Iragarkia

33. ALDIZKARIA - 2016ko otsailaren 18a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

2C/2016 EBAZPENA, urtarrilaren 13koa, Politika Ekonomiko eta Enpresarialaren eta Lanaren zuzendari nagusiak emana, Atarrabiako Abelan San Andrés SL enpresaren hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.

Atarrabiako Abelan San Andrés SL enpresaren hitzarmen kolektiboaren testua (kode zenbakia: 31100060012013) aztertu da, erregistro honetan 2015eko azaroaren 23an sartu zena eta 2015eko urriaren 26an izenpetu eta 2016ko urtarrilaren 8an zuzendu zutena, Langileen Estatutuari buruzko Legearen testu bategina onetsi zuen urriaren 23ko 2/2015 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera. Horrenbestez,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Nafarroako Aldizkari Ofizialean argitaratzeko agintzea, denek jakin dezaten.

Iruñean, 2016ko urtarrilaren 13an.–Politika Ekonomiko eta Enpresarialaren eta Lanaren zuzendari nagusia, Izaskun Goñi Razquin.

ABELAN SAN ANDRÉS SLREN HITZARMENA

I. KAPITULUA

Arau orokorrak

1. artikulua. Aplikazio eremua.

Enpresa hitzarmen hau Atarrabiako (Nafarroa) Abelan San Andrés SL enpresan aplikatuko da, eta honako hauek izenpetu dute: Abelan San Andrés SLko Zuzendaritzaren aldetik, Simón Angel Roda Narvaiz jaunak, Eugenio Uriz Indurain jaunak, Francisco Javier Garde Malo jaunak eta Maia Izaro Gonzalez Van Der Sluys andreak; eta langileen aldetik, enpresa batzordeko kide hauek: Rubén Erro Pagola jaunak (LAB), Rubén San José Dominguez jaunak (LAB), Iñaki Gorostizu López jaunak (LAB), Javier Valdazo Fernandez jaunak (CCOO), José López Pérez jaunak (CCOO) eta Pedro M. Iglesias Aparicio jaunak (CCOO).

1.2. Eremu funtzionala: Abelan San Andrés SLk papera eta kartoia fabrikatzen ditu, eta CNAE 1712 zenbakia du.

2. artikulua. Langile eremua.

Hitzarmen honek Abelan San Andrés SLko langile guztien baldintza sozioekonomikoak arautzen ditu, indarreko legerian adierazitako salbuespenekin bakarrik, eta bereziki, honako kategoria eta lanpostu hauei dagozkienak: zuzendari kudeatzailea; Fabrika, Langile, Kalitate, Merkataritza eta Finantza arloetako zuzendariak; Salmenta, Produkzio, Mantentze-lan, Hornikuntzak, Prozesu ingeniaritza eta Administrazio arloetako buruak eta Mantentze-lan mekanikoaren arloko arduraduna.

3. artikulua. Hitzarmenaren indarraldia eta hitzarmena salatzea.

Hitzarmen hau bi urterako itundu da; 2014ko urtarrilaren 1ean hartuko du indarra ondorio guztietarako, eta 2015eko abenduaren 31n amaituko da.

Hitzarmena besterik gabe salatuko dute negoziazio batzordeko alderdiek 2015eko urriaren 1ean; orduan, negoziazio-mahai berria eratu beharko da hilabeteko epean, hurrengo hitzarmenerako negoziazioak hasteko.

4. artikulua. Betebeharrezkotasuna.

Hitzarmen kolektibo hau bete beharrekoa da indarrean den bitartean, eta behin hitzarmena salatu eta itundutako iraunaldia amaitu ondoren, hitzarmenak indarrean jarraituko du harik eta bi alderdiek horren ordezko bat sinatzen duten arte.

Aurrekoa gorabehera, enpresaren eta langileen ordezkarien arteko akordioaren bidez, bidezkoa izanen da hitzarmenean ezarritako lan-baldintzak enpresan ez aplikatzea.

Hitzarmena aldatzeko edo ez aplikatzeko, sindikatuen ordezkariekin akordio bat lortu beharko da. Beraz, enpresak hitzarmen hau ez aplikatzea edo aldatzea nahi badu Langileen Estatutuen 82.3 artikuluko prozedurari jarraikiz, lehenik kontsultaldi bati emanen dio hasiera, langileen ordezkariekin akordio bat lortzen saiatzeko. Akordio bat lortzea ezinezkoa bada, hitzarmenaren batzorde paritarioaren irizpenaren pean jarriko da, zeinak zazpi eguneko epean ebatzi beharko baitu, eta, hala ere akordiorik ez badago, Nafarroako Lan Auzitegiaren berezko prozeduretara joko da, ondoko paragrafoetan ezarritakoari jarraikiz.

Bi aldeek espresuki erabaki dute batzordeak adostasunak konpontzeko ikusiko dituen prozesuak Nafarroako Lan Auzitegiko adiskidetze eta bitartekotzakoak izanen direla. Arbitraje prozedura aplikatuko da, bakar-bakarrik, haren menpe jartzeko bi alderdien arteko akordioa badago. Orobat, auzia Aholku Batzorde Nazionalaren edo Autonomikoaren menpe jartzeko, alderdi bakoitzak hori onartzeko hartutako erabakia beharko da.

5. artikulua. Batzorde Paritarioa.

Batzorde paritarioa eratzen da, hitzarmenaren sinatzaileek osatua; gehienez ere 6 kide izanen ditu, 3 langileen aldetik eta 3 enpresaren aldetik.

Batzordearen bi aldeetako edozeinek eskatzen ahal du batzordea biltzeko, eta, halakoetan, 15 eguneko epean bilduko da, beranduenez. Bere eskumenak izanen dira hitzarmen kolektibo honen edozein arau interpretatu edo argitzea.

Batzorde paritarioan dagoen sindikatuen ordezkaritza bakoitzak eta, orobat, enpresaren ordezkaritzak aholkularien laguntza izaten ahal dute. Aholkulari horiek hitza izanen dute, baina botorik ez.

Batzorde paritarioaren akordioek balioa izateko, botoen %51ren babesa izan behar dute.

Batzorde paritarioak hilabeteko epean, gehienez ere, hartu beharko du erabakia planteatzen zaizkion kontuei buruz. Epe horretan erabakirik hartzen ez badu, ulertuko da tramitea bete dela.

Batzorde paritarioko kide titularrek eskubidea izanen dute bilkura egunetan baimen ordaindua hartzeko.

II. KAPITULUA

Lanaren antolaketa eta malgutasuna

6. artikulua. Non Stop araubidea.

Non Stop araubidea hitzarmen honen II. eranskinean zehaztutako baldintzek arautzen dute.

7. artikulua. Karga, Deskarga eta Baskularen atalak.

Karga, Deskarga eta Baskularen atalak arautuko dituzten arauak eta baldintzak ere onetsi dira. Hitzarmen honen III. eranskinean zehaztu dira.

Karga, Deskarga eta Baskularen ataletako langileek, zerbitzuak larunbat goizean ematen badituzte, edota funtzionamendurako hitzartutako arauen arabera beharrezkoak diren jaiegunetan, prima hauek jasoko dituzte benetan lan egindako egun bakoitzeko:

–Larunbat goiza: Non Stop puntu bati dagokiona.

–Igandea edo jaieguna: 4 Non Stop punturi dagokiena.

8. artikulua. Mantentze elektrikoa.

Mantentze-lan elektrikoko langileek hitzarmen honi atxikitako IV. eranskinean zehazten diren arau eta baldintzen arabera emanen dute zerbitzua.

Mantentze-lan elektrikoko langileek larunbat goizean lan egiten badute, prima bat jasoko dute benetan lan egindako goiz bakoitzeko, zehazki: 0.5 Non Stop punturi dagokiena.

Guardia lokalizatuen sistema eginen dute (IV. eranskinean zehaztu da) eta horiek Guardia Lokalizatuen Sistemak berarekin dakartzan betebehar guztietan (guardia, lankideen absentziak betetzea, etab.) konpentsatuko dira, 3. gehigarriko E-1, 2 eta 3 puntuetan ageri diren zenbatekoekin.

–Astelehenetik ostiralera bitarteko gauetan egindako guardia lokalizatuko aste bakoitzeko: E-1.

–Larunbat arratsaldez eta gauez eta igandeko txandetan egindako guardia lokalizatuko bi txandatik behin: E-2.

–Jaiegunetako goizetan, arratsaldeetan eta gauetan egindako guardia lokalizatuko txanda bakoitzeko: E-2.

–Bosgarren txandaren akordioaren arabera, zenbateko finkoa jasoko dute hilean edo egunean, altan egindako eta duten soldataren araberakoa, Non Stop Finkoaren Plusa izeneko kontzeptuan. Horren urteko zenbatekoa puntu honetan ageri da: E-3.

–Fabrikan guardia lokalizatuan diren mantentze-lan elektrikoko langileen beharra badute, sartzen duten denborari aparteko orduentzat ezarritako tratamendu bera (24. artikulua) emanen zaio, jaiegunetako aparteko lan orduen baremoa aplikatuta, baina ez dira halakotzat hartuko Gizarte Segurantzan kotizatzeko (betiere ez badute gainditzen akordio honetan ezarritako urteko lanaldia). Nolanahi ere, zenbateko horiek ez dira aintzat hartuko aldi baterako ezintasunagatiko prestazioen osagarriaren oinarria kalkulatzeko (Hitzarmenaren 26. artikulua). Jardundako denbora alde batera utzita, jaiegunetako aparteko bi orduri dagokien zenbatekoa gutxienez kobratuko dutela bermatuko zaie.

9. artikulua. Mantentze-lan mekanikoa.

Mantentze-lan mekanikoko langileak hitzarmen honen V. eranskinean zehaztutako arau eta baldintzen arabera arituko dira.

Prima batzuk jasoko dituzte larunbat goizean, larunbat arratsaldean, igandean edo jaiegunean lan egiteagatik. Hona hemen prima horien balioak:

–Larunbat goiza: 0,5 Non Stop punturi dagokiena.

–Larunbat arratsaldea: Non Stop puntu bati dagokiona.

–Igandean: 2 Non Stop punturi dagokiena.

–Jaiegunak: 4 Non Stop punturi dagokiena.

–Bosgarren txandaren akordioaren arabera, zenbateko finkoa jasoko dute hilean edo egunean, altan egindako eta duten soldataren araberakoa, Non Stop Finkoaren Plusa izeneko kontzeptuan. Horren urteko zenbatekoa 3. gehigarriko puntu honetan ageri da: M-3.

Halaber, guardia lokalizatuen sistema eginen dute (V. eranskinean zehaztu da) eta horiek Guardia Lokalizatuen Sistemak berarekin dakartzan betebehar guztietan (guardia, lankideen absentziak betetzea, etab) konpentsatuko dira, 3. gehigarriko M-1 eta M-2 puntuetan ageri diren zenbatekoekin:

–Guardia lokalizatua:

• gaueko txanda (astelehenetik ostiralera): M-1.
• Larunbat edo igande gaueko bi txandatik behin: M-2.
• Jaiegunetako gaueko txanda bakoitza: M-2.
• Fabrikan guardia lokalizatuan diren mantentze-lan mekanikoko langileen beharra badute, sartzen duten denborari aparteko orduentzat ezarritako tratamendu bera (24. artikulua) emanen zaio, jaiegunetako aparteko lan orduen baremoa aplikatuta. Jardundako denbora alde batera utzita, jaiegunetako aparteko bi orduri dagokien zenbatekoa gutxienez kobratuko dutela bermatuko zaie.

10. artikulua. Galdara eta kogenerazioa.

Galdara eta Kogenerazioko langileak hitzarmen honen VI. eranskinean zehaztutako arau eta baldintzen arabera arituko dira.

Non Stop lan-araubidea dutenez, dagokien prima jasoko dute, hots, 19. artikuluan zehazten dena.

11. artikulua. Absentziak partzialki betetzen dituzten langileak.

Absentziak betetzeko ardura duten langileak hitzarmen honen VII. eranskinean zehaztutako arau eta baldintzen arabera arituko dira.

Absentziak partzialki betetzen dituzten langileei dagokienez, askatasuna dute larunbatetan (arratsaldeko eta gaueko txanda) eta igande edo jaiegunetan (hiru txandak) gerta daitezkeen absentziak betetzeko.

Berariazko ordainsari bat jasoko dute urtean, hilabeteetan banatua. Zenbateko hori 3. gehigarriko C-1 puntuan ageri da.

Halaber, larunbat goizeko, larunbat arratsaldeko eta larunbat gaueko eta igandeko edo jaieguneko primak jasoko dituzte (hitzarmen honen 19. artikuluan zehaztu dira araubide horretarako) eta gaueko lanaren plusa (20. artikuluan aurreikusi da) aurreko garai eta txanda horietako bakoitzean ordezkapenak eta benetako lana egiten dituztenean.

12. artikulua. Malgutasun araubidea (lanaldiaren banaketa irregularra).

Malgutasun araubidea arautzen duten baldintzak hitzarmen honen VIII. eranskinean zehaztu dira.

III. KAPITULUA

Lanbide kategoriak

12.1. artikulua. Langile espezialistak eta kalifikazio gabeko langileak.

Gaur egun Atarrabiako lantokian dauden langile espezialisten eta kalifikatu gabekoen lanpostuak honako kategoria hauetan berregituratuko dira:

Lanpostuaren kategoria.

–K.

• 3. makinako gidaria.
• Lanbide osagarrietako 1. mailako ofiziala.
• Galdara/kogenerazioko gidaria.

–J.

• 1. makinako gidaria.

–I.

• Oreak prestatzeko gidaria.

–H.

• 3. makinako laguntzailea.
• Lanbide osagarrietako 2. mailako ofiziala.
• 1. makinako laguntzailea.

–G.

• 3. bobinagailuko gidaria.
• 1. bobinagailuko gidaria.
• Prozesuko Analista.
• Laguntzaile berezia.

–F.

• Lanbide osagarrietako 3. mailako ofiziala.
• Koipeztatzailea.
• Eskorga gidaria.

–D.

• Lanbide osagarrietako laguntzailea.
• Oreak prestatzeko 2. laguntzailea.
• Oreak prestatzeko 1. laguntzailea..
• Kargako laguntzailea.
• Akaberetako laguntzailea.
• Bobinagailuko laguntzailea.
• Absentziak betetzeko langilea.
• Bestelako edozein lan, hamabi hiletik gorako antzinatasuna duena, produkzioko laguntzailea.

–B.

• Kalifikatu gabeko langile oro, hamabi hilabetetik beherako antzinatasuna duena.

12.2. artikulua. Teknikariak eta administrariak.

–0. taldea.

• Antolatzaile izangaia.
• Administrari izangaia.
• Mandataria (16-17).
• Laguntzailea (16-17).

–1. taldea.

• Garbitzailea.

–2. taldea.

• Lorezaina.
• Atezaina.
• Mandataria.
• Sukaldeko laguntzailea.
• Zerbitzaria.
• Pisularia.
• Zaintzailea-gauzaina.

–3. taldea.

• Etxezaina.
• Telefonozaina.
• Ekonomatuko saltzailea.
• Igorlea.
• Kalitate kontroleko laguntzailea.

–4. taldea.

• Zinpeko guarda edo zaindaria.
• Bulego teknikoko laguntzailea edo kalkatzailea.
• Administrari laguntzailea.
• 2. mailako areto-maisua.

–5. taldea.

• Zulatzailea-grabatzailea-egiaztatzailea.
• Ekonomatuko kutxazaina.
• Sukaldaria.
• 1. mailako areto-maisua.
• Biltegizaina.
• Antolaketako laguntzailea.
• Kalitate kontrolatzailea.

–6. taldea.

• Antolaketako 2. mailako teknikaria.
• Saltzaile bidaiaria.
• Administrari-ofiziala, 2. mailakoa.
• Kontramaisua, 2. mailakoa.

–7. taldea.

• Kontramaisua, 1. mailakoa.
• 1. mailako administrari-ofiziala.
• Antolaketako teknikaria, 1. mailakoa.
• Delineatzailea.
• Operadorea.
• Gizarte-laguntzailea.
• Saltzailea.
• Giza baliabideetako teknikaria.
• Ingurumeneko teknikaria.
• Laneko arriskuen prebentzioko teknikaria.

–8. taldea.

• Ekonomatuko burua.
• Programagailua.
• Delineatzaile-proiektugilea.
• Atalburua edo arduraduna.

–9. taldea.

• Salmenta taldeko burua.
• Antolaketako burua.
• Biltegietako burua.
• Administrazio Ataleko burua.

–10. taldea.

• O.L.T.
• Fabrikazio Ataleko burua.
• Zerbitzuetako burua.
• Kalitate kontroleko burua.
• Bulego Teknikoko burua.
• Datu-prozesuetako analista.
• Salmentetako ordezkaria.
• Laneko arriskuen prebentzioko burua.
• Ingurumeneko burua.

–11. taldea.

• Fabrikazioko burua.
• Salmenta-burua.
• Mantentze-lanetako burua.
• Laborategiko burua.
• Informatikako burua.
• Administrazioko burua.
• Enpresako medikua.
• Langileriaren burua.

–12. taldea.

• Teknikari buruak.

–13. taldea.

• Zuzendariordeak.

–14. taldea.

• Zuzendariak.

13. artikulua. Enpresako langile guztiek baldintza berberetan lehentasunezko eskubidea izanen dute edozein lanbide taldetan eta ataletan sortzen diren lanpostu hutsak betetzeko. Lanpostuko balidazioari esaten zaio baldintzen berdintasuna.

Lanpostuetan sartu eta igotzeko baldintzak indarreko legezko xedapenek arlo horretarako ezartzen dituztenak izanen dira. Igoeretarako, langileak enpresan duen antzinatasuna lehentasunezko merezimendua izanen da, baldintza berberetan.

IV. KAPITULUA

Ordainsariak

14. artikulua. Ordainsarien kontzeptuak eta ordainketa egiteko eguna.

A.–Ordainsarien kontzeptuak.

1. Hitzarmeneko soldata.

2. Soldataren osagarriak:

a) Pertsonalak:

–Antzinatasuna.

–“Ad personam” osagarria.

b) Lanpostukoak:

–Larunbateko, igandeko eta jaieguneko plusa, goizekoa, arratsaldekoa eta gauekoa.

–Non Stop Finkoaren plusa.

–Kategoriaren osagarria.

–Gaueko lanaren plusa.

–Konpentsazio plusa lanaldi jarraituko atsedenaldia (otartekoa) ez egiteagatik.

–Mantentze-lanetako guardien sistemaren plusak.

–Absentziak betetzeko plusa.

c) Lanaren kalitatearenak edo kantitatearenak:

–Aparteko orduak.

d) Hilabete baino gehiagoko mugaeguna dutenak:

–Ekaineko aparteko paga.

–Eguberrietako aparteko paga.

–Iraileko aparteko paga.

–Mozkinen aparteko paga.

–Emaitzen aparteko paga.

3. Soldataz kanpoko sariak:

–Gizarte Segurantzaren babesaren borondatezko hobekuntzak (ABE egoerako osagarria).

B.–Ordainketa egiteko eguna.

Nominak hilabetea bukatutakoan ordainduko dira, hilabete bakoitzeko laugarren lanegunean. Horretarako, lanegunak astelehenetik ostiralera bitarte zenbatuko dira.

Hilabete bakoitzeko 28an edo aurreko lanegunean, aurrerakina abonatuko da kontuan.

15. artikulua. Hitzarmeneko soldata.

Hitzarmen honen 1. gehigarriko soldaten tauletan zehaztu da hitzarmeneko soldata kategoria, talde edo maila bakoitzerako.

16. artikulua. Antzinatasuna.

Antzinatasuna. Langile guztiek izanen dituzte zerbitzuan emandako denboragatiko aldizkako igoerak: bi hirurteko eta hortik aurrerako bosturtekoak.

Hitzarmen honen 2. gehigarriko taulan ezarri da hirurteko eta bosturteko horien balioa.

Langile guztientzat, aldizkako igoerek muga hau izanen dute: bi hirurteko eta lau bosturteko.

Arau horiek aplikatzeak ez du inolaz ere ekarriko kontzeptu horregatik jasotzen ari diren zenbatekoak murriztea.

1978ko urtarrilaren 1etik aurrera sartutako izangaien, ikastunen eta mandatarien kasuan, sartu zirenetik aurrera zenbatuko da antzinatasuna. Enpresan aurretik sartutakoen kasuan, berriz, antzinatasuna 1978ko urtarrilaren 1etik aurrera hasiko da zenbatzen. Halaber, aintzat hartuko dira probaldian egindako zerbitzuak eta enpresako plantillan lanpostua betetzera pasatu diren behin-behineko edo bitarteko langileek egindakoak.

Denbora horiek bete eta hurrengo hileko lehen egunetik hasiko dira sorrarazten aldizkako igoerak.

Kategoriaz igo edo lanbide-taldez aldatzen direnek, taulan bere kategoria edo talde berriari dagokion antzinatasun plusa kobratuko dute.

Langile batek enpresan lana utzi eta berriro bertan sartzen bada, antzinatasuna azken sarrera horren datatik aurrera kalkulatuko da. Horri dagokionez, VI. kapituluan eszedentziei eta soldadutzari buruz ezarritakoa aplikatuko da.

17. artikulua. Kategoriaren osagarria (CSC).

Kategoria bakoitzerako soldataren osagarri bat ordainduko da, zehazki hitzarmen honen 1. gehigarriko soldaten tauletan ezartzen den urteko zenbatekoa.

Taula horiek osatzeko, 22. artikuluan ezarritakoa aplikatu da, 1. taldetik 8.enera bitartekoen (1.a eta 8.a barne) kasuan izan ezik; talde horien balioak handitu egin dira dagokien hitzarmeneko soldataren %51ra arte. Kontzeptu horren igoera –20. artikuluan 2007rako ezarritakoa (%4) baino handiagoa– ad personam osagarrian xurga daiteke (18. art.).

%100eko zenbatekoa jasoko da langilearen antzinatasuna urte betetik gorakoa denean; bestela, gutxienez ere 27. artikuluan zehazten diren portzentajeak jasoko dituzte langile sartu berriek.

CSCren zenbatekoa gutxienez ere hitzarmeneko soldataren %51 izatea erabaki da, kategoria bakoitzean.

18. artikulua. Langile batzuek 1994ko abenduaren 31n “Enpresaren Osagarri” gisa jasotzen zituzten zenbatekoak “Ad personam osagarri” izatera pasatu ziren 1995eko urtarrilaren 1etik aurrera; hala, egun horretatik aurrera desagertu egin zen “Enpresaren Osagarri” izena zuen ordainsaria.

19. artikulua. Non Stop araubidea.

Non Stop plusa ordaintzeko modua (Produkzioa): behar bezala zehaztua Enpresa Itunean 2001/2003 urteetarako.

–Horren ondorioz, bi kontzeptutan finkatu zen:

1. Non Stop Finkoaren plusa = 12 hileko soldatetan jasotzeko, hilabete bakoitzeko egun naturalen arabera. 3. gehigarriko NS-1 puntuan ageri den zenbatekoa.

2. Non Stop Aldakorraren plusa (benetan lan egindako egun bakoitzeko).

Non Stop plusaren %50 Non Stop Finkoaren plusaren kontzeptuarekin konpentsatzen denez, beste erdia konpentsatzea besterik ez da geratzen, eta hori, puntuaren balioa aldatu gabe, puntu kopurua erdira murriztea da:

A.–Larunbat goiza: 0,5 puntu.

–Larunbat arratsaldea: 1,0 puntu.

–Larunbat gaua eta igandeak: 2,0 puntu.

• Lantokira aste barruko jaiegunetan joateagatik 4 puntu emanen dira, 2000. urteko konpututik kanpo utzi baitira –aldakor izaten jarraituko dute–.

Jaiegun bat edo urtarrilaren 1a edo abenduaren 24a, 25a eta 31 larunbata edo igandea badira, lantokira joateagatiko konpentsazioari ez zaizkio kenduko Non Stop Finkoan dagoeneko aplikatutako puntuak (A atalean adierazitakoak).

3. gehigarrian ageri da zein den puntuaren balioa 2014. urterako. Zenbateko hori hitzarmenak indarra duen hurrengo urtean eguneratuko da, soldaten taulak igotzen diren portzentaje berberetan.

• Non Stop Aldakorraren plusa 2001eko urtarrilaren 1etik aurrera egutegian gertatzen diren aldaketen mende egonen da.

Non Stop araubidearen eraginpean ez dauden langileek plus bat kobratuko dute larunbatean, igandean edo jaiegunetan benetan lan egindako egun bakoitzeko eta zenbateko hori eskala honen arabera zehaztuko da:

–Larunbat goiza: Non Stop puntu bati dagokiona.

–Larunbat arratsaldea: 2 Non Stop punturi dagokiena.

–Larunbat gaua, igandea eta jaiegunak: 4 Non Stop punturi dagokiena.

20. artikulua. Gaueko lanaren plusa.

Benetan lan egindako gaueko lanaldi bakoitzerako plusa ezartzen da (3. gehigarrian ageri da).

–Espezialistentzat eta kalifikazio gabekoentzat: T-1.

–Teknikarientzat eta administrarientzat: T-2.

21. artikulua. Ogitartekoaren plusa.

Duen lanagatik langile batek ezin badu lanaldi jarraiturako ezarritako 15 minutuko atsedenaldia hartu, 1. gehigarrian zehazten den zenbatekoa jasoko du. Konpentsazio hori benetan lan egindako egun bakoitzeko emanen da.

22. artikulua. 2014rako eta 2015erako ordainsariak.

–2014. urtean:

Hitzarmenaren indarraldiaren lehen urtean, %1,3 (2013. urteko KPI nazionala + 0,3, gutxienez %1,3) igoko dira soldata taulak, 2013ko abenduaren 31n indarra duten 1., 2. eta 3. gehigarrietan ageri direnak. Igoera horretatik kanpo daude hitzarmen honetan beren igoera duten soldata kontzeptuak.

–2015. urtean:

Hitzarmena indarrean den bigarren urte honetan, %1 (2014. urteko KPI nazionala, gutxienez %1) igoko dira soldata taulak, 2014ko abenduaren 31n indarra duten 1., 2. eta 3. gehigarrietan ageri direnak. Igoera horretatik kanpo daude hitzarmen honetan beren igoera duten soldata kontzeptuak.

23. artikulua. Aparteko pagak.

Urtean aparteko paga hauek ordainduko dira, jarraian zehazten diren kontzeptuak eta zenbatekoak barne:

a) Ekaineko eta Eguberrietako aparteko paga; horietan hitzarmeneko soldata, antzinatasuna, kategoriaren osagarria eta ad personam osagarria sartzen dira.

Urtero, ekainaren 15ean eta abenduaren 15ean ordainduko dira, hurrenez hurren.

Enpresan urtero urtarrilaren 1etik aurrera edo uztailaren 1etik aurrera sartutako langileen kasuan, eskubidea izanen dute kasuan kasuko seihilekoan lan egindako denborari dagokion zati proportzionala jasotzeko, pagen sortzapena seihileko naturalekoa izanen baita.

b) Mozkinen aparteko paga: langile guztiek eskubidea izanen dute Mozkinen aparteko pagaren kontzeptu gisa 1. gehigarriko soldaten tauletan 2014rako zehazten den zenbatekoa jasotzeko, honela: antzinatasunagatik aplikatzen den koefizientea %5ekoa izanen da hirurteko bakoitzeko eta %10ekoa jarraian egindako bosturteko bakoitzeko. Mozkinetan parte hartzea urtero sorraraziko da, urtarrilaren 1etik abenduaren 31ra, eta urtea iraganda ordainduko da, martxoaren 10ean. Abenduaren 31n enpresan urte bete baino gutxiago lan egin duten langileen kasuan, eskubidea izanen dute hurrengo urteko martxoan lan egindako denborari dagokion zati proportzionala jasotzeko, pagen sortzapena urte naturalekoa izanen baita.

c) Emaitzen aparteko paga: emaitzen aparteko paga bat ordainduko da; hori urtero sorraraziko da, urtarrilaren 1etik abenduaren 31ra bitarte, 1. gehigarrian 2014rako adierazitako zenbatekoarekin, eta urtea iragan ondoren ordainduko da, apirilaren 10ean. Abenduaren 31n enpresan urte bete baino gutxiago lan egin duten langileen kasuan, eskubidea izanen dute hurrengo urteko apirilean lan egindako denborari dagokion zati proportzionala jasotzeko, pagen sortzapena urte naturalekoa izanen baita.

d) Iraileko aparteko paga:

Opor guztiak gehienez ere bi ziklotan, uztailaren 1etik abuztuaren 31 arte (biak barne), hartzen dituzten langileek ez dute deus jasoko paga honetatik. Gainerako langileek 3. gehigarrian jasotako zenbatekoaren portzentaje bat hartuko dute, haien egutegian uztailaren 1etik abuztuaren 31 arte (biak barne) adierazita dituzten lan egunen arabera, eta dagozkien oporrak izanen dituzte uztailaren 1etik abuztuaren 31 arte, bi ziklotan hilabete horien barrenean.

Langileren batek Zuzendaritzak planteatzen duena ez beste egutegi bat proposatu eta hura onartua izanez gero, langileak ez du eskubiderik izanen paga hori hartzeko.”

24. artikulua. Aparteko orduak.

I.–”Ordainketa” modalitatea, 3. gehigarrian jasotako balioak.

A.–Lanegunean, astelehenetik ostiralera, norberaren egutegian laneguna dena:

–Espezialistak eta kalifikazio gabeko langileak: HE-1.

–Teknikariak eta administrariak: HE-20.

B.–Gainerako egunetan:

–Espezialistak eta kalifikazio gabeko langileak: HE-3.

–Teknikariak eta administrariak: HE-4.

–Gaueko aparteko orduetan (22:00etatik 6:00etara) gaueko plusa ordainduko da, egindako orduekiko proportzioan.

–Larunbatean, igandean edo jaiegunean Non Stop araubidea duen lanpostuan lan egindako aparteko orduetan, ezarritako prima ordainduko da, egindako orduekiko proportzioan.

C.–Jaieguneko aparteko ordua (guardia) mantentze-lanetako langileentzat: modalitate berri hau ezarri da eta zenbateko berri bat ere bai, kontzeptu guztiak kontuan hartzen dituena: HE-5.

Oharra: “Ordainketa” modalitatekoak izanen dira honako hauengatik egindakoak: “lanaldi arrunta luzatzea”, “mantentze-lanetarako deiak” eta “produkzioari hasiera eman aurretik instalazioak prestatzea”.

II.–”Atseden konpentsatzailea” modalitatea.

–Geroko atseden konpentsatzailerako aintzat hartuko da kalku honetatik ateratzen den ordu kopurua:

egindako aparteko orduak bider 1,75

–Aurreko puntuan adierazitako atseden konpentsatzaileko orduak erabiltzeko arauak:

1.a “Ordainketa” modalitatearen oharrean adierazitakoa salbu, egindako aparteko orduak atseden konpentsatzailerako kontabilizatzen ahalko dira, egun berean egindakoen kopurua edozein izanik. Lanaldi osoetan hartuko dira; eta lanaldi osora iristen ez diren orduak osorik eta behin batean hartuko dira.

2.a Ahal dela, atseden konpentsatzailea ukitutako pertsonari interesatzen zaionean hartuko da, eta horretarako, absentziak betetzeko langileak erabiliko dira, zuzenean nahiz zeharka, kasuan kasuko lanpostuko lana egiten dakitenak.

3.a Ez da arazorik izanen atseden konpentsatzailea emateko, baldin eta erabili nahi den egun horretan, absentzia betetzeko pertsona egon ala ez egon, pertsona eskatzailea bere lanpostuan egoteko beharrik ez badago; hori, noski, dagokion arduradunaren irizpideen arabera erabakiko da, egun horretan egin beharreko produkzioa edo lana aintzat hartuta.

4.a Azaroaren 15eko astean, egun horretan dauden saldoak (erabiltzeke daudenak) aztertuko dira, atseden konpentsatzaileak nola emanen diren antolatzeko eta abenduaren 31n deuseztatzeko.

III. - “Atseden konpentsatzailea gehi ordainketa” modalitatea.

Modalitate hori hautatzen duen langilearen kasuan, egin dituen orduen kopurua bider 1,75 eginen da (adibidez: 8 x 1,75 = 14); hala, 1 hori denboran har dezake eta gainerako 0,75a plus batean, lan egindako ordu arrunten balioan: (adibidez: 14 = 8 hartu eta 6 kobratu).

Lan egindako ordu arrunta: (hitzarmeneko soldata + CSC + antzinatasuna + Non-Stop finkoaren plusa + mozkinen aparteko paga + emaitzen aparteko paga)/urteko lanaldia.

Langileak bat hautatuko du hiru modalitateen artean.

25. artikulua. Konpentsazioa prestakuntzagatik eta arazoak konpontzeko taldeetara joategatik.

Lan orduetatik kanpo prestakuntza mintegietara edo arazoak konpontzeko taldeetara joateagatik aparteko orduengatik ordaintzen den zenbateko bera ordainduko da.

Enpresak segurtasunari buruzko mintegi laburrak ematen ahalko ditu, laneko txanda gehienez ere ordu bete luzatuz edo aurreratuz. Hori guztia plantilla osoa joan dadin.

Bi kasuetan, “Prestakuntzara joatea” deitzen dena bezala ordainduko da, aparteko ordu arrunten zenbateko berean eta ez dira baimenen bidez konpentsatuko.

25.bis artikulua. Prestakuntza.

Enpresarentzat beharrezkoa da langile balioaniztunak izatea; hortaz, beharrezkoa da produkzioko langile guztiak prestatuak eta baliozkotuak egotea, gutxienez ere hurbilen dagoen goragoko lanposturako. Horretarako, zuzendaritzak behar horietara egokitutako prestakuntza plan bat garatuko du urtero. Lanpostuetako titularren artean eta baldintza beretan, enpresan antzinatasun handiena duen langileak izanen du prestakuntzarako lehentasuna. Lanpostuko balidazioari esaten zaio baldintzen berdintasuna.

26. artikulua. Aldi baterako ezintasunaren prestazioen osagarria.

Eritasun arrunta edo lanez kanpoko istripua gertatzean, enpresak gizarte segurantzaren prestazioak konpentsatuko ditu, zehazki, langileari lanaldi arruntagatik dagokion benetako soldataren %100era bitarte (baja hartu aurreko hilabetea oinarri hartuta). Osagarri honetarako urtarrilean indarrean den oinarria soldaten taulak igotzen diren portzentaje berean eguneratuko da. Onura hau lortzeko ezinbesteko baldintza izanen da ondorengo baldintzak betetzea:

1.–Itun honi atxikitako langileen absentismo indizearen arabera, aurreko hamabi hilabeteetan konputatua, honako eskala hau aplikatuko da hitzarmena indarrean den bitartean:

–%0,000tik %4,00ra arteko absentismoa: soldataren %100.

–%4,001etik %5,00era arteko absentismoa: soldataren %95.

–%5,001etik %5,50era arteko absentismoa: soldataren %90.

–%5,501etik %6,50era arteko absentismoa: soldataren %85.

–%6,501etik %7,50era arteko absentismoa: soldataren %80.

–%7,51etik goragoko absentismoa: soldataren %75.

Absentismo indizea galdutako orduen kopurua laneko ordu teorikoen kopuruaz zatituz kalkulatuko da.

Absentismo indizea kalkulatzeko, kanpoan utziko dira lan istripuek eta kreditu sindikaleko orduek eragindako absentziak.

Baja hartu aurreko urtean eritasunaren ondorioz aldi baterako ezintasun egoeran egon ez diren langileen kasuan, indizea konputatzeko kanpoan utziko dira iraupen luzeko eritasunaren ondoriozko bajak 121. egunetik aurrera.

2.–Absentzia lehenbailehen jakinaraztea eta mediku fakultatiboak eritasunagatik edo istripuagatik emandako baja hurrengo 72 orduetan aurkeztea.

3.–Eriak edo istripua jasan duenak (baja lan istripuagatik izan ala ez izan) dagokion mutuak ezartzen dituen azterketak eginen ditu. Azterketa horiek enpresaren zerbitzu medikoarenak ordeztuko dituzte.

Enpresa batzordeari hilero emanen zaio absentismo indizearen berri; berak aztertu eginen du eta egokiak iruditzen zaizkion neurriak erabakiko ditu.

Lan istripuen kasuetan, enpresak Gizarte Segurantzaren prestazioak osatuko ditu %100era bitarte, absentismo indizea gorabehera. Osagarri honetarako urtarrilean indarrean den oinarria soldaten taulak igotzen diren portzentaje berean eguneratuko da.

Aurrekoa gorabehera, langileak baja hartu aurreko bi urteetan ez badu inolako bajarik izan, ez eritasunagatik, ez istripuagatik, soldataren %100 jasoko du, absentismoaren indize orokorra edozein izanik. Baja hartu aurreko bi urteetan sei egunetik beherako baja hartu badu, lanaldi arruntari dagokion benetako soldataren %100 jasoko du (baja hartu aurreko hilabetea oinarri hartuta) aldi baterako ezintasuneko 90 egun betetzen dituenean eta dagoeneko hori jasotzen ari ez bada.

Aurreko egoeraren baten ondorioz langilea berriz gaixotzen bada eta hala adierazita agertzen bada arrazoi arrunten ondoriozko aldi baterako ezintasuneko parte medikoetan, aintzat hartuko den bajen kopurua hori eragin duen kausaren berdina izanen da.

Zuzendaritzak baieztatu du lan istripuen mutuaren bidez kudeatuko duela eritasunen ondoriozko bajen kontrola.

27. artikulua. Kontratuak eta langile sartu berriak.

–Enpresako Zuzendaritzak prestakuntzarako eta ikaskuntzarako kontratuak erabiltzen ahalko ditu, baldin eta horrela kontratatutako langileek langile sartu berrientzat finkatutako ordainsarien %85 jasotzen badute.

Ikastunek legeak ezarritako prestakuntza teorikoa jasoko dute, enpresatik kanpo nahiz barnean.

Enpresak konpromisoa hartzen du aldi baterako laneko enpresetatik heldu diren langileak ez kontratatzeko. Nolanahi ere, produkzioarekin zerikusirik ez duten salbuespenezko egoera eta kasuetan, zuzendaritzak langile horiengana jotzen ahal du, legeriak enpresa batzordearentzat ezarritako eskudantziak galarazi gabe.

Erabaki da enpresak legez edo sektoreko hitzarmen kolektibo nazionalaren bidez ezarritako gainerako kontratu motak erabiltzen ahalko dituela.

–Langile sartu berriak:

Enpresan urte bete baino gutxiagoko antzinatasuna duten langileen kasuan, antzinatasun horren arabera jasoko dituzte taula honetan ezarritako soldaten kontzeptuen gaineko portzentajeak:

–Antzinatasuna Non Stop plusa CSC.

–Lehen urteko lehen seihilekoan, %50 %40.

–Lehen urteko bigarren seihilekoan, %75 %40.

–Bigarren urtean, %100 %100.

Enpresan lanean urte bete igarota, hala lan-kontratu ez-mugagabea izan duen langilearen kasuan, nola bi lan-kontratu ez-mugagabe edo gehiago izan dituenaren kasuan, Zuzendaritzak erabakiko du langile horrek enpresan jarraitzen duen ala ez, aintzat hartuta beharrak, kontratu motak eta langilearen egokitasuna, eta enpresan jarraitzen badu, lan-kontratu mugagabea eginda. Hori ez zaie aplikatuko iraupen luzeko bajak betetzeko bitarte baterako kontratua duten pertsonei, horiek lanpostua utzi beharko baitute kontratatuak izan zireneko arrazoia bukatzen denean. Nolanahi ere, berriro ere kontratatzen badira, aurreko behin-behinekotasun horiek betetzen egindako denbora kontuan hartuko da gorago adierazitako portzentajeen ondorioetarako eta antzinatasun pluserako, prestakuntzarako eta mailaz igotzeko.

Arau horrek aldi baterako 6 langiletik aurrera hartuko du indarra, eta horiek denbora gehiagoz egoten ahalko dira egoera horretan eta antzinatasunaren hurrenkerari jarraituko zaio langile finko bihurtzeko.

28. artikulua. Kaleratze kolektiboa.

Enpresak, hitzarmen honek dirauen bitartean, uko egiten dio lan-kontratuak amaitzeari Langileen Estatutuaren 51. artikuluan araututako kaleratze kolektiboaren bidez. Lege testu horretan jasotako gainerako formulak erabiltzen ahalko ditu kontratuak amaitzeko.

V. KAPITULUA

Lanaldia-egutegia-oporrak

29. artikulua. Lanaldia:

2014. eta 2015. urteetarako gehieneko lanaldia 1.720 ordukoa izanen da urtean (benetan egindako lana) urte bakoitzerako eta enpresako langile guztientzat.

29.bis artikulua. Aurreko artikuluan ezarritakoa gorabehera, enpresak zortzi ordura arteko urteko lanaldi bat antolatzen ahalko du beharrezkoa jotzen duen talde horietarako, prestakuntza ikastaro berezi bat egiteko, funtsean segurtasunari buruzkoa.

Ikastaro horretara joateko benetan erabilitako orduak “Prestakuntzara joatea” kontzeptupean ordainduko dira, jaiegunetako aparteko orduen zenbateko berean.

III. eranskinean ezarritako urteko produkzio egunak osatzeko, kasuan kasuko konpentsazioak ezarriko dira elkarren segidako urteen artean.

30. artikulua. Egutegia eta ordutegiak.

Enpresako Zuzendaritza arduratuko da urteko lanaldia egutegian banatzeaz, enpresa batzordearekin bildu ondotik.

Eguneko lanaldia benetako 8 lan ordukoa izanik, ordutegi hauek ezarri dira:

1. Txandakako langileria:

–Goizez: 06:00etatik 14:00ak arte (benetako 8 lan ordu).

–Arratsaldez: 14:00etatik 22:00ak arte (benetako 8 lan ordu).

–Gauez: 22:00etatik 06:00ak arte (benetako 8 lan ordu).

2. Bulegoetako langileria:

–Lanean sartzea: 08:30etik 09:00ak arte (aukeran).

–Lanetik ateratzea: 17:00etatik 17:30 arte (aukeran).

–13:30ean ordu erdiko geldialdia eginen da; ez da laneko denbora izanen, bazkaltzeko izanen baita.

–Betiere, zein diren ere sartzeko eta ateratzeko orduak, egunean zortzi ordu eginen dira lanean.

–Udako ordutegia: eguneko lanaldia jarraitua izanen da, 08:00etatik 16:00ak arte, astelehenetik ostegunera, eta 08:00etatik 14:00ak arte, ostiraletan.

–Aipatu orduetatik 30 minutu geroago arte ematen ahal zaio hasiera lanaldiari eta, horrenbestez, 30 minutu geroago arte bukaera eman, ezarritako lanaldia osatzeko.

–Enpresak urtero erabakiko du noiz hasi eta bukatuko den udako ordutegia, ekaina eta iraila bitartekoa, 29. artikuluan ezarritako urteko lanaldia osatzeko.

31. artikulua. Oporrak.

Urtean hogeita hamar egun naturaleko oporraldi ordaindua ezartzen da.

Inork ez du hogeita hamahiru (33) egunetan baino gehiagotan lan eginen uztail eta abuztu artean; gainera, zazpi (7) opor egun jarraian izanen ditu uztailean edo abuztuan.

Bost taldetan lan egiten denean, Zuzendaritzak zazpi (7) egunez, Sanferminetan, produkzioa gelditzea aukeratzen ahalko du, edo ez gelditzea eta hiru pertsona kontratatzea txanda bakoitzeko, hogeita hamasei (36) egunetan lan egiteko eta hiru egun ematea, txandaka, guztiei uztailean eta abuztuan.

20 egun natural lehenago, gutxienez ere, adieraziko du Zuzendaritzak erabaki hori.

Langileek lan-jardueraren garaian jasotzen duten ordainsari bera jaso dezaten hilabeteko oporraldian, erabaki da itun honetan bildu diren plusetako edozein onartua duten langile guztiei “Oporren plusa” ordainduko zaiela, eta honela zehaztuko da horren zenbatekoa:

aurreko urteko bigarren seihilekoan sorrarazitako plus aldakorren batura (plus aldakortzat joko dira: gauekoa, ogitartekoa, Non Stop plusak eta mantentze-lan mekaniko eta elektrikoko guardiak puntuen arabera), plus horiek abian den urtean aplikatutako igoerarekin eguneratuta, gehi abian den urteko lehen seihilekoan sorrarazitako plus berdinen arteko batura zati hamaika.

Lortzen den emaitza urte bakoitzeko uztaileko nominan ordainduko da, “Oporretako plusa” izenarekin.

Oporraldia, kolektiboa nahiz banakakoa, martxoaren 31 baino lehen ezarriko da bi alderdiak ados daudela, eta VIII. eranskinaren arabera aldatzen ahalko da.

Oporrak hartzeko eskubideak urte bakoitzaren abenduaren 31n preskribatuko du.

Oporraldiak bat egiten badu aldi baterako ezintasunarekin, eta langileak ezin badu oporraldi osoa edo haren zati bat urte naturalean hartu, zilegi izanen du ezintasuna bukatzean hartzea, ezintasuna ekarri duen gertakizuna edozein izanik eta betiere eragin zen urteaz geroztik 18 hilabete baino gehiago igaro ez badira. Enpresaren opor egunen egutegiaren arabera finkatutako oporraldiak bat egiten badu bularra emateko aldiarekin edo hitzarmenaren 32.2 eta 32.3 artikuluetan ezarritako lan kontratua eteteko aldiarekin, langileak eskubidea izanen du opor egunak aldi baterako ezintasuna edo dagokion baimena bukatutakoan edo kontratuaren etenaldia bukatutakoan hartzeko, urte naturala bukatu bada ere.

VI. KAPITULUA

Lizentziak eta eszedentziak

32.1. artikulua. Langileak, lehenbailehen abisatuta eta behar bezala justifikatuta, lanera ez agertzeko aukera izanen du, ordainsaria izateko eskubidearekin, arrazoi hauengatik eta adierazten den gutxieneko denborarako:

a) 16 egun natural ezkontzagatik.

b) Bi egun seme-alaben jaiotzagatik, eta ezkontidearen, seme-alaben, gurasoen, biloben, aiton-amonen, ezkontza bidezko seme-alaben eta langilearen nahiz ezkontidearen anaia-arreben, bai eta langilearen odol bidezko anaia-arraben ezkontideen heriotzagatik, istripuagatik edo eritasun larriagatik, ospitaleratzeagatik edo ospitaleratu beharra izan gabe etxean atseden hartzea agintzen bada.

Lehen mailako odol- edo ezkontza-ahaideen jaiotza edo heriotza gertatzen denean, bi egunak lanegunak izanen dira.

Bigarren mailako odol- edo ezkontza-ahaideen jaiotza edo heriotza gertatzen denean, bi egunetako bat gutxienez laneguna izanen da.

Lehen mailako odol-ahaidetasun edo ezkontza-ahaidetasuneko gainerako kasuetan, gertaera eragilea astelehenetik ostiralera bitarteko lanegunean gertatzen bada, baina langilearen egutegi partikularrean jaiegun gisa ezarria badago, bi egunak lanegunak izanen dira langilearentzat.

Bigarren mailako odol-ahaidetasun edo ezkontza-ahaidetasuneko gainerako kasuetan, gertaera eragilea astelehenetik ostiralera bitarteko lanegunean gertatzen bada, baina langilearen egutegi partikularrean jaiegun gisa ezarria badago, bi egunetako bat gutxienez laneguna izanen da langilearentzat.

Lehen mailako odol-ahaidetasun edo ezkontza-ahaidetasuneko gainerako kasuetan, gertaera eragilea langilearen egutegi partikularrean jaiegun gisa ezarritako egun batean gertatzen bada, bi egunetako bat laneguna izanen da langilearentzat.

Lehen mailako odol-ahaidetasun edo ezkontza-ahaidetasuneko senideei ebakuntza kirurgikoa egin behar zaienean ospitaleratzearekin, gertaera eragilea langilearen oporraldian gertatzen bada eta oporraldia bukatzean jarraitzen badu, eta langileak hala jakinarazi badu, bi egunetako bat laneguna izanen da langilearentzat.

Zio horregatik langileak tokiz aldatu behar badu, epea hiru egunera bitarte luzatzen ahalko da, irizpide hauei jarraikiz:

1.–Distantzia 100 km baino handiagoa eta 250 km baino txikiagoa bada, egun bat gehiago emanen da (3 egun guztira).

2.–Distantzia 250 km baino handiagoa eta 500 km baino txikiagoa bada, egun bat gehiago emanen da (4 egun guztira).

3.–Distantzia 500 km baino handiagoa bada, hiru egun emanen dira (5 egun guztira).

Hiru kasuetan distantzia lantokitik eta baimenerako arrazoi den ahaidea dagoen tokira (ospitalea edo etxea) kontatzen da.

Bidaiaren luzera neurtzerakoan, enpresaren eta langilearen artean adostasunik ez izatera, distantziaren proba egiteaz enpresa arduratuko da. Garraio publikoan egiten den ibilbide motzena izanen da distantzien neurria.

c) Egun batez, ohiko bizilekua aldatzeko.

d) Publikoa edo pertsonala den eginbehar saihestezina betetzeko behar-beharrezkoa den denbora. Lege bidez edo hitzarmenen bidez ezarritako arau batean denbora jakin bat finkatuta badago, absentziaren iraupenari eta konpentsazio ekonomikoari dagokienez arau hartan xedatutakoari jarraituko zaio.

e) Hezkuntza eskubide orokorrak eta lanbide heziketa jasotzeko ezarritako denbora, indarreko legedian araututako kasuetan eta moduan.

f) Lehen mailako senideen, anai-arreben eta ezkontidearen anai-arreben ezkontza: egun bat.

g) Txandaka lan egiten duen langilearen semearen edo alabaren lehen jaunartzea, egutegiaren arabera egun horretan lan egin behar badu: egun bat.

h) Beharrezkoa den denbora, langilea espezialista baten kontsultara joateko, Gizarte Segurantzakoa izan nahiz ez izan; salbuespenezko kasuetan izan ezik, langileak kontsultaren ordua adierazi beharko du, eta gerora bisita hori enpresan justifikatu.

Era berean, beharrezkoa den denbora izanen da Gizarte Segurantzako familia-medikuaren kontsultara joateko.

i) Urtean 12 ordu bitarteko baimen ordaindua 14 urte bitarteko seme-alaben eritasunagatik, pediatrak behar bezala justifikatuta; baimen hori emateko beharrezkoa izanen da baldintza hauek betetzea:

1.–Bi ezkontideek frogatu beharko dute besteren konturako langileak edo autonomoak direla. (Kanpoan geratuko dira alargunak, banandutakoak eta dibortziatutakoak).

2.–Kontsultaren ordutegia bi ezkontideen lanaldiarekin bat etortzea. (Kanpoan geratuko dira alargunak, banandutakoak eta dibortziatutakoak).

j) Odol bidezko lehengusuen edo osaba-izeben ezkontzara edo hiletara joatea.

Aipatutako ahaidetasunak odol bidezkoak dira eta langilearekin lotuak. Aipatu ekitaldietara joan ahal izateko, horiek ospatzeko eguna bat badator laneko ordutegiarekin, baimen ordaindua eta horretarako behar duen denbora tartea emanen zaizkio. Beharrezko denbora tartetzat hartuko dira:

Ordu eta erdi (1,50 h) ezkontza baino lehen; distantziaren arabera, 1,50 h-tan handituko da 100 km-ko edo 0,75 h-tan 50 km-ko. Horrela ezarriko da lantokitik irteteko ordua, eta lanaldia bukatzen den arte iraunen du baimenak.

Arratsaldeko txandaren kasuan, ezkontza goizez bada, lanaldi osorako baimen ordaindua emanen da.

Gaueko txandarako K atalean zehaztutakoa aplikatuko da.

Hiletaren kasuan, ekitaldia hasi aurreko 0,50 h hartzen da beharrezko denbora tartetzat, eta aurretik adierazitako proportzioan handituko da, distantziaren, irteera orduaren eta lanera itzultzeko orduaren (bidezko bada) arabera.

k) Urtean baimendutako egun bat, odol bidezko lehengusuen edo osaba-izeben ezkontzaren ala hiletaren artean hautatu beharrekoa, edo langilearen lehen mailako odol-ahaidetasuneko edo anai-arreben heriotza.

Artikulu honetan adierazitako baimenak –ezkontidean oinarritzen direnak– langilearen bikote egonkorrari ere aplikatuko zaizkio eta ulertuko da harreman egonkorra dutela bikotekideak gutxienez ere urte betez jarraian elkarrekin bizitzen egon badira eta hala frogatzen badute udaleko egiaztagiri baten bidez, ezkontzagatiko baimena salbuetsita.

32.1.bis artikulua. Argitzeko testua.

32.1 artikuluan ezarritako baimenak gertaera eragilearen egun beretik sorraraziko dira eta horrela zehaztuko dira langileari dagozkion lanegunak, bere egutegiaren arabera. Baimendutako egunen kopurua finkatuta, langileak egokitzat jotzen duenean hartuko ditu, betiere baimena eragin duen beharrak irauten badu.

Kausa berarengatik eta tartean alta medikorik egon gabe edo ospitaletik irteten ez bada, ospitaleratzeagatiko baimenaren barnean balizko ebakuntza kirurgikoarena ere sartuko da, baldin eta ospitaleratzen denetik lehen ebakuntza egiten den arte ez badago 4 eguneko tarterik (96 ordu), eta 10 eguneko tartea (240 ordu) ebakuntzen artean. Tarte horiek badaude, langileak eskubidea izanen du ospitaleratzeari dagokion beste baimen ordaindu baterako.

32.2. artikulua. Emakume langileak, erdituz gero, eskubidea izanen du hamasei aste jarraituko etenaldirako; epe hori hemezortzi astera bitarte handitzen ahalko da erditze anizkoitzagatik. Epe hori interesdunak nahi bezala banatuko da, baina erditu ondoren sei aste hartu behar dira.

Ama hiltzen bada, lanik egiten zuen edo ez kontuan hartu gabe, aitak etenaldi osoa edo geratzen den zatia hartzen ahalko du, erditzearen egunetik zenbatuta, eta erditu aurretik amak egunak hartu bazituen, horiek ez zaizkio deskontatuko. Haurra hiltzen bada, etenaldia ez da murriztuko, salbu eta, nahitaez hartu beharreko sei asteko atsedenaldia amaitu eta gero, amak lanpostura itzultzeko eskatzen badu.

Aurrekoa gorabehera, eta erditu ondoan amaren atsedenerako nahitaez sei aste hartu beharra galarazi gabe, bai aitak eta bai amak lan egiten badute, amak amatasuneko atsedenaldia hastean hautatzen ahalko du umea izan ondoko baimenaren denboraren zati jakin eta jarraitu bat aitak hartzea, bai amarenarekin batera, bai ondoren. Lanera itzultzeko garaian ama aldi baterako ezintasun egoeran badago, aitak hala ere jarraitu ahal izanen du amak hasieran laga zion amatasuneko baimenaren zatia baliatzen.

Amak, bere lanbide jarduerari buruzko arauen ondorioz, jarduera hori eten eta prestazioak hartzeko eskubiderik ez badu, aitak bere lan kontratua eteteko eskubidea izanen du, amari zegokiokeen aldirako, eta hori hurrengo artikuluan aipatzen den eskubidearekin bateragarria izanen da.

Garaia baino lehen erdituz gero edo edozein konturengatik jaioberriak erditzearen ondoren ospitalean egon behar izanez gero, amak edo, ezin badu, beste gurasoak eskaturik, ospitalean alta hartzen denetik aurrera kontatzen ahalko da etenaldia. Kontaketa horretatik erditu ondoko sei asteak salbuesten dira, izan ere, epe horretan amak nahitaez eten beharko du kontratua.

Ama behar baino lehen erditzen bada eta haurrak pisu aski ez badu, edo jaioberria, baldintza klinikoren bategatik, jaio ondoren ospitaleratu behar baldin bada zazpi egunez baino gehiagoz, etenaldia luzatu eginen da jaioberria ospitaleraturik dagoen bitartean, hamahiru astez gehienez, betiere arauekin bat.

Haurra adoptatu edo harreran hartzen den kasuetan, etenaldiak hamasei aste iraunen du, jarraian. Haur bat baino gehiago adoptatzen edo harreran hartzen badira, beste bi aste gehituko dira ume bakoitzeko, bigarren umetik aurrera. Kasu horretan, langileak erabakiko du noiz izanen dituen ondorioak etenaldiak: adopzioa eratzen duen ebazpen judiziala ematen denean edo behin-behineko edo behin betiko harreraren erabaki administratiboa edo judiziala ematen denean. Ez da zilegi etenaldi bat baino gehiago hartzea adingabe beragatik.

Aitak eta amak lan eginez gero, interesdunek hautatzen duten moduan banatzen ahalko dute etenaldia, aldi berean hartzeko nahiz batak bestearen ondoren, betiere etenik gabeko aldietan eta adierazitako mugak gainditu gabe.

Atsedenaldiak batera bi gurasoek hartuz gero, haien baturak ezin izanen du gainditu aurreko lerroaldeetan aurreikusitako hamasei asteko kopurua, edo zenbait haur erditu, adoptatu edo babesean hartzeari dagokien kopurua.

Adoptatu edo harreran hartutako adingabeak edo semeak nahiz alabak desgaitasunen bat baldin badu, atal honetan aipatzen den kontratu etenaldiak bi aste gehiago iraunen du. Bi gurasoek lan eginez gero, etenaldiaren luzapena interesdunek hautatzen duten moduan banatu ahal izanen dute, aldi berean nahiz bata bestearen ondoren, betiere etenik gabeko aldietan.

Hemen aipatzen diren aldiak lanaldi osoan edo lanaldi partzialean hartzen ahalko dira, enpresaburuak eta ukitutako langileak aldez aurretik ados jarrita, erregelamenduz erabakitzen diren baldintzen arabera.

Nazioarteko adopzio kasuetan, gurasoek adopzioan hartuko duten haurraren jatorrizko herrialdera joan beharra dutenean, atal honetan kasu bakoitzerako aurreikusitako lizentzia adopzioari buruzko ebazpena eman baino lau aste lehenagotik ere hasi ahal izanen da.

Kontratuaren etenaldiak iraun bitartean langileek izan zezaketen lan baldintzen edonolako hobekuntza berdin izanen dute, idatz-zati honetan aipatzen diren kasuetan eta 32.3. artikuluan aurreikusitakoetan ere.

Langileek eszedentziarako eskubidea izanen dute, hiru urtekoa gehienez, seme edo alaba bakoitza zaintzeko, bai naturala bada eta baita adopzioan hartua bada ere, derrigorrezko atsedenaldia bukatzen denetik hasita. Hurrengo seme-alabek beste eszedentzia baterako eskubidea emanen dute, baina azkeneko eszedentziak aurrekoaren bukaera ekarriko du. Aitak eta amak, biek lan egiten dutenean, batek bakarrik erabiliko du eskubide hori.

Amatasun edo aitatasun kasuetan, eszedentziak dirauen bitartean (hiru urte, gehienez ere) langilearen lanpostua gordeko dela bermatzen da. Eszedentziaren lehen urtea aintzat hartuko da antzinatasunerako.

Haurdun dagoen emakumeak, haurdunaldiko laugarren hilabetetik aurrera eta aldez aurretik enpresako medikuak, edo bestela Gizarte Segurantzakoak, haurdunaldirako nekagarritzat edo arriskutsutzat jotako lana egiten badu, eskubidea izanen du:

a) Lehentasuna izanen du –egoera horrek dirauen bitartean, soilik– hutsik geratzen den beste lanpostu bat hartzeko, arriskurik ez duena eta bere lanbide prestakuntzarako egokia dena, betiere goragoko kategoria batekoa ez bada.

b) Iraupen berarekin eta behin-behinekotasun berarekin, aldez aurretik eskatuta eta betiere enpresak horretarako aukera badu, bere lanpostua trukatzen ahalko du, kategoria eta soldata mantenduta.

Trukaketa hori egiterik ez badu, enpresak haurdun dagoen emakumearen lanpostua beteko duen pertsona izendatuko du, zeina egoeraren behin-behinekotasuna dela-eta, bere aurreko lanpostura itzuliko den haurdun dagoen emakumeak baja hartzen duenean.

32.3. artikulua. Lan kontratua aitatasunagatik etetea.

Haurra jaio, adoptatu edo harreran hartzen den kasuetan, langileak kontratua hamahiru egun jarraiez eteteko eskubidea izanen du, eta haur bat baino gehiago erditu, adoptatu edo harreran hartzen bada, etenaldiak bi egun gehiago iraunen du, haur bakoitzeko, bigarrenetik hasita. Etenaldi hori eta 32.2 artikuluan araututako amatasun-atsedenaldi konpartitua independenteak dira.

Erditze kasuan, etenaldia beste gurasoari dagokio soilik. Haurra adoptatu edo babesean hartzen denean, eskubidea soilik gurasoetako bati dagokio, interesdunek aukeratuko dute nor. Dena den, 32.2 artikuluan araututako atsedenaldia guraso batek osoki baliatu duenean, aitatasunagatiko etenaldia soilik besteak baliatzen ahalko du.

Langileak eskubide hori epe honetan baliatzen ahalko du: haurra jaiotzeagatiko baimena bukatzen denetik (legez edo hitzarmenez erabakiko da noiz bukatzen den), edo adopzioa eratzen duen ebazpen judiziala ematen denetik, edo haurra babesean hartzea ekartzen duen erabaki administratibo edo judiziala ematen denetik, kontratuaren etenaldia bukatzen den arte (32.2 artikuluan arautua); edo kontratuaren etenaldia bukatu eta segidan amaituko da epea.

Artikulu honetan aipatzen den kontratuaren etenaldia lanaldi osoak edo partzialak hartuta egin daiteke. Lanaldi partziala aukeratuz gero, %50ekoa izanen da gutxienez, aldez aurretik enpresaburuaren eta langilearen artean adosturik, eta erregelamenduan ezartzen denarekin bat.

Langileak behar adinako denboraz jakinaraziko dio enpresaburuari eskubide hori baliatuko duela, egoki bada, hitzarmen kolektiboetan ezarritako baldintzetan.

32.4. artikulua. Bederatzi hilabetetik beheitiko semeari edo alabari bularra ematen dioten emakumezko langileek eskubidea dute lanetik ordubetez lekutzeko. Denbora hori bi zatitan bana dezakete. Erditze anizkoitzen kasuan dagokion proportzioan gehituko da baimen denbora.

Emakumeak, bere borondatez, eskubide horren ordez, bere lanaldi arrunta ordu erdian murrizten ahalko du xede berarekin edo, bestela, bularra emateko denbora metatu; baimendutako denbora hori (ordu bete) lanaldi osoetan metatzen ahalko da amatasun kontratua eteten denetik aurrera.

Baimena amak nahiz aitak hartzen ahalko dute, beren nahierara, biak lanean ari badira.

32.5. artikulua. Legezko zaintza dela-eta, langileren batek hamabi urtetik beherako haurra edo ordaindutako lanik egiten ez duen desgaitu fisikoa, psikikoa edo zentzumenezkoa bere kargu izanez gero, eskubidea izanen du urte naturalaren barnean lanaldia murrizteko Langileen Estatutuaren 37.5 artikuluan jasotako kasuetan eta baldintzetan, eta soldata ere proportzionalki murriztuko zaio, haren iraupenaren zortzirenaren (gutxienez) eta erdiaren (gehienez) artean. Murrizketa hori gauzatzeko, eguneko lanaldia hartzen ahalko da erreferentzialditzat. Murrizketa hori astekoa edo hilabetekoa izan daiteke, betiere lanaren antolaketak horretarako aukera ematen badu.

32.6. artikulua. Borondatezko eszedentziak.

Enpresan gutxienez urtebeteko antzinatasuna duten langileek eskubidea dute borondatezko eszedentzia hartzeko, lau hilabeterako gutxienez eta bost urterako gehienez. Eskubide horretaz berriro balia daiteke langile bera, aurreko eszedentzia bukatu eta lau urte igaro eta gero.

Eszedentzian dagoen langileak enpresan hutsik dauden eta haren kategoriakoak edo antzekoak diren lanpostuetan sartu ahal izateko lehentasuna baino ez dauka.

Bere lanpostua hutsik ez badago, langileak kategoria txikiagoko edo handiagoko lanpostu huts bat hartzen ahalko du; azken kasu horretan, beste langile batzuen igotzeko eskubidea errespetatu beharko du, eta hartzen ahal duen lanpostuaren ezaugarriak bete beharko ditu.

32.7. artikulua. Eszedentzia sindikala.

langileek, enpresatik goragoko esparru batean eginbehar sindikalak betetzeko hautatuak izanez gero, eszedentzia eskatzen ahalko dute eta enpresak derrigorrez onartu beharko die kargu horretan dauden denborarako. Eszedentzia hori nahitaezkotzat joko da eta, beraz, antzinatasunerako kontabilizatuko da.

32.8. artikulua. Emakumezko langile batek enpresa ezkontzeko uzten duenean, enpresak nahitaez berriro hartu beharko du langile hori baldin eta alarguntzearen ondorioz familiaburu bihurtu, eta enpresan berriro hartzeko eskatzen badu, eta lanerako gaitasuna badu.

32.9. artikulua. Gaixotu edo istripua duen langileak eskubidea izanen du Gizarte Segurantzaren Lege Orokorrean aurreikusitako prestazioak jasotzeko, eta nahitaezko eszedentziara pasatuko da bere ohiko lanbiderako ezintasuna duela deklaratzen bada; nolanahi ere, enpresaren barnean bestelako lan batzuk egiteko gaitasun funtzionala badu, enpresari eskatzen ahalko dio Estatuko Hitzarmenaren 6.16 eta 8.3 artikuluetan aurreikusitakoa betetzeko.

32.10. artikulua. Hitzarmen honen indarraldian, eta kapitulu honi dagokionez, Oreen, Paperaren eta Kartoiaren Estatuko Hitzarmenean ezartzen diren hobekuntza guztiak hitzarmen honi aplikatuko zaizkio.

Halaber, kapitulu honetan ezarritakoa, 32.1 artikuluan adierazitakoa salbu, aplikatzekoa izanen da erreferentzia legea (Emakumeen eta Gizonen Berdintasun Eraginkorrerako martxoaren 22ko 3/2007 Lege Organikoa) gerora aldatzen, interpretatzen, garatzen edo beste batengatik ordezten ez den bitartean; bestela, kasu horretan, hori izanen da aplikatuko dena, eta beraz, hitzarmena, kapitulu honetan, une bakoitzean indarrean den legearen mende egonen da.

33. artikulua. Baimen ordaindugabeak.

Zuzendaritzak, produkzioa kaltetu dezakeen arrazoirik ez badago, ordaindu gabeko egun bat gehiago baimenduko du 32.1 artikuluan adierazitako arrazoiengatik eta heriotza, ezkontza eta iloben jaunartzeen kasuetan. Langileak aukera izanen du egun horri dagokion deskontuaren ordez egun hori baimenaren ondoko 30 egunetan berreskuratzeko, zuzendaritzarekin adostu ondoren.

–Baimenak berreskuratzea.

Ordaindu gabeko baimena ematen bada, lantokira huts egindako ordu kopuru bera berreskuratuko da, kasuan kasuko arloko arduradunak adierazitako egunean.

Larunbatean, igandean edo jaiegunean eta Non Stop araubideko lanpostu batean berreskuratzen bada, ezarritako prima kobratuko da.

Baimena ezin izanen da inola ere berreskuratu aparteko orduekin konpentsatuz eta atseden konpentsatzailea aplikatuz.

VII. KAPITULUA

34. artikulua. Gizarte funtsa.

Gizarte funtsa osatzen duen zenbatekoa Abelan San Andrések jarriko du, eta honako honen emaitza izanen da: 3. gehigarrian ageri den balioa bider hilaren bukaeran plantillan diren pertsona kopurua. Pertsona horiek urte betetik gorako antzinatasuna beharko dute izan. Urteko ekarpena ez da inola ere aseguruaren kostu osoa baino txikiagoa izanen.

Funts honen zenbatekoa enpresan urte betetik gorako antzinatasuna duten langileen bizi aseguruaren primaren kostua betetzeko erabiliko da bereziki. Aseguru horrek honako arrisku hauek estaliko ditu, zehazten diren gutxieneko kapitalekin:

–Heriotza, edozein arrazoirengatik: 18.030,36 euro.

–Ezintasun osoa: 33.000 euro.

–Erabateko ezintasuna: 33.000 euro.

Zuzendaritzak konpromisoa hartzen du adierazitako kalte-ordainak hainbat aseguru-etxerekin handitzea aztertzeko, baina horrek ez du ekarriko egungo primekiko kostuak areagotzea.

Enpresa batzordeak funts horien erabilera egokiena aztertu, eta zuzendaritzari proposamena eginen dio, aukera ekonomikoek ahalbidetzen duten neurrian kudea dezan. Funts horren zenbatekoa, lehentasunez, aseguru bat mantentzeko (2014. urtean indarrean denaren antzekoa) erabiliko da, bai eta polizak edozein gorabeherarengatik izan ditzakeen igoeretarako ere, eta soberakin ekonomikoak ahalbidetzen badu, 2013. urteko eguberrietan egindako opariaren antzekoa egiteko.

35. artikulua. Ikasketak.

Zuzendaritza saiatuko da ikasketak egiten ari diren langileei erraztasunak ematen, ahal dela antolaketa egokituz, eta betiere produkzio sistema eragotzi gabe.

Zuzendaritza enpresan prestatzeko plan handinahia garatzen ari da, hitzarmenaren indarraldiak dirauen artean jarraituko duena. Planak kostu handia izanen du, eta honako hauek dira xedeak:

1. Langileek beren lanpostua edo beste bat (ordezkapenak egitean) behar bezala betetzeko beharrezkoak diren ezagutza teknikoak, teorikoak eta praktikoak eskuratzea.

2. Langileei enpresako gainerako departamentuei buruzko prestakuntza ematea.

3. Langileei kalitate arloko teknikak irakastea.

4. Enpresako agintariak eta teknikariak parte-hartze, komunikazio eta prestakuntza sistemetan prestatzea.

36. artikulua. Laneko arropa:

–Langileek 8 jantzi hautatzen ahalko dituzte bi urtean behin jarraian adierazten diren hauen artean:

• Udako galtzak.
• Neguko galtzak.
• Mahuka motzeko poloak.
• Mahuka luzeko poloak.
• Jaka.
• Jertsea.
• Jantzi polarra.
• Txalekoa.
• Kalitate kontrastatuko jantziak izanen dira (txikiagotzen ez direnak, marruskadurak eta luzatzeak jasaten dituztenak), %100 kotoiez eginak.
• Pulperrak mozteko eta elikatzeko nabean diharduten langileek jantzi bereziak izanen dituzte (prakak, parkak eta goretex botak) negurako, eta hondatu ahala ordeztuko dira.

Edozein jantziren narriadura, bai eta oinetakoena eta segurtasun jantziena ere, kontramaisuek baloratuko dute, eta egokitzat jotzen dutenean, bale bat emanen diote langileari bere izenean biltegiak arropa berria eman diezaion. Horrek ez du galaraziko hurrengo bi urteetan jantzi berriak jasotzea.

• Neurri bereziek eragindako arazoak langileak berak konponduko ditu: hornitzailearen establezimendura hurbildu, eta jantzi egokiak aukeratuko ditu, eta beharrezkoa balitz neurrira egin, horrek langilearendako kostu gehigarririk eragin gabe.

37. artikulua. Segurtasuna eta lan-baldintzak.

Enpresa batzordeak batzordekide ez diren plantillako beste kide batzuen esku uzten ahalko du Laneko Segurtasun eta Osasun Batzordeko ordezkaritza. Nolanahi ere, kasuan kasuko legedia aplikatuko da.

1. Segurtasuna:

Zuzendaritzak komunikazio bideak hobetuko ditu fabrikan teknikari bat jarriz. Horrek aholkulari lanak eginen ditu astean behin bi orduz. Teknikari horren eginkizuna aholkatzea izanen da (ez prestakuntza) eta horrek ez ditu langileak, aginte-katea eta zuzendaritza beren eginkizunetatik eta arduretatik salbuetsiko.

Sindikatuen ordezkaritzak konpromisoa hartzen du zuzendaritzarekin elkarlanean arituz prebentzio neurriak eta langileak mentalizatzekoak hedatzeko, horrela istripuak errotik kentzeko.

Zuzendaritzak, langileen ordezkariekin elkarlanean, hiru urtetan burutzeko ekintza zehatzen plana ezarriko du, eta, horren barnean, 1. makinaren bobinagailua beste toki batera eramatea egokia ote den aztertuko da; nolanahi ere, eta aintzat hartuta hori tokiz aldatzeko inbertsio handia egin behar dela, beharrezkoa izanen da proiektuaren, epeen eta kostuaren bideragarritasunari buruzko azterlana egitea, hori enpresako arauen arabera onetsi ahal izateko.

2. Enpresak osasun egoera zaintzeko aldian behingo azterketak bermatuko dizkie langileei, lanak dituen arriskuen arabera, eta horretarako:

2.1. Aldian behin langileen egoera zainduko du haien lanpostuaren arabera.

2.2. Azterketak eginen ditu.

2.3. Osasun azterketek honakoak jasoko dituzte: historia klinikoa eta lanekoa, miaketak, kontrol biologikoa eta azterlanak arriskuaren arabera.

2.4. Pertsonal sanitarioak langileen artean dauden eritasunak ezagutu beharko ditu eta osasun kontuengatik gertatzen diren absentziak.

2.5. Gaitasun azterketak.

Horregatik guztiagatik, langileek pertsonal sanitarioaren esku jarri beharko dute haien eginkizunak behar bezala betetzeko informazio guztia eta legeak eskatzen duen beste edozein.

38. artikulua. Pizgarriak behin betiko bajengatik.

Behin betiko bajen kasuan, salbu eta heriotza, ezintasun osoa, baliaezintasun handia, erabateko ezintasuna edo erretiro partziala gertatzen bada edo aurretik erretiro partzialean egon bada, enpresak 3. gehigarrian ageri diren zenbatekoak ordainduko ditu, aintzat hartuta une horretan enpresa uzten duen pertsonaren adina.

Langileen Estatutuaren arabera, kontratua amaitzea eragiten duen arrazoiaren ondorioz hemen jasotako kalte-ordaina baino handiagoa ordaindu beharko balitz, enpresak bertan finkatutakoa edo legearen arabera unean unean aplikatu beharrekoa ordainduko du.

Baja sustatuak hitzarmen honen indarraldian soilik aplikatzen ahalko dira.

Lanpostua urteak betetzen dituen egunaren ondotik uzten duen langileari aplikatzen zaion pizgarria murriztu eginen da beste urte bete betetzeko geratzen zaion aldiarekiko proportzioan.

Ohiz kanpoko kasuetan, langileek konpromisoa hartzen dute beren behin betiko baja ordezko bat prestatzeko behar den denboraz atzeratzeko. Kasu horretan, pizgarriaren zenbatekoaren ondorioetarako aintzat hartuko den eguna hori eskatu zen eguna izanen da.

38.bis artikulua. Erretiro partzialak, errelebo kontratuarekin.

Erretiro partziala nahi duen eta hala eskatzen duen langileari, legeak horretarako aukera ematen badio, zuzendaritzak erretiroa emanen dio, betiere legezkotasuna egungo parametroen barnean badago.

Partzialki erretiratutako pertsonaren lan-egutegia interesdunarekin adostuko da, eta pertsona horrekin eta enpresa batzordearekin beharrezkoa den dokumentazioa ezarriko da.

Beharrezkoa da erretiroa hartzeko interesa duen pertsonak gutxienez ere sei hilabete lehenago abisua ematea, enpresak errelebolaria bila dezan.

39. artikulua. Beren kategoria edo ordainsaritik beherako lanpostuak betetzen dituztenentzako soldata igoerak.

Hitzarmen honek indarra hartzen duenetik aurrera eta Zuzendaritzaren erabakiz haien kategoria edo soldatatik beherako lanpostuak betetzera pasatzen diren pertsonen kasuan, 2004ko ekainaren 1ean, lanpostua aldatu aurretik zituzten kategoria eta soldata mantenduko dituzte, baina gerora itun honen arabera dagozkien soldaten eguneratzeei dagokienez, betetzen ari diren lanpostu berriari dagokion igoera jasoko dute.

Enpresarentzat interesgarria bada aldaketa soldata txikiagoa duen lanpostu batera egitea, langileak 50 urte edo gehiago baldin baditu, enpresak konpromisoa hartzen du langileari lanpostu berriari dagozkion zenbatekoak ordaintzeko eta behar adina osatzea Gizarte Segurantzan zuen kotizazio maila bera mantentzeraino erretirorako; horrela, lanpostua aldatu beharra konpentsatzen da eta Gizarte Segurantzaren erretiroagatiko prestazioak ez dira murrizten.

Ordainsari hori unean unean ezarriko du libreki enpresako zuzendaritzak.

40. artikulua. Goragoko kategoriako lanak.

Behar izanez gero, enpresak goragoko kategoriako lanpostuak betetzera bidal dezake langilea. Baldintzei dagokienez, Hitzarmen Nazionalaren artikuluan kasu honi buruz xedatzen dena beteko da.

Hitzarmen Nazionalaren artikulu horretan xedatutakoa gorabehera, aldaketa hauek ezartzen dira:

Pertsona batek goragoko kategoria bateko bi lanpostu edo gehiago betetzen baditu (denak kategoria berekoak) eta horietan guztietan baliozkotua badago, goragoko kategoria hori hartuko du.

Pertsona batek goragoko kategoria ezberdinetako bi lanpostu betetzen baditu, horietan baliozkotua badago, goragoko bi kategorien artean apalena hartuko du.

Pertsona batek goragoko kategoria ezberdinetako hiru lanpostu betetzen baditu, horietan baliozkotua badago, goragokoen artean apalena hartuko du.

41. artikulua. Elkarlana.

Erabaki da langileen eta agintarien arteko elkarlana areagotzea enpresako arlo guztietan, ez bakarrik produkzioan, baita segurtasunean, kalitatean, etab., eta horretarako informazio, parte-hartze eta prestakuntza gehiago egonen dira, eraginkortasuna areagotzeko.

Elkarlan hori funtsezkoa da guk ez ditugun zenbait abantaila dituzten beste enpresa batzuekin lehiatzeko (beste toki batean daudelako edo soldata kostu txikiagoak, etab.).

42. artikulua. Produktibitatea.

Hitzarmen honen eraginpean dauden guztiek konpromisoa hartzen dute enpresa ahalik lehiakorren bihurtzeko, eta horretarako, produktibitatea etengabe hobetzeko, eskura ditugun edo izan ditzakegun produkzioko baliabide guztiak probestuz, lan segurua eta kalitatezkoa eginez.

43. artikulua. Arau osagarriak.

Hitzarmen honen bidez arautu ez den orotan honakoak aplikatuko dira: Oreen, Paperaren eta Kartoiaren Estatuko Hitzarmen Kolektiboa eta zuzendaritzaren eta batzordearen arteko akordio indardunak. Halaber, unean unean indarrean den legeria orokorra aplikatuko da.

I. ERANSKINA

Urtean bermatutako diru-sarrera gordinak guztira

Enpresak urtean gutxieneko diru-sarrera gordin batzuk bermatzen dizkie langileei, 3. gehigarriko IGB-T puntuan ageri direnak, soldataren kontzeptu guztiengatik, plusak, eta abar, hitzarmen honetan urterako ezarritako ordu guztietan lantokira bertaratuz gero. Salbuespena izanen dira Ikaskuntza kontratuak, horientzat bermatzen diren diru-sarrerak IGB-A puntuan ageri baitira.

II. ERANSKINA

“Non Stop” lan-araubidea

1.–Bost taldetan lan egiten denean, urtean 357,67 egunez produzituko da, eta 358,67 egunez urte bisustuetan. Produkzioari dagokionez, lantegi hau itxita egonen da urtarrilaren 1ean, uztailaren 6an, 7an, 8an eta 9an eta abenduaren 25ean, bai eta abenduaren 24ko eta 31ko arratsaldeko eta gaueko txandetan ere. Urtean galdutako txanda hori konpentsatzeko, urte bisustuetan lantokia egun bat gehiago irekiko da.

4,5 taldetan lan egiten denean, urtean 330 egunez produzituko da, bai eta urte bisustuetan ere, eta langileek bost egun izanen dituzte, nahi bezala aukeratzeko. Zazpi egun natural lehenago, gutxienez ere, eskatuko dira egun horiek; gehienez ere, 2 lagunek hartuko dute egunean eta txanda desberdinekoak beharko dute izan.

2.–Produkzioko langileen urteko lanaldiaren egun osagarriak, taldearen egutegi orokorretik kanpo.

Larunbateko edo igandeko txanda batean finkatuko dira, gehi lanegun bateko txandan bidezkoa bada, talderen bateko udako oporrekin bat ez datorren garaian edo bere taldearen oporrekin urteko gainerako denboran.

Beharrezkoa da txanda adina talde ezartzea, horrek aukera ematen baitu talde batekoak diren kideak bertan finko egoteko. Ezartzen den plantilla handiagoa da txanda bakoitzeko lana aurrera eramateko beharrezkoa dena baino, salbu eta absentzia handiko egunetan. Beraz, txanda bakoitzean soberan diren langileak beste zeregin batzuetarako erabiliko dira. Plantillaren konpromiso moralari eusten zaio, hots, absentismo handiko egunetan makinak ez geldiaraztea.

3.–Urteko lanaldiaren egun osagarriak, astelehenetik ostiralera bitarte eta txandatik kanpokoak, zazpi eguneko lan zikloekin batera ezarriko dira.

4.–Agiri honetan antolaketari buruz aurreikusitakoaren arabera, ez da beharrezkoa pertsona hauei Non Stop lan-araubidea esleitzea:

–José Luis Garde Agudo.

–Guillermo Zabaleta Pérez.

5. a) Puntu honetako b) atalean ageri diren pertsonei jarraian adierazten diren lanpostuetako bat esleituko zaie:

–“Absentziak betetzea” astelehenetik larunbatera bitarte goizez.

–“Lanbide osagarrietako laguntzailea”.

–“Akaberetako laguntzailea”.

b) Zerrenda:

–Juan Carlos Fernández Morrás.

–Francisco J. Nuin Iturralde.

–Julio Unzúe Paternain.

–José Antonio Zabalza Valcárcel.

6. Antolaketa arloko bestelako inplikaziorik ez bada, enpresako Zuzendaritza arduratuko da Non Stop lan-araubidea eta absentziak betetzekoa aldatzeko banakako eskaerez, betiere honako baldintza hauek betetzen badira:

a) Hutsik uzten den lanpostua betetzen duen langile berriak une horretan Non Stop araubiderik izan ez arren lanpostu hori betetzeko eskaera bere borondatez egitea edo kontratu bidez horretarako baldintzatua egotea.

b) Lanpostuak elkarren artean aldatzen dituzten pertsonak gai izatea lanpostu berrietako zereginak eskatzen den eraginkortasunarekin egiteko.

c) Trukea egitean, ukitutako bakoitzaren kategoria eta soldata (barnean sartuta gaueko plusak, ogitartekoa, Non Stop araubidea...) betetzen den lanpostu berriari dagozkionen berdinak izatea, geroko berritzeekin.

Hemen adierazten dena aplikatzearen ondorioz Non Stop araubidea uzten duten pertsonak araubide horretara itzuliko dira beharrezkoa balitz.

7. A.–Iraupen luzeko bajak: ulertuko da baja bat iraupen luzekoa dela, artikulu honen ondorioetarako, Non Stop araubidean diharduten produkzioko langileen artean, bajaren prozesu berean aldi baterako ezintasuneko 90 egun jarraian egiten direnean.

Halakorik gertatzen bada, enpresak bajan dagoen pertsonaren ordezkoa jarriko du 91. egunetik aurrera, eta horretarako beste pertsona bat kontratatuko du; bitarte baterako kontratua eginen zaio, eta beste langileari alta ematen zaionean edo ezintasunagatik enpresa behin betiko uzten duenean bukatuko zaio. Enpresak gehienez ere bi pertsona ordezkatzen ahalko ditu arrazoi honengatik.

Artikulu honetan aipatzen diren 90 egunetik gorako bajak hitzarmen honen 26. artikuluaren edukiaren mende egonen dira.

A.–Udako behin-behineko langileak: aurrekoa gorabehera eta 1. makinako bobinagailuak gaur egun duen tokian jarraitzen duen bitartean, enpresak bi pertsona kontratatuko ditu, arratsaldeko lanaldian eta behin-behineko kontratuarekin, Non Stop araubideko lanpostu baten lan-egutegia betetzeko. Kontratua ekainaren 15etik irailaren 15era bitartekoa izanen da, eta egun horretan bukatuko da.

B.–M3-ko bobinagailuko xerrak: enpresak konpromisoa hartzen du 3. makinako bobinagailuan xerrak egiten diren guztietan eremu horretarako pertsona bat gehiago egoteko fabrikazioko hamabost lanpostuez gain (horien artean kogeneraziokoa dago). Hori mantenduko da gaur egungo baldintza teknologikoak aldatzen ez diren bitartean (bestela, ez litzateke beharrezkoa izanen pertsona hori) eta behin hori eragin duten arrazoiak azalduta.

III. ERANSKINA

Karga, Deskarga eta Baskularen ataletako lan-araubidea

–Baskulako (biltegizaina) eta Deskargako (jasomakinako gidaria) langileen lanaldia astelehenetik ostiralera bitartekoa izanen da, 6:00etatik 14:00ak arte eta 14:00etatik 22:00ak arte. Halaber, 06:00etatik 14:00ak arte arituko dira larunbat eta jaiegunetan Fabrikazioko bost txanda baino gehiago daudenean. Hortaz, lanaldi bereziagatiko plusa deuseztatzen da.

–Baskularen eta Deskargaren antolaketari dagokionez, gutxienez ere bost pertsona arituko dira.

–Aurretik ezarritako ordutegien arabera, kasuan kasuko egutegiak prestatuko dira, haietan atseden egunak eta opor egunak finkatuta.

–Larunbatetarako eta jaiegunetarako hitzarmenean ezarritako puntuak jasoko dituzte (larunbata puntu bat, etab.).

–Atal honetan ogitartekoaren plusa jasotzen ez zuten langileei dagokienez, kobratu eginen dute euren lana modu jarraian egiteagatik.

–Azpikontratatutako enpresa bat arduratuko da produktu osagarriak kargatu eta deskargatzeaz.

–Kamioiak lanegunetan eta 22:00ak arte soilik kargatu eta deskargatuko dira eta gure langileak arduratuko dira zeregin horretaz. Ordutegi horretatik aurrera, garraiolaria arduratuko da karga edo deskarga egiteaz. Fabrikan 22:00ak baino lehen sartutako kamioien kasuan bakarrik erabiliko da alternatiba hori.

–Atal horietako langileek uztailean eta abuztuan hartuko dituzte oporrak; aldi horretan, urteko gainerako larunbat kopuru berean lan eginen dute.

IV. ERANSKINA

Mantentze-lan elektrikoko lan-araubidea

1.–Lan ordutegia: Bi txanda (goizez edo arratsaldez) urteko lanegunetan, astelehenetik ostiralera.

Zuzendaritzak ezarriko ditu lan egutegiak ataleko langileekin batera.

2.–Fabrikako produkzioa itxita dagoen egunetan, atal honetatik beharrezkoak diren langileak bertaratzea eskatuko da, egun horietarako aurreikusitako lan-kargaren arabera.

3.–Guardia sistemak:

3.1. Guardia lokalizatua, fabrikaren instalazioetan gaueko txandetan nahiz larunbat arratsaldekoetan eta igande eta jaiegunetako goizeko eta arratsaldeko txandetan suertatzen ahal diren kontingentziei aurre egiteko.

3.2. Gutxienez ere bost pertsonak eginen dute guardien sistema.

3.3. Guardien zikloak jarraian egindako zazpi egunekoak dira, larunbatetik ostiralera bitarte (biak barne), eta ziklo horiek aurreko atalean aipatutako langileen artean txandakatuko dira.

3.4. Guardia ziklo bat hasten duen langileak zikloaren lehen egunean (larunbata) eginen du lana 06:00etatik 14:00ak arte.

3.5. Guardien zikloa egiten ari den edo egitera doan pertsona ez badago, Mantentze-lan elektrikoko beste norbaitek eginen du.

3.6. Guardien sistema egiteagatik bi konpentsazio ezarri dira: bata, ekonomikoa eta bestea, atseden konpentsatzailea.

4.–Oporretarako arauak:

Ataleko langile guztiek proposatuko dute egutegia aurreko urteko abenduaren 15a baino lehen, ondoko premisa hauen arabera:

a) Egutegiaren arabera, fabrikan 2 edo 3 pertsona izanen dira goizez eta 2 arratsaldez.

b) Uztailean eta abuztuan, 2 pertsona arituko dira goizeko txandan eta pertsona bat arratsaldeko txandan; hala, beste biek oporrak hartzen ahalko dituzte.

c) Gainerako opor-egunetarako, b) puntuan adierazitakoa beteko da eta langileek eta atalburuak adostuta hartuko dira.

d) Produkzioko instalazioak gelditzen diren garaietarako, egutegian aurreikusiko da lanaldi horietarako ondoko hauek egon beharko dutela fabrikan:

–Bi argiketari, Sanferminetarako.

–Argiketari bat, Eguberrietako eta Urte berriko geldialdietako guardietarako.

e) Egutegian aurreikusiko da Aste Santuko eta abenduaren hasierako asteko (jaiegun bat baino gehiago baitago) guardiak ez dituela pertsona berak eginen.

f) Urtero txandakatuko da esleitutako banaketa.

5.–Absentziak betetzeko arauak:

1. Hona aurreikusitako absentziak: eritasunak eragindako baja, istripuak eragindako baja edo ezarritako baimenak; baina inola ere ez oporrak.

2. a) Egutegian guardia esleitua duen pertsonak ezin badu guardia hori egin 1. puntuan jasotako arrazoiren bat dela medio, arratsaldeko txandan dagoen beste pertsona batek eginen du guardia hori.

b) Asteko guardia hastea dagokion pertsonak ezin badu guardia hori egin 1. puntuan jasotako arrazoiren bat dela medio, hurrengo guardia egitea dagokion pertsonak eginen du, eta guardien egutegian aldaketa eginen da, 1. puntuko arrazoiak direla-eta baztertu ez diren pertsonen arabera.

c) Ezarritako oporrak ez aldatzeko xedez, aldi horrek dirauen bitartean, B) puntuko irizpide bera aplikatuko da oporretan egon gabe 1. puntuko arrazoiengatik baztertuak ez dauden langileen artean.

3. 2 B) eta C) puntuak aplikatzean hasierako egutegia aldatzen bada, lehentasuna izanen da hasierako horretara itzultzea 1. puntuak ukitutako langileak lantokira bueltatzen direnean.

Horretarako honako jarraibide hauei helduko zaie:

a) 1. puntuak ukitutako pertsonek guardia bat gehiago eginen dute.

b) Langileek, zerbitzua bermatuta, atalburuari jakinaraziko diote hori egiteko adostu duten modua.

c) Adostasunik ez badago, atalburuak erabakiko du egokitzapena nola egin.

4. Kasu zehatzen batean ezin badira ezarritako arauak aplikatu, une horretan ardura duen buruak zehaztuko du, bere irizpideen arabera, kasu horretan aplikatu beharreko konponbidea, eta horretarako, argiketarien iritzia entzunen du, betiere hori bideragarria bada.

6.–Konpentsazioak.

I.–Ekonomikoak: akordioaren atal ekonomikoan jasoak.

II.–Lanaldiari dagozkionak:

Guardien sistema egiteagatik ezarritako atseden konpentsatzailea honela zenbatuko da:

Asteburuan egindako bost guardiengatik egun eta erdiko atseden konpentsatzailea izanen da, salbu eta enpresarekin banakako akordioaren bidez diru konpentsazioa adosten den kasuetan.

7.–Atsedenerako arauak.

1.a Aurreko atalean adierazitako atseden konpentsatzailea erabiltzeko (gehi guardien zikloa hastean benetan lan egindako larunbatagatik duen beste atseden eguna) honela eginen da:

a) Pertsona berak egindako guardia bakoitiak (1.a, 3.a, etab): guardia egin ondoko astean astelehenean eta asteartean hartuko du atseden.

b) Pertsona berak egindako guardia bikoitiak (2.a, 4.a, etab): guardia egin ondoko astean astelehenean, asteartean eta asteazkenean hartuko du atseden.

Oharrak:

–Asteburu bateko bost guardien txandak pertsona batek baino gehiagok egiten dituztenean, pertsona bakoitzak egindako guardien txandekiko proportzioan banatuko da egun eta erdiko atseden konpentsatzailea. Horrenbestez, a) eta/edo b) ataletan adierazitakoa aldatuko da.

–Larunbat goizean lanik egiten ez bada, jaieguna izateagatik, a) eta/edo b) ataletan adierazitakoa honela geratuko da:

• a) atalari dagokionez, astelehenean hartuko da atseden.
• b) atalari dagokionez, astelehenean eta asteartean hartuko da atseden.

2.a Aurreko puntuetan adierazitakoa gorabehera, egun eta erdiko atseden konpentsatzailetik sortutako atseden egunak aldatzen edo metatzen ahalko dira, aldez aurretik atalburuari jakinarazita araua ez dela beteko.

Lan egindako larunbatagatik dagokion atsedena arauaren arabera ezarriko da beti, baina noizean behin egun hori asteko beste egun batera pasatzen ahalko da.

Gerora erabili nahi d(ir)en egun zehatza(k) finkatzeko, atalburuaren onespena izan beharko da.

Egun horiek ezin izanen dira hartu beste pertsona baten atseden egunetan, larunbatagatik izan nahiz guardia egiteagatik hartu beharreko atseden egunak izan.

8.–Orain arte adierazitako guztia ezarrita, enpresarentzat eta ukitutako langileentzat arau hauek aski dira, salbu eta gerora egin daitezkeen ñabardurak, Fabrikako instalazioetan uneoro zerbitzu elektrikoa egonen dela bermatzeko, izan ere, aurreikusi gabeko edozein gorabehera ataleko langileen konpromisoarekin eta borondate onarekin konponduko da, horrela frogatu baita orain arte aurreko urteetan.

V. ERANSKINA

Mantentze-lan mekanikoko lan-araubidea

1.–Oraindik ere indarrean da enpresak 1989ko otsailaren 6an prestatutako eta Nafarroako Gobernuko Lanaren eta Gizarte Ongizatearen Departamentuari aurkeztutako espedientean planteatutako antolaketa, jarraian adierazten diren ñabardurekin:

2.–Guardien sistema: Guardia lokalizatua, fabrikan, gaueko txandan, produkzioa abian den urteko edozein egunetan sortzen ahal den edozein kontingentziari aurre egiteko.

3.–Oporrak:

Hogeita hamar egunak aldez aurretik finkatuko dira. Ukitutako langileak ados jarrita, urtero, apirilaren 30a baino lehen proposatzen ahalko diote enpresari oporren zikloak aldatzeko, aldi berean adierazitako zein izanen den guardien banaketa udako hilabeteetan.

Proposamena antolaketaren aldetik egokia bada eta ez badu fabrikari eman beharreko zerbitzua okertzen, enpresako zuzendaritzak oniritzia emanen du eta egutegia berriro doituko da (lanegunen kopurua eta atseden egunena) urte bukaera arte.

4.–Diru konpentsazioa: Akordioaren atal ekonomikoan jasoak.

5.–Laneko urteko egutegia 8 mekanikaritan oinarrituz prestatuko da.

6.–Mekanikariren bat bajan bada edo ezin bada lantokira joan, larunbat, igande edo jaiegunetako goizeko edo arratsaldeko txandetan, horren lanpostua Abelan San Andrés fabrikan modu egonkorrean zerbitzua emateko azpikontratatutako enpresa bateko mekanikariak beteko du.

Azpikontratatutako enpresa bateko mekanikaririk ez badago, eta egonda ere ez badituzte instalazioak behar bezala ezagutzen, eta, halaber, gaixotasunagatik, istripuagatik, oporrengatik edo norberaren nahiz familiaren aferengatik ezin badituzte ordezkapen batzuk egin, taldeko mekanikari titularrek eginen dituzte ordezkapen horiek, ordezkapenetarako ezarritako arauen arabera, indarrean baitiraute.

Halaber, ordezkapenetarako indarrean diren arauak aplikatuko dira, baldin eta larunbat, igande nahiz jaiegun bateko absentzia kopuruak ordezkapena egin beharreko egunerako azpikontratatutako, baliozkotutako eta eskuragarri dauden mekanikarien kopurua gainditzen badu.

7.–Taldeko pertsona bakoitzak ordezkapena egiten duen egun bakoitzeko (aurreko puntuan ezarritakoaren arabera) 3. gehigarriko M-4 puntuan ageri den zenbatekoarekin konpentsatuko zaio eta bere egutegian lanegun gisa ezarritako egun batean ez du lanik eginen, gaur egun ezarrita dagoen bezala.

8.–Mekanikariek laguntzailea izanen dute beharrezkoak diren lanetarako.

Zuzendaritzak ahalmena du antolaketa berria ezartzeko, mantentze-lan mekanikoari nahiz elektrikoari dagokionez, mantentze-lan prebentiboen ezarpenaren arabera, enpresa batzordearen eskudantziak kaltetu gabe.

VI. ERANSKINA

Galdara/kogenerazio lanposturako lan-araubidea

1.–Kogenerazio plantako langilea K taldea. Langile horren zeregina da kogenerazioko instalazioa eta gainerako ekipo lagungarriak gidatzea, eta horretarako beharrezkoak diren operazio guztiak egitea fabrikara doan lurrun hornidura eta kanpoko sare elektrikoarekiko konexioa optimizatzeko, eta bere kargura egoten ahalko dira lantokiko zerbitzu lagungarriak (edateko ura, ur beroa, aire konprimatua, etab). Lanpostu honi zeregin hauek dagozkio:

Oreen-Uraren Ataleko lanak eta /edo zaintza-lanak; egun bakoitzaren espezifikotasunaren eta funtzionatzen ari diren instalazioen arabera.

2.–Lan-araubidea: Non Stop.

Bost pertsonen artean egin beharreko egutegia, urteko egun guztiak betez.

3.–Sorrarazten diren atseden egun guztiak, 2001etik aurrera lanaldia laburtzearen ondorioz –langilearentzat onuragarria denean hartuko dira– enpresarekin adostu ondoren eta kogenerazioko edo produkzioko (Non Stop sistema) egutegiko oporrekin bat ez datozenean.

4.–Produkzioko langilerik ez dagoen egunetako gaueko txandan, enpresak beste norbait jarriko du, txanda horietan bi pertsona egon daitezen fabrikan.

5.–Non Stop primaren zenbatekoa lan-araubide horretarako ezarritakoa izanen da.

Abenduaren 24ko eta 31ko arratsaldeko eta gaueko txandetan, bai eta urtarrilaren 1eko eta abenduaren 25eko hiru txandetan, Non Stop primaren zenbatekoa bikoitza izanen da.

Zuzendaritzak, azterlanak egiten dituzten kanpoko enpresa aholkularien bidez, kogenerazioa antolatzeko modurik egokiena ezarriko du, eta enpresa batzordeari jakinaraziko dio, indarreko legeriak ordezkaritza-organo horri esleitzen dizkion eskudantziak galarazi gabe.

VII. ERANSKINA

Absentziak partzialki betetzeko lan-araubidea

1.–Lanpostu hori betetzen duten pertsonek ez badute nahi ez dituzte larunbatetan (arratsaldeko eta gaueko txanda) eta igandetan (hiru txandak) sortzen diren absentziak bete behar.

2.–Lanpostu horiek betetzen dituzten pertsonek zeregin hauek izanen dituzte:

a) Honako hauengatik sortzen diren absentziak betetzea: eritasuna, istripua, ezarritako baimenak, aparteko orduen konpentsazioak, aldi arruntetik kanpoko oporrak, auzi sindikalak, etab.

b) Zenbait lan (besteak beste, garbiketa).

3.–Bete beharreko lanpostuak (zuzenean edo zeharka) honako arlo hauei dagozkie: Produkzioa, Galdara, Baskula, Karga, Deskarga, Mantentze-lanak (laguntzaileak), bai eta etorkizunean egon daitezkeen antzekoak ere.

4.–Ordutegia: Lehen astea: goizez (astelehenetik larunbatera, jaiegunak kenduta).

–Bigarren astea: gauez (astelehenetik ostiralera, jaiegunak kenduta).

–Hirugarren astea: arratsaldez (astelehenetik ostiralera, jaiegunak kenduta).

Horrela, normalean, pertsona bat izanen da goizeko txandan, beste gauekoan eta beste bat arratsaldekoan.

5.–Bete beharreko absentzia bat baino gehiago badira, eta txanda berekoak badira, absentziak betetzen dituzten langileek egoera horretara moldatuko dute ordutegia.

6.–Baldintza ekonomikoak:

a) Lanpostu horrek dakartzan zeregin guztiengatik plus bat kobratuko dute, hitzarmen honen atal ekonomikoan ezarrita dagoena.

b) Larunbat goizeko plusa txanda horretan benetan egiten diren larunbatengatik kobratuko da.

c) Lan egutegiaren arabera urtean zenbait gauez lan egin behar dutenez, gaueko plusa kobratuko dute benetan lan egindako gau bakoitzeko. Egutegiaren arabera gaueko txanda egokitzen bazaie eta goizekoan edo arratsaldekoan egiten badute lan, gaueko plusa ordainduko zaie. Lanpostu horrek berekin dakar lanaldi jarraituaren konpentsazio plusa kobratzea (ogitartekoa).

7.–Beharrezkoa baldin bada absentziak partzialki betetzen dituen langile bat lanegun batean lantokira etortzea, eta egun hori atseden eguna baldin bada langilearentzat, langile horrek eskubidea izanen du sorrarazten den atsedena (egun bat eguneko) nahi duenean hartzeko, baldin eta ostiral batean ez bada eta absentismoak horretarako aukera ematen badu. Baimena 60 egun igaro baino lehen hartu beharko da.

VIII. ERANSKINA

Malgutasuna

Uztailaren 6ko 3/2012 Legeak aldatutako Langileen Estatutuaren 2. artikuluari jarraikiz, aldeek adosten dute Abelan San Andrés SLen aplikatu beharreko malgutasuna Malgutasun Akordio honetan zehaztuko dela, eta ezin izanen da lanaldiaren banaketa irregularrik egin hitzarmen honetan berariaz xedatzen den horretatik kanpo. Honela ezarriko da lanaldiaren banaketa irregularra:

Urtero, azaroaren bukaeran erabakiko da hurrengo urtean 4½ edo 5 talde egonen diren eta urteko egutegia eginen da, betiere enpresa batzordearekin adosten saiatuz.

1. aukera: 4½ talde.

4½ taldetan aritzeko egutegia eginen da, hitzarmenean ezarritako lanaldiak dituen lanegun kopuru berarekin.

Lana gelditzeko egun finkoak ezartzen dira:

–Urtarrilaren 1a.

–Uztailaren 6tik (uztailaren 5eko gaua) -12ra bitarte (biak barne).

–16 egun abuztuan.

–Abenduaren 24a (2/3), abenduaren 25a eta abenduaren 31 (2/3).

Lana gelditzeko gainerako egunak, erdi-finko izenekoak, “aldi erakargarriak” izeneko aldietan kokatuko dira, hots:

Erregeak: urtarrilaren 1etik 6ra bitarte, Errege egunaren ondoko lehen lanegunera luzatzeko aukerarekin (astelehenetik ostiralera). Hori azaroan zehaztuko da.

–Aste Santua eta Pazko Astea.

–Sanferminetako lanik gabeko egunen aurrekoak nahiz ondokoak.

–Abuztuko egun finkoen aurrekoak nahiz ondokoak.

–Atarrabiako jaien astea.

–Zubi foralen astea.

–Eguberriak: abenduaren 24tik 31ra bitarte.

Erdi-finko izeneko egun horiek aldatzen ahalko dira, 15 egun lehenago jakinarazita, eta betiere salmenten bilakaeraren eta aurreikuspenen arabera eta stock-en egoeraren arabera. Erabakitzen bada egun erdi-finkoetan lana ez dela geldituko, egun horiek berriro finkatuko dira, “aldi erakargarriak” bezala definitutako garaien barruan.

Salmenten aurreikuspenen arabera erabakitzen bada 5 taldetara pasatzea, enpresako Zuzendaritzak maiatzaren bukaera baino lehen jakinaraziko du, eta bost txandak osatzeko beharrezkoak diren behin-behineko langileak kontratatuko dira.

5 taldetara pasatzea honela eginen da:

1. Uztailaren 6tik 11ra bitarteko lanik gabeko egunen ondoren eta produkzioa abuztuan 10 egunez gutxienez geratuta.

2. Lana abuztuan 16 egunez gelditu ondoren eta uztailaren 5etik 12ko gauera bitarte geldituta.

3. Zuzendaritzarentzat beharrezkoa bada udan produkzioa ez gelditzea, uztailaren 6tik 9ra arteko geldialdiaren ondoren 6 txanda jarriko dira. Horretarako, talde orekatuak eratu eta behin behineko langileak kontratatuko dira horiek osatzeko. 6 txandako antolaketa horrek beharrezkoa den denbora iraunen du, txanda guztiek aukera izan dezaten 16 egun jarraituko oporraldia hartzeko ekainaren 25etik irailaren 10era bitarteko aldian.

Kontratazio berrien kasuan, behin behineko langileak bi aste lehenago hartuko dira bete behar dituzten lanpostuetarako prestatzeko.

2. aukera: 5 talde.

5 taldeko egutegia eginen da, 357,67 egunekoa edo 358,67 lanegunekoa, bertan ezarrita lana gelditzeko egun finkoak:

–Urtarrilaren 1a.

–Uztailaren 6tik 9ra bitarte (biak barne).

–Abenduaren 24a (2/3), abenduaren 25a eta abenduaren 31 (2/3).

Urtean zehar salmentek okerrera egiten badute, produkzioan geldialdiak egiten ahalko dira aurretik aipatutako aldi erakargarrietan. Geldialdiak egin baino 20 egun lehenago emanen da horren berri.

Salmenten aurreikuspenen arabera erabakitzen bada 4,5 taldetara pasatzea, enpresako zuzendaritzak 20 egun lehenago jakinarazi beharko du, eta aukera hauen arabera eginen du:

1. Aste Santuan, produkzioan 5 eguneko geldialdia egitea. Kasu horretan, produkzioa gutxienez ere uztailaren 6tik 12ra bitarte eta abuztuan 16 egunez geldituko da.

2. Sanferminetako geldialdia. Kasu horretan, produkzioa gutxienez ere uztailaren 6tik 11ra bitarte eta abuztuan 14 egunez geldituko da.

3. Atarrabiako jaietan, gutxienez ere 5 eguneko geldialdiarekin.

Aurreko aukeretan geratzen den lanaldia:

Urtearen bukaeran geratzen den banakako lanaldia hitzarmenean ezarritakoa baino txikiagoa baldin bada (gehienez 6 egun), langileak hiru aukera izanen ditu:

1. Lan egin gabeko egunak (orduak) honela deskontatzea: Kontzeptu finko guztien %50 deskontatzea, aparteko soldatetan deskontatuz (gehienez 3 egun deskontatuz aparteko paga bakoitzean) eta kotizazioa mantenduz.

Prezioa-ordua formula: (hitzarmeneko soldata + CSC + antzinatasuna + Non-Stop finkoaren plusa + mozkinen aparteko paga + emaitzen aparteko paga)/urteko lanaldia.

2. Lan egin gabeko egunekin (orduekin) poltsa bat eratzea, hurrengo urtean berreskuratzen ahal dena, bi egun lehenago jakinarazita.

3. Aurreko bien arteko nahasketa.

Baina, urtearen bukaeran geratzen den banakako lanaldia hitzarmenean ezarritakoa baino handiagoa bada (gehienez 6 egun), aparteko ordutzat hartuko dira ondorio guztietarako, eta langile bakoitzak aukera izanen du horiek konpentsatzeko hiru modalitateen artean hautatzeko. Hautatzen den aukera atseden konpentsatzailea bada, hurrengo urtean hartzen ahalko du, betiere zazpi egun natural lehenago eskatuta eta egunean bi pertsonak eta txanda bakoitzeko pertsona bakarrak eskatzen badute.

Enpresako txanda eta atal guztiek antzeko lanaldia izanen dute urtean, eta enpresa batzordearekin adostuko da nola orekatuko diren egutegiak.

1. arau orokorra: martxan jartzea larunbatean suertatzen bada, hori aurreko ostiralean eginen da, eta martxan jartzea igandean suertatzen bada, hurrengo astelehenean. Sanferminetarako 4 egun bermatzen dira, eta uztaileko geldialdia laburtzen bada, abuztukoa luzatuko da eta alderantziz.

2. arau orokorra: abuztuko geldialdiak irailaren 3ra arte luzatzen ahalko dira, egun hori barne.

Plantilla eta aldi baterako langileak

5 taldetik 4½ra pasatzen bada, aldi baterako kontratuak beren epemugan deuseztatuko dira legeak ezartzen dituen baldintzetan, eta langile horiek San Andresen lan-poltsan sartuko dira; hala, beharrezkoa denean, enpresak haiek kontratatu beharko ditu lehenbizi, sartzen direneko hurrenkeran, lanpostuak betetzeko egokiak direla egiaztatu ondoren.

IX. ERANSKINA

1. Abelan San Andrés SLren 2014-2015eko hitzarmena sinatzean, enpresak bere plantillari gehituko dizkio 2014ko abenduan kontratua bukatu zuten hiru langileak, hau da, Rodrigo Echarri, Antonio López eta Juan Eransus. Hasieran aldi baterako kontratua eginen zaie pertsona horiei, eta hala jarraituko dute harik eta errelebo kontratu mugagabean sartzen diren arte. Hiru pertsona horiek lehenak izanen dira, haien arteko antzinatasun ordenaren arabera, lehen hiru errelebo kontratu mugagabeetan sartuko direnak, hitzarmen hau sinatzen den egunetik aurrera.

Hiru lagun horiek ez dira kontuan hartuko hitzarmenaren 27. artikuluko azken lerroaldean ezarritako ondorioetarako.

2. Abelan San Andrés SLren 2014-2015 hitzarmena sinatzean, 2015eko irailaren 1ean D edo F kategoriako kontratu mugagabea duten langile guztiek G kategoria hartuko dute.

2015. URTEKO SOLDATEN TAULAK

1. GEHIGARRIA

3. GEHIGARRIA

Balioak - Hainbat

PIZGARRIAK, BEHIN BETIKO BAJENGATIK

Iragarkiaren kodea: F1600626