Iragarkia
67. ALDIZKARIA - 2016ko apirilaren 8a
1. NAFARROAKO FORU KOMUNITATEA
1.5. ESTATUTUAK ETA LAN HITZARMEN KOLEKTIBOAK
14C/2016 EBAZPENA, martxoaren 1ekoa, Politika Ekonomiko eta Enpresarialaren eta Lanaren zuzendari nagusiak emana, Imarkoaingo Ateltrans SL enpresaren hitzarmen kolektiboa aldatzeko akordioa erregistratu, gorde eta Nafarroako Aldizkari Ofizialean argitaratzea erabakitzen duena.
Imarkoaingo Ateltrans SL enpresaren hitzarmen kolektiboa aldatzeko akordioaren testua (kode zenbakia: 31100652012014) aztertu da, Erregistro honetan 2016ko otsailaren 23an sartu zena eta enpresaren ordezkariek eta sindikatuen ordezkariek 2016ko otsailaren 4an izenpetu zutena, Langileen Estatutuari buruzko Legearen Testu Bategina onetsi zuen martxoaren 24ko 2/2015 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera. Horrenbestez,
EBATZI DUT:
1. Nafarroako Lan Hitzarmen eta Akordio Kolektiboen Erregistroan inskribatzeko agintzea.
2. Nafarroako Aldizkari Ofizialean argitaratzeko agintzea, denek jakin dezaten.
Iruñean, 2016ko martxoaren 1ean.–Politika Ekonomiko eta Enpresarialaren eta Lanaren zuzendari nagusia, Izaskun Goñi Razquin.
ATELTRANS SL ENPRESAREN HITZARMEN KOLEKTIBOA
Imarkoainen, 2016ko otsailaren 4an.
BILDU DIRA:
Alde batetik, Ateltrans SL enpresa ordezkatuz (IFK: B31576572), Angel Tellechea Lorenzo jauna (NANa: 72.692.482-Q), adinez nagusia, Gorka Astiz eta Javier Goldáraz aholkulariek lagunduta.
Bestetik, langileak ordezkatuz, langileen ordezkari Eduardo López Montero jauna (NANa: 15.793.963-R), adinez nagusia, José Vicente Zunzarren eta Cecilio Aperte aholkulariek lagunduta.
ADIERAZTEN DUTE:
Bi alderdiek Ateltrans SL enpresaren hitzarmen kolektibo hau izenpetzeko lege-ahalmen nahikoa aitortzen diote elkarri. Hitzarmena fede onez negoziatu dute nahitaez bete beharreko alderdi batzuetan konpromiso batzuk hartzeko asmoz, eta horiek dira, hain zuzen, hitzarmen kolektibo hau osatzen dutenak. Hona hemen akordioaren testua, osorik.
ATELTRANS SL ENPRESAREN HITZARMEN KOLEKTIBOA
1. artikulua. Langile eremua.
Hitzarmen honek Ateltrans, S.L. enpresari atxikita dauden plantillako langile guztiak hartzen ditu, baita haren indarraldia bitartean enpresan sartu eta alta hartzen dutenak ere, zein den ere enpresan betetzen duten lanpostua.
2. artikulua. Eremu funtzionala.
Hitzarmen hau Ateltrans SL enpresako langileei aplikatuko zaie bakar-bakarrik, eta, horrenbestez, ez zaie aplikatuko harekin merkataritzako harremana duten beste enpresa batzuei.
Hitzarmen honi lotutako langile guztiek lan egiteko behar dituzten baimen eta agiri guztiak indarrean eduki beharko dituzte. Enpresaren ardura den dokumentazioa (ikus LGZ eta beste batzuk) ez edukitzeak ez du zehapenik edo soldata murrizketarik ekarriko, falta hori enpresaren ardura edo akatsa bada. Edozein agiri beharrezkok indarra galduz gero, langilearen ardura edo akatsa denean, kontratua hiru hilabetez gehienez eteten ahalko da, eta epe hori bukatuta enplegatuak behar duen dokumentazioa lortzen ez badu, lan kontratua amaituko da.
3. artikulua. Lurralde eremua.
Hitzarmen hau Ateltrans SL enpresako langile guztiei aplikatuko zaie.
4. artikulua. Iraunaldia.
Hitzarmen honek 2014ko urtarrilaren 1etik 2018ko abenduaren 31ra arteko indarraldia du. Indarraldia bukatzearekin salatua dagoela ulertuko da, eta salatzen denetik aurrera, alderdiek urtebete izanen dute beste hitzarmen bat negoziatzeko (beraz, hori izanen da gehieneko aurreraeragina). Epe horretan bi alderdiek adostasunik lortzen ez badute, araudia indarrik gabe geldituko da.
5. artikulua. Osotasunarekiko lotura.
Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira. Agintaritza eskudunak baliogabetzen badu hitzarmen honen klausuletakoren bat, hitzarmenaren gainerako klausulek indarra izaten jarraituko dute, eta izenpetu duten alderdiak beharturik egonen dira ezabatutako klausula edo artikuluak negoziatzen hasteko hilabeteko epean. Hitzarmen hau, alderdien arteko lege den aldetik, bete beharrekoa da sinatzaileentzat eta pertsona fisiko edo juridikoentzat, zeinen izenean egin baita kontratua, eta bete beharreko zuzenbide absolutukoa ez den edozein arauren gainetik egonen da, eraginkorra den denborarako.
6. artikulua. Hitzarmen kolektibo honen aplikazio subsidiarioa.
Hitzarmen honetan araututa ez dauden arlo eta baldintza guztiei dagokienez, martxoaren 24ko 1/1995 Legegintzako Errege Dekretuan xedatutakoa aplikatuko da, horren bidez onetsi baitzen Langileen Estatutuari buruzko Legearen Testu Bategina, baita oro har aplikatu beharreko goragoko xedapen guztietan ezarritakoa ere, eta horien artean, errepideko salgaien garraioaren Bigarren Akordio Orokorra eta Nafarroako “Errepideko salgaien garraioa” sektorearen hitzarmen kolektiboa.
7. artikulua. Urteko lanaldi benetakoa.
Enpresako urteko lanaldi benetakoa 1.744 ordukoa izanen da enpresaren plantillako langile guztientzat, astelehenetik igandera banatuta. Atsedenaldiak, hots, bazkaltzeko denbora, atsedena edo kafea hartzeko etenaldiak eta antzeko beste batzuk, ez dira benetako lanordu gisa hartuko.
Gidarien kasuan, enpresaren eskura edo jardunean ematen duten denbora guztia hartuko da benetako lanordutzat, denbora horretan ibilgailua gidatzen egon, edo ibilgailuen zirkulazio ordutegiaren barreneko beste lan batzuetan, edo ibilgailuarentzako lan osagarriak egiten egon, alde batera utzita, berariaz, atsedena hartzeko finkatuak dauden aldiak. Horretarako, 1561/1995 Errege Dekretua eta 61/2006 EE-Erregelamendua aplikatu beharko dira, edo horiek ordezten dituen edo garatzen dituen araudia.
8. artikulua. Lanaldia, jaiegunak eta asteburuak.
Sektoreko berezitasunak direla eta, bi alderdiek onartzen dute lanaldia astelehenetik igandera arte egin ahal izatea, salbuespenik gabe, unean unean legeak zehazten dituenak izan ezik. Horrek ekarriko ditu hitzarmen honetan edo goragoko eremuko beste batzuetan aipatzen diren konpentsazioak (dirua eta atsedenaldia), baita salgaien errepide-garraioko enpresen II. Akordio Orokorrak aipatzen dituen mugapenak ere.
9. artikulua. Oporrak.
Lan egindako urte bakoitzeko 31 egun natural dagozkio langileari, edo lan egindako denboraren arabera dagozkionak. Enpresak zehaztuko du zein egunetan hartu behar diren 16 opor egun, eta, langileak, berriz, beste 15 opor egunak hautatu ditzake. Horiek enpresari jakinarazi beharko zaizkio oporraldia hasi baino 30 egun lehenago, eta enpresaren ohiko jarduerari kalte egin gabe aukeratuko dira. Ezin da oporrik hartu eskubide hori sorrarazteko finkatutako denbora lan egin ez bada kontratua hasten denetik aurrera.
Enpresaren eta langilearen artean akordioa badago, norberaren aferetarako egunak opor egunei gehitzen ahalko zaizkie.
10. artikulua. Baldintza ekonomikoak.
Hitzarmen kolektibo honetarako itundutako baldintza ekonomikoak I. eranskineko soldata-tauletan agertzen dira. Bi alderdiek adostu dute hiru aparteko paga ordainduko direla eta uztailean eta abenduan jasoko direla. Hirugarren paga hainbanatua kobratuko da hilero, “Etekinen paga hainbanatua” kontzeptu gisa.
Era berean, berariaz itundu dute ez dela inolako ordainketarik aplikatuko antzinatasunagatik.
11. artikulua. Kilometrajearen prima.
Mantenuko eta egonaldiko gastuak kalkulatzea zaila denez, konpentsazio sistema hau erabaki da: egindako kilometro bakoitzeko 0,09 euro aplikatuta ateratzen den kopurua ordainduko da. Zenbateko horren barnean janari gastuak, ostatukoak eta destinoagatik behar diren beste gastu batzuk daude. Dena den, gutxienez sektoreko hitzarmen kolektiboan erabakitako dieta ordainduko da.
12. artikulua. Gaueko lana.
Zerbitzu beharrak hala eskatuz gero, gaueko ordutegian lan egin beharko da. Zerbitzu horren ordaina 5 euro izanen dira lan egindako gaueko, gaueko benetako lanaldia nolakoa den kontuan izan gabe. Gaueko lanalditzat hartzen da goizeko seiak baino lehenago hasi edo gaueko hamarrak baino geroago bukatzen dena.
13. artikulua. Prestakuntza.
Etengabeko prestazioa betebehar bat da bai enpresarentzat bai langilearentzat.
14. artikulua. Zamalanetarako eta geldialdietarako osagarriak.
Bezeroak behar izanez gero, langileak eginen ditu zamalanak, eta, horrelakoetan, 15 euroko prima ordainduko zaio zamalan bakoitzeko. Ibilgailua ferryz garraiatzea 25 euro/egunean konpentsatuko da, betiere geldialdia gutxienez 4 ordukoa bada.
15. artikulua. Borondatezko konpentsazioak.
Enpresako zuzendaritzak, nahi badu, diru bidezko edo gauzazko konpentsazioak ematen ahal dizkie langileei, enpresak finkatuko dituen helburu berariazko batzuk lortzearren. Zenbateko horiek ez dira finkatuko, eta ez dute erreklamatzeko eskubiderik sortuko.
16. artikulua. Lanerako aldi baterako ezintasunaren osagarria.
Lanerako aldi baterako ezintasun kasu guztietan, Gizarte Segurantzak ematen duen prestazioa osatuko du enpresak, soldataren %100 berdindu arte.
17. artikulua. Probaldia.
Probaldia Akordio Orokorrak edo sektoreko hitzarmenak zehazten duena izanen da, araudian kontrakoa ez bada adierazten.
18. artikulua. Aurreabisua, lana utzi behar bada.
Langileak bere borondatez lana uzten badu, enpresari aurreabisua egin beharko dio 7 egun natural lehenago; bestela, aurreabisuaren bete gabeko egunak deskontatzen ahalko dira.
19. artikulua. Hitzarmenaren Batzorde Paritarioa.
Hitzarmen kolektibo honen aplikazioak sor ditzakeen gatazka guztiak konpontzearren, bi alderdiei ongi iruditzen zaie Batzorde Paritarioa sortzea. Edozein alderdik egin dezake batzordea biltzeko deia, eta, halakoetan, deia egin eta hamabost eguneko epean bildu beharko da. Batzorde Paritarioak gutxienez kide bana izanen ditu enpresaren aldetik eta langileen aldetik. Beharrezkoak diren bilerak egin ondotik, Batzordeak erabaki bat hartuko du lehenbiziko bilera egin eta gehienez hamabost eguneko epean. Alderdien arteko akordiorik ez badago, Nafarroako Lan Auzitegiaren arbitrajea eskatuko da.
20. artikulua. Diziplina araubidea.
Hutsegiteak dira langileek lanean, lanarekin lotuta edo lanaren ondorioz egiten dituzten ekintzak eta omisioak, berekin dakartenak betebeharrak ez betetzea, ordenamendu juridikoan, hitzarmen kolektibo honetan eta gainerako arau eta itunetan langileari ezarritakoak, banakakoak edo kolektiboak izan. Arinak, larriak eta oso larriak izan daitezke, honako honi jarraikiz:
20.1. Hutsegite arinak:
1.–Hilabeteko epean, lanera hiru aldiz berandu iristea, edo, bezeroak hala eskatuta, zamalanetarako ordutegiak hiru aldiz ez betetzea, bidezko arrazoirik izan gabe.
2.–Lanera ezin dela joan eta horren arrazoiak ez jakinaraztea aldez aurretik, edozein bide erabiliz, hori egiteko aukera izanez gero.
3.–Lanaldiaren barruan lanetik alde egitea bidezko arrazoirik gabe, denbora laburrerako bada ere.
4.–Arreta falta edo zabarkeria materiala zaintzean.
5.–Errespetu eta adeitasun eza arina enpresako langileekin eta publikoarekin, tartean norberaren garbiketa falta egonda.
6.–Erabiltzeko jarraibideak eta guzti, enpresak emandako jantziak eta ekipamendua ez erabiltzea.
7.–Lanera huts egitea behin hilabetean, bidezko arrazoirik gabe.
20.2. Hutsegite larriak:
1.–Bidezko arrazoirik gabe hilabeteko aldian hiru aldiz baino gehiagotan lanera berandu iristea.
2.–Lanera bi egunez huts egitea hilabetean, arrazoi justifikaturik gabe.
3.–Lanaldiaren barruan edozein jolasetan aritzea, zerbitzuari kalte eginez.
4.–Enpresak lanaren inguruko edozein arlotan ematen dituen agindu eta jarraibideei kasurik ez egitea, asistentziaren kontrola barne, baita langileak bete beharreko jardueraren aurrekari edo ondorio diren tramite administratiboak ez betetzea ere.
5.–Kausa faltsuak alegatzea lizentzietarako.
6.–Zabarkeriaz edo utzikeriaz aritzea lanean, behin baino gehiagotan, zerbitzuaren kaltetan.
7.–Zuhurtziarik edo axolarik gabe jokatzea zerbitzuak egitean. Zehazki, zerbitzuak egitean zuhurtziarik gabe jokatzea izanen da nahitaezkoak diren segurtasuneko arropak eta tresnak ez erabiltzea.
8.–Lanaldian lan partikularrak egitea, horretarako baimenik izan gabe, baita enpresako materiala norberarentzat erabiltzea ere.
9.–Errespetu eta adeitasun eza larria enpresako langileekin, erabiltzaileekin eta publikoarekin, haiei Konstituzioan aitortzen zaizkien eskubideak urratzea ekartzen duenean.
10.–Lanean agintekeriaz jokatzea, eta horrelakotzat joko da egintza arbitrario bat, baldin eta legezko agindu bat nahita eta nabarmen urratzen bada eta kalte nabaria ekartzen badio menpeko bati.
11.–Lanera ezin dela joan eta horren arrazoiak ez jakinaraztea aldez aurretik, edozein bide erabiliz, hori egiteko aukera dagoenean, baldin eta aldez aurretik ez jakinarazte horregatik ibilgailuen irteera atzeratzen bada edo horrek kalterik ekartzen badu jardueraren ohiko garapenean.
12.–Lanetik alde egitea bidezko arrazoirik gabe, laburrerako bada ere, baldin eta horregatik ibilgailuen irteera atzeratzen bada edo horrek kalterik ekartzen badu jardueraren ohiko garapenean.
13.–Lanera huts egitea egun batez hilabeteko epean, bidezko arrazoirik gabe, baldin eta horregatik ibilgailuen irteera atzeratzen bada edo horrek kalterik ekartzen badu jardueraren ohiko garapenean.
14.–Arreta falta edo axolagabekeria materiala zaintzean, horren ondorioz enpresari kalte egiten bazaio.
15.–Jarraian eta ohitura gisa, norberaren garbitasun eta txukuntasunik ez izatea, lankideen bidezko kexak sorrarazten dituenean.
16.–Hiruhileko berean beste hutsegite arin bat egitea edo horretan berrerortzea (puntualtasuna salbu), nahiz desberdina izan, eta langileari hitzezko kargu-hartzea ez den zigorra jarri bazaio; baita aurreko hutsegiteen antzekoa den beste edozein ere.
20.3. Hutsegite oso larriak:
1.–Bidezko arrazoirik gabe sei hilabeteko aldian 10 aldiz edo gehiagotan berandu iristea, edo urtean 20 aldiz.
2.–3 egun jarraituan edo 5 egun ez jarraitutan lanera huts egitea 6 hilabeteko epean, edo 10 egun ez jarraitutan urtebeteko epean, bidezko arrazoirik gabe.
3.–Diziplinarik edo obedientziarik eza lanean. Hutsegite oso larritzat joko da diziplina urratzen denean edo horrek enpresari edo lankideei kaltea ekartzen dienean.
4.–Enpresaburua, enpresan lan egiten dutenak nahiz horien familiakoak hitzez zein egitez iraintzea.
5.–Kontratuaren fede ona haustea eta konfiantza abusua lanean jardutean, eta halakotzat joko dira iruzurra egitea edo leialtasunik gabe jokatzea manatutako kudeaketetan; lapurreta edo ebasketa egitea, bai lankideei, bai enpresari bai edozeini, enpresaren barruan edo enpresaren ibilgailuetan, edo beste nonbait zerbitzuak betetzen ari diren bitartean; gutuneriaren sekretua urratzea edo arrotzei kontatzea lanagatik ezagutzen diren datuak.
6.–Ohiko edo itundutako errendimendua luzaroan eta nahita gutxitzea.
7.–Lanean mozkorturik eta/edo toxikaturik egotea, betiere lan orduetan gertatzen bada edo lanaren ohiko jardunari kalte egiten baldin bazaio.
8.–Lanetik alde egitea, laburrerako bada ere, istripuren bat eragiten badu.
9.–Zuhurtziarik edo axolarik gabe jokatzea zerbitzuak egitean, istripua edo makineriaren, ibilgailuaren edo instalazioen matxura izateko arriskua ekartzen badu.
10.–Sexu jazarpena edo sexuagatiko jazarpena, lanaren esparruan egiten denean eta hura pairatzen duen langilearen duintasunaren kontra larri jotzen duenean.
11.–Laneko jazarpena (mobbinga), ukitutako langilearen duintasunaren kontra larri eta etengabe jotzen duenean.
12.–Hutsegite larrietan berrerortzea, desberdinak badira ere, hiruhileko berean egiten badira eta aurretik zehatu badira; edo gorago aipatutako hutsegiteen antzeko beste edozein.
20.4. Zehatzeko prozedura.
1. Hutsegite larriengatik eta oso larriengatik zehapenak ezarri baino lehen, enpresek idatziz jakinaraziko dizkiete gertatutakoak langile interesdunei, horiek, hala nahi badute, idatziz adieraz dezaten, hiru laneguneko epean, horren inguruan egoki iruditzen zaiena. Jakinarazpena, halaber, langileen ordezkariari eginen zaio.
2. Ustezko hutsegite oso larrien kasuan, enpresak, aurreko ataleko jakinarazpena egitearekin batera edo hura egin ondoren, erabaki dezake langileari enplegua etetea, ordainsaria ukitu gabe, kautelazko neurri gisa, zer gertatu den argitu bitartean soilik, eta hilabetean gehienez ere, azkenean jar daitekeen zehapena gorabehera. Etenaldi hori langileen ordezkariari jakinaraziko zaio.
20.5. Zehapenak.
Ondoren azaltzen dira diziplinako hutsegiteengatik langileei ezartzen ahal zaizkien zehapenak:
a) Hutsegite arinengatik: hitzezko kargu-hartzea edo kargu-hartze idatzia eta 2 egun arteko enplegu-soldaten etenaldia.
b) Hutsegite larriengatik: 3 egunetik 30era arteko enplegu-soldaten etenaldia.
c) Hutsegite oso larriengatik: 31-60 eguneko enplegu-soldaten etenaldia eta/edo bidezko kaleratzea.
20.6. Hutsegiteen preskripzioa.
Langileen hutsegite arinak 10 egunen buruan preskribatzen dira, larriak 20 egunen buruan, eta oso larriak 60ren buruan, enpresa hutsegiteaz jakitun den egunetik aitzina, eta, nolanahi ere, hutsegitea egin eta sei hilabeteren buruan. Aipatzen diren egun guztiak egun naturalak dira.
20.7. Langilearen ardurapeko materiala.
Kontratazioa egiten denean, edo geroago, enpresak bere materiala utziko dio langileari, erabil dezan. Material hori uzteko unean, eta langile guztiek sinatzen duten lan kontratuaren eranskinean, materiala egoki erabiltzeko jarraibideak emanen dira, eta bakoitza zenbat aldiz erabil daitekeen finkatuko da.
Gehieneko muga horretatik gora erabiliz gero, hitzarmen honetan ezarritakoari jarraikiko zaio. Muga horretatik gorako erabilerengatiko ordainketa langilearen ardura izanen da.
21. artikulua. Behin-behineko kontratuak.
Langileen Estatutuaren 15.1 artikuluaren b) letran jasotako ekoizpen beharretarako behin-behineko kontratuen iraupena 12 hilabetekoa izanen da 18 hilabeteko erreferentzialdi bakoitzerako.
22. artikulua. Gidabaimena kentzea.
Gidariari gidabaimena kentzeak ondorio hauek izanen ditu, betiere ez bazaio kendu mozkortzeagatik, toxikomaniagatik edo zuhurtziagabekeria ausartarengatik:
a) Hilabete bitarte kentzen bazaio, aldi hori urteko opor egunen kontura egotziko zaio, non eta ez den ezinezkoa.
b) Hilabetetik sei hilabete bitarteko epe baterako kentzen bazaio, kontratua aldi baterako etenen da ezinbesteko arrazoiengatik.
c) Gidabaimena sei hilabetetik gorako epe baterako kentzen bazaio, lan kontratuaren amaiera ekarriko du, kalte-ordaina jasotzeko eskubiderik izan gabe.
d) Gidabaimena kentzen baldin bazaio lan ordutegiaren barrenean mozkortzeagatik, toxikatzeagatik edo zuhurtziagabekeria ausartegiagatik, kontratua amaitutzat joko da, kalte-ordaina jasotzeko eskubiderik gabe.
I. ERANSKINA
Soldaten taulak
Gutxieneko oinarrizko soldata, hileko hamabi pagatan, aparteko bi pagatan eta mozkinen beste paga batean ordaindu beharrekoa.
–Zerbitzuko burua: 1.400 euro.
–Ataleko burua: 1.120 euro.
–Bulegoko burua: 1.080 euro.
–1. mailako ofiziala: 1.020 euro.
–2. mailako ofiziala: 1.000 euro.
–Administrari laguntzailea: 1.000 euro.
1. mailako trafikoburua 1.200 euro.
2. mailako trafikoburua 1.150 euro.
3. mailako trafikoburua 1.100 euro.
–Gidari mekanikaria: 1.050 euro.
–Gidaria: 900 euro.
–Eskorgazaina: 800 euro.
–Tailerreko burua: 1.150 euro.
–Arduraduna: 1.050 euro.
–1. mailako ofiziala: 1.000 euro.
–2. mailako ofiziala: 980 euro.
–3. mailako ofiziala: 950 euro.
–Tailerreko morroia: 800 euro.
–16-17 urteko ikastuna: 700 euro.
II. ERANSKINA
Ateltrans SLren hitzarmen kolektiboa ez aplikatzea
Hitzarmen kolektibo honetan aurreikusitako soldaten araubidea ez da aplikatuko, eta alderdien akordioz aldatuko da, baldin enpresak jakinarazten dituen inguruabar ekonomikoek haren egonkortasun eta bideragarritasun ekonomikoa okertzen ahal badute. Betiere, aldez aurretik enpresako zuzendaritzak horren arrazoiak frogatu ondoren.
Horrelakoetan, hitzarmen kolektiboa negoziatzeko batzordea bilduko da eta erabaki hauetako bat hartuko du:
a) Soldata ez aplikatzeari uko egitea.
b) Soldata ez aplikatzeko erabakia baimentzea, gutxienez Negoziazio Batzordean horren aldeko akordioa bada.
A erabakia hartzen bada, alderdietako edozeinek aukera izanen du auzia lan jurisdikziora eramateko, bitartekotza eskatuta. Dena den, ez aplikatzea erabakitzeko langileen ordezkaritza beharko da.
Ateltrans SL. Angel Tellechea Lorenzo jaunak sinatua. NANa: 72.692.482-Q.
Aholkulariak: Gorka Astiz jauna eta Javier Goldaraz jauna.
Langileen ordezkaritza. Langileen ordezkaria: Eduardo López Montero jauna. NANa: 15.793.963-R.
Aholkulariak: Jose Vicente Zunzarren jauna eta Cecilio Aperte jauna.
Iragarkiaren kodea: F1603177
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
