Iragarkia
30. ALDIZKARIA - 2016ko otsailaren 15a
1. NAFARROAKO FORU KOMUNITATEA
1.5. ESTATUTUAK ETA LAN HITZARMEN KOLEKTIBOAK
32C/2015 EBAZPENA, abenduaren 23koa, Politika Ekonomiko eta Enpresarialaren eta Lanaren zuzendari nagusiak emana, Irunberriko Embutidos Goikoa S.A. enpresaren hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.
Irunberriko Embutidos Goikoa S.A. enpresaren hitzarmen kolektiboaren testua (kode zenbakia: 31100992012015) aztertu da, erregistro honetan 2015eko irailaren 2an sartu zena eta 2015eko uztailaren 3an izenpetu eta 2015eko abenduaren 9an zuzendu zutena, Langileen Estatutuari buruzko Legearen testu bategina onetsi zuen urriaren 23ko 2/2015 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera. Horrenbestez,
EBATZI DUT:
1. Nafarroako Lan Hitzarmen eta Akordio Kolektiboen Erregistroan inskribatzeko agintzea.
2. Nafarroako Aldizkari Ofizialean argitaratzeko agintzea, denek jakin dezaten.
Iruñean, 2015eko abenduaren 23an.–Politika Ekonomiko eta Enpresarialaren eta Lanaren zuzendari nagusia, Izaskun Goñi Razquin.
EMBUTIDOS GOIKOA S.A. ENPRESAREN ESTATUTUAREN ARABERAKO HITZARMEN KOLEKTIBOAREN TESTUA
1.1. Atarikoa: alderdiak zehaztea
Hitzarmen kolektibo hau honako pertsona hauek sinatu dute, dagokien ordezkaritza erabiliz, hitzarmen kolektiboa sinatzeko legeztaturik baitaude:
Enpresaren ordezkariak:
–Alberto Jiménez Mutiloa. Enpresako zuzendari nagusia eta legezko ordezkaria.
Langileen legezko ordezkariak:
–Ignacio Pérez Vázquez jauna, langileen delegatua. (ELA sindikatua).
Berariaz adierazten da, langileen ordezkaritzari dagokionez, hitzarmena langileen delegatu bakarrak sinatu duela.
1. Izaera juridikoa.
Alderdiek lortutako akordioa estatutuaren araberako hitzarmen kolektibo baten gisara eratzen da oso-osorik, eta haragi-industrien hitzarmen kolektibo nazionalaren osagarria izanen da.
Hortaz, akordio honetan aurreikusi ez den orotan haragi-industrien hitzarmen kolektiboan xedatutakoari jarraikiko zaio.
2. Lurralde eremua.
Hitzarmen hau Embutidos Goikoa S.A. enpresak Zangozan (Nafarroa) duen lantegian aritzen diren langileei baizik ez zaie aplikatuko, zehazki, haren eremu funtzionalaren eta langile eremuaren barrenean sartuak daudenei.
3. Eremu funtzionala.
Hitzarmen kolektibo honetako aginduen bidez Embutidos Goikoa, S.A. enpresako lan harremanak arautzen dira. Enpresa horren jarduera nagusia da zerri hestebeteak prestatzea.
4. Langile eremua.
Hitzarmen kolektibo hau Embutidos Goikoa S.A. enpresak Zangozan duen produkzio lantegian lan kontratu arruntarekin (Langileen Estatutuan eta hura garatzen duten xedapenetan aurreikusitako modalitateetako edozeinetan) aritzen diren langile guztiei aplikatuko zaie, eta berariaz kanpo geldituko dira enpresarekin lan harreman bereziaren bidez lotuta dauden pertsonak, “hitzarmenetik kanpo” ari diren langileak eta, orobat, Embutidos Goikoa S.A.rekin langileak lagatzeko kontratuak hitzartuak dituzten enpresetan sartuak dauden langileak.
Aurreko paragrafoan xedatutakoaren ondorioetarako, ulertuko da “hitzarmenetik kanpo” ari diren langileak direla beren lan baldintzak, lanaren prestazio eta edukia eta ordainsaria modu indibidualean hitzartu dituzten langileak, Embutidos Goikoa S.A.rekin lan harreman arrunt baten bidez atxikita badaude ere, eta zeinahi izanik ere betetzen dituzten eginkizunak.
5. Iraunaldia. Indarraldia eta aurreraeragina.
5.1. Indarraldia.
Enpresa hitzarmen honen indarraldia sinatzen den egunean hasi eta 2016ko abenduaren 31n bukatuko da, baina haren ondorio ekonomikoak 2013ko urtarrilaren 1etik aurrera aplikatuko dira, atzeraeraginez.
Edozein alderdik sala dezake espres hitzarmen hau, indarraldia bukatu (2016ko abenduaren 31an) baino hiru hilabete lehenago. Hitzarmena salatzen ez bada, urteka luzatuko da. Luzatzen bada, luzapeneko urtea bukatu baino hiru hilabete lehenago egin daiteke salaketa.
Salaketa baliozkoa izateko, alderdi salatzaileak jakinarazpen fede-emailea egin beharko dio beste alderdiari, eta komunikazio ofiziala bidali Hitzarmen Kolektiboen Erregistrora.
Salaketaren berri eman eta hilabeteko epean gehienez, hitzarmen berriaren Negoziazio Batzordea eratuko da.
5.2. Aurreraeragina.
Langileen Estatutuaren 86.3 artikuluan ezarritakoaren ondorioetarako, hitzarmen kolektiboaren aurreraeragina gehienez ere lau urteko eperako ezartzen da. Kontuan izanik hitzartutako indarraldia 2016ko abenduaren 31ra artekoa dela, aurreraeraginak 2020ko abenduaren 31ra arte iraunen du. Ordurako beste hitzarmen bat adosten ez bada, honako honek behin betiko galduko du indarra.
6. Ordainsariak. Soldata egitura.
6.1. Konpentsazioa eta irenspena.
Langileen Estatutuaren 26. artikuluan ezarritakoarekin bat, hitzarmen honetan ezartzen diren ordainsariak konpentsatu eta irensten ahalko dira goragoko lerruna eta eremua dituen legezko edo hitzarmenezko beste xedapen batek ezartzen dituenekin, betiere benetan ordaintzen diren ordainsari ekonomikoak, orokorrean harturik eta urte osokoak kontaturik, onuragarriagoak baldin badira langileentzat.
6.2. Soldaten egitura.
Soldaten egiturak honako hauek bilduko ditu: kategoria bakoitzeko oinarrizko soldata, denbora edo lan unitate bakoitzeko ordainsari finkoa izanen baita, eta, horrez gainera, kasuan-kasuan bidezko diren soldata-osagarriak, hurrengo artikuluetan zehazten direnak.
Era berean, ordainsari aldakor bat ezarri da 2015. eta 2016. urteetarako.
Langileen Estatutuaren 26.4 artikuluan xedatutakoari jarraikiz, hitzarmen honetan ezarrita dauden ordainsari guztiak gordinak dira. Ohartarazi beharra dago, halaber, soldaten taulen eranskinean ageri diren zenbateko guztiak lanaldi osoari dagozkiola.
6.2.1. Oinarrizko soldata.
Kategoria bakoitzean oinarrizko soldata gisa hilero kobratu beharreko zenbatekoak, 2013. eta 2014. urteetarako, hitzarmen honen soldaten taulen eranskinean agertzen dira. Zenbateko horien barrenean haragi-industrien hitzarmen kolektibo nazionaletik datozen kontzeptu zahar batzuk jaso eta sartu dira, oinarrizko soldata eta produktibitatearen ordezko plusa, hain zuzen.
Soldaten taulen eranskinean agertzen diren balioak 2012ko abenduaren 31n indarra zuten balioei hitzarmen honetan ezarritako soldata-igoerak aplikatzearen emaitza dira.
6.2.2. Hitzarmenaren osagarria.
Hitzarmen honen aplikazio eremuan dauden langile guztiek “Hitzarmenaren osagarria” izeneko soldata-osagarria jasoko dute. Osagarri horren barrenean sartu dira garai bateko “Itunaren osagarria” izenekoaren kontura kobratzen ziren balioak, haren ordezkoa baita. Hitzarmen osagarri horren hileko zenbatekoak, 2013. eta 2014. urteetarako, hitzarmen honen soldaten taulen eranskinean agertzen dira.
Soldaten taulen eranskinean agertzen diren balioak 2012ko abenduaren 31n indarra zuten balioei hitzarmen honetan ezarritako soldata-igoerak aplikatzearen emaitza dira.
Azalpen gisa, adierazten da soldata-osagarri honek garai bateko “Itunaren osagarria” ordezten duela, baina izena besterik ez dela aldatzen, haren izaerari, edukiari eta egiturari eusten baitie.
Kontuan harturik hitzarmen hau 2014. urtean sinatu zela eta, horrenbestez, 2013. urteko diru zenbatekoak eta 2014ko zati batekoak “Itunaren osagarria” izenpean jaso zirela, ezartzen da izendapen horrekin aldi horietan jasotako diru kopuruak oraingo “Hitzarmenaren osagarriari” dagozkiola; hortaz, langile bakar batek ere ezin du inolako kopururik erreklamatu kontzeptu horien kontura.
6.2.3. Lanpostuaren osagarria.
Lanpostuaren osagarri berezi bat ezartzen da enpresa honetako lanpostu jakin batzuetan aritzeak berarekin dakarren ardura eta/edo prestasun berezia ordaintzeko (arduradunak eta igorpenen 2. mailako ofiziala). Lanpostu horiek zeintzuk diren eta 2013. eta 2014. urteetan hilero kobratuko dituzten zenbatekoak hitzarmen honen soldaten taulen eranskinean zehazten dira.
Soldaten taulen eranskinean agertzen diren balioak 2012ko abenduaren 31n indarra zuten balioei hitzarmen honetan ezarritako soldata-igoerak aplikatzearen emaitza dira.
6.2.4. “Ad personam” osagarriak.
Izendapen generiko horren barrenean sartzen dira enpresako zenbait langilek, aipatutakoez gainera, bakarka jasotzen dituzten soldata-kontzeptu guztiak.
Horien artean “Antzinatasun finkatua” izenekoa dago, haragi-industrien hitzarmen kolektibo nazionaletik kendu den antzinatasun sistematik datorrena, eta, halaber, zenbait langileri bakarka ezarritako beste edozein kontzeptu.
“Antzinatasun finkatuaren osagarria” ezin da ez konpentsatu, ez irentsi, hitzarmen honetan etorkizunean ezartzen diren soldata igoerekin, eta, hala, urtez urte igoko da oinarrizko soldatari aplikatzen zaion ehuneko berean. Aplikatzen diren gainerako osagarri pertsonalei dagokienez, kasuan-kasuan ezarritakoari jarraikiko zaio, hala konpentsazioari edo irenspenari buruz, nola urteko igoerari buruz.
6.2.5. Malgutasuna. Prestasun plusa.
Bezeroarentzako zerbitzuaren arloko eskakizunak gero eta zorrotzagoak direnez eta berehalako erantzuna behar izaten dutenez, alderdiak akordio honetara iritsi dira:
a) Embutidos Goikoa S.A.ko langileak, enpresak eskatuz gero, behartuak egonen dira egutegian ezarrita duten lanaldiaren banaketa aldatzera, eta, horrenbestez, hasiera bateko lan egutegian laneguntzat hartzen ez diren orduetan edo egunetan lan egitera.
Malgutasun hori 32 ordurainokoa izanen da langile bakoitzeko eta urte natural oso bakoitzeko.
b) Enpresako Zuzendaritzak, berak eta beste inork erabakita, zehaztuko du zein unetan aldatu behar duten langileek lanaldia, eta zein langilek eta zein egunetan eta ordutan lan egin behar duten ere berak finkatuko du.
Enpresak aste bat lehenago abisatu beharko die ukitutako langileei, salbu eta gertatzen diren inguruabarrak direla-eta aurreabisurako epe hori betetzerik ez dagoenean.
c) Enpresak ordu-poltsa hori noiz erabili zehazteko daukan ahalmenak muga hauek baizik ez ditu izanen:
1.–Zangozako festak bitartean, egutegiaren arabera lanegun ez direnetan langile bakoitzari gehienez 8 orduz lan egitea eskatzen ahalko zaio, salbu eta borondatez gehiago egitea onartzen baldin badu.
2.–Arau orokor gisa, udako oporraldian zehar langileei ezin izanen zaie lan egiteko eskatu.
d) Lan egiten diren malgutasun orduak konpentsatzeari dagokionez, enpresak finkatuko du noiz hartuko den dagokien atseden denbora, baliokidea izanen baita, hau da: ordu bakoitzeko ordu bat.
Erabiltzen diren malgutasun orduen konpentsazioari begira, irizpide hauek ezarri dira:
–Konpentsazioa arestian aipatutako irizpideari jarraikiz eginen da (ordu bakoitzeko ordu bat), atsedenaldia emanez, salbu eta enpresak eta langileak berariaz erabakitzen badute eskudirutan konpentsatzea. Kasu horretan, horrela konpentsatuko dira, lehen aipatutako irizpide berbera erabiliz (ordu bakoitzeko ordu bat).
–Ahal dela, konpentsazio denbora egun osotan edo zatikitan hartuko da, salbu eta enpresaren erabakiz egindako malgutasun orduak egin badira langileak aurretik eskatu eta hartutako orduen konpentsazio gisa.
Konpentsazio denbora horretaz gainera, edo, kasua bada, aipatutako konpentsazio ekonomikoaz gainera, ordu poltsa hori erabiltzearen ondoriozko malgutasunaren ordain gisa, ukitutako langile bakoitzari prestasun plus bat ordainduko zaio. Plus horren zenbateko gordina 2013. eta 2014. urteetarako, soldaten taulen eranskinean ageri da.
e) Sistema hori aplikatuz enpresak langile bati deitzen badio egun jakin batean lan egiteko eta, aldi baterako ezintasun egoeran egoteagatik edo beste arrazoi bategatik, ezinezkoa baldin badu, enpresak berriz deitzen ahalko dio lanordu horiek beste egun batzuetan egin ditzan.
f) Urte naturala bukatuta, langile bakoitzak poltsan urte natural osorako dituen 32 orduak osorik erabili ez badira, erabili ez diren orduak ezin izanen dira hurrengo urteko poltsan sartu.
6.2.6. Aparteko eskersariak.
Aparteko bi eskersari ezarri dira enpresako langile guztientzat: udakoa eta Eguberrietakoa. Haietariko bakoitzaren zenbatekoa, osorik kobratzeko eskubiderik izanez gero, hilabeteko oinarrizko soldata adinakoa izanen da, gehi hitzarmenaren osagarria eta prestasun osagarria, baita lanpostuaren osagarria eta osagarri pertsonalak ere, horrelakorik izanez gero.
Aparteko paga horiek urtean urteko ekainaren 30ean eta abenduaren 22an ordainduko dira, ordainketa-egun horietan indarra duten zenbatekoen arabera.
Udako eta Eguberrietako eskersarien sorrarazpen aldia seihileko naturala izanen da bi kasuetan; ordainketari, kontaketari edo lanean hasteagatik, enpresa uzteagatik edo likidazioagatik egin beharreko hainbanaketari begira, urtarrilaren 1etik ekainaren 30era bitarteko tartea hartuko da kontuan lehen pagarako, eta uztailaren 1etik abenduaren 31 bitartekoa bigarrenerako.
6.2.7. Oporretako ordainsaria.
Oporretako ordainsaria, oso-osorik sorrarazi baldin bada, honenbestekoa izanen da: oinarrizko soldata gehi hitzarmenaren osagarria eta prestasun osagarria, baita lanpostuaren osagarria eta osagarri pertsonalak ere, horrelakorik izanez gero.
Oporretako ordainsariaren sorrarazpen aldia urte naturala izanen da; ordainketari, kontaketari edo lanean hasteagatik, enpresa uzteagatik edo likidazioagatik egin beharreko hainbanaketari begira, urtarrilaren 1etik abenduaren 31ra bitarteko tartea hartuko da kontuan.
6.3. 2013., 2014., 2015. eta 2016. urteetarako soldata igoera.
6.3.1. 2013. urtea.
2012ko abenduaren 31n indarra zuten ordainsariak mantenduko dira.
6.3.2. 2014. urtea.
2013ko abenduaren 31n indarra zuten ordainsariak mantenduko dira.
6.3.3. 2015. urtea.
2015eko urtarrilaren 1etik aurrerako ondorioekin, 2014ko abenduaren 31n indarra zuten ordainsariak %1 igoko dira.
6.3.4. 2016. urtea.
2016ko urtarrilaren 1etik aurrerako ondorioekin, 2015eko abenduaren 31n indarra zuten ordainsariak %1 igoko dira.
6.4. Ordainsari aldagarriak.
2015. eta 2016. urteetarako, ordainsari aldagarrien sistema hau ezarri da:
6.4.1. 2015. urtea. 2015. urtea bukatuta, enpresak lortzen duen EBITDA positiboa %6,5etik gorakoa bada, enpresak 300 euro gordineko paga bat ordainduko die lanbide kategoria guztietako langileei. Paga hori ez da finkagarria izanen.
2015. urtea bukatuta, enpresak lortzen duen EBITDA positiboa %7,5etik gorakoa bada, adierazitako zenbatekoari 200 euro gordin erantsiko zaizkio, eta paga 500 euro gordinekoa izanen da. Horrela, enpresak %7,5etik gorako EBITDA positiboa lortuta ere, langile bakoitzak ordainsari aldagarri gisa jaso dezakeen zenbatekorik handiena horixe izanen da, 500 euro, eta kopuru hori ezin izanen da inola ere gainditu.
Ordainsari aldagarri gisa jasotzen diren kopuruak ez dira inola ere finkatuko, eta ez dute eskuratutako eskubiderik sorraraziko, ez eta baldintza hoberik ere.
Ordainsari aldagarri gisa ezarritako kopuruak, sorrarazi baldin badira, ordainketa bakarrean pagatuko dira 2016. urtean, Bazkideen Batzar Orokorrak enpresaren urteko kontuak onetsi eta hurrengo hilabetean.
6.4.2. 2016. urtea.
2016. urtea bukatuta, enpresak lortzen duen EBITDA positiboa %6,5etik gorakoa bada, enpresak 300 euro gordineko paga bat ordainduko die lanbide kategoria guztietako langileei. Paga hori ez da finkagarria izanen.
2016. urtea bukatuta, enpresak lortzen duen EBITDA positiboa %7,5etik gorakoa bada, adierazitako zenbatekoari 200 euro gordin erantsiko zaizkio, eta paga 500 euro gordinekoa izanen da. Horrela, enpresak %7,5etik gorako EBITDA positiboa lortuta ere, langile bakoitzak ordainsari aldagarri gisa jaso dezakeen zenbatekorik handiena horixe izanen da, 500 euro, eta kopuru hori ezin izanen da inola ere gainditu.
Ordainsari aldagarri gisa jasotzen diren kopuruak ez dira inola ere finkatuko, eta ez dute eskuratutako eskubiderik sorraraziko, ez eta baldintza hoberik ere.
Ordainsari aldagarri gisa ezarritako kopuruak, sorrarazi baldin badira, ordainketa bakarrean pagatuko dira 2017. urtean, Bazkideen Batzar Orokorrak enpresaren urteko kontuak onetsi eta hurrengo hilabetean.
7. Produktibitatea hobetzea.
Bi alderdiek onartzen dute itundu duten soldata-igoerak ahalegin ekonomiko bat egitea dakarrela, izan ere, horren ondorioz enpresan ezarriko diren ordainsari mailak haragi-industrien hitzarmen kolektibo nazionalean ezarritakoak (enpresarentzat erreferentea dena) baino nabarmen altuagoak izanen dira, eta onartzen dute, orobat, etorkizunean hobekuntza horiei eusteak berarekin dakarrela, ordainean, langileek etengabeko ahalegin bat egin beharra produktibitatea hobetzeko. Horregatik, honako konpromiso hau hartu dute:
“Embutidos Goikoa S.A.ko plantilla, bere legezko ordezkarien bitartez, berariaz konprometitzen da enpresa honen produktibitate indizeak hobetzen laguntzera eta horri begira proposatzen diren neurri guztiak arduraz eta fede onez betetzera, Langileen Estatutuaren 5.e) artikuluan jasotako lan arloko oinarrizko eginbeharra den aldetik”.
8. Lanaldia.
8.1. Urteko lanaldia. Enpresako urteko lanaldia, benetan lan egindako ordutan neurtua, 1.740 ordukoa izanen da hitzarmenaren indarraldi osoan (2013-2016). Urteko lanaldi hori, hala badagokio, hitzarmenaren aurreraeragineko aldian ere mantenduko da.
Lan denbora kontatzeko, langileak, hala eguneroko lanaldiaren hasieran nola bukaeran, lanpostuan egon behar du.
8.2. Soberako egunak.
8.2.1. Kontzeptua. Hitzarmen honen ondorioetarako, soberako egunak dira, lanaldi zibilaren (urte naturala) eta aplikatzen den urteko lanaldiaren arteko egokitzapen beharrak direla-eta, langileak enpresan zerbitzurik eman gabe gertatzen diren lanegunak.
8.2.2. Soberako egunak aukeratzea. Hitzarmenaren indarraldiko urteetan, 2014tik aurrera, soberako egunen erdiak langileak aukeratuko ditu, eta beste erdia enpresak. Soberako egunen kopurua bakoitia bada, alderdiek, hots, langileak eta enpresak, txandaka aukeratuko dute gelditzen den eguna; hortaz, urte batean enpresak aukeratuko du, eta hurrengoan langileak.
Egoera hori gertatzen den lehenbiziko urtean, gelditzen den eguna enpresak aukeratuko du.
8.2.3. Aurreabisua. Soberako egunak noiz hartuko diren gutxienez zazpi egun natural lehenagotik abisatu beharko da, enpresak aukeratu beharrekoa izan ala langileak aukeratu beharrekoa.
8.2.4. Epea. Antolaketa arrazoiengatik, erabaki da langile guztiek kasuan kasuko urteko irailaren 30a baino lehen jakinarazi behar diotela enpresari noiz hartuko dituzten soberako egun guztiak. Langileek soberako egunen bat edo denak noiz hartuko dituzten jakinarazi ezean, enpresak finkatuko du.
8.2.5. Mugapenak. Antolaketa arrazoiengatik, langileek soberako egunak aldi berean hartzeko mugapen batzuk ezarri dira kopuru aldetik lan arlo batzuetan:
–Fabrikazioa: langile bat txanda bakoitzeko.
–Egosiak: langile bat egun bakoitzeko.
–Administrazioa: langile bat egun bakoitzeko.
–Igorpenak: langile bat egun bakoitzeko.
–Xerratze saila: langile bat txanda bakoitzeko.
–Paketatze saila: langile bat egun bakoitzeko.
Egun edo txanda berean eskatzaileen kopurua adierazitakoa baino handiagoa bada, lehenbizi eskatu duen langileak izanen du lehentasuna.
9. Prestakuntzan sartzen diren langile berriak.
Prestakuntzan sartzen diren langile berritzat jotzen dira Embutidos Goikoa S.A.rentzat lehenbiziko aldiz zerbitzua ematen duten langile guztiak, izan ere, sartu berriak direnez, esleitu zaien lanpostuari dagozkion lanak egiten badituzte ere, oraindik ez dute lortu lanak akabera eta errendimendu maila egokiarekin bukatzeko behar den gaikuntza; langile horiek, gainera, ez dute oraindik behar bezala ezagutzen enpresaren antolaketa sistema, ez eta kalitatea bermatzeko sistemak, laneko arriskuei aurrea hartzekoak, eta abar.
Langile horiek sei hilabetez egonen dira prestakuntzan, jarraian edo aldizka, zein den ere erabiltzen den kontratazio mota eta kontratu kopurua.
Prestakuntza bitartean ez dute hitzarmenaren osagarria kobratuko.
Artikulu honetan aurreikusitakoaren ondorioetarako, aldi baterako enpresa baten bitartez, langileak lagatzeko kontratuen bidez, enpresa honetan emandako zerbitzuak prestakuntza denbora gisa kontatuko dira.
Era berean, aldizka egindako prestakuntza aldiak konputatzeari begira, eskatzen diren sei hilabete natural horietako bakoitza benetan lan egindako 22 eguni dagokio.
10. Eritasun arruntaren edo lanaz kanpoko istripuaren ondoriozko baja.
Hitzarmen hau sinatzen denetik aurrera, eritasun arruntaren edo lanaz kanpoko istripuaren ondorioz urte berean gertatzen diren bigarren eta hirugarren bajetan, enpresak kontzeptu kotizagarrien %75era arte osatuko du soldata, hamaikagarren egunetik hogeigarrenera arte.
Horrez gainera, baja egunetan, kontingentziaren izaerari edo jatorriari begiratu gabe, enpresak “Malgutasun plusa” osatuko du, plus horren zenbatekoaren %100eraino.
Laneko istripuen kasuetan, enpresak lehenbiziko egunetik osatuko ditu kontzeptu kotizagarri guztiak, %100eraino.
11. Oporrak.
Oporrak enpresak eta langileek adosturik finkatuko dira, urte bakoitzeko urtarrilaren 31n beranduenik.
Aurrekoa alde batera utzita, langileei dagozkien 30 opor egunetatik bi egun izanen dituzte “norberaren aferetarako”, langile bakoitzak libreki aukeratuko dituenak, enpresari gutxienez zazpi egun lehenagotik abisatuta, baina horrek ez du ekarriko berarekin opor egunen kopurua handitzea edo hitzarmen honetan ezarritako benetako lanaldia murriztea.
Hortaz, ezarritako mugaren barrenean langileek norberaren aferetarako erabiltzen dituzten opor egunak 30 opor egunen multzotik deskontatuko dira, eta egun horiek noiz hartu enpresak eta langileek adosturik erabakiko da.
12. Aldi baterako ezintasun egoerak oporrak bitartean.
Langilearen oporraldiak bat egiten badu haurdunaldiaren edo erditzearen ondoriozko edo bularra emateko aldi baterako ezintasun egoera batekin edo Langileen Estatutuaren 48.4 eta 48.4.bis artikuluan ezarritako lan kontratua eteteko aldiarekin, langileak eskubidea izanen du opor egunak aldi baterako ezintasuna edo dagokion baimena bukatutakoan edo kontratuaren etenaldia bukatutakoan hartzeko, dagokion urte naturala bukatu bada ere.
Oporraldi batean aurreko paragrafoan aipatu ez den arrazoi batengatik aldi baterako ezintasuna gertatuz gero, eta horren ondorioz langileak oporrak dagozkion urte naturalean hartzerik ez badu, osorik edo partez, ezintasuna bukatu ondoren hartzen ahalko ditu, betiere oporrak sorrarazi dituen urtea amaitu zenetik 18 hilabete baino gehiago igaro ez badira.
Aurreko paragrafoetan ezarritako eskubideak zehazteko asmoz, irizpide hauek ezarri dira:
1.–Behin langile baten opor egunak finkatu ondoren, finkatutako oporrak edo oporraldietako bat hasteko egunean langile hori aldi baterako ezintasun egoeran baldin badago, oporraldia ez da kontatzen hasiko harik eta alta medikoa hartu arte.
2.–Langileak alta medikoa hartzen badu hasiera batean adierazitako oporraldi osoa bukatu ondoren, langileak eskubidea izanen du beste oporraldi bat finkatzeko, opor egun guztiak adinakoa edo, kasua bada, dagokion aldian sartutako opor egunak adinakoa.
3.–Langileak alta medikoa hartzen badu hasiera batean adierazitako oporraldia hasia delarik, alta medikoa ematen dioten egunean hasiko da kontatzen oporraldia, eta hasiera batean ezarritako oporraldia bukatu arte falta diren egunak kontatuko dira.
4.–Langileak eskubidea izanen du opor egunak berriz finkatzeko, oporraldiko egun guztiak hartuz edo, bestela, dagokion aldian sartutakoak edo aldi baterako ezintasun egoeraren ondorioz hartu gabe gelditzen zaizkionak. Langileen Estatutuaren 38.3 artikuluko bigarren paragrafoan ezarritako kasuez aparteko kontingentzia kasuetan, opor egunak berriz finkatzeko eskubide hori onartuko da urte naturala bukatu ondoren ere, oporrei dagokien urtea bukatzen denetik hurrengo hemezortzi hilabeteko epean (hau da, honako hauek ez diren kontingentzia kasuetan: haurdunaldia, erditzea, edoskitze naturala eta Langileen Estatutuaren 48.4 eta 48.bis artikuluan kontratua eteteko aurreikusitako kasuak).
5.–Opor egunak berriz finkatzeko, enpresaren eta langilearen arteko adostasuna beharko da, eta, betiere, oporrak hartzeko egun baliodunei buruz enpresak ezarritako mugak aplikatuko dira.
6.–Desadostasun kasuetan, enpresak zehaztuko du noiz hartu egunak, kontuan harturik, betiere, produkzio eta zerbitzu beharrak eta bezeroari arreta eman beharra.
13. Errelebo kontratua.
Enpresak langileen erretiro partziala errazteko politikak sustatuko ditu, errelebo kontratuak formalizatuz langileak indarreko lege xedapenen arabera egoera horretara iristeko aukera ematen duen adina betetzen duenetik aurrera, betiere kasu bakoitzeko inguruabar partikularrak aztertuta eta unean-unean indarra duen eta aplikatzekoa den legerian arlo horren gainean ezarritakoari jarraikiz.
14. Aldi baterako laneko enpresak.
Langileak lagatzeko kontratu baten bidez enpresan lanean ari diren aldi baterako enpresetako langileak gehienez sei hilabetez aritzen ahal dira lan modalitate horretan.
15. Lizentziak eta baimenak.
Ondoren aipatzen diren kasuetan eta aurretik idatziz eskatuz gero, langileek eskubidea izanen dute aipatzen den denboraz lanera ez joateko, dagokien ordainsaria kobratuta:
a) Langileen ezkontza: hamabost egun natural.
b) Seme/alaba baten jaiotza: bost egun.
c) Ezkontidearen edo seme/alaba baten heriotza: bost egun.
d) Aitaren edo amaren heriotza: hiru egun.
e) Ezkontidearen edo seme-alaben eritasun larriagatik edo ospitaleratzeagatik, edo langilearen nahiz ezkontidearen biloben, aiton-amonen edo anai-arreben eritasun larriagatik, ospitaleratzeagatik edo heriotzagatik: bi egun. Langileak bere bizilekutik kanpora joan beharra izanez gero, epe horiei joan-etorria egiteko behar den denbora gehituko zaie, eta, hala, gehienez lau egunera bitarteko lizentzia izanen da (joan-etorria eta egonaldia) e) atalean ezarritako kasuetarako, eta bost egunera bitartekoa d) atalean ezarritako kasurako.
e) atal honetan ezarritako lizentzia hartzeko egunak zehazteari dagokionez, zera ezartzen da:
–Eritasun larrietan eta ospitaleratze kasuetan, lizentzia egunak prozesu eragileak iraun bitarte hartzen ahalko dira, eta ez prozesua bukatutakoan.
–Lizentzia zein egun zehatzetan hartuko den, langileak eta enpresak adostuko dute, ahalik eta aurrerapen handienarekin, eta lizentzia eragiten duen prozesua luzea izanen dela aurreikusiz gero, prozesu horren hasieran.
f) Gurasoen, seme-alaben eta anai-arreben (odolkideen nahiz ezkontza bidezkoen) ezkontza: egun bat.
g) Ohiko bizilekua aldatzeagatik: egun natural bat.
h) Publikoa edo pribatua den eginbehar saihestezina betetzeko: behar-beharrezkoa den denbora.
i) Odol edo ezkontza bidezko 2. mailara arteko ahaideen ebakuntza kirurgikoa, ospitaleratu beharra izan gabe etxean atseden hartzea agintzen bada: 2 egun. Arrazoi horregatik langilea bidaia egin beharrean bada, epea lau egunekoa izanen da.
Aurreko ataletan ezarritako lizentzien ondorioetarako, senar-emazteen balio berekoak izanen dira, ondorio guztietarako, izatezko bikoteak, dagozkion erregistro publikoetan egindako inskripzioaren bidez izaera hori egiaztatzen badute.
16. Batzorde Paritarioa.
Itundutakoa zehatz-mehatz betetzen dela begiratzeko eta sortzen diren aferak lehen auzialdian interpretatu eta aplikatzeko, Batzorde misto paritario bat eratuko da, langileen ordezkari batek eta enpresako zuzendaritzaren ordezkari batek osatua; zuzendaritzaren izenean, Alberto Jimenez Mutiloa jauna arituko da, eta langileen legezko ordezkari gisa, Ignacio Pérez Vazquez jauna. Haiei dagokie hitzarmena negoziatzea eta sinatzea.
1.–Batzorde Paritarioaren eginkizunak:
a) Haren esku jartzen diren gatazka indibidual eta kolektiboetan bitartekari, arbitraje eta adiskidetze-lana egitea.
b) Akordio guztien interpretazio lanak egitea.
c) Akordio guztien jarraipen lanak egitea.
d) Langileen Estatutuak edo beste arau batzuek ezartzen dizkiotenak.
2.–Funtzionamenduko erregelamendua:
a) Bilerak. Batzorde Paritarioa bilduko da esku hartzeko eskatzen zaionean.
b) Deialdiak. Batzorde paritarioa biltzeko deia alderdi sinatzaileetako edozeinek eginen du, eta horretarako aski izanen da idatzizko komunikazio bat, eguneko gai zerrenda azalduko duena.
Batzorde Paritarioa bilduko da gaiaren garrantziaren arabera komeni den epearen barnean, baina deialdia egin eta hamabost eguneko epean gehienez.
Epe horretan Batzordea biltzen ez bada, Batzorde Paritarioaren esku-hartzea amaitu dela ulertuko da eta interesdunak bidezko iruditzen zaizkion ekintzetara jotzen ahalko du.
Batzordea bildurik, erabakiak hartuko ditu gai zerrendako gaien inguruan, bilkuran bidezko akordioak hartuz. Egokitzat hartzen bada, bilkura bertan behera geldi edo eten daiteke eta hurrengo hiru egun naturaleko epean jarraituko du. Epe horretan gai zerrendako gai guztiak jorratu ez badira eta haien gainean erabakirik hartu ez bada, ulertuko da Batzorde Paritarioaren esku-hartzea agorturik dagoela, eta interesdunak bidezko jotzen dituen ekintzetara jotzen ahalko du.
c) Quoruma. Aholkulariak. Batzordea behar bezala eratu dela ulertuko da bi ordezkariak bertaratzen direnean.
Alderdiak bileretara joaten ahal dira bina aholkulari eramanda, gehienez.
d) Akordioen baliozkotasuna. Batzordeak erabakiak hartzeko, bi kideen aldeko botoa beharko da.
Bilera bakoitzaren akta eginen da eta bertaratzen diren kide guztiek sinatuko dute.
e) Helbidea. Batzorde Paritarioak enpresaren lokaletan izanen du jakinarazpen eta deialdietarako helbidea, hau da, Zangozako industrialdean (Nafarroa).
17. Hitzarmena ez aplikatzeko klausula.
Arrazoi ekonomikoak, teknikoak, antolaketakoak edo produkziokoak tartean direla, enpresak eta hitzarmen kolektiboa negoziatzeko legitimazioa duten langileen ordezkariek, 87.1 artikuluan aurreikusitakoari jarraikiz, hala adosten badute, bidezkoa izanen da, Langileen Estatutuaren 41.4 artikuluan ezarritako moduan kontsulta aldi bat ireki ondoren, hitzarmen kolektibo honetan gai hauen gainean aurreikusitako lan baldintzak enpresan ez aplikatzea:
a) Lanaldia.
b) Ordutegia eta lan denboraren banaketa.
c) Txandakako lan araubidea.
d) Ordainketa sistema eta soldataren zenbatekoa.
e) Laneko eta errendimenduko sistema.
f) Langileen Estatutuaren 39. artikuluan mugigarritasun funtzionalerako aurreikusten diren mugak gainditzen dituzten eginkizunak.
g) Gizarte Segurantzaren babesaren borondatezko hobekuntzak.
Kontsultaldia akordioa lortuta bukatzen bada, ulertuko da hitzarmena ez aplikatzeko arrazoiak gertatzen direla, eta akordio hori lan arloko jurisdikzioan iruzurragatik, doloagatik, hertsapenagatik edo eskubideaz abusatzeagatik baizik ezin izanen da aurkaratu.
Hitzarmena ez aplikatzeko akordioak zehatz azaldu beharko ditu enpresan aplikatzekoak diren lan baldintza berriak eta haien iraupena. Azken hau ezingo da luzatu enpresan hitzarmen berri bat aplikatzekoa den unetik aurrera.
Kontsultaldian alderdien arteko adostasunik lortzen ez bada, auzia Nafarroako Lan Auzitegira eramanen da nahitaez, bitartekari lana egin dezan.
Bitartekaritza tramitean akordio batera iristen badira, akordio horrek kontsultaldian lortutakoak bezalako balioa eta eraginkortasuna izanen ditu.
Nafarroako Lan Auzitegiaren aurreko bitartekaritza tramitea akordiorik gabe bukatzen bada, alderdiak Nafarroako Lan Auzitegiaren arbitraje prozedura baten menpe jarriko dira nahitaez. Prozedura hori epaitegi horren barne araudian arbitraje kasuetarako ezarritakoari jarraikiz gauzatuko da.
Kasu horretan, arbitroaren edo arbitraje-elkargoaren erabakiak kontsultaldian lortzen diren erabakien balio eta eraginkortasun bera izanen ditu, eta haren kontra jotzen ahalko da, bakarrik, Langileen Estatutuaren 91. artikuluan ezarritako kasuetan oinarrituta eta hango prozedurari jarraikiz.
Aurreko paragrafoetan aipatzen diren prozeduren emaitza baldin bada lan baldintzak ez aplikatzea, lan arloko agintaritzari horren berri eman beharko zaio, gordailua egin dezan, besterik ez.
18. Araubide subsidiarioa.
Hitzarmen honetan aurreikusi ez diren kasuetan, Haragi-industrien Sektorerako hitzarmen kolektibo nazionalean ezarritakoa aplikatuko da.
Iragarkiaren kodea: F1600592
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
