Iragarkia

80. ALDIZKARIA - 2016ko apirilaren 27a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

15E/2016 FORU AGINDUA, apirilaren 12koa, Eskubide Sozialetako Departamentuko kontseilariak emana, Gizarte Integraziorako Etxebizitzen 2016 programako entitate laguntzaileei diru-laguntzak emateko deialdia onesten duena.

Erreferentzia:

Espedientearen kodea: 0011-1015-2016-000000.

Unitate kudeatzailea:

Eskubide Sozialetako Departamentua.

Oinarrizko Laguntzaren eta Gizarteratze-lanaren Zerbitzua.

Gizarteratzeko eta Gutxiengoei Arreta Emateko Atala.

Telefonoa: 848426900. Faxa: 948240108.

Helbidea: González Tablas kalea, 7.

Helbide elektronikoa: sincorso@navarra.es.

Espedientea:

Espediente mota: Gizarte Integraziorako Etxebizitzen 2016 programako entitate laguntzaileentzako diru-laguntzak.

Araudia:

Gizarte Zerbitzuei buruzko abenduaren 14ko 15/2006 Foru Legeak xedatzen du botere publikoen jarduketek, besteak beste, funtsezko helburu hauek izanen dituztela gizarte zerbitzuen arloan: pertsona guztien bizi kalitatea hobetzea eta haien normalizazioa, parte-hartzea eta integrazioa bultzatzea gizartean, politikan, ekonomian, lan arloan, kulturan eta hezkuntzan, autonomia pertsonala, familiarra eta taldeena bultzatzea, kohesio soziala eta elkartasuna sustatzea, pertsonen eta taldeen bazterketa egoerei aurrea hartzea eta haietaz arduratzea, eta gizarteak behar sozialak konpontzen parte har dezala bultzatzea, batez ere giza talde behartsuenak ordezkatzen dituzten entitateen bidez.

Ekainaren 17ko 69/2008 Foru Dekretuak eremu orokorreko Gizarte Zerbitzuen Zorroa arautzen du. Bertan, gizarte integraziorako etxebizitzak eskuratzeko laguntzak gizarteratze arloan bermaturik ez dagoen prestazio gisa ageri da.

Arau horietako aurreikuspenek bat etorri behar dute Diru-laguntzei buruzko azaroaren 9ko 11/2005 Foru Legekoekin. Foru lege horretan ezarrita dago onura publikoko edo gizarte intereseko jarduerak sustatzeko Nafarroako Aurrekontu Orokorren kargura ematen diren diru-laguntzei dagokien araubide juridiko orokorra. Diru-laguntzak eman baino lehen, organo eskudunak haien oinarri arautzaileak ezarri eta argitaratu beharko ditu, halako jarduerak egiten dituztenek eta diru-laguntza jasotzeko moduan daudenek aukera izan dezaten diru-laguntza eskuratzeko.

Era berean, irailaren 18ko 61/2013 Foru Dekretuak, etxebizitzaren arloko jarduketa babesgarriak arautzen dituenak, gizarte integraziorako etxebizitzen araubidea finkatzen du V. kapituluan.

Deialdi honen helburua da Gizarte Integraziorako Etxebizitzen Programako entitate laguntzaileei diru-laguntzak emateko oinarri arautzaileak ezartzea.

Deialdiak bide ematen die entitate interesdun guztiei berdintasunez parte har dezaten, eta, era berean, bermatzen du diru-laguntzak irizpide objektiboei jarraikiz emanen direla. Irizpide horiek Nafarroako Foru Komunitateak gizarte politikaren esparru orokorrean ezarritako jarraibideen arabera lehenetsiko dira.

Espedienteko txosten tekniko eta juridikoek adierazten dute, hurrenez hurren, diru-laguntza hauek egokiak eta interes publikokoak direla, eta deialdia eta oinarri arautzaileak, legezkoak.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak eta Eskubide Sozialetako Departamentuaren egitura organikoa ezartzen duen abuztuaren 28ko 128/2015 Foru Dekretuak emandako eskudantziak erabiliz.

AGINDU DUT:

1. Gizarte Integraziorako Etxebizitzen 2016 programako entitate laguntzaileei diru-laguntzak emateko deialdia onestea.

2. Deialdiaren oinarri arautzaileak onestea. Foru agindu honen eranskinean ageri dira.

3. 245.000,00 euroko gastua baimentzea, 2016ko gastuen aurrekontuko honako kontu-sail honen kargura:

4. Foru agindu hau eta eranskinak Nafarroako Aldizkari Ofizialean argitaratzea.

5. Deialdi honen eta oinarri arautzaileen kontra, gora jotzeko errekurtsoa jar daiteke, Nafarroako Gobernuari zuzendua, argitaratu eta biharamunetik hasita hilabeteko epean.

6. Foru agindu hau Gizarteratzeko eta Gutxiengoei Arreta Emateko Atalari, Ekonomia eta Aurrekontuak Kudeatzeko Ataleko Kontabilitate Zentroari, Idazkaritza Tekniko Nagusiko Administrazio Aferetarako Bulegoari eta Diru-laguntzen Datu Base Nazionalari igortzea, behar diren ondorioak izan ditzan.

Iruñean, 2016ko apirilaren 12an.–Eskubide Sozialetako kontseilaria, Miguel Laparra Navarro.

I. ERANSKINA

Irabazi-asmorik gabeko entitateei Gizarte Integraziorako Etxebizitzen Programaren funtzionamendu gastuetarako diru-laguntzak emateko 2016ko deialdiaren oinarriak

Lehena.–Xedea eta helburuak.

1. Nafarroako Foru Komunitatearen lurraldean, Gizarte Integraziorako Etxebizitzen programako entitate laguntzaileei 2016ko ekitaldirako diru-laguntzak emateko araubidea ezartzea du xede deialdi honek. Diru-laguntza horien bidez Gizarte Integraziorako Etxebizitzen programan, erosteko edo alokatzeko modalitatean, parte hartu eta gizarte-bazterketako egoeran dauden pertsonek beren inguruan gizarteratzeko behar duten akonpainamendu profesionalaren gastuak finantzatuko dira.

2. Deialdi honetatik kanpo utzi dira berariaz Gizarte Zerbitzuen Zorroan oinarrizko laguntzako prestazio bermatu gisa jasotako jarduketak, maiatzaren 22ko 32/2013 Foru Dekretuaren 24. artikuluan ezarritakoarekin bat. Foru dekretu horren bidez, Gizarte Zerbitzuei buruzko Foru Legea Oinarrizko Gizarte Zerbitzuen Programa eta Finantzaketa arloan garatzeko Erregelamendua onetsi zen.

Bigarrena.–Aurrekontuko diru erabilgarria.

Helburu horretarako, 245.000,00 euro bideratu dira. Diru kopuru hori 2016ko Gastuen Aurrekontuko “GIEE programa eta etxebizitzaren arloko beste akonpainamendu-neurri batzuk” izeneko 900003 91600 4819 231605 kontu-sailean dago erabilgarri.

Hirugarrena.–Entitate onuradunek bete beharreko baldintzak.

Deialdi honetan aipatzen diren diru-laguntzen onuraduna izateko, entitateek baldintza hauek bete beharko dituzte:

a) Legez eratutako pertsona juridikoak izatea, beren izaera juridikoaren araberakoak, eta, eskabideak aurkezteko epea bukatzean, Gizarte Zerbitzuen Erregistroan edo erregelamenduz dagokien administrazio erregistroan inskribatuta egon beharko dute.

b) Irabazi-asmorik ez izatea.

c) Sozietatearen helbidea edo ordezkaritza iraunkorra Nafarroan izatea.

d) Zerga arloko betebeharrak eta Gizarte Segurantzarekikoak egunean izatea eta Nafarroako Foru Komunitateko Administrazioarekiko eta haren erakunde autonomoekiko zorrak kitatuak izatea.

e) Diru-laguntzen onuraduna izateko Diru-laguntzei buruzko Foru Legearen 13. artikuluko 2. eta 3. idatz-zatietan ezarritako gainerako debekuak ez urratzea.

f) Etxebizitza Zerbitzuak Gizarte Integrazioko Etxebizitzen Programaren laguntzaile gisa aitortuak izatea, eta Etxebizitza Zerbitzuarekin eta Eskubide Sozialetako Departamentuarekin behar den lankidetza hitzarmena sinatua izatea.

Aipatutako baldintza horiek guztiak eskaerak aurkezteko epea bukatzen den egunean eta lagundutako jarduerak irauten duen denbora osoan bete beharko dira.

Laugarrena.–Jarduketek bete beharreko baldintzak.

Deialdi honetan aurreikusitako diru-laguntzak jaso ahal izateko, jarduketek honako baldintza hauek bete beharko dituzte:

a) Jarduketen asmoa izanen da bizitegi-bazterketak larriki ukituriko familiei erraztasunak ematea NASUVINSA sozietate publikoaren alokairu programan sar daitezen.

b) Azkeneko bost urtean programan sartu diren familiei edo azkeneko hiru urtean programaren bidez etxebizitza bat erosi duten familiei gizarte-akonpainamendua egiteko jarduketak izan beharko dira.

c) Jarduera horiek 2016an egitea. Ondorio horretarako, ebazpena ematen den eguna hartuko da jardueren hasiera-eguntzat, salbu eta entitate onuradunak lehenagoko bat adierazten badu berariaz, betiere deialdiaren urte naturalaren barnean.

d) 2006an, entitate bakoitzari gehienez 10 jarduketa berri egiteko diru-laguntza emanen zaio.

Bosgarrena.–Diru-laguntzen bateragarritasuna.

Deialdi honetako diru-laguntzak Espainiako edo atzerriko beste administrazio publiko edo erakunde publiko zein pribatu edo partikular batzuek jarduketa bera garatzeko ematen dituztenekin batzen ahalko dira.

Hala ere, zenbatekoak, bakarrik edo beste diru-laguntza, laguntza, diru-sarrera edo baliabide propio batzuekin baturik, ez du behin ere gaindituko entitate onuradunak egin beharreko jardueraren kostua. Justifikazio hori entitatearen ziurtagiri bat aurkeztuz eginen da, eta bertan adieraziko da programarako jasotako diru-sarrerek ez dituztela gainditzen programak sortutako gastuak.

Seigarrena.–Diruz laguntzen ahal diren gastuak.

Gizarte Integraziorako Etxebizitzen programan diruz laguntzen ahal diren gastuetan kontzeptu hauek sartzen ahalko dira:

a) Langileria gastuak: etxebizitza bat bilatzeko eta ingurunean txertatzeko prozesuan profesionalek familia onuradunei egiten dieten akonpainamenduaren ondoriozko gastuak. Akonpainamendu horretarako diru-laguntza ez da izanen kostu errealaren arabera finkatuko den gehieneko muga baino altuagoa, eta horretarako, Nafarroako Foru Komunitateko Administrazioan zerbitzu ematen duten gizarte-laneko profesionalentzat ezarritakoa hartuko da kontuan. Kalkulu hori egiteko formula hau erabiliko da:

2016an eginen diren jarduketa berrien kopurua gehi akonpainamendurako jarduketen kopurua (4. oinarriko b) atalean adierazitakoaren arabera kalkulatuak) bider 978,29 euroko modulua jarduketa bakoitzeko.

b) Langileen joan-etorrietarako gastuak, Gobernuak 2012ko azaroaren 28an hartutako Erabakian kostu errealaren gainean ezarritako muga gainditu gabe. Erabaki horren bidez jarraibideak eman ziren Nafarroako Foru Komunitateko Administrazioaren eta haren erakunde autonomoen zerbitzuko enplegatuek joan-etorriengatik egiten dituzten gastuak onesteko (2012ko 244. Nafarroako Aldizkari Ofiziala, abenduaren 17koa).

c) Jarduera egiteko zuzenean behar diren materialak eta hornidurak.

d) Zeharkako gastuak. Zilegi izanen da diru-laguntzari kopuru bat aplikatzea zeharkako kostuengatik. Zeharkako kostu horiek entitate onuradunaren funtzionamendu gastu orokorrak izanen dira, alegia: langileen gastuak, lokalenak, bulegoko materialenak eta bestelako gastu arruntak.

b), c) eta d) ataletako gastuak, guztira, ez dira izanen a) atalean ateratzen den kopuruaren %10etik gorakoak.

2. Gastu horiek 2016ko abenduaren 31ra arte egindako ondasun-emateenak edo zerbitzu-prestazioenak izanen dira, eta 2017ko otsailaren 10erako ordainduak egon beharko dira.

Zazpigarrena.–Eskaerak aurkeztea.

1. Entitate interesdunek eskabide bat aurkeztu beharko dute, horretarako prestatu den ereduaren araberakoa. Eredua Gizarteratzeko eta Babes Sozialerako Zuzendaritza Nagusian (González Tablas, 7, 31005 Iruña) eta erakunde beraren webgunean (www.cfnavarra.es) eskuratzen ahalko da.

2. Entitate interesdunaren legezko ordezkariak sinatuta aurkeztu beharko da eskabidea, deialdia Nafarroako Aldizkari Ofizialean argitaratu eta 20 egun naturaleko epean.

3. Eskaerak Gizarteratzeko eta Babes Sozialerako Zuzendaritza Nagusiaren Erregistroan (González Tablas, 7, 31005 Iruña) aurkeztuko dira, Nafarroako Gobernuaren Erregistro Orokorrean edo Herri Administrazioen Araubide Jurudikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan ezarritako tokietan. Posta bulegoen bidez aurkezten diren eskaerak gutun-azal ireki batean aurkeztu beharko dira, lehenbiziko orrialdeko goiko aldean onarpen data eta abenduaren 3ko 1829/1999 Errege Dekretuan, posta zerbitzuak arautzen dituen horretan, aipatzen diren gainerako zehaztapenak agerraraz daitezen. Gainera, entitate interesdunak, egun berean, telefax baten bidez jakinarazi beharko dio Gizarteratzeko eta Babes Sozialerako Zuzendaritza Nagusiari eskaera igorri duela.

Zortzigarrena.–Aurkeztu beharreko agiriak.

Eskabideak horretarako ereduaren arabera prestatuko dira eta entitatearen ordezkariak behar bezala sinatuko ditu. Haiekin batera agiri hauek aurkeztuko dira:

a) Entitatea Eskubide Sozialetako Departamentuaren menpeko Gizarte Zerbitzuen Erregistroan edo erregelamenduz dagokion beste erregistro batean inskribaturik dagoela frogatzen duen ziurtagiria edo hori frogatzeko beste agiri bat.

b) Etxebizitza Zerbitzuko Gizarte Integraziorako Etxebizitzen Programako entitate laguntzailea izatearen ziurtagiria, eta Eskubide Sozialetako Departamentuarekin eta Etxebizitza Zerbitzuarekin lankidetza hitzarmena sinatua izatearena.

c) Gizarte Segurantzaren Diruzaintza Orokorrak luzaturiko ziurtagiria, eskaera aurkeztu aurretik hilabeteko epean egina beranduenik, frogatzen duena indarra duten xedapenek Gizarte Segurantzaren aurrean ezartzen dizkion eginbeharrak egunean dituela.

d) Nafarroako Gobernuak eta/edo Espainiako Zerga Agentziak luzatutako ziurtagiria, eskaera aurkeztu aurretik hilabeteko epean egina beranduenik, frogatzen duena tributu arloko betebeharrak egunean dituela.

e) Hala behar izanez gero, eta 14. oinarrian xedatutakoari dagokionez, diru-laguntzaren helburuak betetzeko diru-funtsak aurretiaz behar direla frogatzeko txostena.

f) Erantzukizuneko aitorpena, entitatearen ordezkariak luzatua, entitateak, haren administratzaileek eta ordezkariek diru-laguntzen onuradun izateko debekurik urratzen ez dutela dioena. Debeku horiek Diru-laguntzei buruzko azaroaren 9ko 11/2005 Foru Legearen 13. artikuluko 2. eta 3. idatz-zatietan ageri dira.

g) Nahi izanez gero, entitate eskatzaileek, diru-laguntza eskabidearekin batera, deialdi honen hemezortzigarren oinarrian araututa dagoen gardentasun betebeharra betetzeko behar den informazioa aurkez dezakete. Informazio hori eskaerarekin batera aurkezten ez badute, diru-laguntza jasotzen duten entitateek oinarri hartan ezarritakoa bete beharko dute, eta hilabeteko epea izanen dute informazio hori aurkezteko, diru-laguntza emateko ebazpena jakinarazten edo, kasua bada, argitaratzen den egunetik hasita.

Diru-laguntzei buruzko azaroaren 9ko 11/2005 Foru Legearen 13.8 artikuluan eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 9.4 artikuluan xedatutakoari jarraikiz, a) eta b) letretan eskatzen diren agiriak ez dira aurkeztu beharko, baldin eta Eskubide Sozialetako Departamentuak jadanik dituen datuak edo dokumentuak badira. Kasu horietan, agirietan aldaketarik izan ez bada, berriz aurkeztu beharrean, entitatearen ordezkariaren adierazpen bat egiten ahalko da inguruabar hori azaltzeko, datuak zein espedientetan dauden azalduta.

Bederatzigarrena.–Diru-laguntza emateko prozedura eta instrukzioa.

1. Diru-laguntzak emateko prozedura norgehiagokakoa izanen da, Diru-laguntzei buruzko azaroaren 9ko 11/2005 Foru Legearen 17.1 artikuluan ezarritakoari jarraikiz.

2. Gizarteratzeko eta Babes Sozialerako Zuzendaritza Nagusiak tramitatuko ditu eskaerak, eta, instrukzio organo gisa, Oinarrizko Laguntzaren eta Gizarteratze-lanaren Zerbitzua arituko da. Horrexek egiaztatuko du diru-laguntzak hartzeko betebeharrak betetzen diren, eta eskaerak baloratuko ditu ofizioz, oinarri hauen arabera.

3. Diru-laguntzei buruzko azaroaren 9ko 11/2005 Foru Legearen 19.3 artikuluan ezarritakoarekin bat, ondotik aipatzen diren kasuetan interesdunari eskatuko zaio hamar egun balioduneko epean hutsegiteak zuzendu edo aginduzko agiriak aurkez ditzala, eta ohartaraziko zaio hori egin ezean eskaera bertan behera uzten duela ulertuko dela, espedientea artxibatzeko ebazpena eman ondoren, Araubide Juridikoari eta Administrazio Prozedura Erkideari buruzko Legearen 42. artikuluan aurreikusita dagoenari jarraikiz:

a) Eskaeran identifikazio daturik ez agertzea, dela eskatutako diru-laguntzari dagozkionak, dela entitate eskatzaileari buruzkoak.

b) 8. oinarriaren a) ataletik f) bitartera eskatutako dokumentazioan akatsak edo hutsak izatea.

c) Aurrekontua aldatu beharra dakarten arazoak (akats aritmetikoak, zehaztasunik eza, oso errealistak ez diren kostuak edo hautagarriak ez diren beste kostu batzuk). Horren ondorioz, gauzak argitzeko eskatzen ahalko da, eta instrukzio organoak aldaketak edo murrizketak ezartzen ahalko ditu akats edo datu zehazkabe horiei aurre egiteko.

d) Herri Administrazioen Araubide Juridikoari eta Administrazio Prozedura Erkideari buruzko Legearen 70. artikuluan aurreikusitako edozein kasu.

Gainerako kasu guztietan, eta, bereziki, baloratzeko aurkezten den dokumentazioari dagozkion guztietan, ez da zuzentzeko aukerarik izanen.

Hamargarrena.–Eskaeren balorazioa eta diru-laguntzaren zenbatekoa nola finkatuko den.

1. Eskaerak 0tik 100 puntura arteko eskala baten arabera baloratuko dira, II. eranskinean adierazitako irizpide objektiboak eta haien ponderazioa kontuan hartuta.

2. Diru-laguntzaren eskaera aintzat hartua izateko, esku-hartzeak gutxienez ere 50 puntu lortu beharko ditu.

3. Diru-laguntza eskatzen den zenbatekoa dinakoa izanen da.

4. Balorazio positiboa lortzen duten eskaeren zenbateko guztiek aurrekontuetan horretarako dagoen kreditua gainditzen badute, lehentasun hurrenkera bat ezarriko da, balorazioan lorturiko puntuazioaren arabera, eta diru-laguntzak muga horretaraino banatuko dira. Prozedura horren arabera diru-laguntza eskuratzen ahal duen azken proiektuarentzako diru-laguntza proposatuko da baldin eta haren kontzesioa eraginkorra bada, eta horretarako 11. oinarriko 2. atalean aurreikusitako tramiteari jarraituko zaio.

Hamaikagarrena.–Alegazioen tramitea.

1. Instrukzio organoak proposamen txostena eman aurretik, interesdunei entzutea emateko tramitea egiten ahalko da, Herri Administrazioen Araubide Juridikoari eta Administrazio Prozedura Erkideari buruzko Legearen 84. artikuluari jarraikiz.

2. Diru-laguntzaren proposamenaren zenbatekoa aurkeztutako eskaeran ageri dena baino txikiagoa baldin bada, instrukzio organoak eskaera berregiteko eskatzen ahalko du, konpromisoak eta baldintzak egokitu daitezen ematen ahal den diru-laguntzaren arabera, betiere hasierako xedea eta ezaugarriak errespetaturik. Aldatutako proiektu horren aurrekontua ez da txikiagoa izanen proposatutako diru-laguntzaren zenbatekoaren eta, halakorik badago, hasiera batean antzeko baldintzetan aurreikusitako kofinantzaketaren batura baino (eskaeran ageri den kofinantzaketa portzentaje bera mantenduko da).

Hamabigarrena.–Prozeduraren ebazpena.

1. Prozedura instruiturik eta aurkeztutako eskaerak ebazteko proposamena egin ondoren, Gizarteratzeko eta Babes Sozialerako zuzendari nagusiari dagokio ebazpena ematea, Diru-laguntzei buruzko azaroaren 9ko 11/2005 Foru Legearen bidez eta Eskubide Sozialetako Departamentuaren egitura organikoa ezartzen duen abuztuaren 28ko 128/2015 Foru Dekretuaren bidez esleitutako ahalmenen ondorioz.

2. Ebazpena eman eta jakinarazteko epea hiru hilabetekoa izanen da, eskaerak aurkezteko epea bukatzen denetik hasita. Epe hori bukatuta, berariazko ebazpenik eman eta jakinarazi ez bada, eskaera ezetsi egin dela ulertuko da.

3. Ebazpen horretan honako hauek agertuko dira: diru-laguntzak zer eskatzaileri esleitu zaizkion, laguntzen helburua, zenbatekoa, ordaintzeko eta justifikatzeko modua eta epea, eta gainerako eskaerak ezesteko arrazoiak, Diru-laguntzei buruzko arazoaren 9ko 11/2005 Foru Legearen 21. artikuluan xedatu bezala.

Hamahirugarrena.–Jakinarazpena eta argitalpena.

Deialdiaren ebazpena administrazio prozedura arautzen duen legedian ezarri bezala jakinaraziko zaie entitate interesdunei, eta Nafarroako Atarian argitaratuko da.

Hamalaugarrena.–Diru-laguntza ordaintzea.

1. Diru-laguntza aldez aurretik ordainduko da, Diru-laguntzei buruzko 11/2005 Foru Legearen 33. artikuluan ezarritakoari jarraikiz, kasu horietan non irabazi-asmorik gabeko entitateek edo horien federazio, konfederazio edo taldeek ez duten aski baliabiderik diru-laguntza jaso duen jardueraren gauzatzea behin-behinekoz finantzatzeko, betiere behar bezala frogatzen badute.

Horretarako, eskabidearekin batera aurkeztu beharreko dokumentazioaz gainera, funts horniduraren beharra frogatzen duen dokumentazioa aurkeztu beharko du entitateak, honako hauek erantsita: likideziaren behar iragankor hori frogatzen duen txostena, ordezkariaren ziurtagiri bat, entitatearen izenean dauden banku kontuak agertzen dituena, bankuko kontuetako uneko saldoak agertzen dituen bankuko ziurtagiri bat –banku elektroniko bidez lortutakoak ere onartuko dira–, eta diruzaintzako fluxuen hileroko aurreikuspen bat, kobrantzak, ordainketak, maileguak eta abar zehazten dituena, edo diru-laguntzaren xedeak betetzeko funtsak behar direla frogatzen duen beste edozein ziurtagiri.

2. Ordainketa aurreratzen den kasuetan, aldez aurretik gardentasun betebeharra betetzen dela frogatu beharko da, eta honela ordainduko da:

a) Esleitzen den diru-laguntza 60.000 eurokoa edo txikiagoa baldin bada, epe bakarrean pagatuko da, aurrerakin gisa, diru-laguntza emateko ebazpenarekin batera.

b) Esleitzen den diru-laguntza 60.000,00 eurotik gorakoa bada, honela eginen da: esleitutako zenbateko osoaren %50, ebazpena sinatzearekin batera, eta beste %50a behar diren gastuen eta kofinantzaketaren frogagiriekin batera.

3. Ordainketa aurreratua egitea bidezkoa ez den kasuetan, jarduera egin dela justifikatu ondoren ordainduko da diru-laguntza, 15. oinarrian adierazitakoari jarraikiz. Ordainketa partzialak egiten badira, ordainketa proportzionalak izanen dira, behin gastuak eta kofinantzaketa –horrelakorik bada– justifikatu ondoren.

Hamabosgarrena.–Justifikazioa.

1. Entitate onuradunek diruz lagundutako proiektuaren gauzatzeari buruzko txosten teknikoa eta ekonomikoa aurkeztu beharko dute (partziala edo azkenekoa, zer dagokion), inprimaki ofizialean eta euskarri informatikoan. Eredua Oinarrizko Laguntzaren eta Gizarteratze-lanaren Zerbitzuan eskura daiteke, edo Nafarroako Atarian (www.cfnavarra.es).

2. Azken txostenak edo txosten partzialak justifikazio-kontuaren itxura izanen du, eta gastua justifikatzen duten agiriekin batera aurkeztuko da. Hurrengo alderdi hauek jasoko ditu:

a) Justifikazio teknikoa:

a.1) Gizarte Integraziorako Alokairuko Etxebizitzen programaren jarduketa berriak 2016. urtean. Familia-unitatea etxebizitzan sartu eta hiru hilabetera, jarraipen txosten bat aurkeztuko da.

b.1) Azkeneko bost urtean programan sartu diren familiei edo azkeneko hiru urtean programaren bidez etxebizitza bat erosi duten familiei gizarte-akonpainamendua egiteko jarduketak: Ekitaldiaren azken hiruhilekoan, jarduketei egindako jarraipenaren gaineko txostenak aurkeztuko dira.

b) Justifikazio ekonomikoa:

b.1) Diru-laguntzaren xedeko proiektuari aplikatutako gastuen zerrenda, honako hauek zehaztuta: agiri zenbakia, kontzeptua, emailea, igorri zeneko data, zenbatekoa eta egiazki noiz pagatu den. Zerrenda horrekin batera, gastuaren eta ordainketaren frogagiriak aurkeztuko dira (jatorrizkoak edo behar bezala konpultsatutako fotokopiak). Egiaztagiri gisa, banku-laburpenak, ordainagiriak eta fakturak onartuko dira bakarrik, eta horietan jaulkitzailearen eta hartzailearen datuak, data, kontzeptua, prezioa eta ordaintzeko modua adierazi beharko dira, maiatzaren 10eko 23/2013 Foru Dekretuan xedatutakoari jarraikiz, horren bidez fakturazio betebeharrak arautzen dituen erregelamendua onetsi baitzen. Jatorrizko fakturei zigilua jarriko zaie, hartutako diru-laguntza justifikatzeko Gizarteratzeko eta Babes Sozialerako Zuzendaritza Nagusian aurkeztu izanaren adierazgarri.

b.2) Gizarte Segurantzaren Diruzaintza Orokorrak luzaturiko ziurtagiria, eskaera aurkeztu aurretik hilabeteko epean egina beranduenik, frogatzen duena indarra duten xedapenek Gizarte Segurantzaren aurrean ezartzen dizkion eginbeharrak egunean dituela.

b.3) Nafarroako Gobernuak eta/edo Espainiako Zerga Agentziak luzatutako ziurtagiria, eskaera aurkeztu aurretik hilabeteko epean egina beranduenik, frogatzen duena tributu arloko betebeharrak egunean dituela.

b.4) Jarduerak, diru-laguntzaz gain, funts berekiekin edo bestelako diru-laguntza edo baliabideekin finantzatu direnean, azken justifikazioan –edo justifikazio partzialetan, hala balegokio– diru-laguntza horien zenbatekoa eta jatorria frogatu beharko dira eta, orobat, funtsak diruz lagundutako jarduerei aplikatu zaizkiela. Hala ez bada, ordaindutako zati proportzionala itzuli beharko da. Diru-laguntzaren bigarren eta hurrengo ordainketak egiteko eskubidea ematen duen azken justifikazio tekniko eta ekonomikoa 2016ko abenduaren 31n aurkeztuko da, beranduenez.

Proiektua bukatu ondoren, eta betiere 2017ko otsailaren 10a baino lehen (egun hori barne), entitateak proiektua gauzatu dela justifikatzen duen txosten teknikoa eta ekonomikoa aurkeztu beharko ditu Gizarteratzeko eta Babes Sozialerako Zuzendaritza Nagusian.

Hamaseigarrena.–Hornitzaileak hautatzea eta azpikontratatzea.

Deialdi honetan aurreikusitako ondorioetarako, ez da bidezkoa azpikontratazioa egitea, alegia, beste batzuekin diru-laguntzaren xede den jardueraren hein bateko gauzatzea hitzartzea.

Hamazazpigarrena.–Entitate onuradunen betebeharrak.

Entitate laguntzaileek honako hauek bete beharko dituzte:

a) Diru-laguntza ematea eragin duen programa deialdi honetako oinarri arautzaileen, baldintzen eta betebehar formal eta materialen arabera gauzatzea, eta dirua zer helburutarako eman zen, hartarako baino ez erabiltzea.

b) Oinarri arautzaileotan aipatzen diren frogagiriak, tartekoak eta azkenekoak, adierazitako egunetan aurkeztea.

c) Nasuvinsa sozietate publikoaren alokairu programan sartzeko, aurreko urteetan egindako jarduketen jarraipenari buruzko txostenak aurkeztea. Jarduketa bakoitzerako jarraipen txosten bat egin beharko da, urteko azken hiruhilean aurkeztuko dena. Jarduketa ixtea dagokion kasuetan, programan izandako ibilbidearen balorazio orokorra jasoko du txosten horrek.

d) Azkeneko hiru urteotan egindako erosketen jarraipenari buruzko txostenak aurkeztea. Jarduketa bakoitzaren jarraipen txostenak urtero aurkeztuko dira, azkeneko hiruhilekoan, Gizarteratze Atalak ezarritako eredua erabiliz. Jarduketa ixtea dagokion kasuetan, programan izandako ibilbidearen balorazio orokorra jasoko du txosten horrek.

e) Oinarrizko Laguntzaren eta Gizarteratze-lanaren Zerbitzuari jakinaraztea proiektuari esleitutako langile taldean egiten diren aldaketa guztiak, eta, bereziki, laneko bajak. Baja kasuetan, langileak hilabeteko epean ordeztu beharko dira, diru-laguntza ematean aintzat hartutako langile gastuak osatzeko behar den lanaldi portzentajerako kontratatuz.

f) Proiektuen zabalkundea eta publizitatea egitean, diruz lagundutako entitateek diru-laguntza nork eman dien adierazi beharko dute, Familia, Gazteria, Kirol eta Gizarte Gaietako kontseilariak uztailaren 2an emandako 212/2010 Foru Aginduan ezarritakoarekin bat. Gainera, foru agindu horren 2. artikuluaren baldintza orokorrak eta 4.1 b) artikuluaren berariazko baldintzak bete beharko dituzte.

g) Laguntza ematen duen organoak eta indarra duen antolamendu juridikoaren arabera eskudun diren bestelako organoek egin beharreko egiaztapen lanak onartzea.

h) Entitatearen izaera dela-eta kontabilitatean eskatzen ahal zaizkion betebeharrak betetzea.

i) 2017ko otsailaren 10a baino lehen, diru-laguntzaren xede den proiektu bakoitzaren betetze maila neurtzeko datu kuantitatibo eta kualitatiboak biltzen dituen ebaluazio memoria aurkeztea Gizarteratzeko eta Babes Sozialerako Zuzendaritza Nagusian, horretarako dagoen ereduaren arabera prestatua. Eredua Gizarteratzeko eta Babes Sozialerako Zuzendaritza Nagusiaren bulego nagusietan eta haren webgunean izanen da entitate interesdunen eskura. Nahi badu, entitate onuradunak bestelako agiriak aurkezten ahalko ditu, idatziak edo grafikoak, diru-laguntzaren xede den proiektuaren bilakaera ona bermatzen dutenak.

j) Deialdi honetan eta aplikatzekoa den legedian ezarritako kasuetan, harturiko funtsak itzultzea.

k) Diru-laguntzei buruzko azaroaren 9ko 11/2005 Foru Legeak onuradunei ezartzen dizkien gainerako eginbeharrak.

l) Eskubide Sozialetako Departamentuaren baimena eskatu eta eskuratzea diruz lagundutako proiektuan funtsezko aldaketak egiteko, proiektua gauzatzea nabarmen aldatzen edo zailtzen duten inguruabarrak gertatzen direnean. Funtsezko aldaketatzat jotzeko, helburuetan, emaitzetan, onura hartzen duen populazioan edo lurralde kokapenean eragina izan beharko du, edo, hasierako aurrekontuarekin alderaturik, diru-laguntza jaso dezakeen gastu bakoitzaren %5eko desbideratze ekonomikoa gertatu beharko da. Proiektua aldatzeko eskaeretan aldaketa edo zailtasun horren gainean behar adina arrazoi eman beharko dira, eta inguruabar horiek gertatu eta berehala jakinarazi beharko dira, betiere, diruz lagundutako proiektua gauzatzeko epea bukatu baino lehen. Diru-laguntza emateko kontuan hartutako baldintzen edozein aldaketak, administrazioak onartu ala ez, diru-laguntza emateko ebazpena aldarazten ahalko du, eta, hala badagokio, kasuan kasuko zenbatekoa itzuli beharko da. Proiektua gauzatu bitartean gertatzen diren gainerako gorabehera eta aldaketa ez-funtsezkoak arrazoituta adieraziko zaizkio Nafarroako Gobernuari justifikazioko txosten partzialean edo azken txostenean, barnean dela Nafarroako Gobernutik kanpoko finantzabideak handitzeagatik guztirako kostua handitzea.

Hemezortzigarrena.–Gardentasun betebeharrak.

Nafarroako Aurrekontu Orokorren kargurako diru-laguntzen onuradunen gardentasun betebeharrak arautzen dituen 59/2013 Foru Dekretuaren 2. artikuluan aipatzen diren entitateek Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritako gardentasun betebeharrak bete beharko dituzte, Nafarroako Aurrekontu Orokorren kargurako diru-laguntzak jasotzen badituzte eta bi inguruabar hauek gertatzen badira:

a) Emandako diru-laguntza 20.000 eurotik gorakoa izatea urtean.

b) Emandako diru-laguntza entitate onuradunaren negozio-zifraren edo urteko aurrekontuaren %20tik gorakoa izatea.

Aurreko idatz-zatian ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira. Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez guztizko batura. Erreferentziako negozio-zifra edo urteko aurrekontua honako hauen arteko txikiena izanen da:

a) Aurreko urteko negozio-zifra edo aurrekontu exekutatua.

b) Hala badagokio, negozio-zifra, edo diru-laguntza ematen den ekitaldian entitatearen organo eskudunak onartutako aurrekontua. Aipatu diren inguruabarrak gertatzeagatik gardentasun betebeharrak dituzten entitate onuradunek jarraian adierazten den informazioa eman beharko dute:

a.–Entitatearen gobernu, administrazio eta zuzendaritza organoen osaera.

b.–Organo horiek osatzen dituzten kideen zerrenda.

c.–Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan jasotakoa izanen da.

d.–Kargudun bakoitzaren dedikazio araubidea gobernuko, administrazioko eta zuzendaritzako eginkizunetarako.

e.–Entitate onuradunaren urteko azken kontuen kopia bat.

Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta diru-laguntza kudeatzen duen administrazio unitateari bidaliko zaio.

Informazioa bidaltzeko epea hilabetekoa izanen da, diru-laguntza ematen duen ebazpena jakinarazten edo, hala bada, argitaratzen den egunetik hasita.

Informazio hori urtebetez egonen da aztergai Nafarroako Gobernu Irekiaren Atarian argitaratzen denetik hasita, eta gehienez 15 hilabetez utziko da bertan, informazioa kudeatzen duen organoan sartzen den egunetik hasita. Epe hori igarota, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.

Entitateak gardentasun betebeharra bete behar ez badu, aurreikusitako inguruabarrak gertatzen ez direlako, horren gaineko aitorpena aurkeztu beharko du.

Entitateak ekitaldi berean diru-laguntza bat baino gehiago jasotzen baditu, ez du informazioa errepikatu beharko diru-laguntza bakoitzerako, salbu eta hasieran eman zituen datuak aldatzen badira.

Onuradunak informazioa emateko betebeharrak ez betetzeak ekar ditzakeen zehapenak galarazi gabe, ez-betetze kasuetan, onartutako diru-laguntza ordaindu gabe utziko da, aurrerakinak barne, eta, hala badagokio, kobratutako zenbatekoak itzuli beharko dira, Diru-laguntzei buruzko azaroaren 9ko 11/2005 Foru Legearen 35.1.c) artikuluan ezarritakoari jarraikiz.

Hemeretzigarrena.–Ez-betetzeak.

1. Proiektua burutu ezik edo diru-laguntza emateko ezarritako baldintzak bete ezik, eta Diru-laguntzei buruzko azaroaren 9ko 11/2005 Foru Legearen 35. artikuluan aipatzen diren zergatikoak gertatuz gero, edo deialdian berariaz aipatzen diren betebeharrak bete ezik, hartutako zenbatekoa itzuli egin beharko da, osorik edo hein batean. Legez ezarritako kasuetan, gainera, bidezkoa izanen da diru-laguntza ordaindu zenetik itzuli beharraren gaineko ebazpena ematen den arte sorrarazitako berandutze-interesak ordaintzeko eskatzea.

Dena dela, espedientea ixteko ebazpenean ezartzen dena gorabehera, entitateak berak eskatzen ahalko du justifikatu ez den diru-laguntza zatia itzultzeko. Horretarako azken eguna 2017ko otsailaren 10a izanen da. Horretarako, entitateak frogagiri bat aurkeztu beharko du erakusteko diru-sarrera bat egin duela Eskubide Sozialetako Departamentuaren alde, aurretik ordaindu zaion zenbatekoaren eta justifikatutako zenbatekoaren arteko aldea adinakoa. Kasu horretan, ez da berandutze-interesik aplikatuko, eta ulertuko da entitateak espresuki uko egiten diola itzultzen duen zenbatekoari.

2. Entitate onuradunak ia baldintza guztiak betetzen dituenean eta bere konpromisoak betetzeko jarrera garbia erakusten duenean, itzuli beharreko zenbatekoa proportzionaltasun irizpideari jarraituz zehaztuko da, diru-laguntza emateko ezarritako baldintzetatik zenbat eta noraino bete ez diren ikusita.

3. Ez-betetzeetan maila desberdinak egonen dira, honako hauen arabera:

–Esku-hartzea noraino bete den, arlo teknikoari eta aurrekontuari dagokienez.

–Aurretik baimen administratiboa eduki gabe eginiko aldaketen zenbatekoa eta munta.

–Txostenak epetik kanpo aurkezten direnean, zenbat egun iragan diren.

4. Aurreko ataletan xedatutakoa gorabehera, arau-hauste eta zehapenei dagokienez, azaroaren 9ko 11/2005 Foru Legearen 42. artikuluan eta hurrengoetan xedatutakoari jarraikiko zaio, edo, bestela, Nafarroako Foru Komunitateko Administrazioari buruzko abenduaren 3ko 15/2004 Foru Legearen V. tituluan xedatutakoari. Itzulketa eskatzeko prozedura 12 hilabeteko epean ebatziko da, hasten denetik kontatuta.

Hogeigarrena.–Bidezko diren administrazio errekurtsoak.

1. Deialdi honen eta oinarri arautzaileen kontra, bidezko da gora jotzeko errekurtsoa aurkeztea, Nafarroako Gobernuari zuzendua, argitaratu eta biharamunetik hilabeteko epean, Herri Administrazioen Araubide Juridikoari eta Administrazio Prozedura Erkideari buruzko Legean eta Nafarroako Foru Komunitateko Administrazioari buruzko abenduaren 3ko 15/2004 Foru Legean xedatutakoarekin bat.

2. Aplikazio egintzen aurka eta ebazpenaren aurka (berariazkoa edo ustezkoa) gora jotzeko errekurtsoa aurkezten ahalko da, Eskubide Sozialetako kontseilariari zuzendua, Nafarroako Foru Komunitateko Administrazioari buruzko abenduaren 3ko 15/2004 Foru Legean eta Herri Administrazioen Araubide Juridikoari eta Administrazio Prozedura Erkideari buruzko Legean xedatutakoarekin bat.

Hogeita batgarrena.–Aplikatu beharreko arauak.

Arau hauetan aurreikusita dagoenaz gain, Diru-laguntzei buruzko azaroaren 9ko 11/2005 Foru Legearen xedapenak aplikatuko dira.

II. ERANSKINA

Proiektuak baloratzeko irizpide objektiboak. GIEE Programa

A.–Erakundearen bidezkotasuna (%20) (20,00 puntu).

a.1. Oinarri soziala eta ezarpena Nafarroan (3,00 puntu arte).

a.1.1. Jarduera urteak, erregistroko inskripzioaren arabera (puntu bat arte).

(0,10 puntu, urteko).

a.1.2. Bazkide kopurua, eskala honen arabera (puntu bat arte).

>300: puntu bat.

50 eta 300 bitarte: 0,50 puntu.

<50: 0,00 puntu.

Fundazioen kasuan: 0,50 puntu.

a.1.3. Entitateko zuzendaritza edo ardura karguetan dagoen emakume kopurua, honako eskala honen arabera (1,00 puntu gehienez).

%50 eta hortik gora: puntu bat.

%20tik gora eta %50etik behera: 0,50 puntu.

<%20: 0,00 puntu.

a.2. Gaitasun finantzarioa (7,00 puntu arte).

a.2.1. Aurreko urteko emaitza ekonomikoen azterketa.

(Diru-sarreren eta gastuen arteko aldea) (3,00 puntu arte).

Superabita (Diru-sarr.> Gast.): 3,00 puntu.

Oreka (Diru-sarr. = Gast.): 2,00 puntu.

Defizita %10etik beherakoa bada [(Diru-sarr.- Gast.)/Gast. < - %10]: puntu bat.

Defizita %10etik gorakoa: 0,00 puntu.

a.2.2. Entitateak aurreko urtean izan dituen finantzabideen analisia (4,00 puntu gehienez).

–Finantzabide pribatuak izateagatik, honako eskala honen arabera (2,00 puntu arte).

> Diru-sarrera guztien %30: 2,00 puntu.

> Diru-sarrera guztien %15: puntu bat.

Gainerakoak: 0,00 puntu.

–Finantzaketa iturriak dibertsifikatzeagatik, honako eskala honen arabera (2,00 puntu arte).

Nafarroako Gobernuaz gainera, > 4 finantzabide ezberdin: 2,00 puntu.

Nafarroako Gobernuaz gainera, > 2 finantzabide ezberdin: puntu bat.

Gainerakoak: 0,00 puntu.

a.3. Gaitasun operatiboa eta esperientzia gizarteratze-lanaren arloan (10 puntu arte).

a.3.1. Azkeneko 4 urteotan gizarteratze-lanaren arloan egindako jarduera/proiektu kopurua.

(0,5 puntu proiektuko; proiekturik ez badago, 0 puntu) (2,00 puntu arte).

a.3.2. Azpiegituren analisia (2,00 puntu arte).

–Lokal propioak baldin baditu: puntu bat.

–Ez du lokal propiorik, baina lokal publikoak erabili ohi ditu: 0,75 puntu.

–Oinarrizko ekipamendua badu: puntu bat.

a.3.3. Entitateak kontrataturiko pertsonak.

(0,5 puntu lanaldi osoan ari den langile bakoitzeko; lanaldia laburragoa bada, proportzioan dagokiona) (2,00 puntu arte).

a.3.4. Prestakuntzako praktiketan ari diren pertsonak.

(0,5 puntu bakoitzeko) (2,00 puntu gehienez).

a.3.5. “Auditoretza soziala” egiten dute, edo kalitate sistema homologatu bat dute (puntu bat arte).

a.3.6. Genero berdintasunerako plan bat ezarria dute (puntu bat arte).

B.–Proiektuaren kalitate teknikoa (%80).

b.1. Helburuen, emaitzen eta jardueren arteko koherentzia aztertzea (20 puntu arte).

Hau da, helburuen, emaitzen eta jardueren artean koherentziarik ba ote dagoen aztertuko da: jarduera horiek eginez emaitzak lortzen direnetz eta emaitza horiek lortuz helburuak betetzen direnetz, kontuan hartuz, batetik, ingurunea, eta bestetik, helburuak eta jarduerak diseinatzeko oinarriak: 0 puntutik 20ra arteko eskala kualitatibo batean neurtzen da, sailkapen honen arabera:

–Erabateko koherentzia dago helburuen, emaitzen eta jardueren artean: 20,00 puntu.

–Jardueren eta emaitzen artean bakarrik dago koherentzia: 15,00 puntu.

–Jardueren eta helburuen artean bakarrik dago koherentzia: 10,00 puntu.

–Koherentzia dago helburuen eta emaitzen artean: 5,00 puntu.

–Inkoherentea da: 0,00 puntu.

b.2. Adierazleen eta egiaztatze bideen egokitasuna (10 puntu arte).

Azpi-irizpideetarako, eskala kualitatibo hau erabiliko da: egokia, hala-holakoa, desegokia.

–3 puntu arte, adierazleengatik:

Oso egokia: 3,00 puntu.

Egokia: 2,00 puntu.

Hala-holakoa: 1,00 puntu.

Desegokia: 0,00 puntu.

–3 puntu arte, egiaztatzeko bideengatik:

Oso egokia: 3,00 puntu.

Egokia: 2,00 puntu.

Hala-holakoa: 1,00 puntu.

Desegokia: 0,00 puntu.

–4 puntu arte, ebaluazio eta jarraipen prozesu bat baldin badago:

Oso egokia: 4,00 puntu.

Egokia: 3,00 puntu.

Hala-holakoa: 2,00 puntu.

Desegokia: 0,00 puntu.

b.3. Giza baliabideen eta baliabide tekniko eta ekonomikoen analisia (10 puntu arte).

–2 puntu arte, giza baliabideak egokiak izanez gero. Profil teknikoen definizioa eta esleitutako eginkizunak baloratzen dira.

Oso egokia: 2,00 puntu.

Egokia: 1,00 puntu.

Hala-holakoa: 0,50 puntu.

Desegokia: 0,00 puntu.

–2 puntu arte, boluntarioak izateagatik eta haiei esleitutako eginkizunak zehazteagatik, eskala honen arabera:

Boluntarioak dituzte proiektu honetarako = puntu bat.

Ez dute edo ez dira aipatzen = 0.

–Betetzen dituzten eginkizunak deskribatzen dituzte.

Oso egokia: 1,00 puntu.

Egokia: 0,75 puntu.

Hala-holakoa: 0,50 puntu.

Desegokia: 0,00 puntu.

–2 puntu arte, baliabide tekniko egokiak izanez gero (materialak, lokalak, ...).

Oso egokia: 2,00 puntu.

Egokia: 1,00 puntu.

Hala-holakoa: 0,50 puntu.

Desegokia: 0,00 puntu.

–2 puntu arte, aurrekontua egoki xehakatua aurkeztuz gero.

Oso egokia: 2,00 puntu.

Egokia: 1,00 puntu.

Hala-holakoa: 0,50 puntu.

Desegokia: 0,00 puntu.

–2 puntu arte, kofinantzaketa baldin badago, eskala honen arabera:

NGtik kanpoko ekarpena > %10: 2,00 puntu.

NGtik kanpoko ekarpena %10eraino: puntu bat.

Ez dago NGtik kanpoko ekarpenik: 0,00 puntu.

b.4. Akonpainamendu sozialerako metodologiaren analisia (10 puntu arte). Akonpainamendu sozialaren deskribapena eta arretarako banakako plana baloratuko dira: helburuak, jarduerak, esku hartzeko esparruak eta espero diren emaitzak; eskala kualitatibo honen arabera:

Oso egokia: 10,00 puntu.

Egokia: 7,50 puntu.

Hala-holakoa: 5,00 puntu.

Desegokia: 0,00 puntu.

b.5. Beste entitate eta baliabide sozial batzuekin duen bateragarritasunaren eta koordinazioaren analisia (5 puntu arte):

–Koordinazio egitura edo jarduketa protokolo bat (batzordea, aldian aldiko bilerak, telefono deiak, eta abar) planteatzen du familia unitateen erreferentziako oinarrizko gizarte zerbitzuekin: (3 puntu arte).

Oso egokia: 3,00 puntu.

Egokia: 2,00 puntu.

Hala-holakoa: 1,00 puntu.

Desegokia: 0,00 puntu.

–Arazo sozial bera jorratzen duten beste entitate eta baliabide sozial batzuekin koordinatzeko egitura bat proposatzen du (batzordea, aldizkako bilerak, etab.): (2 puntu arte).

Oso egokia: 2,00 puntu.

Egokia: 1,00 puntu.

Hala-holakoa: 0,50 puntu.

Desegokia: 0,00 puntu.

–Nor bere aldetik aritzen da, edo ez da inolako koordinazio sistemarik aipatzen: 0 puntu.

b.6. Arreta hartzen duten familia unitateen analisia (12 puntu arte), 2 azpi-irizpideetarako, eskala kualitatibo bat erabiliko da (oso egokia, egokia, hala-holakoa, desegokia).

–6 puntu arte, pertsonen profilaren analisiagatik eta zenbatespen kuantitatiboagatik.

Oso egokia: 6,00 puntu.

Egokia: 4,00 puntu.

Hala-holakoa: 2,00 puntu.

Desegokia: 0,00 puntu.

–6 puntu arte, langileak hautatzeko irizpideen analisiagatik:

Oso egokia: 6,00 puntu.

Egokia: 4,00 puntu.

Hala-holakoa: 2,00 puntu.

Desegokia: 0,00 puntu.

b.7. Eraginkortasunaren eta efizientziaren analisia, aurreko urteetako jarduerek jarraitzen badute (13 puntu arte).

–5 puntu arte aurreko urtean aurreikusitako jarduketak gauzatzeko orduan izandako eraginkortasunagatik (aurreko urteetan proposatutako jarduketen eta benetan gauzatutakoen arteko erlazioa baloratuko da).

Oso egokia: 5,00 puntu.

Egokia: 3,00 puntu.

Hala-holakoa: 2,00 puntu.

Desegokia edo ez dago halakorik: 0,00 puntu.

–8 puntu arte lanaldi osoa duen teknikari bakoitzak izandako esku-hartzeen kopuruagatik (hala jarraipen lanak nola aurkeztutako eskaera berriak kontatuko dira).

> 40 esku-hartze: 8 puntu.

35 eta 39 bitarte: 6 puntu.

30 eta 34 bitarte: 4 puntu.

25 eta 29 bitarte: 2 puntu.

< 25: 0 puntu.

Iragarkiaren kodea: F1604495