Iragarkia

246. ALDIZKARIA - 2016ko abenduaren 23a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

107/2016 FORU DEKRETUA, azaroaren 23koa, “Badina Escudera” izeneko Batasunaren Garrantzizko Lekua (BGL) Kontserbazio Bereziko Eremu izendatzen duena eta “Badina Escudera” izeneko Kontserbazio Bereziko Eremuaren eta EN-13 Natur Lekunearen Kudeaketa Plana onesten duena.

ZIOEN AZALPENA

Badina Escudera izeneko gunea Nafarroako hegoaldean dago, Alesbesko udal mugapean. Gune horretan badira Nafarroako aniztasun biologikoaren adierazgarri diren zenbait habitat natural eta basa flora eta fauna; horietako batzuk galzorian daude beren banaketa naturaleko eremuan, edo banaketa naturaleko azalera murritza daukate, bai atzera egiten ari direlako bai berez dutelako eremu murritza. Horregatik, eremu batzuk hautatu behar dira, non bermatuko baita habitat natural eta basa espezie horiek epe luzean iraunen dutela, kudeaketa aktibo eta prebentiborako sistema eraginkor eta eragingarrien bidez.

Habitat natural edo espezie horietako batzuk sarturik daude Kontseiluak 1992ko maiatzaren 21ean emandako Habitat naturalak eta basa fauna eta flora kontserbatzeari buruzko 92/43/EEE Zuzentarauan, edo Basa hegaztiak kontserbatzeari buruzko Europako Parlamentuaren eta Kontseiluaren azaroaren 30eko 2009/147/EE Zuzentarauan. Horrenbestez, balio handia dute ez bakarrik Foru Komunitatean, baita Europar Batasunean ere. Bi zuzentarau horiek dira Europar Batasunak naturaren kontserbazioaren arloan duen tresna nagusia. Horretarako, lekuen sare ekologiko bat sortu zen, Natura 2000 Sarea, non Batasunaren interesekotzat hartu diren basa florako eta faunako espezie eta habitat natural guztien adierazgarriak lehengoratu edo egoki kontserbatu behar baitira.

92/43/EEE Zuzentaraua abenduaren 7ko 1997/1995 Errege Dekretuaren bidez sartu zen Espainiako ordenamendu juridikoan.

Zuzentarauak irizpide zientifiko batzuk eta egutegi bat ezarri zituen Natura 2000 Sarea eratzeko. 4. artikuluaren arabera, Europar Batasuneko estatuek lekuen zerrenda bat proposatu behar diote Batzordeari, eta adierazi behar dituzte leku bakoitzean dauden habitat natural motak eta Batasunaren intereseko espezieak.

Nafarroako Foru Komunitateko Administrazioak, Gobernuak 2000ko maiatzaren 15ean hartutako Erabakiaren bidez, Kontserbazio Bereziko Eremu izendatzen ahal diren lekuen zerrenda behin-behinekoz onetsi zuen, gero Natura 2000 Europako sare ekologikoan sar zitezen. Horien artean, “Badina Escudera” izeneko ES2200039 gunea dago.

Batasunaren Garrantzizko Leku gisa onetsirik, Europar Batasuneko estatuak ahalik eta lasterren deklaratu behar du Kontserbazio Bereziko Eremu, gehienez ere sei urteko epean. Horretarako, kudeaketa plan baten bidez, behar diren kontserbazio neurriak ezarri behar dira, Batasunaren Garrantzizko Leku izatearen arrazoi diren habitat naturalak eta espezieen populazioak kontserbazio egoera onean mantentzeko, edo egoera hori berrezartzeko.

2006ko uztailaren 19ko 2006/613/EE Erabakiaren bidez, Europako Batzordeak eskualde biogeografiko mediterraneoaren barreneko Batasunaren Garrantzizko Lekuen zerrenda onetsi zuen. Horrenbestez, Europako zuzentaraua aplikatzearen ondorioetarako, kontserbazio bereziko eremu izendatuko dira leku horiek.

Badina Escudera gunerako Kudeaketa Plana Europar Batasuneko araudiaren betebeharrekin bat prestatu da, eta, hortaz, bertan jaso dira leku horretan dauden habitat eta taxonen eskakizun ekologikoei dagozkien ekintza, neurri eta jarraibideak, aipatutako 92/43/EEE Zuzentarauan biltzen direnak.

Martxoaren 16ko 72/1989 Foru Dekretuaren bidez, Nafarroako lurraldeko zenbait naturgune natur lekune deklaratu ziren, besteak beste, Badina Escudera gunea (EN-8).

Nafarroako Naturguneei buruzko ekainaren 17ko 9/1996 Foru Legearen arabera, natur lekuneen erabilera eta kudeaketa kasuan kasuko plan zuzentzaileetan xedatzen denaren araberakoak izanen dira. Badina Escudera natur lekuneak (EN-8), gaur den egunean, ez du erabilera eta kudeaketarako plan zuzentzailerik.

Horiek horrela, Landa Garapeneko, Ingurumeneko eta Toki Administrazioko kontseilariak proposaturik, eta Nafarroako Gobernuak 2016ko azaroaren 23ko bilkuran hartutako Erabakiarekin bat,

DEKRETATU DUT:

1. artikulua. Xedea.

Foru dekretu honen xedea hauxe da:

1. ES2200039 Batasunaren Garrantzizko Lekua, “Badina Escudera” izenekoa, Kontserbazio Bereziko Eremu izendatzea.

2. Badina Escudera izeneko ES2200039 Kontserbazio Bereziko Eremua eta Badina Escudera natur lekunea (EN-8) kudeatzeko plana onestea. Foru dekretu honi erantsi zaio.

2. artikulua. Planaren aplikazio eremua eta lurralde mugaketa.

Badina Escudera izeneko gunea Alesbesko udal mugapean dago, eta 157,99 hektareako azalera dauka.

Foru dekretu honek onetsitako planaren aplikazio eremuaren mugaketa ofiziala planean berean jaso den kartografiak ezarri du.

3. artikulua. Zuzendaritza Batzordea.

1. Zuzendaritza Batzorde bat sortzen da “Badina Escudera” gunearen kontserbazioa kudeatzeko kontsultarako eta partaidetzarako organoa izateko asmoz. Alesbesko Udalaren ordezkariek eta Nafarroako Foru Komunitateko Administrazioaren ordezkariek osatuko dute.

2. Zuzendaritza Batzordeak eginkizun hauek izanen ditu:

a) Kudeaketa planean jasotako neurriak bete daitezela sustatzea. Aurreikusitako egutegia betetzen saiatuko da eta planaren neurriak aplikatzeko ahalmena duten eskualdeko eragile guztien lankidetza eta koordinazioa bultzatuko du.

b) Planaren lan-programa dauden aukeretara egokitzea, Planaren neurriak ahalik eta errazen eta modurik eraginkorrenean aplikatzen direla errazteko.

c) Proposamenak egitea Planean ezarritako ekintzak eraginkorragoak izan daitezen, aurreikusitako helburuak betetzeari begira.

d) Foru Komunitateko Administrazioari jakinaraztea Kudeaketa Planaren garapena baldintza dezaketen ekintzak edo mehatxuak.

e) Planaren betetze-maila aldian behin ebaluatzea, eta entitate, administrazio eta organo eskudunei eskatzea neurriak garatzeko behar diren konpromisoak bete ditzatela.

f) Natur baliabideen azterketa eta ikerketa bultzatzea, baita gizarteak baliabide horiek ezagut ditzala eta haiekin goza dadila ere, betiere haien balioekiko errespetua eta ingurumen hezkuntza sustatuz.

XEDAPEN GEHIGARRIAK

Lehenbiziko xedapen gehigarria.–Landa Garapeneko, Ingurumeneko eta Toki Administrazioko kontseilaria gaitzea.

Landa Garapeneko, Ingurumeneko eta Toki Administrazioko kontseilariari ahalmena ematen zaio behar diren tramiteak egin ditzan foru dekretu hau eta, bidezkoa bada, plana aplikatzeko behar den kostu ekonomikoaren kalkuluak Europar Batzordeari igortzeko, Habitat naturalak eta basa fauna eta flora kontserbatzeari buruzko maiatzaren 21eko Kontseiluaren 92/43/EEE Zuzentarauaren 8. artikuluan aurreikusitako ondorioetarako.

Bigarren xedapen gehigarria.–Lotutako araudia.

Badina Escudera natur lekuneari dagokionez (EN-8), guztiz “Badina Escudera” lekuan sartutako espazioa baita, bete beharko da Nafarroako Naturguneei buruzko ekainaren 17ko 9/1996 Foru Legean eta Nafarroako lurraldeko zenbait naturagune natur lekune deklaratzen dituen martxoaren 16ko 72/1989 Foru Dekretuan eta gainerako garapen araudian ezarritakoa.

AZKEN XEDAPENAK

Azken xedapenetako lehena.–Kudeaketa Planaren indarraldia.

1. Hauxe da foru dekretu honen bidez onesten den Kudeaketa Planaren indarraldia:

a) Mugagabea, funtsezko elementuei, azken helburuei, arauei eta jarraibideei dagokienez.

b) 10 urtekoa, espero diren emaitzei eta jarduketei (neurriak) dagokienez. Epe hori bukatutakoan, plana berraztertuko da.

2. Hala ere, Landa Garapeneko, Ingurumeneko eta Toki Administrazioko Departamentuak uste baldin badu planean aurreikusirik ez zegoen funtsezko gorabeheraren bat gertatu dela, gunearen balioen zainketan eragina izan dezakeena, plana berraztertzen edo aldatzen ahalko da.

3. Kudeaketa Plana ukitzen ahal duen edozein aldaketa edo berrikuspen foru dekretu bidez onetsi beharko da.

Azken xedapenetako bigarrena.–Beste plan batzuekiko erlazioa.

1. Foru dekretu honek onesten duen plana bat etorriko da aniztasun biologikoaren kontserbazioari buruz ezartzen diren maila goragoko planekin, eta, zehazki, Nafarroako Naturgune Babestuen Sarean jarduteko ildo orokorrak finkatzeko onesten direnekin.

2. Dena dela, Nafarroako Naturguneei buruzko ekainaren 17ko 9/1996 Foru Legearen 7. artikuluan xedatutakoaren arabera, kudeaketa plan honetako zehaztapenak zuzenean aplikatu beharrekoak dira, eta tokiko entitateen hirigintzako udal planeamenduan sartuko dira, planeamendua egitean edo berraztertzen denean. Hori horrela, oraingo lurralde antolamendurako edo antolamendu fisikorako tresnak, kudeaketa plan honen aurkakoak badira, egokitu beharko dira, lehenbizikoz aldatzen edo berrikusten direnean.

Azken xedapenetako hirugarrena.–Garatzeko gaikuntza.

Landa Garapeneko, Ingurumeneko eta Toki Administrazioko kontseilariari ahalmena ematen zaio foru dekretu hau garatzeko eta betearazteko behar diren xedapen guztiak eman ditzan.

Azken xedapenetako laugarrena.–Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2016ko azaroaren 23an.–Nafarroako Gobernuko lehendakaria, Uxue Barkos Berruezo.–Landa Garapeneko, Ingurumeneko eta Toki Administrazioko kontseilaria, Isabel Elizalde Arretxea.

ERANSKINA

Badina Escudera izeneko ES2200039 Kontserbazio Bereziko Eremua eta Badina Escudera natur lekunea (EN-8) kudeatzeko plana

INDIZEA

I.–Planaren helburua.

II.–Kontserbatu beharreko balio naturalak.

III.–Planaren azken helburuak.

IV.–Planaren aplikazioaren ondorioz espero diren emaitzak.

V.–Araudia.

VI.–Kudeaketarako jarraibide edo orientazioak.

VII.–Jarduketak.

VIII.–Kudeaketa planaren finantzaketa.

IX.–Mugak.

X.–Jarraipen-programa.

XI.–Mugaketa-mapa eta barnean dauden entitateak.

XII.–Kontserbazioaren xede diren objektuen eta ezarritako arauen, jarraibideen eta neurrien arteko egokitasuna.

I.–Planaren helburua.

Plan honen helburua da behar diren neurri aktiboak eta prebentzio neurriak ezartzea hurrengo atalean adieraziko diren habitat naturalak, espezieak, prozesu ekologikoak eta osagai natural eta kulturalak kontserbazio egoera onean mantentzeko edo egoera onera berriz ekartzeko (kasua zein den).

Kudeaketa plan honen arabera hartzen diren neurrien azken helburua da gunearen osotasun ekologikoa bermatzea eta Nafarroako Natura 2000 Sareari koherentzia ematen laguntzea.Kontserbazio Bereziko Eremua ukitzen ahal duen beste edozein plan, programa edo proiektuk bat etorri beharko du helburu horrekin.

Hala ere, plan honen bidez hartzen diren neurriek eta haren ondoriozkoek kontuan hartuko dituzte betebehar ekonomiko, sozial eta kulturalak, eta, ahal den neurrian, saiatuko dira bateragarri egiten gaur egungo erabilera eta aprobetxamenduak eta gizartearen eskari berriek ekar ditzaketenak, hala nola, aisialdia, ingurumen hezkuntza edo ikerkuntza. Era berean, eremu hau babesteko arrazoi diren balioak galtzea ekar dezaketen eraldaketak saihestuko dira.

II.–Kontserbatu beharreko balio naturalak.

Lekuan uretako landareriaren ale bikainak daude, presentzia murriztua badute ere, eta karofizeren larreek tapiz oso bat osatzen dute. Haien gainean, Ruppia maritima, Zannichellia pedunculata, Potamogeton pectinatus edo ur-dilistak espezieen komunitateak agertzen dira txandaka.

Lezkadiak dira eremu horretako habitat nagusiak eta Bolboschoenetum maritimi espeziearen komunitatearekin nahasten dira zati txiki batzuetan. Cynodon dactylon-aren sailak ere ageri dira, Elymus campestris-en belardiekin batera. Ale gutxiagorekin, lezka bilduko lezkadiak agertzen dira (Molinion-Holschoenion-en belar altuko euntze heze mediterraneoak).

Toki gutxitan bada ere, badaude habitat halofiloak, non 13 landare komunitate identifikatu baitira, Europar Batasuneko intereseko 6 habitatetan sailkatuak. Milazka halofiloak nabarmentzen dira (ibai-ertzeko zuhaixka eta galeria termomediterraneoak), azalera txikia okupatzen badute ere kontserbazio egoera onean baitaude.

Faunari dagokionez, urari lotutako hegaztiek ematen diote lekuari kontserbazio baliorik handiena. Espezie habiagileen artean ardeidak daude: koartza hauskara (Ardea purpurea), koartza gorria (Ardea purupurea) eta amiltxori txikia (Ixobrychus minutus). Hainbat anatida eta erralido ugaltzaile daude, baina, haien artean, ahate gorrizta (Netta rufina) eta uroilanda txikia (Porzana pusilla) nabarmentzen dira. Limikola habiagileen artean, honako hauek daude: kuliska txikia (Actitis hypoleucus), txirritxo txikia (Charadrius dubius), zankaluze arrunta (Himantopus himantopus) eta bernagorri arrunta (Tringa totanus). Nabari diren beste habiagile batzuk dira zingira-mirotza (Circus aeruginosus) eta tximutxa (Panurus biarmicus).

Hezegune horrek interes handia du negua igarotzeko leku gisa eta eztei ondoko pasabide gisa hegazti migratzaile askorentzat. Honako hauek nabarmentzen dira neguko kontzentrazioengatik: koartzatxo itzaina (Bulbucus ibis), zingira-mirotza edo zingira-berdantza (Emberiza schoeniclus schoeniclus). Honako hauek dira intereseko beste hegazti batzuk pasagatik edo negua egiteagatik: udako zertzeta (Anas querquedula) papo-urdina (Luscinia svecica), ur-benarriza (Acrocephalus paludicola), benarriz nabarra (Locustella naevia), benarriz gorrizta (Locustella luscinioides), pitxartxar nabarra (Saxicola rubetra), buztangorri argia (Phoenicurus phoenicurus) edo dilindaria (Remiz pendulinus).

Ugaztunen artean, hona hemen espezierik nabarmenenak: igaraba arrunta (Lutra lutra) eta bisoi europarra (Mustela lutreola).

Anfibioei dagokienez, aipagarriak dira uhandre marmolairea (Triturus marmoratus), apo lasterkaria (Bufo calamita) eta txantxiku arrunta (Alytes obstetricans).

Narrastiei dagokienez, apoarmatu istilzalea (Emys orbicularis) da nabarmentzekoa, toki horretan Nafarroako kokalekurik onenetakoa baitu.

Jarraian, kontserbazioaren xede diren guneko objektu guztiei buruzko informazioa jasotzen da (habitat motak eta Batasunaren intereseko espezieak, Datuen Inprimaki Normalizatuan bilduak daudenak), taula moduan. Gainera, faunako eta florako beste espezie batzuk ere adierazten dira, inprimaki berean jasoak.

Kontserbazio Bereziko Eremu (KBE) honetan agertzen diren 92/43/EEE Zuzentarauko habitat motak, eta KBEaren ebaluazioa, horien arabera:

–2009/147/EE Zuzentarauaren 4. artikulua aplikatzekoa duten KBEko espezieak, 92/43/EEE Zuzentarauaren II. eranskinean agertzen direnak, eta BGLaren ebaluazioa, horien arabera:

–Faunako eta florako beste espezie batzuk:

Aurreko balioak kontuan hartuta, habitat batzuk eta KBE honetan dauden edo egon litezkeen flora eta faunako espezie batzuk hautatu dira, lurraldearen adierazgarri diren balio natural guztiak ordezkatzen dituztenak. Habitat eta espezie horiei “funtsezko elementu” esaten zaie. Izan ere, KBEaren kontserbazio “aktiboa” oinarritzeko ardatz gisa erabiltzen dira. Hori horrela, funtsezko elementu guzti-guztietarako proposatutako helburuetatik abiaturik, gaur egungo kontserbazio egoera baldintzatzen duten faktoreak aztertu ondoren, arau, kudeaketako jarraibide eta jarduketa batzuk proposatu dira, KBE osoaren balio naturalak mantentzeko eta hobetzeko aukera ematen dutenak.

Hona hemen KBEa kudeatzeko “funtsezko elementuak”:

1.–Hezegunearen dinamika hidrologikoa.

2.–Habitatak.

3.–Uretako hegaztiak.

4.–Apoarmatu istilzalea.

5.–Bisoi europarra eta igaraba arrunta.

Gainera, lan arlo hau zehaztu da:

A.–Erabilera publikoa.

III.–Planaren azken helburuak.

Kudeaketak, aurreko atalean aipatutako funtsezko elementu guztien kontserbazio egoera ona ahalik eta lasterren lortzeko, bilatu behar dituen xede edo helmugak dira azken helburuak.

1.–Hezegunearen dinamika hidrologikoa.

1.1. Azken helburua: Hezegunearen ezaugarri ekologikoak kontserbatzeko moduko erregimen hidrologikoa eta uraren kalitatea bermatzea.

2.–Habitatak.

2.1. Azken helburua: hezeguneari lotutako habitatak kontserbazio egoera onean egotea.

3.–Uretako hegaztiak.

3.1. Azken helburua: uretako hegaztien kontserbazio egoera ona bermatzea.

4.–Apoarmatu istilzalea.

4.1. Azken helburua: aparmatu istilzalearen kontserbazio egoera ona bermatzea.

5.–Bisoi europarra eta igaraba arrunta.

5.1. Azken helburua: bisoi europarraren eta igaraba arruntaren presentzia bermatzea.

A.–Erabilera publikoa.

A.1 Azken helburua: Lekuaren ezagutza eta balorizazioa hobetzea.

IV.–Planaren aplikazioaren ondorioz espero diren emaitzak.

Gerta liteke ezinezkoa izatea planaren azken helburuak edo helmugak lortzea haren indarraldiaren bitartean, arrazoi ekologiko, sozial edo ekonomikoengatik. Horregatik, indarraldi horretan planaren aplikazioaren ondorioz espero diren emaitzak zehazten dira. Emaitza horiek proposatu diren azken helburuak lortzen lagundu behar dute. Hona hemen, bada, espero diren emaitzak funtsezko elementuei eta azken helburuei emandako zenbakien arabera:

1.–Hezegunearen dinamika hidrologikoa.

1.1.1. Helburu operatiboa: funtzionamendu hidrologikoa hobetzea, hezegunearen balio naturalen kontserbazioa bermatzeko.

1.1.2. Helburu operatiboa: ahalik eta sedimentu eta kutsadura gutxien sartzea uretan.

2.–Habitatak.

2.1.1. Helburu operatiboa: intereseko habitatak kontserbatu eta hobetzea.

2.1.2. Helburu operatiboa: hezeguneko habitatei loturik dauden intereseko fauna espezie batzuk hobeki ezagutzea.

3.–Uretako hegaztiak.

3.1.1. Helburu operatiboa: uretako hegaztien populazioak nola eboluzionatu diren jakitea.

3.1.2. Helburu operatiboa: uretako hegaztiek hazteko eta negua pasatzeko dituzten habitatak lehengoratu eta hobetzea.

3.1.3. Helburu operatiboa: uretako hegaztien heriotza-tasa eta arrazoi natural eta ez-naturalek sortzen dizkieten eragozpenak gutxitzea.

4.–Apoarmatu istilzalea.

4.1.1. Helburu operatiboa: apoarmatu istilzalearen kontserbazio egoera zehaztu eta hobetzea.

5.–Bisoi europarra eta igaraba arrunta.

5.1.1. Helburu operatiboa: igaraba arruntaren presentziaren bilakaera ezagutzea.

5.1.2. Helburu operatiboa: bisoi europarraren populazioaren egoera eta osasun-egoera ezagutzea.

5.1.3. Helburu operatiboa: bisoi europarrerako eta igaraba arrunterako konektagarritasuna hobetzea BGLaren eta ingurunearen artean.

5.1.4. Helburu operatiboa: bisoi amerikarra edo fauna exotikoaren beste espezie batzuk ez sartzea lekuan.

A.–Erabilera publikoa.

A.1.1 Helburu operatiboa: lekuari buruzko informazio-txokoa hornitzea.

V.–Araudia.

–Araudi orokorra:

1. Oihan-zoruan egiteko aurreikusten den edozein jarduketa otsailaren 21eko 3/2007 Foru Legeak aldatutako Nafarroako Oihan Ondarea Babestu eta Garatzeari buruzko abenduaren 31ko 13/1990 Foru Legearen bidez arautuko da.

2. Ingurumena Babesteko Esku-hartzeari buruzko martxoaren 22ko 4/2005 Foru Legearen eta Ingurumen ebaluazioari buruzko abenduaren 9ko 21/2013 Legearen menpe egonen dira beren eranskinetako batean ageri diren titulartasun publiko nahiz pribatuko plan, programa, proiektu eta jarduerak, haiek sortu, abian jarri edo gauzatzearen ondorioz ingurumenaren baldintzak aldatzen ahal dituztenak, edo ingurumenari, pertsonen osasunari edo segurtasunari eta haien ondasunei kalteren bat eragiten ahal dietenak.

3. Ematen diren baimen guztietan bermatuko da Basa Fauna eta haren Habitatak Babestu eta Kudeatzeari buruzko martxoaren 5eko 2/1993 Foru Legean ezarritakoa betetzen dela eta ez direla ukitzen Batasunaren intereseko animalia eta landare espezieak, ez haien habitatak, ezta Kontserbazio Bereziko Eremua kontserbatzeko garrantzi handia duten paisaiako elementuak ere.

4. Ematen diren baimen guztietan Nafarroako Naturguneei buruzko ekainaren 17ko 9/1996 Foru Legea betetzen dela bermatuko da.

5. Ematen diren baimen guztietan bermatuko da honako arau hauetan ezarritakoa beteko dela: batetik, Natur Ondareari eta Biodibertsitateari buruzko abenduaren 13ko 42/2007 Legea, eta bestetik, otsailaren 4ko 139/2011 Errege Dekretua, babes bereziko araubidea duten basa espezieen zerrenda eta espezie mehatxatuen Espainiako katalogoa garatzekoa.

6. Urei buruzko Legearen testu bategina onetsi zuen uztailaren 20ko 1/2001 Legegintzako Errege Dekretuan ezarritakoa aplikatu beharko da, baita obra hidraulikoen arloko zerbitzuak Estatuko Administraziotik Nafarroako Foru Komunitatera eskualdatzeko azaroaren 18ko 1391/1988 Errege Dekretuan ezarritakoa ere. Halaber, aplikatzekoa izanen da Azaleko uren egoerari segimendua egin eta aztertzeko irizpideak eta ingurumen kalitateari buruzko arauak ezartzeko irailaren 11ko 817/2015 Errege Dekretuan eta Plan hidrologikoak, besteak beste Ebroko ur mugapearen Espainiako zatia, 2015etik 2021era bitarteko epean berrikustea onesten duen urtarrilaren 8ko 1/2016 Errege Dekretuan ezarritakoa.

7. Aplikatuko dira, orobat, Hondakinak hondakindegietan bilduz deuseztatzea arautzen duen martxoaren 28ko 23/2011 Foru Dekretua eta Hondakin eta Lurzoru Kutsatuei buruzko uztailaren 20ko 22/2011 Legea, baita martxoaren 28ko 23/2011 Foru Dekretua ere, Nafarroako Foru Komunitatearen lurralde eremuan eraikuntzako eta eraispenetako hondakinen produkzioa eta kudeaketa arautzen dituena.

–Berariazko araudia:

1. Hezegunean eginen den kudeaketa hidrologikoak habitaten eta espezien kontserbazioa bermatu beharko du, salbu eta tartean giza-osasunari eta segurtasun publikoari lotutako arrazoiak badaude.

2. Hezeguneko arroaren erregimen hidrologiko naturalari eragiten ahal dioten erabilera eta/edo proiektu berririk ez da baimenduko.

3. Modu iraunkorrean landu gabe dauden eremuetan ezin da ongarri likidoarekin ureztatu.

4. Debeku da ongarri likidoa gutxienez 50 metrora erabiltzea ur-masaren okupazio mailarik handienetik.

5. Hezeguneko habitatak ukitzen dituzten erabilera eta jarduketetan, habitat horien kontserbazioa bermatzeko behar diren baldintzak jaso beharko dira, salbu eta tartean osasun publikoari, segurtasun publikoari eta/edo lekuaren balioen kontserbazioari lotutako arrazoiak badaude.

6. Debekatua dago edonolako hondakinak botatzea horretarako egokitutako tokietatik kanpora. Ezin da inola ere hondakinik bota.

7. Debeku da beruna duen munizioa edukitzea eta erabiltzea ehizan eta kirol tiroan Natura 2000 Sarean sartutako hezeguneetan.

VI.–Kudeaketarako jarraibide edo orientazioak.

Kudeaketarako jarraibide edo orientazio hauek gomendio gisa hartu behar dira, eta, kontrakoa justifikatzen duen arrazoi oinarriturik ez badago, aplikatu beharko dira.

1. Hezegunean egiten den kudeaketa hidrologikoa egokitu beharko da aurrerantzean ezagutzaren arloan gertatzen diren hobekuntzetara eta habitaten eta espezieen bilakaerara.

2. Arroko ur baliabideen kantitatean eta kalitatean ahalik eta ukipen negatibo gutxien sortzen dituzten nekazaritza jardunbideak sustatuko dira.

3. Hezegunearen arro hidrografikoan Nafarroako Foru Komunitatearen Nekazaritzako Jardunbide Egokietarako Kodean lurzoruaren erabileraz eta ongarritzeaz jasotako gomendioak beteko dira. Kodea Nekazaritza, Abeltzaintza eta Elikadurako kontseilariaren 1997ko otsailaren 17ko Foru Aginduaren bidez onetsi zen.

4. Hezegunearen arroan, ongarri organiko likidoak honela aplikatuko dira, betiere ongarria zabaltzen den eremutik kanpo, ur-masatik 50 metrora:

–Banaketa lokalizaturako sistemak erabiliko dira, zintzilikako hodien arrapalaren modukoak, banaketa uniformea izateko eta aplikatutako dosia modu egokian doitzeko, lurrunduta ahalik eta nitrogeno gutxien galtzeko, eta lur azaleko ur isuriak sortzea galarazteko; horrekin batera, gehienez ere 250 OUren kopuruak onartzen dira nitrogeno/hektareako, urtean.

–Aplikazioan, gorde beharreko gutxieneko tarteak hartuko dira kontuan: 5 m bideetara, 10 m erreten eta hustubideetara. Hala ere, 3 eta 5 metrora murritz daitezke minden banaketa lokalizatuan lurperatze bat egiten bada, aplikatu eta 24 ordura, gehienez.

–Ez da aplikatuko eguraldia horretarako aproposa ez denean, lurra izozturik, elurrak estalirik eta urez gainezka dagoelarik. Banaketa horretarako, aplikatzeko garairik onena izanen da laborearen hazkunderik handienaren denboran edo laborea ezartzen denean.

5. Lekuan sartutako alorrak, ur-goraldietan urak hartzen dituenak, berreskuratzea sustatuko da, natura habitatak leheneratzeko.

6. Lehengoratzeko proiektuetan, landaketak egin behar baldin badira, hezeguneetako espezie autoktonoak erabiliko dira, edo inguruan dauden berezko landare espezie berberak, eta, ahal den neurrian, jatorri berekoak.

7. Lekuaren barrenean edo inguruan abeltzaintzaren jarduera erdi-estentsiboak edo estentsibo ez-ibiltariak ezartzeko, berariazko ingurumen ebaluazioa beharko da Badinako balio naturalen gainean izanen duen eraginari buruz.

8. Ehiza Antolatzeko Planetan, natur lekunearen azalera ehiza aterpetzat joko da uretako hegaztientzat.

9. Uretako hegaztiei egiten zaizkien eragozpengatik, basurdeen eta azerien ehizaldiak irailetik urtarrilera bitarte egin behar dira.

10. Hezegunearen barruan edo bere eraginpeko eremuan obra edo jarduketa bat egin behar bada, hezeguneari lotutako hegaztien ugalketa eta negute garai kritikoetatik kanpo eginen da.

11. Apoarmatu exotikorik aurkituz gero, segimendua eta kontrola egiteko eta erauzteko protokolo bat jarriko da martxan.

12. Bisoi amerikarrik (Neovison vison), mapatxerik (Procyon sp.) edo fauna exotiko inbaditzailearen beste espezieetako animaliarik aurkituz gero, segimendua eta kontrola egiteko eta erauzteko neurriak jarriko dira martxan.

13. Nafarroan arrantza erregulatzen duen araudian, Badina Escudera natur lekunean debekaturik egonen da arrainak eta karramarroak harrapatzea.

VII.–Jarduketak.

Plan honek indarra duen eperako, jarduketa hauek ezarri dira:

1.–Hezegunearen dinamika hidrologikoari lotutako neurriak.

1.1. Kontrol eta segimendu hidrologikoa ezartzea eta abian jartzea, honakoak aurreikusita:

–Lur azpiko uren gorabeherei, ur mailei eta sarrera-emarien eta irteera-emarien gaineko informazioa biltzeko mekanismoak ezartzea.

–Urtean zehar hauen jarraipena egitea: lur azpiko uren gorabeherak, azaleko ur-laminaren mailak eta sarrera eta irteeren bolumen neurketak.

1.2. Hezegunearen jasotze topografiko zehatza egitea.

1.3. Azterlan bat egitea, uholdearen gehieneko eta gutxieneko mailak zehaztuko dituena, baita urtean zehar baltsen mailak nola aldatzen diren ere, lekuaren balio naturalak kontserbatu eta/edo lehengoratuko direla bermatzeko.

1.4. Sedimentazio tasak aldizka kontrolatzea eta neurri zuzentzaileak proposatzea.

1.5. Azaleko uren kalitate fisiko-kimikoa eta biologikoa aldizka monitorizatzea, eta neurri zuzentzaileak proposatzea.

1.6. Algen komunitateari buruzko azterlana egitea, uren eutrofizazio maila identifikatzeko.

1.7. Ebroko Ur Konfederazioari jakinarazpen bat egitea Badina Escudera sartzeko Ebro arroko ur-masen inbentarioan.

2.–Habitatei lotutako neurriak.

2.1. Interes handiena duten habitaten kasuan, aldizkako jarraipen programa bat ezartzea eta kontserbaziorako neurriak proposatzea.

2.2. Alternatibak kontuan hartzen dituen azterlan bat egitea, egun Europar Batasunaren intereseko habitatak dituzten alorren kudeaketa bateragarria izan dadin haien kontserbazioarekin.

3.–Faunari lotutako neurriak.

3.1. Anfibioak monitorizatzeko programa bat martxan jartzea.

3.2. Odonatuen laginketak egitea bost urtean behin.

3.3. Negua igaro eta habia egiten duten uretako hegaztiak kontrolatzeko Nafarroako Gobernuak aldizka egiten dituen zentsuekin jarraitzea.

3.4. Nafarroako Gobernuak aldizka zingira-berdantzei buruz egiten dituen laginketak mantentzea.

3.5. Badina de Escuderako eraztunketa estazioaren jarduera mantentzea.

3.6. Lezkadiak har ditzakeen uretako hegaztien kopuruari buruzko azterlan bat, presioei eta mehatxuei buruzko azterketa bat eta kudeaketarako gomendioak egitea.

3.7. Uretako hegaztientzako habitata hobetzeko proiektua egitea.

3.8. Basurdea eta azeria kontrolatzeko aldizkako kanpainak egitea Badina Escuderan.

3.9. Behar diren linea elektrikoak zuzentzea, hegaztiek haien aurka jo edo elektrokutatzeko arriskua baldin badago.

3.10. Apoarmatu istilzalearen zentsu oso bat egitea lekuan, animalien populazioa kalkulatzeko eta ezaugarritzeko.

3.11. Apoarmatu istilzalearen populazioa lekuan aldizka monitorizatzeko protokolo bat ezarri eta martxan jartzea.

3.12. Lekuan apoarmatu istilzalea markatzeko eta segimendua egiteko azterlan bat egitea, habitataren hautaketa eta kontserbazio egoera zehaztu ahal izateko eta kudeaketarako gomendioak emateko.

3.13. Aukerak aztertzea eta neurri zuzentzaileak hartzea apoarmatu istilzalearen hilkortasun tasa murrizteko lotura hodietan eta ponpa putzuetan.

3.14. Igaraba arruntak kontrolatzeko, Nafarroako Gobernuak bost urtean behin egin ohi dituen laginketak mantentzea, lekuan estazioak sartuz.

3.15. Lekuan bisoi europarraren zentsua egitea, eta, horrekin batera, behar diren osasun-laginak hartzea.

3.16. Proiektu bat prestatu eta gauzatzea lekuan eta bere ingurunean loturak hobetzeko eta igaraba arruntaren eta bisoi europarraren hilkortasun tasa autoek harrapatuta murrizteko.

4.–Erabilera publikoari lotutako neurriak.

4.1. Panelak paratzea lekuaren balio naturalei buruzko informazioarekin.

4.2. Lekuan hegaztiak behatzeko egungo eskaria aztertzea, jakiteko noraino den beharrezkoa behatoki bat paratzea.

VIII.–Kudeaketa planaren finantzaketa.

Landa Garapeneko, Ingurumeneko eta Toki Administrazioko Departamentuak honako hauek hartuko ditu bere gain:

–Gunearen kontserbazio egoera ona bermatzen duten mantentze eta lehengoratze proiektuak gauzatzeko behar diren diru-zenbatekoak.

–Ekipamenduak eta kudeaketaren egitura mantentzeko behar diren diru-zenbatekoak.

–Erabilerak eta jarduerak mugatzearen ondoriozko kalte-ordainak ordaintzeko behar diren kontu-sailak.

–Plana gauzatzeko eta haren helburuak lortzeko behar diren bestelako kontu-sailak.

Hori guztia ordainduko da horretarako kreditu egokia baldin badago. Beraz, behar diren konpromisoak hartuko dira unean-unean aurrekontuan dagoen diruaren arabera.

Nafarroako Gobernuko departamentuek beren politika sektorialak ingurumenean integratzeko sustatzen dituzten jarduketek, baita toki entitateek sustatzen dituzten ekintzek eta ekarpen pribatuekin edo Europar Batasunaren ekarpenekin egiten direnek ere, laguntzen ahal dute plan hau garatzen.

KBEa ongi kontserbatzen laguntzen duten jarduketek Landa Garapeneko, Ingurumeneko eta Toki Administrazioko Departamentuaren finantzaketa osoa izan dezakete, betiere diru-laguntzen arloko araudiak ezartzen duen esparruaren barrenean. Inguruko herriguneen garapen sozioekonomikoa sustatzeko asmoz, departamentu honen menpeko beste edozein laguntzatan, ahal denean, lehentasuna emanen zaie, guneen kontserbazioarekin bateragarriak izanik, Kontserbazio Bereziko Eremu honen barnean proposatzen diren jarduketei. Gainera, laguntzaren portzentajea handiagoa izanen da, eremu horretatik kanpo edo beste edozein naturgunetatik kanpo proposatzen diren beste jarduketa batzuekin alderatuta. Halaber, Landa Garapeneko, Ingurumeneko eta Toki Administrazioko Departamentua aurrekontuetatik kanpoko funtsak aplikatzen saiatuko da, baldin haien helburua plan honetan aurreikusitako ekintzetako baten bat garatzea bada.

IX.–Mugak.

Nafarroako Naturguneei buruzko ekainaren 17ko 9/96 Foru Legearen 28. artikuluan xedatu bezala ordainduko dira erabilerak eta jarduerak mugatzearen ondoriozko kalte-ordainak. Hala ere, bestelako ordainak ere hitzartzen ahalko dira, hala nola laguntzak, diru-laguntzak, zerbitzuak ematea edo bestelako sustapenak.

X.–Jarraipen programa.

Jarraipena egiteko programa bat ezartzen da, plana ongi gauzatzen dela eta haren helburuak lortzen direla bermatzeko. Programa horrek objektiboki egiaztatzen ahal den adierazle bat izanen du, gutxienez, helburu bakoitzerako.

Urtero, programa horren emaitzen eta, oro har, planaren gauzatze-mailaren berri emanen zaio Zuzendaritza Batzordeari.

Lortutako emaitzei erreparatuta, ikusten bada espero ziren emaitzen aldean desbiderapena gertatu dela edo aurreikusten zen epean ezin direla lortu, kudeaketaren eragingarritasuna eta eraginkortasuna hobetzeko behar diren neurri guztiak eransten ahalko zaizkio planari.

XI.–Mugaketa-mapa eta barnean dauden entitateak.

Deskargatu mapa(PDFa).

XII.–Kontserbazioaren xede diren objektuen eta ezarritako arauen, jarraibideen eta neurrien arteko egokitasuna.

Atal honetan, KBEa kudeatzeko funtsezko elementuen definizioak, planaren azken helburuak, planaren aplikaziotik espero diren emaitzak (helburu operatiboak) eta aurreikusitako jarduketak (neurriak) jaso dira, taula moduan, leku honetan kontserbazioaren xede den elementu bakoitzarentzat.

Taulan agertzen diren siglek hau esan nahi dute:

FE.: funtsezko elementua.

AH: azken helburua.

HO: helburu operatiboa.

N: araua.

D: jarraibidea.

M: neurria.