Iragarkia

21. ALDIZKARIA - 2016ko otsailaren 2a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

710/2015 EBAZPENA, abenduaren 31koa, Landa Garapeneko, Nekazaritzako eta Abeltzaintzako zuzendari nagusiak emana, Nekazaritzako Aseguru Konbinatuen 2016ko Planeko (37. plana) nekazaritzako aseguruak 2016an izenpetzeko diru-laguntzen oinarri arautzaileak eta deialdia onesten dituena.

Nekazaritzako Finantziazioari buruzko lege-xedapenen testu bategina onesten duen otsailaren 16ko 54/1998 Legegintzako Foru Dekretuaren 1. eta 2. artikuluen arabera, Nafarroako Gobernuak laguntzak emanen ditu, diruz laguntzen ahal diren nekazaritzako ekoizpenak eta arriskuak aseguratzeko, eta nekazaritzako ondasunen gaineko aseguruen kontratazioaren kostuan parte hartuko du. Legegintzako foru dekretu horrek, VI. tituluan, nekazaritza eta abeltzaintzako aseguru-sarietarako laguntzak arautzen ditu, eta bertan ezartzen du Nekazaritza, Abeltzaintza eta Elikadurako kontseilariak urtero onetsi eta argitaratuko dituela laguntzak jasotzen ahal dituzten aseguru lerroak, Nekazaritzako Aseguru Konbinatuen Urteko Planean sarturik dagoen aseguru bakoitzaren ezaugarrien berri duen unean.

Deialdi honen xedea da Nekazaritzako Aseguru Konbinatuen 2016ko Planeko aseguruen polizak, 2016an izenpetzen direnak, kontratatzeko kosturako laguntzak arautzea. Nekazaritzako aseguruetarako laguntzak Estatuen laguntzak dira eta Europar Batasunak nekazaritzako eta oihangintzako sektorerako 2014tik 2020 arte ezarri dituen Jarraibideak (2014/C eta 204/1) aplikatu behar zaizkie. Batzordearen 2015eko abuztuaren 28ko Erabakiaren bidez, aipatu laguntzak merkatu bateratuarekin bateragarritzat hartzen dira, Europar Batasunaren Funtzionamendurako Itunaren 107. artikuluaren 3 (C) atalaren arabera.

Ebazpen honi honako hauek aplikatu behar zaizkio: Nekazaritzako Finantziazioari buruzko otsailaren 16ko 54/1998 Legegintzako Foru Dekretua eta Diru-laguntzei buruzko azaroaren 9ko 11/2005 Foru Legea.

Nafarroako Gobernuak 2015eko irailaren 30ean hartutako Erabakiaren bidez, 2.400.000 euroko gastua baimendu zen 2017ko ekitaldiaren kargura, 2016ko planaren nekazaritzako zenbait aseguru kontratatzeko kosturako laguntzak ordaintzeko.

Adierazitakoarekin bat, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak ematen dizkidan eskudantziak erabiliz eta Landa Garapeneko, Ingurumeneko eta Toki Administrazioko Departamentuaren egitura organikoa ezartzen duen abuztuaren 28ko 137/2015 Foru Dekretuarekin bat,

EBATZI DUT:

1. Nekazaritzako Aseguru Konbinatuen 2016ko 37. Planeko nekazaritzako zenbait aseguru, polizak 2016ko urtarrilaren 1etik abenduaren 31ra arte izenpetzen badira, kontratatzeko kosturako laguntzen oinarri arautzaileak onestea. Oinarriak ebazpen honen I. eranskinean ageri dira.

2. Nekazaritzako zenbait aseguru, aurreko puntuan aipatzen direnak, izenpetzeko diru-laguntzak emateko deialdia onestea.

3. Gardentasun betebeharrari buruzko aitorpenerako eredua, ebazpen honen II. eranskinean jasoa, onestea.

4. 1.800.000 euroko gastua baimentzea, “Agroseguro bidezko aseguru-sarien konpentsazioa” izeneko 710001 71230 4700 414210 kontu-sailaren edo Nafarroako Gastuen 2017ko Aurrekontu Orokorretan baliokidea izanen den kontu-sailaren kargura.

5. 27.000 euroko gehieneko gastua baimentzea, “Hirugarrenek eginiko bestelako lanak” izeneko 710004 71320 2279 412204 kontu-sailaren edo Nafarroako Gastuen 2017ko Aurrekontu Orokorretan baliokidea izanen den kontu-sailaren kargura.

6. 2016an aurreikusten bada kontratazioan guztira kendutako zenbatekoa aurreko puntuan baimendutakoa baino altuagoa izanen dela, kontratazioaldia hasi ez duten aseguru lerroen gehieneko diru-laguntzaren portzentajeak aldatuko dira. Halaber, kontratazioaldia hasi duten lerroen kasuan, baimendutako kreditua agortu arte onartuko dira eskaerak, eta kontratazio eguna izanen da lehentasuna ezartzeko irizpidea.

7. Ebazpen hau eta eranskinak Nafarroako Aldizkari Ofizialean argitaratzea.

8. Deialdi honen eta oinarri arautzaile hauen aurka gora jotzeko errekurtsoa jar daiteke, Landa Garapeneko, Ingurumeneko eta Toki Administrazioko kontseilariari zuzendua, ebazpen hau Nafarroako Aldizkari Ofizialean argitaratu eta biharamunetik hilabeteko epean.

Iruñean, 2015eko abenduaren 31n.–Landa Garapeneko, Nekazaritzako eta Abeltzaintzako zuzendari nagusia, Ignacio Gil Jordán.

I. ERANSKINA

Nekazaritzako Aseguru Konbinatuen 2016ko 37. Planeko nekazaritzako aseguruak, 2016an sinatzen direnak, kontratatzeko kosturako diru-laguntzaren oinarri arautzaileak

Lehena.–Xedea.

1. Deialdi honen xedea da Nekazaritzako Aseguru Konbinatuen 2016ko 37. Planeko nekazaritzako aseguruak 2016an izenpetzen dituzten nekazari eta abeltzainei laguntzak ematea, Estatuko Administrazio Orokorrak Nekazaritzako Aseguruen Estatuko Entitatearen (aurrerantzean, ENESA) bitartez helburu bererako ematen dituen diru-laguntzen osagarri. Aseguruak Nafarroako Foru Komunitatean dauden nekazaritzako ondasunen gainekoak izanen dira.

Bigarrena.–Onuradunak.

1. Laguntzen onuradun izan daitezke laugarren oinarriko taulan ageri diren aseguru lerroetako poliza bat Agrupación Española de Entidades Aseguradoras de los Seguros Agrarios Combinados, SAn (aurrerantzean, Agroseguro, SA) sarturik dauden aseguru konpainiekin izenpetzen duten nekazariak eta abeltzainak, Nekazaritzako Ustiategiak Modernizatzeko uztailaren 4ko 19/1995 Legearen arabera lanbidez nekazariak badira eta nekazaritzaren arloko gizarte segurantzan kotizatzen badute edo lehentasunezko ustiategia badute.

2. Salbuespen hauek ezartzen dira:

2.1. Ustiategian hildako animaliak suntsitzeak dakartzan gastuen estaldurari dagokion 415. lerroko aseguruen poliza bat izenpetzen duten abeltzainak.

2.2. Nafarroako kooperatibetako elkarlaneko laborantzako atalek honako beharkizun hauek bete behar dituzte laguntzen onuradun izateko:

a) Kooperatiba Nafarroako Nekazaritzako Ustiategien Erregistroan izena emanik egotea, bai eta kasuan kasuko Kooperatiben Erregistroan ere, eta helbide soziala Nafarroan izatea.

b) Elkarlaneko laborantzako atalaren helburu nagusia atalera ekarritako lurrak batera ustiatzea izatea.

c) Haren estatutuetan aurreikusirik egotea azalera lantzeko modua, eta hauetako bat izatea modu hori: kooperatibak zuzenean; kooperatiben arteko akordioen bidez; edo errentan emanik edo beste kontratu mota batzuen bidez, ogibide nagusia nekazaritza duten nekazariekin (bazkideekin lehentasunez), kooperatibekin edo beste sozietate mota batzuekin eginik.

d) Zuzendaritza kontseiluko kideen erdiak baino gehiagok izatea nekazaritza ogibide nagusi.

3. Ebazpen honetako laguntzen onuraduna izateko, Diru-laguntzei buruzko azaroaren 9ko 11/2005 Foru Legearen 13. artikuluan ezartzen diren baldintzak bete beharko dira.

Hirugarrena.–Sariak Agroseguroren bitartez konpentsatzea.

Agroseguro entitateak laguntzen kudeaketan lagunduko du, berak eta Landa Garapeneko, Ingurumeneko eta Toki Administrazioko Departamentuak sinatutako hitzarmenean ezarritako moduan.

Laugarrena.–Diru-laguntza jaso dezaketen lerroak.

1. Diru-laguntza jaso daiteke Nekazaritzako Aseguru Konbinatuen 2016ko ekitaldiko Planeko aseguru lerro hauek kontratatzeko kostuagatik:

2. Nekazaritzako lerroetan, aipatutako laboreen aseguru osagarriak ez dira inoiz diruz lagunduko, mahats ustiategietarako estaldura gorakorreko asegurua izan ezik.

Bosgarrena.–Diru-laguntzaren zenbatekoa.

1. Aurreko oinarrian jasotako nekazaritzako, abeltzaintzako eta ustiategian hildako animaliak eraman eta suntsitzeko aseguruetarako diru-laguntzen zenbatekoa, Landa Garapeneko, Ingurumeneko eta Toki Administrazioko Departamentuak emandakoa, ENESAk helburu horretarako ematen dituenen portzentaje bat adinakoa izanen da.

Nekazaritzako Aseguru Konbinatuen 37. Planak xedatu bezala, Administrazio Publikoek emandako diru-laguntzen zenbatekoak ezin izango ditu 2014/C eta 204/1 Jarraibideek ezarritako mugak inoiz gainditu.

–Nekazaritzako aseguruak: primaren ordainagirian guztira agertzen den zenbatekoaren %65, errekarguak kontuan hartu gabe.

–Abeltzaintzako aseguruak: aseguruaren kostu garbiaren %65, errekarguak kontuan hartu gabe.

–Ustiategian hildako animaliak eraman eta suntsitzeko aseguruak: ustiategi bakoitzeko primaren ordainagirian agertzen den kostuaren %90, errekarguak kontuan hartu gabe.

Nafarroako Gobernuaren eta ENESAren diru-laguntzek onartutako mugak gainditzen badituzte, ENESAK ezarri, Agrosegurok baliozkotu eta 234/2014 zirkularrean agertzen den moduan eginen da doikuntza.

2. Nafarroako Gobernuak jarraian adierazten diren diru-laguntzak emanen ditu nekazaritzako eta abeltzaintzako aseguruetarako:

3. Ustiategian hildako animaliak eraman eta suntsitzeko aseguruetarako diru-laguntzak jarraian zehazten dira:

Hauek dira udalerriak:

Seigarrena.–Eskaerak non eta noiz aurkeztu.

1. Aseguratuak, edo asegurua haren izenean hartzen duenak, aseguru polizaren kontratua ENESAk urtero bezala onetsi duen Ebazpenean ezarritako moduan formalizatzea diru-laguntzaren eskaeratzat joko da, Nekazaritza, Elikadura eta Ingurumen Ministerioak ezarritako izenpetze epeetan egiten baldin bada eta zuzen bete bada edo Agrosegurok zuzendu badu, bai kontratuaren osagaiei dagokienez, aplikatzekoa den araudian xedatutakoarekin bat, bai izenpetutako polizari dagokion diru-laguntza zehazteko behar diren datu guztiei dagokienez. Ebazpen horren bidez, Estatuko Administrazio Orokorrak Nekazaritzako Aseguru Konbinatuen 2016ko Planeko nekazaritzako aseguruak izenpetzeko ematen dituen diru-laguntzetarako deialdia ezarri da.

2. Aseguru berriztagarriko polizen kasuan, diru-laguntzarako eskaera izanen da hasiera batean izenpetutako aseguru poliza, urteko ordainketa egin izanaren agiria erantsirik. Ulertuko da polizaren ordainketak adierazten duela aseguruaren baldintzak onartzen direla eta kasuan kasuko diru-laguntzak jasotzeko betebeharrak betetzen direla.

3. Landa Garapeneko, Nekazaritzako eta Abeltzaintzako Zuzendaritza Nagusiko Nekazaritza Zerbitzuak ofizioz egiaztatuko du aseguratuak diru-laguntza eta laguntza publikoei buruzko arauetan eskatutako baldintzak betetzen dituela, Diru-laguntzei buruzko azaroaren 9ko 11/2005 Foru Legearen 13. artikuluarekin bat. Hala ere, beharrezkoa denean, onuradunei eskatzen ahalko die egiaztapen egokiak egiteko behar den informazio zehatza emateko.

Zazpigarrena.–Diru-laguntza emateko modua, lehentasunak eta irizpide objektiboak.

1. Diru-laguntzak norgehiagokako prozedura erabiliz emanen dira.

2. Agroseguro entitateak eta Landa Garapeneko, Ingurumeneko eta Toki Administrazioko Departamentuak sinatutako hitzarmenean ezarritakoarekin bat, poliza izenpetzean, beste diru-laguntzak kendu ondoren, aseguratuari polizaren zenbatekoa kobratuko zaio, dagokion gehieneko diru-laguntzaren %75 kenduta, deialdi honen bosgarren oinarrian ezarritako portzentajeen arabera.

3. Eskaerak ebaluatu ondoren, guztira ematen ahal den gehieneko diru-laguntza zehaztuko da. Aurrekontuan dagoen diruaren arabera emanen da diru-laguntza.

4. 2.1 puntuan aurreikusitako kasuan, zehaztu den gehieneko laguntza Agrosegurok kontratazioan kendutako zenbatekoa baino handiagoa bada, oinarri arautzaile honen bigarren puntuan xedatutakoaren arabera, Agrosegurok ordainduko du zehaztutako gehieneko laguntzaren eta kontratazioan kendutako zenbatekoaren arteko diferentzia, Agroseguro entitateak eta Landa Garapeneko, Ingurumeneko eta Toki Administrazioko Departamentuak sinatutako hitzarmenean ezarritakoarekin bat.

Zortzigarrena.–Ebaluazio organoa.

1. Nekazaritza Zerbitzuak ebaluatuko ditu eskaerak eta eginen du ebazpen proposamena.

2. Landa Garapeneko, Nekazaritzako eta Abeltzaintzako zuzendari nagusiak ebazpen arrazoitua emanen du diru-laguntzei buruz, eta espresuki jakinaraziko zein eskaera ezetsi den.

3. Prozeduraren gainean ebazteko epea hiru hilabetekoa izanen da. Epea espresuki ebazpenik gabe bukatzen bada, ezetsitzat joko da eskaera.

Bederatzigarrena.–Aseguratuek laguntzaren aldaketen berri ematea.

Laguntzak onartzen dituzten aseguratuak beharturik daude jakinaraztera, zuzenean edo haien hartzaileen bitartez, kontratatutako aseguru lerroan aldaketak egiteko duen epean polizak izaten duen edozein aldaketa.

Hamargarrena.–Diru-laguntzaren bateragarritasuna

Diru-laguntza hau Estatuko Administrazio Orokorrak helburu bererako ematen duenarekin bateratzen ahal da eta haren osagarri izanen da.

Hamaikagarrena.–Kontrola, zehapen araubidea eta diru-laguntzen itzulketa.

1. Diru-laguntzen onuradun diren aseguratuak beharturik daude Landa Garapeneko, Ingurumeneko eta Toki Administrazioko Departamentuaren esku jartzera diru-laguntzen kontrolerako egokiak diren datu eta argibide guztiak.

2. Aseguratuek, nekazaritzako aseguru poliza kontratatzean, baimena emanen diote Landa Garapeneko, Ingurumeneko eta Toki Administrazioko Departamentuari, beharrezkoa bada, beste administrazio batzuei informazioa eskatzeko, informatika edo telematika bidez, eskatutako baldintzak betetzen diren egiaztatzeko, zerga eginbeharrak betetzeari dagokionez, bai eta araututako diru-laguntzak eskuratzeko betebeharrak betetzen diren egiaztatzeko beste edozein informazio ere.

Era berean, poliza kontratatzean baimena ematen dio Agroseguro SAri Landa Garapeneko, Ingurumeneko eta Toki Administrazioko Departamentuari polizari buruzko informazio guztia emateko, dagokion diru-laguntza kudeatu, kontrolatu eta ordaintzeko lanak egin ditzan.

3. Ebazpen honetan eta gainerako arau aplikagarrietan ezarritako baldintzak betetzen ez badira, onuraduna beharturik egonen da diru-laguntzak eta dagozkien legezko interesak osorik edo zati batean itzultzera, Diru-laguntzei buruzko azaroaren 9ko 11/2005 Foru Legearen 37.1 artikuluan xedatutakoari jarraikiz.

4. Aseguru hartzailea, kontratazio kolektiboko polizen kasuan, edo, aseguratua, banakako polizen kasuan, arau-hauste administratiboen erantzule baldin bada, zehapena jasoko dute Diru-laguntzei buruzko azaroaren 9ko 11/2005 Foru Legearen IV. tituluan xedatutakoarekin bat.

Hamabigarrena.–Emandako diru-laguntzen publizitatea.

Deialdi honetako laguntzen onuradunen zerrenda Landa Garapeneko, Ingurumeneko eta Toki Administrazioko Departamentuaren iragarki oholean argitaratuko da, Iruñeko González Tablas kaleko 9an.

Hamahirugarrena.–Onuradunaren betebeharrak.

Onuradunak Diru-laguntzei buruzko azaroaren 9ko 11/2005 Foru Legearen 9. artikuluan ezarritako betebeharrak izanen ditu.

Hamalaugarrena.–Onuradunen eginbeharrak gardentasunari dagokionez.

Nafarroako Aurrekontu Orokorren kargurako diru-laguntzen onuradunen gardentasunerako betebeharrak arautzen dituen 59/2013 Foru Dekretuaren 2. artikuluan aipatzen diren entitateek Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritako gardentasun betebeharrak bete beharko dituzte, Nafarroako Aurrekontu Orokorren kargurako diru-laguntzak jasotzen badituzte eta bi inguruabar hauek gertatzen badira:

a) Emandako diru-laguntza 20.000 eurotik gorakoa izatea urtean.

b) Emandako diru-laguntza entitate onuradunaren negozio-zifraren edo urteko aurrekontuaren %20tik gorakoa izatea.

Aurreko idatz-zatian ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira. Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua konputatuko da ondorio horietarako, ez guztizko batura. Erreferentziako negozio-zifra edo urteko aurrekontua honako hauen arteko txikiena izanen da:

a) Aurreko urteko negozio-zifra edo aurrekontu exekutatua.

b) Hala badagokio, negozio-zifra, edo diru-laguntza ematen den ekitaldian entitatearen organo eskudunak onartutako aurrekontua.

Aipatu diren inguruabarrak gertatzeagatik gardentasun betebeharrak dituzten entitate onuradunek jarraian adierazten den informazioa eman beharko dute:

a) Entitatearen gobernu, administrazio eta zuzendaritza organoen osaera.

b) Organo horiek osatzen dituzten kargudunen zerrenda.

c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan jasotakoa izanen da.

d) Kargudun bakoitzak gobernuko, administrazioko eta zuzendaritzako eginkizunetan duen dedikazioaren araubidea.

e) Entitate onuradunaren urteko azken kontuen kopia bat.

Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta diru-laguntza kudeatzen duen administrazio unitateari bidaliko zaio. Informazioa bidaltzeko epea hilabetekoa izanen da, diru-laguntza ematen duen ebazpena jakinarazten edo, hala bada, argitaratzen den egunetik hasita.

Informazio hori urtebetez egonen da aztergai Nafarroako Gobernu Irekiaren Atarian argitaratzen denetik hasita, eta gehienez 15 hilabetez utziko da bertan, informazioa kudeatzen duen organoan sartzen den egunetik hasita. Epe hori igarota, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.

Entitateak gardentasun betebeharra bete behar ez badu, aurreikusitako inguruabarrak gertatzen ez direlako, horren gaineko aitorpena aurkeztu beharko du.

Entitateak ekitaldi berean diru-laguntza bat baino gehiago jasotzen baditu, ez du informazioa errepikatu beharko diru-laguntza bakoitzerako, salbu eta hasieran eman zituen datuak aldatzen badira.

Onuradunak informazioa emateko betebeharrak ez betetzeak ekar ditzakeen zehapenak galarazi gabe, ez-betetze kasuetan, onartutako diru-laguntza ordaindu gabe utziko da, aurrerakinak barne, eta, hala badagokio, kobratutako zenbatekoak itzuli beharko dira, Diru-laguntzei buruzko Foru Legearen 35.1.c) artikuluan ezarritakoari jarraikiz.

II. eranskina

Gardentasun betebeharrari buruzko aitorpena

Irailaren 11ko 59/2013 Foru Dekretuak Nafarroako Aurrekontu Orokorren kargurako diru-laguntzen onuradunen gardentasun betebeharrak arautzen ditu (2013ko 187. Nafarroako Aldizkari Ofiziala, irailaren 27koa).

Foru dekretu horren 3. artikuluak ezartzen duenez, diru-laguntzak jasotzen dituzten entitateek gardentasun betebehar batzuk bete behar dituzte, inguruabar hauek gertatzen direnean:

a) Emandako diru-laguntza 20.000 eurotik gorakoa izatea urtean.

b) Emandako diru-laguntza entitate onuradunaren negozio-zifraren edo urteko aurrekontuaren %20tik gorakoa izatea.

(Kopuru horiek gainditzen diren kalkulatzeko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira).

Aipatu foru dekretuaren 3. eta 4. artikuluetan xedatutakoari jarraituz,

AITORTZEN DUT:

Ez dudala gardentasun betebeharrik (aipatutako foru dekretuaren 3. artikuluan azaldutako inguruabarrak gertatzen ez direlako).

.......................................................................................-k (adierazi organo-emailea) emandako ................................................................................ (izena) diru-laguntza dela-eta, informazioa aurkeztu dudala; beraz, ez da errepikatu beharrik, emandako datuak aldatu ez direlako.

Gardentasun betebeharra dudala eta, horrenbestez, 59/2013 Foru Dekretuaren 4. artikuluan ezarritako informazioa ematen dut aitorpen honen eranskinean, eta entitatearen urteko azken kontuen kopia eransten.

................................. (e)n, 20...(e)ko ……….......aren ....(e)an

Sinadura: ...........................................

Kargua: ...........................................

Eskatzailearentzako argibide interesgarriak

1. Aitorpen hau eta kasuan-kasuan aurkezten den informazioa telematika bidez aurkeztuko dira, Nafarroako Gobernuaren Erregistro Orokor Elektronikoaren bitartez, eta diru-laguntza kudeatzen duen administrazio unitateari igorriko zaizkio.

2. Aitorpen hau igortzeko epea hilabetekoa izanen da, diru-laguntza ematen duen ebazpena jakinarazten edo, hala badagokio, argitaratzen den egunetik hasita. Betebehar hori betetzen ez bada, emandako diru-laguntza ez da ordainduko.

3. Entitate onuradunak ematen duen informazioa Nafarroako Foru Komunitateko Administrazioaren Gobernu Irekiaren Atariko webgunean argitaratuko da. Informazio hori urtebetez egonen da ikusgai, argitaratzen denetik. Epe hori igarota, hura argitaratzeko ardura duen unitateak ofizioz kenduko du, eta, hala egin ezean, entitate onuradunak kentzeko eskatzen ahalko du.

Iragarkiaren kodea: F1600248