Iragarkia

24. ALDIZKARIA - 2016ko otsailaren 5a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

199/2015 EBAZPENA, abenduaren 31koa, Hezkuntzako zuzendari nagusiak emana, urteko bigarren ordainketa, bigarren seihilekoari dagokiona, baimentzen duena, udalen musika eskolei diru-laguntzak emateko deialdian aurreikusi bezala. Deialdi hori apirilaren 9ko 124/2015 Ebazpenaren bidez onetsi zen 2015erako eta uztailaren 23ko 370/2015 Ebazpenaren bidez ebatzi.

2015eko azaroaren 30ean amaitu zen epea diru-laguntzaren onuradunek musika eskolen diru-sarrera eta gastuen aurrekontua aurkezteko, 2015eko azaroaren 15ean hein batean exekutatua edo gauzatua, musika eskolaren entitate titularraren organo eskudunak onetsia. Apirilaren 9ko 124/2015 Ebazpenaren I. eranskineko 10.3 oinarrian jaso bezala, eskaera ez bada epearen barrenean aurkezten onuradunari diru-laguntzaren %1eko zigorra ezarriko zaio atzeratzen den egun bakoitzeko.

2015eko abuztuaren 31n argitaratu zen udalen musika eskolentzako 2015eko diru-laguntzetarako deialdia ebazten duen uztailaren 23ko 370/2015 Ebazpena. Apirilaren 9ko 124/2015 Ebazpenaren I. eranskineko 12. oinarrian ezarritako epearen barrenean, eskatutako informazioak edo aitorpenak jaso dira, zein den kasua eta musika eskola bakoitzeko titular mota.

Hezkuntza Zuzendaritza Nagusiko Arte Ikasketetarako eta Musikaren Hiria Kudeatzeko Ataleko buruak txosten bat aurkeztu du, musika eskolen 2015eko funtzionamenduaren gastu orokorrak zati batean pagatzeko ordaindu beharrekoak diren diru-laguntzei buruz.

Hezkuntza Departamentuaren egitura organikoa ezarri zuen abuztuaren 28ko 136/2015 Foru Dekretuaren bigarren xedapen gehigarriko bigarren puntuak ematen dizkidan ahalmenak erabiliz,

EBATZI DUT:

1. Diru-laguntzaren bigarren ordainketa agintzea, entitate titular bakoitzari dagokion zenbatekoaren arabera, ebazpen honen eranskinarekin bat. Zenbatekoa, guztira, 859.869,36 eurokoa da, 2015era luzatutako 2012ko aurrekontuetako “Musika Eskolendako diru-laguntza” izeneko 421004-42440-4609-322502 kontu-sailaren kargura (40004061 kontabilitate espedientea), apirilaren 9ko 124/2015 Ebazpenaren bidez 2015erako onetsitako eta uztailaren 23ko 370/2015 Ebazpenaren bidez ebatzitako deialdian ezarritako arauei jarraikiz.

2. Ebazpen hau eta eranskina Nafarroako Aldizkari Ofizialean argitara daitezela agintzea.

3. Ebazpen hau eta eranskina Ekonomia eta Ogasun Departamentuak Hezkuntzakoan duen kontu-hartzaile delegatuari, Hezkuntzako Ikuskapen Zerbitzuari, Baliabide Ekonomikoen Zerbitzuari, Hizkuntzen eta Arte Ikasketen Zerbitzuari, Ikastetxeen, Finantzaketaren eta Ikasketetarako Laguntzen Atalari, Arte Ikasketetarako eta Musikaren Hiria Kudeatzeko Atalari, Kudeaketa Ekonomikoaren Bulegoari eta interesdunei igortzea, behar diren ondorioak izan ditzaten.

4. Administrazioko ebazpen honen kontra administrazio publiko interesdunek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiaren Administrazioarekiko Auzien Salari zuzendua, ebazpena argitaratu eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egiteko aukera, Administrazioarekiko Auzien Jurisdikzioa arautzen duen ekainaren 13ko 29/1998 Legearen 44. artikuluan aurreikusitako moduan eta epeetan.

Iruñean, 2015eko abenduaren 31n.–Hezkuntzako zuzendari nagusia, Estebe Petrizan Iriarte.

ERANSKINA

Udalen musika eskoletarako diru-laguntzak 2015. urterako

Apirilaren 9ko 124/2015 Ebazpena, Hezkuntzaren, Lanbide Heziketaren eta Unibertsitateen zuzendari nagusiarena.

Uztailaren 23ko 370/2015 Ebazpena, Hezkuntzaren, Lanbide Heziketaren eta Unibertsitateen zuzendari nagusiarena.

Iragarkiaren kodea: F1600413