1. NAFARROAKO FORU KOMUNITATEA
1.7. BESTELAKOAK
157/2016 EBAZPENA, urtarrilaren 27koa, Nafarroako Unibertsitate Publikoko errektoreak emana. Haren bidez “Gobernu Kontseiluaren Erabakia, Nafarroako Unibertsitate Publikoaren Hauteskunde Arautegia aldatzen duena” argitaratzeko agintzen da. 2016ko urtarrilaren 27ko Gobernu Kontseiluak hartutako erabaki baten bidez onetsi zen.
Maiatzaren 12ko 110/2003 Foru Dekretuak onetsitako Unibertsitateko Estatutuen 40. artikuluak ematen dizkidan eskumenak erabiliz, Gobernu Kontseiluak 2016ko urtarrilaren 27an onetsi zuen erabakia argitaratzeko agintzen dut. Erabaki horren bidez “Nafarroako Unibertsitate Publikoaren Hauteskunde Arautegia aldatzeko Erabakia” onetsi zen.
GOBERNU KONTSEILUAREN ERABAKIA, NAFARROAKO UNIBERTSITATE PUBLIKOAREN HAUTESKUNDE ARAUTEGIA ALDATZEA ONESTEN DUENA
Nafarroako Unibertsitate Publikoaren Gobernu Kontseiluak, 2011ko azaroaren 16ko erabaki baten bidez onetsi zuen Unibertsitateko Hauteskunde Arautegia (Arautegia Nafarroako Unibertsitate Publikoko errektorearen azaroaren 16ko 1741/2011 ebazpenaz argitaratu zen 2011ko 230. Nafarroako Aldizkari Ofizialean, azaroaren 21ean).
2011ko Hauteskunde Arautegiak Nafarroako Unibertsitate Publikoaren Estatutuen 2011ko berrikuntzak bere barnean bildu zituen, eta bidea eman du Nafarroako Unibertsitate Publikoaren hauteskunde prozesu guztiak legearen barnean egiteko.
Hauteskunde prozesu hauek garatu diren bitartean, Nafarroako Unibertsitate Publikoan egiten diren hauteskunde prozesu guztien jarraipena egiteko eta kontrolatzeko organo ahalmenduna baita, Hauteskunde Batzorde Nagusiak atzeman du hauteskunde organoetan eta prozesuetan parte hartzen duten unibertsitate komunitateko talde batzuek Hauteskunde Arautegiak ezartzen dizkien betebeharrekin bateraezinak diren inguruabarrak eta egoerak dituztela.
Inguruabar eta egoera horiek Nafarroako Unibertsitate Publikoaren Hauteskunde Arautegiak ezartzen duenarekin bateragarriak izan daitezen, Hauteskunde Batzorde Nagusiko buruak proposatu du Arautegi honetako 4.4, 10. eta 16.3 artikuluak aldatzea.
Hori horrela, eta kontuan harturik Nafarroako Unibertsitate Publikoaren Estatutuetako 49.4 artikuluak ezartzen duela “Gobernu Kontseiluari dagokiola aurreko idatz-zatiek aipatzen dituzten hautaketa prozesuetan aginduko duen Hauteskunde Arautegia onestea “ hau da Gobernu Kontseiluak, 2016ko urtarrilaren 27an egindako bileran, eta kideen eztabaida eta gero, hartu duen
ERABAKIA:
Lehena.–Onestea, erabaki honi erantsi zaion Eranskinean ezartzen den moduan, Nafarroako Unibertsitate Publikoaren Hauteskunde Arautegian honako hauek aldatzea: 4. artikuluaren 4. idatz-zatia, 10. artikulua eta 16. artikuluaren 3. idatz-zatia.
Bigarrena.–Erabaki hau Nafarroako Aldizkari Ofizialean argitaratzeko agindua ematea.
Hirugarrena.–Erabaki honek Nafarroako Aldizkari Ofizialean argitara eman, eta biharamunean hartuko du indarra.
Iruñean, 2016ko urtarrilaren 27an.–Errektorea, Alfonso Carlosena.
ERANSKINA
Unibertsitate Publikoaren Hauteskunde Arautegian honako hauek aldatu dira: 4. artikuluaren 4. idatz-zatia, 10. artikulua eta 16. artikuluaren 3. idatz-zatia. eta honela idatzirik gelditu dira:
4. artikulua, 4. idatz-zatia.
2. idatz.zatian b), c) d) eta e) letrek aipatzen dituzten Hauteskunde Batzorde Nagusiko kideak, baita hirugarren idatz-zatian aipatzen den ordezkaria ere, zozketa publikoaren bidez izendatuko dira. Zozketa hori Hauteskunde Batzorde Nagusiko buruak egingo du Gobernu Kontseiluaren Batzorde Iraunkorraren aurrean. Hauteskunde Batzorde Nagusian ordezkaritza izateko eskubidea duen arlo bakoitzeko kide titular bat eta ordezko bat izendatuko dira.
2. idatz.zatian b), c) eta e) letrek aipatzen dituzten Hauteskunde Batzorde Nagusiko ordezkariak izendatzeko zozketan zerbitzuak arduraldi osoan ematen dituzten langileak sartuko dira.
10. artikulua.
1. Organo eskudunak hauteskundeen deialdia onetsi eta gero, honek berehala emango dio deialdiaren berri Hauteskunde Batzorde Nagusiari, baita Tokiko Hauteskunde Batzorde eskudunari ere.
2. Hauteskundeetarako deialdiak hauek edukiko ditu, gutxienez:
a) Hauteskundeak zer organori edo batzorderi dagozkien.
b) Hautatu beharreko ordezkari-kopurua, kasu bakoitzean.
c) Hauteskunde egutegia, bozketak zer egunetan, tokitan eta ordutan egingo diren zehaztuko duena.
d) Hauteskunde Batzorde eskuduna zein den.
3. Hauteskundeak Klaustroa, errektorea, saileko dekanoak edo zuzendariak hautatzeko baldin badira, bozketa egunean dagokion hauteskunde prozesuan hautesle diren ikasleek ez dute egin behar azterketa, proba edo ariketa praktiko derrigorrezkorik, eta irakasle arduradunak edo ikastegiek horretarako behar diren aldaketak egin beharko dituzte.
Halaber, prozesu hauetan hauteskunde mahaietako kide izendatzen dituzten ikasleek ez dute egin beharko Nafarroako Unibertsitate Publikoko ikaslea izateari loturiko edozein irakaskuntza jarduera, edo, hala badagokio, jarduera hori beste egun batean egiteko eskubidea edukiko dute.
4. Hauteskundeen deialdiak egiten dituen organoak jendaurrean jarriko ditu, behar diren iragarki-oholetan, eta Unibertsitatearen web-orrialdean, hala badagokio.
Hauteskunde Batzorde eskudunak jendaurrean jarriko ditu prozesuaren beste gainerako ekintza guztiak, eta Unibertsitatearen web-orriadean, hala badagokio, hauteskunde egutegian aurreikusten denarekin bat etorriz.
16. artikulua, 3. idatz-zatia.
Mahaiburuak eta bi mahaikidek osatuko dute hauteskunde mahai bakoitza. Dagokion arloko kideen arteko zozketa batez izendatuko dira. Mahaiburuak eta mahaikideek beren lehen eta bigarren ordezkoak edukiko dituzte, gutxienez, haiek ere zozketaren bidez izendatuak.
Irakasle eta Ikertzaileen Arloko eta Administrazio eta Zerbitzuetako Langileen arloko hauteskunde mahaietako kideak eta ordezkoak izendatzeko zozketan, dagokion arlo bakoitzean zerbitzuak arduraldi osoan ematen dituztenak baizik ez dira sartuko.
Hautesle aldarrikatu dituztenak, batzordeetako buruak eta eremu orokorreko gobernu-organo pertsona bakarrekoak eta hauteskunde batzorde eskudunaren kide titularrak ez dira zozketan sartuko.
Aurreko idatz-zatian aurreikusten dena gertatzen bada, arlo, azpiarlo eta talde guztiek edukiko dute ordezkaritza hauteskunde mahaian.
Iragarkiaren kodea: F1601138