Iragarkia

228. ALDIZKARIA - 2016ko azaroaren 25a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

79/2016 FORU AGINDUA, azaroaren 9koa, Kultura, Kirol eta Gazteriako kontseilariak emana, Nafarroako kirol federazioei 2017an diru-laguntzak emateko oinarri arautzaileak onesten dituena.

Uztailaren 5eko 15/2001 Foru Legeak, Nafarroako Kirolari buruzkoak, 6.1 artikuluan ezartzen duenaren arabera, Foru Komunitateko kirol administrazioari dagokio, egun Nafarroako Kirolaren eta Gazteriaren Institutuaren bitartez, Nafarroako Gobernuaren kirol gaietako politika planifikatu eta betearaztea. 6.2.e) artikuluan adierazten da haren eskumenen artean dagoela Nafarroako kirol federazioak, esleitu zaizkien eginkizun publikoak betetzen ari direnean, koordinatu eta begiratzea, haien jarduera pribatua ezertan eragotzi gabe.

Aipatutako foru legeak, 33.a) artikuluan, zehazten du Foru Komunitateko kirol administrazioak diru-laguntzak ematen ahalko dizkiela Nafarroako kirol federazioei.

Espedienteko txosten tekniko eta juridikoek adierazten dute, hurrenez hurren, diru-laguntza hauek egokiak eta interes publikokoak direla, eta deialdia eta oinarri arautzaileak, legezkoak.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak eta Kultura, Kirol eta Gazteriako Departamentuaren egitura organikoa ezartzen duen irailaren 9ko 199/2015 Foru Dekretuak emandako eskudantziak erabiliz,

AGINDU DUT:

1. Nafarroako kirol federazioei 2017an (2016ko azarotik 2017ko urrira arte, biak barne) diru-laguntzak norgehiagokako araubidean emateko oinarri arautzaileak onestea, baita dokumentazioa aurkezteko erabili beharreko ereduak ere. Oinarri arautzaileen testua I. eta II. eranskinetan daude, eta ereduak III., IV. eta V. eranskinetan.

2. 2.120.000,00 euroko gastua baimentzea, diru-laguntza horiek 2017an emateko, kontu-sail ekonomiko hauen kargura:

–2.055.000,00 euro “Federazioentzako diru-laguntzak” izeneko A50002 A5120 4819 336100 kontu-sailaren kargura, edo 2017ko gastuen aurrekontuan helburu bererako gaituko den kontu-sailaren kargura.

–43.000 euro “Nafarroako kirol selekzioen jantziak” izeneko A50002 A5120 4819 336106 kontu-sailaren kargura, edo 2017ko gastuen aurrekontuan helburu bererako gaituko den kontu-sailaren kargura.

–22.000 euro “Kirol federazioen ekipamendua” izeneko A50002 A5120 7819 336100 kontu-sailaren kargura, edo 2017ko gastuen aurrekontuan helburu bererako gaituko den kontu-sailaren kargura.

Laguntza emateko, 2017ko Nafarroako Aurrekontu Orokorretan horretarako behar adinako kreditua izan beharko da.

3. 2017ko ekitaldian zehar A50002 A5120 4819 336100 kontu-sailean aurrekontu erabilgarririk badago, deialdi honetarako aurreikusitako gastua gehienez 200.000 euroan handitu daiteke, 2017ko Nafarroako Aurrekontu Orokorretan “Federazioentzako diru-laguntzak” kontzeptuari lotutako kontu-sail horretan, deialdi honen II. eranskinean jasotzen diren arauekin bat. Kopuru gehigarri horiek II. eranskineko “Sarrera” atalean ezarritako lehentasunen ordenari jarraikiz esleituko zaizkie deialdiko atalei. Hala bada, baimentzen den kreditu gehikuntza hori Nafarroako Aldizkari Ofizialean argitaratu beharko da, deialdia ebazten duen ebazpena onetsi baino lehen. Argitalpen horrek ez du ekarriko eskaera gehiago aurkezteko epe bat irekitzea, ez eta ebazteko epea berriz kontatzen hasi beharra ere.

4. Foru agindu hau eta I. eta II. eranskinak Nafarroako Aldizkari Ofizialean argitaratzea, behar diren ondorioak izan ditzaten. Gainerako eranskinak nafarroa.eus web-orrian eskuratzen ahalko dira.

5. Foru agindu honen kontra gora jotzeko errekurtsoa jar daiteke, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita, Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.

Iruñean, 2016ko azaroaren 9an.–Kultura, Kirol eta Gazteriako kontseilaria, Ana Herrera Isasi.

I. ERANSKINA

Nafarroako kirol federazioei diru-laguntzak
emateko deialdia. Oinarri arautzaileak

1. oinarria.–Xedea eta helburua.

1. Deialdi honen xedea da Nafarroako kirol federazioei diru-laguntzak emateko oinarri arautzaileak onestea, 2016ko azaroaren 1etik 20176ko urriaren 31ra bitarteko jarduerarako.

2. Diru-laguntza horiek emanez Nafarroako kirol federazioei lagundu nahi zaie Nafarroako Kirolari buruzko uztailaren 5eko 15/2001 Foru Legeak eta hura garatu zutenek ezartzen dituzten eginkizunak bete ditzaten.

3. Diru-laguntza hauen bidez helburu sozial hauek lortu nahi dira:

a) Nafarroako kirol federazioen ohiko funtzionamendua sustatu eta erraztea.

b) Nafarroako txapelketa ofizialak sustatzea, horrelakoak antolatzeko erraztasunak ematea eta nazio mailako txapelketetako parte-hartzea sustatzea.

c) Kirol praktika federatua Nafarroako Foru Komunitatean garatu eta heda dadila bultzatzea.

2. oinarria.–Diruz laguntzen ahal diren kontzeptuak.

1. Ohiko funtzionamendurako gastuak.

2. Nafarroako txapelketa ofizialak antolatzea.

3. Txapelketa nazional ofizialetan parte hartzea.

4. Txapelketa nazional ofizialak antolatzea.

5. Sustapen jarduerak.

6. Prestakuntza jarduerak.

7. Kirol jantziak.

8. Material inbentariagarriaren ekipamendua.

3. oinarria.–Entitate onuradunak.

Nafarroako Kirol Entitateen Erregistroan inskribaturik dauden Nafarroako kirol federazioak izan daitezke diru-laguntza hauen onuradun, apirilaren 14ko 80/2003 Foru Dekretuan xedatutakoarekin bat, horren bidez arautu baitziren Nafarroako Kirol Entitateak eta Nafarroako Kirol Entitateen Erregistroa.

4. oinarria.–Federazioek, onuradun izateko, bete beharrekoak.

1. Nafarroako Kirol Entitateen Erregistroan inskribatua egotea.

2. Gizarte Segurantzarekiko zerga arloko betebeharrak eta Nafarroako Foru Komunitateko Administrazioaren edo haren erakunde autonomoen aldeko zorrak ordaintzeko betebeharrak egunean izatea.

3. Diru-laguntzen onuraduna izateko, Diru-laguntzei buruzko azaroaren 9ko 11/2005 Foru Legearen 13. artikuluan ezarritako debekuetatik kanpo egotea.

4. Federazioek antolatutako jardueren ondoriozko erantzukizun zibila babesten duen aseguru bat kontratatuta edukitzea, bai entitatearentzat berarentzat, bai haren izenean ari diren pertsonentzat ere (zuzendaritza taldekoentzat eta langileentzat).

Eskaerak aurkezteko epea bukatzen den egunean bete beharko dira baldintza guztiak, eta, orobat, diru-laguntza jasotzen duen jarduerak irauten duen bitartean.

5. oinarria.–Eskabideak aurkeztea.

1. Eskaerak Nafarroako Kirolaren eta Gazteriaren Institutuko Erregistroan aurkezten ahalko dira (Arrieta kalea, 25, 31002 Iruña), baita Nafarroako Gobernuko Erregistroaren edozein bulegotan, Administrazio Publikoen Araubide Juridikoari buruzko urriaren 1eko 39/2015 Legearen 16. artikuluan ezarritako tokietan eta Nafarroako Gobernuko Erregistro Orokor Elektronikoan ere. Eskaerak erregistro elektronikoaren bidez tramitatzeko, eskabidea eta eranskinak sinatzen dituen pertsonaren sinadura elektronikoa beharko da, baita kasuan kasuko federazioaren sinadura elektronikoa ere.

2. Eskaera Nafarroako Kirolaren eta Gazteriaren Institutuari zuzenduko zaio, horretarako ezarritako eredu ofizialari jarraikiz.

3. Eskaerak aurkezteko epea 20 egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

4. Eskaerak postaz aurkez daitezke. Kasu horretan, interesdunak dagokion ziurtagiriaren bidez frogatu beharko du zein egunetan egin zuen igorpena posta bulegoan, eta, egun berean, diru-laguntza kudeatzen duen organoari iragarri beharko dio telefax, telex edo telegrama bidez proposamena igorri duela. Bi baldintza horiek bete ezean, dokumentazioa ez da onartuko, betiere eskaera aurkezteko ezarritako epetik kanpo jasotzen bada. Halaber, epea amaitu eta 10 egun natural iraganik dokumentaziorik jaso ez bada, ez da inola ere onartuko.

Diru-laguntza eskatzeak berarekin dakar deialdi hau arautzen duten oinarriak onartzea.

6. oinarria.–Eskatzaileek aurkeztu beharreko dokumentazioa.

Honako dokumentazio hau aurkeztu behar da, Nafarroako Kirolaren eta Gazteriaren Institutuak prestatutako ereduekin bat (V. eranskina):

1. Eskabide-orri orokorra. Helbide elektroniko bat adieraziko da, eskabidean akatsik eginez gero, balizko zuzenketa haren bidez eskatzeko, eranskin honen 7. oinarriarekin bat. Laguntzak ematearen gaineko ebazpena ere helbide horretara igorriko da, baina komunikazioak egiteko asmoz bakar-bakarrik.

2. Erantzukizuneko aitorpena, entitatearen ordezkariak emana, entitatea diru-laguntzen onuradun izateko debeku-egoeretan ez dagoela dioena. Debeku horiek Diru-laguntzei buruzko azaroaren 9ko 11/2005 Foru Legearen 13. artikuluko 2. eta 3. idatz-zatietan ageri dira.

3. Nafarroako Gobernuko Ogasuneko eta Finantza Politikako Departamentuaren ziurtagiria, Foru Ogasunarekiko zerga betebeharrak egunean dituela frogatzen duena. Ziurtagiri horrek hilabeteko antzinatasuna izanen du gehienez. Ez da dokumentazio hori aurkeztu beharko baldin eta baimena ematen bada NKGIk egiaztapen hori zuzenean egiteko Ogasuneko eta Finantza Politikako Departamentuan.

4. Gizarte Segurantzako Diruzaintza Orokorrak egindako ziurtagiria, gehienez hiru hilabeteko antzinatasuna izanen duena, eskatzaileak Gizarte Segurantzarekiko betebehar guztiak egunean dituela egiaztatzen duena. Ez da dokumentazio hori aurkeztu beharko baldin eta baimena ematen bada NKGIk egiaztapen hori zuzenean egiteko Gizarte Segurantzaren Diruzaintza Orokorrean.

5. Federazioek antolatutako jardueren ondoriozko erantzukizun zibila babesten duen aseguruaren polizaren kopia, bai entitatearentzat berarentzat, bai haren izenean ari diren pertsonentzat ere (zuzendaritza taldekoentzat eta langileentzat). Aseguru horren azkeneko ordainketaren egiaztagiriaren kopia ere aurkeztu beharko da.

6. Eskaeraren xedeko kontzeptu bakoitzerako eskabide-orria (eranskin honen 2. oinarriaren 1. ataletik 8.era), NKGIk egindako ereduei jarraikiz (V. eranskinean daude). Eskabide horiek paperean edo euskarri digitalean sinatuak aurkeztuko dira. Paperean sinatuak aurkezten badira, fitxategiak euskarri digitalean ere aurkeztuko dira.

7. Jantzien eta ekipamenduaren atala: eskatutako materialaren aurrekontua aurkeztu beharko da, materiala hornituko duten enpresek egina.

7. oinarria.–Eskaera zuzentzea.

Aurkeztutako dokumentazioa aski ez bada edo deialdian eskatzen direnak betetzen ez baditu, entitate eskatzaileari galdeginen zaio, jaso izana egiaztatzen duen agiri baten bidez, hamar egun balioduneko epean dokumentazioa osatu edo akatsak zuzen ditzala, eta ohartaraziko zaio hala egin ezean ezetsi eginen dela bere eskaera, azaroaren 9ko 11/2005 Legearen 19.3. artikuluak dioen bezala.

Errekerimendua modu elektronikoan egiten ahalko da, mezu elektroniko bat bidaliz eskatzaileak eskaeran jarritako helbidera. Errekerimendua modu horretan egiten ahalko da, bakar-bakarrik, eskatzaileak berariaz baimendu baldin badu eskabide-orri orokorreko aitorpena sinatuz.

8. oinarria.–Antolamendua eta instrukzioa.

1. Nafarroako Kirolaren eta Gazteriaren Institutuko Kirol Zuzendariordetza izanen da laguntza hauek emateko prozedura antolatu eta instrukzioa egiteko unitate organiko eskuduna.

2. Instrukzio organoak administrazio publikoko arlo juridikoko teknikari baten laguntza izanen du.

3. Instrukzio organoak eskaerak ebazteko beharrezkotzat jotzen duen dokumentazioa edo informazio osagarria eskatzen ahalko du edonoiz, baita oinarri arautzaile hauetan eskatzen diren baldintzak zorrotz betetzen direla frogatzeko ere.

4. Aurreko lerroaldeetan ezarritako dokumentazioa osatu edo zuzentzeko errekerimendua komunikazio elektronikoaren bidez egiten ahalko da, eskaeran eskatzaileak adierazitako helbide elektronikora zuzenduta. Errekerimendua modu horretan egiten ahalko da, bakar-bakarrik, eskatzaileak berariaz baimendu baldin badu eskabide-orriko aitorpena sinatuz.

Hori horrela, Nafarroako Foru Komunitateko Administrazioan administrazio elektronikoa ezartzeko apirilaren 4ko 11/2007 Foru Legearen 14. artikuluarekin bat, dokumentazioa osatu edo zuzentzeko errekerimendua interesdunari pertsonalki egin zaiola ulertuko da, legezko ondorio guztietarako, noiz eta hark emandako helbide elektronikora bidalitako mezu elektronikoa irekitzen den unean berean.

Mezu elektronikoa irekitzearekin ondorioztatuko da jakinarazitako egintza administratiboaren edukia eskuratu dela eta interesduna dela eduki horretan sartu dena.

Adierazitako helbide elektronikoan jakinarazpena jaso dela jakinda, hamar egun naturaleko epean mezua irekitzen ez bada, jakinarazpenari uko egiten zaiola ulertuko da, salbu eta ofizioz edo hartzaileak hala eskaturik mezuan sartzeko ezintasun tekniko edo materiala dagoela egiaztatzen den kasuetan.

9. oinarria.–Diru-laguntzak emateko prozedura, balorazioa eta zenbatekoa.

1. Diru-laguntzei buruzko azaroaren 9ko 11/2005 Foru Legean ezarritakoaren arabera, laguntza hauek norgehiagokako araubideari jarraikiz emanen dira, Diru-laguntzei buruzko Foru Legearen 17.1 artikuluan xedatutakoarekin bat.

2. Aurkeztutako eskaeren balorazioan, eman beharreko diru-laguntzen zenbatekoa zehazteko, foru agindu honen II. eranskinean (baremoa) ezarritako irizpideak hartuko dira kontuan.

3. Balorazio ekonomikotik ateratzen den zenbateko osoa aurrekontuetan erabilgarri dagoen diru kopurua baino handiagoa bada, baremoa aplikatuta ateratzen diren kopuruak modu proportzionalean banatuko dira, II. eranskinean deialdiaren atal bakoitzerako ezarritako xehetasunen arabera.

10. oinarria.–Alegazioak aurkezteko tramitea.

Eskaeren hasierako balorazioa eginda, Kirolaren Zuzendariordetza Nagusiak federazio guztiei jakinaraziko die laguntzak emateko prestatu duen proposamena, eta hamar egun balioduneko epea emanen die alegazioak aurkezteko, araudi honetan xedatutako irizpideak egoki aplika dakizkien aurkeztutako eskaerari.

11. oinarria.–Eskaera berriz egitea.

1. Alegazioen tramitea bukaturik, Kirolaren Zuzendariordetzak federazio guztiei jakinaraziko die laguntzak emateko prestatu duen proposamena, eta hamar egun balioduneko epea emanen die eskaera berriz egiteko, hurrengo atalean xedatutakoari jarraikiz.

2. Proposatutako diru-laguntzarekin batera 9. oinarriko 3. atalean adierazitako hainbanaketa ere jakinarazten bada, federazioek zilegi izanen dute eskaera berriz egitea hasierako eskaeran adierazitako jarduera berberetarako, gastu-konpromisoak eta baldintzak diruz laguntzen ahal den kontzeptu bakoitzerako eman daitekeen zenbatekora doitzeko. Nolanahi ere, eskaera berregitean diru-laguntzaren xedea, baldintzak eta helburuak errespetatu beharko dira, bai eta eskaeraren atal bakoitzerako ezarritako balorazio irizpideak ere. Ondoko irizpideei jarraikiz eginen da doikuntza hori:

a) Federazioaren beraren baliabideekin (diruz laguntzen ahal den jarduerak zuzenean sortzen ez dituenekin) eta jardueraren berariazko baliabideekin (kuotekin, babesletzekin eta abarrekin) finantzatzen den kopurua, hasierako eskaeran adierazitakoa, mantendu beharko da.

b) Eskaera berregin ondoren banatzen diren azkeneko diru-laguntzak finkatzean, II. eranskinean ezarritako gehieneko ehunekoak errespetatu beharko dira.

3. Instrukzio organoak eskaera berregina onetsi ondoren, dokumentazio guztia organo eskudunari igorriko zaio, laguntzen gaineko behin betiko ebazpena eman dezan. Organo eskudunak, dokumentazioa berrikusi ondoren, beharrezkotzat jotzen badu emandako zenbatekoren bat doitzea, eta zenbateko hori hainbanaketa eta aldaketa jaso duen atal batean badago, eskaera berriz egiten ahalko da berrikuspen horretara egokitzeko.

12. oinarria.–Diru-laguntza emateko ebazpena.

1. Nafarroako Kirolaren eta Gazteriaren Institutuko zuzendari kudeatzaileari dagokio diru-laguntza jasotzeko aurkeztutako eskaerak ebaztea. Diru-laguntza emateko, 2017ko Nafarroako Aurrekontu Orokorretan horretarako behar adinako kreditua izan beharko da.

2. Diru-laguntza emateko ebazpenean diru-laguntzaren xedeak, zenbatekoa eta ordaintzeko modua agertuko dira. Halaber, hala behar bada, eskaeraren baten ezespena ebatziko da.

3. Eskaerak lau hilabeteko epean ebatziko dira gehienez, eskaerak aurkezteko epea bukatzen denetik hasita.

4. Epe hori ebazpen espresik eman eta jakinarazi gabe iraganik, interesdunek beren eskaera ezetsi egin dela ulertuko dute. Hala ere, Administrazioa beharturik dago ebazpena ematera.

5. Diru-laguntzak emateko ebazpena eta deialdi honen gaineko gainerako ebazpenak honela jakinaraziko dira: Nafarroako Gobernuko iragarki oholean (Karlos III.aren etorbidea, 2) eta Nafarroako Kirolaren eta Gazteriaren Institutuko bulego nagusietako iragarki oholean iragarkiak jarriz eta nafarroa.eus Interneteko atarian argitalpen horren berri emanez.

6. Laguntzak ekitaldi ekonomiko jakin baten kargura jasotzeak ez dakarkio onuradunari hurrengo urteetan laguntza izateko eskubidea.

13. oinarria.–Jarduera berrietarako eskaera.

1. Diru-laguntzak emateko ebazpena eman ondoren, federazioek, instantzia bidez, jarduera berri baterako diru-laguntza eska dezakete, betiere jarduera 2. oinarriko ataletako batean sartuta badago, edo hasiera batean aurreikusietako bat ordeztuko duen jarduera baterako. Horri dagokionez, federazioak diru-laguntzen eskaera aurkeztu ondoren egiten direnak baizik ez dira hartuko jarduera berritzat.

2. Eskaera horiek, beranduenez, eskatutako jarduera berria egin baino 15 egun lehenago aurkeztu beharko dira. Jarduera egin baino lehen aurkeztu beharraren salbuespen gisa, zilegi izanen da eskaerak aurkezteko epea bukatzen den egunetik hasi eta diru-laguntza emateko ebazpena jakinarazi bitarte egiten diren jarduera berrietarako eskaerak ere aurkeztea, baina, betiere, eskaera aurkezten baldin bada jarduera egin aurretik.

3. Instrukzio organoak (Nafarroako Kirolaren eta Gazteriaren Institutuko Kirolaren Zuzendariordetza), behar den ofizioaren bitartez, eskaera onartu edo ez onartu erabakiko du, eta onartzeko edo atzera botatzeko arrazoiak emanen ditu.

4. Nafarroako Kirolaren eta Gazteriaren Institutuak eskaera hori onartzen badu, diru-laguntzaren zenbatekoa ez da handituko; izan ere, emandako diru-laguntza konpentsatu eginen da jarduera berria ere kontuan izanda. Konpentsazio hori azken justifikazioan egin beharko da. Horrela, jardueraren bat egiten ez bada, edo gastua txikiagoa bada, aukera izanen da jarduera berri horiei dagokien diru-laguntzarekin konpentsatzeko, betiere bakoitzari dagokion baremoaren irizpideekin bat.

14. oinarria.–Bateragarritasuna.

Deialdi honetan araututako diru-laguntzak bateragarriak dira xede bererako jasotzen den beste edozein diru-laguntza edo laguntzarekin. Hala ere, diru-laguntzen zenbatekoa ezin da inola ere izan, bakarrik edo beste diru-laguntza, laguntza, diru-sarrera edo berezko baliabide batzuekin batuta, onuradunak egin beharreko jardueraren kostua baino handiagoa.

15. oinarria.–Diru-laguntzaren ordainketa.

1. Diru-laguntza ordaintzeko, hiru bide erabiltzen ahalko dira, federazio bakoitzak aurkezten duen eskaeraren arabera: ordainketa, konturako ordainketa eta aurrerakinak.

2. Nolanahi ere, lehenbiziko ordainketa egin baino lehen, gardentasun-betebeharrak justifikatzeko dokumentazioa aurkeztu beharko da, 20. oinarrian araututakoari jarraikiz.

3. Konturako ordainketa egiteko prozedura aukeratzen duten federazioentzat, diru-laguntzak emateko ebazpena egin ondoren, gehienez 4 konturako ordainketa egiten ahalko dira 2. oinarriaren 1.etik 6.era bitarteko ataletako kontzeptuetarako, hiruhileko hauei dagozkienak: 2016ko azaroaren 1a-2017ko urtarrilaren 15a, 2017ko urtarrilaren 16a-apirilaren 15a, 2017ko apirilaren 16a-uztailaren 15a, eta 2017ko uztailaren 16a-urriaren 15a. Gero, espedientea ixteko ebazpen bat etorriko da. Espedientea ixteko ebazpenean, azken justifikazioa baino lehen egindako konturako ordainketak doituko dira. Aurreko atalean aipatutako konturako ordainketen zenbatekoa kalkulatzeko, bi atal hauek hartuko dira aintzat, bata besteari gehituta:

a) Ohiko funtzionamendurako gastuak (2. oinarriaren 1. atala): kontzeptu horietarako onetsitako diru-laguntzaren arabera hilabete bati dagokion parte proportzionala. Atal honetako ordainketa egiteko, horri dagokion justifikazio-inprimakia aurkeztu beharko da.

b) Jardueren gastuak (2. oinarriaren 2. ataletik 6.era bitarte): justifikazio-inprimakian azaldutakoaren arabera, ordaintzeko data bakoitzean zer portzentaje dagoen egina diruz lagundutako jardueretatik, kontuan harturik gauzatze-portzentajea eta jarduerarako aurreikusitako egunen eta benetan egindakoen erlazioa. Atal honetako ordainketa egin ahal izateko, egindako jardueraren memoria aurkeztu beharko da, kirol arloari dagokiona, eta horrekin loturiko egiaztagiriak.

d) Ordaintzeko ebazpen horiek egiteko, federazioek aurkeztutako justifikazioak bi prozedura motatan elkartzen ahalko ditu Nafarroako Kirolaren eta Gazteriaren Institutuak:

I. Ebazpen berean bilduko dira ordainketa-kontzeptu guztien justifikazio guztia aurkeztu duten federazioei dagozkien ordainketak.

II. Ebazpen berean bilduko dira ohiko funtzionamendurako gastuen atalarengatik edo jardueren atalarengatik federazioei dagozkien ordainketak, betiere federazio bakoitzari dagokiona banan-banan eta bereiz adierazita, aurkezten diren justifikazioen arabera.

4. Aurrerakinen bidez ordaintzeko prozedura aukeratzen duten federazioen kasuan, prozedura honi jarraikiko zaio:

a) Honako hauek dira eskaerak justifikatzeko aurkeztu beharreko agiriak:

I. Diruzaintzako saldoaren eta diruzaintzako fluxuen hileko aurreikuspenen gaineko txostena, diru-laguntzaren xedeko jarduerarentzat aurreikusten diren diru-sarrerak eta gastuak zehaztuta, diru-laguntzaren xedeko jarduera egiteko aurrerakinak behar direla justifikatzeko.

II. Eskaera justifikatzeari begira, federazioari egoki iruditzen zaion dokumentazio osagarria.

b) Eskaerarekin batera aurkeztu beharreko dokumentazioa aztertuta NKGIk erabakitzen badu diru-laguntzaren xedeko jarduerak egiteko funtsak aurreratu beharra justifikatuta dagoela, laguntza onartzeko ebazpena eman ondoren eta gardentasunari buruzko dokumentazioa aurkeztu ondoren, onartutako diru-laguntzaren %80 ordainduko da gehienez, aurrerakin gisa.

c) Aurrerakin hori jasotzen duten federazioek aurkezten dutenean aurreratutako zenbateko osoari edo zati bati dagokion justifikazio-kontua (egindako gastu eta ordainketen jatorrizko egiaztagiriak barne), ordainketa bat libratzen ahalko da justifikatzen den zenbatekoa adinakoa (onartutako laguntzaren %100 gehienez).

d) Azken justifikazioa aurkeztu ondoren, azken itxierarako ebazpen bat emanen da justifikatzen ez diren kopuruetarako, hala %80ra bitarteko aurrerakin bakarra egin baldin bada, nola kopuru osagarria adinako ordainketa osagarria egin bada. Horretarako, federazio horiei gainerako federazioei egiten zaizkien berrikuspen txosten berberak eginen zaizkie, eta ordaindutako kopuruak txosten horietan ezarritakoari egokituko zaizkio.

e) Nolanahi ere, aurrerakin guztiak 60.000 eurotik beherakoak izanen dira.

f) Aurrerakinak eskatzeko aurkeztu den dokumentazioa azterturik, NKGIk erabakitzen badu ez dela bidezkoa federazioren bati aurrerakinik ematea, federazio horri ordaintzeko, ordainketa prozedura edo konturako ordainketaren prozedura erabiliko da.

5. Federazioek noiznahi eskatzen ahalko dute ordainketen prozeduraren bidez ordaintzea, beste bi prozeduren osagarri gisa (konturako ordainketak eta aurrerakinak). Prozedura horretan, diruz laguntzen ahal diren ataletakoren baten gaineko tarteko justifikazio-kontua aurkeztu beharko da (kontu osoa edo partziala); gainera, dagozkion gastuen eta ordainketen egiaztagiriak aurkeztu beharko dira.

6. Diruz lagundutako kontzeptuak eskuratu direla eta haiek ordaindu direla frogatzeko ziurtagiriak (jatorrizko fakturak) federazioek aurkeztu ondoren emanen da 2. oinarriko 7. eta 8. ataletako kontzeptuei dagokien diru-laguntza (kirol jantziak eta material inbentariagarriaren ekipamendua). Ordainketa hori dena batera egiten ahalko da, edo, bestela, hiruhileko bakoitzari dagokiona, bereiz. Ziurtagiri horiek aurkezteko azken eguna 2017ko abenduaren 31 izanen da.

16. oinarria.–Jardueren arteko doikuntzak.

1. Deialdiaren 1. ataletik 6.era bitarte adierazitakoari dagokionez, diru-laguntzaren helburuak oso-osorik betetzen baldin badira (eskaeran aurreikusitako jarduerak egiteari dagokionez) eta proposaturiko jardueraren batean gastu txikiagoak edo defizit handiagoak baldin badira, azkeneko justifikazioan zilegi izanen da doikuntza edo konpentsazio ekonomikoak egitea diru-laguntzaren xedeko beste jardueraren batean izandako gastu handiagoekin, baita federazio onuradunek egindako beste jarduera berri batzuetan edo diruz lagundutako jardueren antzekoak diren beste batzuetan izandako gastuekin ere (13. oinarrian ezarritako prozeduraren arabera eskatu eta baimendu baldin badira), betiere deialdi honen arabera diruz laguntzeko modukoak baldin badira (zein multzotan sailkatzen diren gorabehera). Dena dela, kirol federazio bati jarduera jakin bat egiteagatik esleitzen zaion diru-laguntzak ez ditu gaindituko deialdi honetako II. eranskinean (1. oinarritik 6.era bitarte) adierazitako portzentajeak, eta diru-laguntzak emateko ebazpenean aplikatutako hainbanaketaren portzentajeak errespetatuko ditu. Doikuntza edo konpentsazio horiek, betiere, ezin izanen dute gainditu laguntza emateko ebazpenean federazio bakoitzari esleitutako diru kopurua.

2. Aurreko puntuan aipatutako aurrekontu-aldaketak ezin dira izan jarduera bakoitzarentzat hasiera batean aurkeztutako aurrekontuaren %50etik gorakoak. Muga horretatik gorako dirua ezin izanen da erabili horrelako doikuntzak beste jarduera batzuekin egiteko.

3. Jarduera egin gabe gelditzen bada federazioari ezin leporatzen ahal zaion ezinbesteko arrazoi bategatik, aldaketa horiek jatorrizko aurrekontu osoaren gainean egiten ahalko dira, aurreko puntuan adierazitako %50eko muga aplikatu gabe. Alderdi hori federazioak frogatu beharko du, eta kasuan kasuko jarduera bertan behera utzi dela jakiten den unean eskatu beharko zaio NKGIri. NKGIk kasuaren gaineko inguruabar guztiak baloratu ondoren ebatziko du eskaeraren gainean.

4. Diru-laguntzak ematen dituen organoak, espedientea ixten denean, aurkezten den azken justifikazioaren arabera ebatziko du behar dena.

17. oinarria.–Justifikazioak.

1. Justifikazio-kontuen bidez eginen dira, salbu eta txapelketa nazionaletan parte hartzeko laguntzen atalekoak, horietarako moduluen prozedura erabiliko baita. Justifikazio-kontuan sartuko dira, orobat, txapelketa nazionaletan parte hartzeagatiko inskripzio gastuak. Kirol jantzien eta material inbentariagarriaren ekipamenduaren ataletan, justifikazioa honela eginen da: eskatutako eta onartutako kontzeptuak eskuratu eta ordaindu direla justifikatzeko agiriak (fakturak) aurkeztuz. Agiri horiek gastuen azken justifikazio gisa hartuko dira, eta horiek ere justifikazio-kontuan sartu beharko dira.

2. Justifikazio-kontu horretan diru-laguntza eskaeran adierazitako jardueren eta kontzeptuen egiaztagiriak sartuko dira, bakar-bakarrik.

3. Deialdiaren atal bakoitzerako aurrekontuaren (hasierakoaren edo egokituaren) %100 betearazi izanaren justifikazioa egin beharko da, hartarako diru-laguntzarik onetsi bada. Justifikatutako gastua aurrekontua baino gutxiago baldin bada, zenbatekoa proportzioan egokituko da ixteko ebazpenean.

4. Diru-laguntza hauen onuradun diren federazio guztiek azken justifikazio hau aurkeztu beharko dute 2017ko abenduaren 31 baino lehenago, federazioko lehendakariak sinatua:

a) Egindako jardueren memoria bat, kirol arlokoa, eta, horrekin batera, federazioak egindako eta aurreko epeetan justifikatu gabe gelditu diren kirol jarduera guztiei dagokien dokumentazioa.

b) Jarduera mota bakoitzerako eskaera-inprimakiak (ohiko funtzionamendua, Nafarroako txapelketak antolatzea, txapelketa nazionaletan parte hartzea, txapelketa nazionalak antolatzea, sustapena eta prestakuntza), benetako exekuzioari dagokion zatia beteta (inprimaki ereduetan jasotako atal teknikoetan bakarrik). Inprimakiak paperean sinatuak aurkezten badira, fitxategiak euskarri digitalean ere aurkeztuko dira.

c) Diru-laguntzaren xedeko jardueren justifikazio-kontua III. eranskinean agertzen den ereduaren arabera prestatuko da, eta bertan jarduera bakoitzaren gastu eta diru-sarreren zerrenda sailkatu bat agertuko da, honako hauek adierazita: agiri zenbakia, jarduera, jaulkipen data, kontzeptua, zenbatekoa eta ordainketaren data. Inprimaki eredu hori aldatzeko, beste aurkezpen formal bat egin daiteke, goian adierazitako informazio guztia baldin badu. Azkeneko justifikazio-kontu hori bakarra izanen da diru-laguntzaren xedeko jarduera guztietarako, eta federazioek urtean zehar aurkeztutako tarteko justifikazio-kontu guztiak hartuko ditu bere baitan.

5. Nafarroako Kirolaren eta Gazteriaren Institutuak justifikazio-kontu horien gaineko berrikuspen txostenak eginen ditu, Kontu-auditoreen Erregistro Ofizialean inskribatua dagoen jarduneko kontu-auditore baten bidez. Txosten horiek honako hauek betez eginen dira:

I. Txosten horien kontratazioa NKGIk eginen du.

II. Txostena maiatzaren 17ko EHA/1413/2007 Aginduan ezarritakoari jarraikiz eginen da, IV. eranskinean agertzen den eredua erabiliz. Agindu horren bidez onetsi zen kontuen auditoreek diru-laguntzen justifikazio-kontuak berrikusteko jarraitu beharreko jarduketa araua.

6. Alternatiba moduan, zilegi da Nafarroako Gobernuaren beraren langileek egitea justifikazio-kontu horien berrikuspena.

7. Aurrerakinen prozeduraren bidez diru-laguntza ordaindu zaien federazioek lehendik (hau da, aurreratutako diru kopuruaren justifikazio-kontuan) justifikatu gabeko diru kopuruei dagokien justifikazio-kontua aurkeztu beharko dute, orobat, 2017ko abenduaren 31 baino lehen. Justifikazio hori ere lehen aipatutako berrikuspen txostenen bidez berrikusiko da.

18. oinarria.–Espedientea ixteko ebazpena.

Eranskin honen 16. eta 17. oinarrietan ezarritako dokumentazioa berrikusi ondoren, NKGIk espedientea ixteko ebazpena emanen du, eta, horretan, ordaindu edo itzuli beharreko diru kopurua zehaztuko da, egindako justifikazioaren arabera. Ebazpena honako hauek kontuan harturik prestatuko da:

1. Ixteko ebazpen horretan federazio guztien berrikuspenak sartuko dira, hala konturako ordainketen prozedura aukeratu dutenena, nola aurrerakinen prozedura hautatu dutenena.

2. Diru-laguntzaren kalkulua aurkeztutako aurrekontuaren gaineko portzentaje batzuen arabera egiten den ataletan (ohiko funtzionamendua, Nafarroako txapelketak, txapelketa nazionalak antolatzea, sustapena eta prestakuntza), haietako bakoitzean ezarritako portzentajea aplikatuko zaie benetan egin eta justifikatu diren gastuei, kasuan kasuko gastu eta/edo jarduerarako aurreikusitako zehaztapenarekin. Betiere, diru-laguntza emateko ebazpenean ezarritako diru-muga kontuan hartu beharko da, baita atal batzuetan aplikatzen ahal den hainbanaketaren portzentajea ere. Eranskin honen 16. oinarrian ezarritako mugak ere kontuan hartuko dira, jardueren arteko doikuntzei dagokienez.

3. Zenbatekoa moduluen prozeduraren bidez finkatzen den atalean (txapelketa nazionaletan parte hartzea), dagokion balorazioa kalkulatzeko, parte-hartzearen datu errealak hartuko dira kontuan (zenbat parte-hartzaile izan diren, txapelketa non egin den eta zenbat egun iraun duen).

4. Jantzien eta ekipamenduaren atalak haietako bakoitzaren justifikazioaren arabera analizatuko dira, bakar-bakarrik, gainerako atalekin doikuntzak egin gabe. Horretarako, haietako bakoitzean aurreikusitako irizpideak benetan egin eta justifikatzen den gastuari aplikatuko zaizkio.

19. oinarria.–Kirol federazio onuradunen betebeharrak.

1. Federazioak hartutako laguntzaren xedeko jarduerak egitea eskaeran adierazi bezala, eta diru-laguntza emateko ezarritako baldintzak betetzea.

2. Eranskin honen 15. eta 17. oinarrietan ezarritako egiaztagiriak aurkeztea, hala tarteko konturako ordainketetarako, nola azken justifikaziorako.

3. Hala badagokio, hornitzaileak efizientzia eta ekonomia irizpideen arabera eta merkatuko prezioetan kontratatu direla frogatzea, Diru-laguntzei buruzko azaroaren 9ko 11/2005 Foru Legearen 28.3 artikuluen arabera.

4. Nafarroako Gobernuaren laguntza jaso dela adieraztea jardueren gaineko edonolako publizitatean, Nafarroako Kirolaren eta Gazteriaren Institutuak adierazten duen irudi korporatiboa jarriz.

5. Laguntza ematen duen organoak eta indarra duen antolamenduaren arabera eskudun diren bestelako organoek egin beharreko egiaztapen lanak onartzea.

6. Diru-laguntza jasotzen duen jardueraren frogagiriak gordetzea, dokumentu elektronikoak barne, egiaztatze eta kontrol lanen xede izan daitezkeen bitartean.

7. Laguntzak erabiltzea onartu diren berariazko helburuetarako, eta haien aplikazioa justifikatzea, kontuan harturik, orobat, jardueren artean egiten diren doikuntzak, behar diren ataletan ezarrita dagoen bezala.

8. Diru-laguntza jasotzen duen jarduera finantzatzeko lortzen dituen beste laguntza, diru-sarrera edo baliabide batzuen berri ematea diru-laguntza ematen duen organoari. Jakin bezain laster emanen da horren berri, eta, betiere, jasotako dirua zertan erabili den frogatu baino lehen.

9. Erraztasunak ematea NKGIk kontratatutako kontu-auditoreek berrikuspen-txostenak egin ditzaten.

10. Diru-laguntzei buruzko azaroaren 9ko 11/2005 Foru Legearen 35. artikuluan ezarritako kasuetan, hartutako diru-laguntzak itzultzea.

11. Diru-laguntzei buruzko Foru Legeak onuradunei ezartzen dizkien gainerako betebeharrak.

12. Indarreko araudiari jarraituz (Nafarroako Administrazio Publikoetan euskararen erabilera arautzen duen otsailaren 10eko 29/2003 Foru Dekretua eta Nafarroako Kirolaren eta Gazteriaren Institutuaren estatutuak onetsi zituen abuztuaren 28ko 133/2015 Foru Dekretua), pertsona guztien hizkuntza eskubideak bermatzeko, kirol federazioek bermatuko dute euskara komunikazio guztietan agertzen dela: paperak, inskripzio-orriak, kartelak, hedatzeko baliabideak, megafonia eta publizitate leloak.

20. oinarria.–Gardentasun-betebeharrak.

1. Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritakoari jarraikiz, entitate onuradunek gardentasunez aritzeko betebeharra izanen dute, irailaren 11ko 59/2013 Foru Dekretuan arautua baitago, bi inguruabar hauek gertatzen badira:

a) Emandako diru-laguntzaren zenbatekoak 20.000 euro gainditzea urtean.

b) Emandako diru-laguntza entitate onuradunaren negozio-zifraren edo urteko aurrekontuaren %20tik gorakoa izatea.

2. Aurreko idatz-zatian ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira. Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez guztizko batura. Erreferentziako negozio-zifra edo urteko aurrekontua honako hauen arteko txikiena izanen da:

a) Aurreko urteko negozio-zifra edo aurrekontu exekutatua.

b) Hala badagokio, negozio-zifra, edo diru-laguntza ematen den ekitaldian entitatearen organo eskudunak onartutako aurrekontua.

3. Aipatu diren inguruabarrak gertatzeagatik gardentasun betebeharrak dituzten entitate onuradunek jarraian adierazten den informazioa eman beharko dute:

a) Entitateen gobernu, administrazio eta zuzendaritza organoen osaera.

b) Organo horiek osatzen dituzten kargudunen zerrenda.

c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan jasotakoa izanen da.

d) Kargudun bakoitzaren dedikazio araubidea gobernuko, administrazioko eta zuzendaritzako eginkizunetarako.

e) Entitate onuradunaren urteko azken kontuen kopia bat.

4. Aipatutako informazioa diru-laguntzaren onuradun diren entitateen legezko ordezkariek sinatua aurkeztu beharko da, laguntza ematearen gaineko ebazpena jakinarazi eta hilabeteko epean.

5. Aurreko ataleko inguruabarrak ez gertatzeagatik entitate onuradunak gardentasun-betebeharra bete behar ez badu, horixe dioen aitorpena aurkeztu beharko du, deusetan galarazi gabe deialdia kudeatzeko unitateari egiaztatu eta ikuskatzeko esleitu zaizkion ahalmenak.

Aitorpen hori aurkeztuta ere, nahitaez onartu behar dira laguntza ematen duen organoaren egiaztapen lanak, eranskin honen 19. oinarrian ezarritakoak.

6. Onuradunak informaziorako betebeharrak ez betetzeak ekar ditzakeen zehapenak galarazi gabe, atal honetan agindutako informazioa ez aurkezteak onetsitako diru-laguntza ez ordaintzea ekarriko du berekin, eta, bidezko bada, kobratutako zenbatekoak itzuli beharra, Diru-laguntzei buruzko Legearen 35.1.c) artikuluan ezarritakoari jarraikiz.

7. Nolanahi ere, kirol federazio onuradunek dokumentuak ez aurkezteko eskubidea izanen dute baldin eta haiek dagoeneko Foru Komunitateko Administrazioaren esku badaude (Nafarroako Foru Komunitateko Administrazioari buruzko abenduaren 3ko 15/2004 Foru Legearen 9.4 artikulua).

8. Datu Pertsonalak Babesteari buruzko abenduaren 13ko 15/1999 Lege Organikoaren 11.2.a) artikuluan ezarritakoarekin bat, entitate onuradunak eman behar duen informazioan dauden datu pertsonalak jakinarazteko ez da beharrekoa izanen interesdunaren baimena, Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian baimentzen baita.

9. Entitate onuradunek ematen duten informazioa Nafarroako Foru Komunitateko Administrazioaren Gobernu Irekiaren Atariko webgunean argitaratuko da. Informazio hori urtebetez egonen da ikusgai argitaratzen denetik hasita, eta gehienez 15 hilabetez utziko da bertan, informazioa kudeatzen duen organoan sartzen den egunetik hasita. Epe hori iraganik, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.

21. oinarria.–Azpikontratazioa.

Federazio onuradunek zilegi dute diruz lagundutako jarduerak azpikontratatzea, guztiz edo partez, jardueren kostuaren %100 arte. Nolanahi ere, onuradunak berak egiten badu diru-laguntza jasotzen duen jarduera, horretarako behar diren gastuen kontratazioa kontzeptu honetatik kanpo geldituko da.

Diru-laguntzei buruzko Foru Legearen 26. artikuluan ezarritako gainerako aurreikuspenak ere bete beharko dira. Zehazki, hirugarrenekin hitzarturiko jarduerak diru-laguntzaren zenbatekoaren %20 gainditzen duenean eta zenbateko hori 60.000 eurotik gorakoa denean, azpikontratazioa egiteko kontratua idatziz sinatu beharko da.

22. oinarria.–Hornitzaileak kontratatzea.

Diru-laguntzei buruzko Foru Legearen 28.3 artikuluan xedaturikoarekin bat, ekipamendu ondasunak eskuratzen direnean edo aholkularitza edo laguntza enpresek zerbitzuak ematen dituztenean, diruz laguntzen ahal den gastuaren zenbatekoa 12.000 eurokoa baino handiagoa bada, federazio onuradunak frogatu beharko du, organo emailearen aurrean, hornitzailea eragimen eta ekonomia irizpideei jarraituz hautatu dela.

Kasu horietan, federazio onuradunak helburua lortzeko gai diren hiru enpresarekin edo gehiagorekin kontsultatu eta negoziatu beharko ditu kontratuaren baldintzak, eta eskaintzarik hoberena egiten duenarekin sinatuko du. Kontsulta-tramitearen gaineko dokumentazioa eta eskaintzak gorde egin beharko ditu entitate onuradunak. Kontu horiek agiri bidez frogatu beharko ditu diru-laguntza ematen duen organoaren aurrean, kontratua sinatu bezain laster. Agiri horiekin batera, enpresa hautatzeko arrazoiei buruzko txosten labur bat aurkeztuko da.

Ez da beharrezkoa izanen enpresa bati baino gehiagori kontsulta egitea, diruz laguntzen ahal diren gastuen ezaugarrien berezitasunagatik, merkatuan hornidura edo zerbitzu hori ematen duten enpresak behar adina ez direnean.

23. oinarria.–Dirua itzultzea.

Jarduera gauzatu ezik edo diru-laguntza emateko ezarritako baldintzak bete ezik, Diru-laguntzei buruzko Foru Legearen 35. artikuluan aipatzen diren zergatikoak gertatuz gero edo deialdi honetan berariaz aipatzen diren eginbeharrak bete ezik, jasotako laguntza itzuli beharko da, osorik edo partez. Legez ezarritako kasuetan, gainera, bidezkoa izanen da diru-laguntza ordaindu zenetik itzuli beharraren gaineko ebazpena ematen den arte sorrarazitako berandutze-interesak ordaintzeko eskatzea.

Dirua itzultzeko prozedura goian aipaturiko artikuluan xedaturikoari jarraituko zaio eta hasten denetik 12 hilabeteko epean eman beharko da haren gaineko ebazpena.

Halaber, onuradunak betebeharrak ia osorik bete dituenean eta zalantzarik gabe bere konpromisoak burutzeko jarrera frogatzen duenean, itzuli beharreko dirua proportzionaltasun irizpideari jarraituz zehaztuko da, hau da, hasierako aurrekontuaren arabera onartutako zenbatekoaren eta benetan gauzatutakoaren arteko aldea kontuan hartuta.

24. oinarria.–Arau-hausteak eta zehapenak.

Deialdi honetan aurreikusitako diru-laguntzen federazio onuradunak Diru-laguntzei buruzko Foru Legearen 42. artikuluan eta hurrengoetan, diru-laguntzen arloko arau-hauste administratiboei buruz, ezarritako zehapen araubidearen menpe egonen dira, eta han ezarritako erantzukizunak izanen dituzte.

Diru-laguntzen arloko zehapenak erregelamendu bidez finkatzen den prozeduraren arabera ezarriko dira, edo, halakorik izan ezean, Nafarroako Foru Komunitateko Administrazioari buruzko abenduaren 3ko 15/2004 Foru Legearen V. tituluan xedatutakoari jarraikiz.

25. oinarria.–Administrazio errekurtsoak.

1. Deialdi honen eta bere oinarrien kontra gora jotzeko errekurtsoa jar daiteke, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik, Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.

2. Era berean, Nafarroako Kirolaren eta Gazteriaren Institutuko zuzendari kudeatzailearen ebazpenen aurka, gora jotzeko errekurtsoa aurkezten ahalko da, Kultura, Kirol eta Gazteriako kontseilariari zuzendua, hilabeteko epean, haiek jakinarazi edo argitaratu eta biharamunetik aitzina, Nafarroako Foru Komunitateko Administrazioari buruzko abenduaren 3ko 15/2004 Foru Legean xedatuarekin bat.

26. araua.–Legeria aplikagarria.

Foru dekretu honetan aurreikusirik ez dagoen guztian, Diru-laguntzei buruzko azaroaren 9ko 11/2005 Foru Legean eta Nafarroako Kirolari buruzko uztailaren 5eko 15/2001 Foru Legean xedatutakoari jarraituko zaio.

Iruñean, 2017ko azaroaren 9an. Kultura, Kirol eta Gazteriako kontseilaria, Ana Herrera Isasi.

II. ERANSKINA

Nafarroako kirol federazioei diru-laguntzak
emateko deialdia. Irizpideak eta baremoak

Sarrera. Irizpide orokorrak

1. 2017ko Nafarroako Aurrekontu Orokorretan “Federazioentzako diru-laguntzak” kontzeptuari lotutako kontu-saila deialdiaren atal guztien artean banatuko da, bloketan sailkatuta. Dokumentazioa azterturik, baremoko atal bakoitzaren arabera esleituko dira diru-laguntzak, lehentasunen ordena honi jarraikiz eta ondoren agertzen diren diru kopuruak banatu arte:

1.–Ohiko funtzionamendurako gastuak: 970.000,00 euro.

2.–Nafarroako txapelketa ofizialak: 435.000,00 euro.

3.–Txapelketa nazional ofizialetan parte hartzea: 380.000,00 euro.

4.–Txapelketa nazional ofizialak antolatzea: 40.000,00 euro.

5.–Sustapen jarduerak: 210.000,00 euro.

6.–Prestakuntza jarduerak: 20.000,00 euro.

2. Lehenbizi, ohiko funtzionamendurako gastuei dagozkien eskaerak aztertuko dira, eta atal horretako baremoaren araberako diru-laguntza esleituko zaie.

a) Esleitutako kopurua handiagoa baldin bada bloke horretarako aurreikusitako dirua baino, ukitutako federazioen artean banatuko da, proportzionalki, diru kopuru hori.

b) Esleitutako kopuruak bloke horretarako aurreikusitako dirua gainditzen ez badu, soberan gelditzen den diruarekin beste bloke bat sortuko da, “esleitu gabe dauden zenbatekoak” izenekoa.

3. Aurreko puntuan aipatutako prozesua 6 blokeekin errepikatuko da (haietako bakoitzerako erabakitako zenbatekoak banatuz), 1. atalean ezarritako ordenari jarraikiz.

4. “Esleitu gabe dauden zenbatekoak” izeneko blokea honela banatuko da:

a) Lehenbizi, hasiera batean esleitutako kopuruak aski ez izateagatik hainbanaketa egin behar izan den blokeetan falta den dirua estaltzeko erabiliko da, 1. atalean ezarritako ordenari jarraikiz. Bloke horietako bakoitzean diru-laguntzak emateko aurreikusitako irizpide berberak aplikatuko dira.

b) Sei blokeak aztertu ondoren oraindik ere esleitu gabeko dirurik gelditzen bada, ohiko funtzionamendurako gastuen atalari dagozkion diru-laguntzen portzentajea handitzeko erabiliko da diru hori, erabilgarri dagoen kontu-saila osorik agortu arte.

5. Benetan gauzatu diren jardueren azken dokumentazioa aztertzen denean, zilegi izanen da aurrekontu aldaketak egitea deialdi honetako atal batetik bestera, I. eranskineko 16. oinarrian agertzen den bezala. Horrela, jarduera baten gastua baxuagoa izan bada, beste jarduera batean izandako gastu handiagoa konpentsatzeko erabiltzen ahalko da diru hori, betiere II. eranskinean deialdiko bloke bakoitzerako ezarritako portzentaje mugak gainditu gabe eta diru-laguntzak emateko ebazpenean aplikatutako hainbanaketaren portzentajeak errespetatuz.

6. Ez da diru-laguntzarik izanen honako kategoria hauetako txapelketa eta/edo torneoak antolatzeko eta/edo haietan parte hartzeko:

a) Bakar-bakarrik 2009. urtean eta hortik aurrera jaio diren kirolarientzat diren txapelketa eta torneoak.

b) Masterrak, beteranoak eta antzeko kategorietakoak.

7. Kirol jantziei eta ekipamenduari buruzko ataletarako (I. eranskineko 2. oinarriaren 7. eta 8. puntuetakoak) bideratuko den diru kopurua foru agindu honetan kasuan kasuko kontu-sail ekonomikoen kargura baimendutakoa izanen da. Dagokion diru-laguntza kalkulatzeko, eranskin honetako oinarrietan adierazitako irizpideak baizik ez dira aplikatuko, betiere aurkeztutako dokumentazioa aztertuz.

8. Deialdi honetako diru-laguntzak ez dira erabiliko NKGIren beste deialdi berariazko batzuen xede diren jardueretarako.

9. Eskatutako jardueraren baten dokumentazioa osorik ez badago, I. eranskinaren 7. oinarrian eskaera zuzentzeko ezarritako prozedurari jarraituko zaio. Eskatutako jardueraren edukia zehaztu beharko da, kasu bakoitzari dagokion memoriaren bidez, bai eta aurreikusitako aurrekontuak ere. Ildo horretatik, ez dira onartuko “askotarikoak”, “bestelakoak” edo antzeko kontzeptu batean sailkatutako gastuak eta sarrerak, kontzeptuak zehaztu behar baitira.

10. Edozein jardueraren berariazko diru-sarreren kasuan (inskripzioak, sarrerak, babesleak...), zehaztapen hauek hartuko dira kontuan:

a) Diruz lagundu ezin den kontzeptu bati lotutako diru-sarrerak ez dira kontuan hartuko (adibidez, esku-diruzko sariak emateko babesleak).

b) Diru-sarrera orokorren kasuan, hau da, kontzeptu jakin bati loturik ez daudenak, diruz lagungarriak diren gastuek gastu guztien aldean hartzen duten portzentaje berean egotziko dira diru-sarrerak, diruz lagundu ezin diren kontzeptuei lotutako gastuak baldin badira.

11. Modalitate olinpikotzat jotzea. Deialdiaren ataletan, federazio eta/edo modalitate olinpikotzat joko dira 2018ko eta 2020ko Joko Olinpikoen programan daudenak.

12. 2017ko ekitaldian zehar kontu-sail horretan aurrekontu erabilgarririk badago, deialdi honetarako aurreikusitako gastua gehienez 200.000 euro handitu daiteke, 2017ko Nafarroako Aurrekontu Orokorretan “Federazioentzako diru-laguntzak” kontzeptuari lotuta gaituko den kontu-sailean.

1. oinarria.–Ohiko funtzionamendurako gastuak.

1. Atal honetan, honako hauetarako diru-laguntzak emanen dira:

a) Federazioak lan administratiboak eta zuzendaritza teknikoa egiteko, eta ez besterik, kontratatutako langileak. Bestelako eginkizunak dituzten langileak baztertzen dira.

b) Zerbitzu komunetako bulegoaren gastuak, aurreikusitako hiru ataletako edozeinetakoak (administratiboak, teknikoak eta komunikaziokoak).

c) Federazioen funtzionamendu gastu orokorrak (gastu orokorrak eta administraziokoak), kontzeptu hauetarako:

I. Bulegoko materiala eta material informatiko suntsikorra.

II. Hainbat arlotako aholkularitza: kontabilitatekoa, lan arlokoa, datuak babestekoa, etab.

III. Aseguru orokorrak (erantzukizun zibilekoa, hirugarrenak babestekoa, etab.), lizentziei lotutako aseguruak izan ezik.

IV. Komunikazioak: telefonoa eta Internet. Atal honetan telefono eta Internet zerbitzuak emateko konpainiekin sinatutako kontratuak jasotzen dira, kuota finkoa eta kontsumoak kontzeptuei dagozkienak (edo konpainia bakoitzak ezartzen dituen antzeko kontzeptuetarako).

V. Posta eta mezularitza.

VI. Banketxeetako gastuak: banketxeen komisioak (transferentzietakoak, mantentze-lanetakoak, erreziboak kobratzekoak, etab.) eta finantzaketa-interesekoak (maileguak, kreditu kontuak, etab.). Gastu horiek diru-laguntza hartzen ahalko dute baldin eta diruz lagundutako jarduerarekin zuzeneko lotura badute eta hura ongi prestatu edo egiteko ezinbestekoak badira. Banketxeetako kontuetako interes zordunak salbuetsita daude (kontu korronteetako zorpekoak).

2. Federazioaren programa jakin batzuetarako berariaz kontratatzen diren langileentzako diru-laguntzak ez dira atal honetan sartzen, federazioak ez baditu modu jarraituan kontratatuak.

3. Zuzendaritza teknikoko eginkizunetan aritzen diren langile kontratatuen kostuari dagokionez, deialdi honen arabera diruz lagungarriak diren jardueretan eta lagungarriak ez direnetan aritzen baldin badira, diruz lagunduko da, bakarrik, deialdiaren xedeko jardueretan aritzen direneko lanaldiaren portzentajea. Langile horien lanaldiaren %50 edo gehiago ez bada erabiltzen deialdi honetako eginkizunetan, ez da horretarako diru-laguntzarik emanen.

4. Diru-laguntzaren portzentajea hauxe izanen da:

a) Kontratatzen diren langileentzat: gastuei kontzeptu honengatik jasotako diru-sarrerak kendu ondoren ateratzen den zenbatekoaren %45. Federazio bakoitzak 60.000 euro hartzen ahal ditu gehienez. Kalkulu hori egiteko, aintzat hartuko dira federazio eskatzaileek kudeaketa federatiboaren kontzeptuarentzat beste entitate batzuetatik jaso ditzaketen diru-sarrerak.

b) Zerbitzu komunen bulegorako (zerbitzu administratiboak, teknikoak eta komunikaziokoak), aurreikusitako defizitaren %90.

c) Gastu orokorretarako eta administrazioko gastuetarako: aurreikusitako defizitaren %35. Portzentaje horri %15 gehituko zaio baldin eta federazioek langileria gasturik eta zerbitzu komunetako gasturik ez badute.

d) Portzentaje horiek handitu egiten ahalko dira erabilgarri dagoen kontu-sail ekonomikoa agortu arte, eranskin honetako “Sarrera” oinarriko 4.b) atalean bildutako aurreikuspenarekin bat. Portzentajearen igoera berdina izanen da hiru ataletan (kontratatutako langileak, zerbitzu komunak eta funtzionamendu gastuak).

5. 2017tik aurrera eginen diren langileen kontratazio berrietarako, diru-laguntza emanen da, bakar-bakarrik, baldin eta kontratazio prozesua irizpide hauei jarraikiz egin baldin bada: txosten bat prestatzea kontratazio beharraren arrazoiak eta prozesuan segituko diren urratsak azaltzeko: eskatzen diren tituluak, esperientzia, beste betebehar batzuk, aplikatuko den puntuazio baremoa, eginen diren probak, eginkizunak, ordainsariak (kasuan kasuko sektorearen hitzarmen kolektiboan finkatutako kopuruak gainditu gabe), deialdiaren publizitatea, etab.; horrez gainera, federazioaren estatutuetan horrelako kontratazioak egiteko ezarrita dauden prozedurak bete beharko dira. Prozedura horren arabera kontratatzen diren langileek ez dute inolako kontratuzko lan harremanik izanen Nafarroako Gobernuarekin: deialdi honen arabera, diru-laguntza jaso dezaketen langileak besterik ez dira izanen.

2. oinarria.–Nafarroako txapelketa ofizialak antolatzea.

1. Atal honetan Nafarroako txapelketa ofizialak (torneo, liga, jardunaldi eta antzekoen bidez) antolatzeko diru-laguntzak sartzen dira.

2. Diruz laguntzen ahal diren txapelketak: oro har, atal honen babesean, honako hauek dira diru-laguntza jaso dezaketenak: txapelketetan izaten diren espezialitate, modalitate eta/edo adinaren araberako kategorietako txapelketak, hain zuzen, kasuan kasuko modalitatean, espezialitatean eta/edo kirolerako adinaren araberako kategorian Nafarroako txapeldun titulua eskuratzera bideratuak, betiere kontuan hartuta “Sarrera” izeneko oinarrian benjaminen azpiko adina dutenen eta master kategoriakoen txapelketetarako ezarritako irizpide orokorrak.

3. Diru-laguntza jaso dezaketen gastuak:

a) Sariak: federazio bakoitzak antolaturik, Nafarroako txapeldun titulua eskuratzera bideratutako kirol maila goreneko txapelketetarako garaikurrak, dominak, txapelak eta maillotak (kirol modalitate bakoitzaren araberakoak), adinaren araberako kategoria, espezialitate eta modalitate guztietakoak. Modalitate batzuetan ohikoa bada, onartuko da garaikur edo domina bat ematea, eta, gehigarri gisa, bestelako sari bat (txapela eta maillota). Lehenengo hiru sailkatuentzako sariak baizik ez dira izanen diruz lagungarriak (edo lehenbiziko laurentzakoak, 3. eta 4. sailkatuak zehazteko zuzeneko lehiaketa ez duten modalitateetan, eta, orobat, topagune moduko azken fase bat egiten duten modalitateetan).

b) Arbitrajeak: atal honetan sartzen dira zehatz-mehatz arbitraje-lanak direnak, eta, orobat, federazioaren kontura txapelketaren kontrolerako eta jarraipenerako antzeko lanak egiten dituzten pertsonak (mahaikideak, ohar-hartzaileak eta antzekoak). Kirol federazio bakoitzak onartu ondoren, NKGIri aurkeztu zaizkion arbitraje tarifak aplikatuko dira. Kirol modalitatea zein den, irizpide hauek aplikatuko dira:

I. Kirol kolektiboetako probetan, arbitraje gastuak azken faseetan, igotzekoetan edo antzekoetan baizik ez dira onartuko, federazioak batera antolatzen baldin baditu balizko parte-hartzaile guztientzat. Horren ondorioetarako, kirol kolektibo gisa hartuko dira ezaugarri hauek dituzten espezialitate edo probak: bi talderen arteko lehia, denbora eta toki berean egiten dena, tresna mugikor baten jabetza txandakatuz, erasoko eta defentsako ekintza tekniko-taktikoen bitartez.

II. Kirol indibidualetako probetan, federazioak antolatutako Nafarroako txapelketetako arbitraje guztiak sartzen dira. Atal honetan, aurreko atalean jaso ez diren gainerako modalitate guztiak sartzen dira.

c) Jokorako materiala: kirol indibidualen txapelketetan, horrelako materialerako gastua onartuko da baldin eta inbentariagarria ez bada eta federazioak berak zuzenean jartzen badu parte-hartzaileen eskura arrazoi teknikoengatik (materialaren homologazioa, eta abar): teniserako, golferako, euskal pilotarako eta antzekoetarako pilotak, badmintonerako luma-bolak, herri kiroletarako egurra, etab. Kirol kolektiboetako azken faseetako txapelketetan erabiltzeko den materiala ere onartuko da. 5.000 euroko muga izanen da modalitate autoktonoen federazioentzat (herri kirolak eta pilota), eta 3.000 eurokoa gainerako federazioentzat.

d) Osasun arreta: kirol modalitate bakoitzaren arriskuen arabera (kasuan kasuko Nafarroako federazioaren edo dagokion Espainiako federazioaren kirol araudiaren bidez onesten direnak), anbulantzien eta/edo osasun arretaren gastuak izanen dira diruz lagungarriak.

e) Instalazioak eta azpiegitura muntatzea: txapelketa egiten deneko instalazioa egokitzeko behar-beharrezkoak diren gastuak. Atal honetan sartzen dira egokitzapen horretarako behar diren langileak eta materiala (hesiak, koltxonetak eta, modalitate bakoitzaren ezaugarri berezien arabera, txapelketarako beharrezkoa den edonolako materiala garraiatu eta instalatzea).

f) Instalazioen alokairua: txapelketarako beharrezkoak diren instalazioen alokairuaren berariazko gastuaren %30 izanen da diruz lagungarria.

g) Oro har, aipatutako txapelketak antolatzeko Nafarroako Kirolaren eta Gazteriaren Institutuaren ustez beharrezkoak eta ezinbestekoak diren gastu guztiak. Atal honetan, txapelketa antolatzeko behar-beharrezkoa eta ezinbestekoa den material suntsigarria sartzen da, baina horren beharra berariaz justifikatu beharko da. Oro har, diruz laguntzeko modukoak hartuko dira txapelketaren antolakuntza orokorrarekin zerikusia duten kontzeptuak, txapelketarako behar-beharrezkoak baldin badira. Ez dira diruz laguntzeko modukoak hartuko, ordea, parte hartzen duten kirolariei eta/edo taldeei zuzenean egozten ahal zaizkien gastuekin lotutako kontzeptuak. Zilegi da txapelketa horiek antolatzeko zuzeneko ardura duten langileen gastuengatik portzentaje bat egoztea diruz laguntzeko moduko gastu gisa.

h) Otordu gastuak, ostatu gastuak eta antzekoak ez dira inola ere diruz lagunduko.

i) Material inbentariagarri gisa har daitekeena erostea ez da inola ere diruz lagunduko.

j) Esku-diruzko saririk ematea ez da inola ere aurreikusiko.

4. Federazio bakoitzak eskaera orokor bat aurkeztu beharko du, non diru-laguntza jaso dezaketen modalitate eta/edo kategoria guztietako Nafarroako txapelketen aurrekontu guztiak bilduko baitira (diru-sarrerak eta gastuak). Horrez gainera, txapelketa eta kontzeptu bakoitzaren datu guztiak zehaztu beharko dira, horretarako inprimaki ofizialak erabiliz (aurrekontuak, egunak eta parte-hartzaile kopurua adierazita).

5. Nafarroako txapelketetarako diru-laguntza nola kalkulatu: Nafarroako txapelketen atal osorako emanen da, modu orokorrean, eta txapelketak antolatzeagatik gertatzen den defizitaren %100i egokituko zaio, kontuan harturik aurreko puntuetan aipatutako zehaztapenak eta inguruabarrak.

6. Atal honetako diru-laguntzen kontura federazio bakoitzak jaso dezakeen kopurua mugatua da, hots:

a) Federazio olinpikoak eta kirol modalitate autoktonoak (herri kirolak eta pilota): 50.000 euro.

b) Olinpikoak ez diren federazioak: 30.000 euro.

3. oinarria.–Txapelketa nazional ofizialetan parte hartzea.

1. Atal honetan sartzen dira autonomia erkidegoetako federazioek Espainiako Txapelketen sailkapen faseetan eta/edo azken faseetan parte hartzeko diru-laguntzak, hau da, kirol modalitate eta/edo espezialitate bakoitzean Espainiako txapeldun titulua lortzeko txapelketetan parte hartzekoak. “Espainiako kopa” izeneko txapelketak ere sartzen dira, betiere deia Espainiako Federazioak egiten badu autonomia erkidegoetako federazioek parte har dezaten.

2. Atal honetan, diru-laguntza emanen da, orobat, kirol modalitate autoktonoen erkidegoen arteko txapelketetan parte hartzeko (herri kirolak eta pilota).

3. Atal honi dagokion diru-laguntza emateko, erreferentziako modulu batzuk ezarriko dira eskatutako jarduera bakoitzerako, hurrengo atalean adierazten diren irizpideei jarraikiz, eta, modulu horiek oinarri hartuta, diru-laguntzaren portzentajeak aplikatuko dira, federazioaren eta jardueraren arabera. Azkenik, espedientea ixteko ebazpenean, emandako zenbatekoa egokituko da benetan gauzatu den jardueraren arabera (distantziak, parte-hartzaileen kopurua eta zenbat egun iraun duen), eta I. eranskinaren 16. oinarrian aurreikusita dauden jardueren arteko doikuntzetako bat izanen da.

4. Erreferentziako moduluak parte-hartzaile kopuruaren arabera zehaztuko dira, baita txapelketaren herrira joateko distantziaren arabera eta haren iraupenaren arabera ere. Distantziak, parte-hartzaileen kopurua, ostatu eta otordu gastuak eta kilometrajea kalkulatzeko, irizpide hauek aplikatuko dira:

a) Joan-etorrien distantzia. Ondoko ataletan aipatzen diren probintziak zein diren, hiru distantzia mota bereizten dira: laburrak, ertainak eta luzeak (txapelketa egiten den herrirainoko kilometro kopurua hartuko da aintzat):

I. Laburrak: Bilbo, Burgos, Huesca, Logroño, Donostia, Soria, Gasteiz, Zaragoza.

II. Ertainak: Albacete, Ávila, Bartzelona, Castelló, Ciudad Real, Cuenca, Girona, Guadalajara, Lleida, León, Madril, Oviedo, Palentzia, Salamanca, Santander, Segovia, Tarragona, Teruel, Toledo, Valentzia, Valladolid eta Zamora.

III. Luzeak: Alacant, Almería, Badajoz, Balearrak, Cáceres, Cádiz, Ceuta, Kordoba, Granada, Huelva, Jaén, A Coruña, Las Palmas, Lugo, Málaga, Melilla, Murtzia, Ourense, Pontevedra, Santa Cruz Tenerifekoa eta Sevilla.

IV. Eskaera egiten den egunean zehaztu gabe baldin badago non eginen den txapelketaren bat, kalkulua aurreko urtean egin zen herrian balitz bezala eginen da, eta gero zenbatekoa egokituko da, benetan egiten den lekuaren arabera. Doikuntza hau I. eranskinaren 16. oinarrian aurreikusita dauden jardueren arteko doikuntzetako bat izanen da.

b) Parte-hartzaileen kopurua: txapelketako akta ofizialetan benetan inskribaturik dauden parte-hartzaileen kopurua, entrenatzailea eta ofizialki onartutako delegatuak eta/edo laguntzaileak barne, kirol modalitatea zein den.

c) Ostatua: 30 euro aplikatuko dira gaua pasatu behar den bakoitzean, eta ondoko irizpideak hartuko dira aintzat gauak pasatzeko gastua kalkulatzeko, distantzien arabera:

I. Laburrak: lehiaketa egunen kopurua ken 1.

II. Ertainak: lehiaketa egunen kopurua.

III. Luzeak: lehiaketa egunen kopurua gehi 1.

d) Otorduak: 12 euro aplikatuko dira otordu bakoitzeko (bazkaria eta afaria). Parte-hartzaileen kopuruaren arabera kalkulatuko da, ondoko irizpide hauei jarraikiz:

I. Laburrak: lehiaketa egunen kopurua bider 2, ken 1.

II. Ertainak: lehiaketa egunen kopurua bider 2, gehi 1.

III. Luzeak: lehiaketa egunen kopurua bider 2, gehi 3.

e) Kilometrajea: parte-hartzaileen kopuruaren arabera kalkulatuko da, ondoko irizpide hauei jarraikiz:

I. Txapelketan gehienez 20 parte-hartzaile badaude (kopuru hori barne): 0,20 euro aplikatuko dira kilometroko 4 parte-hartzaileko (edo zatikia). Kirol modalitateren batean lehiatzeko materialen premia dela-eta garraiorako ibilgailu bereziren bat erabili behar bada, ibilgailu hori ere hartuko da kontuan. Premia, dena dela, eskaeran justifikatu beharko da.

II. Txapelketan 21 parte-hartzaile edo gehiago badaude: ulertuko da bidaia autobusez egiten dela, eta 1,15 euro aplikatuko da kilometroko, gehi kopuru finko bat, 250 euro eguneko.

III. Iruñetik txapelketa eginen den herrirainoko distantziak hartuko dira aintzat (joatea eta etortzea).

IV. Penintsulatik kanpoko bidaietarako, 200 euro pertsona bakoitzeko izanen da erreferentzia Kanarietara joaten bada, eta 100 euro pertsona bakoitzeko gainerakoetarako, gehi Iruñetik Madrilera (Kanarietara, Ceutara eta Melillara joateko bidaietarako) edo Iruñetik Bartzelonara joatekoa (Balearretarako bidaietarako).

5. Diru-laguntza, hasiera batean, jarduera bakoitzari dagokion moduluaren %50ekoa izanen da. Txapelketa bakoitzaren ezaugarriak ikusita, portzentaje hori handitzen ahalko da (%100era iritsi arte), honako irizpide hauen arabera:

a) Errendimendu programa batean sartuta egotea: %25. Kasu honetan, NKGIk 2016. urtean ontzat hartu eta lagundutako errendimendu programak sartuko dira, kontuan hartu gabe haien tramitazio administratiboa zein izan den. Diru-laguntzak emateko ebazpenaren egunean programa horien laguntza emateko ebazpena eman bada 2017rako (urte osorako edo urtearen zati baterako), azken ebazpen horretan sartutako federazioak ere kontuan hartuko dira.

b) Modalitate olinpikoa, paraolinpikoa edo kirol modalitate autoktonoa (herri kirolak eta pilota) izatea: %20.

c) Administrarien gasturik ez duten federazioak (atalak: langileria gastuak eta administrazio zerbitzu komunak): %15.

6. Goian azaldutako prozeduraren bidez lortzen den moduluari txapelketan izena emateko ordaindutako kopuruak gehituko zaizkio. Izena emateko gastuak justifikatzeko, egiaztagiriak aurkeztu beharko dira (fakturak eta ordainketa-agiriak), eta justifikazio-kontuan sartu beharko dira.

7. Atal honetan, federazio bakoitzak 50.000 euro jaso ditzake gehienez federazio olinpikoen eta kirol modalitate autoktonoen (herri kirolak eta pilota) kasuan, eta 30.000 euro gainerako kasuetan.

8. Txapelketa horien azken antolatzaileak (Espainiako Federazioa, Kirolen Batzorde Gorena, beste autonomia erkidego bat, etab.) diru-laguntzaren bat eman baldin badu atal horietakoren batentzat, zenbateko hori deskontatuko da modulu honi dagokion kopurutik, edo, bestela, ez da kontuan hartuko antolatzaileak bere gain hartutako gastuari (ostatua, mantenua, etab.) dagokion modulu zatia, kasua zein den.

4. oinarria.–Txapelketa nazionalak antolatzea.

1. Atal honetan, Espainiako Txapelketatako sektore faseen (edo antzekoen) eta/edo azken faseen antolamendua sartzen da, bai eta Espainiako kopena ere (aurreko oinarrian jasotzen den bezala). Kirol modalitate autoktonoen txapelketak ere sartzen dira, autonomia erkidegoen artekoak (herri kirolak eta pilota).

2. Oro har, diru-laguntza jaso dezakeen gastuaren %50 emanen da, baina aurreikusitako defizita gainditu gabe. Espainiako Federazioari ordaintzen zaion kanonaren edo antzekoaren gastuan, gehienez ere 3.000 euro emanen da txapelketa bakoitzeko. Emandako diru-laguntzaren likidazioa eginen da benetan izandako diru-sarrerak eta gastuak kontuan hartuta. Nolanahi ere, Nafarroako Kirolaren eta Gazteriaren Institutuaren diru-laguntzak ez du aipatutako portzentaje hori gaindituko.

3. Diru-laguntza jaso dezaketen gastuak:

a) Garaikurren, arbitrajeen eta jokorako materialaren gastuak, osasun arretaren gastuak, instalazioak eta azpiegiturak muntatzekoak eta instalazioak alokatzekoak, II. eranskin honen 2.3 oinarrian adierazitakoaren arabera.

b) Antolakuntza, protokolo eta komunikazio gastuak, kartelak egitekoak eta antzekoak.

c) Espainiako Federazioari ordaintzen zaion kanonaren edo antzekoaren gastua.

d) Material inbentariagarriaren erosketa ez da diruz laguntzeko modukoa hartuko, ez eta esku-dirutan ematen diren sariak ere.

e) Oro har, aipatutako txapelketak antolatzeko Nafarroako Kirolaren eta Gazteriaren Institutuaren ustez beharrezkoak eta ezinbestekoak diren gastu guztiak. Atal honetan, txapelketa antolatzeko behar-beharrezkoa eta ezinbestekoa den material suntsigarria sartzen da, baina horren beharra berariaz justifikatu beharko da. Oro har, diruz laguntzeko modukoak hartuko dira txapelketaren antolakuntza orokorrarekin zerikusia duten kontzeptuak, txapelketarako behar-beharrezkoak baldin badira. Ez dira diruz laguntzeko modukoak hartuko, ordea, parte hartzen duten kirolariei eta/edo taldeei zuzenean egozten ahal zaizkien gastuekin lotutako kontzeptuak.

5. oinarria.–Sustapen jarduerak.

1. Nafarroa edo Espainia mailako jarduera ofizialak ez izateagatik, aurreko ataletan sartu ez diren jarduera guztiak sartzen dira atal honetan.

2. Diru-laguntza jaso dezaketen gastuen kontzeptuak II. eranskin honen 2.3 oinarrian (Nafarroako txapelketak antolatzea) adierazitako berberak dira. Gastu horiez gainera, maila bakoitzean aurreikusitako jarduerak egiteko beharrezkoak diren mantenu eta ostatu gastuak eta antzekoak sartzen dira.

3. Eskatzen diren jarduerak mailaka sailkatuko dira, maila bakoitzeko jarduerei dagokien diru-laguntzaren portzentajea ezartzeko. Kasu guztietan, beharrezkoa izanen da proposatutako jarduerak azaldu, zehaztu eta justifikatzea, bakoitzarentzat aurreikusitako helburuak zehaztuta, maila bakoitzerako adierazitako definizioak kontuan harturik.

a) I. maila. Kontzeptu bat baino gehiago hartzen ditu bere baitan: 1) aurreko urtean (2016an) 300 lizentzia edo gutxiago izan dituzten federazioek beren modalitatea sustatu eta garatzeko programak egiteko aurkeztutako eskaerak, zehazki, lizentzia kopurua handitzeko helburua dutenak, federazio hauek izan ezik: aurreko 2 urteetan (2015ean eta 2016an) maila eta atal hauetarako diru-laguntza eskatu ondoren lizentzia kopurua handitu ez bada, eskaeraren lehenbiziko urteari dagokionez (2014ko eta 2015eko lizentzia kopuruari dagokionez); 2) berariaz, emakumeen kirola sustatzeko diren sustapen jarduerak; 3) giza talde behartsuak eta minoritarioak helburu dituzten jarduerak; 4) kirol modalitate autoktonoak (herri kirolak eta pilota) sustatzeko jarduerak. Aplikatu beharreko diru-laguntza: diru-laguntza jaso dezakeen gastuaren %75ekoa, baina aurreikusitako defizita gainditu gabe. Atal honetan ezin dira sartu txapelketa ofizialetan parte-hartzea dakarten jarduerak.

b) II. maila. Kontzeptu bat baino gehiago hartzen ditu bere baitan: 1) aurreko urtean 301 eta 750 lizentzia bitarte izan dituzten federazioek eta 300 lizentzia edo gutxiago izan dituzten federazioek (I. mailan sartzen ez direnak lizentzia kopurua ez handitzeagatik) beren modalitatea sustatu eta garatzeko programak egiteko jarduerak, zehazki, lizentzia kopurua handitzeko helburua dutenak; 2) modalitatearen hobekuntza teknikoa helburu duten jarduerak; 3) kirol antolamendurako proiektuak; 4) Espainiako eta/edo nazioarteko federazioen egutegi ofizialetan sartutako txapelketa eta torneoak (eranskin honetako 4. oinarrian sartzen ez direnak) antolatzea eta haietan parte hartzea. Diru-laguntza: %50.

c) III. maila. Honako hauek hartzen ditu bere baitan: 1) aurreko urtean 750 lizentzia baino gehiago izan dituzten federazioek beren modalitatea sustatu eta garatzeko programak egiteko jarduerak, zehazki, lizentzia kopurua handitzeko helburua dutenak; 2) kirol denboraldiaren bukaerako jardunaldiak, topaketak eta antzekoak (kasu honetan, bazkarietako gastuak eta antzekoak ez dira diruz lagungarriak izanen); 3) ofizialak ez diren gainerako txapelketa eta torneoak antolatzea eta horietan parte hartzea; 4) udako campusak eta antzekoak. Diru-laguntza: %35.

4. Diru-laguntza esleitzeko prozedura:

a) Lehenbizi, I. mailari dagozkion eskaerak aztertu eta baloratuko dira, eta baremoaren arabera dagokien kopurua esleituko zaie, betiere eranskin honetako sarreran bloke honentzat ezarritako muga gainditu gabe.

b) I. maila honetan, aipatutako esleipenaren ondoriozko zenbatekoa atal honetarako erabilgarri dagoen kontu-saila baino handiagoa bada, hainbanaketa eginen da ukitutako federazioen artean.

c) Azkenik, II. eta III. mailetako eskaerak aztertu eta baloratuko dira. Kasu honetan, hainbanaketa egin behar izanez gero, bi maila horientzat eginen da, batera.

6. oinarria.–Prestakuntza jarduerak.

1. Atal honetan federazioek antolatutako etengabeko prestakuntza jarduerak sartzen dira: federazioek beren teknikari, epaile eta arbitroentzat antolatutako prestakuntza eta birziklatze ikastaroetarako diru-laguntza emanen da (jardunaldiak, clinic deiturikoak eta antzekoak), baita teknikari eta/edo kirolari nafarrek (kasuan kasuko Nafarroako federazioaren bitartez inskribatu ondoren) beste entitate batzuek antolatutako ikastaroetan parte hartzeko ere.

2. Kanpo uzten dira deialdi berariazkoago baten bidez diruz laguntzen ahal diren jarduerak, bai eta NKGIk, federazioek eskatuta, kirol teknikari eta entrenatzaileentzako ikastaroen bloke komuna emateko zuzenean kontratatzen dituen gastuak ere.

3. Aplikatuko den diru-laguntza diruz lagun daitekeen gastuaren %30ekoa izanen da, baina aurreikusitako defizita gainditu gabe. Gehienez ere, federazio bakoitzari 4.000 euroko laguntza emanen zaio atal honetan.

4. Hauexek izanen dira aintzat hartuko diren gastu kontzeptuak:

a) Nafarroako federazioek antolatutako jardueretan, honako hauek hartuko dira aintzat: monitoreentzako eta irakasleentzako ordainketak, material didaktikoa, zabalkuntza eta komunikazio gastuak, eta instalazioak (baldin eta NKGIk ezin baditu bere instalazioak edo itundutako beste batzuk erabili).

b) Beste entitate batzuek antolatutako ikastaroetan parte hartzeko, gastu hauek hartuko dira aintzat: izena ematekoak, joan-etorriak, eta ostatu eta otordu gastuak, halakorik badago. Gastu horiek behar diren fakturen bidez justifikatuko dira, benetan egindako gastuaren arabera.

7. oinarria.–Kirol jantziak.

1. Atal honetan, Espainiako Txapelketetan parte hartzen duten Nafarroako selekzioen gastu hauek sartzen dira: kirol jantzi ofizialak (paseokoak zein beroketa egitekoak) eta haien osagarriak erosteko gastuak, betiere Nafarroako Kirolaren eta Gazteriaren Institutuaren oniritziarekin erosi badira.

2. Jantzietan irudi korporatiboaren marka agertu behar da, Nafarroako Kirolaren eta Gazteriaren Institutuak zehazten duena. Eskuratu aurretik, materialaren behin betiko diseinua aurkeztu beharko da Nafarroako Kirolaren eta Gazteriaren Institutuan, eta, eskuratu ondoren, erositako materialaren ale bana. Egokiak direla ikusi ondoren, ale horiek federazioari itzuliko zaizkio.

3. Materialaren ezaugarri teknikoak:

a) Jantzi arruntak: txandala, poloa, parka, zira, izerditakoa, kamiseta eta jokatzeko galtzak.

b) Osagarri arruntak: bidaietarako poltsa eta/edo motxila.

c) Berariazko osagarriak kirol modalitatearen arabera: betiere Nafarroako Kirolaren eta Gazteriaren Institutuaren oniritziarekin.

d) Gomendatutako koloreak: gorria (oinarrizko kolorea), urdina, eta zuria kontrasterako.

4. Aplikatu beharreko baremoa: Kiroletako Batzorde Gorenaren bidez antolatutako Espainiako Txapelketetan parte hartzen duten federazioen eskaerak aztertuko dira lehenbizi; ondoren, errendimendu programetan sartutako federazioenak, eranskin honen 3.5.a) oinarrian jasotako irizipideen arabera; azkenik, aurrekontuko kontu-sailean oraindik diru erabilgarririk balego, gainerako eskaerak aztertuko lirateke. Kasu guztietan, baremo hau aplikatuko zaio aurkezten den aurrekontu osoari, eskatutako jantzien aurrekontuaren arabera:

a) 1.000,00 euro bitarte, kopuru hori barne, %100.

b) 1.000,01 eurotik 2.000,00ra bitarte, %90.

c) 2.000,01 eurotik 3.000,00ra bitarte, %80.

d) 3.000,01 eurotik 4.000,00ra bitarte, %70.

e) 4.000,01 eurotik 5.000,00ra bitarte, %60.

f) 5.000,01 eurotik 10.000,00ra bitarte, %50.

g) 10.000 eurotik gora, %40.

5. Baremoa aplikatu ondoren, deialdirako baimendutako zenbatekoa gainditzen bada, diruz lagundutako federazioen artean hainbanatuko da, honela:

a) Aurrekontuko kontu-saila agortzen bada Kiroletako Batzorde Gorenaren bidez antolatutako Espainiako Txapelketetan parte hartzen duten federazioen eskaerak aztertzean, federazio guztien artean eginen da hainbanaketa.

b) Aurrekontuko kontu-sailean diru aski baldin badago errendimendu programetan sartutako federazioen eskaerak aztertzeko, eta orduan agortzen bada, federazio horien artean eginen da hainbanaketa.

c) Aurrekontuko kontu-saila aski izan bada federazio guztien eskaerei kasu egiteko, aurreko bi ataletako edozeinetan sartu gabeko federazioen artean baizik ez da eginen hainbanaketa.

8. oinarria.–Material inbentariagarriaren ekipamendua.

1. Diru-laguntza eskatzen ahal da tresna informatikoak, kiroleko materiala, bulegoko materiala, komunikazio sistemak eta, oro har, federazioei egokitutako Kontabilitate Plan Orokorraren kontabilitate-irizpideen arabera inbentariagarria den beste edozein material eskuratzeko.

2. Aplikatu beharreko baremoa. Diru-laguntza zehazteko, portzentaje hauek aplikatuko dira, eskatutako materialaren guztirako aurrekontuaren arabera:

a) 601 euro bitarte, kopuru hori barne, %90.

b) 601,01 eurotik 1.200,00era bitarte, %85.

c) 1.200,01 eurotik 1.800,00ra bitarte, %80.

d) 1.800,01 eurotik 2.400,00ra bitarte, %75.

e) 2.400,01 eurotik 3.000,00ra bitarte, %70.

f) 3.000,01 eurotik 3.600,00ra bitarte, %65.

g) 3.600,01 eurotik 4.200,00ra bitarte, %60.

h) 4.200,01 eurotik 5.000,00ra bitarte, %55.

i) 5.000,01 eurotik 10.000,00ra bitarte, %50.

j) 10.000 eurotik gora, %45 bitarte, oinarri honetako 4. atalean zehaztutakoaren arabera.

3. Lehenbizi, 10.000 eurotik beherakoa aurrekontua duten eskaera guztiak aztertuko dira, eta ezarritako portzentajearen arabera dagokien diru-laguntza aplikatuko zaie. Baremoa aplikatu ondoren, deialdirako baimendutako zenbatekoa gainditzen bada, diru-laguntza eskatu eta egoera horretan dauden federazioen artean hainbanatuko da.

4. Aurreko puntuan adierazitako kalkulua egin ondoren oraindik ere diru erabilgarria badago aurrekontuetako kontu-sailean, 10.000 eurotik gorako aurrekontua duten eskaerak aztertuko dira, eta laguntzaren %45 esleituko zaie, unean-unean erabilgarri dagoen aurrekontuaren arabera.

Iragarkiaren kodea: F1612655