82. ALDIZKARIA - 2016ko apirilaren 29a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

185/2016 FORU AGINDUA, apirilaren 7koa, Eskubide Sozialetako kontseilariak emana, adingabeen babesaren esparruan aritzen diren irabazi-asmorik gabeko entitateentzako diru-laguntzen deialdia onesten duena eta 2016. urterako gastua baimentzen duena.

Gizarte Zerbitzuei buruzko abenduaren 14ko 15/2006 Foru Legeak aurreikusten dituen jarduketa-programen artean haurrari eta familiari lehen laguntza ematea agertzen da. Haurrentzako eta nerabeentzako sustapenari, laguntzari eta babesari buruzko abenduaren 5eko 15/2005 Foru Legeak, bestalde, ezartzen du Nafarroako Foru Komunitateko Administrazioaren eginkizunen artean adingabeak sustatzea eta babestea dagoela.

Horri dagokionez, ekainaren 5eko 7/2009 Foru Legeak, Foru Komunitateko zergadunek gizarte intereseko beste xede batzuetarako bideratzen duten tributuen %0,7 arautzen duenak, funts horien bidez lagundu beharreko taldeen artean babesik gabe dauden adingabeena jasotzen du.

Pertsonen Autonomiarako eta Garapenerako Nafarroako Agentziaren estatutuak onesten dituen irailaren 3ko 172/2015 Foru Dekretuak xedatzen du Familiaren eta Adingabeen Zuzendariordetzari dagokiola Haurrentzako eta Nerabeentzako Sustapenari, Laguntzari eta Babesari buruzko abenduaren 5eko 15/2005 Foru Legea bete eta gara dadila sustatzea.

Azkenik, Eskubide Sozialetako Departamentuaren egitura organikoa ezartzen duen abuztuaren 28ko 128/2015 Foru Dekretuaren 2.1 artikuluak Eskubide Sozialetako kontseilariari esleitzen dio aipatu departamentuaren aurrekontuen kontura emanen diren diru-laguntzen deialdia egiteko eskumena.

Espedientean Familiaren eta Adingabeen Zuzendariordetzaren proposamen txostena, txosten juridikoa, Nafarroako Gizarte Ongizatearen Kontseiluaren txostena eta kontu-hartzaile delegatuaren adostasuna jaso dira.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak, Diru-laguntzei buruzko azaroaren 9ko 11/2005 Foru Legeak eta Eskubide Sozialetako Departamentuaren egitura organikoa ezartzen duen abuztuaren 28ko 128/2015 Foru Dekretuak emandako eskudantziak erabiliz,

AGINDU DUT:

1. Nafarroako Foru Komunitatean adingabeen babesaren esparruan aritzen diren entitateentzako diru-laguntzen 2016ko deialdia onestea, foru agindu honen eranskinean azaltzen diren oinarrien arabera.

2. 116.470 euroko gastua baimentzea, 2016ko gastuen aurrekontuko “PFEZaren %0,7ko funtsa, Adingabeen esparruko diru-laguntzen deialdia “ izeneko 920008 93300 4819 231702 kontu-sailaren kargura.

3. Foru agindu hau eta deialdiaren oinarriak Nafarroako Aldizkari Ofizialean argitaratzea.

4. Deialdi honen eta bere oinarrien aurka gora jotzeko errekurtsoa jartzen ahal da, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

5. Foru agindu hau Eskubide Sozialetako Departamentuko Idazkaritza Tekniko Nagusiko Ekonomia eta Aurrekontuak Kudeatzeko Atalari, Pertsonen Autonomiarako eta Garapenerako Nafarroako Agentziako Familiaren eta Adingabeen Zuzendariordetzari eta Diru-laguntzen Datu Base Nazionalari igortzea, behar diren ondorioak izan ditzan.

Iruñean, 2016ko apirilaren 7an.–Eskubide Sozialetako kontseilaria, Miguel Laparra Navarro.

ERANSKINA

Deialdiaren oinarri arautzaileak

1. oinarria. Xedea eta helburua.

Deialdi honen xedea da Nafarroako Foru Komunitateko adingabeen babesaren esparruan aritzen diren irabazi-asmorik gabeko entitateen funtzionamendurako eta jardueren sustapenerako diru-laguntzak emateko araubidea ezartzea 2016. urterako.

Diru-laguntza horien bidez bultzatu nahi da adingabeen babesaren eta babesgabetasun arriskuaren prebentzioaren arloan aritzen diren elkarteek eta gainerako entitateek programak eta ekintzak egin ditzatela talde horien arrisku egoerak gutxitu eta desagerrarazteko.

2. oinarria. Diru-laguntza jaso dezaketen ekintzak.

1. Pertsonen Autonomiarako eta Garapenerako Nafarroako Agentziaren diru-laguntzak ekintza hauetarako izanen dira:

a) Abegi-familiak sentsibilizatzea, prestatzea eta laguntzea.

b) Familia adoptatzaileak sentsibilizatzea, prestatzea eta laguntzea.

c) Babesgabetasun arrisku arina/moderatua duten adingabeentzako esku-hartze terapeutikoak eta gizarte eta hezkuntza arlokoak, eta/edo babesgabetasun arriskua sor dezaketen egoerei aurrea hartzea helburu dutenak, zehazki, egoera horietan dauden adingabeen bizi baldintzak hobetzera (lehen, bigarren eta hirugarren mailako prebentzio programa eta ekintzak eginez) zuzendutako programak.

2. Haurren eta Nerabeen Sustapenari, Laguntzari eta Babesari buruzko abenduaren 5eko 15/2005 Foru Legearen arabera babesik gabeko egoeran ez dauden haur edo nerabeentzako programak edo ekintzak ez dira diruz lagunduko, ezta adingabeen babesgabetasun egoerei aurrea hartzea helburu ez dutenak ere.

3. Era berean ez dira lagungarritzat jotzen Agentziak deialdi hau argitaratzen den unean garatzen dituen ekintzak, ez eta Gizarte Zerbitzuen Zorroaren arabera eskaini behar dituenak ere, prestazio bermatuak izateagatik.

3. oinarria. Diru-laguntzaren zenbatekoa eta konkurrentzia.

1. Entitateek deialdi honetako bigarren oinarriko lehen atalean adierazitako ekintzen barnean sartutako programa bakar baterako diru-laguntza jasotzen ahalko dute.

2. Hona hemen programa bakoitzerako aurreikusitako zenbatekoak guztira:

a) Abegi-familiak sentsibilizatu, prestatu eta laguntzeko: 20.000 euro.

b) Familia adoptatzaileak sentsibilizatu, prestatu eta laguntzeko: 20.000 euro.

c) Babesgabetasun arrisku arina/moderatua duten adingabeentzako esku-hartze terapeutikoak eta gizarte eta hezkuntza arlokoak, eta/edo babesgabetasun arriskua sor dezaketen egoerei aurrea hartzea helburu dutenak, zehazki, egoera horietan dauden adingabeen bizi baldintzak hobetzera zuzendutako programetarako (lehen, bigarren eta hirugarren mailako prebentzio programa eta ekintzak eginez): 76.470 euro.

3. Aurreko ataleko a) eta b) letretan aurreikusitako kasuan, diru-laguntzaren zenbatekoa ez da urtean 10.000 eurotik gorakoa izanen, programa bakoitzeko, eta c) letran aurreikusitako kasuan, 12.500 eurotik gorakoa, programa bakoitzeko.

4. Nolanahi ere, diru-laguntza emateko ezinbestekoa izanen da aurrekontuan horretarako krediturik izatea.

5. Diru-laguntzak emateko prozedura norgehiagokako araubideari jarraikiz tramitatuko da.

6. Programetako batean deialdia hutsik geratzen bada edo aurreikusitako aurrekontua agortzen ez bada, kreditu-geldikina aurrekontu nahikoa ez duten programen aurrekontua handitzeko erabiltzen ahalko da, programa bakoitzean aurreikusitako zenbatekoarekiko modu proportzionalean.

4. oinarria. Diru-laguntza jaso dezaketen gastuak.

1. Diru-laguntza jaso dezaketen gastuak diru-laguntzaren xedeko jarduera garatzeko beharrezkoak direnak izanen dira. Zehazki, diru-laguntza jaso dezaketen gastuak dira gauzatu beharreko ekintzetarako gastuak eta ekintza horiek burutzen dituzten langileen gastuak.

2. Egin beharreko ekintzetan sartzen dira lokalen alokairua edo erabilera, haiek entitatearenak izan edo ez.

3. Langileen gastuaren atalean, entitateak ekintza gauzatzeko propio kontratatzen dituen langileen gastuak sartzen ahal dira, edo entitateko langileek beraiek ekintzan duten dedikazioaren araberako portzentaje bat; kasu horretan, zehatz-mehatz identifikatu beharko dira langile horiek.

4. Entitatearen lokalei edo langileei buruzko justifikazioak aurkeztuz gero, entitateak berariaz ziurtatu beharko du zer portzentajeko dedikazioa izan den diru-laguntzaren xedeko ekintzetan.

5. Lokalak edo izendatutako langileak Nafarroako Foru Komunitateko Administrazioak diruz laguntzen edo kontratatzen duen baliabide bati atxikita daudenean, ezin izanen da diru-laguntzarik eman gastu horretarako.

5. oinarria. Entitate eskatzaileek bete beharreko baldintzak.

1. Deialdi honetan aipatzen diren diru-laguntzak jaso ahal izateko, entitateek baldintza hauek bete beharko dituzte:

a) Legez eratutako pertsona juridikoa izatea eta bidezkoak diren erregistroetan inskribatuta egotea.

b) Diru-laguntza jasoko duen jarduera Nafarroako Foru Komunitatean egitea.

c) Irabazi-asmorik ez izatea.

d) Erakundearen xedea babesgabetasun arriskuan dauden adingabeekin edo babesgabetasuna prebenitzearekin lotutako jarduerak prestatzea dela espresuki agertzea estatutuetan.

e) Bere xedeak bete daitezen bermatzeko egitura, baliabide material eta langile nahikoa izatea, baita proposatutako helburuak lortzeko behar den gaitasun operatiboa ere.

f) Zerga arloko betebeharrak eta Gizarte Segurantzarekikoak eguneraturik izatea eta Nafarroako Foru Komunitateko Administrazioarekiko eta haren erakunde autonomoekiko zorrak kitatuak izatea.

g) Diru-laguntzen onuraduna izateko Diru-laguntzei buruzko Foru Legearen 13. artikuluko 2. eta 3. idatz-zatietan ezarritako gainerako debekurik ez urratzea.

2. Aipatutako baldintzak horiek guztiak eskaerak aurkezteko epea bukatzen den egunean eta diru-laguntza jasotzen duen jarduerak irauten duen bitartean bete beharko dira.

6. oinarria. Programa gauzatzeko epea.

Laguntzaren xede diren programak gauzatzeko epea urtebetekoa da (2016. urtean egin behar dira. Edozein egunetan hasten direla ere, diruz lagundutako jarduerek 2016ko abenduaren 1a baino lehen bukatuta egon behar dute.

7. oinarria. Eskaerak aurkezteko epea eta tokia.

Eskaerak Familiaren eta Adingabeen Zuzendariordetzaren Erregistroan aurkeztuko dira (Abejeras kalea, 9, Iruña), Eskubide Sozialetako Departamentuaren Erregistroan (González Tablas kalea 7, 31005 Iruña), Nafarroako Gobernuaren Erregistro Orokorrean edo Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan aipatzen diren tokietako edozeinetan, 30 egun naturaleko epean, deialdia Nafarroako Aldizkari Ofizialean argitaratu eta biharamunetik hasita.

Posta bulegoen bitartez aurkezten diren eskabideek posta zerbitzuak arautzen dituen abenduaren 3ko 1829/1999 Errege Dekretuan aurreikusitako zehaztapenak bete beharko dituzte.

8. oinarria. Dokumentazioa.

Eskaera egiteko eskabide orokorra aurkeztu beharko da, entitatea legez ordezkatzeko ahalmen nahikoa duen pertsonak sinatua, espresuki adierazita zein programatarako den. Horrekin batera, agiri hauek aurkeztuko dira:

a) Entitate eskatzaileari buruzko agiri orokorrak:

–Entitatearen estatutuak.

–Diru-laguntzaren eskabidea sinatzen duen pertsonaren ordezkaritza frogatzen duen agiria eta pertsona horren nortasun agiri nazionala.

–Kasuan kasuko inskripzioak bidezko diren erregistroetan egin direla frogatzen duten agiriak: Nafarroako Gobernuko Lehendakaritzako, Funtzio Publikoko, Barneko eta Justiziako Departamentuko Elkarteen Erregistroko inskripzioa, edo dagokion beste edozein inskripzio.

–Identifikazio fiskaleko txartela.

–Transferentzia bidez ordaintzeko eskaera.

–Erantzukizuneko aitorpena, entitatearen ordezkariak emana, agerrarazten duena ez entitateak, ez administratzaileek edo ordezkariek ez dutela diru-laguntzen onuradun izateko debekurik urratzen. Debeku horiek Diru-laguntzei buruzko Foru Legearen 13. artikuluko 2. eta 3. idatz-zatietan ageri dira.

–Entitateak Gizarte Segurantzarekiko zerga betebeharrak ordainduta dituela egiaztatzen duen ziurtagiria, edo Nafarroako Foru Komunitateko Administrazioarekin edo haren erakunde autonomoekin dituen zorrak ordainduta dituela; ziurtagiri hori eskaera aurkeztu eta, gehienez ere, bi hilabete lehenagokoa izanen da.

Diru-laguntzei buruzko Foru Legearen 13. artikuluko 8. idatz-zatian eta Nafarroako Foru Komunitateko Administrazioari buruzko Foru Legearen 9. artikuluko 4. idatz-zatian xedaturikoarekin bat, ziurtagiriak Foru Komunitateko Administrazioko organoek eman behar badituzte edo administrazio honek dagoeneko badauzkan datuak badira, ez da beharrezkoa izanen eskatzen diren agiriak aurkeztea. Kasu horietan, agirietan aldaketarik izan ez bada, berriz aurkeztu beharrean, entitatearen ordezkariaren aitorpen bat aurkez daiteke, inguruabar hori azaltzeko.

b) Diru-laguntza eskaeraren xede den programaren gaineko memoria teknikoa, programaren deskribapena eta ondoko datu hauek zehazturik:

–Helburuak.

–Zein giza-talderi zuzentzen zaizkion ekintzak.

–Eginen diren jardueren eta haien metodologiaren azalpena.

–Laguntza emanen zaien pertsonen kopuruaren kalkulua, eta ekintzen bidez lortu nahi diren emaitzen aipamena.

–Ekintza/Programa horretara bideratuko diren langileak eta baliabideak.

–Lan egutegia. Ekintzak diru-laguntza eskatzen den urte berean egin beharko dira.

–Ebaluazio sistema.

–Programaren/Ekintzaren justifikazioa.

–Eta programa baloratzeko interesgarriak izan daitezkeen gainerako gorabehera guztiak.

c) Dokumentazio ekonomikoa:

–Programako gastuen ta diru-sarreren guztirako aurrekontua, kontzeptuz kontzeptu xehakatua: egin beharreko ekintza zehatzak eta ekintza horiek eginen dituzten langileak.

–Kasu bakoitzean, zer beste baliabide dituen programa osoa finantzatzeko, kontuan hartuta diru-sarrerak, jaso daitekeen diru-laguntza barne, ezin direla programaren kostu osoa baino handiagoak izan.

–Kasu bakoitzean, diru-laguntza osorik aurreratzeko, zinpeko aitorpenaren bidez egindako justifikazio txosten bat, non frogatuko baita entitateak ez duela irabazi-asmorik, ezta behar adinako baliabiderik ere diruz laguntzen den jarduera behin-behinekoz finantzatzeko.

9. oinarria. Antolamendua eta instrukzioa.

1. Deialdi honen ondorioetarako, Familiaren eta Adingabeen Zuzendariordetzako Adingabearen Babes eta Sustapenerako Atalari esleitu zaizkio diru-laguntzak emateko prozedura antolatu eta instruitzeko aurreikusitako eginkizunak. Oinarri hauetan instrukzio organoari egindako aipamenak atal horri egindakotzat hartuko dira.

Instrukzio organoak arlo juridikoko administrazio publikoko teknikari baten eta arlo ekonomikoko beste baten laguntza izaten ahalko du.

2. Eskaerak aipatu diren betebeharrak betetzen ez baditu, entitate interesdunari eskatuko zaio 15 egun naturaleko epean okerra zuzen dezala, eta hala egin ezean, eskaera bertan behera utzi duela ulertuko da, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeak eta Nafarroako Foru Komunitateko Administrazioari buruzko abenduaren 3ko 15/2004 Foru Legeak ezarritako moduan ebazpena eman ondotik.

3. Eskaeren balorazioa batzorde tekniko batek eginen du. Honako hauek osatuko dute batzorde hori: Familiaren eta Adingabeen zuzendariordeak, Adingabearen Babes eta Sustapenerako Ataleko buruak eta Adopzioaren eta Familia-harreraren Ataleko buruak.

4. Programak baloratu ondoren, instrukzio organoak ebazpen proposamena igorriko dio organo eskudunari.

10. oinarria. Balorazioa.

1. Entitate eskatzaileek aurkezten dituzten programen balorazioa ondoren zehazten diren irizpideetan oinarrituko da. Behean aipatzen den atal bakoitzak, gainera, zenbait azpiatal izanen ditu, 1. eranskinean ezarritako irizpideei jarraikiz:

a) Entitate eskatzaileen balorazioa. 15 puntu gehienez, honela banaturik:

–Entitatearen helburuak, xedeari eta diruz laguntzen ahal diren ekintzei begira: 5 puntu gehienez.

–Haurraren eta nerabeen babesaren arloan aurretik duen esperientzia, 5 puntu gehienez.

–Herri, probintzia edo bestelako mailetan hezkuntzaren, gizartearen eta osasunaren esparruko bestelako entitate eta elkarteekin lankidetza eta koordinazioa, 5 puntu gehienez.

b) Programen balorazioa, 50 puntu gehienez, 8. oinarriaren b) letran eskatutako edukia kontuan hartuta. Zehazki:

–Programaren kalitatea, 45 puntu gehienez.

–Aurreko urteetan garatutako programaren eraginkortasuna (diru-laguntzarik izan edo ez): 5 puntu gehienez.

c) Baloratu beharreko beste alderdi batzuk, 35 puntu gehienez.

–Aurreko urteetan garatutako programaren jarraipena (diru-laguntzarik izan edo ez): 5 puntu gehienez.

–Oinarrizko zerbitzu komunitarioek egindako beste programen osagarri izatea eta haiekin koordinatzea, 5 puntu gehienez.

–Programa zein neurritan egokitzen den xedeko populazioaren beharretara, 5 puntu gehienez.

–Aurkeztutako programaren berrikuntza, besteak beste helburuei, edukiei, metodologiari edo programan erabilitako baliabideei dagokienez, 10 puntu gehienez.

–Programaren eraginkortasunaren eta efizientziaren adierazleen sistema: 10 puntu gehienez.

2. Ondoko entitate hauek deialditik kanpo geldituko dira:

a) Ekintzen programa 8. oinarriaren b) letran eskatutako edukiaren araberakoa ez dutenak (diru-laguntza eskaeraren xede den programaren deskribapena eta haren gaineko memoria teknikoa).

b) Hamargarren oinarriaren lehen ataleko b) letran aurreikusitako programaren kalitatearen balorazioan 35 puntu baino gutxiago lortzen dutenak.

c) Deialdiaren guztirako balorazioan 50 puntu baino gutxiago lortzen dutenak.

3. Onartzen diren entitateen zerrenda eginen da, puntuazioaren araberakoa, eta bakoitzari eman beharreko diru-laguntzaren zenbatekoa ezarriko da.

4. Diru-laguntzak emateko, ezarritako balorazio irizpideak aplikatzeak dakarren lehentasun ordenari jarraituko zaio, erabilgarri dagoen kreditua agortu arte.

5. Gastuaren eta diru-sarreren arteko aldetik ateratzen den defizita izanen da emanen den zenbatekoa, kontuan hartu gabe Pertsonen Autonomiarako eta Garapenerako Nafarroako Agentziatik jaso beharreko laguntza, halakorik bada, eta deialdi honen 3. oinarrian ezarritako mugekin.

6. Eskaera guztietarako behar adinako krediturik ez badago, ez da hainbanaketarik eginen.

7. Eskaeran aurkeztutako kalkulu ekonomikoa benetan justifikatutakoa bezalakoa ez bada, Diru-laguntzei buruzko Foru Legean aurreikusitakoaren arabera erregularizatu beharko da diru-laguntzaren zenbatekoa.

11 oinarria. Diru-laguntza emateko ebazpena.

1. Prozeduraren instrukzioa eginda eta ebazpen-proposamena igorri ondoren, Pertsonen Autonomiarako eta Garapenerako Nafarroako Agentziako zuzendari kudeatzaileari dagokio ebazpena ematea.

Diru-laguntza emateko kontuan hartu diren baldintzak aldatuz gero, ebazpen hori aldatzea ekar dezake berarekin.

2. Ebazpena eman eta jakinarazteko epea hiru hilabetekoa izanen da, eskaerak aurkezteko epea bukatzen denetik hasita. Epe hori bukatuta, berariazko ebazpenik eman eta jakinarazi ez bada, eskaera ezetsi egin dela ulertuko da.

3. Ebazpenean, gutxienez, diru-laguntza jasotzen duten eskatzaileen zerrenda eta bakoitzari emandako diru-laguntzaren zenbatekoa jaso beharko dira, eta espresuki adieraziko da zein eskaerari esan zaion ezetz, halakorik baldin bada.

12. oinarria. Diru-laguntzaren ordainketa.

Diru-laguntzei buruzko 11/2005 Foru Legearen 33. artikuluan ezarritakoari jarraikiz ordainduko da diru-laguntza, hau da, ordainketa bakar batean ebazpenarekin batera, irabazi-asmorik gabeko entitateek edo horien federazio, konfederazio edo taldeek aski baliabiderik ez dutenean diruz lagundutako jarduera behin-behinekoz finantzatzeko, eta, betiere, hori behar bezala frogatzen badute.

2. Diru-laguntzaren ordainketa aurreratua egitea zilegi ez den kasuetan, diru-laguntza ordainduko da programa egin dela justifikatu ondoren 14. oinarrian adierazitakoari jarraikiz.

13. oinarria. Jarraipena eta kontrola.

Instrukzio organoak jarduketen jarraipena, ebaluazioa eta kontrola eginen du, eta haien kalitateaz eta eraginkortasunaz arduratuko da. Horretarako, jarraipen eta kontrolerako beste jarduketa batzuk galarazi gabe, entitate onuradunak egindako jarduerei buruzko urtero memoria tekniko bat aurkeztu beharko du justifikazio ekonomikoarekin batera.

14. oinarria. Entitate onuradunen betebeharrak.

Entitate onuradunek betebehar hauek izanen dituzte:

a) Diru-laguntza zein programa eta jardueratarako ematen den, horiek deialdiaren oinarrien arabera gauzatzea, ez baita zilegi diru hori beste helburu batzuetarako erabiltzea.

b) Jarduera egin dela eta diru-laguntza emateko edo erabiltzeko eskatutako baldintza guztiak bete direla justifikatzea, jarduera bukatu eta hilabeteko epean. Urriaren 31tik aurrera bukatzen diren jardueren kasuan, 2016ko abenduaren 1a baino lehen justifikatu beharko dira.

c) Laguntza ematen duen organoak eta indarra duen antolamendu juridikoaren arabera eskudun diren bestelako organoek egin beharreko egiaztapen lanak onartzea.

d) Lagundutako jarduera finantzatzeko eskatu edo lortutako bestelako diru-laguntza, laguntza, diru-sarrera edo baliabideen berri ematea diru-laguntza ematen duen organoari. Jakin bezain laster emanen da horren berri, eta, betiere, jasotako dirua zertan erabili den frogatu baino lehen.

e) Jasotako funtsen aplikazioari buruzko frogagiriak gordetzea, agiri elektronikoak barne, egiaztatze eta kontrol lanen xede diren bitartean.

f) Entitatearen izaera dela-eta kontabilitatean eskatzen ahal zaizkion betebeharrak betetzea.

g) Entitateak programaren diru-sarreren eta gastuen balantzea aurkeztuko du justifikaziorako eta, harekin batera, diruz lagundutako programari aplikatutako gastuen zerrenda bat, non zehaztuko baitira dokumentu zenbakia, kontzeptua, jaulkitzailea, hartzailea, jaulkipen-data eta ordainketaren data eta zenbatekoa.

Zerrenda horrekin batera frogagiriak aurkeztu beharko dira (fakturak edo antzeko froga-balioa duten dokumentuak); jatorrizkoak izan beharko dute, eta haien fotokopia bat erantsita aurkeztuko dira. Frogagiri guztietan (fakturak, banku-laburpenak, ordainagiriak, etab.) honako hauek agertuko dira: jaulkitzailea, hartzailea, data, kontzeptua, prezioa eta ordainketa-modua; eta ordainketa frogatzen duen dokumentua erantsita eduki behar dute.

h) Memoria teknikoa aurkeztea. Bertan, gutxienez, honako datu hauek bilduko dira:

–Entitatearen eta programaren identifikazioa.

–Lortutako helburuak.

–Parte hartu edo onura lortu duen giza taldea.

–Egindako jardueren azalpen laburra, honako hauek jasoz: edukiak, metodologia, bilakaera denboran eta beste erakundeekin izandako koordinazioa.

–Proiektua gauzatzean izandako zailtasunak.

–Proiektuaren balorazioa, ebaluaziorako ezarri ziren irizpideen araberakoa.

i) Familia, Gazteria, Kirol eta Gizarte Gaietako kontseilariak uztailaren 2an emandako 212/2010 Foru Aginduan ezarritako betebeharrak betetzea. Foru agindu horren bidez, Nafarroako Gobernuaren parte-hartzearen zabalkundea egiteko arauak ezarri ziren, gizarte zerbitzuen, garapenerako lankidetzaren, familiaren, haurren eta kontsumoaren arloetan diruz lagundutako edo kontratatutako zerbitzu eta zentroetan egiten diren programa, jarduera, inbertsio eta jarduketetarako.

j) Proiektua egiteko hornitzaileen kontrataziorako 12.000 euro baino gehiago behar baldin badira, diru-laguntzaren onuradunak behar den bezala frogatu beharko du hornitzailea efizientziaren eta ekonomiaren irizpideei jarraikiz hautatu dela.

Horretarako, entitateak aski izanen du proiektua egiteko hiru aurrekontu aurkeztea, hori egiterik dagoenean.

k) Diruz lagundutako jardueraren parte bat egiteko hirugarrenekin azpikontratazioa egin behar izanez gero, azpikontratazio horrek ez du emandako diruaren %25 baino gehiago hartuko.

l) Eskubide Sozialetako Departamentuaren baimena eskatu eta eskuratzea diruz lagundutako proiektuan funtsezko aldaketak egiteko, proiektua gauzatzea nabarmen aldatzen edo zailtzen duten inguruabarrak gertatzen direnean.

Funtsezko aldaketatzat jotzeko, helburuetan, emaitzetan, onura hartzen duen populazioan edo lurralde kokapenean eragina izan beharko du, edo, hasierako aurrekontuarekin alderaturik, diru-laguntza jaso dezakeen gastu bakoitzaren %5eko desbideratze ekonomikoa gertatu beharko da. Proiektua aldatzeko eskaeretan aldaketa edo zailtasun horren gainean behar adina arrazoi eman beharko dira, eta inguruabar horiek gertatu eta berehala jakinarazi beharko dira, betiere, diruz lagundutako proiektua gauzatzeko epea bukatu baino lehen. Diru-laguntza emateko kontuan hartutako baldintzen edozein aldaketak, administrazioak onartu ala ez, diru-laguntza emateko ebazpena aldarazten ahalko du, eta, hala badagokio, kasuan kasuko zenbatekoa itzuli beharko da.

Proiektua gauzatu bitartean gertatzen diren gainerako gorabehera eta aldaketa ez-funtsezkoak arrazoituta adieraziko zaizkio Nafarroako Gobernuari justifikazio txostenean, barnean dela Nafarroako Gobernutik kanpoko finantzabideak handitzeagatik guztirako kostua handitzea.

15. oinarria. Itzulketak.

1. Betebeharrak betetzen ez badira, Diru-laguntzei buruzko azaroaren 9ko 11/2005 Foru Legearen 35. artikuluan eta hurrengoetan xedatutakoari jarraituko zaio.

2. Familia, Gazteria, Kirol eta Gizarte Gaietako kontseilariak uztailaren 2an emandako 212/2010 Foru Aginduan ezarritako betebeharrak ez betetzeak berarekin ekarriko du diru-laguntzako kopuruak itzultzea, foru agindu horren 8.2 artikuluan ezarritako portzentajean. Foru agindu horren bidez, Nafarroako Gobernuaren parte-hartzearen zabalkundea egiteko arauak ezarri ziren, gizarte zerbitzuen, garapenerako lankidetzaren, familiaren, haurren eta kontsumoaren arloetan diruz lagundutako edo kontratatutako zerbitzu eta zentroetan egiten diren programa, jarduera, inbertsio eta jarduketetarako.

16. oinarria. Diru-laguntzaren bateragarritasuna.

Foru agindu honetako diru-laguntzak bateragarriak izanen dira helburu bererako ematen diren bestelako diru-laguntzekin, betiere haien zenbatekoa, bakarrik edo beste diru-laguntza, laguntza, diru-sarrera edo baliabide bereki batzuekin baturik, onuradunak egin beharreko jardueraren kostua baino handiagoa ez bada.

Beste laguntza edo diru-sarrera batzuk lortzearen ondorioz diruz lagundutako proiektuaren edo programaren zenbatekoa gainditzen bada, soberakina Nafarroako Foru Administrazioari itzuli beharko zaio.

17. oinarria. Gardentasuna.

1. Nafarroako Aurrekontu Orokorren kargurako diru-laguntzen onuradunen gardentasun betebeharrak arautzen dituen irailaren 11ko 59/2013 Foru Dekretuaren 2. artikuluan aipatzen diren entitateek Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritako gardentasun betebeharrak bete beharko dituzte, Nafarroako Aurrekontu Orokorren kargurako diru-laguntzak jasotzen badituzte eta bi inguruabar hauek gertatzen badira:

a) Emandako diru-laguntza 20.000 eurotik gorakoa izatea urtean.

b) Emandako diru-laguntza entitate onuradunaren negozio-zifraren edo urteko aurrekontuaren %20tik gorakoa izatea.

Aurreko idatz-zatian ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira. Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez guztizko batura. Erreferentziako negozio-zifra edo urteko aurrekontua honako hauen arteko txikiena izanen da:

a) Aurreko urteko negozio-zifra edo aurrekontu exekutatua.

b) Hala bada, diru-laguntza ematen duenean entitatearen organo eskudunak onartutako negozio-zifra edo aurrekontua.

Aipatu diren inguruabarrak gertatzeagatik gardentasun betebeharrak dituzten entitate onuradunek jarraian adierazten den informazioa eman beharko dute:

a) Entitatearen gobernu, administrazio eta zuzendaritza organoen osaera.

b) Organo horiek osatzen dituzten kideen zerrenda.

c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan jasotakoa izanen da.

d) Kargudun bakoitzaren dedikazio araubidea gobernuko, administrazioko eta zuzendaritzako eginkizunetarako.

e) Enitate onuradunaren urteko azken kontuen kopia bat.

Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta diru-laguntza kudeatzen duen administrazio unitateari bidaliko zaio. Eskabidearekin batera borondatez aurkeztu ez bada, informazioa bidaltzeko epea hilabetekoa izanen da, diru-laguntza ematen duen ebazpena jakinarazten edo argitaratzen den egunetik hasita, argitaratuz gero.

Informazio hori urtebetez egonen da aztergai Nafarroako Gobernu Irekiaren Atarian argitaratzen denetik hasita, eta gehienez 15 hilabetez utziko da bertan, informazioa kudeatzen duen organoan sartzen den egunetik hasita. Epe hori igarota, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.

Entitateak gardentasun betebeharra bete behar ez badu, aurreikusitako inguruabarrak gertatzen ez direlako, horren gaineko aitorpena aurkeztu beharko du.

Entitateak ekitaldi berean diru-laguntza bat baino gehiago jasotzen baditu, ez du informazioa errepikatu beharko diru-laguntza bakoitzerako, salbu eta hasieran eman zituen datuak aldatzen badira.

Onuradunak informazioa emateko betebeharrak ez betetzeak ekar ditzakeen zehapenak galarazi gabe, ez-betetze kasuetan, onartutako diru-laguntza ordaindu gabe utziko da, aurrerakinak barne, eta, hala badagokio, kobratutako zenbatekoak itzuli beharko dira, Diru-laguntzei buruzko azaroaren 9ko 11/2005 Foru Legearen 35.1.c) artikuluan ezarritakoari jarraikiz.

2. Gardentasunari eta Gobernu Irekiari buruzko ekainaren 21eko 11/2012 Foru Legearen 20. artikuluan xedatutakoarekin bat, Pertsonen Autonomiarako eta Garapenerako Nafarroako Agentziak, diru-laguntzak emateko jakinarazpena egin ondoko hilabetean, Nafarroako Gobernuaren Atarian argitaratuko duen zerrenda batean jarriko ditu diru-laguntzen onuradunak, laguntzen zenbatekoak eta araudi erregulatzailea.

18. oinarria. Errekurtsoak.

1. Deialdi honen eta bere oinarrien kontra gora jotzeko errekurtsoa jartzen ahal da, Nafarroako Gobernuari zuzendua, Nafarroako Aldizkari Ofizialean argitaratu eta biharamunetik hasita hilabeteko epean, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean eta Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoari jarraikiz.

2. Foru agindu hau aplikatzeko egintzen aurka gora jotzeko errekurtsoa jartzen ahalko da Eskubide Sozialetako kontseilariari zuzendua, haiek jakinarazi edo Nafarroako Aldizkari Ofizialean argitaratu edo errekurritutako egintza jakinarazi eta biharamunetik hasita hilabeteko epean, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean eta Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoari jarraikiz.

19. oinarria. Aplikatu beharreko legeria.

Foru agindu honetan aurreikusita ez dagoen guztian Diru-laguntzei buruzko azaroaren 9ko 11/2005 Foru Legean eta aplikatu beharreko gainerako arauetan ezarritakoari jarraituko zaio.

1. ERANSKINA

Diru-laguntza proiektuak baloratzeko irizpideen proposamena, 2016

Entitatearen balorazioa: 15 puntu gehienez.

–Helburuak: 5 puntu gehienez.

5 puntu. Deialdiaren helburua entitatearen estatutuen helburuen artean ageri da, zerrendako lehenengo edo bigarren tokian.

3 puntu. Deialdiaren helburua zerrenda horretako hirugarren edo laugarren tokian agertzen da.

Puntu bat. Deialdiaren helburua zerrenda horretako laugarren tokitik haratago agertzen da.

–Esperientzia: 5 puntu gehienez.

(0,25 puntu egiaztatutako esperientzia urte bakoitzeko, edo entitatea erregistratu zen egunetik aurrerako urte bakoitzeko. 5 puntu gehienez).

–Lankidetza eta koordinazioa: 5 puntu gehienez.

Beste entitate edo erakunde batzuekiko ohiko koordinazioa: 2 puntu.

Entitateak ohiko koordinazioa izatea bizpahiru entitate edo erakunderekin: 3 puntu.

Entitateak ohiko koordinazioa izatea lau entitate edo erakunderekin: 4 puntu.

Entitateak ohiko koordinazioa izatea lautik gorako entitate edo erakunderekin: 5 puntu.

Programaren balorazioa: 50 puntu gehienez.

–Kalitatea 45 puntu gehienez.

Jarraian adierazten diren alderdiak jasotzen diren heinean:

Helburuak: 4,5 puntu.

Zein gizatalderi zuzentzen zaion eta onuradunen kopurua: 4,5 puntu.

Jardueren deskribapena: 4,5 puntu.

Metodologiaren deskribapena: 4,5 puntu.

Giza baliabideak: 4,5 puntu.

Baliabide materialak: 4,5 puntu.

Jardueren egutegia: 4,5 puntu.

Ebaluazio sistemak (horrelakorik ba ote den): 4,5 puntu.

Biztanleriaren beharren araberakoa da (programaren zergatia justifikatzen da): 4,5 puntu.

Proiektuaren koherentzia: 4,5 puntu.

–Beste urte batzuetako eraginkortasuna: 5 puntu.

Azken urtea hartuko da erreferentzia gisa, espedientean jasotzen den memoriaren arabera. Memorian horrelako informaziorik agertzen ez bada, ez da punturik emanen.

Ezarritako helburu guztiak lortu dira: 5 puntu.

Helburuen % 50 lortu dira: 2,5 puntu.

Bestelakoak: 35 puntu gehienez.

–Aurreko urteetako jarraipena izatea: 5 puntu.

Azken urtea hartuko da erreferentzia gisa, espedientean jasotzen den memoriaren arabera. Memorian horrelako informaziorik agertzen ez bada, ez da punturik emanen.

Programaren xedeko giza-talde guztiengana zenbatean iritsi den baloratuko da (adingabeak eta familiak).

%95-%100engana iritsi da: 5 puntu.

%75-%94rengana iritsi da: 4 puntu.

%50-%74rengana iritsi da: 3 puntu.

%30-%49rengana iritsi da: 2 puntu.

–Komunitatearen oinarrizko zerbitzuek programa hau garatzeko egindako beste programa batzuekin nola koordinatzen den eta haiekin duen osagarritasuna: 5 puntu gehienez.

Puntu bat. Beste entitate edo programa batekin koordinatzen da erregularki edo aldian behin.

2 puntu. Bi entitate edo programarekin koordinatzen da erregularki edo aldian behin.

3 puntu. Hiru entitate edo programarekin koordinatzen da erregularki edo aldian behin.

4 puntu. Lau entitate edo programarekin koordinatzen da erregularki edo aldian behin.

5 puntu. Sarean lan egiten du (bezar bezala dokumentatuko da).

–Programa zenbateraino egokitzen den hura jasoko duten herritarren beharretara: 5 puntu gehienez.

–Programa berritzailea izatea: 10 puntu gehienez.

Berritzailea da proposatzen dituen helburu edo edukietan: 5 puntu gehienez.

Berritzailea da erabiltzen dituen baliabideetan eta metodologian: 5 puntu gehienez.

–Adierazle sistemak: 10 puntu gehienez.

–Eraginkortasunaren adierazleak: 5 puntu gehienez.

–Eragimenaren adierazleak: 5 puntu gehienez.

Iragarkiaren kodea: F1604523