2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
SAN ADRIAN
Kultur jarduerak antolatzeko diru-laguntzak
San Adriango Udalak, 2016ko urtarrilaren 27an egindako osoko bilkuran, onetsi zituen San Adrianen 2016. urtean kultur jarduerak antolatzeko diru-laguntzen deialdiko oinarriak. Hona hemen:
2016. URTEAN KULTUR JARDUERAK ANTOLATZEKO DIRU-LAGUNTZEN DEIALDIA
Arlo honetan indarra duen araudian ezarritakoarekin bat, San Adriango Osoko Bilkurak kultur jarduerak antolatzeko diru-laguntzen deialdiko oinarriak onetsi ditu, betiere jarduera horiek herritarren onerako badira eta udal eskumenekoei laguntzen badiete eta/edo osatzen badituzte.
Laguntzak ematerakoan irizpide hauei jarraituko zaie: publikotasuna, tratu berdintasuna eta bitartekoen eta helburuen bat etortzea. Honako hauek dira oinarri arautzaileak:
OINARRI ARAUTZAILEAK
Lehenbizikoa.–Diru-laguntzaren helburua, baldintzak eta xedea.
1.1. San Adriango Udalak diru-laguntzen deialdi publikoa aurkeztu du, San Adrianentzat interesa duten askotariko kultur jarduerak eta proiektuak egiteko 2016. urtean. Deialdia irizpide hauetan oinarrituko da: publikotasuna, lehia, objektibotasuna, berdintasuna eta bereizkeriarik eza, gardentasuna, eraginkortasuna eta efizientzia.
1.2. Kultura aktibo eta parte-hartzailea sustatzeko ekimenei sostengu emateko asmoz, San Adrianen kultur jarduerak egiteko diru-laguntza ematea du xede deialdi honek, baita interes publikokotzat jotzen diren proiektuak finantzatzea ere, lehendabiziko eta funtsezko helburua kultur jarduera badute.
1.3. 2016ko urtarrilaren 1etik abenduaren 31ra arte egiten diren jarduera eta proiektuetarako emanen da diru-laguntza.
1.4. Proiektu edo jarduera bati diru-laguntza emateko, eskaera egiten duten elkarteek edo norbanakoek jardueren proiektu edo programa zehatz bat aurkeztu beharko dute, diru-laguntzaren xede izan dadin. Programa horretan haren xedea, helburuak, finantzabideak, baliabide erabilgarriak, aurrekontua eta ebaluazioa azalduko dira. Aurrekontuarekin batean gastuen eta diru-sarreren zerrenda aurkeztuko da, proiektu edo jardueraren bideragarritasuna bermatuko duena.
1.5. Elkarte edo norbanakoen programa edo proiektuei diru-laguntza emateagatik ez da eskubiderik sortuko hura hurrengo deialdietan eskuratzeko.
1.6. Proiektu bera ezin izanen da aurkeztu San Adriango Udalaren deialdi batera baino gehiagotara.
1.7. Deialditik kanpo daude honako jarduera edo proiektu hauek:
–Kultur jarduera lehen edo funtsezko helburua ez dutenak, nahiz haien alderdietakoren bat kulturari lotua izan. Berariaz deialditik kanpo gelditzen dira ikastetxeetan egindako kirol eta hezkuntza jarduerak eta festak (eskola ordukoak nahiz eskolaz kanpokoak).
–Jende guztiarendako ez direnak.
–Diru-sarrera aski duten jarduerak edo gehienbat erabiltzaileek, udal honetako beste zerbitzu batzuek edo beste administrazio batek diruz lagundu behar dituztenak.
–Ezaugarri sexistak edo arrazistak dituzten jarduerak edo indarkeria bultzatzen dutenak edo bestelakoak, administrazio publiko batek diruz lagundu ez ditzakeenak.
–Ondasun inbentariagarriak eskuratu, eraiki, zaharberritu eta hobetzeko gastuak.
–Elkartearen funtzionamendu gastuak.
–Otordu, aperitibo eta oparien gastuak.
–Eskariari lotutako dokumentazioaren faltsukeria nabarmena denean.
Bigarrena.–Laguntzak emateko araubidea eta aurrekontuko kreditua.
Oinarri hauetan araututako diru-laguntzak emateko prozedura norgehiagokako araubideari jarraikiz tramitatuko da, hau da, aurkezten diren eskaerak konparatuz, guztiekin lehentasun zerrenda bat prestatzeko asmoz, deialdiaren 5.1 oinarrian ezarritako balorazio irizpideen arabera.
San Adriango Udalaren gastuen aurrekontuko 3340 4820000 kontu-sailean (“Kulturarako diru-laguntzak”) 7.000,00 euroko diru kopurua dago 2016. urterako. Aurrekontu horrek izaera mugatzailea du.
Hirugarrena.–Eskatzaileek bete beharreko baldintzak.
Kultur proiektu eta/edo jarduerak egiteko diru-laguntzak eskatzen ahal dituzte bizilekua San Adrianen duten pertsonek eta irabazi asmorik gabeko entitateek, betiere herriarentzat interesa duten proiektuak eta/edo jarduerak egiten badituzte eta baldintza hauek betetzen:
a) Legez eratua izatea eta Nafarroako Gobernuko Elkarteen Erregistroan inskribatua egotea.
b) Estatutuetan, beren helburuen artean izatea kulturarekin ikusteko duten jarduerak egitea, eta irabazi asmorik ez izatea.
c) Kultur jarduerak eta diru-laguntzaren xede izanen diren proiektuak San Adriango udalerrian gauzatzea, eta horiek herritarren onerako izatea.
d) Onuraduna izatea eragozten duten kasuetako bakar batean ere ez egotea, Diru-laguntzei buruzko azaroaren 17ko 38/2003 Lege Orokorraren 13. artikuluan xedatutakoarekin bat, eta San Adriango Udalarekin zorrik ez izatea.
Laugarrena.–Eskabideak eta agiriak aurkezteko epea.
4.1. Aurkezteko epea:
Eskabideak eta agiriak aurkezteko epea 15 egun baliodunekoa izanen da, deialdiaren oinarriak Nafarroako Aldizkari Ofizialean argitaratu eta biharamunetik hasita. San Adriango Udaleko Erregistro Orokorrean aurkeztuko dira, bulego orduetan, eta jakinarazten da larunbatetan bulegoa itxita egonen dela.
4.2. Aurkeztu beharreko agiriak:
a) Elkartearen estatutuen kopia konpultsatua, eta IFK edo IFZrena.
b) Entitatearen eta hura ordezkatzen duen pertsona fisikoaren datuak (I. eranskina).
c) Diru-laguntzaren xede den proiektuaren deskribapena (II. eranskina).
d) Aurrekontu xehakatua, kontzeptuen arabera sailkaturik azalduz aurreikusten diren diru-sarrerak eta gastuak (II. eranskina).
e) Erantzukizuneko aitorpena, onuraduna izatea eragozten duten kasuetako bakar batean ere ez egoteari buruzkoa, Diru-laguntzei buruzko azaroaren 17ko 38/2003 Lege Orokorraren 13. artikuluan xedatutakoarekin bat.
f) Entitateak Nafarroako Foru Ogasuneko zerga beharkizunak eta Gizarte Segurantzakoak beteak dituela frogatzen duten ziurtagiriak, eta San Adriango Udalarekin inolako zorrik ez duela frogatzen duena.
g) Erantzukizuneko aitorpena, deialdi honetako laguntzaren xede den proiekturako bertze erakunde publiko eta/edo pribatu batzuetan diru-laguntzarik eskatu eta/edo jaso den azaltzeari buruzkoa (I. eranskina).
h) Proiektuaren edo jardueraren publizitatea eta zabalkundea egitean, San Adriango Udalaren diru-laguntza jaso duela agerrarazteko konpromisoa (I. eranskina).
Borzgarrena.–Aurkeztutako eskabideen balorazioa.
5.1. Balorazio irizpideak.
Aurkeztutako jarduerak baloratzeko irizpideak eta laguntzaren zenbatekoa jarraian azaltzen diren balorazio irizpideen arabera zehaztuko dira, eta gehienez ere 100 puntu emanen dira, honela banaturik:
1. Proiektuaren kalitatea eta interes artistiko edo kulturala (50 puntu gehienez), honela banaturik:
a) Kalitatea, berrikuntza, herritarren interes orokorrarekin eta Udalaren kultur politikaren helburuekin bat (20 puntu).
b) San Adriango Udalarekiko lankidetza (15 puntu). Lankidetza gauzatuko da Udalaren beraren programetan sar daitezkeen jardueretan edo udal titulartasuneko ekipamenduetan garatzen direnetan.
c) San Adriango ondare kultural eta/edo artistikoaren zabalkundea (10 puntu).
d) Entitatearen helburuak, ibilbidea eta osaera (5 puntu).
2. Proiektuak San Adriango kultur dinamizazioan duen eragina (30 puntu), honela banaturik:
a) Zenbat ikusle edo parte-hartzaile aurreikusten diren jardueran (15 puntu).
b) Tokiko sustapen ekintzak, sormena, prestakuntza eta/edo parte-hartzaileen leialtasuna lortzea (10 puntu).
c) Proiektuan borondatez parte hartzen duten langileak (5 puntu).
3. Proiektuaren bideragarritasun ekonomikoa (20 puntu), honela banaturik:
a) Diru-sarreren eta gastuen egituraren koherentzia (10 puntu).
b) Honako hauen portzentajea: diru-sarrera berekiak, bazkideen kuotak, txartelak, ekoizpenen merkaturatzea, babesletzak. 10 puntu.
Proiektuen balorazioa egin ahal izateko, entitate eskatzaileak deialdi honen II. eranskinean ageri den azalpen txosteneko ereduaren araberako eskabidea aurkeztu beharko du; eranskin horretan zehatz-mehatz jasotzen dira irizpide bakoitzaren barrenean baloratu beharreko alderdiak. Informazio ekonomikoa deialdiaren II. eranskinean dagoen informazio ekonomikoari buruzko inprimakian osatuko da.
Oker betetzen diren datuak edo ausartegiak direnak baloraziotik kanpo geldituko dira.
Eskaera bakoitzaren balorazio puntuak atera ondoren, eta laguntzaren zenbatekoa zehaztearren, honako irizpide hauek aplikatuko dira:
–80 puntutik gorako proiektuak: onartutako aurrekontuaren %75.
–70 eta 80 puntu arteko proiektuak: onartutako aurrekontuaren %50.
–50 eta 70 puntu arteko proiektuak: onartutako aurrekontuaren %25.
–50 puntutik beherako proiektuak: onartutako aurrekontuaren %15.
Ratio horiek aplikatu ondoren, ateratzen diren diru-laguntzen baturaren zenbatekoa kreditu erabilgarria baino handiagoa bada, hainbanatu eginen dira laguntzen zenbatekoak, batura deialdiko kredituaren arabera egokitu arte.
Diru-laguntzaren zenbatekoa aurkeztu eta onartu den aurrekontuaren portzentaje bat denez, azken kostua hasiera batean aurreikusitako kostu osoa baino txikiagoa bada, aurreikusi den laguntza portzentajea jardueraren benetako kostuari aplikatuko zaio, diru-laguntza murriztuz, baita jasotako laguntza eta diru-sarreren zenbateko osoak jardueraren kostua gainditzen duenean ere.
Diruz lagundutako jarduerak osorik justifikatzen ez direnean, proportzionalki murriztuko da onartutako diru-laguntza. Diru-laguntzaren zenbatekoa ez da inoiz izanen diruz lagundutako jardueraren kostua baino handiagoa, hala bakarrik nola beste diru-laguntza, laguntza, diru-sarrera edo baliabide batzuekin batera.
Seigarrena.–Instrukzioa egin eta ebazpena emateko organo eskuduna.
Kulturako Informazio Batzordea izanen da aurkezten diren eskaerak deialdiko balorazio irizpideen arabera baloratuko dituen kide anitzeko organoa. Gainera, balorazio txostena instruktoreari igorriko dio.
Kulturako koordinatzailea izanen da espedientearen instruktorea, eta ebazpena emateko beharrezkoak iruditzen zaizkion txostenak eskatzen ahalko ditu, oinarri hauetan eskatutako agiriez landa. Kulturako Informazio Batzordearen espedientea eta txostena ikusirik, Kulturako koordinatzaileak ebazpen proposamen arrazoitua eginen dio Alkatetzari, deialdia ebazteko, proposamena igorri eta hamabost eguneko epean.
Alkateak emanen du ebazpena, non, ebazpen proposamenak ezartzen duenarekin bat, honako hau jasoko baita:
–Diru-laguntza hartuko duen eskatzailea edo eskatzaileen zerrenda eta zenbatekoa, ebaluazioa eta horretarako erabili diren balorazio irizpideak zehaztuta.
–Zein eskabide ezetsi den, halakorik bada, arrazoiak azalduta.
Ebazpen proposamenak ez dio inolako eskubiderik ekarriko proposatutako onuradunari San Adriango Udalaren aurrean, harik eta diru-laguntza emateko ebazpena jakinarazten zaion arte.
Diru-laguntza emateko ebazpenak dagokion gastu konpromisoa baitu itsatsirik, Udaleko Kontu-hartzailetzaren fiskalizazioa beharko du aldez aurretik.
Zazpigarrena.–Onuradunen betebeharrak.
Onuradunen betebeharrak ondoko hauek dira:
a) Diru-laguntza jasotzeko behar den jokabidea izan, xedea bete, proiektua gauzatu edo jarduera egitea.
b) Organo emaileari erakustea beharkizunak eta baldintzak betetzen direla; orobat, hari frogatzea diru-laguntza emateko edo diru-laguntza jasotzeko arrazoi izan diren jarduerak egin eta helburuak bete direla.
c) Organo emaileak eginen dituen egiaztapenak eta Espainiako nahiz Europar Batasuneko kontrol organo eskudunek egin ditzaketen egiaztapen eta kontrol finantzarioak onartzea, eta jarduketa horietan eskatzen zaizkien argibide guztiak ematea.
d) Diruz lagundutako jarduerak finantzatzeko lortutako bertze diru-laguntza, laguntza, diru-sarrera edo baliabideen berri ematea organo emaileari (I. eranskina).
e) Diru-laguntzak ematen dituen ebazpenaren proposamena egin baino lehen, Gizarte Segurantzarekiko betebeharrak eta zerga betebeharrak eguneratuak dituztela frogatzea.
f) Kontabilitate liburuak, erregistro eginbidetuak eta behar bezala auditaturiko bertzelako agiriak eduki beharko dira, onuradunei aplikatzen ahal zaizkien merkataritzari eta sektoreari buruzko legeetan xedatu bezala.
g) Jasotako funtsen aplikazioari buruzko frogagiriak gordetzea, agiri elektronikoak barne, egiaztatze eta kontrol lanen xede diren bitartean.
h) Dirua itzultzeko arrazoietakoren bat izanez gero, itzuli egin beharko da jasotako dirua.
Zortzigarrena.–Justifikazioa eta kobrantza.
8.1. Aurkeztutako proiektuaren edo proiektuen justifikazioa.
a) Egindako jardueraren memoria labur eta zehatza (III. eranskina).
b) Azken balantze ekonomikoa, gastuen eta diru-sarreren justifikazioa, elkarteko diruzainak eta buruak sinatua.
c) Gastua frogatzen duten jatorrizko fakturak edo horien fotokopia konpultsatuak. Onartuko dira, orobat, bankuko frogagiriak, “ordaindua” zigilua duten fakturak –hornitzaileak sinatu eta zigilatuak–, erosketaren tiketa, fakturari erantsia, edo bertze edozein agiri, faktura edo gastuaren frogagiria ordaindu izana erakusten duena.
d) Erantzukizun zibileko aseguru poliza eta ordainketaren frogagiri eguneratua, behar den kasuetan.
e) Frogatu beharko da San Adriango Udalaren laguntza jaso izana agertu dela diruz lagundutako jardueren publizitatean (programak, liburuak, kartel iragartzaileak, publizitateko iragarki laburrak...), edo diruz lagundutako argitalpenaren kontrazalean eta lehen orrialdean.
8.2. Deialdi honetan emandako zenbatekoa ordaintzea.
Kulturako diru-laguntzen zenbatekoa, berez edo beste diru-laguntza, laguntza, diru-sarrera eta baliabide batzuk gehituta, inoiz ez da izanen diruz lagundutako jardueraren kostua baino handiagoa. Diruz laguntzen ahal diren gastu frogatuen %75 arteko diru-laguntza emanen da gehienez, eta eskatzaileak bere baliabideak erabiliz bete beharko du gelditzen den tartea.
Diru-laguntza bi epetan ordainduko da:
–Lehen epean diru-laguntzaren %50, konturako ordainketa gisa: gehienez ere 30 eguneko epean, laguntza emateko ebazpena jakinarazi eta biharamunetik hasita.
–Gainerako %50: eskatzen diren frogagiriak aurkeztutakoan; diru-laguntzarako eskaeran adierazitako helburuak, programa eta aurrekontua betetzea ezinbertzeko baldintza izanen da. Proiektuaren justifikazioa gehienez ere 30 egun balioduneko epean eginen da, aurkeztutako proiektuko jarduera bukatzen denetik hasita. Eskatutako frogagiriak aipatu epean aurkezten ez badira, onuradunak diru-laguntza lortzeko eskubide guztiak galduko ditu.
Gastuen eta diru-sarreren azken justifikazioarekin gastua behar bezala frogatzen ez bada, behar bezala frogatutako gastu lagungarrietarako soilik lortzen ahalko da laguntza.
8.3. Laguntza itzuli beharra.
Jasotako laguntzak itzuli beharko dira eta berandutza interesa ordaindu, diru-laguntza ordaintzen den unetik itzuli beharra erabakitzen den egunera bitarte, eta Diru-laguntzei buruzko Lege Orokorraren 38.2 artikuluan finkatuko zenbatekoaren arabera, Diru-laguntzei buruzko Lege Orokorraren 37.1 artikuluan ezarritako kasuetan, eta honako hauetan:
a) Programaturiko jarduerak gauzatzen ez direnean. Halakoetan, onuradunak jasotako aurrerakina itzuli beharko du Udaleko Diruzaintzan. Hala egiten ez badu, behar den espedientea irekiko da.
b) Frogagiriak epez kanpo aurkezten direnean; izan ere, horrek diru-laguntza deuseztatzea ekarriko du eta itzuli egin beharko da jasotako dirua.
c) Diruz lagundutako jardueretan Udalak baimendu gabeko aldaketak egiten direnean.
d) Diru-laguntza zer xedetarako eman zen, helburu hura betetzen ez denean.
e) Diru-laguntza eskuratzen denean horretarako eskatzen diren baldintzak bete gabe, onuradunari egozten ahal zaizkion arrazoiengatik.
f) Jasotako dirua zertan erabili den frogatu beharra betetzen ez denean.
g) Zenbait diru-laguntza batera jasotzen direnean, haien artean bateragarriak direnean izan ezik.
h) Diruz lagundutako jardueraren kostuaren muga gainditzen denean, onuradunak bateragarriak diren diru-laguntzak batuz; muga horretatik goitiko zenbatekoari erreparatuko zaio.
i) Diru-laguntza emateko kontuan izan diren baldintzak aldatzen direnean edo betetzen ez direnean.
j) Oinarri honetan aipatzen diren egiaztapen egintzei trabak jartzen zaizkienean eta horiei men egin beharra betetzen ez denean.
Alkatetzak emanen du diru-laguntza itzultzeari buruzko ebazpena, aldez aurretik espedientea instruiturik, aplikatzekoa den legeria orokorrarekin bat. Itzuli beharreko zenbatekoak zuzenbide publikoko diru-sarreratzat hartuko dira eta, horiek kobratzeko, diru-bilketari buruz indarra duen araudian xedatzen dena aplikatuko da.
8.4. Diruz lagundutako jardueren finantziazioa.
Deialdi honetan norberaren finantziazio zenbateko bat eskatzen da, diruz lagundutako jardueraren %25ari erantzuteko adinakoa. Diruz lagundutako proiektuan edo ekintzan norberaren funtsak jarri direla frogatu beharko da diru-laguntzaren justifikazioa egiten den unean, eta orduan funts horien zenbatekoa, jatorria eta diruz lagundutako jardueretan aplikatu izana zehaztuko dira.
Bederatzigarrena.–Aplikazio ordeztailea.
Ordenantza honetan jasotzen ez den orotan aplikatzekoak izanen dira Diru-laguntzei buruzko azaroaren 17ko 38/2003 Lege Orokorra, eta uztailaren 21eko 887/2006 Errege Dekretua, Diru-laguntzei buruzko azaroaren 17ko 38/2003 Lege Orokorraren Erregelamendua onesten duena, eta orobat honako hauetan ezarria dagoena: Nafarroako Toki Administrazioari buruzko uztailaren 2ko 6/1990 Foru Legea, Nafarroako Toki Ogasunei buruzko martxoaren 10eko 2/1995 Foru Legea, Herri Administrazioen Araubide Juridikoari eta Administrazio Prozedura Erkideari buruzko Legea eta aplikatzekoa den gainerako araudia.
San Adrianen, 2016ko urtarrilaren 27an.–Alkatea, Emilio Cigudosa García.
ERANSKINAK
–2016. urtean kultur jarduerak antolatzeko diru-laguntzen deialdiko eskabidea (PDF).
I. ERANSKINA
–Irabazi asmorik gabeko kultur entitate eta elkarteendako diru-laguntzen deialdi publikoa. 2016. urtea (PDF).
–Eskatzailea nor den frogatzen duten agiriak eta adierazpenak (PDF).
II. ERANSKINA
–Jarduera bakoitzaren fitxa: 5. Memoria eta 6. Aurrekontua (PDF).
III. ERANSKINA
–2016. urtean diruz lagundutako jardueren memoria (PDF).
Iragarkiaren kodea: L1601215
