1. NAFARROAKO FORU KOMUNITATEA
1.1. XEDAPEN OROKORRAK
1.1.1. Foru legeak eta legegintzako foru dekretuak
2/2016 FORU LEGEA, urtarrilaren 29koa, Nafarroako Ondareari buruzko apirilaren 4ko 14/2007 Foru Legea aldatzen duena.
NAFARROAKO GOBERNUKO LEHENDAKARIA NAIZEN HONEK.
Aditzera ematen dut Nafarroako Parlamentuak onetsi duela honako:
FORU LEGEA, NAFARROAKO ONDAREARI BURUZKO APIRILAREN 4KO 14/2007 FORU LEGEA ALDATZEN DUENA.
ZIOEN AZALPENA
Foru lege honek Nafarroako Ondareari buruzko apirilaren 4ko 14/2007 Foru Legea aldatzen du, eta, horretarako, Nafarroako Parlamentuko kideen gehiengo osoak onets dezala eskatzen da, hala ezartzen baita Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoko 20.2 eta 45.6 artikuluetan eta Nafarroako Parlamentuaren Erregelamenduaren 152. artikuluan.
Artikulu bakarrak 14/2007 Foru Legeko bigarren xedapen gehigarria aldatzen du, eta etxebizitzen arloan eskumena duen departamentuari esleitzen dizkio foru lege horretan ondarearen arloko eskumena duen departamentuari esleitutako ahalmenak, Lurzoru Publikoaren Foru Bankuaren ondasun eta eskubideei dagokienez, bai eta Nafarroan Etxebizitza Izateko Eskubideari buruzko maiatzaren 10eko 10/2010 Foru Legea oinarri hartuta eskuraturiko etxebizitzak eskuratzeko, kudeatzeko eta besterentzeko ahalmenak ere.
Artikulu bakarra.–Nafarroako Ondareari buruzko apirilaren 4ko 14/2007 Foru Legearen aldaketa.
Bigarren xedapen gehigarria aldatzen da.–Honela gelditzen da idatzirik:
“Bigarren xedapen gehigarria.–Lurzoruaren eta etxebizitzen arloko berezitasunak.
1. Etxebizitzen arloan eskumena duen departamentuak bere gain hartuko ditu foru lege honetan ondare gaietan, Lurzoru Publikoaren Foru Bankuaren ondasun eta eskubideei dagokienez, eskumena duen departamentuari esleitutako ahalmenak.
2. Halaber, etxebizitzen arloan eskumena duen departamentuak izanen du ahalmena Nafarroan Etxebizitza Izateko Eskubideari buruzko maiatzaren 10eko 10/2010 Foru Legea oinarri hartuta eskuraturiko etxebizitzak eskuratzeko, kudeatzeko eta besterentzeko”.
Xedapen indargabetzaile bakarra.–Arau-indargabetzea.
Indarrik gabe gelditzen dira foru lege honetan xedatutakoari aurka egiten dioten maila bereko edo apalagoko xedapen guztiak.
Azken xedapenetan lehenengoa.–Arau-garapena
Nafarroako Gobernuari ahalmena ematen zaio behar adina xedapen eman ditzan foru lege honetan ezarritakoa garatu eta betearazteko.
Azken xedapenetako bigarrena.–Indarra hartzea.
Foru lege honek Nafarroako Aldizkari Ofizialean argitara eman eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta “Estatuko Aldizkari Ofizialera” igor dadila agintzen dut eta herritar eta agintariei bete eta betearaz dezatela manatzen diet.
Iruñean, 2016ko urtarrilaren 29an.–Nafarroako Gobernuko lehendakaria, Uxue Barkos Berruezo.
Iragarkiaren kodea: F1601540
