Iragarkia

210. ALDIZKARIA - 2016ko urriaren 31

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

725/2016 EBAZPENA, urriaren 20koa, Unibertsitateen eta Hezkuntza Baliabideen zuzendari nagusiak emana, unibertsitateko ikasketak eta derrigorrezko ikasketen ondoko unibertsitatez kanpoko ikasketak egiten dituzten ikasleendako beken deialdi orokorra onesten duena, 2016-2017 ikasturterako.

Nafarroako Gobernuak irailaren 8an hartutako Erabakiaren bidez, baimena eman zitzaion Unibertsitateen eta Hezkuntza Baliabideen zuzendari nagusiari 2016-2017 ikasturterako beken deialdi orokorra, 3.634.104,00 eurokoa, onesteko, unibertsitateko ikasketak eta derrigorrezko ikasketen ondoko unibertsitatez kanpoko ikasketak egiten dituzten ikasleentzat.

Ikusirik Departamentu honetako Baliabide Ekonomikoen Zerbitzuko zuzendariak 2016-2017 ikasturterako beken deialdi orokorraren gainean aurkeztutako txostena.

Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1.d) artikuluaren bidez eskuordetutako ahalmenak erabiliz, eta Baliabide Ekonomikoen Zerbitzuak proposaturik,

EBATZI DUT:

1. Unibertsitateko ikasketak eta derrigorrezko ikasketen ondoko unibertsitatez kanpoko ikasketak egiten dituzten ikasleendako beken deialdi orokorra onestea, 2016-2017 ikasturterako. Ebazpen honen eranskin bakarrean ageri da testua.

2. Deialdi honen gastua 3.634.104,00 eurokoa izanen da eta 2017ko Gastuen Aurrekontuan 2016ko gastuen aurrekontuko 410002 41140 4800 323100 kontu-sailaren baliokidea izanen den kontu-sailaren kargura finantzatuko da, betiere kreditu egokia eta nahikoa badago. 2016ko kontu-sail horren izena “Erdi eta Goi Mailako Ikasketetarako Bekak eta Laguntzak” da.

3. Ebazpen hau eta eranskina igortzea Ogasuneko eta Finantza Politikako Departamentuak Hezkuntza Departamentuan duen kontu-hartzaile delegatuari, Unibertsitateen eta Hezkuntzako Teknologien Zerbitzuari, Lanbide Heziketaren Zerbitzuari, Hezkuntzako Ikuskapen Zerbitzuari, Antolamenduaren eta Aukera Berdintasunaren Zerbitzuari, Ebaluazioaren, Kalitatearen, Prestakuntzaren eta Bizikidetzaren Zerbitzuari, Baliabide Ekonomikoen Zerbitzuari, Ikastetxeen, Finantzaketaren eta Ikasketetarako Laguntzen Atalari, Beka Bulegoari eta Kudeaketa Ekonomikoaren Bulegoari, behar diren ondorioak izan ditzaten.

4. Deialdi hau eta eranskina Nafarroako Aldizkari Ofizialean argitara daitezela agintzea.

Iruñean, 2016ko urriaren 20an.–Unibertsitateen eta Hezkuntza Baliabideen zuzendari nagusia, Nekane Oroz Bretón.

ERANSKINA

2016-2017 ikasturterako beken deialdi orokorra, derrigorrezko ikasketen ondoko unibertsitatez kanpoko ikasketak eta unibertsitateko ikasketak egiten dituzten ikasleentzat

Unibertsitateko ikasketak eta derrigorrezko ikasketen ondoko unibertsitatez kanpoko ikasketak egiten dituzten ikasleendako beka eta laguntzen deialdi orokorra egiten da 2016-2017 ikasturterako. Deialdia ondoko arauek aginduko dute, eta horiek nahitaez bete beharko dira.

I. Deialdiaren ezaugarriak

1. araua

1. Nafarroako Gobernuak ikasketetarako ematen dituen beka eta laguntzak Hezkuntza, Kultura eta Kirol Ministerioak eta/edo Eusko Jaurlaritzak dei egindakoen osagarri dira.

2. Nafarroako Parlamentuak 2017. urterako aurrekontuan ezartzen duen kreditua izanen da deialdi honen muga, deialdi honen bidez araututako beka eta laguntzak onartu eta ordaintzeko. Hori horrela, ematen diren beka guztiak ordaintzeko aurrekontu krediturik aski ez badago, familiaren per capita errenta erabilgarriaren arabera ordainduko dira, txikienetik handienerako ordenan, kreditua bukatu arte. Kreditu ezagatik ordaindu ezin diren eskaerak ukatutzat hartuko dira.

II. Deialdian sartzen diren ikasketak

2. araua

1. Deialdi honetan sartzen diren beka edo laguntzak ondoko ikasketa hauetarako izanen dira:

–Fakultateetan, unibertsitate kolegio edo institutuetan, goi eskola teknikoetan eta unibertsitate eskoletan egindako ikasketak, lizentziadun, ingeniari, arkitekto, diplomadun, maisu-maistra, ingeniari tekniko eta arkitekto tekniko izateko titulua lortzeko direnak.

–Europako Goi Mailako Hezkuntzaren Esparruari egokitutako unibertsitate ikasketak, graduko eta masterreko titulu ofizialak lortzeko direnak.

–Erlijio ikasketak.

–25 urtetik gorakoentzako sarbide ikastaroa, UHUNek emana.

–Egokitzapen kurtsoak, bigarren zikloko unibertsitate ikasketak jarraitu nahi dituzten unibertsitate eskoletako tituludunentzat edo unibertsitateko irakaskuntzen lehenbiziko zikloa gainditu dutenentzat.

–Goi mailako heziketa zikloetara sartzeko prestakuntza ikastaroa.

–Lanbide Lantegiak eta Oinarrizko Lanbide Heziketa.

–Erdi eta goi mailako heziketa zikloak.

–Batxilergoa.

–Kirol ikasketak.

–Arte irakaskuntza profesionalak.

–Goi mailako arte ikasketak

–Hizkuntza eskola ofizialetan egindako hizkuntza ikasketak.

2. Laguntzarik jasoko ez duten kasuak.

a) Ikasketa hauetarako ez da ez bekarik ez laguntzarik emanen: unibertsitateko hirugarren zikloa edo doktoregoa, espezializazio ikasketak, karrera bukaerako lana edo proiektua eta lizentziako tesina, unibertsitateetako berezko tituluak, Haur Hezkuntza, Lehen Hezkuntza edo Derrigorrezko Bigarren Hezkuntza.

b) Orobat, ezin izanen dute ikasketetarako bekarik jaso irakaskuntza kontzeptuagatik, ondoko ikasleek: Lanbide Heziketa, Batxilergoa edo erdi mailako beste ikasketaren bat, titulartasun publikoa duten ikastetxeetan, ikastetxe pribatu itunduetan edo osorik diruz lagundutakoetan eta Nafarroako Gobernuaren diru-laguntza berariazkoa duten ikastetxeetan egiten ari direnek.

c) Hizkuntza eskola ofizialetako ikasketetan, ikasketa osagarriak direnez, laguntzak bakar-bakarrik irakaskuntza edo matrikula kontzeptuengatik emanen dira.

d) Ez zaie beka edo laguntzarik emanen lanbide jardueretan aritzeko gaitasuna ematen duen titulu akademiko baten jabe diren ikasleei, egin nahi dituzten ikasketak maila edo gradu handiagokoak izan ezean (hau da, diplomadun titulu akademikoa izan eta lizentzia bateko ikasketak egitea –4. edo 5. ikasmaila, hala badagokio–, edo master bat).

e) Ez da beka edo laguntzarik emanen bigarren diplomatura bat lortzeko helburua duten ikasketetarako.

f) Ez da beka edo laguntzarik emanen bigarren lizentzia bat lortzeko helburua duten ikasketetarako.

g) Ez da beka edo laguntzarik emanen bigarren master ofiziala lortzeko helburua duten ikasketetarako.

h) Ez da beka edo laguntzarik emanen gradu mailako bigarren titulua lortzeko helburua duten ikasketetarako.

i) Ikasketak aldatzeko bekarik ez da emanen, ikasmailetan gora egiten ez bada. Batxilergoko 2. ikasmaila gainditu ondoren goi mailako heziketa zikloak egiten hasten diren ikasleak arau horretatik salbu geldituko dira.

j) Unibertsitateko lehenbiziko ikasmaila egin ondoren goi mailako prestakuntza ziklo bateko lehen ikasmaila egitera aldatzen diren ikasleei ez zaie bekarik emanen, salbu eta unibertsitateko ikasmaila hori egiteko bekarik izan ez bazuten.

III. Ikasketak zein ikastetxetan egin beharko diren

3. araua

1. Beka edo laguntza eskatzen duten ikasleek beren ikasketak Espainiako ikastetxe publiko nahiz pribatuetan egin beharko dituzte, Hezkuntza, Kultura eta Kirol Ministerioak edo behar den autonomia erkidegoak aitortu eta baimendutakoetan.

2. Ikastetxe publiko, itundu edo diruz lagundutako batean edota familiaren etxetik hurbil egoteagatik aipatu beka edo laguntzen beharrik ez duen ikastetxe batean ikasketak egiteko aukera izanik besteren batean matrikulatzen diren ikasleek ez dituzte jasoko beka edo laguntzak, salbu eta oso inguruabar bereziak gertatu eta agiri bidez frogatzen diren kasuetan, 11.4.1 arauan adierazitako salbuespenarekin.

3. Edonola ere, unibertsitatez kanpoko ikasketetarako beka eta laguntzek martxoaren 13ko 150/1996 Foru Dekretuan ezarritakoa bete beharko dute. Dekretu horrek Nafarroako Foru Komunitateko ikastetxeen sarea berrantolatzeko arauak eman zituen martxoaren 13ko 69/1995 Foru Dekretua aldatu zuen.

4. Zehazki, Foru Komunitatetik kanpoko ikastetxe batean matrikulatzen den ikasleari kasu hauetan bakarrik ematen ahal zaio beka edo laguntza:

a) Nafarroako Unibertsitate Publikoan beka edo laguntzaren xede diren ikasketak egiteko tokia eskatu, baina eman ez bazaio, karrera edozein dela ere.

b) Ikaslea matrikulatu den ikastetxea hurbilago baldin badago bere etxetik Foru Komunitatean kokatuta daudenak baino.

c) Kasuan kasuko ikasketak ez badira eskaintzen Nafarroako Unibertsitate Publikoan.

d) Kasuan kasuko ikasketak beste hizkuntza batean eskaintzen badira.

5. Kasu guztietan, Nafarroako Foru Komunitatetik kanpoko ikastetxeetan egiten diren goi mailako ikasketetarako, kontzeptu bakoitzean ez da beka edo laguntzarik emanen baldin eta Foru Komunitateko ikastetxe batean eginez gero baino garestiago ateratzen bada.

IV. Onuradunak, eta eskatzaileak eta familia unitateko gainontzeko kideek bete beharreko baldintza orokorrak

4. araua

1. Honako hauek izanen dira ikasteko beka edo laguntzen eskatzaile eta balizko onuradun, kasu guztietan:

a) Gurasoak edo legezko tutoreak, honako hauek eginiko ikasketengatik:

–30 urtetik beherako seme-alabek (2015eko abenduaren 31n).

–30 urtetik gorako seme-alabek (2015eko abenduaren 31n), %33ko edo hortik gorako desgaitasuna badute.

Betiere seme-alabak haiekin bizi badira eta beste familia unitate bat osatu ez badute.

b) Beren izenean, aurreko lerroaldean sartzen ez direnak.

2. Eskatzaileak edozein egoera zibil duela ere, familiatik aparte eta bere kontu bizi dela alegatzen badu, modu sinesgarrian egiaztatu beharko du aparte bizitzeko baliabide ekonomiko aski dituela, baita etxebizitza baten titulartasuna edo alokairua ere. Etxebizitza horrek ikasturtean zehar ikaslearen bizileku izan beharko du, ondorio guztietarako. Udalak emandako erroldatze eta bizikidetza ziurtagiria, 2015. urteari dagokiona, aurkeztu beharko du.

Beren kontu bizi diren ikasleek ez dute egoitza laguntzarako eskubiderik.

Eskaera zehatz-mehatz aztertuko da, eskatzailearen eta haren gurasoen errenta eta benetako egoera egiaztatuz, baita behar dituen baliabide ekonomikoak irabazi-asmorik gabe ematen dizkionaren dohaintzak ere. Kontu horiek 2015eko abenduaren 31ko datarekin aski frogatzen ez badira, eskaera ukatu eginen da.

3. Eskatzaileak eta familia unitateko gainontzeko kideek baldintza hauek bete beharko dituzte:

a) Nafarroan erroldatua egon eta bertan bizitzea 2015. urtean eta gaur egun ere (eskaera aurkezteko epe bukaera).

b) PFEZa Nafarroan ordaintzea 2015. urtean, errentaren aitorpena egitera beharturik egonez gero.

Ikasleak eguneratuak izan beharko ditu zerga arloko betebeharrak.

4. Familia unitateko kideren batek 2016ko urriaren 31n aurreko ikasturteetako beka edo laguntzen zenbatekoak itzultzeke baditu, ez da beka edo laguntzarik emanen.

5. Beka edo laguntza eskatua duen familiako kideak deialdian aipatutako ikasketak adierazi diren ikastetxeetakoren batean egin behar ditu.

6. Beharrezkoa da, horretarako betebeharrak betetzen badira, 2016-2017 ikasturterako beka eskatu izatea Hezkuntza, Kultura eta Kirol Ministerioari edo Eusko Jaurlaritzari. Hezkuntza, Kultura eta Kirol Ministerioak edo Eusko Jaurlaritzak beka hori ukatzen badu, ezin da arrazoi hauengatik izan:

a) Deialdi horietan agiriak aurkezteko epeak ez betetzea.

b) Eskabideko oinarrizko datuak ez betetzea edo lehiaketa erabaki ahal izateko beharrezkoa diren agiriak, eskatu bazaio ere, ez aurkeztea.

c) Baztertua izatea.

Betebehar akademikoak ez betetzeagatik eskatu ez bada, horren egiaztagiriak aurkeztu beharko dira.

Bestela, beka automatikoki ukatuko da.

Oroitarazi behar da Ministerioaren eta Eusko Jaurlaritzaren deialdiak ebazteko, deialdietan jasotzen diren oinarri arautzaileak aplikatzen direla, eta bereziki bere zerga araubidea errenta zehazteko.

7. Ezin da ikasturte berean beste ikasketa batzuetarako beste bekarik eskatu.

8. Beka edo laguntza eman den xederako erabili behar da, hots, klasera joateko, azterketetara aurkezteko eta, hala badagokio, laguntzaren helburu diren gastuak ordaintzeko.

V. Ematen diren beka edo laguntza motak

5. araua

1. Deialdi honetako beka edo laguntzen xedea izanen da premia duten familiei laguntza ematea, familiako kideen ikasketa gastuen zati bat ordaintzeko.

2. Bekak edo laguntzak honako kontzeptu hauetarako eskatzen ahalko dira:

–Irakaskuntza edo matrikula. Laguntza ez da eskatzen ahal Hezkuntza, Kultura eta Kirol Ministerioak, Nafarroako Gobernuak edo beste autonomia erkidego batek oso-osorik itundutako edo diruz lagundutako mailak unibertsitatez kanpoko ikastetxeetan ikasten ari diren ikasleentzat.

–Hiriarteko garraioa. Garraiorako laguntzak eman daitezke familiaren bizilekutik ikastetxearen herrira 5 km edo gehiago badira eta astean gutxienez 4 bidaia (bi joateko eta bi etortzeko) egiten badira.

Diruz lagundutako edo doako garraioa edo Nafarroako Gobernuak antolatutako unibertsitateko garraioa erabiltzen dutenek ez dute zerbitzu horretako bidaiari dagokion laguntzarik jasoko.

–Jantokia (ikasleak astean bi egunetan edo gehiagotan, eskola ordutegia dela kausa, etxetik kanpo bazkaldu behar badu eta jantokiak diru-laguntzarik hartzen ez badu, eta ikastetxea dagoen herritik familiaren etxea dagoen herrira gutxienez 5 km-ko tartea badago).

–Egoitza: Egoitzarako laguntza emateko, eskatzaileak ikasketa presentzialak egin behar ditu, eta frogatu familiaren etxetik kanpo bizi behar duela ikasturtean zehar, familiaren etxearen eta ikastetxearen arteko distantziagatik, garraiobideen eskasiarengatik eta eskolen orduak aldatzeko aukera ezagatik.

Garraiorako, jantokirako eta egoitzarako beka edo laguntzen ondorioetarako, bekadunak hautatuko dituen organoak familiaren etxetzat har dezake ikastetxetik hurbilen dagoena, legezko helbidea ez bada ere.

Zehazki, deialdiko beka eta laguntzen ondorioetarako, familiaren etxetzat hartuko da familia unitateko edozein kidek ikastetxetik hurbilen duena.

Egoitzarako laguntza bateraezina da garraioari eta jantokiari dagozkienekin, baita Nafarroako Gobernuak antolatutako unibertsitateko garraioari dagokionarekin ere. Garraiorako eta jantokirako laguntzak bateraezinak dira egoitzarako zeinahi laguntza eskaerarekin.

Garraiorako eta jantokirako laguntzen zenbatekoen batura ezin da egoitzarako laguntzaren zenbatekoa baino handiagoa izan; salbuespenez, 11.4.2 arauaren bigarren lerroaldean sartzen diren ikasleei ematen zaien zenbatekoa muga horren %10eraino handitzen ahalko da.

–Laguntza berezia (kasu bakanetan bakarrik, ikus 11.4.7 araua).

VI. Unibertsitatez kanpoko mailako ikasketetarako baldintza akademikoak

6. araua

1. Unibertsitatez kanpoko ikasketetarako beka edo laguntza lortzeko ezinbestekoa da eskatzaileak 2016-2017 ikasturterako ikasmailaz edo mailaz igotzea, indarra duten ikasketa planen arabera.

Batxilergoko lehen mailan, lanbide lantegietan, oinarrizko lanbide heziketan eta erdi edo goi mailako heziketa zikloetan, ikasmaila horretan matrikulatuta egoteko baldintzak betetzea.

Irakasgai edo lanbide moduluren bat gainditu ez arren, ikasmailaz igotzea onartzen duten unibertsitatez kanpoko ikasketetako ikasmailetan arituz gero, beka emanen da, baldin eta irakasgai bat edo lanbide modulu bat baino gehiago gainditu gabe uzten ez bada.

Irakasgairen bat edo modulu profesionalen bat gainditu gabe edukiz gero eta aurreko arauek ikasleari beka edo laguntza lortzeko bide ematen badiote, haren zenbatekoa %70era gutxituko da eskubidea sortzen duten kontzeptu guztietan, eskatzailearen per capita errenta tartearen arabera.

2. Ikasmaila errepikatzen ari diren ikasleei ez zaie bekarik emanen.

3. Ikasleen matrikulak ikasmaila oso bati dagokion eskola orduen kopurukoa izan beharko du, kasu bakoitzean indarra duen ikasketa planaren arabera. Ondokoa salbuespentzat hartuko da:

Urrutiko Batxilergoaren ikasketa ofizialetako ikasleek, aurrez lehen ikasmaila osoan matrikulaturik egon badira eta, beraz, irakasgai solteetako matrikula egin badezakete, beka erdietsi ahal izateko, gutxienik lau irakasgaitan matrikulatu beharko dute, eta horiek osorik gainditu.

4. Ikasturteren bat ikasi gabe pasatu baldin bada, 2015-2016 ikasturterako adierazitako baldintzak ikasleak egindako azken ikasturtean betetzea eskatuko da.

5. Bekadun gisa osoki edo partzialki egindako ikasketen kasuan, ezin izanen da beka edo laguntzarik lortu ikasketak aldatu badira, aldaketa horrek hezkuntza prozesuan ikasturte bat edo gehiago galtzea baldin badakar, 2.2 arauan xedatutakoa izan ezik.

VII. Unibertsitate mailako ikasketetarako baldintza akademikoak

7. araua

Unibertsitate mailako ikasketetarako beka edo laguntza lortzeko, honako baldintza akademiko hauek bete behar dira:

1. Gradua lortzera bideratutako unibertsitate ikasketak.

1.1. 2015-2016 ikasturtean ondoko kalifikazioak lortzea:

Ikasketa hauetan, ekain eta iraileko deialdietan matrikula egin zuen kredituen %70 gutxienik gainditzea: Goi Eskola Teknikoak, Itsasgintza Zibila, Informatika Fakultateak, Arkitektura eta Ingeniaritza Teknikoko eta Informatikako Unibertsitate Eskolak.

Gainerako unibertsitate ikasketak edo goi mailako ikasketak badira, matrikula egin zuen kredituen %80 gutxienik gainditzea.

Kasu guztietan, deialdiren batean ikasleak azterketa egiteari uko egiten badio, irakasgai horiek gainditu gabeko irakasgaitzat hartuko dira.

1.2. Beka lortu ahal izateko, eskatzaileek 2016-2017 ikasturtean 60 kreditutan matrikulatuta egon beharko dute gutxienez, hau da, denbora osoko ikasketetan aritu beharko dute.

1.3. Hala ere, ikasturte batean 30etik gorako eta 60tik beherako kreditutan matrikulatuta dauden ikasleek ere jaso dezakete beka. Deialdi honen ondorioetarako, egoera honen izena matrikula partziala da, eta arau hauek aplikatuko dira:

–Matrikula partziala aukeratzen dutenek, eskura dituzten kreditu guztietan matrikulatu ez badira, matrikularako eta garraiorako laguntza jaso dezakete bakarrik.

–Gainera, kreditu horiek lauhileko/seihileko bakar batean egiten badira, bekaren zenbatekoa ondokoa izanen da: garraio kontzeptua badagokio, haren %50, gehi matrikula kontzeptua (kasu honetan ez da aplikatuko %50eko murrizketa).

–Hurrengo ikasturtean beka mantentzeko, matrikulatutako kreditu guztiak gainditu beharko dituzte.

1.4. Matrikula sei hilean behin edo lau hilean behin egiten den ikasketa planen kasuan, beka lortu ahal izateko, aurreko atalean ezarritako kreditu kopuruaren %50ean matrikulatu beharko dute ikasleek. Hala ere, hurrengo lauhilekoan edo seihilekoan matrikula osatu beharko dute, 2. puntuan adierazitako kreditu kopurura iristeko. Matrikula aldatu edo zabaltzen bada, agiri bidez frogatu beharko da Hezkuntza Departamentuko Beka Bulegoan

1.5. Presentziala ez beste modalitate bateko graduko ikasketak egiten dituztenek matrikularako laguntza eskuratzen ahalko dute. Hurrengo ikasturtean beka mantentzeko, matrikulatutako kreditu guztiak gainditu beharko dituzte, edo arau honetan oro har ezarritako ehunekoa, ikasmaila osoko matrikula egin bada.

2. Kredituka egituratuta dauden ikasketak (gradukoak salbu).

2.1. 2015-2016 ikasturtean aurreko 1.1 puntuan graduko ikasketetarako ezartzen diren kalifikazioak lortzea eta baldintzak betetzea.

2.2. Ikaslea, gutxienik, 2016-2017 ikasturtean kreditu kopuru honetan matrikulaturik egotea: ikasketa plana osatzen duten kredituen kopurua zati ikasketa plan horren urte kopurua, alde batera utzita hautapen libreko irakasgaien kredituak. Betiere, planen urte kopurua kontatzeko orduan, azaroaren 27ko 1497/1987 Errege Dekretuan (abenduaren 14ko Estatuko Aldizkari Ofiziala) eta ondoko aldaketetan ezarritakoa aintzat hartuko da; izan ere, errege dekretu horren bidez ezarri ziren Espainia osoan ofizialak eta baliozkoak diren unibertsitate tituluetako ikasketa planetarako jarraibide orokor komunak.

Matrikula aldatu edo zabaltzen bada, agiri bidez frogatu beharko da Hezkuntza Departamentuko Beka Bulegoan.

2.3. Hala ere, ikasturte batean 30etik gorako eta aurreko atalean xedatutakoaren beherako kreditutan matrikulatuta dauden ikasleek ere jaso dezakete beka. Deialdi honen ondorioetarako, egoera honen izena matrikula partziala da, eta arau hauek aplikatuko dira:

–Matrikula partziala aukeratzen dutenek, eskura dituzten kreditu guztietan matrikulatu ez badira, matrikularako eta garraiorako laguntza jaso dezakete bakarrik.

–Gainera, kreditu horiek lauhileko/seihileko bakar batean egiten badira, bekaren zenbatekoa ondokoa izanen da: garraio kontzeptua badagokio, haren %50, gehi matrikula kontzeptua (kasu honetan ez da aplikatuko %50eko murrizketa).

–Hurrengo ikasturtean beka mantentzeko, matrikulatutako kreditu guztiak gainditu beharko dituzte.

2.4. Presentziala ez beste modalitate bateko ikasketak egiten dituztenek matrikularako laguntza eskuratzen ahalko dute. Hurrengo ikasturtean beka mantentzeko, zer kreditutan matrikulatu diren, horiexek guztiak gainditu beharko dituzte, edo 7. arauan orokorrean ezarritako portzentajea, kurtso osoko matrikula egin bada.

3. Gutxieneko irakasgai edo kredituetan baino gehiagotan matrikulatuz gero, horiek denak kontuan hartuko dira ebazpen honen bidez ezarririko betebehar akademikoak baloratzeko.

Hori deusetan ukatu gabe, hautapen organoek baloratu eta aintzat hartzen ahalko dute ikaslearen aprobetxamendu akademiko aparta, kasuan kasuko ikasketa planak ezarritako urte kopurua baino denbora laburragoan egiten baditu bere ikasketak.

4. Unibertsitatearen ikasketa planek edo araudiak mugatzen badute ikasleak zenbat kredituren matrikula egin dezakeen, ikasleak beka eskura dezake aukera duen irakasgai edo kreditu guztietan matrikulatzen bada, aukera duen guztietan jakina, nahiz eta aurreko paragrafoan aipatutako gutxieneko kopurura iristen ez bada ere. Egoera hori agiri bidez frogatuko da.

5. Ikasleak 2016-2017 ikasturtean matrikulaturik egon behar duen irakasgai edo kredituen gutxieneko kopurua, aurreko ataletan finkatutakoa, ez zaie karrerako azken kurtsoa egiten ari direnei eskatuko, karrera bukatzeko falta zaizkien kredituengatik, aurreko kurtsoko edo kurtsoetako aprobetxamendu akademiko hobea dela kausa matrikulatutako gutxieneko irakasgai edo kreditu kopuru hori ez badute. Horregatik ez bada, 2016-2017 ikasturtean matrikulaturiko irakasgai edo kredituek gutxienez ere beka lortzeko oro har behar direnen %50 izan beharko dute.

6. Aurreko ataletan aipatutako gutxieneko horietan ez dira inola ere sartuko espezialitate desberdinetako irakasgaiak, ez kasuan kasuko titulua eskuratzeko behar den kreditu kopurua gainditzen duten irakasgaien kredituak, ez eta irakasgai edo kreditu aitortuak, baliozkotuak, egokituak, transferituak edo antzekoak ere.

7. Ikasketa planaren kurtsoak adina deialditan lortu ahal izanen da beka, bai eta beste batean ere. Urte gehigarri horretan bekaren zenbatekoa legokionaren %50ekoa izanen da, matrikula kontzeptuagatik emanen dena izan ezik, kasu horretan legokionaren %100ekoa izanen baita.

8. UHUNek hogeita bost urtetik goitikoentzat antolatzen duen unibertsitatera sartzeko prestakuntza ikastaroa egiten duten ikasleek urte bakarrean izanen dute ikastaro horretarako beka.

9. UHUNen egiten diren gradu ikasketetan, ikasleek 30 kreditutan matrikulatu beharko dute gutxienez. Hurrengo urtean beka jaso nahi izanez gero, kreditu guztiak gainditu beharko dituzte. Egoera hau ez da matrikula partzialtzat hartuko. Kurtso osoko matrikula egin bada, arau honetan oro har ezarritako ehunekoa gainditu beharko da hurrengo ikasturtean beka mantentzeko.

10. UHUNen egiten diren master ikasketetan, ikasleek 30 kreditutan matrikulatu beharko dute gutxienez. Hurrengo urtean beka jaso nahi izanez gero, kreditu guztiak gainditu beharko dituzte. Egoera hau ez da matrikula partzialtzat hartuko.

11. Beka edo ikasketarako laguntza lortzen duten goi mailetako ikasleei, 2015-2016 ikasturteko irakasgai edo kredituren bat gainditu gabe badute, bekaren %70 besterik ez zaie ordainduko, eskubidea sortzen duten kontzeptu guztiak murriztuz, eskatzailea sarturik dagoeneko per capita errenta tartearen arabera.

12. %65eko edo hortik gorako desgaitasun aitortua duten ikasleek beren eskola orduen kopurua %50era arte murrizten ahalko dute, eta artikulu honetako aurreko ataletan ezarritako gutxienekoak muga horietara murriztuko dira. Beka berritzen ahalko dute matrikulatuta dituzten kredituen %50 gainditzen badute.

%65eko edo hortik gorako desgaitasuna izan eta eskola orduen kopurua murriztea erabaki duten bekadunek kasuan kasuko ikasketa planak ezarritako iraupena baino bi urte gehiagotan lortzen ahalko dute beka, Ingeniaritza edo Arkitekturako ikasketen kasuan izan ezik, horietan epe hori lau urtekoa izanen baita.

Ikasleak ez badu matrikula murriztua egiteko eskubidea erabiltzen eta oro har ezarritako kreditu kopuru osoan matrikulatzen bada, dagozkion beken zenbatekoak %50 handituko dira, matrikula kontzeptuagatik ematen denarena izan ezik.

Ikasle hauek matrikula murriztua aukeratzen badute, ez zaie aplikatuko matrikula partzialaren kasuetan ezartzen den zenbatekoen muga.

13. Ebazpen honetako deialdiaren bekak titulazio bikoitzak ikasten ari direnei emateko, aurreko artikuluetan ezarritakoa aplikatuko da, ondoren adierazten diren salbuespenekin.

a) Matrikularen kreditu kopurua.

Titulazio bikoitzak ikasten ari direnek, gutxienik, kreditu kopuru honetan matrikulatu behar dute: ikasketa plan bateratua osatzen duten kredituen kopurua zati ikasketa plan horren urte kopurua.

b) Aurreko ikasturteko errendimendu akademikoa.

Egiten diren bi titulazioak jakintza arlo berekoak ez badira, beka lortzeko behar den errendimendu akademikoa eskakizun akademiko txikiena duen arlorako ezarritakoa izanen da.

c) Bekadun izaeraren iraupena.

Ikasketa planaren ikasmailak adina urtetan eskuratu ahal izanen da titulazio bikoitzak ikasteko beka.

Hala ere, titulazio bat (edo biak) Arkitektura eta Ingeniaritza/Ikasketa teknikoak arlokoa bada, aurreko lerroaldean ezarritakoa baino urte bat gehiago izaten ahalko da beka.

VIII. Master titulu ofiziala lortzeko ikasketetarako baldintza akademikoak

8. araua

Master titulu ofiziala lortzera bideraturiko beka edo laguntza eskuratzeko, honako baldintza akademiko hauek bete behar dira:

1. Master bat egiteko aukera ematen dioten aurreko ikasketak gaindituak izan beharko ditu ikasleak, edo behar den titulua eduki beharko du.

2. Master ofizialetako lehen ikasmailan beka eskatzeko, ikasleak 2016-2017 ikasturtean gutxienez 60 kreditutan matrikulaturik egon beharko du.

Unibertsitatearen ikasketa planek edo araudiak mugatzen badute ikasleak zenbat kredituren matrikula egin dezakeen, ikasleak beka eskura dezake aukera duen irakasgai edo kreditu guztietan matrikulatzen bada, aukera duen guztietan jakina, nahiz eta aurreko paragrafoan aipatutako gutxieneko kopurura iristen ez bada ere. Egoera hori agiri bidez frogatuko da.

Gutxieneko kreditu kopuruan baino gehiagoan matrikulaturik badago, horiek guztiak hartuko dira kontuan ikaslearen errendimendu akademikoa baloratzeko.

Master ofizialen kasuan, ikasketa planaren ikasmailak adina deialditan lortu ahal izanen da beka, ez gehiagotan. Horretarako, ulertuko da 60 kreditu baino gehiagoko eta 120 kreditu baino gutxiagoko ikasketa planek urte eta erdi dirautela. Kasu horretan, bigarren urteko bekaren zenbatekoa deialdian xedatutakoari jarraikiz bidezko izanen zatekeenaren %50ekoa izanen da, irakaskuntzarako laguntza izan ezik, hori osorik ordainduko baita.

3. Master ofizialetako ikasketetako lehenbiziko mailarako beka eskatzen dutenek masterra egiteko aukera ematen dioten unibertsitate ikasketetako espediente akademikoan 6,50 puntuko batez besteko nota dutela frogatu beharko dute. Masterrak lanbide arautu batean jarduteko gaitzen badu, batez besteko nota 6,00 puntukoa izanen da. Horretarako, irakaskuntza teknikoetako ikasketen batez besteko notak 1,17 koefizientearekin biderkatuko dira.

Masterra egiteko aukera bigarren ziklokoak bakarrik diren titulazioak gainditzeari esker lortu bada, batez bestekoa kalkulatzeko, aurretik egindako lehen zikloko kalifikazioak ere hartuko dira kontuan.

4. Masterreko bigarren urtean beka eskatzeko, ikasleak lehenengo ikasmailan matrikulatuta dituen kreditu guztiak gainditu dituela frogatu beharko du. Horrez gain, ikasleak masterra egiteko aukera ematen duen batez besteko nota duela (aurreko puntuan adierazten dena) frogatu beharko du eta titulua lortzeko falta zaizkion kreditu guztietan matrikulatu.

5. Aurreko puntuan adierazten den batez bestekoa kalkulatzeko, arau hauek aplikatuko dira:

5.1. Kalifikazioak baremo honen arabera kontatuko dira:

–Ohorezko matrikula (bikain eta aipamena) = 10 puntu.

–Bikain (9-10 puntu) = 9 puntu.

–Oso ongi (7-8,9) = 7,5 puntu.

–Nahikoa edo gai (5-6,9) = 5,5 puntu.

5.2. Irakasgaien arabera antolaturiko ikasketa planak izanez gero, batez besteko nota kalkulatuko da guztira lorturiko puntuak irakasgai guztien artean zatituz.

Kredituen arabera antolatutako ikasketa planen kasuan, irakasgai bakoitzari aurreko baremoa aplikatu eta gero lortzen den puntuazioa haztatuko da irakasgaiaren kreditu kopurua kontuan hartuta, formula honi jarraikiz:

B = (P x IKK) / EKK

B = Irakasgai bakoitzean lortutako notaren haztapenaren balioa.

P = Irakasgai bakoitzaren puntuazioa, aurreko puntuko baremoa kontuan hartuta.

IKK = Irakasgaiaren kreditu kopurua.

EKK = Eginiko kreditu kopurua, agindu honen arabera kontatzen ahal dena.

Formula horren aplikazioaren ondoriozko balioak batu eginen dira. Horren emaitza izanen da azken batez bestekoa.

5.3. Baliozkotu, egokitu eta parekatutako irakasgai edo kredituak abiapuntuko ikastetxean lortutako kalifikazioari dagozkion puntuetan emanen dira. Kalifikazio hori ez dagoenean nahikotzat joko da (5,5 puntu).

5.4. Kalifikaziorik ez daukaten irakasgai eta kreditu onartuak ez dira espedientean sartuko.

5.5. Atzerriko unibertsitateetatik datozen espedienteen batez besteko nota kalkulatzeko, hautapen epaimahaiak Espainiako hamartar sistemara egokituko du, irakasgaiz irakasgai, kontuan hartuz jatorrizko kalifikazioan gainditzeko behar den gutxieneko nota eta gehieneko nota eta horren arabera Espainiako kalifikazio hamartarreko sisteman dagokiena.

5.6. Masterreko lehenbiziko maila egin behar duten ikasleen batez bestekoaren ziurtagiriak egitean, unibertsitateek irailaren 5eko 1125/2003 Errege Dekretua hartu beharko dute kontuan. Dekretu horrek ezartzen ditu kredituen Europako sistema eta kalifikazioen sistema, Espainia osoan balio duten unibertsitateko titulazio ofizialetan.

6. %65eko edo hortik gorako desgaitasun aitortua duten ikasleek beren eskola orduen kopurua %50era arte murrizten ahalko dute, eta artikulu honetako aurreko ataletan ezarritako gutxienekoak muga horietara murriztuko dira. Beka berritzen ahalko dute matrikulatuta dituzten kredituen %50 gainditzen badute.

%65eko edo hortik gorako desgaitasuna izan eta eskola orduen kopurua murriztea erabaki duten bekadunek kasuan kasuko ikasketa planak ezarritako urte kopurua bider bitan lortzen ahalko dute beka.

Ikasleak ez badu matrikula murriztua egiteko eskubidea erabiltzen eta oro har ezarritako kreditu kopuru osoan matrikulatzen bada, dagozkion beken zenbatekoak %50 handituko dira, matrikula kontzeptuagatik ematen denarena izan ezik.

Ikasle hauek matrikula murriztua aukeratzen badute, ez zaie aplikatuko matrikula partzialaren kasuetan ezartzen den zenbatekoen muga.

IX. Datuak bildu eta lagatzea

9. araua

Beka edo laguntzen eskatzaileek inprimaki ofizialetan eskatzen zaizkien datu guztiak eman beharko dituzte. Datu horiek eman nahi ez izateak eskatutako beka ukatzea ekar dezake berarekin.

Bekarako eskaera aurkezteak berarekin dakar hezkuntza administrazioei baimena ematea beste administrazio publiko batzuei informazioa eskatzeko, beka eskaera ebazteko beharrezkoak diren identifikazio datuak, inguruabar pertsonal, akademiko eta familia inguruko guztiak eta, orobat, errenta eta ondareari buruzko datuak ezar, ezagut eta egiazta ditzaten.

Inprimaki horietan jarritako datu pertsonalak, eta bekak edo laguntzak emateko eskatzen diren gainerako agiriak, Hezkuntza Departamentuko Baliabide Ekonomikoen Zerbitzuaren ardurapeko fitxategi automatizatu batean sartuko dira.

Aipatu unitate organikoak edozein unetan erabil ditzake fitxategi horretako datuak, egiazkoak ote diren baieztatzeko.

Hezkuntza Departamentuak familia unitateko kideen datu ekonomiko-finantzarioak eskura ditzake Ekonomia, Ogasun, Industria eta Enplegu Departamentutik, paperean eta euskarri informatikoan hartzeko moduko igorpen elektronikoaren bidez, beka eta laguntzen deialdi orokorreko 4. eta 10. arauetan aipatzen diren baldintza ekonomikoen gaineko informazioa osatzeko, hots: diru-sarrerak, errentak, inbertsioak, ondareko ondasunak, subsidioak, onurak, pentsio planak, zerga beharkizunak eta beste.

Hezkuntza Departamentuak ahalmena du eman eta ukatu diren beka eta laguntzen zenbateko eta kontzeptuei buruzko datuak eta eskatzaileen identifikazio eta ikasketei buruzkoak Hezkuntza, Kultura eta Kirol Ministerioari, udalei eta ikastetxeei lagatzeko, eta bankuko datuak, orobat, beka edo laguntza kobratzeko eskatzaileak hautatutako finantza entitateei.

X. Baldintza ekonomikoak

10. araua

Honako hauek dira eskatzen diren baldintza ekonomikoak:

10.1. Ikasketarako beka edo laguntza hartu ahal izatearen ondorioetarako, familiaren errenta erabilgarriaren eta familiaren ondarearen atalasea hartuko da kontuan, deialdiaren 10. eta 11. arauetan xedatu bezala.

10.2. Familiaren errenta.

a) Familia unitatea zer den.

Bekarako, familia unitateko kide hauek hartuko dira kontuan: ikaslea, haren aita eta haren ama edo, bidezko bada, tutorea edo ikasle adingabea zaindu eta babesten duen pertsona, eta senide ezkongabeak, 2015eko abenduaren 31n 30 urtetik beherakoak badira eta egun horretan familiaren etxean bizi baziren, edo zaharragoak, legez %33ko edo hortik gorako desgaitasuna badute.

Gurasoak bereiziak edo dibortziatuak badira, beka eskatzen duen ikaslearekin bizi ez dena, aita edo ama, ez da zenbatuko.

Alargunak edo dibortziatuak berriz ezkonduz gero, ezkontide berria familia unitateko kidetzat hartuko da ondorio guztietarako. Izatezko bikoteen kasuan, berdin jokatuko da.

Ikaslea ezkondua bada edo bikotekidearekin bizi bada, familia unitatea eurek osatuko dute, bai eta arestian aipatu diren adinaren, bizikidetasunaren eta desgaitasunaren gaineko baldintzak betetzen dituzten seme-alaba ezkongabeek ere, horrelakorik badu. Halakoetan, eskatzailea burujabetzat hartuko da eta 4.1.b) araua aplikatuko zaio.

Deialdi honetako kide konputagarriak, 4.6 arauan aipatzen diren baldintzak betetzen badituzte, eskaeran sartu behar dira.

b) Familia unitateko kide bakoitzaren banakako errenta nola kalkulatu.

2015eko PFEZren aitorpena aurkeztu beharra duten familia unitateko kideen kasuan, hauxe izanen da banakako errenta:

–Zerga oinarriaren zati orokorra.

–Ken ezkontidearen alde konpentsazio pentsioagatik ordaindutako kantitateak eta elikatzeko urteko sariak, biak ere epailearen erabakiz ezarriak, eta bikotekide egonkorraren alde ordaindutako kantitate legez galdagarriak.

–Gehi zerga oinarriaren aurrezkiaren zati berezia, kenduta 2011tik 2014ra bitarteko ondare irabazi eta galeren saldo garbi negatibo guztiak eta aurrezkiaren zerga oinarrian sartu beharreko 2011tik 2014ra bitarteko kapital higigarriaren etekinen saldo garbi negatiboa.

–Gehi PFEZaren ondorioetarako salbuetsita dauden gainerako errentak, hala nola erabateko baliaezintasun iraunkorreko pentsioak edo baliaezintasun handikoak, kalte-ordainak, loteria sariak, aitak edo amak seme-alaben mantenurako hartzen dituen urteko sariak, kontuan hartu gabe jasotako ikasketa beka edo laguntzak.

Ondorio praktikoetarako, banakako errenta 2015eko ekitaldiko pertsona fisikoen errentaren gaineko zergari dagozkion laukitxoekin eragiketa hauek eginez kalkulatuko da:

507 laukia - 511 laukia - 822 laukia + 8841 laukia – 809 laukia +
8825 laukia + 8834 laukia + 8833 laukia + 8832 laukia + 8831 laukia + 529 laukia (*)

(*) Arestian aipatutako errenta salbuetsiak ez dira kontuan hartuko haien batura, familia unitateko kide guztiak kontuan izanda, ez bada 10.000 eurora iristen.

PFEZaren aitorpena egitera beharturik ez dauden familia unitateko kideen kasuan, bakoitzaren errenta honela kalkulatuko da: 2015. urtean eskuratutako diru-sarrera gordinen batura, edozein dela ere beren iturria, barnean sarturik ondasun higiezinak alokatzeagatik jasotako errentak eta enpresa, lanbide eta nekazaritza jardueren ondoriozko etekin garbiak. Ateratzen den zenbatekotik besteren konturako langileen Gizarte Segurantzako kotizazioak kendu beharko dira.

c) Familiaren errenta erabilgarriaren kalkulua.

Familiaren errenta hau izanen da: eskatzailearen eta haren ezkontidearen banakako errentak gehi familia unitateko beste kideen banakako errenten %50, aurreko atalean adierazi bezala kalkulaturik. Guztira ateratzen den kopuru horretatik 2015eko ekitaldiko pertsona fisikoen errentaren gaineko zergaren aitorpenetan familia unitateko kideei dagokien aurretiazko kuota diferentziala kenduko da (578 edo 569 laukia).

10.3. Familiaren errenta erabilgarriaren kenkariak.

Beka emateari dagokionez ezarri denaren arabera familiaren errenta erabilgarria lortu eta gero, errenta horretatik kontzeptu hauei dagozkien kopuruak kentzen ahalko dira:

A) Familia ugaria.

–Hiru edo lau seme-alaba dituzten familiak: 654 euro seme edo alaba bakoitzarengatik.

–Lau seme-alaba baino gehiago dituzten familiak: 874 euro seme edo alaba bakoitzarengatik.

B. Familiako buruaren, ezkontidearen, ikaslearen edo anai-arrebetako baten desgaitasuna:

–2.078 euro, %33ko edo hortik goitiko desgaitasuna duen kide bakoitzarengatik.

–3.325 euro, %66ko edo hortik goitiko desgaitasuna duen kide bakoitzarengatik.

C. Unibertsitateko ikasketak direla eta etxetik kanpo bizi diren bi anai-arreba edo neba-ahizpa edo gehiago daudenean:

–1.296 euro egoera horretan dagoen seme edo alaba bakoitzarengatik.

10.4. Alde batera utzita 10. arauaren arabera kalkulatutako familiaren errenta, 2016-2017 ikasturterako beka ukatu eginen da baldin eta gainditzen badira familiaren ondarea adierazten duten atalase hauek:

a) Familia unitateko kide konputagarrien hiri finken katastroko balioen baturak, Nafarroako Foru Komunitateko etxebizitza baten katastroko balioa kenduta, halakorik bada, ezin izanen du gainditu 108.966 euroko kantitatea.

b) Familia unitateko kide konputagarrien landalurreko finken katastroko balioen baturak ezin izanen du gainditu 16.675 euroko kantitatea kide konputagarri bakoitzeko.

c) Familia unitateko kide konputagarrien kapital higigarriaren errendimenduen saldo positiboa gehi ondare irabazi eta galeren saldo positiboaren arteko baturak, salbu etxebizitza erosteko edo zaharberritzeko jasotako diru-laguntzak, ezin izanen du gainditu 2.159 euroko kantitatea (2015eko ekitaldiko pertsona fisikoen errentaren gaineko zergari dagozkion laukiak: 8810 laukia + 8808 laukia - 708 laukia).

Ondarea adierazteko elementu horiek 2015eko abenduaren 31n duten balioaren arabera kontatuko dira, Pertsona Fisikoen Errentaren gaineko Zergari buruzko araudian xedatutakoarekin bat.

Era berean, beka ukatuko da egiaztatzen bada familiako kide konputagarrien diru-sarrera hauen baturak 449.746 euroko kantitatea gainditzen duela, balio erantsiaren gaineko zerga alde batera utzita:

a) Jarduera ekonomikoen ondoriozko diru-sarrerak, zuzeneko zenbatespenaren bidez edo zenbatespen objektiboaren bidez zehaztuak.

b) Nortasun juridikorik gabeko entitateen edo bestelako entitate juridikoen bidez garatutako jarduera ekonomikoetan familiako kide konputagarri guztiek ehuneko berrogeita hamarreko edo hortik gorako partaidetza izateagatik dituzten diru-sarrerak, behin jardueren guztizko diru-sarrerei jarduera horietako partaidetzaren ehunekoa aplikatu ondoren.

Aurreko lerroaldeetan ageri diren elementuen balioaren konputuaren ondorioetarako, familiako edozein kide konputagarrirenak diren elementuen balioaren %50 kenduko da, eusle nagusienak izan ezik.

10.5. Onuraduna izaten ahalko da, Diru-laguntzei buruzko azaroaren 9ko 11/2005 Foru Legearen 13.2 e) artikuluan ezartzen diren baldintzak bete gabe ere.

10.6. Nafarroako Foru Komunitatean aplikagarria den legeriak agintzen duenari men eginen zaio honako kontzeptu hauei dagokienez: oinarri orokorra, berezia, zerga-oinarria, likidazio-oinarria, konpentsazioak, murriztapenak, errenta salbuetsiak, pentsio planak, gizarte aurreikuspeneko sistema alternatiboak, gizarte aurreikuspeneko mutualitateak, atxikipenak, PFEZren konturako ordainketak, aurretiazko kuota diferentziala eta PFEZren aitorpena egin beharra.

Ekonomia, Ogasun, Industria eta Enplegu Departamentuak egindako PFEZren behin-behineko edo behin betiko likidazioa badago, hori erabiliko da familiaren errenta erabilgarria zehazteko.

10.7. Baldin eta 2015. urteari buruz aitortutako inguruabar ekonomikoak beka edo laguntza aurkezteko datan modu egiaztagarrian eta larrian urritu badira, familia unitateko kide errenta-hartzaileren bat hil delako edo lanerako desgaitasunaren edo langabeziaren egoerara iragan delako, eskatzaileak espresuki adieraziko du eskabideari atxikitako orri batean eta egoera hori frogatzen duten agiriak erantsi beharko dizkio nahitaez, baita 2016. urteko PFEZaren aitorpenaren kopia osoa ere (hura egiten den unean).

Aldaketa hori eskaera aurkezten denetik 2016ko abenduaren 31 bitartean gertatuko balitz (data hori eta gero gertatutako aldaketak ez dira aintzat hartuko ikasturte honetarako), berdin eginen da, Beka Bulegora zuzenduriko eskabide bat Hezkuntza Baliabideen Zuzendaritza Nagusiko Erregistro Orokorrean aurkeztuta (San Domingo kalea, z.g., 31001 Iruña).

Behin 15.3 arauan aipatutako epea amaitutakoan ez da onartuko 2015. urtearekin alderatuta diru-sarrerak larri urritu direla frogatzeko beste dokumentaziorik.

10.8. Eskatzailea ikaslea bera bada eta bere kargura ahaiderik badu (guraso eta/edo senideak), horiek elementu zatitzaile izanen dira, egoera hori agiri bidez frogatzen baldin badu, eta bere karguko ahaideen diru-sarrerak batu eginen dira familiaren per capita errenta erabilgarria ateratzeko.

10.9. Lanbidearteko gutxieneko soldatatik beherako familia errenta duten familia unitateen eskaerak Ekonomia, Ogasun, Industria eta Enplegu Departamentura igorriko dira, azterketa zehatz-mehatza egin diezaieten.

Edozein errenta-iturri ezkutatzen bada, eskatutako laguntza ukatuko da.

Iruzurrari aurre egiteko asmoz bekak erdiesteko aurkezten diren eskaeren gaineko kontrolean, hezkuntza administrazioak erabaki dezake aurreko atalak aipatzen duen ezkutatzea eman dela edonolako frogaren bidez eta, bereziki, administrazio publikoetako beste organoetan dauden datuez baliatuz.

Kasu bakoitzeko inguruabar guztiak ikusirik, beka jasotzeko bete beharreko baldintzak faltsutu direla edota beka ukatzea eraginen zuketen inguruabarrak ezkutatu direla ondoriozta daiteke. Kasu horietan, eskatutako beka ukatuko da, haren kontzesioa aldatuko da edo haren itzulketa erabakiko da, ezarritako prozedurari jarraituz. Era berean, Hezkuntza Departamentuko organo eskudunek beka ukatu edo baliogabetu dezakete, baldin eta laginketa bidez aurkitzen badute familia unitate batek justifikatzen dituen diru-sarrerak objektiboki beren gastu mailaren oso azpitik daudela, ez badituzte bizitzeko dituzten baliabideak frogatzen.

Bekarako eskaera aurkezteak berarekin dakar Hezkuntza Departamentuari baimena ematea ondareari eta errentei buruz behar dituen datuak Ekonomia, Ogasun, Industria eta Enplegu Departamentuaren bidez lortzeko, betiere bekaren ondorioetarako.

XI. Beka eta laguntzak hartzea eta haien zenbatekoa

11. araua

11.1. Nafarroako Gobernuak ikasle batengatik beka edo laguntzaren bat ematen badu, eta Hezkuntza, Kultura eta Kirol Ministerioak edo Eusko Jaurlaritzak ere ikasle horri beka edo laguntza ematen badio edo matrikula ordaintzetik salbuesten badu, Nafarroako Gobernutik bi zenbateko horien guztirako absolutuen arteko aldea bakarrik jasotzeko eskubidea izanen du, Nafarroako Gobernuarena beste entitateak emandakoa baino handiagoa baldin bada betiere.

Alde hori kalkulatzeko beste xederik gabe eta Nafarroako Unibertsitatean matrikulatu ez diren ikasleei aplikatzeko soilik, berdintzat joko dira Hezkuntza Departamentuak irakaskuntzagatik ematen duen beka eta Hezkuntza, Kultura eta Kirol Ministerioak ematen duena.

Bien arteko aldea zero edo Nafarroako Gobernuarena txikiagoa bada, nahitaez beste entitateak emandako beka edo laguntza hautatuko du. Nafarroako Gobernuak ematen duen Laguntza Berezia alde horretatik kanpo geratuko da.

11.2. Edozein kontzeptu dela-eta, matrikulak merkeago ateratzen badira, edo doan, onura horiek deskontatuko dira irakaskuntza kontzeptuagatik emandako laguntzaren zenbatekotik, salbu eta Nafarroako Unibertsitateko prezioen suspertze planean egiten den deskontua eta familia ugarikoa izateagatik edo ohorezko matrikula ateratzeagatik egiten diren murrizketak.

Nolanahi ere, irakaskuntza kontzeptuagatik emandako zenbatekoa ezin izanen da matrikularen benetako kostua baino handiagoa izan.

11.3. Beka edo laguntzaren zenbatekoa zehazteko, eskuarki, eskaerak familiaren errenta erabilgarriaren arabera ordenatuko dira, 10. arauan ezarritakoaren arabera kalkulatu ondoren, tarte hauek eginez:

11.4. Beka edo laguntzen zenbatekoa honako hau izanen da irakaskuntza kontzeptuen eta mailen arabera:

11.4.1. Irakaskuntzarako beka edo laguntzak.

Irakaskuntza kontzeptuari dagokionez, irizpide hau aplikatuko da zenbatekoa kalkulatzeko:

1.–Unibertsitate maila eta goi mailako arte ikasketak.

a) Unibertsitateko ikasketak Nafarroako Unibertsitate Publikoan egiten badira, errenta tarteei dagozkien bekak edo laguntzak honako hauek izanen dira:

–1. tartea: ikasketa berberak ematen dituen ikastetxe publikoko Hezkuntza, Kultura eta Kirol Ministerioaren prezio akademikoa halako 3.

–2. tartea: ikasketa berberak ematen dituen ikastetxe publikoko Hezkuntza, Kultura eta Kirol Ministerioaren prezio akademikoa halako 2,1.

–3. tartea: ikasketa berberak ematen dituen ikastetxe publikoko Hezkuntza, Kultura eta Kirol Ministerioaren prezio akademikoa halako 1,5.

Lehen ikasmailako ikasleen kasuan, laguntzak emanen dira baldin eta Nafarroako Unibertsitate Publikoak ez baditu ikasketa horiek ematen edo, bestela, nahiz eta Nafarroako Unibertsitate Publikoak ere eman, ikasleek bertan ikasteko posturik lortu ez dutela egiaztatzen badute.

Hezkuntza, Kultura eta Kirol Ministerioaren prezio akademikoen zenbatekoa uztailaren 15eko 293/2016 Errege Dekretuko hirugarren xedapen gehigarrietako 1. eta 2. ataletan xedatutakoaren arabera ezarriko da. Errege Dekretu horrek ezartzen ditu 2016-2017 ikasturterako errentaren eta familia ondarearen tarteak eta beken eta ikasketetarako laguntzen zenbatekoak eta hein batean aldatzen du beka eta ikasketetarako laguntza pertsonalizatuen araubidea ezartzen duen abenduaren 21eko 1721/2007 Errege Dekretua.

b) Unibertsitateko ikasketak aurreko a) atalean aipatzen direnetan ez beste goi mailako ikasketetako ikastetxe publiko edo pribatuetan egiten badira, bekak Hezkuntza Departamentuaren prezio akademikoaren %100 izanen dira –1., 2. eta 3. errenta tarteen kasuan–.

c) Unibertsitatez kanpoko goi mailako ikasketak aurreko ataletan aipatzen direnetan ez beste goi mailako ikasketetako ikastetxe publiko edo pribatuetan egiten badira, bekak Hezkuntza Departamentuaren prezio akademikoaren %100 izanen dira –1., 2. eta 3. errenta tarteen kasuan–.

Hezkuntza Departamentuaren prezio akademikoen zenbatekoa Unibertsitateen eta Hezkuntza Baliabideen zuzendari nagusiak emandako ekainaren 9ko 381/2016 Ebazpenean ezarritakoa izanen da. Ebazpen horrek Nafarroako Unibertsitate Publikoan titulu ofizialak eskuratzeko zerbitzu akademikoengatik eta gainerako eskubideengatik 2016-2017 ikasturtean ordaindu beharreko prezio publikoak finkatzen ditu.

Aurreko lerroaldeetako prezioen zenbatekoa kalkulatzeko ez dira kontuan hartuko bigarren aldiko edo hurrengo aldietako kreditu edo irakasgaien matrikulak, ezta administrazio zerbitzuetako tasa hauek ere: espedientea irekitzea ikasketak hasteagatik, lekuz aldatzea, nortasun txartelak luzatzea, baliozkotzeak, egokitzapenak etab.

2.–Derrigorrezko ikasketen ondoko gainerako ikasketak.

2016-2017 ikasturtean Nafarroako ikastetxe itunduetan goi mailako heziketa zikloak egiten dituzten ikasleentzako irakaskuntza laguntzak izanen dira Nafarroako Aurrekontu Orokorretan 2016ko ekitaldirako ezarri diren eta 2017ko ekitaldirako ezarriko diren hileroko kuoten %100 -1., 2. eta 3. tarteetan-.

Derrigorrezko ikasketen ondotik egiten diren unibertsitatez kanpoko gainerako ikasketetako edo goi mailako heziketa zikloetako ikasleentzat, aurreko kasuan sartuak ez daudenentzat, diru-laguntzarik jasotzen ez duten edo itundu gabe dauden ikastetxe pribatuetan arituz gero, beken zenbatekoa 581 euro izanen da 1., 2. eta 3. errenta tarteetan.

Hezkuntza Departamentuaren mendeko ikastetxeetan derrigorrezkoak ez diren ikasketak egiten dituzten ikasleendako irakaskuntza laguntzak Hezkuntzako kontseilariaren maiatzaren 20ko 61/2016 Foru Aginduan ezarritakoak izanen dira, betiere ikasketa horiek deialdi honetako 2. arauan sarturik badaude. Zenbatekoa matrikularen %100 izanen da, 1., 2. eta 3. errenta tarteetan.

Derrigorrezkoak ez diren ikasketak Nafarroako Foru Komunitatetik kanpoko ikastetxe publikoetan egiten dituzten ikasleentzako irakaskuntza laguntzak matrikularen zenbatekoaren %100 izanen dira 1., 2. eta 3. errenta tarteetan.

Zenbateko horiek doitzen ahalko dira eskola orduen kopuruaren arabera.

11.4.2. Garraiorako beka edo laguntzak.

Garraioaren kostua kalkulatzeko, herrien arteko distantzia (km) bider astean egin beharreko bidaia kopurua (joan-etorriak) eginen da. Eta gero, hortik ateratzen dena bider 2,8 eginen da.

Pirinio aldeko ikasleen kasuan (Erronkaribar, Zaraitzu, Erroibar eta Aezkoa ibarretakoak, eta Luzaide, Auritz eta Orreaga udalerrietakoak) biderkadura hori eta 3,1 koefizientea biderkatuko dira.

Aurreko formulan kalkulatutako kostuaren ehuneko jakin bat ordainduko da, familiaren errenta erabilgarriaren tartearen arabera.

2016-2017 ikasturtean erdi edo goi mailako heziketa ziklo baten azken ikasmailan ari diren ikasleek laguntza horri dagokion %35 soilik lortzen ahalko dute ikasmaila horretan lantokietako prestakuntza besterik ez bada.

Zenbateko horiek doitzen ahalko dira eskola orduen kopuruaren arabera.

11.4.3. Jantokirako beka edo laguntzak.

Zenbateko horiek doitzen ahalko dira eskola orduen kopuruaren arabera. Etxetik kanpo jan beharra agiri bidez frogatu beharko da (eskola ordutegiak, praktiketakoak, etab.).

11.4.4. Egoitzarako beka edo laguntzak.

2016-2017 ikasturtean erdi edo goi mailako heziketa ziklo baten azken ikasmailan ari diren ikasleek egoitzarako laguntzari dagokion %35 soilik eskuratzen ahalko dute ikasmaila horretan lantokietako prestakuntza besterik ez bada.

Zenbateko horiek doitzen ahalko dira eskola orduen kopuruaren arabera.

11.4.5. Presentziala ez beste modalitate bateko ikasketak.

UHUNeko eta ikasgelako modalitateaz bestelako ikasketetako (ez-presentzialeko) ikasleek ez dute eskubiderik izanen egoitzarako edo jantokirako laguntzarik hartzeko.

11.4.6. Ikasketetarako laguntzak emanen dira kasu hauetakoren bat gertatzen bada:

–Ekintza terrorista baten ondorioz ikaslearentzat berarentzat edo bere gurasoentzat, tutoreentzat edo zaintzaileentzat kalte pertsonalak eratorri badira, Terrorismoaren Biktimei Laguntzeari buruzko apirilaren 28ko 9/2010 Foru Legean ezarritakoarekin bat.

–Beren kideren bat genero indarkeriaren biktima izan dela aitortua duten familia unitateak, Emakumeen kontrako indarkeriari aurre egiteko 14/2015 Foru Legeari jarraikiz.

–Batxilergoko bigarren ikasmailan ohorezko matrikula lortu duten ikasleek graduko lehen ikasmailako matrikularako laguntza jasotzen ahalko dute, baldin eta haien familia unitateek egoitzari eta tributazioari dagokienez deialdiak ezarritako baldintzak betetzen badituzte eta ikasturte honetan ez badute Nafarroako Gobernuaren edo Hezkuntza, Kultura eta Kirol Ministerioaren bekarik eskuratu eta, horrez gain, ez badute ohorezko matrikulagatik kenkaririk izan unibertsitate graduko lehen ikasmailako matrikulan, deialdi honek ezartzen dituen gainerako baldintzak betetzen ez badituzte ere. Laguntza horren kopurua ekainaren 9ko 381/2016 Ebazpenean ezarritako prezio akademikoaren baliokidea izanen da eta berariaz eskatu beharko da, egoera berezia adieraziz.

11.4.7. Laguntza berezia.

Behar ekonomiko larria aitortu eta frogatzen duten familia unitateek bakarrik izanen dute horretarako aukera.

Laguntza berezia jasotzeko eskubidea izateko beharrezkoak izanen dira, deialdi honetako baldintza orokorrez gain (VI, VII, VIII eta IX. arauak), jarraian aipatzen diren 1. eta 2. baldintzak eta 3. atalean zehazten direnetako bat:

1.–Familiaren per capita errenta erabilgarria 4.260 eurotik beherakoa izatea.

2.–Laguntza eskatzen duen ikaslea 2001eko urtarrilaren 1a baino lehen jaio izatea, Oinarrizko Lanbide Heziketako ikasketetarako izan ezik.

3.–Familia multzo hauetako batean egotea:

a) Errenta hartzaile nagusia 2015ean gutxienez 10 hilabetez langabezian izan duten familiak.

b) Batere gurasorik gabeko umezurtzak.

c) Aita edo ama ezkongabeen edo dibortziatu edo legez bereizitako ezkontidearen seme-alabak, diru-sarrera bakarra kasu bakoitzean sortutako mantenu-sariak direnean.

d) Gurasoek edo ikasleak berak legez kalifikatutako desgaitasunen bat dutenean (%33koa edo handiagoa).

e) Errenta jasotzaile nagusia pentsioduna duten familiak.

f) Familiak 2015ean gizarteratze-errenta eskuratzen zuenean.

Betiere, laguntza eman aitzin benetako egoera sozioekonomikoa zehatz-mehatz aztertuko da, eta aurreko baldintzak frogatzen dituzten agiriekin batera, txosten sozial bat aurkeztu beharko da, gizarte langile batek prestatua (txosten hori ez da beharrezkoa izanen gizarteratze-errenta eskuratzen dutenendako).

Laguntza berezi gisara, diru-zenbateko hauek emanen dira:

–Unibertsitate mailako ikasleentzat: 1.800 euro gehienez ere.

–Goi mailako heziketa zikloetako ikasleentzat: 1.325 euro gehienez ere.

–Deialdian sartutako gainerako ikasleentzat: 950 euro gehienez ere.

11.4.8. Beka edo laguntzaren kontzeptu guztiak baturik, guztira ordainduko den kopurua ezin izanen da lanbidearteko gutxieneko soldata (gaur egun 9.080,40 euro) baino handiagoa izan, ikasleari eman zaizkion laguntza guztien baturak kopuru hori gainditzen badu ere.

11.4.9. Edozein kontzepturengatik emandako laguntzaren zenbatekoa ez da izanen haren kostua baino handiagoa.

XII. Bekak eman eta ukatzea

12. araua

12.1. Unibertsitateen eta Hezkuntza Baliabideen zuzendari nagusiak emanen du beka eta laguntzen eskaerei buruzko behin-behineko ebazpena, bai eta behin betikoa ere, Baliabide Ekonomikoen Zerbitzuak proposatuta.

12.2. Beka edo laguntzaren kontzesioa eskatzailearen alde eginen da legezko ondorio guztietarako.

12.3. Hezkuntza Departamentuak noiznahi agintzen ahal du laguntza ematean oinarri izan ziren eskaera espedienteak berrikusteko, horietan ezarritako datuak egiazkoak ote diren ziurtatzeko.

12.4. Ikuskapen prozesuan laguntzeari uko egiten dioten onuradunek edo eskatutako informazioa eta dokumentazioa aurkezten ez dutenek besterik gabe galduko dute onuradun izaera eta itzuli egin beharko dute jasotako bekaren edo laguntzaren diru-zenbatekoa.

12.5. Ikasketa, ekonomia edo inguruabarrei buruzko datuak ezkutatu edo faltsutuz gero, emandako laguntzak bertan behera utzi eta atzera itzuli beharra agintzen ahalko da.

XIII. Aurkeztu beharreko dokumentazioa

13. araua

Beka edo laguntzetarako eskaerak Nafarroako irakaskuntza ertain eta unibertsitarioetako ikastetxeetan eta Hezkuntza Departamentuko bulegoetan aurkeztuko dira.

Eskabideari honako hauek erantsi beharko zaizkio:

a) Baliaezintasun pentsioaren, langabezia sariaren eta PFEZtik salbuetsiutako beste diru-sarrera batzuen frogagiriak, horiek guztiak 2015. urteari dagozkionak.

b) Familiaburuaren banku, aurrezki kutxa edo kreditu kooperatibako kartilaren lehen orrialdearen fotokopia, hartan diru-sarrera egiteko, non ez den aurreko ikasturtean beka kobratu eta kontu korronte berarekin jarraitzen. Bat bakarra finkatuko da familia unitate bakoitzeko.

c) Familia unitateak PFEZaren aitorpena egin ez badu, legez horretara beharturik ez dagoelako, honako hauek erantsi beharko dizkio eskabideari:

–Erroldatze eta bizikidetza ziurtagiria, 2015. urteari dagokiona, udalak luzatua.

–Besteren konturako langileen edo pentsiodunen kasuan, 2015. urtean izandako diru-sarreren frogagiria.

–Enpresaburu edo profesional liberalen kasuan, 2015. urtean izandako diru-sarrera gordinen aitorpena.

d) Diru-laguntzei buruzko azaroaren 9ko 11/2005 Foru Legearen 13. artikuluan onuradun izateko 2.c atalean ez bezala ezarritako ezein debekutan ez dagoela dioen aitorpena.

e) Kenkarien (desgaitasuna...) justifikazioa, ziurtagiri eguneratuak erabiliz, eta, familia ugariaren kasuan, familia ugariaren txartel eguneratua erabiliz.

10.3.c puntuko kenkarien kasuan, matrikulen kopia erantsi beharko da.

f) Bidezkotzat hartzen diren dokumentu eta ziurtagiri guztiak.

XIV. Eskaerak aurkezteko epea eta modua

14. araua

14.1. 2016-2017 ikasturterako beka edo laguntzak eskatzeko, www.nafarroa.eus web orrian dagoen eskabide eredua bete beharko da (online eskaera).

Bete ondoren, eskabide hori (pdf fitxategia) paperean inprimatu behar da eta eskatzailearen sinadurarekin aurkeztu.

14.2. Eskaera, dokumentazio guztia duela, toki hauetan aurkeztu beharko da:

a) Nafarroan egiten diren ikasketak direnean: ikastetxean berean.

b) Nafarroatik kanpo egiten diren ikasketak direnean: Hezkuntza Departamentuko Beka Bulegoan (Santo Domingo, zk.g.; 31001, Iruña).

Edo Administrazio Publikoen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aurreikusitako edozein bide erabilita, deialdi hau Nafarroako Aldizkari Ofizialean argitaratzen denetik 2016ko azaroaren 30a arteko epean.

Eskabidea posta bulego batean aurkezten bada, gutun-azal ireki batean aurkeztuko da, postako langileek eskabideari data eta zigilua jarri diezazkioten, ziurtatu eta Hezkuntza Departamentuko Erregistrora igorri baino lehen.

14.3. Eskaera bertan adierazitako datu, ziurtagiri eta gainerako dokumentuak goitik behera behar bezala bete ondoren aurkeztuko da.

Eskatzaileen borondatetik kanpoko inguruabarrak direla eta, eskatutako ziurtagiriak inprimakietan jaso ezin direnean, egokiak diren dokumentu eta ziurtagiriak erantsi beharko dizkiote eskaerari.

14.4. Deialdiaren barnean sartzen ez diren ikasketa edo ikastetxeetarako eskaerak ez dira onartuko, ez eta II. arauan espresuki aipatzen diren kasuei buruzkoak ere.

14.5. Eskaerak biltzen laguntzen duten ikastetxeek, 2016ko abenduaren 16a baino lehen, aurkeztutako eskaeren zerrenda igorriko dute Beka Bulegora, bi aletan, alfabetozko hurrenkerari jarraituz, eta espediente oso eta diligentziatuak ere bai.

XV. Ebazpena eta erreklamazioak

15. araua

15.1. Espedientearen instrukzioa egiteko organo arduraduna Baliabide Ekonomikoen Zerbitzua da.

15.2. Onartu eta ukatzen diren beka eta laguntzen behin-behineko zerrenda Unibertsitateen eta Hezkuntza Baliabideen zuzendari nagusiaren ebazpenaren bidez onetsiko da, Baliabide Ekonomikoen Zerbitzuak proposatuta.

15.3. Behin-behineko zerrenda hori ontzat jotzen ez duten eskatzaileek espedienteak berrikus ditzala eskatzen ahalko diote Hezkuntza Departamentuko Baliabide Ekonomikoen Zerbitzuari. Horretarako hilabeteko epea izanen da, ebazpena Nafarroako Aldizkari Ofizialean argitaratu eta hurrengo egunetik aitzina.

Zerbitzu horrek, hala berean, ofizioz berrikusten ahalko ditu espedienteak, deialdian aurreikusitakoaren aurkako arau-hausterik edo akatsik baldin bada.

15.4. Unibertsitateen eta Hezkuntza Baliabideen zuzendari nagusiaren ebazpen baten bidez eta Baliabide Ekonomikoen Zerbitzuak proposatuta, onetsiko da eman eta ukatzen diren beka eta laguntzen zerrenda, baldin eta ofizio bidezko berrikuspenak, edo interesdunak hala eskatutakoak, behin-behineko ebazpenean aldaketak ekarri baditu.

15.5. Baliabide Ekonomikoen Zerbitzuak proposatuko du aldaketei buruzko behin betiko ebazpena, Beken Batzordearekin kontsultatu ondoren.

Batzorde horrek proposatzen ahalko du, deialdiko baldintza guztiak bete ez arren, batzordearen ustez beka edo laguntza jasotzeko merezimendu aski dituzten ikasleei ere bekak ematea, merezimendu horiek behar bezala justifikatuz gero.

Beken batzordeak kide hauek izanen ditu:

–Batzordeburua: Unibertsitateen eta Hezkuntza Baliabideen zuzendari nagusia.

–Batzordeburuordea: Baliabide Ekonomikoen Zerbitzuko zuzendaria.

–Batzordekideak: Unibertsitateen eta Hezkuntzako Teknologien Zerbitzuko zuzendaria, edo berak eskuordetzen duena.

–Nafarroako Foru Komunitateko Hezkuntzako Goi mailako Ikuskatzailetzaren Arloko zuzendaria.

–Ikastetxeen, Finantzaketaren eta Ikasketetarako Laguntzen Ataleko burua.

–Beka Bulegoko ordezkari bat.

–Hezkuntzako ikuskatzaile bat.

–Ogasuneko eta Finantza Politikako Departamentuko ikuskatzaile edo kudeatzaile bat.

–Unibertsitatez kanpoko mailetako ikasleen bi guraso.

–Maila unibertsitarioetako bi ikasle, bata Nafarroako Unibertsitate Publikokoa eta bestea Nafarroako Unibertsitatekoa.

–Unibertsitateetako bi ordezkari, bata Nafarroako Unibertsitate Publikokoa eta bestea Nafarroako Unibertsitatekoa.

–Idazkaria: Hezkuntza Departamentuko APT bat (arlo juridikoa).

15.6. Emandako eta ukatutako beka eta laguntzen zerrenda zuzenduak lehen aipatutako ebazpena Nafarroako Aldizkari Ofizialean argitaratzen den egunean berean hartuko du behin betiko izaera. Halaber, epe berean hartuko dute behin betiko izaera behin-behinean emanak ziren gainerako laguntza eta bekek, aipatutako zuzenketen zerrendan agertzen ez direnek.

15.7. Onartu eta ukatzen diren beken behin-behineko eta behin betiko zerrendak haiek onesteko ematen den ebazpenean aipatzen diren Nafarroako Gobernuko administrazio bulegoetako iragarki oholetan paratuko dira.

15.8. Bekak eta laguntzak eman edo ukatzeari buruzko behin betiko ebazpenen aurka gora jotzeko errekurtsoa aurkezten ahal da, Hezkuntzako kontseilariari zuzendua, deialdiko 15.4 arauan aurreikusitako ebazpena Nafarroako Aldizkari Ofizialean argitaratu eta biharamunetik hasita hilabeteko epean.

15.9. Ez da erreklamazio bakarrik ere onartuko, jaso duen zentroak behar bezala zigilatutako gordekina aurkezten ez bada.

XVI. Beka edo laguntzen ordainketa

16. araua

16.1. Nafarroako Gobernuari beka edo laguntza eskatu ahal izateko aurretik Hezkuntza, Kultura eta Kirol Ministerioari edo Eusko Jaurlaritzari eskatu behar diotenek Beka Bulegoan (San Domingo kalean, z.g., 31001 Iruña) erakunde horren bekaren onarpenaren edo ukapenaren behin betiko jakinarazpena aurkeztu beharko dute 2017ko urriaren 31 baino lehen. Jakinarazpen hori aurkezten ez bada, beka ukatu eginen da. Ez dute aurkeztu beharrik izanen derrigorrezko irakaskuntzaren ondoko unibertsitatez kanpoko ikasketak Nafarroan egiten ari diren ikasleek, ez eta Nafarroako Unibertsitatean goi mailako ikasketak egiten ari direnek ere.

16.2. Eskatzailearen aldeko beka edo laguntzen ordainketa eskaeran azaltzen den banku, aurrezki kutxa edo kreditu kooperatibaren bidez eginen zaio eskatzaileari.

16.3. Ebazpen honen bidez deitutako ikasketetarako beka edo laguntzen onuradunak beharturik daude beka edo laguntza eman den xederako erabiltzera, hots, matrikula egiteko, klasera joateko, azterketetara aurkezteko eta, gastuak, zeinetarako ematen baita laguntza, ordaintzeko.

Horren ondorioetarako, beka edo laguntza eman zaion helburuetarako ez duela erabili ondorioztatuko da ondoko kasuren bat gertatzen bada:

a) Unibertsitatez kanpoko ikasketak:

1.–2016-2017 ikasturtea bukatu baino lehen, ikastetxean baja hartzea.

2.–Eskola ordu guztietatik %80ra edo gehiagora ez joatea, eskolatzetik salbuetsita egon ezean.

3.–Ikastetxeak emandako zerbitzuak ez ordaintzea, beka zerbitzu horiek finantzatzeko eman bazen.

4.–Matrikulaturiko irakasgai edo kredituen %50 ez gainditzea, ez deialdi arruntean ez berezian.

Beka zer kontzeptutarako eman zaion, horiek guztiak itzuli beharko ditu 1., 2. eta 4. puntuetan deskribatu bezalako inguruabarretan erori denak. Ordaindu gabeko zerbitzuei dagozkien kontzeptuak itzuli beharko ditu 3. puntuan deskribatu bezalako egoeran baizik erori ez denak.

b) Unibertsitate mailako ikasketak:

1.–Matrikula baliogabetzea.

2.–Beka zer ikasmailatarako eman zaion eta hartan zer kreditutan matrikulatu den, orokorrean gutxienez ere horien %50 ez gainditzea. Zientzien eta ikasketa teknikoen alorretan ehuneko hori %40koa izanen da.

Ehuneko hori kalkulatzeko aparte utziko dira kreditu baliozkotuak, aitortuak, egokituak, transferituak edo gisakoak.

3.–Ikastetxeak emandako zerbitzuak ez ordaintzea, beka zerbitzu horiek finantzatzeko eman bazen.

1. kasuan, beka zer kontzeptutarako eman zaion, horiek guztiak itzuli beharko ditu.

2. kasuan, beka zer kontzeptutarako eman zaion, horiek guztiak itzuli beharko ditu, matrikularako beka izan ezik.

3. kasuan, ordaindu gabeko zerbitzuei dagozkien kontzeptuak itzuli beharko ditu.

Ikastetxeetako idazkaritzek 2017ko urria baino lehen jakinarazi beharko diote Hezkuntza Departamentuari zein ikasle dauden 16.3 atalean aipatutako egoeretako batean.

Ikaslea ikasturtean zehar hilen balitz, beka edo laguntza oso-osorik kobratzeko eskubidea izanen luke.

16.4. Espedienteak osatu ahala, ordainketak informatika bloke osoen bidez eginen dira.

2017ko ekaineko ordainketaren ondoan ebatzi gabe dauden espediente osatugabeek bloke informatiko bakar bat osatuko dute eta haien gaineko ebazpena gero emanen da, 2017ko irailean, osotasunean. Espediente edo erreklamazioren bat geroago ebazten bada, 2017-2018 ikasturteko bekekin batean ordainduko da.

XVII. Laguntzak ezeztatzea

17. araua

Bekadunek edozein momentutan galtzen ahal dute emandako laguntza, Administrazioaren egintza arrazoitu baten bitartez, bidezko instantzien aitzineko ekintzak galarazi gabe, deialdi honetako arauek aipatzen dituzten inguruabarrak frogatzeko espedientea ireki ondoren. Espediente hori Hezkuntza Departamentuak ireki eta ebatziko du.

Espediente baten ondorioz laguntza ezeztatuz gero, jasotako dirua itzuli beharko da, baztertu gabe eskatzaileak edota laguntza jaso duen ikasleak hartu ahal izan dituen erantzukizun administratibo, zibil eta penalak.

XVIII. Argibideak

18. araua

Beketarako lehiaketa orokorraren emaitzak, gutxienez, Nafarroako Gobernuaren argibide bulegoetan jarriko dira jendaurrean.

Berriro aipatu nahi da:

1. Nafarroako Gobernuaren 2016-2017 ikasturterako beken deialdi honetan parte hartu ahal izateko, beharrezkoa da Hezkuntza, Kultura eta Kirol Ministerioari edo Eusko Jaurlaritzari kasuan kasuko beka eskatu izatea, baldintzak betez gero.

2. Nafarroako Gobernuari egindako beka eskabidea erabat osaturik aurkeztu behar da puntu guztietan, Hezkuntza, Kultura eta Kirol Ministerioan beka eskatu ala ez.

Deialdi honetan adierazitakoa irakaskuntzarako beka eta laguntzen arloan eskumenak dituzten autonomia erkidegoetan egindako ikasketei aplikatuko zaie.

XIX. Errekurtsoak

19. araua

Deialdi honen eta oinarrien aurka gora jotzeko errekurtsoa paratzen ahal da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunean hasita.

Iragarkiaren kodea: F1611956