Iragarkia

14. ALDIZKARIA - 2017ko urtarrilaren 20a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

1542/2016 EBAZPENA, abenduaren 30ekoa, Landa Garapeneko, Nekazaritzako eta Abeltzaintzako zuzendari nagusiak emana, Nafarroako 2014-2020 Landa Garapeneko Programaren barnean, “Nekazaritzaz bestelako jardueretarako enpresak landa eremuetan sortzea” 6.2 azpineurrirako laguntzen 2016ko deialdia eta oinarri arautzaileak onesten dituena.

Nafarroak, bere foru araubideari esker, eskumen osoa du nekazaritza eta abeltzaintza gaietan, ekonomiaren antolamendu orokorrarekin bat, hala ezarrita baitago Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 50.1.a) artikuluan. Bestalde, lege organiko horren 56.1.a) artikuluan ezarritakoaren arabera, eta jarduera ekonomiko orokorraren oinarriekin eta antolamenduarekin bat, Nafarroako Foru Komunitateari dagokio Nafarroaren barnean jarduera ekonomikoa planifikatzeko eta garapen ekonomikoa sustatzeko eskumen osoa.

Landa Garapenerako Europako Nekazaritza Funtsaren (LGENF) bidezko landa garapeneko laguntzei buruzko Europako Parlamentuaren eta Kontseiluaren 2013ko abenduaren 17ko 1305/2013 (EB) Erregelamenduak, Kontseiluaren 1698/2005 (EE) Erregelamendua indargabetzen duenak, 19.1.a).ii) artikuluan, nekazaritzaz bestelako jardueretarako enpresak landa eremuetan sortzeko laguntza ezartzen du.

2014ko urriaren 30ean, Batzordeak eta Espainiak 2014-2020 Elkartzeko Akordioa sinatu zuten, Europar Batasunaren EIE Funtsak erabiltzeari buruz. Gero, 2015eko otsailaren 13an, 2014-2020 Landa Garapenerako Esparru Nazionala onetsi zen, Nekazaritza, Elikadura eta Ingurumen Ministerioak egina.

Batzordearen azaroaren 18ko 8143/2015 Betearazpen Erabakiaren bidez, Europar Batasunaren erakundeek Nafarroako 2014-2020 Landa Garapeneko Programa onetsi zuten. Programaren “Nekazaritza eta enpresa ustiategien garapena” 6. neurrian, “Nekazaritzaz bestelako jardueretarako enpresak landa eremuetan sortzea” 6.2 azpineurria dago.

Nekazaritzaz bestelako jardueretarako enpresak landa eremuetan sortzeko laguntzaren xedea da lan aukera berriak bultzatzea landa lurraldearen ekonomia eta gizartea dinamizatzeko, landa eremuen despopulatzea saihestuz. Horretarako, lehiakortasuna sustatzen da nekazaritzako sektorean, nekazaritzaz bestelako jardueretara dibertsifikatuz.

Nafarroan ugari dira nekazaritzako familia ustiategiak, egitura txikikoak, eta, horren ondorioz, merkatuen bilakaerak eta arau berrien eskakizunek eragin handia dute haietan. Ildo horretatik, negozio-linea berrien bilaketa erraztu behar da, nekazaritzako jarduera osatzeko, urtarokotasuna murriztuz eta sektorearen independentzia handituz.

Aldi berean, enpresa txikiak landa ekonomikoaren bizkarrezurraren parte dira. Enpresen sorkuntza kalitateko enplegua sustatzera eta landa eremuetan nekazaritzaz bestelako sektoreak garatzera bideratu behar da, tokiko sektorearteko loturak bultzatuz. Beraz, enpresen sorkuntzari laguntza eman behar zaio, betiere enpresa plan bat behar bezala gauzatzen bada.

Beraz, neurri honen esparru juridikoa 1305/2013 (EB) Erregelamendua izanen da, Landa Garapenerako Europako Nekazaritza Funtsaren (LGENF) bidez landa garapenari laguntzeari buruzkoa, eta, orobat, hura garatzeko erregelamenduak:

–Batzordearen 2014ko martxoaren 11ko 807/2014 (EB) Erregelamendu Delegatua, 1305/2013 (EB) Erregelamendua osatzen duena.

–Batzordearen 2014ko uztailaren 17ko 808/2014 (EB) Betearazpen Erregelamenduak xedapenak ezartzen ditu aplikatzeko Europako Parlamentuaren eta Kontseiluaren 2013ko abenduaren 17ko 1305/2013 (EB) Erregelamendua, FEADER-Landa Garapenerako Europako Nekazaritza Funtsaren bidezko landa garapenerako laguntzari buruzkoa.

–Batzordearen 2014ko uztailaren 17ko 809/2014 (EB) Betearazpen Erregelamendua, xedapenak ezartzen dituena Europako Parlamentuaren eta Kontseiluaren 1306/2013 (EB) Erregelamendua aplikatzeko, landa garapenerako neurriak kudeatu eta kontrolatzeko sistema integratuari eta baldintzazkotasunari dagokienez.

–Batzordearen martxoaren 31ko 640/2014 (EB) Betearazpen Erregelamendua, Europako Parlamentuaren eta Kontseiluaren 2013/2013 Erregelamendua osatzen duena kudeaketaren eta kontrolaren sistema integratuari dagokionez, ordainketak ukatu edo kentzeko baldintzei dagokienez eta zuzeneko ordainketei, landa garapenerako laguntzari eta baldintzazkotasunari aplika dakizkiekeen zehapen administratiboei dagokienez.

Neurri honi Diru-laguntzei buruzko azaroaren 9ko 11/2005 Foru Legea aplikatzen zaio.

Ebazpen honen aldeko txostena eman du Nafarroako 2014-2020 Landa Garapeneko Programaren kudeaketa agintaritzak.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak eta Landa Garapeneko, Ingurumeneko eta Toki Administrazioko Departamentuaren egitura organikoa ezarri zuen irailaren 21eko 78/2016 Foru Dekretuak eman dizkidaten eskudantziak erabiliz, eta urtarrilaren 23ko 7/2013 Foru Dekretuaren bidez eman dizkidaten ahalmenak baliatuz, izan ere, dekretu horren bidez Nekazaritza Bermatzeko Europako Funtsak (NBEUF) eta Landa Garapenerako Europako Nekazaritza Funtsak (LGENF) finantzaturiko gastuak Nafarroako Foru Komunitatean ordaintzen dituen erakundea baimendu eta haren antolamendua eta funtzionamendua ezarri baitziren,

EBATZI DUT:

1. Nafarroako 2014-2020 Landa Garapeneko Programaren barnean, “Nekazaritzaz bestelako jardueretarako enpresak landa eremuetan sortzea” 6.2 azpineurrirako laguntzen oinarri arautzaileak onestea. Oinarri horiek ebazpen honen I. eranskinean jaso dira.

2. Nekazaritzaz bestelako jardueretarako enpresak landa eremuetan sortzeko laguntzen 2016ko deialdia onestea, betiere Batzordeak 2014-2020 LGPren aldaketa onesten badu.

3. Deialdi honetarako eskaerak aurkezteko epea hilabetekoa izanen da, ebazpen hau Nafarroako Aldizkari Ofizialean argitaratu eta biharamunetik hasita.

4. 306.250,00 euroko gastua baimentzea 2017ko ekitaldirako eta 306.250,00 euroko gastua 2019ko ekitaldirako, Nafarroako Gobernuaren 2016ko Gastuen Aurrekontuetako ‘’Nekazaritzaz bestelako enpresak landa eremuetan sortu eta garatzea. 2014-2020 LGP LGENF’’ izeneko 720007 71720 7709 414200 kontu-sailaren baliokidea den kontu-sailaren kargura, ebazpen honek dakartzan konpromisoei aurre egiteko. Baimendutako gehieneko kreditua handitzen ahalko da laguntzak emateko, aurrekontuetan bidezkoa den aldaketa edo mugimendua onetsi ondoren. Nolanahi ere, diru kopuru gehigarria onesteko, ezinbestekoa izanen da aurrekontuan horretarako diru erabilgarririk izatea.

5. Oinarri arautzaileak Diru-laguntzen Datu Base Nazionalean (BDNS) erregistratzea.

6. Ebazpen hau eta eranskinak Nafarroako Aldizkari Ofizialean argitaratzea.

7. Ebazpen honek ez du administrazio bidea amaitzen, eta interesdunek gora jotzeko errekurtsoa jartzen ahal dute haren kontra, Landa Garapeneko, Ingurumeneko eta Toki Administrazioko kontseilariari zuzendua, argitara eman eta biharamunetik hilabeteko epean.

Iruñean, 2016ko abenduaren 30ean.–Landa Garapeneko, Nekazaritzako eta Abeltzaintzako zuzendari nagusia, Ignacio Gil Jordán.

1. ERANSKINA

Nafarroako 2014-2020 Landa Garapeneko Programaren barnean, “Nekazaritzaz bestelako jardueretarako enpresak landa eremuetan sortzea” 6.2 azpineurrirako laguntzen oinarri arautzaileak

1. oinarria.–Neurri hau aplikatzeko xedea, eremua eta baldintza orokorrak.

1. Nafarroako Landa Garapeneko 2014-2020 Programako “Nekazaritzaz bestelako jardueretarako enpresak landa eremuetan sortzea” 6.2 azpineurrirako laguntzak arautzea dute xede oinarri hauek, honako hauek ezartzen duten esparruan: batetik, Europako Parlamentuaren eta Kontseiluaren 2013ko abenduaren 17ko 1305/2013 (EB) Erregelamenduaren 19.1.a).ii) artikulua (erregelamendu horrek landa garapenerako laguntza arautu zuen, Landa Garapenerako Europako Nekazaritza Funtsaren (LGENF) bidez ematen dena, eta indarrik gabe utzi zuen Kontseiluaren 1698/2005 (EE) Erregelamendua), eta bestetik, Batzordearen 2014ko ekainaren 25eko 702/2014 Erregelamenduaren 45. artikulua (erregelamendu horrek barne merkatuarekin bateragarriak diren zenbait laguntza kategoria deklaratzen ditu, Europar Batasunaren Funtzionamenduari buruzko Tratatuaren 107. eta 108. artikuluak aplikatuta).

2. Nekazaritzaz bestelako jardueretarako enpresak landa eremuetan sortzeko laguntzaren xedea da lan aukera berriak bultzatzea landa lurraldearen ekonomia eta gizartea dinamizatzeko, landa eremuen despopulatzea saihestuz. Horretarako, nekazaritzako ustiategien dibertsifikazioa sustatzen da, nekazaritzaz bestelako jarduerak egiten dituzten eta enplegua sortu eta mantentzen duten enpresak sortuz.

2. oinarria.–Lurralde eremua.

1. Nafarroako Foru Komunitateko landa eremuetan sortutako enpresei aplikatzen ahal zaie laguntza. Ondorio horietarako, landa eremutzat joko dira Nafarroako 2014-2020 Landa Garapeneko Programaren ezarritakoak, hau da, DEGURBA sailkapenak landa eremutzat eta dentsitate ertaineko eremutzat jotzen dituenak.

2. Horrenbestez, ez dira diru-laguntza honen xedea hiri eremu zabaletan sortutako enpresak. Nafarroako 2014-2020 Landa Garapeneko Programan ezarritakoaren arabera, Iruñeko udalerria da hiri eremu zabal bakarra.

3. III. eranskinean jasotzen dira Nafarroako landa eremuko udalerriak, beraien ezaugarri sozio-demografikoekin eta naturako edo ingurumeneko ezaugarriekin batera.

3. oinarria.–Aurreikusitako jarduera motak.

1. Diru-laguntza jasotzeko, nekazaritzaz bestelako ekoizte-jarduerak garatzen dituzten enpresak sortu behar dira, hau da, salduko diren edo merkaturatzen ahal diren ondasun eta/edo zerbitzu pribatuak, edo titulartasun pribatuko ondasunen balioa handitzen dutenak. Horrez gain, enplegua sortu edo mantendu behar dute.

2. Dibertsifikazio jarduerak arlo hauetako batekoak izan behar dira:

a) Ingeniaritzako, arkitekturako, aholkularitzako edo albaitaritzako zerbitzu profesionalak, zerbitzu teknikoak edo bestelakoak.

b) Informazioaren teknologiei, informatikari edo bestelakoei lotutako jarduerak.

c) Jarduera artistikoak eta/edo artisautzakoak garatzea.

d) Gizarte zerbitzuak ematea.

e) Nekazaritzaz bestelako jardueretarako lantegiak, industriak, lokalak edo instalazioak ezartzea.

f) Produktuak eraldatzea eta merkaturatzea, ondoriozko produktua Europar Batasunaren Funtzionamenduari buruzko Tratatuaren I. eranskinean agertzen ez bada.

g) Edozein sektore ekonomikotarako zerbitzuak ematea, nekazaritza eta basogintza barne, edo landa eremuko populaziorako zerbitzuak.

h) Nekazaritza-turismoko, landa turismoko, aisialdiko edo ostalaritzako jarduerak, jolas edo kirol jarduerak, edo lurralde garapen ekonomikoari lotutakoak.

i) Landa Garapeneko, Ingurumeneko eta Toki Administrazioko Departamentuak laguntzaren helburua betetzeko hautagarritzat jotzen dituen beste eragiketa batzuk.

4. oinarria.–Laguntzen xede diren pertsonak.

Pertsona fisiko hauek izan daitezke laguntzen onuradun:

a) Nafarroako Nekazaritzako Ustiategien Erregistroan inskribatutako nekazari profesionalak.

b) a) atalean sartutako pertsonen lehen graduko ahaideak.

5. oinarria.–Laguntza jasotzeko baldintzak.

1. Laguntzen araubidean sartzeko, eskatzaileek ondoko baldintza hauek bete behar dituzte:

a) Eskaera egiten denean 18 urte beteak izatea.

b) Nekazari profesional titularra izatea, edo Nafarroako Nekazaritzako Ustiategien Erregistroan inskribatutako ustiategi baten bazkidea, edo pertsona horren lehen graduko ahaidea.

Nekazari gazteak nekazari profesionaltzat hartzeko, “Nekazari gazteak beren gain jartzea” neurrirako laguntza emateko ebazpena izan behar dute eta/edo Nafarroako Nekazaritzako Ustiategien Erregistroan ogibide nagusia nekazaritza duen nekazari gisa inskribaturik egon.

Ustiategia mikroenpresa edo enpresa txikia izan behar da, Mikroenpresen, enpresa txikien eta enpresa ertainen definizioari buruz Batzordeak emandako 2003/361/EE Gomendioan ezarritakoaren arabera.

c) Aurreko urte naturalean eta eskaeraren egunaren arte nekazaritzako ustiategian lan egin duten pertsona guztien gaineko aitorpena aurkeztea.

d) Laguntzaren aurreko deialdietako onuraduna ez izatea.

e) Familia unitateko kideek jarduera bera edo antzeko bat hasi ez izana deialdi hau argitaratu baino lehen.

f) Zerga betebeharrak eta Gizarte Segurantzarekikoak egunean izatea.

g) Diru-laguntzei buruzko azaroaren 9ko 11/2005 Foru Legearen 13.2 artikuluan laguntzen onuradun izateko ezarritako debeku-egoeretan ez egotea.

2. Gainera, enpresa sortzeko prozesuari dagokionez, honako betebehar hauek bete beharko dira:

a) Jarduera Nafarroako 2014-2020 Landa Garapeneko Programak landa eremutzat jotzen dituen udalerrietako batean egitea.

b) Nafarroako Gobernuaren adostasuna izatea proiektuak ukitzen dituen eremuei dagokienez. Honelako jarduerei lotutako proiektuen kasuan:

–Turismo, ostatu zerbitzuak, aisialdia, jolasaldia eta antzekoak: Garapen Ekonomikorako Departamentuaren aldeko txostena.

–Landa eta kultur ondarea, eta antzekoak: Kultura, Kirol eta Gazteria Departamentuaren aldeko txostena.

–Proiektuaren motagatik behar den beste edozein txosten.

Hala bada, ingurumen eraginaren balorazioa egin beharko da, Ingurumen Babesteko Esku-hartzeari buruzko 4/2005 Foru Legearen arabera, ingurumenean eta biodibertsitatean ondorio kaltegarriak baditu.

Nolanahi ere, unitate arduradunek erabakitzen dituzten neurri zuzentzaileak aplikatuko dira, halakorik bada.

c) Deskripzio memoria aurkeztea, Nafarroako Gobernuaren Interneteko atariko izapideen katalogoan laguntza hauen fitxan dagoen ereduaren arabera.

d) Enpresa plana aurkeztea, 6. oinarriaren arabera.

6. oinarria.–Enpresa plana.

1. Pertsona eskatzaileak, laguntza eskaerarekin batera, jarduera berrirako enpresa plana aurkeztu behar du, jarduera identifikatu, deskribatu eta aztertzeko, bere bideragarritasun tekniko, ekonomiko eta finantzarioa frogatzeko, eta enpresa sortzeko behar diren prozedura eta estrategia guztiak garatzeko.

2. Honako eduki hau izanen du gutxienez:

a) Pertsona sustatzailearen eta enpresaren deskribapena.

b) Jarduera: helburu nagusia, deskribapena eta ezaugarriak, kokalekua, hasierako egoera eta bukaerako egoera epe laburrera, ertainera eta luzera. Araudi aplikagarriaren xehetasunak eta betetzen dela justifikatzea.

c) Mugarriak eta helburuak, definitutako adierazle neurgarrien bidez. Jardueraren helburu gisa hiru urteko eperako planteatzen den azken egoeraren deskribapena.

d) Gauzatze plana: jarduera abian jartzeko egutegia eta faseen xehakapena.

e) Produktuak/Zerbitzuak: deskribapena, betetzen dituen beharrak eta merkatuan dauden beste batzuen aldean dituen abantailak.

f) Produkzio plana: produkzio prozesuaren edo zerbitzuaren deskribapena, kontrol sistemak eta kalitate kudeaketa, erabilitako teknologia, instalazioak eta makinak, eta hornitzaileak.

g) Merkatu azterketa: sektorearen azterketa orokorra, merkatuaren mugapena, bezerogaiak, lehiakideen azterketa, ahuleziak, mehatxuak, indarrak eta aukerak.

h) Marketin plana: kokapena eta merkatu helburua, prezioen estrategia, salmenten politika, sustapena eta publizitatea, banaketa-eskema eta saldu ondoko zerbitzuak eta garantia.

i) Antolaketa eta langileria: jarduerak sortzen dituen lanpostuen azterketa, lan kategoria, egin beharreko zereginak eta prestakuntza plana.

j) Inbertsio plana: ibilgetu materiala, ukiezina eta finantzarioa, edo beste inbertsio batzuk.

k) Plan ekonomiko eta finantzarioa: finantzaketa plana, behin-behineko emaitzen kontua, behin-behineko balantzea, diruzaintza plana eta emaitza ekonomiko-finantzarioen azterketa eta balorazioa. Agerian utzi behar du hiru urterako deskribatutako azken emaitza lortzeko aukera, jardueraren bideragarritasuna bermatu behar duena.

3. Planaren informazioak eta deskripzio memoriarenak bat egin behar dute.

7. oinarria.–Konpromisoak eta betebeharrak.

1. Oro har, onuradunek konpromiso hauek hartzen dituzte:

b) Enpresa plana gauzatzea aplikatzen ahal zaizkion Europar Batasuneko, Espainiako eta tokiko arauekin bat, batez ere, honako arlo hauen gaineko arauei jarraikiz: bateraezintasuna, estatuko laguntzak, publizitatea, ingurumenaren babesa eta aukera-berdintasuna.

b) Enpresa plana laguntza ematen denetik hurrengo bederatzi hilabetean hastea.

c) Enpresa plana gauzatzea diru-laguntza emateko ebazpenean adierazten den epean, deusetan galarazi gabe onartzen ahal diren luzapenak.

d) Pertsona edo entitate ekintzaileen erregistroan inskribatzea, apirilaren 11ko 127/2013 Foru Aginduaren arabera. Foru agindu horren bidez, pertsona edo entitate ekintzaileen erregistroa sortu, eta bertan inskribatzeko prozedura arautzen da.

e) Diru-laguntzaren kobrantza erregistratzea kontabilitatean edo erregistro liburuan, Europar Batasunaren (LGENF) eta Nafarroako Gobernuaren partaidetza adierazita, testu honen bidez: 2014-2020 LGP (LGENF-NG).

f) ede berarekin eskatu edo jaso diren bestelako diru-laguntzen berri ematea.

g) Laguntza eskaera aurkezten den unean, azken hiru zergaldietan jasotako diru-laguntzen berri ematea, de minimis araubidea bete den egiaztatzeko.

h) Bost urtez mantentzea laguntzaren xedeko jarduera, diru-laguntzaren azken ordainketaren ebazpenaren egunetik hasita, ezinbesteko kasuetan izan ezik.

i) Jendeari eragiketaren helburuaren berri eta LGENFek emandako laguntzaren berri ematea, 21. oinarrian ezarritako errekerimenduak betez.

j) Landa Garapeneko, Ingurumeneko eta Toki Administrazioko Departamentuari jakinaraztea azpineurriaren ebaluaziorako eta jarraipenerako adierazleak prestatzeko behar diren datuak.

k) Laguntza ongi eman dela eta gerora konpromisoei eutsi zaiela egiaztatzeko behar diren kontrolak eta egiaztapenak onartzea. Egiaztapen lan horiek Europako Batzordeak, FEAGA-LGENF laguntzen erakunde ordaintzaileak, Nafarroako Landa Garapenerako 2014-2020 Plana kudeatzeko agintaritzak, Estatuko Administrazioaren Kontu-hartze Orokorrak, Kontuen Auzitegiak, Nafarroako Kontuen Ganberak eta Nafarroako Gobernuaren organo fiskalizatzaileek egin ditzakete.

l) Nafarroako Landa Garapenerako 2014-2020 Plana kudeatzeko agintaritzak finkatzen duen beste edozein.

2. Enpresa plana gauzatzeari dagokionez, onuradunek konpromisoa hartzen dute enpresa plana 6. eta 15. oinarrietan ezarritakoaren arabera gauzatzeko.

8. oinarria.–Laguntzaren zenbatekoa.

1. Laguntza prima bakarrekoa da, eta bi ordainketa berdinetan pagatzen da. Enpresa plana hasi ondoren egin daiteke lehenbiziko ordainketa, eta enpresa plana behar bezala gauzatu ondoren egin daiteke bigarrena.

2. Laguntzaren zenbatekoa 37.275,70 eurokoa da.

9. oinarria.–Diru-laguntzak emateko modua eta hautatzeko irizpideak.

1. Norgehiagokako prozedurari jarraikiz emanen da laguntza, aurkeztutako eskaerak alderatuta, haien arteko hurrenkera ezartzeko.

3. Laguntza hartu ahal izateko gutxienez ere 14 puntu lortu behar dira. Hortik beherako puntuazioa lortzen duten eskaerak ezetsiko dira.

4. Berdinketa gertatuz gero, ingurumeneko alderdietan puntuaziorik altuena duen eskaerak lehenetsiko da. Berdinketak badirau, eskatzailearen izaeran puntuazio altuena lortzen duen eskaera lehenetsiko da. Hala ere berdinketak badirau, sortu beharreko jardueraren kokalekuan puntuazio altuena duena lehenetsiko da. Azkenik, berdinketak jarraitzen badu, “Kalitate deiturei eta/edo sektoreko elkarteei atxikitzea” atalean puntuaziorik altuena duen eskaera lehenetsiko da.

5. Deialdirako dagoen aurrekontu-kreditua nahikoa ez bada laguntzarako eskubidea duten eskaera guztiei diru-laguntza emateko, ezetsi eginen dira aurrekontuan zuzkidura nahikoa ez izateagatik aintzat hartu ezin direnak.

6. Deialdian finkatutako gehieneko kreditua gainditzeagatik, eskaera batek legokiokeen laguntzaren zati bat bakarrik jaso baldin badezake, eskubidea izanen du dagokion kopurua jasotzeko, aurrekontu-kontsignazioaren mugaraino. Dena dela, beste pertsona onuradunen batek diru-laguntza kobratzeko eskubidea galtzen badu, laguntza osatuko zaio, aurrekontu-kontsignazio aski egon izan balitz egokituko zitzaiokeen kopurua berdindu arte.

10. oinarria.–Laguntza eskaerak eta eskatutako dokumentazioa aurkeztea.

1. Eskaerak aurkezteko epea hilabetekoa izanen da, deialdia Nafarroako Aldizkari Ofizialean argitaratu eta biharamunetik hasita.

2. Eskaerak telematika bidez aurkeztu behar dira nahitaez, Nafarroako Gobernuak Interneten duen Atariaren (www.nafarroa.eus) izapideen katalogoko fitxa erabiliz. Tramitea egiteko, eskatzailea egiaz bera dela egiaztatu behar da, bere ziurtagiri digitalaren bidez edo IFZ+PIN erabilita.

Behar diren baliabideak ez dituzten edo aholkularitza behar duten eskatzaileei tramitazioa errazteko, Nafarroako Gobernuak erabiltzaileentzako arretaguneak jarriko ditu, eta izapideen katalogoaren fitxan behar bezala iragarriko.

3. Laguntza eskaera 2. eranskinean adierazitako agiriekin batera aurkeztu behar da (dokumentuak eskaneatuta, bereizita eta behar bezala identifikatuta egonen dira).

4. Laguntza eskaera bakarra aukez daiteke deialdiko.

11. oinarria.–Instrukzio organoa.

Neurri honetan aurreikusitako laguntzak emateko prozeduren instrukzioa Landa Garapeneko, Nekazaritzako eta Abeltzaintzako Zuzendaritza Nagusiko Landa Aniztasunerako eta Garapenerako Zerbitzuari atxikitako Landa Aniztasunerako Atalari dagokio.

12. oinarria.–Laguntza eskaerak egiaztatu eta balidatzea.

1. Landa Aniztasunerako Atalak laguntza eskaerak jasotakoan, eskatzen den dokumentazio guztia duten egiaztatuko da. Akatsen bat baldin badago, laguntza eskatzen duen pertsonari eskatuko zaio 15 egun naturaleko epean zuzendu dezala, eta adieraziko zaio, zuzendu ezean, eskaerari uko egiten diola ondorioztatuko dela eta espedientea artxibatzeko ebazpena emanen dela.

2. Dokumentazioa oso-osorik dagoenean, behar diren kontrolak eginen dira, eskatzen diren baldintzak betetzen diren egiaztatzearren.

3. Landa Aniztasunerako Atalak espedientea behar bezala tramitatzeko beharrezkotzat jotzen duen edozein argibide edo dokumentazio eskatzen ahalko du.

13. oinarria.–Laguntza emateko ebazpena.

1. Eskaerak balidatu eta ebaluatu ondoren, haien lehentasun ordena ezarriko da 9. oinarrian ezarritako irizpideen arabera.

Ebaluazioa ikusirik, ebazpen proposamena eginen da, non jasoko baita pertsona onuradunek diru-laguntza eskuratzeko behar diren baldintza guztiak betetzen dituztela.

2. Laguntzaren lehenbiziko ordainketa %50ekoa izanen da, eta bigarrenean gainerako %50ekoa ordainduko da, deialdian adierazitako ekitaldietako aurrekontuaren kargura.

3. Ebazpen proposamena ikusirik, Landa Garapeneko, Nekazaritzako eta Abeltzaintzako zuzendari nagusiak diru-laguntzen gaineko ebazpena emanen du, gehienez ere hiru hilabeteko epean, eskaerak aurkezteko epea bukatzen denetik hasita.

Epe hori berariazko ebazpenik eman gabe bukatzen bada, eskaera ezetsitzat joko da.

Aurkeztutako eskaeraren berariazko edo presuntziozko ezespenaren aurka interesdunek gora jotzeko errekurtsoa jartzen ahalko dute, Landa Garapeneko, Ingurumeneko eta Toki Administrazioko kontseilariari zuzendua, administrazio prozedura erkideari buruzko legeriari jarraikiz.

4. Ebazpenean, gutxienez, datu hauek agertuko dira: laguntza eman zaien eskatzaileen zerrenda, laguntzaren zenbatekoa, jarduera berriaren sorkuntza gauzatzeko eta justifikatzeko epeak eta laguntza finantzatzeko funtsen jatorria. Eskaerarik ezetsiz gero, horiek ere espresuki agertuko dira eta, horien artean, aurrekontu-baliabideen esleipena mugatzearen ondorioz ezetsitakoak.

14. oinarria.–Diru-laguntza emateko ebazpenaren aldaketak.

1. Laguntza emateko ebazpenean ezartzen den epean eta moduan gauzatu behar da enpresa plana. Hala ere, aurkeztutako enpresa planaren aldaketa nabarmenak dakartzaten inguruabarrak gertatzen direnean, pertsona onuradunak horren berri eman behar du, aldaketak aplikatu baino lehen aldaketa eskaera bat aurkeztuz.

2. Aldaketa nabarmen horiek gauzatu ahal izateko, Landa Aniztasunerako Atalaren baimena behar da. Aldaketa baimentzen ez bada, hasierako enpresa plana bete beharko da.

3. Aldaketa nabarmentzat hartuko da ondorio hauetako bat duena:

a) Egin beharreko jarduera ekonomikoa aldatzea.

b) Enpresa planaren funtsezko baldintza tekniko edo ekonomikoak aldatzea.

c) Enpresa plana gauzatzeko epea luzatzea.

4. Aldaketa eskaerak pertsona onuradunak enpresa planean egin nahi dituen aldaketak azaldu behar ditu, laguntza eskaeran erabilitako zehaztasun maila berarekin, eta enpresa plan berriaren bideragarritasuna bermatu behar da. Aldaketa aplikatu baino lehen egin behar da eskaera.

5. Laguntzak esleitzeko emandako puntuazioa gutxitzea dakarten aldaketak ez dira inola ere onartuko, ez eta gauzatze epea luzatzeko eskaerak ere, baldin eta, laguntza zein ekitaldiren kargura ematen den, ekitaldi horretako azaroaren 15etik haratago luzatzea eskatzen bada, salbu eta ezinbesteko kasuetan.

6. Enpresa planaren aldaketa nabarmen bakarra onartuko da.

15. oinarria.–Enpresa planaren epeak eta gauzatzeko baldintzak.

1. Enpresa planaren gauzatzea ebaluatzeko, hala agiri bidezkoak nola bertatik bertara, enpresa planaren mugarri nagusiak eta oinarri honetan adierazitako baldintzak kontrolatuko dira.

2. Enpresa planaren gauzatzeak epe eta baldintza hauek bete behar ditu:

a) Laguntza emateko ebazpenaren egunaren ondoko 9 hilabetean, enpresa planaren hasiera justifikatu behar da. Lehenbiziko ordainketa egin baino lehen, baldintza hauek betetzen direla egiaztatu behar da:

i. Altan egotea jarduera ekonomikoen gaineko zergan, jarduerari dagokion epigrafean, eta egunean izatea zerga horren ordainketan.

ii. Altan egotea Langile autonomoen araubide berezian.

iii. Inskribatuta egotea Pertsona edo entitate ekintzaileen erregistroan.

iv. Hasierako gauzatzearen gaineko memoria aurkeztea: enpresa planaren uneko egoera azaltzen duen agiria. Hasierako enpresa planean izandako aldaketa guztiak bildu behar ditu, eta gauzatzearen frogagiriak erantsi, hala bada.

v. Bestelakoak, jardueraren eta enpresa planean adierazitakoaren arabera.

b) Diru-laguntza eman eta hurrengo urteko urtarrilaren 1etik irailaren 30 arte.

i. Tarteko gauzatzearen gaineko memoria aurkeztea: enpresa planaren uneko egoera azaltzen duen agiria. Hasierako enpresa planean izandako aldaketa guztiak bildu behar ditu, eta gauzatzearen frogagiriak erantsi, hala bada.

c) Azken ordainketa eginen den aurrekontu ekitaldiari dagokion urteko urtarrilaren 1etik ekainaren 30a bitarte, enpresa plana behar bezala gauzatu dela justifikatu behar da. Azken ordainketa egin baino lehen, baldintza hauek betetzen direla egiaztatu behar da:

i. Azken ekitaldian gutxienez 6.000 euroko urteko diru-sarrerak izatea sortutako jardueratik.

ii. Nekazaritzako ustiategiaren eta sortutako jardueraren arteko lanpostuen kopuru osoa ezin da hasierako egoerakoa baino txikiagoa izan.

iii. Egunean izatea jarduera ekonomikoen gaineko zergaren ordainketan, jarduerari dagokion epigrafean.

iv. Altan egotea Langile autonomoen araubide berezian.

v. Inskribatuta egotea Pertsona edo entitate ekintzaileen erregistroan.

vi. Azken gauzatzearen gaineko memoria aurkeztea: agiriak enpresa plana behar bezala gauzatu dela azalduko du, eta sortutako jardueraren uneko egoera, haren kudeaketa eta ingurunearekiko lotura deskribatuko ditu.

vii. Bestelakoak, jardueraren eta enpresa planean adierazitakoaren arabera.

3. Horren ondorioetarako, onuradunak ebaluazio horren unitate arduradunarekin kolaboratu beharko du, eskatzen zaion informazio eta dokumentazio guztia aurreikusitako epeetan emanez eta jarduera gauzatzen den tokira egiten diren bisitetan lagunduz.

16. oinarria.–Ordainketa eskaera.

1. Urte bakoitzari dagokion laguntza jasotzeko, pertsona onuradunak ordainketa eskaera aurkeztu behar du, 4. eranskinean adierazitako agiriekin batera, epe hauetan:

a) Ordainketa partzialaren eskaera: laguntza ematen duen ebazpenaren egunaren ondoko hurrengo 9 hilabetean.

b) Azken ordainketaren eskaera: azken ordainketa eginen den aurrekontu ekitaldiari dagokion urteko ekainaren 30ean beranduenez.

2. Ordainketa eskaera aurkezten ez bada laguntza emateko ebazpenean ezartzen diren egunen aurretik, ondorioztatuko da berariaz uko egiten diola emandako laguntzari, deusetan galarazi gabe Diru-laguntzei buruzko 11/2005 Foru Legearen 35. artikuluan ezarritakoari jarraikiz bidezko diren erantzukizunak.

3. Landa Aniztasunerako Atalak espedientea behar bezala tramitatzeko beharrezkotzat jotzen duen edozein argibide edo dokumentazio eskatzen ahalko du.

17. oinarria.–Beste laguntza batzuekiko bateragarritasuna.

1. Deialdi honetako diru-laguntzak bateraezinak dira 1305/2013 (EB) Erregelamenduaren 59.8 artikuluaren arabera Europako funtsekin finantzatuta helburu bererako ematen den beste edozeinekin.

2. Deialdi honetako diru-laguntzak bateraezinak dira gainerako diru-laguntzekin, kasuan kasuko araudiak kontrakoa ezartzen ez badu, deusetan galarazi gabe de minimis araubidearen babespeko beste laguntza batzuen konkurrentziari buruz ezarrita dagoena.

3. Laguntza hauen pertsona onuradunek, ordainketa eskaerarekin batera aurkeztu beharreko zinpeko aitorpenaren bidez, justifikatuko dute xede eta helburu bererako beste laguntzarik eskatu duten edo ez, betiere Batasuneko, Espainiako eta Nafarroako araudian eta Nafarroako Foru Komunitateko Landa Garapenerako 2014-2020 Programan ezarritakoaren arabera. Beste laguntzarik jaso badute, dokumentu horretan idatziko dute zein entitatek eman zien eta/edo laguntzaren zenbatekoa.

18. oinarria.–Ordaintzeko ebazpena.

1. Landa Aniztasunerako Atalak behar adina kontrol eginen ditu, egiaztatzeko onuradunak konpromisoak betetzen dituela eta enpresa plana egoki gauzatzen ari dela. Kontrolen emaitzak ikusirik, laguntza ordaintzeko ebazpen proposamena prestatuko du.

2. Landa Garapeneko, Nekazaritzako eta Abeltzaintzako Zuzendaritza Nagusiak laguntza emateko edo ukatzeko ebazpena emanen du. Ebazpen hori arrazoitua izan behar da, eta oinarriak egiaztatuak egonen dira. Laguntzaren onuradunak jaso behar dira bertan. Administrazio egintza hori pertsona onuradunari igorriko zaio, eta, bidezkoa bada, laguntzaren ordainketa haren banku-kontuan eginen da.

19. oinarria.–Ez-betetzeen mailakatzea, murrizketak eta salbuespenak.

1. Ezarritako konpromiso eta betebeharrak betetzen ez badira, laguntza egokitu edo laguntza osoa itzuli beharko da. Ez-betetzea nolakoa den, laguntza honenbeste murriztu edo itzuli beharko da:

a) Jarduera berria gauzatzen ez bada Europar Batasuneko, Espainiako eta tokiko araudiaren arabera: %100.

b) Enpresa plana laguntza ematen denetik hurrengo bederatzi hilabetean hasten ez bada: %100.

c) Enpresa plana gauzatzen ez bada laguntza emateko ebazpenean ezarritako epean edo onartzen diren luzapenen barrenean: %100.

d) Hautatzeko irizpideen puntuazioa aldatzea, atal jakin batzuetan (jardueraren kokalekua, jarduera berriaren sektoreko elkarte espezifikoen bazkidea eta azpiproduktuak lehengai gisa erabiltzea), horren ondorioz onuradun izaera galtzea ekarriko zukeena: %100.

e) Jarduera bertan behera uztea: %100.

f) Porrota: %100.

g) Kudeaketa agintaritzak egiten dituen kontrolak onartzen ez badira: %100.

f) Segimendu eta ebaluazioari buruzko datuak jakinarazten ez bazaizkio kudeaketa agintaritzari: %25.

i) Publizitatearen gainean ezarritakoa betetzen ez bada: %25. Ez-betetze hori errepikatzen bada: %50.

j) Gainerako betebeharrak betetzen ez badira: %10.

2. Ezinbesteko kasu edo salbuespenezko inguruabar hauetako bat gertatzen denean, ez da ondorioztatuko konpromisoak ez direla bete, betiere pertsona onuradunak edo haren eskubidedunak idatziz jakinarazten badu eta behar diren probak eransten baditu:

a) Onuraduna hiltzea.

b) Onuradunak lanerako ezintasun luzea izatea.

c) Hondamendi natural larria.

d) Jardueraren eraikinen eta/edo instalazioen suntsipena, istripuz.

e) Enpresa osoa edo haren zati handi bat desjabetzea, baldin eta eskaera aurkeztu zenean ezin bazen desjabetzea aurreikusi.

3. Egiaztatzen bada pertsona onuradunak gezurrezko adierazpen bat egin duela nahita, emandako laguntza bertan behera utziko da eta ordaindutako zenbateko guztiak berreskuratuko dira. Gainera, onuraduna neurri horretarako laguntzetatik bazterturik geldituko da, ekitaldi horretan eta hurrengoan, deusetan galarazi gabe Diru-laguntzei buruzko azaroaren 9ko 11/2005 Foru Legean ezarritako zehapenak edo adierazpen hori aurkezteko unean iruzurraren kontrako borrokarako indarrean dagoen arauditik datozenak.

4. Artikulu honen 1. eta 2. zenbakietako xedapenak aplikatuko dira, baita NBEFren zirkularretan landa garapenerako laguntzen murrizketak eta bazterketak aplikatzeko irizpideei buruz ezarrita dagoena ere.

20. oinarria.–Itzulketak, arau-hausteak eta zehapenak.

1. Europar Batasuneko araudian xedatutakoa galarazi gabe, itzulketak, arau-hausteak eta administrazio zehapenak Diru-laguntzei buruzko azaroaren 9ko 11/2005 Foru Legean xedatutakoarekin bat etorriko dira.

2. Arau-hausteak finkatzeko eta zehapenak ezartzeko prozedura Administrazio Publikoen Administrazio Prozedura Erkideari buruzko urriaren 1eko 39/2015 Legean ezarritakoaren araberakoa izanen da.

21. oinarria.–Publizitatea.

1. Oinarri arautzaile hauen esparruan ematen diren laguntzen publizitateari dagokionez, Nafarroako 2014-2020 Landa Garapeneko Programan eta Europar Batasuneko, Espainiako eta eskualdeetako arauetan ezarritakoari jarraikiko zaio. Horretarako, pertsona onuradunek Batasunaren laguntza finantzarioaren berri eman beharko dute;

a) Informazio eta komunikazio jarduera guztietan.

b) Pertsona onuradunaren erabilera profesionalerako webgunean, baldin eta loturaren bat ezarri baldin badaiteke webgunearen xedearen eta eragiketari emandako laguntzaren artean.

Informazio hau agerraraziko da: jarduera berriaren azalpen laburra; Batasunaren ikurra, web-orri honetan dauden arau grafikoekin bat: http://europa.eu/european-union/about-eu/symbols/flag_es Ikurraren ondoan, Batasunaren eginkizunaren azalpena agertuko da, “Landa Garapenerako Europako Nekazaritza Funtsa: Europak landa eremuetan inbertitzen du” testuaren bidez, eta Nafarroako Gobernuaren logotipoa.

2. Oinarri arautzaile honen babesean ematen diren diru-laguntzak jendaurrean jarriko dira, 1306/2013 (EB) Erregelamenduaren 111. artikuluan xedatutakoarekin bat.

2. ERANSKINA

Laguntza eskaerarekin batera aurkeztu beharreko dokumentazioa

Laguntzaren eskaerari agiri hauek erantsi behar zaizkio:

1. IFZ.

2. Familia liburua.

3. Nekazaritzako ustiategiaren titularraren edo bazkideen baimena.

4. Nekazaritzako ustiategiaren ETEren deklarazioa.

5. Nekazaritzako ustiategiaren lanpostu kopuru osoaren gaineko deklarazioa.

6. Deskripzio memoria, Nafarroako Gobernuaren Interneteko atariko izapideen katalogoan dagoen ereduaren arabera.

7. Enpresa plana.

8. Jarduerak ukituko dituen esparruetako erakunde eskudunen txostena.

9. De minimis adierazpena.

10. Lan bizitza.

11. Ordainketa transferentzia bidez jasotzeko eskaera.

12. Sortu beharreko jardueraren sektoreko elkarte espezifikoen bazkidea dela frogatzen duen agiria.

Espedientearen tramitazioan beste agiri batzuk eska daitezke, sortu beharreko jardueraren eta aurkeztutako enpresa planaren arabera.

Pertsona eskatzaileren batek Landa Aniztasunerako Atalari baimenik ematen ez badio eskaeran adierazitako datuen artetik laguntza tramitatu eta ebazteko beharrezkoak direnak egiaztatzeko Nafarroako Gobernuko edo beste Administrazio Publiko batzuetako organoen bitartez, behar den dokumentazioa erantsi beharko du.

4. ERANSKINA

Ordainketa eskaerekin batera aurkeztu beharreko dokumentazioa

Ordainketa partzialaren eskaerari agiri hauek erantsi behar zaizkio:

1. Alta jarduera ekonomikoen gaineko zergan eta ordainagiria.

2. Alta Langile autonomoen araubide berezian eta ordainagiria.

3. Hasierako gauzatze memoria, Nafarroako Gobernuaren Interneteko atariko izapideen katalogoan dagoen ereduaren arabera.

4. Bestelakoak, jardueraren eta enpresa planean eta laguntza emateko ebazpenean adierazitakoaren arabera.

Tarteko gauzatze memoria ez dago lotuta ordainketa eskaera bati, eta ezarritako epeetan aurkeztu behar da. Nafarroako Gobernuaren Interneteko atariko izapideen katalogoan dagoen eredua erabili behar da. Eskaerari behar diren agiriak eransten ahal zaizkio enpresa planaren gauzatutako zatia justifikatzeko.

Azken ordainketaren eskaerari agiri hauek erantsi behar zaizkio:

1. Azken ekitaldian sortutako jardueraren ondoriozko urteko diru-sarreren frogagiriak.

2. Nekazaritzako ustiategiaren eta sortutako jarduera berriaren artean dauden lanpostu kopuru osoaren gaineko deklarazioa.

3. Jarduera ekonomikoen gaineko zergaren azken ordainagiria.

4. Langile autonomoen araubide bereziaren azken ordainagiria.

5. Ordainketa partzialaren kobrantza kontabilitatean edo erregistro liburuan erregistratzearen frogagiria, Europar Batasunaren (LGENF) eta Nafarroako Gobernuaren partaidetza adierazita, testu honen bidez: 2014-2020 LGP (LGENF-NG)

6. Azken gauzatze memoria, Nafarroako Gobernuaren Interneteko atariko izapideen katalogoan dagoen ereduaren arabera.

7. Hautatzeko irizpide hauek betetzen direla justifikatzeko agiriak, laguntza eskaerak horiengatik puntuak jaso baditu:

i. Jarduera berriaren sektoreko elkarte espezifikoen bazkidea.

ii. Azpiproduktuak lehengai gisa erabiltzen dituen jarduera.

8. Bestelakoak, jardueraren eta enpresa planean eta laguntza emateko ebazpenean adierazitakoaren arabera.

Pertsona eskatzaileren batek Landa Aniztasunerako Atalari baimenik ematen ez badio eskabide-orrietan adierazitako datuen artetik laguntza tramitatu eta ebazteko beharrezkoak direnak egiaztatzeko Nafarroako Gobernuko edo beste Administrazio Publiko batzuetako organoen bitartez, behar den dokumentazioa erantsi beharko du.

Iragarkiaren kodea: F1700148