Iragarkia
73. ALDIZKARIA - 2016ko apirilaren 18a
1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
352/2016 EBAZPENA, martxoaren 18koa, Nafar Lansare-Nafarroako Enplegu Zerbitzuko zuzendari kudeatzaileak emana, laneratzeko orientazio eta jarraipen ekintzak egiteko diru-laguntzen deialdia eta oinarri arautzaileak onesten dituena.
Enpleguari buruzko Legearen Testu Bategina onesten duen urriaren 23ko 3/2015 Legegintzako Errege Dekretuaren 2. artikuluaren arabera, enplegu politikaren helburuetako bat da langabeziaren aurrean prebentziozko ikuspuntua hartzea, bereziki luzaroko langabeziaren aurrean, langabeei banakako arreta emanez, lana eskuratzeko aukerak hobetzen dituzten politika aktiboetako ekintza integratuen bidez. Artikulu horretan helburutzat proposatzen da laneratzeko politika egokiak bermatzea laneratzeko eragozpen handiak dituzten taldeei, bereziki gazteei, emakumeei, desgaitasuna dutenei eta 45 urtetik gorako luzaroko langabeei.
3/2015 Legegintzako Errege Dekretuaren II. tituluko II. kapituluan, langabeek enplegu zerbitzu publikoek ematen dituzten zerbitzuak nola jaso arautzen da.
Irailaren 5eko 751/2014 Errege Dekretuak Espainiako Enplegua Suspertzeko Estrategia onesten du 2014-2016 aldirako. Estrategia horrek sei ardatz ezartzen ditu urriaren 23ko 3/2015 Legegintzako Errege Dekretuan enplegua suspertzeko jasotzen diren politiketarako. 1. ardatzean (Orientazioa) honako jarduketa hauek daude: informazioa, lanbide orientazioa, motibazioa, aholkularitza, lanbide profilaren eta gaitasunen diagnostiko eta zehaztapena, ikaskuntzako banakako ibilbidearen diseinu eta kudeaketa, enplegu bilaketa, lan bitartekotza eta, laburbilduz, onuradunei laneratzen laguntzeko jarduketak.
Estrategia horrek hiru erregelamenduren onespena aurreikusten du. Horietako bat da Enplegu Sistema Nazionalaren zerbitzu komunen zorroarena, urtarrilaren 16ko 7/2015 Errege Dekretuaren bidez onetsi zena. Erregelamendu horrek enplegu zerbitzu guztiek eman behar dituzten zerbitzu komunak garatzen ditu, oinarrizkotzat eta beharrezkotzat jotzen baitira erabiltzaileei arreta egokia, integrala eta etengabea emateko eta erabiltzaile guztiek zerbitzuak berdintasun baldintzetan jasotzen dituztela bermatzeko. Zerbitzu horiek aski izan beharko dira enplegu eskatzaileek bide izan dezaten laneratzeko ibilbide pertsonalizatuan ezarritakoa eta jarduera-konpromisoaren eskakizunak betetzeko.
Bestetik, lortu beharreko helburuak finkatzen dira enplegu politikako urteko planean, bai eta helburu horien eskuratze maila baloratzeko adierazleak ere.
Nafar Lansare-Nafarroako Enplegu Zerbitzuaren estatutuetan ageri da zerbitzu horren eginkizun nagusietako bat laneratzeko eta enplegagarritasuna hobetzeko orientazioa eta prestakuntza bultzatzea dela.
Arlo horietan, eta bereziki laneratzea zaila duten taldeekin, lan egiten duten entitate interesdunen finantzaketa erraztearren, beharrezkoa da diru-laguntzen oinarri arautzaileak onestea jarduketa hauek egiteko: informazioa, lanbide orientazioa, motibazioa, aholkularitza, lanbide profilaren eta gaitasunen diagnostiko eta zehaztapena eta, laburbilduz, onuradunei laneratzen laguntzeko jarduketak.
Azaldutakoarekin bat, eta Nafar Lansare-Nafarroako Enplegu Zerbitzuaren Estatutuak onesten dituen abenduaren 2ko 263/2015 Foru Dekretuaren 12. artikuluak eman dizkidan eskudantziak erabiliz,
EBATZI DUT:
1. Laneratzeko orientazio eta jarraipen ekintzak egiteko diru-laguntzen oinarri arautzaileak eta zehaztapen teknikoak onestea, ebazpen honen I. eta II. eranskinetan ageri direnak, bai eta diru-laguntza horien deialdia ere.
2. 300.000 euroko gastua baimentzea 2016ko gastuen aurrekontuko “Enplegu Plana. Entitate laguntzaileen ekintzak laneratzeko orientazioa emateko. Konferentzia Sektorialak kofinantzatuak” izeneko 950001 96100 4819 241102 kontu-sailaren kargura, betiere aurrekontuan horretarako diru erabilgarririk badago eta dagoen kreditu erabilgarria agortu arte.
Urtean zehar kontu-sail horretan diru erabilgarririk baldin badago, baimendutako gastua handitzen ahalko da.
3. Ebazpen hau Orientaziorako, Enplegua Sustatzeko eta Enpresentzako Zerbitzuetarako Zerbitzuari eta Kontu-hartzailetza Delegatuari igortzea.
4. Ebazpen honen aurka gora jotzeko errekurtsoa jartzen ahal da, Nafarroako Gobernuko Eskubide Sozialetako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.
5. Ebazpen hau eta eranskinak Nafarroako Aldizkari Ofizialean argitaratzea.
Iruñean, 2016ko martxoaren 18an.–Nafar Lansare-Nafarroako Enplegu Zerbitzuko zuzendari kudeatzailea, Paz Fernández Mendaza.
I. ERANSKINA
Oinarri arautzaileak
1. oinarria. Xedea eta jarduketa esparrua.
Deialdi honen xedea da laneratzeko orientazio eta jarraipen ekintzak egiteko diru-laguntzak eman, jarraitu eta kudeatzeko araubidea ezartzea Nafarroako Foru Komunitatean, parte-hartzaile bakoitzaren premien eta ezaugarrien arabera, beren enplegagarritasun baldintzak hobetzeko.
2. oinarria. Programak eta azken hartzaileak.
A.–Programak.
Zerbitzu hauek jaso ditzakete diru-laguntzak:
1.–Lanbide orientazioa.
Zerbitzu integral honen xedea da informazioa, banakako egoeraren diagnostikoa, aholkularitza, motibazioa eta akonpainamendua lan trantsizioetan, bai hezkuntzatik lan mundura, bai lan-bizitzako laneko edo langabeziako egoera batetik halako beste egoera batera.
Zerbitzu honen helburua da erabiltzaileei beren enplegagarritasuna hobetzen laguntzea, beren lanbide karrera sustatzea eta beren kontratazioa erraztea edo autoenplegura zuzentzea. Orobat, eta beren premien diagnostikoa abiapuntu hartuta, orientazioaren ondorioz Enplegu Sistema Nazionalaren zerbitzu komunen zorroko beste zerbitzu espezializatu batzuk eman daitezke. Orientazioko zerbitzuak jarduera hauek biltzen ditu:
a) Banakako diagnostikoa eta profila egitea: arreta espezifikoa emanen zaio erabiltzaileari bere abileziak, gaitasunak, prestakuntza eta esperientzia, interesak, familia egoera eta izan ditzakeen lanbide aukerak identifikatzeko, bai eta jarduera hori garatzen duen protokoloan garrantzitsutzat jotzen diren beste aldagai batzuk ere. Erabiltzailearen profila egiteko eta erabiltzailea enplegagarritasunaren arabera sailkatzeko erabiliko da informazioa.
b) Enplegurako ibilbide pertsonalizatuaren diseinua: erabiltzailea laneratzeko prozesu egokiena prestatu eta modu fede-emailean jakinaraziko zaio, bidezko denean, bere profil, premia eta itxaropenen arabera, irizpide tekniko eta estatistikoen bidez, proposatzen diren jarduketa nagusiak, egutegia eta egiaztapen eta jarraipen elementuak barne. Ibilbide hori egiteko, erabiltzaileak eta enplegu zerbitzu publikoak enplegurako akordio pertsonala izenpetu beharko dute.
Gutxienez, ekintza hauetako bat jaso beharko du ibilbideak:
1. Lanbide aukerak identifikatzea. Horretarako, erabiltzaileek Espainian, Europar Batasunean eta munduan dituzten enplegu aukerak aztertuko dira, arrazoituz, beren lanbide profilaren arabera.
2. Prestakuntza ibilbide bat identifikatzea, erabiltzailearen profilaren arabera beharrezkoa bada, erabiltzailearen gaitasunak eta lanbide kualifikazioa hobetzeko egokiak diren prestakuntza ekintzak eta/edo lan esperientziaren edo prestakuntza ez-formalaren egiaztapena proposatuz.
3. Erabiltzaileak, bere profilaren arabera, enplegu bilaketa aktiborako egin beharko dituen jarduketak identifikatzea.
c) Akonpainamendu pertsonalizatua ibilbidea garatzeko eta jarduera-konpromisoa betetzeko: tutore edo orientatzaile batek banakako jarraipen pertsonalizatua eginen du erabiltzaileak bere ibilbidea gauzatzeko egiten dituen jarduketen gainean, ibilbidea berrikusi eta eguneratuko du, jomugak, etapak, betekizunak eta, prestazioak jasotzen dituzten erabiltzaileen kasuan, jarduera-konpromisoa finkatuko ditu eta betetzen direla begiratuko du, eta aholkularitza, informazio eta laguntzako beste edozein eginkizun, erabiltzailea aktibatzeko eta bere enplegagarritasuna hobetzeko.
d) Aholkularitza eta laguntza tekniko osagarria honako hauetarako:
1. Bere curriculuma definitzea, lanbide gaitasunen araberako lanbide profila adierazteko: informazioa eta aholkularitza (banaka, taldeka edo modu orokorrean), tresnak eta laguntza-teknikak emanen zaizkie erabiltzaileei beren curriculum pertsonalizatua egin dezaten.
2. Enplegu bilaketa aktiborako teknikak aplikatzea: informazioa emanen zaie, eta besteren konturako lana bilatzeko eskura dauden bitarteko, teknika eta tresnen oinarrizko erabilera irakatsiko zaie, bide telematikoak eta sare sozialak barne. Bidezko denean, autoenplegurako eta ekintzailetzarako aholkularitza zerbitzura bideratuko dira.
e) Informazio eta aholkularitza osagarria, honako honi buruz:
1. Lan merkatuaren egoera eta enplegurako politika aktiboak. Lan merkatuaren eta enplegurako politika aktiboen gaineko datu edo gorabeherak jakinaraziko zaizkie, betiere erabiltzaileek enplegua eskuratzeko duten aukerak areagotzen badituzte.
2. Europako prestakuntza eta kualifikaziorako mugigarritasuna errazten duten prestakuntza-eskaintza eta programak: aholkularitza espezializatua emanen zaie erabiltzaileei prestakuntza-eskaintzari buruz. Aurrez aurre edo informazioaren eta komunikazioaren teknologien bidez emanen da, banaka edo taldeka, produkzio-sektoreen eta pertsonen premiak eta Europan dauden aukerak kontuan hartuta.
f) Lan mugigarritasunaren kudeaketarako laguntza: informazioa, aholkularitza eta laguntza emanen zaizkie erabiltzaileen mugigarritasun geografiko eta funtzionalari buruz (Espainian, Europan eta munduan), eskura dituzten enplegu eskaintza egokiak aprobetxa ditzaten.
Informazio orokorra emanen da Europar Batasuneko lan inguruabarrei buruz, EURES sarean eskura daitekeen informazioa barne.
2.–Autoenplegurako eta ekintzailetzarako orientazioa.
Autoenplegurako eta ekintzailetzarako orientazioko zerbitzuak jarduera hauek biltzen ditu:
a) Lana eskatzen duenaren premiak identifikatzea autoenpleguari dagokionez.
b) Ekintzailetzarako zerbitzu kualifikatuak ematen dituzten entitateetara bideratzea.
3.–Enplegu eskaintzak biltzea.
Enplegu eskaintzak bilduko dira eta Nafarroako enpleguaren atarian (www.empleo.navarra.es) argitaratuko dira, NL-NEZak haiekin bat egiten duten erregistratutako enplegu eskatzaileak aurki ditzan, beren lanbide profilaren eta, zehazki, beren lanbide gaitasunen arabera.
Zehazki, enplegu eskaintzak bildu eta erregistratzeak zeregin hauek biltzen ditu:
a) Enplegatzaileen premiak aztertu eta identifikatzea. Horretarako, enpresak bisitatuko dira.
b) Enplegu zerbitzu publikoek kudeatzen ez dituzten enplegu eskaintzak biltzea: enpresekin harreman estuak sortuko dira, bereziki enpresa txikiekin, NL-NEZak kudeatzen ez dituen enplegu eskaintza ezkutuak ager daitezen.
c) Nafarroako enpleguaren atarian (www.empleo.navarra.es) biltzen diren enplegu eskaintzak mekanizatzea, NL-NEZak enplegu agentzien bidez kudea ditzan.
Ondorio horietarako, honela definitzen dira:
1. Enplegu eskaintzak biltzea: entitate laguntzaileak enplegatzaile batek lanposturen bat betetzeko duen premia identifikatzea, eta eskatzailearengandik (edo hura behar bezala ordezkatzen duen norbaitengandik) eskaintza kudeatzeko eskaera jasotzea, hautagaien lanbide profila adierazita. Profil horrek ezin du baldintza diskriminatzailerik izan.
2. Enplegu eskaintza bat Nafarroako enpleguaren atarian (www.empleo.navarra.es) erregistratzea: NL-NEZak horretarako gaitutako pertsona batek eskaintzak biltzeko prozesuan eskuratutako datuak mekanizatzea eta Nafarroako enpleguaren atarian (www.empleo.navarra.es) sartzea, sisteman enplegu eskaintza berri bat sortuz, betiere NL-NEZak horretarako ezartzen dituen baldintzak betetzen badira.
NL-NEZak eskaintza baten erregistroa galarazten ahalko du, uste badu eskatzen diren baldintzek objektibotasun, gardentasun eta diskriminazio ezaren printzipioak urratzen dituztela.
B.–Zerbitzuen erabiltzaileak.
Langabeak, NL-NEZeko agentziaren batean lan eskatzaile gisa inskribatuak, laneratzeko eragozpen bereziak dituztenak. Batez ere talde hauetakoak izanen dira:
–Gazteen Bermearen Sistema Nazionalaren fitxategian onuradun gisa inskribatutako gazteak.
–Gradudun edo tituludun unibertsitarioak, Lanbide Heziketako tituludunak, profesionaltasun ziurtagiri bat duten pertsonak, luzaroko langabeak.
–Luzaroko emakume langabeak.
–45 urtetik gorako luzaroko langabeak.
–Desgaitasunen bat duten pertsonak.
–Gizartetik bazterturik gelditzeko arriskua duten pertsonak, gizarte zerbitzu publiko eskudunek egoera hori egiaztatuta.
Programa honen ondorioetarako, luzaroko langabeak dira arreta jaso aurreko 540 egunetatik gutxienez 360 egunean enplegu zerbitzu publiko eskudunean inskribaturik egon diren langabeak.
NL-NEZak zerbitzu horiek behar dituzten pertsonak identifikatzen ahalko ditu, eta diru-laguntza hauen entitate onuradunetara bideratu. Hala ere, ezarritako baldintzak betetzen dituzten pertsonentzako arretak justifikatzen ahalko dituzte entitate onuradunek. Nolanahi ere, arreta jasotzeko erabateko lehentasuna izanen dute NL-NEZak bideratutako pertsonek.
3. oinarria. Diru-laguntzaren zenbatekoa eta diru-laguntzaren xede izan daitezkeen gastuak.
A.–Diru-laguntzarekin entitatearen gastuak ordainduko dira, zehazki hauen ingurukoak:
a) Langileak:
1. Proiektuaren zuzendaritza, urteko 42.000 euro bitarte, lanaldi osorako, Gizarte Segurantzako kotizazioak barne.
2. Lanbide orientazioko teknikariak, urteko 38.000 euro bitarte, teknikari bakoitzeko, lanaldi osorako, Gizarte Segurantzako kotizazioak barne.
3. Administrazio laguntzako langileak, urteko 25.000 euro bitarte langileko, lanaldi osorako, Gizarte Segurantzako kotizazioak barne.
Hiru kasu horietan, dedikazioa lanaldi osokoa ez bada, dagokion zati proportzionala lagunduko da diruz.
b) Gastu orokorrak:
Benetan egindako ekintzei funtzionamendurako, materialetarako eta baliabide teknikoetarako gastu orokor gisa egotz dakizkiekeen gastuak hauek dira:
1. Material teknikoa prestatzea:
–Gida teknikoak.
–Parte-hartzaileentzako dokumentazioa.
–Material psikoteknikoa.
2. Bulegoko materiala.
3. Ekintzak burutzeko egin beharreko gastuak, bidezko proportzioan:
–Eraikin, altzari eta tresnen errentamenduak.
–Mantentze-lanak.
–Argindar, ur eta erregai hornidurak.
–Komunikazioak, telefonoa eta Internet.
–Garbiketa.
–Segurtasuna eta zaintza.
–Erantzukizun zibileko aseguruak.
–Publizitatea.
–Instalazioen eta ekipo teknikoen amortizazio gastuak.
–Diru-laguntza zertarako eman den, horretarako ekintzak ondo burutzeko beharrezkotzat jotzen diren beste gastu batzuk.
Langileen guztirako kostuen %15 arteko diru-laguntza eman daiteke, gastu orokor hauek direla eta: funtzionamendua, material teknikoak, eta ekintzak egoki garatzeko egiten diren joan-etorrietako gastuen ondoriozko dietak.
Gastu guztiak diru-laguntzaren xede den aldian egin beharko dira.
B.–Diru-laguntza jasoko duen kostua kalkulatzeko irizpideak, programen arabera:
Proiektuan ezarritako lanbide orientazio eta informazioko ekintzetan arreta jasotzen duten bederatziehun pertsonako ondoko diru-laguntza hau emanen da:
–Lanbide orientazioko teknikari bat, lanaldi osoarekin.
–Proiektuko zuzendari bat, lanaldiaren %25arekin.
–Administrazio laguntzako pertsona bat, lanaldiaren %25arekin.
Honako hauek hartuko dira arretatzat:
–Banakako diagnostikoa eta profila egiteko saio bat.
–Enplegurako ibilbide pertsonalizatua diseinatzeko saio bat.
–Akonpainamendu pertsonalizaturako saio bat, ibilbidea garatzeko eta jarduera-konpromisoa betetzeko.
–Aholkularitza eta laguntza tekniko osagarrirako saio pertsonalizatu bat.
–Informazio eta aholkularitza osagarrirako saio pertsonalizatu bat.
–Lan mugigarritasunaren kudeaketarako laguntza emateko saio pertsonalizatu bat.
–Gutxienez 2 orduko talde-jarduketetan, saiora bertaratutako 3 pertsonek arreta bat osatuko dute (muga: 15 bertaratu).
–Autoenpleguari buruzko informazio saio pertsonalizatu bat.
–Prospekzio bisita bat enpresetara.
–Eskaintza bat Nafarroako enpleguaren atarian (www.empleo.navarra.es) argitaratzea.
Aipatu laguntzak proportzioan handitu edo murriztuko dira teknikarientzat eta administrarientzat, arreta bederatziehun laguni baino gehiagori edo gutxiagori ematen zaion kontuan harturik.
C.–Diru-laguntzaren gehieneko zenbatekoa 75.000 eurokoa izanen da proiektu bakoitzeko.
4. oinarria. Entitate onuradunak.
Deialdi honetara proiektuak aurkezten ahalko dituzte, bai eta laguntzak eskatu ere, nortasun juridiko berekia duten eta irabazi-asmorik ez duten entitateek, sozietatearen helbidea Nafarroako Foru Komunitatean badute eta baldintza hauek betetzen badituzte:
1. Orientazioaren esparruan gutxienez 3 urteko ibilbide finkatu eta frogatua izatea, edo laneratzeko proiektu integralak egin izana, edo Europar Batasunaren funtsek kofinantatzen duten proiektuak egin izana, eta horietan guztietan hainbat arlotako ekintzak txertatu izana, arlo horietako bat aipatu taldeentzako lanbide informazioa eta orientazioa izanik.
2. Sozietate-helburuaren eta jarduketa-eremuaren barnean lanbide enplegurako politika aktiboetako jarduerak izatea.
3. Egiten diren zerbitzuen kalitatea kontrolatzeko ebaluazio-sistema eduki behar dute; sistema honetan eraginkortasun ekonomikoaren adierazleak txertatu behar dira, bai eta erabiltzaileen asebetetasunaren, enplegagarritasuna hobetzearen eta laneratzearen adierazleak ere.
4. Giza baliabide eta baliabide material egokiak izatea jarduera garatzeko.
5. oinarria. Eskaerak aurkeztea, eskatzen diren agiriak eta baldintzak betetzeari buruzko egiaztagiriak.
2016ko eskabideak NL-NEZeko Erregistroan aurkeztu beharko dira, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aipatutako tokietako edozeinetan, 30 egun naturaleko epean, deialdi hau Nafarroako Aldizkari Ofizialean argitaratu eta biharamunetik hasita.
Hurrengo ekitaldietarako, eskaerak egiteko epea kasuan kasuko deialdian ezarriko da.
Eskabidearekin batera, agiri hauek aurkeztu beharko dira:
a) Entitate eskatzailearen nortasun juridikoa frogatzea, bere eraketa eskrituraren, bere estatutuen eta dagokion erregistroko inskripzioaren kopia aurkeztuz.
b) Entitate eskatzailearen legezko ordezkariak identifikatzen dituen agiriaren kopia eta, hala behar denean, horiek ahalordetzeko agiriarena, bai eta jakinarazpenak igortzeko helbidea eta posta elektronikoa eta programen arduradunak ere.
c) Identifikazio fiskaleko txartelaren fotokopia konpultsatua.
d) Nafarroako Ogasunarekiko zerga betebeharrak eta Gizarte Segurantzari dagozkionak ordaindu izanaren ziurtagiria.
e) 4.1 oinarrian aipatzen den 3 urteko gutxieneko esperientzia egiaztatzen duen agiriak, 6.B) oinarriaren 4. atalean xedatutakoarekin bat.
f) Ordainketa transferentzia bidez jasotzeko eskaera.
g) Diru-laguntzaren xede den proiektuaren memoria, alderdi hauek zehaztuta:
–Eskaeraren xedea eta proiektuaren justifikazioa.
–Zein programatarako egin duen eskaera eta horien garapena.
–Giza baliabideak, teknikoak eta materialak.
–Aurreikusten den onuradun kopurua.
–Aurreikusten den arreta kopurua.
–Zein talderentzat bideratuko diren.
–Zerbitzuen kalitatea ebaluatzeko sistemak.
–Eskatutako diru-laguntzaren zenbatekoa eta aurrekontuaren xehakapena.
6. oinarria. Diru-laguntza emateko prozedura eta irizpide objektiboak.
A.–Diru-laguntzak emateko prozedura norgehiagokako araubideari jarraikiz tramitatuko da.
Baremazioaren ondorioetarako, entitate eskatzaileak proiektuaren memorian zehaztu eta, hala bada, frogatu dituen alderdiak soilik hartuko dira kontuan eta, beraz, puntuatuko.
B.–Eskaeren lehentasun ordena ezarriko da honako balorazio irizpideak aplikatuz lortzen dituzten puntuazioaren arabera (50 puntu gehienez):
1. Proiektuan programetako jarduera hauek eskaintzea (10 puntu gehienez):
1. programa.–Lanbide orientazioa:
–Banakako diagnostikoa eta profila egitea: puntu bat.
–Enplegurako ibilbide pertsonalizatuaren diseinua: 2 puntu.
–Akonpainamendu pertsonalizatua ibilbidea garatzeko eta jarduera-konpromisoa betetzeko: puntu bat.
–Aholkularitza eta laguntza tekniko osagarria curriculuma prestatzeko eta enplegu bilaketa aktiborako teknikak aplikatzeko: puntu bat.
–Informazioa eta aholkularitza osagarria lan merkatuari eta enplegurako politika aktiboei buruz edo prestakuntza eskaintzari buruz: puntu bat.
–Lan mugigarritasunaren kudeaketarako laguntza: puntu bat.
2. programa–Autoenplegurako eta ekintzailetzarako orientazioa.
–Autoenplegurako eta ekintzailetzarako orientazioa: puntu bat.
3. programa.–Laneratzea:
–Enplegu eskaintzak aztertu, bildu eta erregistratzea. 2 puntu.
2. Lehentasunezko arreta, deialdi honen 2. oinarrian aipatutako berariazko taldeei. 10 puntu lortzen ahalko dira gehienez, honela banatuta:
–Talde horietakoren bati ematen zaion arretak lan guztien %75 edo gehiago hartzen badu: 10 puntu.
–Talde horietakoren bati ematen zaion arretak lan guztien %55 edo gehiago hartzen badu: 6 puntu.
–Gainerako taldeak: 3 puntu.
3. Arreta ematen duten pertsonen profil teknikoa.
Lanbide orientazioan egiaztatutako esperientzia urteak (bigarren urtetik aurrera). Arreta pertsona batzuek ematen badute, puntuazioa proiektuari atxikitako teknikarien esperientzia urteen batezbestekoa izanen da. Puntu bat emanen da urte edo zatiki bakoitzeko (5 puntu gehienez).
4. Entitatearen esperientzia (5 puntu gehienez).
Administrazio publikoekiko enplegu programetan azken 10 urteetako parte-hartze egiaztatua, betiere deialdi honen xedeko taldeen enplegagarritasuna hobetzeko jarduerak bazituzten. Gehienez puntu bat emanen da programako eta urteko.
Administrazio publikoek antolatzen ez dituzten programen kasuan, gehienez puntu erdia emanen da programako eta urteko.
Puntuazioa esleitzean, hiru urteko esperientzia ez da kontuan hartuko, 4.1 oinarrian ezartzen den deialdirako baldintza baita.
Deialdien esleipena edo hitzarmenen izenpetzea frogatzeko, entitate eskatzaileak deialdiaren araua eta esleipenaren ebazpena aurkeztu beharko ditu lehenbiziko kasuan, eta izenpetutako hitzarmena bigarrenean. Dagokion esleipena edo izenpetzea agertzen ez bada, aurkeztutako agiriak ez dira kontuan hartuko.
Programaren esleipena eta/edo izenpetzea NL-NEZari badagokio, entitate eskatzaileak idazki bat aurkezten ahalko du, esleitutako programa eta deialdiaren edo hitzarmenaren urtea adierazita, ofizioz egiazta dadin. Dagokion esleipena edo izenpetzea agertzen ez bada, aurkeztutako agiriak ez dira kontuan hartuko.
Entitate eskatzailea administrazio publikoen eremutik kanpoko programak garatzeko hautatua izan bazen, agiri baten bidez frogatu beharko du, entitate emailearen izena, hautaketaren data, programaren iraupena eta aurreikusitako jarduketak adierazita. Entitate emailearen ordezkari eskudun batek sinatu beharko du agiri hori. Datu horiek agertzen ez badira, aurkeztutako agiriak ez dira kontuan hartuko.
5. Ekintza bakoitzean arreta jaso duten pertsonen kopurua, proiektuaren kostuaren zenbatekoarekin alderatuta. Kostu ekonomikoa/emandako arreta ratioa: 10 puntu gehienez.
–45 euro bitarte: 10 puntu.
–50 euro bitarte: 8 puntu.
–55 euro bitarte: 6 puntu.
–60 euro bitarte: 4 puntu.
–65 euro bitarte: 2 puntu.
–70 euro bitarte: puntu bat.
–70 eurotik gora: 0 puntu.
6. Entitate eskatzailearen jarduketa-eremu geografikoa.
Gehienez 5 puntu emanen dira, eskala honen arabera:
–Entitateak enplegu agentzia baten lurralde eremuan jarduten badu (Altsasu, Agoitz, Lizarra, Lodosa, Iruña, Doneztebe, Tafalla, Tutera): puntu bat.
–Entitateak bi enplegu agentziaren lurralde eremuan jarduten badu: 3 puntu.
–Entitateak hiru enplegu agentziaren edo gehiagoren lurralde eremuan jarduten badu: 5 puntu.
7. Egutegia eta ordutegia (5 puntu gehienez).
Entitateak erabiltzaileentzat, urtean, zenbat zerbitzu egun dituen baloratuko da:
–240 baino gehiago: 2,5 puntu.
–220 eta 240 arte: 2 puntu.
–200 eta 219 arte: puntu bat.
–200 baino gutxiago: 0 puntu.
Egunean zenbat arreta ordu dauden baloratuko da:
–8 ordu eguneko: 2,5 puntu.
–6 ordu eguneko: 2 puntu.
–4 ordu eguneko: puntu bat.
C.–Dirua puntuaziorik onena lortzen duten entitateen artean banatzeko prozedura honako hau izanen da:
1. Proiektuak puntuazio handienetik txikienera ordenatuko dira. Berdinketa izanez gero, 1. irizpidean puntuaziorik handiena lortzen duten proiektuei emanen zaie lehentasuna.
Hala ere berdinketa hausten ez bada, atal bereko 2. irizpidea hartuko da kontuan, eta horrelaxe jarraituko da 7. irizpidera iritsi arte.
2. Diru-laguntzak emateko, oinarri honetan ezarritako balorazio irizpideak aplikatzearen ondoriozko hurrenkerari jarraituko zaio, aurrekontuan dagoen diru erabilgarriaren arabera.
Balorazioa egin ondoren aurrekontuan azken entitateari gelditzen zaion kreditu erabilgarria berak eskatutakoa baino txikiagoa bada, horren berri emanen zaio, eta aukera izanen du eskaera berregiteko. Nolanahi ere, eskaera berreginak ez du ekarriko puntuazio ezberdina lortzea balorazio irizpideak aplikatu ondoren.
7. oinarria. Organo eskudunak eta ebazteko gehieneko epea.
Diru-laguntzak emateko prozeduraren instrukzioa NL-NEZeko Enplegagarritasun Programen Atalak eginen du. Honek ebazpen proposamena bidaliko dio NL-NEZeko zuzendari kudeatzaileari, atxikita dagoen zerbitzuko zuzendaritzaren adostasunarekin.
Aurkeztutako agiriak baloratzeko, balorazio batzorde bat eratuko da. Batzorde hori honako hauek osatuko dute:
–Batzordeburua: Orientaziorako, Enplegua Sustatzeko eta Enpresentzako Zerbitzuetarako Zerbitzuko zuzendaria.
–Batzordekidea: Enplegagarritasun Programen Ataleko burua.
–Batzordekide-idazkaria: Lurralde Antolaketaren, Zerbitzuen eta Entitateen Ataleko burua.
NL-NEZeko zuzendari kudeatzaileak eskaerak aurkezteko epea amaitu eta hurrengo hiru hilabetean emanen du ebazpena. Epe horretan ebazpen espresurik ematen ez bada, eskaera ezetsitzat jo beharko da.
Ebazpenaren kontra gora jotzeko errekurtsoa jartzen ahal da, Eskubide Sozialetako kontseilariari zuzendua, jakinarazi eta biharamunetik hasita hilabeteko epean.
8. oinarria. Entitate onuradunen betebeharrak eta horiek ez betetzearen ondorioak.
Entitate onuradunek baldintza hauek bete beharko dituzte:
a) Orientazioko ekintzen emaitzari eta garapenari buruzko datuak eman beharko dizkiote NL-NEZari, zerbitzu horrek ezartzen dituen bide elektronikoak erabiliz. Horrela, Nafar Lansare-Nafarroako Enplegu Zerbitzuak lan eskatzaileen banakako laneratze-ibilbideen bilakaerari buruzko informazio eguneratu guztia edukiko du, informazio hori enplegu eskaeran txertatuz eta jasotako orientazioko zerbitzuak azalduz.
b) Ekintzen kontrol fitxak, arreta jasotzen duten pertsonek sinatuak, aurkeztea aldian-aldian. Enplegagarritasun Programen Atalak ezarriko du nolako aldizkakotasunarekin aurkeztu behar dituen fitxa horiek entitate bakoitzak, beraren ekintzen kopurua eta programen eta ekintzen ezaugarriak kontuan hartuta.
c) Egindako lanbide informazio eta orientazioko ekintzak Estatuko Enplegu Zerbitzu Publikoaren sistema informatikoan erregistratu behar dituzte, NL-NEZak proposatzen duen moduan eta berak ezartzen dituen aldietan.
d) NL-NEZari aurkeztu behar dizkiote deialdi honetan aipatutako ekintzak egiteko kontratatuko dituzten teknikarien lan historialak, behar den profila baduten egiaztatzeko.
e) NL-NEZak ezarritako jarraibideak betetzea emaitzen ebaluazioari dagokionez.
f) Diru-laguntzen xede diren ekintzen onura jasotzen duten pertsonei ezin zaie ezer kobratu inola ere.
g) Halaber, Diru-laguntzei buruzko azaroaren 9ko 11/2005 Foru Legearen 9. artikuluan ezarritako betebehar orokorrak bete behar dituzte.
Diru-laguntza emateko ebazpenean, oinarri arautzaile hauetan edo Diru-laguntzei buruzko Foru Legean ezarritako baldintzak bete ezean, onartutako diru-laguntza kobratzeko eskubidea galduko da edo diru hori itzuli egin beharko da, foru lege horren 35. artikuluan xedatutakoarekin bat.
Halaber, aurreko betebeharretako bat hein batean betetzen ez bada, emandako diru-laguntzaren zenbatekoa berriro ere zehazten ahalko da, proportzionaltasun printzipioari jarraikiz, edo, zein den kasua, dagokion zenbatekoa itzuli beharko da.
Arau-hauste eta zehapenei dagokienez, deialdi honetan Diru-laguntzei buruzko Foru Legearen IV. tituluko araubidea erabiliko da.
9. oinarria. Onuradunek egindako gastu eta ordainketak justifikatzea. Diru-laguntza ordaintzeko modua eta epeak.
A.–Diru-laguntzak NL-NEZeko zuzendari kudeatzaileak ematen duen ebazpenaren bidez ordainduko dira, dagokion zerbitzuak aldeko txostena eman ondoren, era honetan:
a) Entitateak diruz lagundutako jarduera aldez aurretik justifikatuta, jarduera osorik gauzatu ondoren.
b) Aurrerakin baten bidez, emandako diru-laguntzaren %25ekoa gehienez. Entitateak noiznahi eska dezake aurrerakina, betiere justifikatu gabe dagoen diru-kopuruak %25 gainditzen ez badu eta onuradunak, diru-laguntzaren xedea betetzeari begira, funts horniduraren beharra justifikatzen badu.
Justifikazio hori aurrerakinaren eskabideari gehituko zaio, eta eskatzen den zenbatekoa edo portzentajea adierazi beharko da. Agiri hauetakoren bat ere aurkeztu beharko da:
–Diruzaintzako fluxuen aurreikuspenaren gaineko ziurtagiria, entitateak egina.
–Diruz lagundutako jarduera finantzatzeko eskatu eta/edo eskuratu diren maileguen zerrenda, banku entitateen ziurtagiriak gehituta.
–Funts horniduraren beharra frogatzen duen beste formula bat.
c) Konturako ordainketa baten bidez, entitateak justifikatutako zenbatekoa pagatzeko, emandako diru-laguntzaren %20 bada gutxienez; gauzatze memoria tekniko baten bidez edo gastuen fakturen bidez eginen da justifikazioa.
Aurrerakina eta konturako ordainketa bateragarriak dira.
B.–Proiektuan 2. oinarrian agertzen diren berariazko taldeei arreta ematea proposatzen duten entitateen kasuan, 6.B.2 oinarrian ezarritako balorazio irizpidea aplikatuz puntuazioa jasotzen badute, talde horiei eman beharreko arreta portzentajea bete ezean, berariazko taldeei benetan emandako arretak eta gainerako taldeei aurrekontuaren arabera eman beharreko arretak lagunduko dira diruz.
C.–Justifikazio ekonomikoa bi hilabeteko epean aurkeztu beharko da, diruz lagundutako proiektuaren indarraldiaren azken egunetik hasita, eta, nolanahi ere, gauzatzea azaroan edo abenduan bukatzen duten proiektuen kasuan, kasuan kasuko urtearen abenduaren 31n beranduenez.
D.–Entitate onuradunak gutxienez hiru eskaintza eskatu behar ditu entitate hornitzaileak hautatzeko, baldin eta justifikatzeko gastuaren zenbatekoak Diru-laguntzei buruzko azaroaren 9ko 11/2005 Foru Legearen 28.3 artikuluan aurreikusitako zenbatekoa gainditzen badu. Aurkeztutako eskaintzen arteko hautapena, diru-laguntzaren justifikazioarekin batera adierazi beharrekoa, eragimen eta ekonomia irizpideei jarraikiz eginen da, eta memoria batean justifikatuko da espresuki, proposamen ekonomiko onuragarriena hautatu ez bada.
10. oinarria. Diru-laguntzen bateragarritasuna.
Deialdi honetan aurreikusitako laguntzak bateragarriak izanen dira lortzen ahal diren beste diru-laguntza publiko edo pribatu batzuekin; halakoetan, NL-NEZari horren berri eman beharko zaio. Laguntza horiek batuta ezin izanen da ekintzen kostuaren %100a gainditu.
Hala ere, deialdi honen diru-laguntza bat jasotzea ez da bateragarria NL-NEZak antzeko xedeko diru-laguntzak zuzenean eta ekitaldi bererako ematearekin.
11. oinarria. Gardentasun-betebeharrak.
Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritakoari jarraikiz, Nafarroako Aurrekontu Orokorren kargurako diru-laguntzak jasotzen dituzten entitate eta pertsona juridiko onuradunek gardentasunez aritzeko betebeharra izanen dute, bi inguruabar hauek gertatzen badira:
–Emandako diru-laguntza 20.000 eurotik gorakoa izatea urtean.
–Emandako diru-laguntza entitate onuradunaren negozio-zifraren edo urteko aurrekontuaren %20tik gorakoa izatea.
Ondorio horietarako, bi baldintza horiek betetzen dituzten entitate eta pertsona juridiko onuradunek ondotik zehazten den dokumentazioa aurkeztu beharko dute, entitatearen legezko ordezkariak sinatua, modu telematikoan Nafarroako Gobernuaren Erregistro Orokor Elektronikoaren bidez, NL-NEZari zuzenduta, hilabeteko epean diru-laguntza emateko ebazpena jakinarazten denetik, Nafarroako Aurrekontu Orokorren kargurako diru-laguntzen onuradunen gardentasun betebeharrak arautzen dituen irailaren 11ko 59/2013 Foru Dekretuan ezarri bezala:
a) Entitatearen gobernu, administrazio eta zuzendaritza organoen osaera.
b) Organo horiek osatzen dituzten kargudunen zerrenda.
c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan jasotakoa izanen da.
d) Kargudun bakoitzak gobernuko, administrazioko eta zuzendaritzako eginkizunetan duen dedikazioaren araubidea.
e) Entitate onuradunaren urteko azken kontuen kopia bat.
Aurreko idatz-zatian ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira.
Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez guztizko batura.
Entitateak gardentasunerako betebeharra bete behar ez badu, aurreko ataleko inguruabarrak gertatzen ez direlako, horren gaineko aitorpena aurkeztu beharko du, aipatutako epean.
12. oinarria. Aplikatu beharreko arauak.
Deialdi honetan aurreikusita ez dagoen orotan, Lanaren eta Gizarte Gaien Ministerioak 1998ko urtarrilaren 20an emandako Aginduari jarraituko zaio, zuzenean aplikatzen ahal diren alderdiei dagokienez. Agindu horren bidez oinarri arautzaileak ezartzen dira, enplegurako lanbide orientazioko eta autoenplegurako laguntzako ekintzak egiteko diru-laguntzak emateko.
Orobat, Diru-laguntzei buruzko azaroaren 9ko 11/2005 Foru Legea eta arloagatik aplikatzekoa den beste edozein araudi aplikatzen ahalko dira.
13. oinarria. Diru-laguntzaren publizitatea, onuradunaren aldetik.
Bai publizitatean, bai zabalkundeko materialetan eta paper-gauzetan, entitate onuradunek Nafar Lansare-Nafarroako Enplegu Zerbitzuaren eta Enpleguko eta Gizarte Segurantzako Ministerioaren babesa eta lankidetza aipatu beharko dituzte.
14. oinarria. Oinarri arautzaileen aurkako errekurtsoa.
Oinarri arautzaileen aurka gora jotzeko errekurtsoa jar dezakete interesdunek, Eskubide Sozialetako kontseilariari zuzendua, argitaratu eta biharamunetik hilabeteko epean.
15. oinarria. Datuen babesa.
Entitate eskatzaileek eta entitate onuradunek jakinarazpenetan ematen duten informazioa datuak babesteari buruz indarra duen araudiaren mende egonen da.
Entitate eskatzaileen, onuradunen eta parte-hartzaileen identifikazio datuak fitxategi informatikoetan sartuko dira, bidezkoak diren ondorioetarako, eta, horri dagokionez, interesdunak Datu Pertsonalak Babesteari buruzko abenduaren 13ko 15/1999 Lege Organikoan eta hura garatzeko gainerako arauetan oro har aitortzen diren eskubideez baliatzen ahalko dira.
Orobat, entitate onuradunek arreta jaso dutenen datu pertsonalak tratatu eta zaintzean, lege horretan xedatutakoa bete beharko dute.
16. oinarria. Emandako diru-laguntzen publizitatea.
Diru-laguntzei buruzko azaroaren 9ko 11/2005 Foru Legearen 15. artikuluan xedatutakoarekin bat, NL-NEZak emandako diru-laguntzen berri emanen du Nafarroako enpleguaren atarian (www.empleo.navarra.es), datu hauek adierazita: deialdia, aurrekontuko zein programa eta kredituren kargura ordainduko diren diru-laguntzak, eta diru-laguntza bakoitzaren onuraduna, zenbatekoa eta xedea.
Orobat, Diru-laguntzei buruzko azaroaren 17ko 38/2003 Lege Orokorraren 20.8 artikuluan ezarritakoarekin bat, Estatuko Administrazioko Kontu-hartzailetza Nagusiak bere web orrian argitaratuko ditu datu horiek.
II. ERANSKINA
Lanbide orientazioko jardueren zehaztapen teknikoak
1.–Banakako diagnostikoa eta profila egitea:
a) Xedea eta helburua:
Bere abileziak, gaitasunak, prestakuntza eta esperientzia, interesak, familia egoera eta izan ditzakeen lanbide aukerak identifikatzea, bai eta jarduera hau garatzen duen protokoloan garrantzitsutzat jotzen diren beste aldagai batzuk ere.
b) Arreta emateko era:
Arreta pertsonalizatua eta aurrez aurrekoa izanen da, saio batean edo gehiagotan. Arreta bat baino gehiago ematen badira, horietako batzuk telematika bidez egin daitezke.
c) Jorratu beharreko gaiak:
–Egoera pertsonal eta sozioekonomikoa.
–Oinarrizko gaitasunak menperatzea.
–Historial profesionala.
–Enplegurako motibazioa.
–Pertsonaren eta enpleguaren arteko harremanean eragina duten alderdi pertsonalak.
–Enplegua bilatzeko teknikak eta estrategiak menperatzea.
–Curriculuma taxutzen jakitea.
d) Teknikariaren profila:
Tituludun unibertsitarioa, ahal bada giza zientzien adarretakoa, gutxienez urtebeteko esperientzia duena enplegagarritasuna hobetzeko lanbide orientatzaile gisa.
2.–Enplegurako ibilbide pertsonalizatuaren diseinua:
a) Xedea eta helburua:
Ibilbide bat prestatzea, arreta jaso duen pertsonarekin adostuta, honako hauek abiapuntu hartuta:
–Lanbide aukerak identifikatzea.
–Prestakuntza ibilbide bat identifikatzea.
–Enplegu bilaketa aktiborako jarduketak identifikatzea.
Enplegurako akordio pertsonal bat izenpetuko da, zeinak bi alderdiak behartuko baititu akordioa betetzeko ahalegin guztiak egitera.
b) Arreta emateko era:
Arreta pertsonalizatua eta aurrez aurrekoa izanen da, saio batean edo gehiagotan. Arreta bat baino gehiago ematen badira, horietako batzuk telematika bidez egin daitezke.
c) Jorratu beharreko gaiak:
–Xedea eta/edo lanbide helburuak.
–Prestakuntza helburuak.
–Enplegu bilaketa eraginkorrerako jarduketen helburuak.
–Ibilbidea gauzatzeko egin beharreko jarduketen gaineko akordioa.
d) Teknikariaren profila:
Tituludun unibertsitarioa, ahal bada giza zientzien adarretakoa, gutxienez urtebeteko esperientzia duena enplegagarritasuna hobetzeko lanbide orientatzaile gisa.
3.–Akonpainamendu pertsonalizatua ibilbidea garatzeko eta jarduera-konpromisoa betetzeko:
a) Xedea eta helburua:
Arreta jasotzen duen pertsonak erreferentzia bat eta laguntza hurbila eta etengabea izatea adostutako ibilbidean aurreikusten diren jarduketa guztietan.
b) Arreta emateko era:
Arreta aurrez aurrekoa edo telematikoa izanen da, saio batean edo gehiagotan.
c) Jorratu beharreko gaiak:
–Motibazio alderdiak.
–Engaiatutako jardueren errefortzua.
–Helburuen lehenespena:
- Helburuak bereiztea, modu horretan errazago lortzeko.
- Objektuak berregin eta aldatzea.
–Informazio garrantzitsua bilatzeko laguntza.
–Lan pertsonalizatua alderdi pertsonal eta instrumentalen gainean enplegu bilaketa aktiboan.
–Aurreikusitako jarduketa bakoitzean zerbitzu hoberena ematen duen entitatera bideratzea.
d) Teknikariaren profila:
Tituludun unibertsitarioa, ahal bada giza zientzien adarretakoa, edo Gizarte Integrazioko goi mailako teknikaria, gutxienez urtebeteko esperientzia duena enplegagarritasuna hobetzeko lanbide orientatzaile gisa.
4.–Aholkularitza eta laguntza tekniko osagarria honako hauetarako:
a) Xedea eta helburua:
Jarrera ona eta beste alderdi pertsonal batzuk hartu eta hobetzea, bai eta enplegu bilaketa aktiboari lotutako teknikak eta estrategiak ere. Hori guztia bat eginik diagnostikoarekin eta ibilbidearekin.
Arreta emateko era:
Jarduera honi lotutako arretak banaka edo taldeka eginen dira, aurrez aurre edo telematika bidez (telefono, posta elektronikoa...), saio batean edo gehiagotan.
b) Jorratu beharreko gaiak:
–Lanaren balioa eta lan egiteko motibazioa.
–Lanbide eta prestakuntza historialaren interpretazioa.
–Gizarte trebetasunak.
–Helburuak eta egin beharreko jarduketak sendotzeko argudioak.
–Erabakiak hartzea.
–Harremanak kudeatzea.
–Informazio garrantzitsua bilatzea.
–Bilaketaren agiriak prestatzea.
–Enplegu bilaketa aktiboa egiteko prozedurak.
–Bilaketarako jarduera pertsonalen programazioa, kontrola eta jarraipena.
–Teknologia berriak erabiltzea informazioa bilatzean eta enplegu bilaketa aktiboan.
c) Teknikariaren profila:
Tituludun unibertsitarioa, ahal bada giza zientzien adarretakoa, gutxienez urtebeteko esperientzia duena enplegagarritasuna hobetzeko lanbide orientatzaile gisa.
5.–Informazio eta aholkularitza osagarria, honako honi buruz:
1. Lan merkatuaren egoera eta enplegurako politika aktiboak.
2. Europako prestakuntza eta kualifikaziorako mugigarritasuna errazten duten prestakuntza-eskaintza eta programak.
a) Xedea eta helburua:
Arreta jaso duen pertsonak beharrezko informazioa izatea lanbide eta prestakuntza helburuen eta adostutako ibilbideari lotutako prestakuntza eskaintzaren gainean.
b) Arreta emateko era:
Banaka edo taldeka, aurrez aurre edo telematika bidez (telefono, posta elektronikoa, etab.), saio batean edo gehiagotan.
c) Jorratu beharreko gaiak:
–Bere lanbide helburuari lotutako lan merkatuaren baldintzak, Nafarroan, Espainian nahiz Europan.
–Bere ibilbideari lotutako prestakuntza eskaintza, Nafarroan, Espainian nahiz Europan.
d) Teknikariaren profila:
Tituludun unibertsitarioa, gutxienez urtebeteko esperientzia duena enplegagarritasuna hobetzeko lanbide orientatzaile gisa.
6.–Lan mugigarritasunaren kudeaketarako laguntza:
a) Xedea eta helburua:
Arreta jasotzen duen pertsonak beharrezko informazioa izatea bere lanbide helburuei lotutako beste lan merkatu batzuei buruz Espainiatik kanpo.
b) Arreta emateko era:
Banaka edo taldeka eginen da, aurrez aurre edo telematika bidez (telefono, posta elektronikoa, etab.), saio batean edo gehiagotan.
c) Jorratu beharreko gaiak:
–Bere lanbide helburuari lotutako lan merkatuaren baldintzak, Nafarroan, Espainian nahiz Europan.
–Kontuan hartu beharreko kudeaketak eta agiriak atzerrian lan egiteko.
–EURES sareko teknikariengana bideratzea enplegua bilatu nahi duen herrialdean.
d) Teknikariaren profila:
Tituludun unibertsitarioa, gutxienez urtebeteko esperientzia duena lanbide orientatzaile gisa, hizkuntza batzuk dakizkiena (gutxienez B2 maila ingelesez).
Lana eskuratzeko eta enpresei aholkularitza emateko zerbitzuaren zehaztapen teknikoak
1.–Enplegu eskaintzak kudeatzea, lan eskaintzak eta lan eskaerak bat eginez.
a) Xedea eta helburua:
Enplegu eskaintzak biltzea eta NL-NEZaren atarian erregistratzea.
b) Arreta emateko era:
Aurrez aurre edo telematika bidez.
Enpresekin dituzten harremanetan emanen dira arretak.
c) Jorratu beharreko gaiak:
–Enpresen prospekzioa.
–Eskatzen diren lanbide profilak identifikatzea.
–Kontratazio modalitateak.
–Enplegua sustatzeko neurriak.
–Titulazio akademikoak.
–Enplegu eskaintzak NL-NEZaren atarian erregistratzea.
d) Teknikariaren profila:
Tituludun unibertsitarioa, gutxienez urtebeteko esperientzia duena enpresen prospekzioan eta lan merkatuko bitartekotzan.
Autoenplegurako eta ekintzailetzarako orientazioko zerbitzuaren zehaztapen teknikoak
1.–Autoenplegurako eta ekintzailetzarako orientazioa.
a) Xedea eta helburua:
Norberaren konturako eta banaka edo ekonomia sozialeko enpresa batean lan egin nahi duten pertsonei informazioa ematea zerbitzu horiek emateko eskumena duten erakundeei buruz, eta, hala bada, zerbitzu horietara bideratzea.
b) Arreta emateko era:
Arreta pertsonalizatua eta aurrez aurrekoa izanen da.
c) Jorratu beharreko gaiak:
–Ekintzaile batentzat garrantzitsuak diren alderdi pertsonalak.
–Erabiltzaileen premiak ekintzailetza eta autoenpleguaren arloan.
–Ekintzailetza zerbitzuak eskaintzen dituzten erakunde eta entitate kualifikatuak.
d) Teknikariaren profila:
Tituludun unibertsitarioa, gutxienez urtebeteko esperientzia duena lanbide orientatzaile gisa.
Iragarkiaren kodea: F1603584
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
