1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
Laburpena, Nafar Lansare-Nafarroako Enplegu Zerbitzuko zuzendari kudeatzaileak abenduaren 30ean emandako 3015/2016 Ebazpenarena. Ebazpen horren bidez langabeei zuzendutako Lantegi-Eskolak eta Programa Integratuak izeneko prestakuntza eta enplegu programak 2017. eta 2018. urteetan gauzatzeko diru-laguntzen deialdia onetsi da, Nafarroako Foru Komunitateko lurralderako bakarrik.
Diru-laguntzei buruzko azaroaren 17ko 38/2003 Lege Orokorraren 17.3.b eta 20.8.a artikuluetan aurreikusitakoari jarraituz, argitara ematen da deialdiaren laburpena; horren testu osoa Diru-laguntzen Datu Base Nazionalean kontsulta daiteke (http://www.pap.minhap.gob.es/bdnstrans/GE/eu/index): BDNS (identifikazioa): 329054.
Lehendabizikoa.–Onuradunak:
a) Toki entitateak, beren erakunde autonomoak eta horien menpeko edo horiei atxikitako entitateak, beren titulartasun osoa toki entitate horiena bada, eta, kasu guztietan, Nafarroako Foru Komunitatearen lurralde eremuan badaude, eta Nafarroako Foru Komunitatearen titulartasun publikoko entitateak.
b) Lantokia Nafarroako Foru Komunitatean duten elkarteak, fundazioak eta irabazi-asmorik gabeko beste entitate batzuk.
c) Aurreko bi ataletan aipatutako entitateetatik edozeinek osatutako elkarteak, nortasun juridikorik ez badute ere.
Onuradun izaten ahalko dira, orobat, aipatutako entitate horietako batek (baita c) atalean aipatutakoak ere) honako hauetako batekin osatzen dituen nortasun juridikorik gabeko elkarteak:
Zentroen erregistroan inskribaturik edo egiaztaturik dauden prestakuntza zentroak, goian aipatutako entitate mota horietako batekin bat etortzen ez direnak. Zentro horiek prestakuntza ekintzen eremuan baizik ez dute parte hartuko.
Programa gauzatzeko beharrezkoa den jardueraren bat egiten duten enpresak edo bestelako entitateak, programako ekintzei lotutako zerbitzuetako batean espezializatuak daudenak.
Bigarrena.–Xedea:
Langabeei zuzenduriko prestakuntza eta enplegu programa integratuak eta lantegi-eskolak finantzatzeko diru-laguntzak arautzea, Nafarroako Foru Komunitateko lurralderako bakarrik.
Hirugarrena.–Oinarri arautzaileak:
Nafar Lansare-Nafarroako Enplegu Zerbitzuko zuzendari kudeatzailearen abenduaren 30eko 3015/2016 Ebazpenaren bidez onetsiak.
Laugarrena.–Zenbatekoa:
Guztira, 5.038.000,00 euroko gastua baimentzen da, 2017. eta 2018. urteetarako diru-laguntza eskaerei erantzuteko.
Bosgarrena.–Eskaerak aurkezteko epea:
Eskaerak aurkezteko epea hogei egun naturalekoa izanen da, deialdi hau Nafarroako Aldizkari Ofizialean argitara ematen denetik hasita. Eskaerak adierazitako epetik kanpo aurkeztuz gero, ez dira onartuko.
Iruñean, 2016ko abenduaren 30ean.–Nafar Lansare-Nafarroako Enplegu Zerbitzuko zuzendari kudeatzailea, Paz Fernández Mendaza.
Iragarkiaren kodea: F1700588
