Iragarkia

122. ALDIZKARIA - 2017ko ekainaren 26a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

668/2017 EBAZPENA, ekainaren 6koa, Landa Garapeneko, Nekazaritzako eta Abeltzaintzako zuzendari nagusiak emana, mahastiak berregituratu eta birmoldatzeko planetarako laguntzak emateko deialdia eta oinarri arautzaileak onesten dituena, 2017-2018 kanpainarako.

Honako hauek dira mahastiak berregituratzeari eta birmoldatzeari buruzko xedapenak arautzen dituztenak, mahastizaintzako ekoizleen lehiakortasuna handitzeko neurri gisa: Nekazaritzako merkatuen antolamendu bateratua sortu eta 922/72 (EEE), 234/79 (EEE), 1037/2001 (EE) eta 1234/2007 (EE) erregelamenduak indarrik gabe uzten dituen Europako Parlamentuaren eta Kontseiluaren 2013ko abenduaren 17ko 1308/2013 (EB) Erregelamenduaren II. kapituluko 4. atala; Batzordearen 2016ko apirilaren 15eko 2016/1149 (EB) Erregelamendu Delegatua, 1308/2013 (EB) Erregelamendua osatzen duena mahastizaintzaren eta ardogintzaren sektoreari laguntzeko programa nazionalei dagokienez eta Batzordearen 555/2008 (EE) Erregelamendua aldatzen duena; eta mahastizaintzaren eta ardogintzaren sektoreari laguntzeko programa nazionalei dagokienez 1308/2013 (EB) Erregelamendua aplikatzeko xedapenak ezartzen dituen Batzordearen apirilaren 15eko 2016/1150 (EB) Exekuzio Erregelamenduaren II. eta IV. kapituluak.

Abenduaren 5eko 597/2016 Errege Dekretuak Espainiako mahastizaintzaren eta ardogintzaren sektorerako 2014-2018 laguntza programaren neurriak aplikatzeko oinarrizko araudia ezarri du. Aipatu errege dekretuaren II. kapituluko 2. atalak mahastiak berregituratu eta birmoldatzeko laguntzei aplikatzen zaien oinarrizko araudia biltzen du. Dena dela, bertako aurreikuspen batzuk zehazteko, autonomia erkidegoen arau osagarri baten beharra dago.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak eta Landa Garapeneko, Ingurumeneko eta Toki Administrazioko Departamentuaren egitura organikoa onesten duen irailaren 21eko 78/2016 Foru Dekretuak ematen dizkidaten eskudantziak erabiliz,

EBATZI DUT:

1. Mahastiak berregituratu eta birmoldatzeko planetarako laguntzak emateko deialdia onestea, 2017-2018 kanpainarako.

2. 2017-2018 kanpainan mahastiak berregituratu eta birmoldatzeko planetarako laguntzak arautzen dituzten oinarriak, ebazpen honen I. eranskinean jasoak, onestea eta ebazpen honen II. eranskinetik IV.era bitartekoak onestea.

3. 2018ko ekitaldian Nekazaritza Bermatzeko Europako Funtsak (NBEUF) Nafarroako Foru Komunitateari bideratzen dion aurrekontuak aukera ematen duen heinean erantzunen zaie ebazpen honen ondoriozko gastu konpromisoei.

4. Ebazpen hau eta eranskinak Nafarroako Aldizkari Ofizialean argitaratzea.

5. Ebazpen honek ez du administrazio bidea amaitzen, eta interesdunek gora jotzeko errekurtsoa jartzen ahal dute haren kontra, Landa Garapeneko, Ingurumeneko eta Toki Administrazioko kontseilariari zuzendua, argitara eman eta biharamunetik hilabeteko epean.

Iruñean, 2017ko ekainaren 6an.–Landa Garapeneko, Nekazaritzako eta Abeltzaintzako zuzendari nagusia, Ignacio Gil Jordán.

I. ERANSKINA

Mahastiak berregituratu eta birmoldatzeko planetarako
laguntzak emateko deialdiaren oinarri arautzaileak,
2017-2018 kanpainarako

Lehena.–Xedea eta aplikazio eremua.

1. Nafarroako Foru Komunitatean mahastiak berregituratu eta birmoldatzeko plan berrien aurkezpena eta onespena arautzea du xede ebazpen honek, mahastizaintzaren eta ardogintzaren merkatuaren antolamendu bateratuaren barrenean, eta plan horietan aurreikusitako jarduketetarako NBEUF laguntzak eskuratzea 2017-2018ko kanpainarako.

2. Ardoa egiteko mahatsa ekoizten duten mahastiak berregituratu eta birmoldatzeko aurkezten diren plan berrietan aplikatzeko izanen dira oinarri hauek, betiere haien lurzatiak Nafarroako Foru Komunitatearen lurraldean badaude eta honako hauen babesean: “Nafarroa” jatorrizko deitura, “3 Erribera” adierazpen geografiko babestua, “Queilesko Erribera” adierazpen geografiko babestua eta “Errioxa” jatorrizko deitura kalifikatua.

3. Ez da laguntzarik emanen ekintza hauetarako:

a) Berezko ziklo naturala bukatua duten mahastien berritze normala, hots, lurzati bera ardogintzarako mahats barietate berarekin eta landaketa metodo bera erabiliz birlandatzea.

b) Azkeneko hamar urteetan mahastiak berregituratu eta birmoldatzeko laguntzen onuradun izan diren azalerak (salbu eta ontzi itxurako mahatsondotik besora pasatzeko izan bada). Epe hori onuradunak azalera horretarako ordainketa eskatu zuen egunetik hasita kontatuko da, edo, aurrerakina eskatuz gero, saldoaren likidazioa eskatu zuenetik.

c) Mahatsondoak atera eta berriak landatzea, abuztuaren 4ko 1472/2000 Errege Dekretuaren 2.2. artikuluan aipatzen diren landaketa berrien kontzesioaren ondorioz egina (aipatu errege dekretuak ardo produkzioaren ahalmena arautzen du, landaketa egin eta hamar urte pasatu arte).

d) Batzordearen 2016ko apirilaren 15eko 2016/1149 (EB) Erregelamendu Delegatuaren 14. artikuluan jasotako ekintzen kostuak. Honako hauek sartzen dira horietan: mahastien eguneroko kudeaketa egitea, ehizak, hegaztiek edo txingorrak eragin litzaketen kalteak eragozteko babesa jartzea, haize-babesak eta hormak eraikitzea haizetik babesteko, sarbideak eraikitzea eta jasogailuak jartzea, eta nekazaritzako ibilgailuak erostea.

e) Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 63. eta 64. artikuluaren arabera emandako landaketa berria egiteko baimenarekin landatutako azalerak.

f) Lurzatiak berrantolatzeko prozesuan dauden eremuetako lurzatietarako eskaerak, Landa Garapeneko, Ingurumeneko eta Toki Administrazioko Departamentuko Nekazaritzako Azpiegituren Zerbitzuaren baimena duten lurzatietarako izan ezik.

g) Mahastiekin batera beste labore bat duten azaleretan jarduketak egitea.

Bigarrena.–Onuradunak.

1. Ardoa egiteko mahatsa ekoizteko mahastiak dituzten mahastizainak izan daitezke mahastiak berregituratu eta birmoldatzeko araubidearen onuradun.

2. Ezin izanen dira diru-laguntzaren onuradunak izan mahastiak landatzeari buruzko indarreko araudia betetzen ez duten titularrak, beren mahasti ustiategiko edozein azaleratarako.

Hirugarrena.–Neurri diruz lagungarriak.

1. Mahastiak berregituratzeko eta birmoldatzeko laguntza 2017-2018ko kanpainan ondoko jarduera baterako edo batzuetarako eman daiteke soilik:

a) Mahastiak berrezartzea.

b) Mahats barietatea aldatzea.

c) Mahastiak kudeatzeko teknikak hobetzea, ontzi itxurako mahastitik besorako mahastira aldatzeko.

2. Aurreko atalean aipatutako jarduerei laguntza emateko, honako definizio hauek finkatu dira:

a) “Mahastiak berrezartzea”: lurzati bateko edo batzuetako mahatsondoak beste landaketa baten edo batzuen bidez ordeztea, betiere azalera bera badute. Mahastizaintzako lurzati berean berrezartzen bada, barietate aldaketa edo laborantza metodoaren aldaketa egin dela frogatu beharko da, gidamoduaren sistema edo txertaka aldatu dela ulertuta.

Lurzatiak berrantolatzeko prozesu batean, lurzatiak berrantolatzeko eremuan mahatsondoak kentzearen ondorioz sortutako baimen guztiak baliozkoak izanen dira mahastiak berrezartzeko.

b) “Mahats barietatea aldatzea”: mahasti lurzati bateko barietatea aldatzea, oraingo barietatearen gainetik txertatuz, lurzatiko mahatsondo kopurua handitu gabe. Barietatearen aldaketa 2013-2014 kanpainaren aurretik landatutako lurzatietan baizik ez da egiten ahalko.

c) “Ontzi itxurako mahastitik besorako mahastira aldatzea”: gidamodu baxua duen mahastia besorako gidamodura jasotzea, mahastia modu egokian mekanizatu ahal izateko, bereziki inausketa eta mahats bilketari dagokienez. Transformazioa landare eta osasun egoera onean dauden mahastietan baizik ez da egiten ahalko, betiere 2013-2014 kanpainaren aurretik landatuak baldin badira.

d) Dagokien kontseilu arauemaileek edo agintaritza eskudunak baimendutako barietate guztiek jaso dezakete diru-laguntza.

Laugarrena.–Mahastiak berregituratu eta birmoldatzeko planak.

1. Mahastiak berregituratu eta birmoldatzeko araubidea berregituratu eta birmoldatzeko planen bitartez gauzatuko da, eta plan horiek egin beharreko jarduketak jasoko dituzte. Planak kolektiboak izanen dira, urtean betetzekoak.

2. Mahastiak berregituratu eta birmoldatzeko plan kolektibo bat osatzeko gutxienez 20 mahastizain beharko dira.

3. Planak mahastizain parte-hartzaileen artean sinatutako hitzarmen baten barnean eginen dira. Aipatu hitzarmenean, plan kolektiboko parte-hartzaileen ordezkari bat izendatuko da, eta hura arduratuko da administrazio publikoarekin izan beharreko hartu-emanez.

Bosgarrena.–Mahastiak berregituratu eta birmoldatzeko planen aurkezpena.

1. Mahastiak berregituratu eta birmoldatzeko plan baten onuradun izan nahi duten mahastizainek eskaera aurkeztu behar dute beren plan kolektiboaren ordezkariaren bitartez. Eskaerak telematika bidez aurkeztuko dira Landa Garapeneko, Ingurumeneko eta Toki Administrazioko Departamentuan, izan zuzenean edo izan Herri Administrazioen Araubide Juridikoari eta Administrazio Prozedura Erkideari buruzko urriaren 1eko 39/2015 Legearen 16. artikuluan aipatzen diren erregistro edo bitartekoren bat erabiliz, Nafarroako Gobernuaren Interneteko Atariko zerbitzuen katalogoan eskuratzen ahal den ereduaz baliatuz, eta ebazpen hau Nafarroako Aldizkari Ofizialean argitaratu eta 15 egun balioduneko epean.

2. Diru-laguntzaren xede diren jarduketak egin aurretik aurkeztu behar dira eskaerak.

3. Eskatzaileek, laguntza eskaerarekin batera, agiri hauek aurkeztu behar dituzte:

a) Planaren proiektua, eduki honekin:

–Planean jasotako jarduketa bakoitzaren helburuak.

–Planaren kokapena eta identifikazioa.

–Hura osatzen duten mahastizainen identifikazioa.

–Banakako fitxa, nekazaritza eta finantza arlokoa. Planean parte hartzen duen mahastizain bakoitzak eginen dituen jarduketak jasoko dira hartan: mahastia berrezartzea, barietatea aldatzea eta ontzi itxurako mahatsondoa besorako mahasti bihurtzeko, horretarako prestatutako ereduarekin bat. Fitxa horretan jarduketa bakoitzak zer azalerari eraginen dion zehaztu behar da, bai eta lurzatien kokapena eta ezaugarriak ere, hasierakoak zein berregituratu ondorengoak (barietateak, txertakak, eraketa sistemak, landare-tarteak, etab.), plana osatzen duten lurzatien Nekazaritzako Lurzatien Informazio Geografikorako Sistemen (hemendik aurrera, NELIGS) barrutiak identifikatuta, bai eta proiektuko landaketarako baimen mota eta aurreikusitako inbertsioaren zenbatekoa ere.

–Eskatutako planaren laburpen fitxa, horretarako prestatutako ereduarekin bat.

b) Osatu gabeko barrutiak sartzen badira, krokis bat erantsi beharko da, planean berregituratzeko edo moldatzeko sartutako azalera non dagoen jakin ahal izateko.

c) Planean parte hartzen duten mahastizainen artean izenpeturiko hitzarmena.

d) Planean parte hartzen duten eskatzaileen NANaren edo IFKren fotokopia eta haien datu pertsonalak.

e) Nekazari gaztea izanez gero, plana aurkeztu baino lehen Beren Konturako Langileen edo Autonomoen Araubide Berezian afiliaturik dagoela frogatzen duen agiria. Lehen instalazioaren kasuan, hori frogatzen duten agiriak.

f) Ogibide nagusia nekazaritza dutenen kasuan, lehentasunezko ustiategi baten titularra edo titulartasun partekatuko ustiategi batena denean, bere ustiategia Nafarroako Nekazaritza Ustiategien Erregistroaz besteko erregistro batean inskribatuta badago, horren ziurtagiria, dagokion nekazaritza ustiategien erregistroak emana.

g) Elkarteen kasuan, laguntza hauetarako prozesuan elkartearen ordezkari aritzeko baimena duen pertsonaren identifikazioa agertzen duen dokumentazioa.

h) Berregituratu edo birmoldatzeko eskatu diren lurzatiak baliatzen ahal direla egiaztatzea:

h.1) Lurzatiak eskatzailearenak baldin badira, lurzati zedula aurkeztuko da, gaurkotua, edo bestela, jabetzaren eskritura publikoa. Berriki lurzatien berrantolamendua egin duten udalak izanez gero, berrantolamenduan esleitutako lurren orrialdea aurkeztuko da, eta, lurzatiak berrantolatzeko prozesuan lurzatien jabetzan aldaketak izaten badira gero, organo eskudunak emandako dokumentazioa aurkeztuko da, lurzatiaren titularra nor den jakiteko.

h.2) Lurzatiak eskatzailearenak ez badira, jabearen baimena beharko da eta haiek erabiltzeko eskubidea modu hauetakoren batean frogatu beharko da:

–Errentamenduko kontratua, plana aurkeztu baino lehenagokoa, eredu ofizialaren arabera betea, Landalurreko Errentamenduen Erregistroan inskribatua. Haren indarraldia 2028ko uztailaren 31 artekoa izanen da, gutxienez ere.

–Lurzatiaren gaineko gozamenerako eskubide bat eratu dela agiri bidez frogatzea.

–Herrilurrak izanez gero, udalaren ziurtagiria, adierazten dituena adjudikazioduna, adjudikatze data eta adjudikazioaren iraupena.

i) Emandako landaketa baimenak justifikatzen dituen dokumentazioa aurkeztea, Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 66. eta 68. artikuluen arabera, baita uztailaren 31ko 740/2015 Errege Dekretuaren 25. artikuluaren 2. idatz-zatiaren arabera ere: erauzteko eskaera, aldez aurretik birlandatzeko eskaera eta proiektuan sartzen diren landaketarako eskubide bihurtzeko eskaera.

j) Mahasti barietatea aldatzeko eta ontzi itxuratik besora pasatzeko neurrien kasuan, Mahastien Erregistroan aldaketa egiteko behar bezala betetako eskabidearen fotokopia.

k) Lurzatiak berrantolatzeko prozesuan dauden eremuetako lurzatien kasuan, oraindik horri buruzko hitzarmenik ez badago, Landa Garapeneko, Ingurumeneko eta Toki Administrazioko Departamentuaren Nekazaritzako Azpiegituren Zerbitzuaren baimena.

Seigarrena.–Plan kolektiboen baldintzak.

1. Mahastiak berregituratzeko eta birmoldatzeko plan bakoitzaren esparruan guztira berregituratzen edo birmoldatzen den azalera 10 hektareakoa izanen da gutxienez.

2. Planean sartutako mahasti bakoitzak, behin berregituratuta edo birmoldatuta, gutxienez 0,5 hektarea izan behar du. Dena dela, berregituratze eta birmoldatze plana egin ondoren gelditzen diren lurzatien kopurua hasierako kopuruaren %80 baino txikiagoa baldin bada, muga hori txikiagoa izaten ahalko da. Mahastiak mahastizain beraren beste lurzati batekin egiten badu muga, orduan ere 0,5 hektarea baino txikiagoa izan liteke.

Ondorio horietarako, hauxe hartuko da mahasti lurzatitzat: mahastizain bakar batek mahatsondoak lantzeko duen azalera etenik gabea, barruti bakar batek edo erreferentzia alfanumeriko bat edo gehiago dituzten barruti puskek osatua, NPBGISen grafikoki irudikatua.

Mahats barietatea aldatzeko edo ontzi itxuratik besora aldatzeko besterik ez bada, gutxieneko azalera hasierakoa izanen da.

3. Diru-laguntza jasoko duen azalera, gehienez, zortzi hektarea izanen da mahastizain bakoitzeko. Inguruabar tekniko edo ekonomikoek hala eskatzen dutenean, gehieneko muga hori aldatzen ahalko da, Landa Garapeneko, Ingurumeneko eta Toki Administrazioko Departamentuak proposaturik.

4. Planetan ezin izanen dira sartu Mahastien Erregistroa eguneratzean esleitutako eskubide bihurtzeko baimenak edo landaketa berrirako eskubide bihurtzeko baimenak.

5. Eskualdeko erreserbatik lortutako landaketa eskubideak sartzen ahalko dira planetan, ezartzen den araudiari jarraikiz.

6. Landaketa guztietan, ziurtatutako txertakak erabili behar dira nahitaez. Diru-laguntza jasotzeko, baimendutako merkatariaren edo mintegizainaren faktura eta ordainagiria aurkeztu behar dira nahitaez.

7. Mahastia berrezartzeko eskatutako barrutiak ezin izanen ditu NELIGSen erabilera hauek izan: zuhaixka-larreak, larreak edo larre zuhaiztunak edo paisaiaren egiturazko elementuak.

Zazpigarrena.–Planak onestea eta funtsak esleitzea.

1. Batzordearen 2016ko apirilaren 15eko 2016/1150 (EB) Exekuzio Erregelamenduaren 23.1 artikuluarekin bat, planetan aurkeztutako eskaerak aztertu, eta horiek onartzekoak diren edo ez ebaluatuko da alderdi hauek kontuan hartuta: aurkezpen epea bete al den, eskaeretan jasotako edukia egokia al den, planen baldintzak zein diren eta diruz lagungarriak diren kostuak zenbatekoak diren. Halaber, eskatzaileari eskatuko zaio 10 eguneko epean aurkez dezala zuzendu beharreko informazioa edo agiriak, edo, hala badagokio, gehitu beharreko informazioa edo agiriak.

2. Batzordearen 2016ko apirilaren 15eko 2016/1150 (EB) Exekuzio Erregelamenduaren 23.2 artikuluarekin bat, II. eranskinean ezarritako lehentasun irizpideei dagokien ponderazioa aplikatzean lortutako puntuazioa kontuan hartuz klasifikatuko dira eskaerak.

3. Behin autonomia erkidegoak badakienean zein den dena delako finantza ekitaldirako hasierako esleipena, finantza ekitaldi horretan eskaera eta jarduketa berriak hautatuko dira eskaera berrietarako erabilgarri dauden funtsen arabera, hasierako esleipenaren baitan eta 2. atalean adierazitako lehentasun irizpideak aplikatuta lortutako puntuazioa kontuan hartuz.

4. 3. atalean aipatutako hautaketarako, 2018ko finantza ekitaldian finantzatuko diren jarduketen behin betiko onespena eginen da.

5. Landa Garapeneko, Nekazaritzako eta Abeltzaintzako zuzendari nagusiak planen onespena ebatziko du, baina onespen horrek ez dio Administrazioari ekarriko etorkizunean gasturik egiteko bestelako konpromisorik. Aipatu onespena eskaerak aurkezteko epea amaitu eta sei hilabeteko epean eginen da. Baldin eta sei hilabeteko epea igarotakoan interesdunei ez bazaie inongo ebazpenik jakinarazi, beren eskaera baztertu egin dela ulertu behar dute. Eskaerek ez badituzte onartuak izateko eskakizunak betetzen, eskaerak baztertzeko arrazoiak zein izan diren jakinaraziko zaie eskatzaileei.

Ebazpenaren aurka, errekurtsoa jartzen ahalko da bide administratiboan edo administrazioarekiko auzien bidean, ebazpenak bide administratiboa agortzen duen edo ez duen, kasuan-kasuan dagokiona.

6. 2018ko ekitaldian NBEUFetik Nafarroako Foru Komunitatearen esku utzitako diru kopuruak, lehenik eta behin, aurreko ekitaldietan egin baino ordaindu gabeko berregituratze eta birmoldatze planetan erabiliko dira, zaharrenetik hasita, eta gero, 2017-2018 kanpainan ebazpen honen arabera aurkeztutako planetan, NBEUFk Nafarroako Foru Komunitatearen esku utzitako aurrekontuaren zenbatekoa agortu arte.

7. Eskatzailearen edo diru-laguntzaren xede diren lurzatien aldaketaren bat egin ahal izateko, aurrez Merkatuen Erregulaziorako Atalak baimendu behar du.

Aldaketa egiteko eskaerak behar bezala justifikatuta egon behar du, ez dio jarduketaren helburu nagusiari eragin behar, ez du onartutako aurrekontua handitu behar, eskaera onartzeko eskakizunak bete behar ditu eta ez du aldaketarik ekarri behar hautapen prozeduran jasotako ponderazioan; aldaketa eskaera posta elektronikoz bidali behar da Merkatuen Erregulaziorako Atalera, aldaketa egin aurretik, eta betiere jarduketaren amaiera jakinarazteko eta ordainketaren eskaera egiteko agiria aurkeztu aurretik.

Zortzigarrena.–Laguntzaren kalkulua.

1. Laguntzak kalkulatzeko, ebazpen honen III. eranskinean aipatzen diren jarduerak eta gehieneko kostuak hartuko dira kontuan, honelaxe:

a) Mahastia berrezartzeko laguntzarako, ekintza hauek hartuko dira kontuan: zaharrak ateratzea (mahatsondoak biltzea barne), lurra prestatzea, desinfekzioa, harriak kentzea, lurra berdintzea, landarea eta landatze-lana, landatzeko momenturako untxien kontrako babes indibiduala (jartzeko lana barne) eta besorako euskarria (jartzeko lana barne).

Ondorio horietarako, lurraren nibelazioa diruz laguntzeko modukoa izanen da, soilik, lurrak mugitzearen helburua denean lurrak denboraldiko ureztaketak uholdeka egiteko mailan uztea.

Ez dira finantzatuko erauzketaren kostuak Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 66. eta 68. artikuluen arabera emandako birlandaketarako baimenak erabiltzen diren azaleretan, ez badira sortu birmoldatzeko planaren aplikazioan, eta mahatsondoak plana eskatu aurretik atera badira.

b) Mahasti barietatea aldatzeko laguntzarako, oraingo barietatearen gainetik txertatzeagatik izandako kostuak hartuko dira kontuan (kostu jakin bat txertaketa unitate bakoitzeko). Mahatsondo batean egiten dena hartzen da txertaketa unitatetzat, edozein delarik ere mahatsondo horretan sartu beharreko zirien kopurua.

c) Ontzi itxurako mahatsondoa besorako bihurtzeko laguntzaren kasuan, ontzi itxurako mahatsondoa besorako bihurtzeko ekintza hartuko da kontuan, hirugarren oinarriko 2.c) puntuan xedatuarekin bat.

2. Mahasti baten azalera berregituratu eta birmoldatzeagatik mahastizainak jaso dezakeen laguntzaren zenbatekoa zehazteko, berregituratutako edo mahatsondoak kendutako mahastiaren azalera neurtuko da, Batzordearen 2016ko apirilaren 15eko 2016/1150 (EB) Exekuzio Erregelamenduaren 44. artikuluan jasotako metodoari jarraikiz.

3. Nafarroako Foru Komunitateko mahastizainei egin beharreko konpentsazioa puntu honetan jasotako zehaztapenen arabera eginen da, jarraian adierazten den bezala.

a) 2017-2018 kanpainarako onesten diren plan berrietan diru-sarreren galera orekatzeko laguntzaren zenbatekoa honako hau izanen da:

–410,00 euro hektareako, “Nafarroa” jatorrizko deiturarako, “3 Erribera” adierazpen geografiko babesturako eta “Queilesko Erribera” adierazpen geografiko babesturako.

–1.050,00 euro hektareako, “Errioxa” jatorrizko deitura kalifikaturako.

b) Errenta galtzeagatiko laguntza bi kanpainatan emanen da, mahastien berrezartze jarduketetarako, inguruabar hauek izaten direnean:

–Berrezarri beharreko lurzatiko mahatsondoak plana eskatu ondoren eta 2017ko azaroaren 15a baino lehen kendu direnean.

–Laguntza eskatu duen mahastizainak lurzatiaren jabetza eta titulartasuna frogatzen dituenean Landa Garapeneko, Ingurumeneko eta Toki Administrazioko Departamentuko Mahastien Erregistro Ofizialean, eta mahastiak berak kendu dituenean; edo, laguntza eskatu duen mahastizainak Landa Garapeneko, Ingurumeneko eta Toki Administrazioko Departamentuko Mahastien Erregistro Ofizialean titulartasuna bakarrik frogatzen duenean, jabetza izan gabe, eskatzaileak berak kenduak izanen dira mahatsondoak, jabea ados dagoela.

c) Ez dute diru-sarrerak galtzeagatiko kalte-ordainik jasotzeko eskubiderik izanen Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 66. eta 68. artikuluen arabera emandako landaketarako baimenarekin berregituratutako azalerek, sortu badira birmoldatzeko planaren aplikazioan, eta mahatsondoak plana eskatu aurretik atera badira.

d) Barietateak aldatzeko eta ontzi itxurako mahatsondoko lurzatia besorako mahasti bihurtzeko jarduketetan, kanpaina bakar batean emanen da laguntza errenta galtzeagatik, eta laguntza eskatzen duen mahastizainak honako hauek frogatu beharko ditu:

–Mahastiaren jabetza eta titulartasuna, Landa Garapeneko, Ingurumeneko eta Toki Administrazioko Departamentuko Mahastien Erregistro Ofizialean, edo

–Mahastiaren titulartasuna Landa Garapeneko, Ingurumeneko eta Toki Administrazioko Departamentuko Mahastien Erregistro Ofizialean baizik frogatzen ez badu, jabetza izan gabe, aldaketa egiteko eskaera aurkeztu beharko du Landa Garapeneko, Ingurumeneko eta Toki Administrazioko Departamentuko Nekazaritzako Erregistroen Atalean, jabeak baimendurik egin beharreko hobekuntza dela adierazita.

6. Harriak kentzeko ekintzak, lurrak desinfektatzekoak eta lurrak berdintzekoak, mahastizainak aldez aurretik eskatu behar ditu, eta ondoko baldintza hauek bete behar dituzte:

a) Lurra desinfektatzeko lanetarako laguntzak ematen ahalko dira, betiere mahatsondoak 2013ko abuztuaren 1etik aurrera kendu diren lurzatian egiten bada landaketa berria.

b) Harriak kentzeko eta lurra berdintzeko laguntzak ematen ahalko dira, betiere lan horiek egin egin direlako dudarik ez badago. Laguntza emateko ezinbesteko baldintza izanen da lanak hasiko direla jakinaraztea, hasi baino 10 egun lehenago gutxienez, Landa Garapeneko, Ingurumeneko eta Toki Administrazioko Departamentuko Merkatuen Erregulaziorako Atalari. Epe horretan ez bada egiten aldez aurreko jakinarazpena, ekintza ezin izanen da aukeratu laguntza ordaintzeko.

5. Mahastia berregituratu eta birmoldatzeko kostuetako parte-hartzea ebazpen honen III. eranskinean bildutako ekintzetarako baizik ezin izanen da egin. Bakarka ezin izanen da finantzatu ekintzarik, salbu eta gainetik txertatzeko ekintza edo ontzi itxuratik besora aldatzekoa. Bigarren eskuko materialagatik ere ezin da laguntzarik jaso.

Ebazpen honen III. eranskinean bildutako gehieneko zenbatekoen %50 da berregituratze eta birmoldatze plan bakoitzari gehienez emanen zaion laguntza. Jasotako diru kopuruak ezin izanen du inola ere gainditu portzentaje hori benetan egindako gastu egiaztatuaren gainean aplikatuta ateratzen den kopurua, onuradunak berak egin ez dituen ekintzen kasuan (gastuak, nahitaez, faktura eta ordainagirien bidez egiaztatuak).

Baldin eta lanak mahastizainak berak egin baditu eta, beraz, ez fakturarik ez ordainagiririk ez badago, honako honen arabera zehaztuko dira diruz laguntzen ahal diren zenbatekoak: batez beste zenbat denbora behar izaten den (ordutan) lan horiek egiteko, norberaren eskulanari eta makineriari dagokionez, bider horrelako lan batek izan ohi duen batez besteko ordainsari tasa eta bider azalera hautagarria. Dena dela, horrela kalkulatutako kopuruek ezin izanen dituzte IV. eranskinean jasotako gehieneko zenbatekoak gainditu.

Laguntza guztira kalkulatzeko, III. eranskinean finkatutako gehieneko mugak hartuko dira aintzat, egin diren ekintzak justifikatzeko agiriak aurkeztu eta baliozkotzat jo ondoren. Nolanahi ere, fakturatutako zenbatekoa, edo fakturatutako zenbatekoa gehi norberaren eskulanaz eta makineriaz egindako lanen kosturako kalkulatutakoa, IV. eranskinean ezarritako gehieneko zenbatekoa baino txikiagoa bada, justifikatutako eta baliozkotzat jotako zenbatekoaren arabera likidatuko da laguntza.

6. Mahasti baten azalera berregituratu eta birmoldatzeagatik mahastizainak jaso dezakeen laguntzaren zenbatekoa zehazteko, berregituratutako edo mahatsondoak kendutako mahastiaren azalera neurtuko da, Batzordearen 2016ko apirilaren 15eko 2016/1150 (EB) Exekuzio Erregelamenduaren 44. artikuluan jasotako metodoari jarraikiz.

7. Plana onesteak sortutako eskubide eta betebeharrak subrogatzen ahal zaizkio mahastizain berri bati, baldin eta horrek bere gain hartzen baditu subrogatutako lurzatietan plana onetsi zitzaion mahastizainak hartutako konpromisoak.

8. Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 2. artikuluan aipatutako ezinbesteko kasuetan edo salbuespenezko egoeretan edo desjabetzeetan izan ezik, mahastiak berregituratu eta birmoldatzeko planetan sartzen diren azalerek gutxienez hamar urtez egon beharko dute landaturik ordainketa eskatu eta hurrengo kanpainatik hasita.

Lurzatian nekazaritzako azpiegituretarako jarduerak egin behar izateagatik edo interes orokorreko herri lanen exekuzio batengatik laguntza hauek jaso dituen onuradunak ezin badio eutsi hartutako konpromisoari, espresuki eskatu beharko dio organo kudeatzaileari hartutako konpromisotik salbuesteko, mahatsondoak kendu aurretik, hori justifikatzen duen dokumentazioa aurkeztuta. Dokumentazio hori azterturik ezintasun hori ondorioztatzen bada, onuraduna salbuetsia egonen da. Beraz, konpromisoa bukatutzat jo, eta ez da exijituko jasotako laguntza itzultzea.

Planetan sarturiko azalerak gutxienez ere hamar kanpainatan landatuta eduki beharra betetzen ez bada, jasotako laguntza gehi legez dagozkion interesak itzuli beharko ditu laguntzaren onuradunak.

9. Egiaztatzen bada onuradunak, mahastia berregituratu eta birmoldatzeagatik lehen laguntza jaso eta urte natural horretako urtarrilaren 1etik hurrengo hiru urtean, ez dituela errespetatu bere ustiaketan kudeaketarako legezko betekizunak eta nekazaritzarako zein ingurumenerako baldintza egokiak, Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 91., 92., 93., 94. eta 95. artikuluetan aipatuak, laguntzaren zenbatekoa, onuradunari zuzenean leporatzen ahal zaion ekintza edo omisioagatik bete ez bada, hein batean edo erabat murriztuko edo deuseztatuko da, zein den hutsegitearen larritasuna, hedadura, iraupena eta errepikapena, eta onuradunak, hala badagokio, itzuli egin beharko du, aipatu xedapenen arabera. Baldintza horiek betetzen direla kontrolatzeko, informazio eguneratua izan beharko da, onuradunaren ustiategiaren parte diren lurzati guztien NELIGSeko erreferentzia alfazenbakikoei dagokienez.

Bederatzigarrena.–Aurrerakinak.

1. Hamargarren oinarrian xedatua gorabehera, planetan parte hartzen dutenek aurrerakina eskatzen ahalko dute, hasieran onetsitako laguntzaren zenbatekoaren %60ra bitarte, aurrerakinaren zenbateko bera duen berme bat eratuta dutenean. Eskaera aurkezteko epea 2018ko maiatzaren 20an bukatuko da.

2. Aurrerakinak ematen direnean, beharrezkoa izanen da jarduketa egitea, eta emandako aurrerakinaren zenbateko guztia gastatu beharko da dena delako jarduketa egiteko lanetan. Jarduketa amaitu dela eta jarduketa egiteko lanetan egindako gastua idatziz jakinaraziko da, 2018ko ekainaren 30a bitarte. Baldin eta ez bada emandako aurrerakinaren zenbateko guztia gastatu dena delako jarduketa egiteko lanetan eta ezarritako epeetan, bermea baliatuko da, ezinbesteko inguruabarretan edo ohiz kanpokoetan izan ezik.

3. Baldin eta dena delako azalerak agintari eskudunek onartutako hondamendi natural bat jasan duen eremu batean baldin badaude edo aurreikusitako jarduketak ezin badira gauzatu erakunde baimendu batek egiaztatuta dituen arazo fitosanitarioen ondorioz, aurrerakin gisa emandako zenbatekoa gastatzeko epea egokitu egin ahal izanen da, eta neurria 2018ko uztailaren 31 baino lehen gauzatzen bada, saldoa ordainduko da.

6. Organo eskudunak zehazten badu aurrerakinaren zenbatekoak gainditu egiten duela dena direlako jarduketak egiteko Europar Batasunak egiten duen ekarpenari dagozkion gastu errealen zenbatekoa, bermea askatzen ahalko da.

Hamargarrena.–Laguntza onuradunei ordaintzea.

1. Behin jarduketak bukatutakoan, onuradunak jarduketaren amaiera eta laguntza ordaintzeko eskaera jakinarazteko agiria aurkeztu behar du. Jakinarazpen hori idatziz egin behar da 2018ko maiatzaren 20a bitarte. Bederatzigarren oinarrian zehazten den aurrerakina eskatuz gero, jakinarazpena 2018ko ekainaren 30a bitarte egiten ahalko da.

a) Jarduketaren amaiera eta laguntza ordaintzeko eskaera jakinarazteko agiriarekin batera, egindako ordainketen ordainagiri eta fakturen kopia aurkeztu behar du onuradunak. Mahastizaintzaren eta ardogintzaren sektoreari laguntzeko programa nazionalen aplikaziorako zuzentarauekin bat, dirutan ordaindutako gastuak ez dira diruz lagungarriak izanen.

Baldin eta zenbait jarduketa mahastizainak berak egin baditu, berariaz hori hala izan dela aipatu behar da jarduketaren amaiera eta laguntza ordaintzeko eskaera jakinarazteko agirian, eta horrez gain, orduen parte bat ere gehitu behar da datu hauekin: mahastizaina nor den, zein den erabili duen bere makineria, egindako lan bakoitzaren deskribapen xehea eta emandako denbora, horretarako prestatutako ereduarekin bat.

b) Ekintza bakoitzeko faktura bat aurkeztu behar da, edo, bestela, fakturan ekintza bakoitzari dagokion zenbatekoa zehaztu.

c) Laguntza eskatzen duen mahastizainaren izenean eginen dira faktura guztiak, eta haietan, ekintza zein lurzatitan egiten den, dagozkion NPBGIS erreferentziak zehaztuko dira.

Landareen fakturetan, zer landare material erosi den adierazi behar da, hau da, txertaka eta barietatea.

2. Lurzatietan jarduketak guztiz egin direla eta onetsitako edo, hala badagokio, aldatutako planei lotzen zaizkiela frogatutakoan ordainduko dira laguntzak, zortzigarren oinarrian ezarritako kalkuluaren arabera.

3. Mahastizainak ez badu jarduketa laguntzan zehaztutako azalera osoan egiten, planean onetsitako edo aldatutako azaleraren eta benetan landutako azaleraren arteko aldea kalkulatuko da. Tokian bertan egindako kontrolen bidez zehaztuko da jarduketa benetan zer azaleratan egin den. Alde hori ez bada ehuneko 20a baino handiagoa, tokian bertan egindako kontrolek zehaztutako azalera hartuko da kontuan laguntza kalkulatzeko. Aldea ehuneko 20a baino handiagoa bada, baina ehuneko 50a baino txikiagoa edo berdina, laguntza kalkulatzeko tokian bertan egindako kontrolek zehaztutako azalera hartuko da kontuan, baina, egiaztatutako aldearen bikoitza zenbat den, ehuneko hori murriztuta. Azaleren arteko aldea ehuneko 50a baino gehiago bada, ordea, ez da laguntza jasotzeko eskubiderik izanen.

6. Baldin eta mahastizainak behin betiko laguntza baino aurrerakin handiagoa jaso badu, aldea itzuli beharko du. Behin betiko laguntza jasotako aurrerakina baino handiagoa bada, aldiz, aldea kobratzeko eskubidea izanen du. Dena dela, laguntza, guztira, ezin da hasieran eskatu zena baino handiagoa izan.

5. Mahastizainak laguntzaren xedeko ekintzak gauzatzen ez baditu, arau-hauste arina izanen da Mahatsondoei eta Ardoari buruzko uztailaren 10eko 24/2003 Legearen 38.1.g) artikuluan ezarritakoaren arabera, eta aipatu legearen 42.1 artikuluan ezarritakoari jarraikiz zehatuko da, eta itzuli egin beharko da, hala badagokio, jasotako aurrerakina, ezinbesteko inguruabarretan edo ohiz kanpokoetan izan ezik. Era berean, egin ez diren ekintzengatik ez da ordainduko.

6. Landa Garapeneko, Nekazaritzako eta Abeltzaintzako zuzendari nagusiak laguntzak eman eta ordaintzeko ebazpena emanen du. Onuradunari laguntza gehienez ere hamabi hilabeteko epean ordainduko zaio, laguntza ordaintzeko eskaera baliozkoa osorik aurkeztu zuen datatik zenbatzen hasita.

7. Ezin izanen dira 2014-2018 Laguntza Programaren kontura finantzatu mahastizaintzaren eta ardogintzaren merkatuaren antolamendu bateratua ezartzen duen Kontseiluaren maiatzaren 17ko 1493/1999 (EE) Erregelamenduaren baitan aurkeztutako planetako neurriak.

Hamaikagarrena.–Publizitaterako eta datuen babeserako araudia.

1. Laguntza hauen onuradunen datuak nekazaritzako politika bateratuaren finantziazioari, kudeaketari eta jarraipenari buruzko Europako Parlamentuaren eta Kontseiluaren abenduaren 17ko 1306/2013 (EB) Erregelamenduaren 111. artikuluarekin bat argitaratuko dira.

2. Onuradunen datu pertsonalak erakunde nazionalek eta Europar Batasuneko erakundeek erabili ahal izanen dituzte, betiere administrazioen kudeaketa, kontrol eta ikuskaritzako zein jarraipen eta ebaluazioko betebeharrekin zerikusia izanez gero, Europako Parlamentuaren eta Kontseiluaren abenduaren 17ko 1306/2013 (EB) Erregelamenduaren (EB) 117. artikuluan xedatutakoarekin bat.

Ondorio horietarako, onuradunek 95/46/EE Zuzentarauko datuen tratamenduari buruzko arauetan eta Datu Pertsonalak Babesteari buruzko abenduaren 13ko 15/1999 Lege Organikoan ezarritako eskubideak balia ditzakete.

II. ERANSKINA

Lehentasun eta ponderazio irizpideak

III. ERANSKINA

Mahastia berregituratu eta birmoldatzeko gehieneko kostuak

A) Mahastiak berrezartzea:

Erauzketa (mahats-orpoak biltzea barne): 430 euro/ha.

Lurra prestatzea: 1.400 euro/ha.

Desinfektatzea: 2.000 euro/ha.

Harriak kentzea: 400 euro/ha.

Lurra berdintzea: 800 euro/ha.

Landarea eta landaketa: 1,69 euro bakoitza.

Landaketa egiten den momentuan landarea banan-banan babestea untxien kontra (jartzea barne): 0,50 euro bakoitza.

Besorakoa (jartzea barne): 3.400 euro/ha.

B) Mahastiak birmoldatzea:

Oraingo barietatearen gainetik txertatzea: 0,90 euro bakoitza.

C) Mahastiak kudeatzeko teknikak hobetzea:

Ontzi itxurako mahatsondoa besora aldatzea: 600 euro/ha + besorako euskarria.

Iragarkiaren kodea: F1706975