Iragarkia

33. ALDIZKARIA - 2016ko otsailaren 18a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

39C/2015 EBAZPENA, abenduaren 30ekoa, Politika Ekonomiko eta Enpresarialaren eta Lanaren zuzendari nagusiak emana, Iruñeko Tecnología y Calidad Láctea, S.L. (Tecnolat) enpresaren hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.

Ikusirik Iruñeko Tecnología y Calidad Láctea, S.L. (Tecnolat) enpresaren hitzarmen kolektiboaren testua (kode zenbakia: 31101012012015), Erregistro honetan sartu zena 2015eko uztailaren 10ean eta enpresaren eta sindikatuen ordezkariek 2015eko ekainaren 15ean izenpetu eta 2015eko abenduaren 15ean eta 28an zuzendu zutena. Langileen Estatutuari buruzko Legearen Testu Bategina onetsi zuen urriaren 23ko 2/2015 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen eta Akordioen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Nafarroako Aldizkari Ofizialean argitaratzeko agintzea, denek jakin dezaten.

Iruñean, 2015eko abenduaren 30ean.–Politika Ekonomiko eta Enpresarialaren eta Lanaren zuzendari nagusia, Izaskun Goñi Razquin.

IRUÑEKO TECNOLOGÍA Y CALIDAD LÁCTEA, S.L. (TECNOLAT) ENPRESAREN HITZARMEN KOLEKTIBOA

1. artikulua. Lurralde eremua eta alderdiak zehaztea.

Tecnología y Calidad Láctea S.L. enpresako zuzendaritzak eta, langileen aldetik, enpresa batzordeak hitzartzen dute hitzarmen kolektibo hau.

Hitzarmen honek biltzen dituen arauak Tecnologia y Calidad Lactea, S.L. sozietatea osatzen duten langile guztiei aplikatuko zaizkie.

2. artikulua. Langile eremua.

Plantillako langile guztiak biltzen ditu, 7. artikuluan adierazten diren lanbide kategorietakoak, zuzendaritzako karguak eta artikulu horretan sartuta ez dauden lanbide kategorietakoak salbu.

3. artikulua. Iraunaldia.

Hitzarmenak 2015eko urtarrilaren 1ean hartuko du indarra. 2 urteko iraunaldia xedatu da: 2015 eta 2016.

Indarraldia agorturik, hitzarmenak aurreraeragina izanen du, hau da, aplikatzen jarraituko du hura berritzen duen hitzarmenak ordeztu arte.

Langileen Estatutuaren 86.2 artikuluan ezarritakoaren ondorioetarako, hitzarmen hau salatutzat jotzen da indarraldia bukatu baino bi hilabete lehenagotik, eta 2016ko abenduaren 1ean negoziazioak hasiko dira hura berritzeko edo luzatzeko.

4. artikulua. Batzorde Paritarioa.

Batzorde paritario bat eratu da; gehienez ere 2 kide izanen ditu, 1 langileen aldetik eta 1 enpresaren aldetik.

Batzordearen bi aldeetako edozeinek eskatzen ahal du batzordea biltzeko, eta, halakoetan, 15 eguneko epean bilduko da, beranduenez.

Batzordeak eskumen hauek izanen ditu:

A) Hitzarmen kolektibo honen edukia interpretatzea.

B) Hitzarmen honetako konpromisoak garatzea.

Batzorde paritarioa bilduko da edozein ordezkaritzak, emandako eskumena erabiliz, biltzeko eskatzen duen bakoitzean.

Batzordea biltzeko deia jakinarazpen baten bidez eginen da, gutxienez zazpi egun lehenago. Idazki bat erantsiko zaio jakinarazpenari, interpretatu behar den auzia planteatzeko.

Batzorde paritarioan dagoen sindikatuen ordezkaritza bakoitzak eta, orobat, enpresaren ordezkaritzak aholkularien laguntza izaten ahal dute. Aholkulari horiek hitza izanen dute, baina botorik ez.

Edozein batzordekidek ordezko bat izaten ahalko du, batzordeari aurretik abisatzen badio.

Batzorde paritarioaren akordioek balioa izateko, ordezkaritza bakoitzaren botoen %51ren babesa izan beharko dute. 15 eguneko epean erantzuna emanen zaio planteatutako auziari.

Batzorde paritarioko kide titularrek eskubidea izanen dute bilkuretarako baimen ordaindua izateko hura biltzen den egunetan, eta eginkizun hauek betetzen sortzen diren gastuak enpresak ordainduko ditu.

Bi alderdien aholkulariak joan daitezke bileretara. Aholkulari horiek hitza izanen dute, baina botorik ez.

5. artikulua. Arau osagarriak.

Hitzarmen honetan aurreikusi ez den orotan, lan arloko legeria indarduna aplikatuko da. Edonola ere, Langileen Estatutua aplikatuko da, zuzenean edo ordezko gisa.

6. artikulua. Urteko lanaldia, lan txandak eta ordutegiak.

6.1. Urteko lanaldia.

Hona zein izanen den Lácteos de Navarra enpresaren urteko lanaldia:

–2014ko uztailaren 1etik 2015eko abenduaren 31ra arte, urteko lanaldia 1.716 ordukoa izanen da. Kontuan harturik 2014ko urteko lanaldia bakarrik urte erdian aplikatzen dela, 15,5 ordu luzatuko da lantokian egin beharreko lanaldia.

–2016ko urtarriletik aurrera, lantokian egin beharreko urteko lanaldia 1.685 ordukoa izanen da.

Lantokian egin beharreko lanaldia 10 ordu murriztuko da auditatutako kontuen arabera mozkinak badira segidako bi ekitalditan.

6.2. Lan txandak.

6.2.1. Lan araubidea.

Kontrol atalak, mantentze-lanen atalak eta zerbitzu industrialen atalak laugarren txandako araubidean lan eginen dute, hau da, igandeko 22:00etatik larunbateko 22:00etara lan eginen dute, txanda hauekin: gauekoa, arratsaldekoa, goizekoa, astebeteko atsedenaldia.

Produkzio atalak eta kalitate atalak hiru txandako araubidean lan eginen dute, hau da, astelehenetik ostiralera lan eginen dute, txanda hauekin: gauekoa, arratsaldekoa, goizekoa.

Lan antolaketa hau alda daiteke urtean zehar, produkzio beharrak asetzeko txanda aldaketen bidez; horren ondorioz banakako egutegiak prestatuko dira, urte bakoitzeko otsailaren 28a baino lehen. Abenduaren 31n urteko lanaldian dagoen saldoa, aldekoa nahiz kontrakoa izan, urte bakoitzeko urtarrilaren 31 baino lehen jakinarazi beharko zaio langileari, eta martxoaren 31 baino lehen erregularizatu, enpresak eta langileak erdibana adostuz.

6.2.2. Malgutasuna (lan poltsa).

Egutegiko laneguntzat hartuko dira urteko jaiegun guztiak, 6.2.3 klausulan bildutakoak salbu.

Horrez gain, enpresak 10 egun izanen ditu urtean berak libreki aukeratzeko. Egun horietan lan egiteko beharra langileen ordezkariei jakinaraziko die enpresak, lanaldia hasi baino 4 egun lehenago.

Lanaldiaren malgutasunari buruz hitzartu diren neurriak dira lanaldiaren banaketa irregularraren %10 (Langileen Estatutuaren 34.2 artikuluan aurreikusitakoa) ordezteko eta indarrik gabe uzteko legez eskatzen dena, alderdien borondatearen osagarri.

6.2.3. Produkzio gabeko jaiegunak.

Hitzarmen honen indarraldian, ontziratze lan produktiboa ez da egingo egun hauetan: urtarrilaren 1a, maiatzaren 1a, uztailaren 7a, abenduaren 25a eta abenduaren 24ko eta 31ko arratsalde-gauetan.

Uztailaren 7a lan hori beharrezkoa bada, aste horretako ostiralera pasatuko da jaieguna.

6.3. Larunbatak, igandeak eta produkzio gabeko jaiegunak.

Larunbatetan, kalitate atalak 8 orduz lan eginen du gehienez, enpresaren beharren arabera adosten denari jarraikiz.

Abenduaren 24an eta 31n arratsaldeko eta gaueko txandetan lan egitea egokitzen zaien langileek atsedena hartuko dute, eta ordu horiek atseden ordutzat hartuko dira urteko lanaldian.

6.4. Ordutegiak.

A) Produkzioa, kalitatea eta zerbitzuak.

Txanden lan ordutegia: 06:00etatik 14:00etara, 14:00etatik 22:00etara, 22:00etatik 06:00etara.

B) Administrazioa.

1.–Lanaldi trinkoa ekainetik irailera:

Lanaldia: astelehenetik ostiralera, 7 ordu eta 24 minutukoa; derrigorrez 08:00etatik 14:00etara lan egin behar da, eta ordu bat malgutasunez, egunero egokituz.

Ekainaren 1etik 15era bitarte, edo irailaren 15etik 30era bitarte, langile bakoitzak aste batean lanaldi zatituko lana eginen du, departamentuko langileak txandakatuz, aldi horretan enpresaren beharrak asetzeko; gainerako asteetan lanaldi trinkoa eginen du, ekainaren 15etik irailaren 15era arte bezala.

2.–Lanaldi zatitua: urritik maiatzera (biak barne):

Kontuan harturik bezeroei, hornitzaileei eta abarrei egun osoan eta urteko egutegiko lanegun guztietan arreta eman behar zaiela, administrarien lan ordutegiak hauek izanen dira:

–Astelehenetik ostegunera:

• Sarrera: 08:00-09:00. Irteera: 13:30-14:00.
• Sarrera: 14:45-15:30. Irteera: 17:00-18:30.

–Ostiralean:

• Sarrera: 08:00-09:00. Irteera: 13:30-15:00.

Sartzeko eta irteteko ordutegia malgua izanen da, langileak aukeratuta. Derrigorrez 09:00etatik 13:30era eta 15:30etik 17:00etara lan eginen du astelehenetik ostegunera, eta 09:00etatik 13:30era ostiraletan. Lanaldiaren egokitzapena hamabost egunean behin eginen da.

Administrazioko langileei, enpresak 3 euro ordainduko die goiz eta arratsaldeko ordutegiarekin lan egindako egun bakoitzeko; hilabetero ordainduko da, lanaldi zatituaren prima gisa. Zenbateko hori ez da eguneratuko hitzarmenak indarrean dirauen bitartean.

Abenduaren 24ko edo 31ko goizetan lan egiten duten administrariek atsedena izanen dute bi egunetako batean, eta ordu horiek lan ordutzat edo atseden ordutzat hartuko dira urteko lanaldian.

6.5. Lan txanden eta ordutegien berregokitzapena.

Enpresak eta langileen ordezkariek berrikus dezakete lan txanden eta ordutegien atalean zehaztutakoa, haiek zerbitzuaren benetako beharretara egokitzeko, bi alderdiek adostuta.

6.6. Atsedenaldia lanaldi jarraituan.

Enpresak antolakuntza sistema (baliabide teknikoak eta giza baliabideak) ezarriko du, bi alde hauek uztartuz: 15 minutuko aginduzko atsedenaldia (enpresaren kontura) hartzeko eskubidea eta prozesu industrial eta teknikoak ez eteteko beharra.

6.7. Hitzartutako lanalditik gaineko ordu poltsa.

Ezarritako urteko lanaldia kontuan harturik, urteko lan egutegia prestatu ondoren, ikusten bada egunen edo orduen soberakina dagoela, irizipide hauen arabera hartuko dira egun edo ordu horiek:

1.–Lehenbiziko bi egunak, langileak aukeratuta; 8. artikuluan aipatzen diren segidako 13 eguneko oporraldiari metatzen ahalko zaizkio.

2.–Langileak eskubidea izanen du poltsa horretako orduen %50 aukeratzeko, baina ez du hartuko lanpostu eta/edo atal bereko beste langile batek hartutako ordu edo egun bera, horrek antolakuntzan arazorik sortzen badu. Enpresak behar diren errelebo edo txanda aldaketak egin ditzake eskubi hori bemartzeko.

Hirugarren hiruhilekoa bukatzean langileak aldi horri dagozkion atseden egunak hartu ez baditu, laugarren hiruhilekoan hartzea eska dezake. Enpresa zuzendaritzarekin adostuta hartuko ditu, 15 egun lehenago jakinarazi ondoren.

Ordu poltsa kalkulatzeko, irizpide hauei jarraituko zaie:

–Benetan sortzen den ordu poltsatik deskonta daiteke soilik, eta ez, inola ere, opor egunetatik.

–Ogitartekorako atsedenaldian horretarako ezarritakotik gora hartutako denbora deskontatutako da langileek sortzen duten ordu poltsatik. Ondorio horietarako, 20tik gorako minutu guztiak deskontatuko dira, fitxaketen arabera. Urtean behin deskontatuko dira ordu horiek.

–Langileak bajan daudenean, ulertuko da, oro har, langileek ez dutela ordu poltsarik sortzen, eta bakarrik oporrak mantenduko dituzte. Arau orokor horren salbuespenak:

• Aldi baterako ezintasuna istripu batengatik bada, lan egin balu sortuko zukeen poltsaren %100 sortuko da.
• Amatasuneko bajen kasuan, lan egin balu sortuko zukeen poltsaren %100 sortuko da.
• Aldi baterako ezintasunak gehienez 2 hilabete irauten badu, lan egin balu sortuko zukeen poltsaren %100 sortuko da.
• Bajak 2,1 eta 6 hilabete artean irauten badu, lan egin balu sortuko zukeen poltsaren %50 sortuko da.
• Baja 6 hilabetetik gorakoa bada, ez da ordu poltsarik sortuko.

6.8. Konpentsazioa.

Honela konpentsatuko dira 6.2.1 eta 6.2.2 klausuletan ezarritako lan txandak:

2013ko urtarrilaren 1etik 2014ko ekainaren 30era, 120 euroko plusa ordainduko da lan egindako larunbat, igande edo jaiegun bakoitzeko.

2014ko uztailaren 1etik 2015eko abenduaren 31ra, 60 euroko plusa ordainduko da lan egindako produkzioa duten larunbat bakoitzeko, urte bakoitzean produkzioa duten lehenbiziko hamar larunbatetan. Produkzioa duen larunbata izanen da oholean 48 ordu lehenago iragarria. Aldi horretako gainerako larunbatetan, 120 euroko plusa mantentzen da. 2014. urterako, urte erdian bakarrik aplikatzen denez, 5 larunbatetan lan egin beharko da, eta 60 euro pagatuko da bakoitzeko.

Kasu guztietan, langileak atseden konpentsatzaileko egun bat izanen du edo, bestela, 16 orduko atsedena, prima gabekoa.

Plus horien zenbatekoa ez da berrikusiko hitzarmen honen indarraldi osoan.

2016ko urtarrilaren 1etik aurrera, larunbateko lanaren konpentsazioa 120 eurokoa izanen da.

7. artikulua. Lanbide kategoriak.

Lácteos de Navarra SL eta/edo Tecnología y Calidad Láctea SL enpresetako plantillako langile guztiek lanbide kategoria hauetako bati atxikiko zaie:

–Teknikariak: Honako kategoriak ezarri dira:

• Goi mailako teknikaria.
• Erdi mailako teknikaria.
• Kalitateko teknikaria.
• Atalburua eta/edo departamentuko burua.
• Sistemen goi mailako teknikaria.
• Sistemen erdi mailako teknikaria.
• Esportazioen teknikaria.
• Marketin teknikaria.
• Merkatuen teknikaria-analista.
• Kontrol eta kudeaketa teknikaria.
• Kontroleko teknikari laguntzailea.
• Kontramaisua.
• Arduraduna.
• I+G teknikaria.
• Kontrol teknikaria.
• Lerroen ikuskatzailetza.
• Laborategiko 1. mailako teknikaria.
• Laborategiko 2. mailako teknikaria.
• Laborategiko teknikari laguntzailea.
• OLT.

–Administrariak: Honako kategoriak ezarri dira:

• 1. mailako burua.
• 2. mailako burua.
• Sistemen analista.
• Idazkaria.
• Lehen mailako ofiziala.
• Bigarren mailako ofiziala.
• Administrari laguntzailea.
• Analista programatzailea.
• Programatzailea.
• Informatika-operadorea.

–Merkataritza-Marketineko langileak:

• Arloko kudeatzailea.
• Salmenta-ordezkaria.
• Kontu nagusien arduraduna.
• Ordezkari komertziala.
• Salmenta-burua.
• Sustatzaile komertziala.
• Produktu-buru seniorra.
• Produktu-buru juniorra.
• Kategorien araberako kudeatzailea.
• Saltokiko kudeatzailea.
• Sustatzaile juniorra.

–Menpeko langileak:

• Biltegizaina.
• Zaindaria edo atezaina.

–Beharginak:

• Laguntzailea.
• peoia.
• Peoi espezializatua.
• 3. mailako espezialista.
• 2. mailako espezialista.
• 1. mailako espezialista.
• 1. mailako ofiziala. Txoferra.
• Ofizioko 1. mailako ofiziala.
• Ofizioko 2. mailako ofiziala.
• Zerbitzuetako 1. mailako ofiziala.
• Zerbitzuetako 2. mailako ofiziala.

8. artikulua. Oporrak.

Hitzarmen honen eraginpeko langile guztiek 26 eguneko oporrak izanen dituzte urte naturalean, larunbatak, igandeak eta jaiegunak kontuan hartu gabe:

A) Ahal dela, oporrak ekainean, uztailean, abuztuan eta irailean hartuko dira. Langile bakoitzerako oporren egutegia ezarriko da urte bakoitzeko otsailaren 28a baino lehen, eta langileak eskubidea izanen du aldi horretan segidako 13 laneguneko oporrak hartzeko, eta 6.7 artikuluan ezarritako ordu poltsaren bi egunak batera hartzen ahal ditu. Ordainsaria zehazteko, erantsitako tauletan ezarritakoari jarraituko zaio.

B) Langile sartu berriek dagozkien oporrak hartuko dituzte, sarrera eguna kontuan harturik, urte naturala bukatu baino lehen.

C) Enpresak langile bakoitzaren oporraldia berretsiko du, idatziz, gutxienez hartu baino 2 hilabete lehenago, langilearen asmoak eta plantillaren egutegi orokorra aztertu ondoren.

D) Oporrak A atalean ezarritako alditik kanpo hartzen dituzten langileek eskubidea izanen dute poltsa ekonomikoa jasotzeko, irizpide hauen arabera:

–26 egunetatik, segidan hartzen diren 10-14 egunengatik, 195,99 euro edo 2 opor egun gehiago.

–26 egunetatik, segidan hartzen diren 15 egunengatik (edo gehiago), 323,54 euro edo 3 opor egun gehiago.

9. artikulua. Lizentzia ordainduak.

Enpresak lizentzia ordainduak emanen ditu, tauletan ezarritako ordainsaria pagatuz, kasu hauetan:

A) Langileriaren ezkontza: 20 egun natural; dagozkion oporren erdia metatzen ahal zaio lizentziari.

B) Seme edo alaba baten jaiotza: 3 egun natural.

C) Ezkontidearen eta seme edo alaba baten eritasun larria: 4 egun natural, edo 7 lanaldi erdi.

D) Ezkontidearen edo seme edo alaba baten heriotza: langilearen etxean bizi bazen, 7 egun natural; bestela, 4 egun natural.

E) Aitaginarrebaren edo amaginarrebaren eritasun larria ala heriotza: 3 egun natural.

F) Langilearen edo ezkontidearen anai edo arreba baten, koinatu edo koinata baten, aiton edo amona baten edo biloba baten eritasun larria edo heriotza: egun natural bat, edo 2 lanaldi erdi.

G) Osaba-izeben eta lehengusuen hiletak edo ehorzketak: 8 ordu urtean.

Eritasuna larritzat jotzeko, eritasunaren edo ospitaleratzearen ziurtagiri medikoa izan behar da.

Eritasun larriaren edo heriotzaren kasuetan, ohiko bizilekuaren probintziatik kanpo gertatzen bada, egun bat gehiago luzatuko da baimena.

Aipatu ahaideen eritasun larriak irauten badu, eskubidea izanen da bigarren lizentzia hartzeko, gutxienez 30 egun igaro badira aurreko lizentzia bukatu zenetik.

Enpresa prest dago bestelako lizentzia ordainduak emateko, kasu bakoitzaren inguruabarrak kontuan harturik.

H) Guraso baten, seme edo alaba baten, anai edo arreba baten, aiton edo amona baten eta biloba baten ezkontza: egun natural bat.

I) Ohiko bizilekuaren aldaketa: egun bat.

J) Norberaren aferei aurre egiteko, langile guztiek 24 orduko baimen ordaindua izanen dute urtean; horretarako, justifikatu egin beharko dute, eta aldez aurretik abisatu.

Egun horiek kasu hauetan ere erabil daitezke: bigarren gradurainoko odol- edo ezkontza-ahaideen istripua, heriotza, eritasun larria edo ospitaleratu beharra izan gabe etxean atseden hartzea eskatzen duen ebakuntza.

K) Ikasketen ondoriozko azterketak egiteko: behar den denbora; aldez aurretik justifikatu behar da enprearen aurrean.

L) Ordaindu gabeko lizentziak emanen dira adopzio eta/edo harreren tramiteak egiteko, behar den denboraz, hiru hilabetekoa gehienez.

M) Haurrari esnea ematea: langileek aukera dute eskubide horren denbora metatzeko, haurrak bederatzi hilabete bete arte, amatasun bajari lotuz. Kasu horretan, bajaldia bukatu baino 15 egun lehenago jakinaraziko zaio enpresari.

10. artikulua. Parekatze sozialak - Laneko eta familiako eginkizunak batera eramatea.

Langileak bikote egonkorra osatzen badu, ezkontzak ematen dituen eskubide berak izanen ditu. Langilearen bikotekidea haren ezkontidetzat hartuko da ondorio guztietarako.

Interesdunak udalak luzatutako bizikidetza ziurtagiria aurkeztu beharko du egoera frogatzeko.

Langileak lanaldi murrizketa eska dezake, haurrak 12 urte bete arte, Emakumezkoen eta Gizonezkoen Benetako Berdintasunari buruzko Lege Organikoarekin eta gainerako lege indardunekin bat.

Enpresaren eta sindikatuen ordezkariek batzorde misto paritario bat osatuko dute.

Batzordearen zereginen artean hauek izanen dira:

–Aukera berdintasuna sustatzea, bai eta sexu, egoera zibil, adina edo arraza arrazoiengatik izan litekeen bereizkeriarik eza ere.

–Komunikazioetan, informazio orrietan eta lan eskaintzetan hizkuntza sexista ez dela erabiltzen begiratzea.

–Sexu jazarpen egoeretan jarduteko prozedura prestatzea, kasu horiek prebenitzeko eta, gertatzen direnean, lehenbailehen konpontzeko.

–Emakumeen kontratazioen jarraipena egitea, bai eta kontratu horien behin-behinekotasunarena ere.

–Langile guztien bizitza eta lana batera eramateko gaiei ekitea.

–Plantillako langileek laneko eta familiako eginkizunak batera eramateko dituzten beharren diagnostikoa prestatzea, lanpostuak eta lanbide kategoriak kontuan harturik.

–Laneko eta familiako eginkizunak batera eramateko plan bat prestatzea, diagnostikoaren arabera hartu beharreko neurriekin.

Hori horrela, guztiz pertsonalak diren gai batzuk banan-banan eta modu pribatuan planteatuko dira, langileak hori eskatzen badu, enpresa honetan ohikoa den bezala.

11. artikulua. Eguberrietako saria.

Urte bakoitzeko abenduan, enpresak 108 euroko balioa duen saria emanen dio plantillako langile bakoitzari. Zenbateko hori ez da eguneratuko hitzarmenaren indarraldian, eta enpresa batzordeak kudeatuko du haren edukia.

12. artikulua. Lanaldiaren luzapena.

Enpresak hilero jakinaraziko dio enpresa batzordeari lanaldia luzatzeagatik zenbat ordu egin diren, kausak eta banaketa (atalen eta langileen arabera) zehaztuz.

Lanaldiaren luzapentzat hartuko dira ezinbesteko kasu bat ez diren egoeretan honako arrazoi batengatik egiten diren gehiegizko orduak:

–Behar bezala kontserbatzeko esneari egin behar zaizkion gutxieneko tratamenduak egitea.

–Produkzioa luzatzea matxura batengatik.

–Langileak ustekabe lanera joaten ez direnean; egun horietan gehienez 4 ordu luzatuko da lanaldi arrunta.

–Esnea galtzeko arriskua dagoenean, produkzio akatsen ondoriozko fabrikazio akastunengatik.

Plantillako langileek lanaldia ahalik eta gutxienetan luza dezaten, enpresak konpromisoa hartzen du behin-behineko langileak kontratatzeko, edo unean uneko legeria indardunak ahalbidetzen duen antzeko modalitatekoak.

Lanpostuaren ezaugarri bereziengatik edo lanpostuak eskatzen dituen ezagutza espezifikoengatik kontratazio hori ezinezkoa denean, lanpostu horietako titularrek borondatez onartu beharko dute lanaldiaren luzapena, alderdiek uste baitute horrela behar horiek guztiak beteko direla. Hala ere, behar diren lanpostuak borondatez betetzen ez badira, enpresak prestatutako boluntarioen zerrendan aldez aurretik inskribatu diren langileek beteko dituzte ordu horiek.

Aurreko lerroaldean ezarritakoari jarraikiz lanpostuak betetzen ez badira, egun bakoitzean lanaldia luzatu behar duten lanpostu eta/edo atalei atxikitako langile titularrek derrigorrez bete beharko dituzte lanaldi horiek, betiere larunbateko goizeko eta arratsaldeko lanaldiak badira.

Aurrekoa gorabehera, enpresa zuzendaritza eta langileen ordezkariak behar bezainbestetan bilduko dira artikulu honetan idatzikoaren eraginkortasuna aztertzeko, eta, posible bada, lanaldiaren luzapenak betetzeko sistema berriak ezartzeko.

Ohiko lanaldiaren luzapeneko orduak, adierazi den tratamendua aplikatzetik datozenak, ez dira apartekotzat hartuko, eta prima bat eta dagokion atseden baliokidea emanen da konpentsatzeko (lanaldiaren zatiak metatuko dira lanaldi oso bat osatu arte), edo atsedeneko 20 ordu, primarik gabe, egindako ordu edo lanaldi bakoitzeko. Ordu horiek konpentsatzeko, 16 euro atsedeneko ordu bat emanen dira orduko.

13. artikulua. Soldata igoerak.

Hitzarmen honen indarraldian, honela aldatuko dira soldatak:

–2015. eta 2016. urteak: 2015eko soldaten taulak.

Akordioaren indarraldian, auditatutako kontuen arabera, enpresak mozkinak baditu, paga ez-finkagarri bat emanen da hurrengo urteko ekainaren 30a baino lehen, aurreko urteko KPIan izandako igoera adinakoa.

Mozkinen zenbatekoa pagatuko da, aurreko urteko KPIa muga izanik.

Hileko 12 soldaten zenbatekoa eta aparteko 3 pagena (udakoa, Eguberrietakoa eta martxokoa) 30 egunekoa izanen da, tauletako soldata oinarri harturik.

14. artikulua. Antzinatasuna.

Langileak enpresan duen antzinatasuna zerbitzuak egiten hasten den egunean hasiko da kontatzen, langile finko izan baino lehen behin-behinekotasun aldiak, aldi baterakoak eta probaldiak barne.

Akordio honetatik aurrera, antzinatasuna kobratzeko eskubidea bost urtean behin sorraraziko da. Kasu guztietan, gehienez 5 bosturteko kobratuko dira. Langileek norbanako gisa aurreko hitzarmenengatik aitorturik edo sorrarazirik dituzten antzinatasun balioak errespetatuko dira.

Bosturteko baten zenbatekoa eranskineko tauletan kategoria bakoitzerako ezartzen dena da. Horrela sorrarazitako antzinatasunaren zenbatekoa, 2012ko abenduaren 31n, %3 izanen da 2013ko urtarrilaren 1etitk aurrera.

Salbuespenez, 2013ko ekitaldiaren lehenbiziko hiruhilekoan laurteko bat betetzen duten langileei konpentsatzeko, laurteko hori aplikatuko zaie %4ko zenbateko baliokidearekin.

15. artikulua. Soldaten ordainketa eta aurrerakinak.

Arau orokor gisa, egun hauetan pagatuko dira soldatak:

–Hileko soldata: hurrengo hilabeteko lehenbiziko 5 egunetan.

–Udako paga: uztailaren 7a baino lehen.

–Eguberrietako paga: abenduaren 18aren eta 20aren artean.

–Martxoko paga: martxoaren 18aren eta 20aren artean ordainduko da.

Aurrerakinak: Aurrerakina eskatzen duten langileei, gehienez, hileko soldaten %50 eta mozkinen pagaren %90 emanen zaie, egun hauetan:

–Hilabeteko aurrerakinak: Hil bakoitzaren 20an ordainduko da.

–Martxoko pagaren aurrerakina: urte bakoitzeko urtarrilaren 1etik otsailaren 28ra bitartean.

16. artikulua. Urruntasun plusa.

Enpresak plus hori pagatuko die bizilekua lantokitik 2 kilometrotik gorako distantziara duten langileei, irizpide hauei jarraikiz:

1. Garraio publikoa bada, bizilekutik lantokira egiten diren joan-etorri guztiak ordainduko dira, garraio publikoaren txartelaren prezioa bakoitzean.

2. Langileak bere ibilgailua erabiltzen badu joan-etorri horietan, eskubidea izanen du garraio publikoaren txartelaren prezioa jasotzeko.

3. Garraio publikorik ez bada, ibilbide eta eremuarekin antza handiena duen garraio publikoaren txartelaren zenbatekoa ordainduko da.

Gaur egun dauden garraio zerbitzuak eta ordaintzeko sistemak mantenduko dira.

17. artikulua. Gaueko lanaren plusa.

Hitzarmenaren indarraldian, 22:00etatik 06:00etara bitartean zerbitzua egiten duten langileek eskubidea izanen dute oinarrizko soldataren gaineko %27ko gainordaina jasotzeko benetan lan egindako ordu bakoitzeko, formula honen arabera kalkulatuta:

18. artikulua. Txandakako lanaren plusa.

Zerbitzuak bi txandako edo txanda gehiagoko araubidean egiten dituzten langileek eskubidea izanen dute plus bat jasotzeko, 3,00 eurokoa urtean benetan lan egindako egun bakoitzeko.

19. artikulua. Lan istripuak eta eritasun arruntak.

Eritasun arruntaren edo lan istripuaren ondoriozko bajetan, enpresak Gizarte Segurantzaren edo, hala badagokio, ugazaben mutualitatearen prestazioak osatuko ditu, bajaren lehenbiziko egunetik alta edo ezintasun iraunkorraren deklarazioa izan arte, taulen soldata gehi antzinatasuna eskuratu arte. Egoerak dirauen bitartean, aparteko eskersariak ez dira pagatuko, dagozkien egunetan jasoko baitira, baina bajan emandako denbora lan egindakotzat hartuko da eskersarien sorrarazpenean.

Osagarri horiek urtarrilaren 1etik aurrerako atzeraeragineko ondorioekin aplikatu zaizkie aurreko urtean hasi zen baja batean jarraitzen duten langileei, betiere aurtengo igoerak aplikatu ez bazaizkie. Lanera itzuli ondoko lehenbiziko nominan pagatuko zaizkie.

21. artikulua. Langileek eskuratzen dituzten hornidurak.

Enpresak konpromisoa hartzen du bere produktuen prezioan deskontuaren portzentajea mantentzeko, langileek erosten dituzten horniduretan, hau da, %35 txikizkariak pagatzen duen prezioaren gainean, gehi dagokion BEZa. Dena den, langileek pagatzen duten prezioa ez da produkzio kostua baino txikiagoa izango.

23. artikulua. Lanbide prestakuntza.

Bi alderdiek beharrezkotzat jotzen dute langileen etengabeko prestakuntza. Horregatik, enpresaren ordezkariek eta ordezkari sindikalek prestakuntzarako batzorde paritarioak osatuko dituzte, xede hauekin: enpresako prestakuntza beharrak aztertzea eta enpresaren jarduerarentzat interesgarriak eta jarduera horretan parte hartuko duten langileen prestakuntza osatzeko egokiak diren ikastaroak erabakitzea. Txandakako lana egiten dutenek lehentasunezko eskubidea izanen dute lan txanda aldatzeko prestakuntza ikastaroetara joan ahal izateko, ikastaroek dirauten bitartean, inskripzioa frogatu ondoren. Ikastaroa bukatuta, hara joan izanaren egiaztagiria aurkeztu beharko dute.

Batzorde paritarioan planteatzen den etengabeko prestakuntza Enplegurako Prestatzeko Estatuko Fundazioa FEFEren bidez eginen da, ahal bada.

Enpresak konpromisoa hartzen du, FEFEri prestakuntza plana aurkeztu baino lehen, ordezkaritza sindikalari prestakuntza planaren elementu guztien berri emateko, hau da: beharren diagnostikoa, ikastaroen zerrenda, parte-hartzaileen kopuru aurreikusia, kalkulatu den kostua, etab.

Halaber, enpresak prestakuntza jarduketetan parte hartzen dutenen zerrenda bidaliko die ordezkari sindikalei, bakoitza hasi baino lehen, eta hiruhilekoan behin jarduketen gauzatzeari buruzko informazioa emanen du.

Prestakuntza ikastaroa enpresak interesa duelako planteatzen zaienean langileei, langilearen lanaldian eginen da, ahal bada. Posible ez bada, eta langileak bere lanalditik kanpo joan behar badu ikastarora, enpresak honako hau ordainduko dio langileari ikastaroa bukatu ondoren: ikastaroaren ordu kopurua bider langilearen benetako soldata, gehi otordu ordaina. Langileak probintziatik kanpo joan behar badu ikastaroa egiteko, eta, produkzio atalaren kasuan, langilearen atseden astearekin edo asteekin bada, enpresak honako hau emanen dio langileari: ikastaroaren ordu kopurua bider langilearen benetako soldata, edo dagozkion atseden egunak.

Langilearen ekimenez egiten bada, lanalditik kanpo izanen da, eta ikastaroaren kostuaren %50 ordainduko da, 600,00 euro gehienez. %25 matrikula aurkeztean ordainduko da, eta gainerakoa ikastaroa bukatzean, betiere langileak ikastarora joan dela eta aprobetxatu duela frogatzen badu, ikasketa zentroak luzatutako ziurtagiri baten bidez.

Langileak eskubide hauek izanen ditu:

–Azterketak egiteko baimenak izateko, eta, enpresak araubide hori badu, lan txanda aukeratzeko lehentasuna, titulu akademikoa edo profesionala eskuratzeko ikasketak erregulartasunez egiten baditu.

–Lanaldi arrunta egokitzeko, lanbide prestakuntza edo hobekuntza ikastaroren batera joan behar badu, bitartean lanpostua gordeta.

Bi kasuetan, aldez aurretik langileak enpresaren onarpena eskuratu beharko du.

Dagokion departamentuko buruaren bidez aurkeztuko da ikastaroa egiteko eskaera.

24. artikulua. Euskararen sustapena.

Enpresak ikasketa zentro ofizialetan egiten diren euskara ikastaroen %100 ordainduko die bere langileei, betiere lanorduetatik kanpo egiten badira.

Ordainketa egiteko, langileak ikastarora joan dela eta aprobetxatu duela frogatu behar du, ikasketa zentroak luzatutako ziurtagiri baten bidez.

25. artikulua. Bizi-asegurua.

Hitzarmen hau sinatzean, haren indarraldirako bizi-aseguru kolektiboa sinatu da plantillako langile guztientzak, prestazio hauekin:

–Berezko heriotza: 9.500,00 euro.

–Heriotza, istripuagatik: 19.000,00 euro.

–Heriotza, zirkulazio istripuaren ondorioz: 28.500,00 euro.

–Ezintasun iraunkor absolutua: 9.500,00 euro.

–Istripuaren ondoriozko erabateko baliaezintasun iraunkorra: 19.000,00 euro.

–Zirkulazio istripuaren ondoriozko erabateko ezintasun iraunkorra: 28.500,00 euro.

Aurrekoaz gain, enpresa istripu-asegurua kontratatuko du langileen lan jardueretarako, berme hauekin:

–Laneko istripuaren ondoriozko heriotza: 9.500,00 euro.

–Laneko istripuaren ondoriozko erabateko ezintasun iraunkorra: 9.500,00 euro.

Aseguru honen bermeak bizi-aseguruari metatzen ahal zaizkio, hala balegokio.

Enpresak ordainduko du ateratzen den prima.

26. artikulua. Osasun azterketa.

Enpresaren osasun zerbitzuak egiten dituzten fakultatiboek urtean bitan aztertuko dituzte hori eskatzen duten langile guztiak. Enpresak, derrigorrez, azterketa bat eskainiko du urtean.

Gutxienez bihotza eta birikak aztertuko dira, eta odol eta gernu analisiak eginen dira.

Osasun zerbitzuak betetzeko, enpresako medikuak eta OLTk ezin dute oporrak aldi berean hartu. Halaber, OLTek lanera joan gabe aste bat egiten duenean, lanbide prestakuntza bereko beste langile batek ordeztuko du.

27. artikulua. Kontratazioak.

7. artikuluan ezarritako kategorietako lanpostu hutsak betetzeko, enpresak beharrezkotzat jotzen dituen proba tekniko eta psikoteknikoak ezarriko ditu izangaien gaitasuna baloratzeko. Plantillako langile guztiek egin ditzakete probak, eta horretarako eskaera aurkeztuko dute ezarriko den epean.

Lanpostu horiek betetzeko deialdia iragarki oholean argitaratuko da.

Enpresak lan kontratuak erabiliko ditu behin-behineko edo sasoiko langileak kontratatzeko, inola ere ez aldi baterako laneko enpresen bidez. Langile horiek ezagutza tekniko eta profesional txikiena eskatzen duten lanpostuetan arituko dira. Ahalik eta zuzenen kontratutako dira eskatzaileen artean, eta horren berri emanen zaio enpresa batzordeari.

28. artikulua. Lan Osasuneko Kabinetea.

Enpresak eta langileek beren gain hartuko dituzte laneko segurtasunaren eta osasunaren arloan hitzarmen honetako xedapen berariazkoek eta, besterik ezean, unean-unean indarrean dagoen legeriak zehazten dituzten elkarrekiko eskubideak eta erantzukizunak.

Ondorioz, zuzendaritzak eta langileen ordezkariek konpromisoa hartzen dute, dituzten aukeren baitan betiere, eta aurrez adosturiko epeetan, prebentzio planak ezartzeko. Horien helburu komun eta zehatzak dira istripuak eta arriskugarritasun, toxikotasun nahiz nekagarritasun arrisku egiaztatuak pixkanaka desagerraraztea edo murriztea, eta ingurumen baldintzak eta lanpostuetakoak hobetzea. Horretarako, posible eta beharrezko diren zuzenketa neurri teknikoak aplikatuko dira eta, bitartean, beharrezko eta egoki iritzitako babes pertsonalerako jantzi eta baliabideak langileen esku jarriko dira, eta erabili eginen dira.

Bestalde, langileek, banaka, laneko segurtasunaren eta osasunaren arloan jasotako jarraibideak bete beharko dituzte nahitaez, prestakuntza eta informazio teoriko eta praktiko nahikoa eta egokia jaso ondoren. Batez ere prebentzio zerbitzuak emanen die aholkua, babes pertsonaleko bitarteko eta jantziei buruz.

Laneko Arriskuei Aurrea hartzeko Legearen 35. eta 38. artikuluekin bat osatuko da segurtasun eta osasun batzordeak. Hala ere, langileen ordezkari ez den pertsona bat izenda daiteke prebentzio ordezkari, eta 5 orduko baimen ordaindua izanen du prebentzioari lotutako gaietarako.

Laneko Arriskuei Aurrea Hartzeari buruzko 31/1995 Legeak eta arlo horretan indarrean dauden gainontzeko legezko xedapenek ezartzen dituzten bermeak izanen dituzte segurtasun eta osasun batzordeko kideek.

Segurtasun eta osasun batzordeak, batzordeburuak aldez aurretik dei eginda edo, edozein kasutan, Laneko Arriskuei Aurrea Hartzeari buruzko 31/1995 Legearen 38. artikuluan ezarritakoarekin bat, hilean behin eginen du bilera arrunta, eta, horrez gain, batzordeburuak beharrezkotzat jotzen duen bakoitzean, edo kideen gehiengoak edo langileen ordezkari diren kide guztiek eskatuta. Langileen ordezkari diren kideak haien arteko bi orduko bilera egin dezakete aldez aurretik.

Kabinete horren eginkizuna da, besteak beste, prestakuntza programak garatzea segurtasun, higiene eta sorospen gaiei buruz, pertsona eta erakunde eskudunekin elkarlanean.

Funtzionamendu eraginkorragoa izateko, lan osasuneko kabineteak urteko plana aurkeztuko du, egin nahi dituen proiektuak biltzen dituena, aurrekontua esleitzeko.

29. artikulua. Laneko jantziak eta higienea.

Laneko jantziak emanen zaizkie eskuzko operazioak egiten dituzten langileei. Kolorea egiten dituzten lanen arabera aukeratuko da. Halaber, oinetako egokiak emanen zaizkie horien beharra duten langileei. Instalazio edo lokal arriskutsuetan, babes arropa erabiliko dute langileek.

Funtzionamendu arauak:

–Ataleko arduradunari jantziak eskatu.

–Arduradunak txartela bete.

–Kontramaisuak edo fabrikazio buruak ontzat eman.

–Biltegiak jantzia eman.

Produktuen kalitateak baldintza hoberenak eskatzen ditu haiek maneiatzeko. Horregatik, Europar Batasuneko eta Espainiako legeetan horretarako ematen diren arauak ezarriko ditu enpresak.

Langileek behar bezala erabiliko dituzte ematen zaizkien jantziak.

30. artikulua. Eszedentziak.

Enpresan gutxienez 3 urteko antzinatasuna duten langileei emanen zaizkie eszedentziak, besterik gabe lanera itzultzeko eta lanpostu bera gordetzeko eskubidearekin, betiere eszedentzien kopuruak plantilla osoaren %8 gainditzen ez badu eta eszedentzialdia gutxienez 6 hilabetekoa eta gehienez 24 hilabetekoa bada.

%8 gainditzen bada, eszedentzia berriak eskaeren hurrenkerari jarraituz emanen dira, batzorde paritario mistoarekin ados jarrita.

Horrez gain, Emakumezkoen eta Gizonezkoen Benetako Berdintasunari buruzko Lege Organikoaren hamaikagarren xedapen gehigarriak eszedentziari buruz sartutako aldaketak aplikatuko dira.

31. artikulua. Mailaz igotzea.

Antzinatasunaren arabera kategoriaz igotzeko sistema ezartzen da, gutxieneko lanbide sustapena ziurtatzeko, arau hauen arabera:

Laguntzaile izatetik peoi izaera, enpresan 3 urte betetzean.

a) Administrari laguntzaile izatetik 2. mailako ofizial izatera, enpresan 5 urteko antzinatasuna betetzean.

b) Peoi izatetik peoi espezialista izatera, enpresan 18 hiletik gorako antzinatasuna betetzean.

c) Peoi espezialista izatetik 3. mailako espezialista izatera, enpresan 5 urtetik gorako antzinatasuna betetzean.

Aurrekoan ezarritakoaren arabera kategoriaz igotzen direnek konpromisoa hartzen dute igoera unean zituzten ohiko eginkizunak eta zeregin berberak egiteko.

Hala ere, enpresa behartuta dago eskuratzen duten kategoriaren berezko lanean lehentasuna emateko, enpresak prestakuntzari buruzko 26. artikuluan ezarritakoari jarraikiz diseinatuko dituen sustapen eta prestakuntzaren arabera.

32. artikulua. Atal sindikalak.

1. Sindikatu berari afiliatutako langileek, enpresako plantillaren %15 gainditzen badute, atal sindikala osatzen ahalko dute. Enpresari egiaztatu behar zaio ehuneko hori, aldez aurretik eta modu fede-emailean, eta enpresak sindikatuaren ordezkaritzat hartuko du ordezkari sindikala une horreratik aurrera.

2. Ordezkari sindikal bat atal sindikaleko burua izanen da, eta enpresa batzordeko kideen berme berberak izanen ditu. Ordezkari sindikal horrek 30 ordu ordaindu erabiltzen ahalko ditu bere jarduera egiteko, gehi batzordeko ordezkarien ordu soberakina. Atal sindikaleko beste kideek edo enpresa batzordeko sindikatu bereko kideek erabiltzen ahalko dituzte ordu horiek.

3. Sindikatuko ordezkariaren eginkizunak:

a) Sindikatuko edo laneko argitalpenak eta oharrak zabaltzea enpresako iragarki oholean.

b) Sindikatuko afiliatuen kaleratzeen edo zehapenen gaineko informazioa jasotzea, bai eta kasu hauetan ere: plantilla berregituratzea, enplegu erregulazioa, langileak lantokiz aldatze kolektiboa eta lana antolatzeko sistema berriak ezarri edo berraztertzea.

4. Enpresak baimena emanen die atal sindikal bateko afiliatuei bilera egiteko bere lokaletan, betiere lanorduetatik kanpo bada, laneko normaltasunari kalte egiten ez badio eta gutxienez 24 ordu lehenago aurreabisua egiten badiote.

5. Ezin izanen dute ordezkari sindikalik kaleratu, ezta zigortu ere, bere eginkizunetan ari den bitartean, kaleratzea edo zehapena langilea bere karguan legez aritzearen ondorioz gertatu bada, eta ezin izanen dute kaleratu eta ez zehatu, kargua utzi eta hurrengo bi urteetan ere.

6. Aitortutako atal sindikalek gehienez ordaindu gabeko 5 egun izanen dituzte urtean bere afiliatuak (multzoka, ez banaka) prestakuntza ikastaroetara, bere sindikatuaren biltzarretara eta antzeko jardueretara joateko. Lizentzia egun horiek erabiltzeko, derrigorrezko da sindikatuari 48 ordu lehenago horren berri ematea egun bat bakarra hartu behar bada, eta 72 ordu lehenago, egun bat baino gehiago hartu nahi bada.

7. %25eko afiliazioa duten atal sindikalek gehienez bi ordu izanen dituzte urtean, hitzarmen honen indarraldian, lanorduetatik kanpo bilera sindikalak egiteko. Ordainduko dira, baina bere afiliatuei bakarrik. Enpresako lokaletan nahiz enpresatik kanpo egin daitezke bilera horiek. Atal sindikalek %30eko afiliazioa badute, aurreko lerroaldean aipatzen den ordu kopurua hiru izanen da, urtean, eta afiliazio ehunekoa %35ekoa bada, urteko ordu kopurua 4 izanen da.

Ordezkari sindikalak eginen du bilera horien deia, eta gutxienez 48 ordu lehenago horren berri emanen dio enpresa zuzendaritzari, bileraren eguna eta gai-zerrenda zehazturik.

Salbuespeneko eta funtsezko arrazoiak direla medio, ordezkari sindikalak 24 ordu lehenago emanen du abisua.

Enpresak bilera horiek egiteko lokala ez badu ordezkari sindikalek, batzordeak edo atal sindikalek bakarrik erabiltzeko uzten, enpresa zuzendaritzarekin adostu beharko da bilera egiteko orduak.

Bilera horien ordainsariak zehazteko, tauletan ezarritako soldatak hartuko dira oinarri.

Aurrekoarekin bat, sindikatuek zerrenda bat bidaliko beharko diote enpresa zuzendaritzari bilera horietara bertaratu diren afiliatuen izenekin, bilera horien ordainsariak zehazteko.

Artikulu honetan aipatzen den ordainsaria ordezkari sindikalaren bidez pagatzen ahal da, dagokion atal sindikalak hori erabakitzen badu. Horretarako, erabakiaren berri emanen zaio enpresari eta, kasu guztietan, langile afiliatu bakoitzaren idazkiak aurkeztuko dira, zenbateko hori bere ordezkari sindikalaren bidez pagatzeko baimena emanez. Baimenak hitzarmen honen indarraldi bera izanen du. Kasu horietan, enpresak bileretan bertaratu diren afiliatuei dagozkien ordainsariak emanen dizkio atal sindikalaren ordezkariari, berak horien artean banatzeko. Sistema honen bidez pagatutako ordainsariek soldaten eta fiskalitatearen aldeko araubide bera izanen dute, enpresak langileei zuzenean pagatzen dizkienekin alderatuta.

8. Probintziako edo hortik gorako kargu sindikal bat betetzen dutenei eszedentzia emanen zaie, haiek hura eskatzen badute. Gai horretan aplikatzen diren xedapen orokorrek arautuko dituzte eszedentzia horiek.

33. artikulua. Enpresa batzordea.

Enpresako langile multzoaren ordezkaritza organoa da. Batzordekide bakoitzak 30 ordu ordainduko erreserba izanen du hilean bere eginkizunak betetzeko. Lauhilabeteko naturaletan metatzen ahal dira, eta zuzendaritzak dei egindako bileretan erabilitako orduak ez dira zenbatuko. Atal sindikaleko beste kideek edo enpresa batzordeko sindikatu bereko kideek erabiltzen ahalko dituzte ordu horiek.

Enpresa batzordearen eginkizunak hauek dira:

1. Sozietate ezberdinen hitzarmena negoziatzea, eta hitzarmenean adostutakoaren jarraipena egitea.

2. Hiru hilean behin informazioa jasoko du bere sektore ekonomikoaren bilakaera orokorraz, entitatearen ekoizpenaren zein salmenten egoeraz, bere ekoizpen programaz eta enpresan enpleguak ustez izanen duen bilakaeraz.

3. Balantzea, emaitzen kontua eta memoria ezagutzea eta, enpresa akzio edo partaidetza bidezko sozietatea baldin bada, bazkideei ematen zaizkien gainerako agiriak, horien baldintza berberetan.

4. Txostena egitea, enpresaburuak ondoko arlo hauetan hartzen dituen erabakiak gauzatu aurretik:

a) Plantilla berregituratzea eta hartan izaten diren uzte erabatekoak edo partzialak, behin betikoak edo aldi batekoak.

b) Lanaldi murrizketak, baita instalazioen lekualdaketa erabatekoak edo partzialak ere.

c) Enpresaren lanbide heziketako planak.

d) Lanaren antolaketako eta kontroleko sistemak ezarri edo berrikustea.

e) Denborak aztertzea, prima edo pizgarrien sistemak ezartzea eta lanpostuen balorazioa egitea.

5. Txostena egitea, enpresaren bat-egiteak, xurgapenak edo “status” juridikoaren aldaketak enplegu kopuruan eragina baldin badu.

6. Enpresak erabiltzen dituen lan kontratu idatziko ereduak ezagutzea, baita lan harremana bukatzearen inguruko agirienak ere.

7. Hutsegite oso larriengatik jartzen diren zehapen guztien berri izatea.

8. Hiru hilean behin bederen ondokoei buruzko estatistikak jasotzea: absentismo indizea eta horren arrazoiak, lan istripuak eta lanbideari lotutako eritasunak eta horien ondorioak, ezbehar-tasak, laneko ingurumen arloko aldian aldiko azterketak edo azterketa bereziak, eta erabiltzen diren prebentzio baliabideak.

Batzordekide bakoitzak 30 ordu ordainduko erreserba izanen du hilean bere eginkizunak betetzeko. Lauhilabeteko naturaletan metatzen ahal dira, eta zuzendaritzak dei egindako bileretan erabilitako orduak ez dira zenbatuko.

35. artikulua. Batzarrak.

Langileek eskubidea izanen dute urtean gehienez 8 batzar egiteko, enpresaren barruan, betiere guztira 4 ordu gainditu gabe.

Halaber, ordu bateko batzarra egiteko eskubidea izanen dute aparteko arrazoiengatik, langileen ordezkariek eta enpresa zuzendaritzak adostuta.

Asanblada horiek idatziz jakinaraziko zaizkio enpresari, gai-zerrenda adierazita, gutxienez 48 ordu lehenago, enpresako batzordearen bidez.

Nolanahi ere, behar diren zaintaldeak mantendu beharko dira, ezinbesteko zerbitzuak uneoro bermatzeko.

36. artikulua. Konpentsazioa eta irenspena.

Hitzarmen honetan ezarritako baldintzek aurreko egoera indibidualak konpentsatuko eta irentsiko ditu, bai eta xedapen legalek, administratiboek eta itunek ezartzen dituzten ordainsari igoerak ere, osotasunean harturik eta urteko konputuan neurturik.

Itundutako baldintzek osotasun organiko eta zatiezina osatzen dute eta, bi alderdiek formalki adierazten dutenez, hitzartutakoari eginiko loturek itundutako klausula guztiekiko konpromiso izaera dute.

Agintaritza judizialak hitzarmen honetako funtsezko punturen bat baliogabetzat jotzen badu, puntu hori ondoriorik gabe geldituko da, eta alderdiak bilduko dira berriz haren edukia aztertzeko.

Aurreko hitzarmenen baten ondorioz soldata baldintza hobeak dituzten langileek, hitzarmen honi erantsitako tauletan daudenekin alderatuta, alde hori mantenduko dute “ad personam”. Aldea plus pertsonal batean ordainduko zaie nominan.

37. artikulua. Dietak eta kilometrajea.

A) Dietak: 10,809 euroko dieta ezartzen da bazkari edo afari bakoitzeko. Zenbateko hori eguneratuko da, urtero egiten diren soldata igoerekin bat.

B) Kilometrajea: 0,27 euro ordainduko da lanaldian norbere ibilgailuarekin eta enpresaren zerbitzura egiten den kilometro bakoitzeko.

38. artikulua. Azken xedapena. Hitzarmeneko baldintzak ez aplikatzea.

Langileen Estatutuaren 82.3 artikuluak arautzen du lan baldintzak ez aplikatzea, baldintza horiek funtsez aldatzeagatik. Hitzarmen honetan itundutakoak ez aplikatzea justifikatzeko, enpresaren bideragarritasuna eta enpleguari eustea arriskuan jar dezaketen arrazoi ekonomiko, tekniko eta antolaketakoak izan behar dira. Edozein kasutan, ordezkari sindikalekin adostu behar da. Hala bada, ordezkariek fede onez negoziatuko dituzte beste baldintza batzuk, aipatu kausen larritasuna egiaztatzen bada. Horrenbestez, enpresak konpromisoa hartzen du lan baldintzak ez aplikatzea bere kabuz ez erabakitzeko, eta aldez aurretik adostu gabe arbitrajera ez eramateko.

Lehen xedapen gehigarria.–Errelebo-kontratua.

Arauzko legea betetzean, langileek aukera izanen dute lanaldia eta soldata murrizteko, eta egoera hori bateragarria izanen da erretiro partzialarengatik Gizarte Segurantzak aitortzen dion pentsioarekin, 65 urte bete arte. Adin horrekin, erretiro arrunta hartuko dute.

Hitzarmen honen indarraldian egiten diren errelebo kontratu guztiak mugagabeak izanen dira.

Akordio honi jarraituz egiten diren erretiro partzial guztiak Gizarte Segurantzaren Lege Orokorrean, Langileen Estatutuan eta gainerako unean uneko legeria indardunean gai horri buruz ezarritako baldintzei lotuko zaizkie.

Bigarren xedapen gehigarria.–Hitzarmena betetzeko bermea.

Hitzarmen indarraldian enpresak ez baditu hitzemandako inbertsioak gauzatzen aurreikusitako epeetan, eta/edo kaleratze objektiboak edo bidegabekoak badira, enpresa zuzendaritzak bere burua behartzen du honako hauek egitera: ukitutako langileei 2012ko azaroan zeuden soldata eta lan baldintzak berehala berrezartzea, akordio honek aldatzen duen hitzarmenean agindutako igoerak aplikatzea (2013. urterako itundutako igoera, 2010. urteari dagozkion soldata taulak igotzea –2013ko abendura arte eginik gabe zegoena– eta 2012ko atzerakinak pagatzea –aurreko urteko KPIa–), 2012. urteari dagozkion ordaindu gabeko atzerakinak pagatzea eta 2013ko urtarriletik 1etik garantia-klausula hau gauzatzen den arte hitzarmenaren aldaketarengatik kobratu gabe zegoen dirua berriz jartzea.

Garantia-klausula hau ez da aplikatuko baldin eta, ez-aplikatzea justifikatzeko, enpresaren bideragarritasuna eta enpleguari eustea arriskuan jar dezaketen arrazoi larriak badira, ekonomikoak, teknikoak nahiz antolaketakoak izan. Bi alderdiek larritzat jo behar dituzte arrazoi horiek.

Hirugarren xedapen gehigarria.–Enpresak zainduko du langileak lanaldiaren iraupena eta banaketa egokitzeko duten eskubidea betetzen dela, eginkizun pertsonalak, familiakoak eta lanekoak batera eramateko eskubidea benetan erabiltzeko.

Horretarako, enpresak eta enpresa batzordeak ahalegin handiak eginen dituzte plantillako langile guztien laneko eta familiako eginkizunak batera eramateko plan bat egin eta ezartzeko, eginkizun pertsonalak, familiakoak eta lanekoak bateragarriak izateko neurriak zehaztuz, helburu hauekin:

–Plantillako laneko eta familiako eginkizunak batera eramateko diagnostiko bat egitea, lanpostu ezberdinak kontuan harturik.

–Laneko eta familiako eginkizunak batera eramateko plan bat egitea, lanbide kategoria, lanpostu eta lanaldi mota ezberdinak kontuan harturik eta egindako diagnostikoa oinarri harturik.

–Laneko eta familiako eginkizunak batera eramateko plana bukatzea, plantillarekin eta/edo ordezkari sindikalekin egindako bateratze-lanean atera diren proposamenak kontuan harturik, eta hura martxan jartzeko plangintza egitea.

–Neurriak eta/edo zerbitzuak hitzarmen kolektiboan sartzea.

–Laneko eta familiako eginkizunak batera eramateko plana martxan jartzearen jarraipena egitea, moduari eta denborari dagokienez, bai eta emaitzena ere.

Tecnologia y Calidad Lactea, S.L. Langileen ordezkaria

Iragarkiaren kodea: F1600620