86. ALDIZKARIA - 2016ko maiatzaren 5a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

21C/2016 EBAZPENA, martxoaren 31koa, Politika Ekonomiko eta Enpresarialaren eta Lanaren zuzendari nagusiak emana, Alesbesko Agropecuaria San Fermin SL enpresaren hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.

Alesbesko Agropecuaria San Fermin SL enpresaren hitzarmen kolektiboaren testua (kode zenbakia: 31101032012016) aztertu da, erregistro honetan 2015eko abenduaren 24an sartu zena eta 2016ko martxoaren 14an zuzendu zena, Langileen Estatutuari buruzko Legearen Testu Bategina onetsi zuen urriaren 23ko 2/2015 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera. Horrenbestez,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Nafarroako Aldizkari Ofizialean argitaratzeko agintzea, denek jakin dezaten.

Iruñean, 2016ko martxoaren 31n.–Politika Ekonomiko eta Enpresarialaren eta Lanaren zuzendari nagusia, Izaskun Goñi Razquin.

AGROPECUARIA SAN FERMIN SL-REN HITZARMEN KOLEKTIBOA

Alderdiak zehaztea:

Agropecuaria San Fermin SLren hitzarmen kolektibo hau, alde batetik, Carlos Idiazabal Romeo jaunak (NANa: 52442890S) izenpetzen du, Agropecuaria San Fermin SLren izenean eta hura ordezkatuz, eta, alde sozialetik, berriz, enpresako langileen ordezkariak, Zdravko Antimov Lilov jaunak (AIZ: X3293201S).

1. artikulua. Enpresako hitzarmen kolektibo honek, indarrean dagoen bitartean, Nafarroako nekazaritzaren eta abeltzaintzaren hitzarmen kolektiboa ordezten du, salbu eta hemen biltzen diren berariazko aipamenak.

2. artikulua. Eremu funtzionala. Hitzarmen kolektibo hau bete beharrekoa da nahitaez Agropecuaria San Fermin SLn.

3. artikulua. Langile eremua: hitzarmen kolektibo honek Agropecuaria San Fermin SLko plantillako langile guztiei eragiten die.

4. artikulua. Iraunaldia eta salaketa.

Hitzarmenaren iraupena 2016ko urtarrilaren 1etik 2018ko abenduaren 31ra artekoa izanen da.

Hitzarmen kolektibo hau 2018ko urriaren 1ean salatuko dute, zuzenean, Batzorde Negoziatzailea osatzen duten alderdiek. Mahai Negoziatzaile berria osatu beharko da, negoziazioak hasteko.

Alderdietako edozeinek hitzarmen honen amaiera behar den bezala eta behar den epean iragarrita, haren arauen edukiak indarrean jarraituko du beste hitzarmen bat sinatu arte.

5. artikulua. Konpentsazioa eta irenspena.

Hitzarmena sinatzen duten alderdiek, konpentsazioaren eta absortzioaren gaiari dagokionez, men eginen diote Langileen Estatutuaren 26. artikuluko 5. zenbakiari. 2016ko urtarriletik aurrera, soldataren ordainagirien egituran kontzeptu berri bat sartuko da, lan kantitateko plusa izenekoa, jardueraren izaeraren ondorioz sor litezkeen ordu gehiagoko lanaldiak estaltzeko. Honela eratuko da kontzeptu horren zenbatekoa: langileek jasotzen dituzten zenbatekoak, eranskinetako tauletan aurreikusitako oinarrizko soldataren eta antzinatasunaren gainetik.

6. artikulua. Langileen sailkapena.

Gai hori Nafarroako nekazaritzaren eta abeltzaintzaren sektorearen hitzarmen kolektiboaren 7. artikuluan xedatutakoarekin bat arautuko da.

7. artikulua. Behin-behineko langileen eskubideak.

Behin-behineko langileek enpresako gainerako langileen eskubide berberak dauzkate.

Merkatuaren egoerak, zereginen pilaketak edo eskarien gehiegizko kopuruak hartara behartzen dutenean, enpresaren jardun arrunta balitz ere, horrek kasu horietarako kontratuak egin ditzake, gehienez ere 12 hilabeteko iraupenarekin 18 hilabeteko epe batean, kausa horiek sortzen direnetik hasita.

8. artikulua. Zuzenbide osagarria.

Hitzarmen honetan aurreikusten ez denerako, aplikatu beharreko legezko xedapenei jarraituko zaie (2/2015 Legegintzako Errege Dekretua).

9. artikulua. Osotasunarekiko lotura.

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira.

Lan administrazioko agintaritzaren ustez hitzarmeneko punturen batek indarreko legezkotasuna hausten badu, hitzarmen oso hau berraztertu beharko da.

10. artikulua. Lanaldia eta lan egutegia.

Urriaren 23ko 2/2015 Legegintzako Errege Dekretuaren 34.1 artikuluan aurreikusitakoa izanen da lanaldia.

Enpresaren jardueraren ardatza zerri aziendak haztea eta gizentzea denez, asteko egun guztiak joko dira laneguntzat, ezertan ukatu gabe legez aurreikusitako atsedenaldiak, eta langileek asteburuko txandak izanen dituzte, xedatzen den moduan.

Sei ordutik gorako lanaldietan, atseden hartzeko lan-etenaldiak ez dira benetan lan egindako denboratzat hartuko.

11. artikulua. Oporrak.

Hitzarmen honek ukitzen dituen langileek, enpresan urtebetez egin badituzte zerbitzuak, eskubidea izanen dute urtean 30 egun naturaleko oporrak hartzeko, soldata arruntaren gainean ordainduak. Gainerako langileentzat, har daitezkeen opor egunak egindako lanaren araberakoak izanen dira.

Oporrak hartzeko epea jarraitua izanen da, eta ezin izanen da bi epetan baino gehiagotan zatitu, non ez duen langileak hala berariaz adierazi.

Oporrak hartzeko egunak enpresa edo nagusia eta langileak ados egonda finkatuko dira, kontuan izanik zein den garairik motelena hitzarmen honetan araututako lanak egiteko.

12. artikulua. Lizentziak eta baimen ordainduak.

2/2015 Legegintzako Errege Dekretuaren 37. artikuluan aurreikusitako baimenak eta lizentziak izanen ditu langileak.

13. artikulua. Osasun kontsultategietara joatea.

Osasun kontsultategi eta kliniketara lanaldiaren barruan joaten denean, ordainsariak jasoko dira hitzarmeneko soldataren arabera, baldin eta ezin bada lanalditik kanpo joan horretarako ordutegirik ez dutelako.

Langileak behar bezala justifikatu beharko du arrazoi horiengatik ez dela lanera joan.

14. artikulua. Oinarrizko soldata.

Eranskinetako tauletan aurreikusitako oinarrizko soldataren zenbatekoa jasoko dute langileek.

2016ko zenbatekoa 2015ean aplikatzen den berbera izanen da.

2017an eta 2018an, kontzeptu hori %0,5 handituko da urte bakoitzean.

15. artikulua. Antzinatasuna.

Kontzeptu hori jasotzen duten langileek 2015ean aplikatutako zenbatekoa mantenduko dute; hartara, izozturik geldituko da hitzarmen honek indarra duen bitartean.

16. artikulua. Igande eta jaiegunetako lanaldia.

Sinatzaileek berariaz hitzartzen dute hitzarmenean sartzea asteburuetako ordutegia ezartzeko akordioa (7:00-13:30, ordu erdi batekin hamarretakoa hartzeko). Hori dela eta, oraingo lan txandak mantenduko dira, eta, salbu eta txanden garapen arrunta ukitzen duten produkzio arloko arrazoiengatik edo beharrengatik, langile bakoitzak bi asteburutan lan eginen du hilero.

17. artikulua. Aparteko pagak.

Hitzarmen honi atxikitako langile guztiek aparteko hiru paga jasoko dituzte, haietako bakoitza soldata arruntaren hogeita hamar eguneko zenbatekokoa. Honela ordainduko dira pagak: lehenengoa uztailean eta bigarrena abenduaren 22an.

Mozkinetan parte izatea: hilero hainbanatuta jasoko dute langileek paga hori.

18. artikulua. Aldi baterako ezintasuna.

Langile batek aldi baterako ezintasuna badu, arrazoia edozein dela ere, 8/2015 Legegintzako Errege Dekretuan legez aurreikusitako zenbatekoaren prestazioen ordainketa aurreratuko du enpresak.

19. artikulua. Istripu-asegurua.

Hitzarmen honi atxikitako langile guztiek aseguru kolektiboko poliza baten estaldura izanen dute. Horren kostua langilea kontratatzen duen enpresaren kargura joanen da, eta ondoko kontingentziak hartuko ditu:

a) Heriotza, lan istripuagatik edo eritasun profesionalagatik. Balioa: 39.813,91 euro.

b) Baliaezintasun iraunkor osoa edo erabatekoa, edo baliaezintasun handia, lan istripuagatik edo eritasun profesionalagatik. Balioa: 50.771,50 euro.

Enpresek poliza horren suskripzioaren kopia emanen dute, hitzarmen honetan itundutako baldintzetan. Hura izanen da arriskuak zuzenean estaltzen dituena.

Aurreko paragrafoetako poliza sinatzeko epea hilabete batekoa izanen da, hitzarmen honen argitalpen ofizialetik aurrera. Egun horretara arte aplikatu beharko da eta indarrean jarraituko du 2010ean indarra zuen hitzarmenaren 27. artikuluak.

20. artikulua. Tresnak.

Enpresak emanen ditu lan egiteko tresnak. Enpresaburuak ematen ez baditu edo langileak eraman behar baditu, bien adostasunarekin konpentsazioko plus bat ordaindu beharko zaio langileari, tresnen higaduragatik.

21. artikulua. Osasun azterketa.

Langileek eskatuta, enpresek osasun azterketa bat sustatu beharko dute, gutxienez urtean behin. Azterketa hori laneko ordutegiaren barruan eginen da.

22. artikulua. Laneko arropa.

Enpresak laneko arropa egokia emanen du, lan guztiak egiteko, hala nola, sufreztatzeko, sulfatatzeko eta abarretarako. Laneko arropa horiek, gehiago higatzen direnez, beharrezkoa den guztietan ordeztuko dira.

Era berean, uretan edo lokatzetan egin beharreko lanetarako, dagozkion oinetako iragazgaitzak emanen zaizkie langileei.

Orobat, arropa iragazgaitzak eman beharko zaizkie langileei lanak landare edo zuhaitz bustien artean egin behar dituztenean.

23. artikulua. Hutsegiteak.

Hutsegitetzat hartuko dira indarra duten legezko xedapenek eta, oro har, oinarrizko hitzarmen honek ezarritako betebeharrak urratzen edo kontuan hartzen ez dituzten ekintzak edo ez-egiteak.

Garrantziaren arabera, hutsegiteak honela sailkatuko dira: arinak, larriak eta oso larriak.

24. artikulua. Hutsegite arinen sailkapena.

Ondokoak hutsegite arintzat jotzen dira:

1.–Hilabetean lanera behin, bitan edo hirutan berandu iristea, bidezko arrazoirik gabe.

2.–Lanerako ezintasun iragankorreko baja edo lanera ez agertzearen bidezko arrazoiak bi egun balioduneko epean ez jakinaraztea, hori egiterik ez dela izan frogatu ezean.

3.–Lanetik denbora gutxirako alde egitea, bidezko arrazoirik gabe.

4.–Norberaren garbitasun edo txukuntasun eza noizbehinka.

5.–Egun batez lanera ez agertzea, bidezko arrazoirik gabe.

6.–Noizean behin mozkortuta agertzea.

25. artikulua. Hutsegite larrien sailkapena.

Honako hauek hutsegite larriak dira:

1.–Lautik zortzira bitarteko hutsegite lanera berandu iristeagatik, 30 egun naturaleko epean.

2.–Lanera bi egunez ez agertzea 30 egun naturaleko epean, bidezko arrazoirik izan gabe.

3.–Lanorduetan edozein motatako jokoetan ibiltzea.

4.–Beste langile bat lanera agertu dela simulatzea, haren sinadura, fitxa edo kontrol txartela erabiliz.

5.–Lanean zuhurtziarik gabe jokatzea. Jokabide hori hutsegite oso larritzat jo daiteke, baldin eta langilea bera edo lankideak istripua izateko arriskuan jartzen badira edota instalazioak edo salgaiak hondatzeko edo su hartzeko arriskuan.

6.–Lanorduetan norberaren lanak egitea, bai eta enpresaren tresnak norberarentzat erabiltzea ere, lanalditik kanpo izan arren, horretarako baimenik izan gabe (hutsegite arina izan liteke).

7.–Langileak ikusitako egintzak edo hutsegiteak ezkutatzea, horrek kalte larriak sortzen baditu, eta instalazioetan ikusten den edozein arazo garrantzitsuren berri buruari berehala ez ematea.

8.–Norberaren akatsak nahita ezkutatzea, enpresari kalteak sortzen ahal dizkioten arren.

26. artikulua. Hutsegite oso larrien sailkapena.

Honako hauek hutsegite oso larriak dira:

1.–Lanera behin eta berriro berandu iristea edo ez joatea, bidezko arrazoirik gabe.

A) Lanera zortzi aldiz baino gehiagotan berandu iristea arrazoirik gabe, hogeita hamar egun naturaleko epean, eta hamasei aldiz baino gehiagotan bidezko arrazoirik gabe, ehun eta laurogei egun naturaleko epean.

B) Lanera ez joateagatiko hutsegitea: lanera hiru egunez ez agertzea, arrazoirik eman gabe, hiru hilabeteko epean.

Egiten den jardueraren izaera dela eta, eta igande eta jaiegunetan lan egiteak duen garrantzia dela eta, halako egunetan lanera ez joatea, hau da, enplegatu bakoitzari dagokion egutegiaren arabera bi asteburutan ondoz ondo, edo hiru asteburutan aldizka sei hilabeteko epean, hutsegite oso larritzat hartuko da, eta kaleratzearekin zigortzen ahalko da.

2.–Agindutako kudeaketetan iruzur egitea, eta enpresari, lankideei edo beste edozeini lantoki barnean nahiz lanean beste edozein lekutan aritzean ebastea edo lapurtzea.

3.–Enpresaren lanabes, makineria, aparatu, instalazio, eraikin, altzari edo agiriak desagerrarazi, ezdeus bihurtu edo hondatzea.

4.–Enpresaren edo langileen isilpeko eskutitzen edo agirien sekretua haustea.

5.–Enpresakoa ez den norbaiti nahitaez isilpean eduki beharreko datuak ezagutaraztea.

6.–Nagusi, mendeko edo lankideak jotzea edo iraintzea, norberaren defentsarako ez bada.

7.–Istripu larriak sorraraztea, zabarkeria edo zuhurtziagabekeria desenkusaezinagatik.

8.–Lankideekin liskarrak eta iskanbilak maiz sortzea, arrazoirik gabe.

9.–Segurtasun eta higieneagatik debekatuta dagoen tokietan erretzea. Debeku hori argi azaldu beharko da halako tokietan, kartelen, banderen edo beste edozein sistema egokiren bidez.

10.–Kontratuko onustea haustea, eta laneko konfiantza-abusua.

11.–Ohiko edota itundutako errendimendua luzaroan eta nahita gutxitzea.

27. artikulua. Zehapenak.

Hutsegiteen arabera, zehapen hauek ezarriko dira:

1.–Hutsegite arinengatik:

–Hitzezko kargu-hartzea.

–Kargu-hartze idatzia.

–Gehienez bi eguneko enplegu-soldaten etenaldia.

2.–Hutsegite larriengatik:

–Hiru egunetik hamabostera bitarteko enplegu-soldaten etenaldia.

3.–Hutsegite oso larriengatik:

–Hamasei egunetik hirurogeira bitarteko enplegu-soldaten etenaldia.

–Kaleratzea.

28. artikulua. Zehapenak betetzea.

Enplegua eta soldata etetea ezartzen duten zehapenetan, zehapena betetzeko egunak atzera daitezke zehapena irmo bihurtu arte.

29. artikulua. Lan gatazken konponketa.

Nafarroako Lan Gatazkak Konpontzeko Auzitegiaren mende jartzea. Arlo horretan, Nafarroako nekazaritzaren eta abeltzaintzaren hitzarmen kolektiboaren I. eranskina aplikatuko da.

30. artikulua. Batzorde Paritarioa.

1.–Hitzarmen honetan Batzorde Paritarioa eratzen da, hori sinatu dutenek osatzen baitute. Eginkizunak 2. atalean zehazten dira.

Batzorde Paritarioak behar bezainbestetan bilduko da, hitzarmen honen funtzionamendu egokirako.

Bilkurarako deialdia idatziz egin beharko da, hiru egun baliodun lehenago, eta gai-zerrenda izanen du nahitaez.

2.–Batzorde Paritarioak eginkizun hauek beteko ditu:

a) Hitzarmena betetzen den zaintzea eta haren segimendua egitea.

b) Hitzarmen honen agindu guztiak aplikatzean eta interpretatzean sortzen diren gaiak ebaztea eta ezagutzea.

c) Alderdietako batek eskatua, hitzarmena aplikatzearen ondorioz sor daitezkeen auzi edo arazo kolektiboetan bitarteko lana egin, eta/edo konponbidea bilatzen saiatu eta, alde guztiak ados egonez gero eta horretarako eskaera eginez gero, haiek epaitzea.

d) Bide administratibora eta jurisdikzionalera jo aurretik, nahitaez, hitzarmen hau aplikatzean eta interpretatzean hitzarmen kolektiboen inguruan sortzen diren planteamenduetan aginpidea izatea, artikulu honen 3. idatz-zatian aurreikusi bezala.

e) Hitzarmen honek eraginkortasun praktiko handiagoa izatea xede duten beste edozein eginkizun, edo testuan eta horren barruan dauden eranskinetan xedatutakotik eratortzen direnak.

3.–Hitzarmen hau sinatu duten alderdiek nahiz 1. artikuluan daudenek (langile eremuari dagokionez) Batzorde Paritarioari jakinarazi beharko dizkiote hitzarmenaren interpretazioan eta aplikazioan sor daitezkeen zalantza, desadostasun eta gatazka kolektibo oro, betiere haren eskumenekoak badira, aurreko atalean ezarritakoaren arabera; horrela, helburua da esku-hartzearen bitartez, planteatutako arazoa konpontzea, edo hori posible ez bada, dagokion ebazpena edo txostena ematea.

4.–Batzorde Paritarioan bere eskumenekoak diren gaiak idatziz aurkeztuko dira, eta haien edukia behar adinakoa izanen da, arazoa behar bezala ezagutuz aztertu dezaten. Honako hau da nahitaez izanen duen gutxieneko edukia:

a) Gaia labur eta zehatz adieraztea.

b) Proposamen egilearen iritziz bere alde dituen arrazoi eta oinarriak.

c) Batzordeari egiten zaion proposamen edo eskaria zehatza.

Kontsultaren idazkiarekin batera, arazoa ulertu eta konpontzeko beharrezkotzat jotzen diren agiri guztiak aurkeztuko dira.

5.–Batzordeak informazio edo agiri gehiago eskatzen ahalko ditu aferaren gaineko informazio hobea edo osatuagoa lortzeko asmoz. Horretarako, proposatzaileari gehienez 5 egun balioduneko epea emanen zaio.

6.–Batzorde Paritarioak, kontsultaren idazkia jaso ondoren edo, hala balegokio, beharrezko informazioa osatu ondoren, 20 egun baliodunetik beherako epea izanen du, akordioa erdietsiz gero, gaia ebazteko dagokion ebazpenaren bidez.

Akordiorik egon ezean, batzordeko kideek txostena eginen dute. Bertan, nork bere jarrera, eta, horrenbestez, desadostasuna oinarritzeko adierazi dituen irizpenak bilduko dira.

Azken kasu horretan, batzordeak hurrengo zenbakian zehazten den bezala jokatuko du.

7.–Batzorde paritarioak akordiorik erdiesten ez duenean bere eskumenen artean, aurreko 2. ataleko e) letran eta 10. artikuluan jasotzen diren gaietatik kanpoko bat planteatzen zaionean, desadostasunak, kasua bada, lan gatazkak auzibidetik kanpo ebazteko sistemara pasatu ahal izanen ditu, Laneko Gatazken Konponbide Autonomorako V. Akordioa bere gain hartuz (Estatuko Aldizkari Ofizialean, otsailaren 23an, argitaratua, Enplegu Zuzendaritza Nagusiaren 2012ko otsailaren 10eko Ebazpenaren bidez). Hori guztia, hitzarmen honen 10. artikuluan ezarritakoarekin bat, edo, hala behar bada, gatazkak konpontzeko sistema ez-judizialen mendean jarri, LEren 83. artikuluan aurreikusitako lanbide arteko akordioen bidez ezarri ziren horien mendean, hain zuzen.

II. ERANSKINA

2016. urteko soldaten taulak

KATEGORIAK

HILABETEKO OINARRIZKO SOLDATA

Teknikariak

1.370,12 euro

Administrari-ofiziala

1.069,50 euro

Administrari laguntzailea

946,55 euro

Arduradunak

1.137,85 euro

Traktoristak - makinistak

1.076,05 euro

Espezialistak

972,67 euro

Zaindariak

971,11 euro

Etxezainak

971,11 euro

Lanbide klasikoetakoak

1.164,14 euro

Peoiak

932,86 euro

Sasoiko langilea - orduko soldata

6,69 euro

Taula horiek handitu daitezke Nafarroako nekazaritzaren eta abeltzaintzaren sektorearen hitzarmen kolektiboan 2014 eta 2015erako hitzartzen ahal diren soldata igoerekin.

Iragarkiaren kodea: F1604123