83. ALDIZKARIA - 2016ko maiatzaren 2a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

IRUÑA

Laburpena, honako honena: Diru-laguntza, Nafarroako Gobernuarekin elkarlan hitzarmena duten errehabilitazio zentroetako egonaldiak ordaintzeko prestazio ekonomikoak emateko, 2016rako

Oharra: testu osoa Diru-laguntzen Datu Base Nazionalean kontsulta daiteke (http://www.pap.minhap.gob.es/bdnstrans/GE/eu/index). BDNS (Identifikazioa): 303430.

DIRU-LAGUNTZEN DEIALDIA, NAFARROAKO GOBERNUAREKIN HITZARMENA DUTEN ERREHABILITAZIO ZENTROETAKO EGONALDIAK ORDAINTZEKO PRESTAZIO EKONOMIKOAK EMATEKO, 2016RAKO

Deialdiaren xedea: diru-laguntzak arautzea, gizarte zerbitzuen arloan, horien helburua izanik Nafarroako Gobernuarekin elkarlan hitzarmena duten errehabilitazio zentroetako egonaldiak ordaintzeko prestazio ekonomikoak ematea, 2016rako, betiere deialdi honen B.3) eta D) ataletan ezarritako baldintzak eta beharkizunak betetzen badira.

Laguntza ekonomiko puntualak dira, borondatearen araberakoak, eta subsidiarioak Nafarroako Gobernuak zentro eta komunitate terapeutikoetan ematen dituenekiko, entitate horiekin hitzarturik: Centro Egiarte Ibarre Multzoa SA; Asociación Proyecto Hombre; Antox: Comunidad Terapéutica Larraingoa.

Deialdiko gehieneko kopurua, guztira: 66.000 euro.

Eskabideak aurkezteko tokia: errehabilitazio zentroetako egonaldietarako diru-laguntzen eskabideak auzo unitateetan aurkeztuko dira, baita Gizarte Ekintzako eta Komunitate Garapeneko Alorreko beste programa eta zerbitzu batzuetan ere.

Eskabideak, gehi dagokion gizarte txostena, laguntzaren beharra frogatzen duena, eta baldintzak betetzen direla eta eskatzaileen egoera ekonomikoa frogatzen dituzten agiriak, erregistratu eginen dira, eta P.E.M. programari atxikitako teknikariei bidaliko, balora ditzaten.

Eskabideak aurkezteko epea: deialdi hau Nafarroako Aldizkari Ofizialean argitaratu eta biharamunean hasiko da eskabideak aurkezteko epea eta haren indarraldia bukatu arte iraunen du. 2016. urtea hartzen du indarraldiak. Eskabideak epe horretatik kanpo aurkeztuz gero, ez dira onartuko.

Pertsona edo entitate onuraduna izateko betebeharrak: onuradun izaten ahalko dira diru-laguntza emateko egoeran dauden pertsonak edo entitateak, jarraian azaltzen diren inguruabarretan badaude, eta Diru-laguntzen ordenantza orokorraren 10. artikuluan ezarritako debekuetakoren bat ere ez badute, salbu diru-laguntzaren izaera dela-eta azken baldintza hori salbuesten bada, eta horixe azaltzen bada atal honetan.

Ondoko baldintzak betetzen dituzten norbanakoek edo bizikidetasun unitateek eskatzen ahalko dute diru-laguntza:

1.–Iruñean egiaz bizitzea, eta Iruñean egotea erroldatua, gutxienez ere urtebeteko antzinatasunez.

2.–Iruñeko Udalaren Gizarte Ekintzako eta Komunitate Garapeneko Alorreko Gizarte Zerbitzuen erabiltzaileak izatea, eta esku-hartze sozialeko prozesu batean inplikaturik egotea.

3.–Egoera horri aurre egiteko modua ematen duten baliabide ekonomiko propio nahikorik ez izatea, ezta gizartearen edo familiaren laguntzarik ere. Aplikatzekoa den diru-sarreren baremoko maila ekonomikoetako batean egotea, deialdi honen C.3) atalean ezarritakoarekin bat.

Eskabideen diru-sarreren muga kalkulatzeko, zenbatuko dira, zentroan egon bitartean, izanen dituen diru-sarrera garbi guztiak. Diru-sarrera finko egonkorrak izanez gero, urtean jasotzen dena zati 12 hilabete eginen da.

Familia unitate ekonomikotzat honako hau hartzen da: eskatzailea, ezkontidearekin edo antzeko maitasun harremana duen bikotekidearekin, eta seme-alaba adingabeak edo helduak, baldin ekonomikoki eskatzailearen menpeko badira.

Eskatzaileei, hilabeteko diru-sarreren muga ezarri aurretik, haien eskubideko kenkariak aplikatuko zaizkie. Hona zein diren:

–Diru-sarreretatik kenduko da etxebizitzarako gastuaren %70, gehienez ere 200 euro/hilabeteko, gela bat errentamenduan dutenean, edo, biren kasuan, arabera. Ezin izanen da kendu alokairuko kostua baino zenbateko handiagoa.

Familia bakarrik bizi bada etxebizitzan, eta alokairu edo hipoteka kontratuaren titulartasuna badu, honako hau kenduko da: alokairu edo hipotekaren hilabeteko kostuaren gainean %70 aplikatzearen ondoriozko zenbatekoa. Deskontatu beharreko zenbatekoa inoiz ez da izanen 400 euro/hilabetea baino handiagoa. Gela bat edo gehiago alokaturik duten kasuetan, horregatik lortutako diru-sarrera deskontatuko da alokairu edo hipotekaren kostutik. Ondoriozko zenbatekoari aipatutako portzentajea (%70) aplikatuko zaio, behar den kenkaria aplikatzeko.

–Mantenu eta/edo konpentsazioko pentsioagatiko ordainketa, behar den agiriaren bidez frogatua. Zenbateko hori deskontaturik, eskatzailea kide bakarreko familia unitatetzat hartuko da, diru-sarrerak zenbatzeko eta, beraz, eman beharreko diru-laguntza ezartzeko.

4.–Laguntza jasotzen duenak desintoxikazio tratamenduan egon beharko du, Nafarroako Gobernuarekin elkarlan hitzarmena duen errehabilitazioko zentro batean.

Diru-laguntzaren izaera berezia kontuan harturik, pertsona edo entitate onuradunek ez dute frogatu beharko Diru-laguntzen ordenantza orokorraren 10.2 artikuluan ezarritako baldintzak betetzen dituztela.

Iruñean, 2016ko apirilaren 25ean.–Gizarte Ongizate eta Berdintasun Alorreko idazkari teknikoa, Margarita Moreno Fernández.

Iragarkiaren kodea: L1604982