33. ALDIZKARIA - 2016ko otsailaren 18a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

BERRIOZAR

Hirigintzako lizentzien tasei, jardueren lizentzien tasei eta ikuskapenen tasei buruzko ordenantza fiskalak (7, 8 eta 9 zenbakiko ordenantzak). Behin betiko onespena

Berriozarko Udalak, 2015eko azaroaren 26ko osoko bilkura arruntean, erabaki zuen hasiera batean onestea ondotik zehazten diren ordenantza fiskaletako aldaketa, Nafarroako Toki Ogasunei buruzko martxoaren 10eko 2/1995 Foru Legearen eta Nafarroako Toki Administrazioari buruzko uztailaren 2ko 6/1990 Foru Legearen 325. eta 326. artikuluetako aginduak betez.

7. ordenantza, Lizentziak eman eta hirigintzan bestelako jarduketak egiteko tasak arautzen dituena.

8. ordenantza, Jarduera sailkatu eta kaltegabeetan aritzeko eta jarduera eskualdatzeko lizentzien gaineko tasak arautzen dituena.

9. ordenantza, Udal ordenantza eta erabakietan aurreikusitako ikuskapenen tasak arautzen dituena.

17. ordenantza, Herriko jabari publikoko lurzoru, hegalkin eta zorupean aprobetxamendu berezia egiteko tasak arautzen dituena.

2015eko 250. Nafarroako Aldizkari Ofizialean, azaroaren 17an, argitaratu zen aipatutako hasierako onespenari buruzko iragarkia.

Jendaurrean egondako 30 egun balioduneko epean alegazio bat jaso zen 17. ordenantzari buruz, Herriko jabari publikoko lurzoru, hegalkin eta zorupean aprobetxamendu berezia egiteko tasak arautzen dituena baita.

Gainerako hiru ordenantzak behin betiko onetsita gelditu dira, ez baita alegaziorik jaso jendaurreko epean. Hortaz, jarraian argitara ematen dira haien behin betiko testuak, osorik.

7. ORDENANTZA FISKALA, LIZENTZIAK EMAN ETA HIRIGINTZAN BESTELAKO JARDUKETAK EGITEKO TASAK ARAUTZEN DITUENA

Oinarria

1. artikulua. Ordainarazpen hau ezarri da Nafarroako Toki Ogasunei buruzko martxoaren 10eko 2/1995 Legearen lehenbiziko tituluko IV. kapituluko 7. atalean xedatutakoaren arabera eta lege beraren 12. artikuluan jasotzen den baimenari jarraituz.

Zergapeko egintza

2. artikulua. Hirigintzako jarduketei dagozkien zerbitzu tekniko eta administratiboak ematean datza zergapeko egintza, etxegintzaren eta lurzoruaren erabileraren arloko egintzak egokitu ahal izateko indarra duten hirigintza eta eraikuntza arauei.

3. artikulua. Tasa hauei loturiko udal ekintzak dira udal planeamenduko edozein motatako dokumentuen kudeaketa eta tramitazioa, bai eta Lurraldearen Antolamenduari eta Hirigintzari buruzko 35/2002 Foru Legearen 189. artikuluan zehaztutako hirigintzako jarduketak ere.

Aipatze aldera, ondokoak dira:

–Mota guztietako eraikuntza eta instalazio obrak, eraikuntza berrikoak badira.

–Lehendik dauden mota guztietako eraikin edo instalazioak handitzeko obrak.

–Lehendik dauden eraikinen edo instalazioen egitura edo kanpoko itxura ukitzen duten obrak, aldatzekoak edo berritzekoak.

–Eraikinen barneko banaketa aldatzen duten obrak, edozein erabilera emanda ere.

–Behin-behineko obra eta erabilerak.

–Hirigintzako lurzatiketak eta landa finken banaketa eta zatiketak.

–Lur-mugimenduak, hala nola zelaitu, lurrerauzi, hondeatu eta betetzeko lanak, salbu eta lan horiek zehaztu eta programatutako obrak badira onetsia den urbanizazio edo eraikuntza proiektu baten barrenean.

–Eraikinak eta instalazioak lehenbiziko aldiz erabili edo okupatzea eta haien erabilera aldatzea.

–Eraikinak botatzea, salbu eta berehalako aurri-egoera deklaratzen denean.

–Zorupeari eragiten dioten instalazioak.

–Arbolak eta zuhaixkak botatzea, baldin eta zuhaitz-masa, basogune, arboladi edo parke badira, planeamendu onetsia izan ala ez, salbu eta nekazaritzaren arloko legeek baimentzen dituzten lanak direnean.

–Presa, idoi eta defentsa-obrak egin eta ubide publikoak zuzentzea, interes orokorreko obra publikoak ez badira.

–Agregakinak ateratzea eta harrobiak ustiatzea, jabari publikoko lurretan egin eta administrazioaren kontzesioa behar izanda ere.

–Finkak ixtea.

–Eta, oro har, erregelamendu bidez adierazten diren egintzak, obrak ekartzen dituztelako, edo lurzoruaren nahiz zorupearen erabilera handitzen delako, haien erabilera pribatiboa dakartelako edo erabilera ez-normala edo lurren berezko nekazaritza edo oihangintzako erabileraz bestelakoa dakartelako.

Horiez gain:

–Tramitazio laburreko obra lizentziak, obra txikiak, etxeak mantendu eta apaintzekoak eta eraikuntza txikietakoak.

–Emandako lizentzien aldaketak.

–35/2002 Foru Legearen 107. artikuluaren babesean emandako behin-behineko lizentziak.

–Lurzorua erabiltzeko edo eraikitzeko egintzak, erantzukizuneko aitorpenaren araubidearen menpe daudenak, edo aldez aurretik komunikatu behar direnak, dokumentazioa aurkeztu eta eraikuntza bukatu ondoren sortzen duen berrikuspen eta ikuskapen jarduerarengatik.

Ordaindu beharra

4. artikulua. Oro har, ordaindu beharra sortzen da dokumentua onesten den momentuan edo lizentzia ematen denean. Uko egiten bazaio, lizentzia eskatzen den unean hasten da ordaintzeko betebeharra.

Subjektu pasiboa

5. artikulua. Tasa hauek ordaintzera beharturik daude pertsona fisikoak edo juridikoak, heredentzia banatugabeak, ondasun komunitateak eta Tributuei buruzko Lege Orokorraren 33. artikuluak aipatzen dituen gainerako entitateak, zerbitzuak eta lizentziak eskatu, sorrarazi eta haien onura izaten dutenean, subsidiarioki.

Tarifak eta karga-tasak

6. artikulua. Aplikatu beharreko tarifa, tasa eta karga-oinarriak ordenantza honen eranskinean agertzen dira.

Lizentzien tramitazioa eta horien ondorioak

7. artikulua. Hirigintza jarduketari buruzko edozein eskabide Hirigintza prozedurari buruzko ordenantzan eta aplikagarri diren bestelako arauetan ezarritako moduan bete beharko da.

8. artikulua. Lizentzien iraungipenaren inguruko orotan, Hirigintza prozedurari buruzko Nafarroako legerian xedatutakoari jarraituko zaio.

9. artikulua. Lizentziaren titularrek uko egiten ahalko diote eskatutako obrak tramitatu edo egiteari, Udalari ukoa idatziz aurkeztuta, betiere aipatu lizentzia iraungirik ez badago. Udalak lizentzia onetsi edo emateko erabakia hartu baino lehen egiten bada uko eta obrak hasi gabe badaude, lizentzia onetsi edo emandakoan legokiokeen tasaren %20 ordaindu beharko da. Lizentzia onetsi edo eman eta gero egiten bada uko, tasak %50 baizik ez dira gutxituko.

Kudeaketa arauak

10. artikulua. Planeamendurako espedienteak eta lizentziak tramitatzeko ardura duten bulegoetatik, udal teknikariek aldeko txostena eman eta gero, zergak likidatuko dituen bulegora igorriko dira espedienteak. Bulego horrek likidazioa eginen du, eta bertan honako hauek aipatuko ditu: subjektu pasiboaren izena, tasa zer kontzepturen arabera likidatzen den, tasaren tarifa eta zenbatekoa.

11. artikulua. Urbanizazio gaien tramitazioan, proiektua onesterakoan eginen da tasen likidazioa. Hasierako onespenetan, jendaurreko prozesua izan edo ez, tasaren %50 ordainduko da hasierako onespenean eta %100 behin betiko onespena ematen denean. Onespen hori Udaletik kanpoko organo batek eman behar badu, %100 ordainduko da behin-behineko onespenarekin eta %20 gehiago ordainduko da behin betiko onesten denean.

12. artikulua. Lizentziak emateko tasak behin-behinekoz ordainduko dira obra gauzatzeko aurrekontuaren kostu osoaren arabera, obra lizentzia eskuratzeko proiektuan jasoko dena, eta lizentzia emateko egintzan ordaindu beharko da.

Obra bukatu edo behin-behinekoz onartu eta hurrengo hilabetean, obrak bukatu direla ziurtatzen duen aitorpena aurkeztuko da, obraren zuzendariak luzatutako ziurtagiriarekin batera, behar den elkargo profesionalak ikus-onetsia, beharrezkoa bada (1000/2010 ED), zeinak obren kostu osoa ziurtatuko baitu. Aipatutako kostua udal teknikariek aztertuko dute eta errealitateari ez zaiola egokitzen ikusten badute, egokitzen saiatuko dira. Behin betiko likidazioa eginen da eta onesteko aurkeztuko. Partikularraren aldeko diferentziarik izanez gero, itzuli eginen zaio; Udalaren aldekoa bada, berriz, hura ordaintzeko hilabeteko epea emanen zaio. Ordaintzen ez badu, premiamendu bidez kobratuko da, besterik gabe.

Hilabeteko epe hori iragaten bada obren bukaerako kostuaren ziurtargiria jasotzen duen aitorpen hori, aurreko lerroaldean aipatu baita, aurkeztu gabe, lizentzia emateko egintzan sortutako tasak behin betiko bilakatuko dira.

13. artikulua. EIOZa (eraikuntzen, instalazioen eta obren gaineko zerga) zer elementurengatik ordaintzen den, elementu horiek osatzen dute tasaren ezarpen oinarria. Ordenantza honen eranskinean esaten denaz gain, beharrezkoa baldin bada, tasaren ezarpen oinarriaren zatitzat hartuko da eraikuntzari lotutako barne urbanizazioaren proiektuaren zenbatekoa. Horretarako, interesdunek barne urbanizaziorako proiektua aurkeztu beharko dute, aurrekontu eguneratuarekin batera.

14. artikulua. Tasen likidazioa onetsi eta gero, interesdunari jakinaraziko zaio, erregelamenduzko epean tasak ordain ditzan.

15. artikulua. Autolikidazioen eta “aldez aurreko komunikazioko edo erantzukizuneko aitorpeneko” araubidearen menpe dauden lizentzien kasuan, eskatzaileak Udal Diruzaintzako Departamentutik hartuko du baimenaren agiria.

Tasa horiek eskaera egin aurretik ordainduko dira eta horren ziurtagiria aurkeztu beharko da obra lizentziaren, jarduera eta obren lizentziaren, bide publikoa okupatzeko edo antzekotarako lizentziaren eskabidearekin batera. Ziurtagiriaren aurkezpena nahitaezkoa izanen da eskabideak onartzeko. Horrela geratuko da lizentziaz eta haren aplikazioaz jabeturik.

Arau-hausteak eta zehapenak

16. artikulua. Arau-hausteei eta zehapenei dagokien orotan, ordenantza fiskal orokorrean xedatutakoari jarraituko zaio.

TARIFEN ERANSKINA

I. epigrafea.–Lurraldearen Antolamenduari eta Hirigintzari buruzko Legearen 221. artikuluaren babesean emandako lizentziak.

I.1) Lurzatiketak egiteko lizentziak:

–Lurzatiketarako lizentzia bakoitza tramitatu eta ebazteko tasak azaleraren arabera likidatuko dira; 1.000 m² edo zatiki bakoitzeko. 52,57 euro.

I.2) Eraiste, eraikitze, berritze, instalazio, zuhaitz botatze eta oro har lizentzia behar duten gainerako obretarako lizentziak, betiere aurreko ataletan ez badaude.

Kuota = zerga-oinarria (12. artikuluaren arabera) x (karga-tasa)

Honako karga-tasa hauek aplikatuko dira, tarteka:

–100.000 euro bitarte: %1,5.

–100.001 eurotik 600.000 eurora: %1,0.

–600.000 eurotik goiti: %0,5.

I.3) Lizentziak, eraikinak eta instalazioak lehen aldiz erabili edo okupatzeagatik:

–Etxebizitza kolektibo berrien eraikinak lehen aldiz erabili edo okupatzeko lizentzia bakoitza tramitatu eta ebaztea: 843,52 euro.

–Familia bakarreko etxebizitza berrien eraikinak lehen aldiz erabili edo okupatzeko lizentzia bakoitza tramitatu eta ebaztea: 210,88 euro.

–Etxebizitzak lehen aldiz erabili edo okupatzeko lizentzia partzial bakoitza tramitatu eta ebazteagatik, lehen aldiz erabiltzeko lizentzia dagoeneko badaukaten eraikinetan, etxebizitza bakoitzeko: 104,95 euro.

–Etxebizitzetarako ez diren bestelako eraikinak eta/edo lokalak lehen aldiz erabili edo okupatzeko lizentzia bakoitza tramitatu eta ebazteagatik: 104,95 euro.

–Lehen aldiz erabiltzeko lizentzia bakoitza tramitatu eta ebazteagatik, eraikitzeko baldintzak aldatzen direnean: 104,95 euro.

–Eraikin osoak edo banakako etxebizitzak, Zaharberritzeko laguntzetarako udal ordenantzaren babesean daudenak, lehen aldiz erabili edo okupatzeko lizentzia bakoitza tramitatu eta ebazteagatik: 30,00 euro.

I.4) Hirigintzako beste figura batzuk.

–Plan partzial edo bereziak tramitatzea: 600,00 euro.

–Urbanizazio proiektuak tramitatzea. 600,00 euro.

–Udal Planeko egiturazko aldaketak tramitatzea: 600,00 euro.

–Udal Planeko aldaketa ez egiturazkoak tramitatzea: 400,00 euro.

–Plan partzial edo berezien aldaketak tramitatzea: 400,00 euro.

–Birzatitzeko, finkak erregularizatzeko edo lurzatiak berrantolatzeko proiektuak tramitatzea: 400,00 euro.

–Xehetasun azterlanak edo lerrokadura azterlan osagarriak: 200,00 euro.

–Unitateen mugapena, erabilera aldaketak: 100,00 euro.

–Aitzinetik aipatu ez diren beste kudeaketa moduak tramitatzea: 300,00 euro.

Aurreko tasetan ez dira sartu Nafarroako Aldizkari Ofizialean edo egunkarietan argitaratzeagatiko tasak; ordenantza honetako epigrafeen arabera igorriko dira.

II. epigrafea.–Gutxieneko eskubideak.

Aurreko epigrafeengatik ordaindu behar diren tasak gutxieneko zenbatekoetara iristen ez badira, honako hauek ordaindu beharko dira:

–Lurzatiketak (lurzati bakoitzeko): 55,61 euro.

–I.2 epigrafeko obra lizentziak: 46,14 euro.

8. ORDENANTZA FISKALA, JARDUERA SAILKATU ETA KALTEGABEETAN ARITZEKO ETA JARDUERAK ESKUALDATZEKO LIZENTZIEN GAINEKO TASAK ARAUTZEN DITUENA

Oinarria

1. artikulua. Ordainarazpen hau ezarri da Nafarroako Toki Ogasunei buruzko martxoaren 10eko 2/1995 Legearen lehenbiziko tituluko IV. kapituluko 7. atalean xedatutakoaren arabera eta lege beraren 12. artikuluan jasotzen den baimenari jarraituz.

Ordainarazpenaren xedea

2. artikulua. Ordainarazpen honen xede dira kasu hauetan ematen edo eskualdatzen diren jarduera sailkatu eta kaltegabeen lizentziak:

a) Jarduera berritik jartzea lokal batean, jardueraren funtsezko aldaketa egitea edo horren aldaketak.

b) Aldaketak jardueran, izena, titularra eta lokala aldatu gabe.

c) Jarduera handitu edo txikitzea, eta hori gertatutzat emanen da jarduera gauzatzen den azalera aldatzen bada edo jarduera sailkatuen gaineko zerga handitzen den aldiro, non ez den araudi fiskalaren aldaketak sortua.

d) Eskualdaketak eta titular aldaketak, bertan garatzen den jarduera aldatu edo handitu gabe.

e) Lizentzia berrikustea, titularraren nahiz administrazioaren jarduketak direla-eta.

f) Jardueretako lizentziak eta irekitzekoak.

g) Egiaztatze eta ikuskatze arloan behar diren jarduketak, erantzukizuneko aitorpenaren eta/edo aldez aurreko komunikazioaren bidez tramitatutako espedienteetan.

Lokal bateko jardueraren lizentzia haren jabea den pertsona fisiko edo juridikoaren izenean egon beharko da edo jarduera garatzen duen pertsona fisiko edo juridikoaren izenean.

Zergapeko egintza

3. artikulua. Zergapeko egintzak dira irekitzeko lizentziak eman aurretik eta haiek eskualdatzeko edo haien titulartasuna aldatu aurretik eta/edo ondotik emandako zerbitzu tekniko eta administratiboak, lizentzia haien jabe izan behar baitute, nahitaez, ingurumena kontrolatzeko jarduera sailkatuen edo kaltegabeen titularrek.

Ordaindu beharra

4. artikulua. Zergak ordaindu beharra hasten da:

a) Nahitaezko lizentzia ematean, bai udal ebazpen espresaren bidez bai erantzukizuneko aitorpena edo aldez aurreko jakinarazpena aurkeztean.

b) Ordenantza honen 2. artikuluan ezarritako inguruabarretako bat gertatzen denean.

Subjektu pasiboa

5. artikulua. Pertsona natural edo juridikoak daude beharturik ordenantza honetan ezarritako tasak ordaintzera, lizentzia ematen bazaie jarduera batean aritzeko, eskualdaketa egiten bazaie edo titulartasuna ematen.

Tarifak

6. artikulua. Ordenantza honen eranskinean jaso dira aplikatuko diren tarifak.

7. artikulua. Interesdunak espresuki uko egiten badio eskatutako lizentziari, tasa %80 beheratuko da lizentzia eman aurretik gertatzen bada, jarduera kaltegabeen kasuan.

Jarduera sailkatuen kasuan, interesdunak espresuki uko egiten dionean, beherapena %80 izanen da, jendaurrean jartzeko prozesua hasi eta/edo kanpoko txostenik eskatu baino lehen gertatzen bada; prozesu hori hasi bada, %50 beheratuko da.

Kudeaketa arauak

8. artikulua. Irekitzeko lizentzia erdiesteko interesa duten pertsonek behar den eskabidea aurkeztuko dute Udaletxean, lokalean egin beharreko jarduerak eta kokalekua zehaztuta eta sektoreko eta autonomia erkidegoko eta udal ordenantzen eskatutako dokumentazioa gehituta, hau da, jarduera proiektua eta obra proiektua, beharrezkoa bada.

9. artikulua. Lizentzia eman eta tasaren likidazioa onetsita dela, interesdunak zenbateko bat ordaindu beharko du borondatezko kobrantza aldiaren barrenean, jakinarazpena jasotzen duenetik aurrera; bestela, inolako gaztigurik gabe, premiamendu bidez kobratuko da.

Erantzukizuneko aitorpenaren eta/edo aldez aurreko komunikazioaren sistema aplikatzen bada, autolikidazio bidez eginen da abonua, aurkeztu aurretik, eta tasak ordaindu izanaren frogagiria erantsiko zaio erantzukizuneko aitorpenari eta/edo aldez aurreko jakinarazpenari.

10. artikulua. Emandako lizentziek balioa galduko dute dagokien ordenantzetan eta legedian ezarritako epe eta arauen arabera, eta hori gertatuz gero, jardueran aritu nahi duten interesdunek lizentzia berria eskatu beharko dute eta tasa oso-osorik berriz ordaindu.

11. artikulua. Titulartasuna aldatu edo jardueraren eskualdaketa gertatzen denean, lizentziaren titular berriak Udalari jakinaraziko dio, eta horretarako behar diren egiaztagiriak aurkeztuko ditu.

Arau-hausteak

12. artikulua. Arau-hausteei eta zehapenei dagokien orotan, ordenantza fiskal orokorrean xedatutakoari jarraituko zaio.

TARIFEN ERANSKINA

I. epigrafea.–Berritik jartzen diren establezimenduak, jardueren lekualdaketak, jarduera aldaketak.

I.1. Jarduera lizentzia ematea/kontrolatzea, lokaleko jardueran funtsezko aldaketa egitea:

Establezimendua edo instalazioak:

AZALERA

SAILKATUA

KALTEGABEA

50 m² bitarte

550,00 euro

275,00 euro

50 m²-tik 100 m²-ra bitarte

620,00 euro

310,00 euro

100 m²-tik 250 m²-ra bitarte

690,00 euro

345,00 euro

250 m²-tik 500 m²-ra bitarte

795,00 euro

397,50 euro

500 m²-tik gora

900,00 euro

450,00 euro

I.2. Jarduerak irekitzeko lizentziaren kontrola.

Establezimendua edo instalazioak:

AZALERA

SAILKATUA

KALTEGABEA

50 m² bitarte

600,00 euro

325,00 euro

50 m²-tik 100 m²-ra bitarte

670,00 euro

360,00 euro

100 m²-tik 250 m²-ra bitarte

745,00 euro

395,00 euro

250 m²-tik 500 m²-ra bitarte

860,00 euro

462,50 euro

500 m²-tik gora

990,00 euro

540,00 euro

Bi epigrafe hauek likidazio sistemaren bidez aplikatzen dira. Jardueraren lizentzian, I.1 epigrafean zehazten den zenbatekora arte ordaintzen da, eta irekitzeko lizentzian, I.2 epigrafean zehaztutako zenbatekora arte ordaintzen da diferentzia, azkenik legeztaturiko jardueraren arabera.

Jarduera sailkatutzat joko dira 4/2005 Foru Legearen eta 93/2006 Errege Dekretuaren eranskinetan edo haien ordezko legerian agertzen direnak, baita udal ordenantzetan halakotzat jotzen direnak ere. Jarduera kaltegabetzat joko dira aitzineko baldintzak betetzen ez dituztenak.

II. epigrafea.–Jarduerak handitzea edo murriztea, aldaketak, berritzeak, jardueren eskualdaketak eta titularraren aldaketak.

II.1. Jarduera handitzea edo murriztea.

II.1.1. Lokalaren azalera handitzea:

I.1 epigrafeko tarifen %100 aplikatuko da, jardueran handitzen den azaleraren arabera.

II.1.2. Lokalaren azalera murriztea:

I.1 epigrafeko tarifen %25 aplikatuko da, jardueran murrizten den azaleraren arabera.

II.1.3. Lizentzia fiskalari epigrafe gehiago gehitzea, azalera bere horretan utzita:

I.1. epigrafeko tarifen %25 aplikatuko da.

II.2. Aldaketak jardueran.

II.2.1. Aurreko lizentzia desberdina denean:

Jarduera berritzat hartuko da eta I.1 eta I.2 epigrafeetako tarifak aplikatuko dira.

II.3. Jarduera eskualdatzea.

I.2 epigrafeko tarifen %50 aplikatuko da.

II.4. Titularra aldatzea.

I.2 epigrafeko tarifak aplikatuko dira, irekitzeko lizentzia berria balitz bezala. Lokalak aurretik irekitzeko lizentzia baldin bazuen azalera eta jarduera beretarako, likidatuko da lokalak jarduera lizentziaren tasak ordaindu balitu bezala.

II.5. Jarduera indarra duen legeriari egokitzea edo administrazioak eskatzen dituen jarduketak.

Jadanik badiren lizentziak, jarduera handitzea eskatzen ez dutenak.

I.2 epigrafeko tarifak aplikatuko dira, irekitzeko lizentzia berria balitz bezala. Aitzinetik irekitzeko lizentzia izanez gero egokitzen den jardueran aritzen den pertsonaren izenean, dagokion jarduera lizentziaren balioa deskontatuko da.

Jadanik badiren lizentziak, jarduera handitzea behar dutenak azalera handitu gabe.

I.1. epigrafeko tarifen %50 aplikatuko da.

Jadanik badiren lizentziak, jarduera handitzea eta/edo hartan funtsezko aldaketa egitea behar dutenak.

Jarduera berritzat hartuko da eta I.1 eta I.2 epigrafeetako tarifak aplikatuko dira.

II.6. Instalazioak eta lokalak berriz irekitzeko baimena, egiaztatu behar izaten diren obra garrantzitsuak egin ondotik.

AZALERA

TASA

50 m² bitarte

50,00 euro

100 m² bitarte

75,00 euro

200 m² bitarte

150,00 euro

300 m² bitarte

300,00 euro

500 m²-tik gora

638,40 euro

9. ORDENANTZA FISKALA, UDAL ORDENANTZA ETA ERABAKIETAN AURREIKUSITAKO IKUSKAPENEN TASAK ARAUTZEN DITUENA

Oinarria

1. artikulua. Ordainarazpen hau ezarri da Nafarroako Toki Ogasunei buruzko martxoaren 10eko 2/1995 Legearen lehenbiziko tituluko IV. kapituluko 7. atalean xedatutakoaren arabera eta lege beraren 12. artikuluan jasotzen den baimenari jarraituz.

Zergapeko egintza

2. artikulua. Zergapeko egintza Udalak bere langileen bidez egiten duen ikuskapen jarduerak dakar, frogatzeko hertsiki betetzen direla osasun arloko ordenantzek ezarritako arauak, jarduera sailkatuen edo kaltegabeen ingurukoak eta gainerako ordenantza eta udal erabakietan agertzen direnak, uste denean haiek urratu direla edo ez direla betetzen.

3. artikulua. Ikuskapenak bide hauei jarraikiz egin daitezke:

a) Ofizioz, arauek hala ezartzen dutenean.

b) Alderdi batek hala eskaturik, edo inork egindako salaketen ondorioz.

4. artikulua. Pertsona natural edo juridiko orok Alkatetzaren aurrean salatzen ahalko ditu, jarduera sailkatuen, osasungintzakoen eta emaniko gainerako arauen arloan egindako arau-hausteak, arau horietan ezarritako betekizunei eusten badie.

5. artikulua. Udal administrazioak ikustaldiak noiznahi egin ahal izanen ditu, kasuan kasuko arauak betetzen direla egiaztatzeko.

Tasaren sorrarazpena

6. artikulua. Tasaren sorrarazpena, kasuan kasuko espedienteari edo jarduerari dagokionez, udal langileek egindako ikustaldiarengatik eta egiaztapenarengatik gauzatuko da, honako arau hauekin osatuz:

a) Tasa ezartzeko, ikustalditzat joko da ikuskatzaileek egindako joan-etorria, ikuskatu beharreko lekura iristerik ez badute ere.

b) Irekitzeko lizentzia duten jarduerei dagokienez, lokalaren neurri zuzentzaileak eta segurtasunekoak betetzen diren egiaztatzeko egiten den lehenbiziko ikustaldiak ez du inolako tasarik sortuko.

Subjektu pasiboak

7. artikulua. Ordaintzera beharturik egonen dira:

a) Ikuskapenaren xede den jardueraren pertsona natural edo juridiko titularrak.

b) Ikuskatzen diren eraikin, establezimendu, zentro, lokal eta gainerakoen jabeak, arau-haustearekin zerikusia baldin badute.

c) Arau-haustea egiten duten pertsonak.

d) Salaketa dagoenetan, ausartegi justifikatu gabea edo argi eta garbi funtsik gabekoa dela jotzen bada, txosten teknikoaren arabera, salatzailearen gain geratuko dira ikuskapenak sortzen dituen tasak.

e) Halaber, higiezinaren jabeak ordaindu beharko ditu tasak, aurri espedienteen ondorioz egiten diren ikuskapenetan.

Tarifak

8. artikulua. Tarifak, beren karga-oinarriekin batean, ordenantzaren eranskinean agertzen dira.

Tasaren kudeaketa

9. artikulua. Ikuskatzaileek agerraldia egin izanaren berri emanen diote behar den departamentuari, likidazioa egiteko beharrezkoak diren datuekin eta adieraziz ea salaketa, kasuan kasu, ausartegitzat edo arrazoitu gabetzat hartzen den, eta hark kasuari dagokion likidazioa eginen du, eta, behar izanez gero, zigorra gehituko da, eta behar den organoari onespena proposatuko zaio. Onetsitakoan, obligaziodunari jakinaraziko zaio, eta kuota jakinarazpenaren ondoko hilabetearen barnean ordaindu beharko da. Ordaintzen ez bada, bestelako oharrik gabe, premiamendu bidez kobratzeari ekinen zaio.

Arau-hausteak eta zehapenak

10. artikulua. Arau-hausteei eta zehapenei dagokien orotan, ordenantza fiskal orokorrean xedatutakoari jarraituko zaio.

TARIFEN ERANSKINA

I. epigrafea.

Ikuskapenerako ikustaldiak, jarduera sailkatuen arloan eta gainerako ordenantza eta erabakietan ezarritakoaren arabera, bai eta udal ondarean sortutako kalteengatik ere, egindakoak.

Ikuskapenerako ikustaldi bakoitza: 151,99 euro.

Adierazitako egun eta orduan ez agertzeagatik arrazoi justifikaturik gabe eta gaztigatu gabe, ikuskatzaileak instalazioetara joan direnean. 146,99 euro.

II. epigrafea.

Eraikinen azterketa, segurtasun baldintzak eta aurri egoeretako espedienteak direla eta.

Gutxieneko ikuskapena: arkitektoaren eta aparejadorearen 1,5 orduko lana: 220,69 euro.

Lan gehiago behar bada, ordu bakoitza: 60,00 euro, barnean direla txostena idaztea eta lotutako gainerako jarduketak.

Argitara ematen da, behar diren ondorioak izan ditzan.

Berriozarren, 2016ko otsailaren 1ean.–Alkate udalburua, Raúl Maiza González.

Iragarkiaren kodea: L1601263