Iragarkia

13. ALDIZKARIA - 2017ko urtarrilaren 19a

2. NAFARROAKO TOKI ADMINISTRAZIOA

2.1. OPOSIZIOAK ETA LEHIAKETAK. LAN PUBLIKOAREN ESKAINTZA

ESTERIBAR

Deialdia, zerbitzu anitzetako arduradun izateko lanpostu bat, euskaraz jakin beharrekoa, oposizio-lehiaketaren bidez aldi baterako betetzeko

Alkatetzaren abenduaren 16ko 377/2016 Ebazpenaren bidez deialdia onetsi da, Esteribarko Udalean zerbitzu anitzetako arduradun izateko lanpostu bat, euskaraz jakin beharrekoa, oposizio-lehiaketaren bidez aldi baterako betetzeko.

Hautapen prozesua honako hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsia, aipatutako estatutua garatu eta gauzatzeko Sarrera Erregelamendua, gainerako aplikazio arauak eta deialdi honen oinarriak.

Esteribarren, 2016ko abenduaren 16an.–Alkatea, Mikel Gastesi Zabaleta.

OINARRIAK

1. oinarria.–Arau orokorrak.

1.1. Deialdi honen xedea da Esteribarko Udalean zerbitzu anitzetako arduradun izateko lanpostu bat, euskaraz jakin beharrekoa, oposizio-lehiaketaren bidez betetzea.

1.2. Kontratuak administrazio izaera izanen du, eta lanpostua behin betiko bete arte edo lanpostua amortizatu arte iraunen du.

Kontratuak bi hilabeteko probaldia izanen du. Hori iraganik eta, organo eskudunaren iritziz, eman zaizkion egitekoak betetzeko gai ez bada, kontratua deuseztatutzat joko da.

1.3. Nafarroako Administrazio Publikoen Zerbitzuko Langileen Estatutuaren Testu Bateginean eta Lansarien Behin-behineko Erregelamenduan C mailari dagokion lansaria izanen du lanpostuak, eta Udaleko plantilla organikoan jasotzen diren osagarriak, eta Gizarte Segurantzaren Araubide Orokorrean alta emanen zaio.

1.4. Lanaldi osoa bete beharko da eta zerbitzuaren beharretara egokituko da, eta administrazio organo eskudunek noiznahi aldatzen ahalko dute.

1.5. Lanpostuak euskarazko nahitaezko hizkuntza eskakizun hau du: ahozko maila B2 eta idatzizkoa B1.

1.6. Deialdi honen ondorioz izendatzen den lagunak bere mailari eta kategoriari eta deialdian eskatzen diren ikasketei dagozkien eginkizun eta lanak eginen ditu, zehatz-mehatz, hauek:

–Zerbitzu anitzetako lan taldearen koordinazioa, plangintza eta segimendua, esleitutako giza baliabideen eta baliabide materialen eraginkortasunaren ardura izanen duela. Bere kargu dauden langileen antolaketa eta plangintza.

–Udalaren eraikin, azpiegitura eta berdeguneetan honako lan hauek antolatu eta eginen ditu: igeltserotza, iturgintza, elektrizitatea, uraren tratamendu eta horniduraren kontrola, lorezaintza, pintura, zurgintza eta mantentze-lanak, baita beste arlo batzuetan laguntza emanen ere, beharrezkoa denean.

–Kanpoko zerbitzuekin koordinatzea eta kudeaketa egitea, eta haien lanak koordinatzea, beharrezkoa denean.

–Materialaren edo tresnen erosketa aurreikustea eta egitea, edo zerbitzuak kontratatzea, organo eskudunak ikus-onetsi ondoan, eta erosketa horiek kontrolatzea.

–Lanpostuari lotutako memoria txikiak, idazkiak eta proposamenak egitea.

–Materialaren, tresnen, ibilgailuen eta gainerako makineriaren kontrolaz, inbentarioaz eta mantentze-lanez arduratzea.

–Udalaren azpiegitura, egoitza eta ekipamenduetan ikusten diren akats, matxura eta hausturak kontrolatzea eta horiez arduratzea; eta horiei buruzko proposamen eta aurrekontu zehatzak egitea.

–Segurtasun eta higiene arauak betetzea eta betearaztea, lan bakoitzean erabiltzen diren babes ekipo egokiak behar bezala baliatuta.

–Zerbitzuak hobetu daitezen sustatu eta laguntzea, hobekuntzarako lagungarri izan daitezkeen ekintzak eta aldaketak proposatuz.

–Lanerako ezarritako arau, prozedura eta argibide guztiak ezagutu eta aplikatzea.

–Noizbehinka, egoerari egokitzea, bere lanorduekin malgutasunez jokatuz, ezarritako lan programa eta zerbitzuaren beharrak betetzeko.

–Bide eta eremu publikoak egoera onean ote dauden begiratzea, baita udal eraikinak ere, eta haien mantentze-lan eta/edo hobekuntzarako proposamenak egitea.

–Udal zerbitzuei laguntzeko lanak eta mandatuak kontrolatzea: iragarkiak, bandoak, Udalaren publizitatea banatu eta jartzea, baita bankuak ere, agiriak eramatea, gauzak garraiatzea eta pertsonak leku batetik bestera eramatea.

–Udal mugapearen barreneko zaintza-lanak: trafikoa eta aparkatzea antolatzea, eremu publikoaren okupazioa.

–Udalaren instalazio eta eraikinen, kaleen, bide eta gainerako ondasunen mantentze-lanak eskatzen dituen zereginak, halako espezializazio baten beharrik ez dutenak, baina bai lanbidea nolabait ezagutzea edo hartan trebetasuna izatea.

–Larrialdi eta ezusteko saihestezinetan laguntzea (edo laguntza koordinatzea), ohiko lan ordutegitik kanpo.

–Edozein eratako udal zerbitzuak ematea, eta hala Alkatetzak nola Udalbatzak bere esku uzten dituen beste edozein zeregin; betiere, bere eskumen, maila eta kategoriaren barrenean.

–Ekipoak mantendu eta konpondu edo aldatzeko koordinazio lanetan kultura energetikoa sustatzea eta ingurumen irizpideak aplikatzea, betiere helburu izanik energia kontsumoaren murrizketa eta ingurumeneko baliabideen aprobetxamendu jasangarria.

–Hilero instalazio publikoen energia kontsumoa kontrolatzea (elektrizitatea, gasa, gasolioa, ura) eta hura murrizteko neurriak proposatzea.

–Esteribarko Udalaren edateko ura arazteko instalazioak hilero kontrolatzea.

–Laneko arriskuei aurrea hartzeko kontrol lanez arduratzea.

–Hornidura kontratuak eta obra txikienak kontrolatzea, aurrekontuak aztertzea eta kontratu horiek gauzatzean gastuak kontrolatzea.

–Udalak manatzen dizkion beste guztiak, dagokion kategoriaren barnean sartzen badira, betiere.

–Eta, oro har, Udalak eskatzen dion guztia, bere lanbide trebakuntzaren barnean sartzen bada.

1.7. Lanpostua bete gabe utz dezake epaimahaiak, baldin eta uste badu izangaietatik bakar batek ere ez duela lanpostuan aritzeko behar bezalako jakintza mailarik, gaitasunik eta prestakuntzarik.

2. oinarria.–Izangaiek bete beharreko baldintzak.

2.1. Oposizio-lehiaketa honetan onartuak izateko, izangaiek, eskabideak aurkezteko epea bururatzen den egunean, honako baldintza hauek bete beharko dituzte:

a) Adinez nagusia izatea.

b) Espainiarra izatea edo Europar Batasuneko estaturen batekoa edo, Europako Erkidegoak sinatu eta Espainiako Estatuak berretsitako nazioarteko itunen arabera, langileen joan-etorri askea aplikatzen duen estaturen batekoa.

c) Lanpostua betetzeko gaitasuna ematen duen titulazioa izatea: gutxienez ere Batxilergoko titulua, 2. mailako Lanbide Heziketakoa edo horien baliokidea den titulua, edo eskuratzeko baldintzetan egotea, eskabideak aurkezteko epea bukatzen den egunean. Atzerrian lortutako tituluak badira, homologazioaren egiaztagiria eduki beharko da.

d) Bete behar dituen eginkizunetan aritzeko adinako gaitasun fisiko eta psikikoa izatea.

e) Eginkizun publikoak betetzeko ezgaitua edo gabetua ez izatea, eta inongo administrazio publikoren zerbitzutik bereizia ez izatea.

f) Gidabaimena edukitzea, gutxienez B motakoa.

2.2. Hirugarren oinarrian ezarritakoa izan ezik, arestiko betebeharrak, azterketa gainditu eta lanpostua eskuratzen duen izangaiak frogatu beharko ditu, deialdi honen 9. oinarriak xedatzen duen eran eta epean. Hori guztia bete beharko da eskabideak aurkezteko epea burutzen den egunerako, baita hautapen prozesuan eta kontratazioa egiten den unera arte ere.

3. oinarria.–Eskabideak aurkeztea.

3.1. Deialdian parte hartzeko eskabideak Esteribarko Udaleko Erregistro Orokorrean aurkeztuko dira, 30 egun naturaleko epearen barnean, deialdi hau Nafarroako Aldizkari Ofizialean argitaratu eta biharamunetik hasita. Aipatu eskabideak deialdian argitaratutako I. ereduari lotuko zaizkio, eta horiekin batean agiri hauek aurkeztuko dira:

a) Nortasun Agiri Nazionalaren fotokopia konpultsatua, edo izangaiaren nazionalitatea eta nortasuna frogatzen dituen beste agiri baliokideren batena.

b) Eskatutako tituluaren fotokopia, konpultsatu ahal izateko jatorrizko agiriarekin batera aurkeztuko baita, edo hura eskuratzeko eskubideak ordaindu izanaren gordekinarena.

c) Lehiaketaldian izangaiak baliatu nahi dituen merezimenduen jatorrizko agiriak edo kopia kautotuak.

d) Izangaiaren gidabaimenaren fotokopia; gutxienez B motakoa behar du.

3.2. Minusbaliatuek ariketak egiteko denbora eta baliabide aldetik behar ditzaketen egokitzapenak eskatzen ahalko dituzte, haien beharrik izanez gero. Kasu horretan, eskabidean adierazi beharko dute zein ezintasun duten eta zein egokitzapen eskatzen duten.

3.3. Eskabideak aurkezteko epea luzaezina da.

4. oinarria.–Izangaien onarpena eta erreklamazioak.

4.1. Eskabideak aurkezteko epea bururatutakoan, Esteribarko Udaleko alkateak ebazpena emanen du, onartu eta baztertuen behin-behineko zerrenda onesteko, eta Nafarroako Aldizkari Ofizialean argitaratzeko aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako Aldizkari Ofizialean argitaratzen denetik, erreklamazioak aurkezteko eta, akatsik egin badute, haiek zuzentzeko.

4.3. Erreklamazioetarako epea bukatutakoan eta erreklamazioei erantzun ondotik, Esteribarko Udaleko alkateak ebazpena emanen du onartu eta baztertuen behin betiko zerrenda onesteko, eta Nafarroako Aldizkari Ofizialean argitaratzeko aginduko du. Ebazpen horretan berean zehaztuko da probak non, noiz eta zer ordutan hasiko diren.

5. oinarria.–Epaimahaia.

5.1. Epaimahaia honako kide hauek osatuko dute:

Mahaiburua: Esteribarko Udaleko alkatea, Mikel Gastesi Zabaleta.

–Ordezkoa: hark eskuordetutako zinegotzia.

1. mahaikidea: Esteribarko Udaleko zinegotzia, Jose Ramón Darias Barbarin.

–Ordezkoa: hark eskuordetutako zinegotzia.

2. mahaikidea: Jose Andrés Iriarte Diez.

–Ordezkoa: hark eskuordetutako zinegotzia.

3. mahaikidea: Uharteko Udaleko zerbitzu anitzetako arduraduna, Jorge Camino Unzu.

–Ordezkoa: hark eskuordetutako pertsona.

4. mahaikidea: udal arkitektoa, David Gomez Urrutia.

–Ordezkoa: udal arkitektoa, Rafael Calderon Aristu.

5. mahaikidea: Edurne Crespo Montes, Esteribarko Udaleko langilea.

–Ordezkoa: Esteribarko Udaleko langile bat.

Idazkaria: Esteribarko Udaleko idazkaria, Miren Sanz de Galdeano Martinez de Eulate edo hark eskuordetzen duen pertsona.

5.2. Epaimahaia hautaprobak egin baino lehen eratuko da eta bere eraketak eta jarduketak balio izateko gutxienez ere kideen gehiengo osoa beharko da elkartu.

5.3. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaz sor daitezkeen afera guztiak.

5.4. Epaimahaiak aholkulari adituen laguntza izan dezake, proba batzuetan nahiz guztietan laguntzeko. Aholkulari horiek beren espezialitate teknikoetan baizik ez baitira ariko, horietan bakarrik emanen diete laguntza epaimahaikoei.

6. oinarria.–Oposizio-lehiaketaren nondik norakoa.

6.1. Oposizio-lehiaketa bi alditan eginen da, lehiaketaldia lehenbizi eta oposizioaldia gero, oinarri hauetan zehazten den gisara.

6.2. Izangai onartu eta baztertuen behin betiko zerrenda argitaratzean adieraziko da non, noiz eta zein egunetan hasiko den oposizioa. Ondotik, epaimahaiak garaiz jarriko ditu ikusgai hurrengo probak egiteko iragarkiak Udalaren iragarki oholetan.

6.3. Oposizio-lehiaketako gehieneko balorazioa 100 puntu izanen da; haietarik, 20 puntu lehiaketaldiari dagozkio eta 80 puntu oposizioaldiari.

7. oinarria.–Lehiaketaldia.

7.1. Lehiaketaldia ez da baztertzailea izanen eta gehienez ere 20 puntu izanen ditu, baremo honen arabera:

A. Laneko esperientzia (15 puntu gehienez):

a.1. Udaletan zerbitzu anitzetako langile edo arduradun gisa eta lanpostu honekin zerikusia dutenetan (C maila) aritutako urte bakoitzeko: 2,5 puntu, eta gehienez ere 15 puntu.

a.2. Udaletan zerbitzu anitzetako langile edo arduradun gisa eta lanpostu honekin zerikusia dutenetan (D maila) aritutako urte bakoitzeko: 2 puntu, eta gehienez ere 15 puntu.

a.3. Administrazio Publikoan lanpostu honekin zerikusia duten zerbitzuetan aritutako urte bakoitzeko: puntu 1, eta gehienez ere 8 puntu.

B. Prestakuntza osagarria (5 puntu):

b.1. Lanpostuaren egitekoekin zerikusia duten espezialitateetako unibertsitate tituluengatik (lizentzia edo diploma): 3 puntu, eta gehienez ere 3 puntu.

b.2. LHII edo baliokideren bat, lanpostuaren egitekoekin zerikusia duten espezialitateetan: 2 puntu, eta gehienez ere 2 puntu.

b.3. LHI edo baliokideren bat, lanpostuaren egitekoekin zerikusia duten espezialitateetan: puntu 1, eta gehienez ere puntu 1.

b.4. Lanpostuaren egitekoekin zerikusia duen prestakuntza, 30 ordutik gorakoa: 0,10 puntu, eta gehienez ere 3 puntu.

Aurreko ataletako merezimenduak frogatzeko, izangaiak lan egindako administrazio publikoaren edo legez eratutako enpresa pribatuaren ziurtagiriak aurkeztuko dira; merezimendu horiek kontatzeko, berriz, aintzat hartuko dira lan araubidean, behin-behineko edo finko gisa egindako zerbitzuak, eta administrazio araubidean, bitarteko gisa edo jabetzan egindakoak, bai eta pertsona talde edo enpresa bateko kide izanik administrazio publikoei egindako zerbitzuak ere.

Frogaturiko esperientzia aldiak ez badu urteko osorik hartzen, dagokion proportzioa aterako da hileko osoak kontuan hartuta. Kontratu bakoitzeko, hileko oso bat gutxienez beharko da.

Lanaldia osoa ez bada, orduan ere dagokion proportzionaltasunaren arabera kalkulatuko da.

Zerbitzuak bete izana frogatzen duten dokumentuetan espresuki adieraziko da zerbitzu haiek lanaldi osokoak ala murriztukoak ote ziren, eta lanaldi murritza bazen, zenbatekoa.

7.2. Lehiaketaldia bururatutakoan, Esteribarko Herriko Etxeko iragarki oholean argitara emanen da izangai bakoitzak lortutako puntuazioa.

8. oinarria.–Oposizioaldia.

8.1. Oposizioan 80 puntu lortu ahal izanen dira gehienez, eta ariketa hauek izanen ditu:

–Lehenbiziko ariketa: teorikoa (baztertzailea). Lanpostuarekin zerikusia duen test bat egin beharko da, II. eranskineko zerrendan ageri diren gaiei buruzkoa. Ariketa honetan gehienez ere 15 puntu emanen dira, eta ariketa gainditzeko gutxienez ere 7,5 puntu erdietsi behar dira; baztertuta geldituko dira hori lortzen ez duten izangaiak.

–Bigarren ariketa: Informatika (baztertzailea). Proba praktiko batzuk egin beharko dira, lanpostuarekin zerikusia dutenak, ofimatikako ezagutzei buruz Windows ingurunearen barrenean: Office 2007 (Word, Excel) eta Outlook. Ariketa honetan gehienez ere 5 puntu emanen dira, eta ariketa gainditzeko gutxienez ere 2,5 puntu erdietsi behar dira; baztertuta geldituko dira hori lortzen ez duten izangaiak.

–Hirugarren ariketa: praktikoa (baztertzailea). Proba praktiko batzuk egin beharko dira, egun batean edo zenbait egunetan, lanpostuarekin zerikusia dutenak, II. eranskineko zerrendan ageri diren gaiei buruzkoak (adibidez: igeltserotza, iturgintza, elektrizitatea, uren tratamendua, lorezaintza). Ariketa honetan gehienez ere 35 puntu emanen dira, eta ariketa gainditzeko gutxienez ere %50 erdietsi behar da proba bakoitzean; baztertuta geldituko dira hori lortzen ez duten izangaiak.

–Laugarren ariketa: teoriko-praktikoa (baztertzailea). Kasu praktiko bat idatziz azaldu beharko da: lanpostu honen eta bere eginkizunen inguruan dauden beharren diagnostikoa eginen da, kontzejuz osatutako udalerri baten testuinguruan, horrelakoxea baita Esteribar. Epaimahaiaren aurrean eginen da ariketa honen defentsa, eta epaimahaiak ariketari buruz egokiak iruditzen zaizkion galderak egiten ahalko dizkio izangaiari. Ariketa honetan gehienez ere 25 puntu emanen dira, eta ariketa gainditzeko gutxienez ere 12,5 puntu erdietsi behar dira; baztertuta geldituko dira hori lortzen ez duten izangaiak.

8.2. Oposizioaldiko ariketa bakoitza bururatutakoan, epaimahaiak argitara emanen ditu Herriko Etxeko iragarki oholean, azterketa gainditu duten izangaien zerrenda, haien kalifikazioekin, baita hurrengo ariketa noiz eta non eginen den ere.

Probetarako dei bakarra eginen da eta Nortasun Agiri Nazionala eraman beharko dute izangaiek. Agertzen ez diren izangaiak bazterturik geldituko dira.

9. oinarria.–Probak gainditzen dituztenen zerrenda, izendatzeko proposamena eta agirien aurkezpena.

9.1. Azken ariketaren kalifikazioa bururatuta, epaimahaiak probak gainditzen dituztenen zerrenda eginen du, puntuazio handienetik txikienerako ordenan antolatua, izangai bakoitzak lehiaketaldian eta oposizioaldian ateratako puntuazioak batuta. Zerrenda Esteribarko Herriko Etxeko iragarki oholean argitaratuko da.

9.2. Epaimahaiak puntuazio handiena atera duen izangaia izendatzeko proposamen loteslea eginen dio Esteribarko Udaleko alkateari. Proposamen hori Nafarroako Aldizkari Ofizialean argitaratu beharko da.

9.3. Izendapen proposamena Nafarroako Aldizkari Ofizialean argitara eman eta hamabost egun naturaleko epearen barrenean, proposatutako izangaiak honako agiri hauek aurkeztu beharko ditu Udalaren Erregistro Orokorrean:

1.–Zinpeko aitorpena, eginkizun publikoak betetzeko ezgaiturik edo gabeturik ez dagoela eta inongo administrazio publikoren zerbitzutik bereizia ez dela izan adierazten duena.

2.–Osasun ziurtagiria, karguaren eginkizunetan aritzea galarazten dion eritasunik edo akats fisikorik ez duela frogatzen duena. Izangaiak minusbaliotasunen bat alegatzen badu, egiaztagiri bat aurkeztu beharko du, balorazio eta orientazio talde eskudunek emana, non azalduko baitute bateragarriak direla hura eta deialdi honetako xede den lanpostua.

9.4. Aipatu epearen barnean, eta aski arrazoituriko ezinbesteko kasuetan izan ezik, izangai izendatuak errandako agiri horiek aurkezten ez baditu, ezin izanen da izendatu, eta beraz jarduketa guztiak deuseztaturik geldituko dira, betiere deialdian parte hartzeko eskabidean egin faltsukeriagatik legokiokeen erantzunbeharra galarazi gabe.

9.5. Aitzineko atalean azaldutakoa gertatuz gero, buruak hutsunea beteko du gainditu dutenen zerrendan, 9.1 atalean aipatzen den horretan, ondo-ondotik heldu den izangaiarekin. Harekin ere aurreko ataletan adierazi den bezalaxe jokatuko da.

10. oinarria.–Kontratuaren formalizazioa.

10.1. Hautapen prozesua bururaturik, eta izangaiak aitzineko 9.3 oinarrian aipatutako agiriak ekarririk, behar den lan kontratuaren formalizazioa eginen da.

11. oinarria.–Behin betiko zerrenda.

Puntuazioaren behin betiko zerrenda, gutxienez proba teorikoa gainditzen duten izangai guztiena, behin-behineko kontratazioak egiteko erabiltzen ahalko da, lan pilaketak, bajak, oporrak edo gerora sortzen diren arrazoiak direla-eta edo udal zerbitzuak indartzeko behar puntualak izaten direnean, eta kasu horretan lanpostuaren kontratazioa kasuan kasuko lanpostuari egokituko zaio.

Esteribarko Udalak probak hasi baino lehen zehaztuko du poltsaren funtzionamendua.

12. oinarria.–Errekurtsoak.

Deialdiaren, oinarrien eta aplikazio egintzen kontra ondoko errekurtso hauetakoren bat paratzen ahalko da, hautara:

a) Administrazioarekiko auzi-errekurtsoa, Nafarroako Justizia Auzitegi Nagusiko arlo bereko salari zuzendua, erabaki hau edo errekurritzen den egintza argitaratu edo jakinarazi eta biharamunetik bi hilabeteko epean, organo egileari errekurritzeko asmoaren berri aurretik emanik; edo bestela,

b) Gora jotzeko errekurtsoa, zuzenean Nafarroako Administrazio Auzitegiari zuzendua, hilabeteko epean, erabaki hau argitaratu edo errekurritzen den aplikazio egintza jakinarazi eta biharamunetik hasita; edo bestela,

c) Berraztertzeko errekurtsoa, erabakia hartu edo aplikazio egintza egin duen organoari zuzendua, hilabeteko epean, erabaki hau argitaratu edo errekurritzen den aplikazio egintza jakinarazi eta biharamunetik hasita.

I. ERANSKINA

Eskabide eredua(PDFa).

II. ERANSKINA

Gai zerrenda

1.–Esteribarko udalerria: kontzejuen eta biziguneen izena eta kokapena.

2.–Administrazio agiriak. Ofizioa, eskabidea, egiaztagiria, akta, zirkularra, erabakien igorpena. Administrazio egintzen jakinarazpena. Epeak eta moduak.

3.–Nafarroako toki entitateen kontratuak. 6/2006 Foru Legea: xedapen orokorrak. Administrazio kontratu motak. Prestatzeko jarduketa administratiboak. Esleitzeko prozedurak eta moduak.

4.–Elektrizitateko oinarrizko tresnak (bihurkinak, aizturrak, aliketak, giltza motak, zerrak, eskuko daratulua...) ezagutu, erabili eta mantentzea.

5.–Eraikinetako banaketa koadroak, potentzia kontrolatzeko etengailua, magnetotermikoa eta diferentziala.

6.–Oinarrizko argi-zirkuituak eta fluoreszenteak: etengailuak, kommutadoreak, entxufe-oinak, lanparak, pitzarazgailuak eta erreaktantziak.

7.–Iturgintzako oinarrizko tresnak ezagutu, erabili eta mantentzea.

8.–Iturgintzako eta berokuntzako instalazioen mantentze-lanak: aparatu sanitarioak, txorrotak, zisternak, sifoiak, berokuntza zirkuituak, zirkuituak airez betetzea eta purgatzea, galdara-gelak eta haien osagai bereziak.

9.–Zurgintzako oinarrizko tresnak (mailuak, zerrak, trintxak, daratulu elektrikoa eta osagarriak: lixak, lekedak...) ezagutu, erabili eta mantentzea.

10.–Zurgintzako oinarrizko eragiketak: ate eta leihoak doitzea, sarrailak, sarraila-zilindroak eta pertsianak.

11.–Herriko argien instalazioak. Aginte zentroak, babesak eta kontrol tresnak. Argien euskarrien banaketa. Kanpoan jartzen diren argiak: motak eta ezaugarriak.

12.–Barruko instalazioak. Neurketa ekipoak. Potentzia kontrolatzeko etengailuak. Etengailu diferentzialak. Bulego bateko oinarrizko instalazioak (koadroa, kanalizazioak, eroaleak eta mekanismoak).

13.–Energia elektrikoaren banaketa funtsezko zein kontzeptutan oinarritzen den.

14.–Kloratzaileen funtzionamendua.

15.–Lorezaintzako eta mendiko lanetako oinarrizko produktuak eta tresnak (sasi-garbitzeko makina, belarra moztekoa, aizkora, motozerra) ezagutzea, erabiltzea eta mantentzea. Kale eta plazak garbitzea eta berdeguneak ureztatzea.

16.–Garbiketako eta pinturako produktuak eta tresnak (pintura eta berniz mota desberdinak, brotxak eta arrabolak) ezagutzea, erabiltzea eta mantentzea, baita hondakinak kudeatzea ere.

17.–Igeltserotzako oinarrizko produktu eta tresnak ezagutu, erabili eta mantentzea. Ondasun publikoak kontserbatzeko obrak. Planoak irakurri eta interpretatzea. Udal konponketak eta obra-zuinketak.

18.–Ezagupenak izatea arlo hauetan: kudeaketa energetikoa, kontsumo energetikoen neurketa, datu bilketa, energia aurrezpenen kalkulua, hobekuntzen planteamendua, ingurumen irizpideak erabiltzea ekipo eta instalazioen erosketan.

19.–Oihan kudeaketa integralari buruzko oinarrizko ezagupenak, arlo hauetan zehazki: oihangintza, jostetarako azpiegiturak, abeltzaintza estentsiboa eta informazio geografikoko sistemak.

Iragarkiaren kodea: L1614410