Iragarkia

2. ALDIZKARIA - 2016ko urtarrilaren 5a

1. NAFARROAKO FORU KOMUNITATEA

1.7. BESTELAKOAK

136/2015 EBAZPENA, azaroaren 26koa, Informatikaren, Telekomunikazioen eta Berrikuntza Publikoaren zuzendari nagusiak emana, France Telecom España SAk (gaur egungo izena: Orange Espagne SA) aurkeztu duen Nafarroako Foru Komunitateko Azpiegituren Lurralde Plana aldatu eta eguneratzeko lehenbiziko espedientea onesten duena.

Nafarroako Foru Komunitatean uhin elektromagnetiko ez-gidatuen bidezko telekomunikazioko oinarrizko estazioak antolatzeko maiatzaren 6ko 10/2002 Foru Legearen arabera, operadoreek planaren edukiaren edozein aldaketa Nafarroako Gobernuko departamentu eskudunari jakinarazi beharko diote, plana behar den moduan eguneratuz.

2013ko maiatzaren 9an, Josep M.ª Rabes Cabus jaunak, France Telecom España SA ordezkatuz, Amena operadoreari baimendu zitzaion Azpiegituren Lurralde Plana aldatzeko eskaera aurkeztu du. Eskrituren bidez frogatzen du France Telecom España SAk xurgatu zuela Amena.

Geroago, France Telecom España SAk eskriturak aurkeztu ditu enpresaren izen aldaketa frogatzeko, oraingo izena Orange Espagne SA baita.

Informatikaren, Telekomunikazioen eta Berrikuntza Publikoaren zuzendari nagusiaren urriaren 5eko 38/2015 Ebazpenaren bidez, France Telecom España SAk (gaur egungo izena: Orange Espagne SA) Nafarroako Foru Komunitateko Azpiegituren Lurralde Plana aldatu eta eguneratzeko aurkeztu duen lehenbiziko espedientearen tramitazioari hasiera eman zitzaion, eta agindua eman zen eskatutako kokapenak Nafarroako Gobernuaren gobernu irekiaren atarian argitaratzeko, interesdunek bidezko alegazioak aurkez zitzaten.

Orobat, ebazpen horretan errekerimendua egin zitzaien Ingurumen Kalitatearen eta Klima Aldaketaren Zerbitzuari, Elikagaien Segurtasunaren eta Ingurumen Osasunaren Zerbitzuari, Ondare Historikoaren Zerbitzuari eta Lurraldearen Antolamendu eta Hirigintza Zerbitzuari, bakoitzak bere eskumenen esparruan txostena egiteko azpiegituren lurralde planaren aldaketari buruz. Aipatu unitateek eta Azpiegitura Teknologikoen eta Euskarri Zentroaren Zerbitzuak txosten bana egin dute, eta horietan ezarritako determinazioak ebazpen honen II. eranskinean bildu dira.

Aipatu atarian jendaurrean egon den bitartean, ez da alegaziorik aurkeztu.

2015eko ekainaren 24ko Erabakiaren bidez, 10/2002 Foru Legean arautzen diren Nafarroako Foru Komunitateko azpiegituren lurralde planei dagokienez, Nafarroako Gobernuak erabaki du telekomunikazioen arloan eskumenak dituen departamentuak tramitatu eta ebatziko dituela plan horiek.

Horrenbestez, Lehendakaritzako, Funtzio Publikoko, Barneko eta Justiziako Departamentuaren egitura organikoa ezartzen duen irailaren 9ko 198/2015 Foru Dekretuaren 4. artikuluak ematen dizkidan eskudantziak erabiliz,

EBATZI DUT:

1. France Telecom España SAk (gaur egungo izena: Orange Espagne SA) Nafarroako Foru Komunitateko Azpiegituren Lurralde Plana aldatu eta eguneratzeko aurkeztu duen lehenbiziko espedientea onestea, barne direla ebazpen honen I. eranskinean agertzen diren kokapenak eta II. eranskinean agertzen diren ukitutako instalazioek bete beharreko determinazioak.

2. Ebazpena honako hauei igortzea: Azpiegitura Teknologikoen eta Euskarri Zentroaren Zerbitzua, Ingurumen Kalitatearen eta Klima Aldaketaren Zerbitzua, Elikagaien Segurtasunaren eta Ingurumen Osasunaren Zerbitzua, Ondare Historikoaren Zerbitzua eta Lurraldearen Antolamendu eta Hirigintza Zerbitzua.

3. Ebazpen hau eta bere eranskinak Orange Espagne SAri jakinaraztea, eta aditzera ematea gora jotzeko errekurtsoa jartzen ahal dela Lehendakaritzako, Funtzio Publikoko, Barneko eta Justiziako kontseilariari zuzendua, jakinarazi eta biharamunetik hilabeteko epean, Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluan eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluetan xedatutakoarekin bat (lege hori urtarrilaren 13ko 4/1999 Legearen bidez aldatu zen).

4. Ebazpen hau eta eranskinak Nafarroako Aldizkari Ofizialean argitaratzea, orok jakin dezan.

Iruñean, 2015eko azaroaren 26an.–Informatikaren, Telekomunikazioen eta Berrikuntza Publikoaren zuzendari nagusia, Mikel Sagués García.

I. ERANSKINA

II. ERANSKINA

Determinazio orokorrak

–Elikagaien Segurtasunaren eta Ingurumen Osasunaren Zerbitzuak emandako txostenean ezarritakoa betez:

Irekitzeko lizentziaren fasean, eta oinarrizko estazioak martxan jarri baino lehen, teknikari eskudun baten ziurtagiria aurkeztuko da dagokion udalean. Txosten horretan justifikatuko da estazioak proiektu teknikoarekin eta aurkeztutako eranskinekin bat egin direla, eta emisio irrati-elektrikoetako esposizio mailen neurketa errealen emaitzak emanen dira. Neurketak erradiazio handiena den iristeko moduko tokian eginen dira, barne direla bereziki aintzat hartu beharreko erabilera-eremuak, urtarrilaren 11ko CTE23/2002 Aginduan eta geroko aldaketetan ezarritako prozedurari jarraikiz eta maiatzaren 6ko 10/2002 Foru Legean ezarritakoarekin bat.

–Ingurumen Kalitatearen eta Klima Aldaketaren Zerbitzuak emandako txostenean ezarritakoa betez:

Sustatzaileari gogorarazi behar zaio ezen, Ingurumena Babesteko Esku-hartzeari buruzko martxoaren 22ko 4/2005 Foru Legea garatzeko Erregelamendua onetsi zuen abenduaren 28ko 93/2006 Foru Dekretuaren arabera, obretako udal lizentziak eman baino lehen instalazio bakoitzaren ingurumen ukipenetarako baimen egokia tramitatu beharko dela, betiere instalazioa lurzoru urbanizaezinean bada eta aldez aurretik baimen hori ez badu.

–Ondare Historikoaren Zerbitzuak emandako txostenean ezarritakoa betez:

Aurreikusitako lanetan, horren berririk izan ez eta aztarna arkeologikoren bat agertuko balitz, lanak gelditu eta horren berri eman beharko dio, berehala, Arkeologia Atalari, ondare historikoaren alorrean indarrean dagoen legeriarekin bat (Nafarroako Kultur Ondareari buruzko azaroaren 22ko 14/2005 Foru Legearen 59. artikuluan eta Espainiako Ondare Historikoari buruzko ekainaren 25eko 16/1985 Legearen 43.3 eta 44. artikuluak). Aipatu foru legearen 101.h artikulua aplikatzeko, oharpen hori ez betetzeagatik ondare historikoari gerta dakiokeen edozein ukipen arau-hauste larritzat joko da.

–Azpiegitura Teknologikoen eta Euskarri Zentroaren Zerbitzuak emandako txostenean ezarritakoa betez:

Operadoreak abenduaren 31n martxan dauden estazioen zerrenda aurkeztu beharko du, egun hori baino lehen, gutxienez datu hauekin: estazioaren kodea, UTMX eta UTMY koordenatuak, erabilitako teknologiak (GSM, UMTS, LTE, etab.), emisio frekuentziak eta sektoreen potentziak. Azken urtean estazioan aldaketarik izan ez bada, aski izanen da estazioaren kodea ematea eta aldaketarik ez duela izan adieraztea.

–Lurraldearen Antolamendu eta Hirigintza Zerbitzuak emandako txostenean ezarritakoa betez:

35/2002 Foru Legearen 117. artikuluan xedatutakoarekin bat, lurzoru urbanizaezineko kokapenek, lurzoru urbanizaezineko jardueretako baimena behar badute, instalatu baino lehen tramitatu beharko dute baimena. Orobat, aditzera ematen da baimen horiek eskatzeko behar den dokumentazio teknikoa aipatu legearen 119. artikuluan agertzen dela, eta ohartarazten da ezen, egin gogo diren jarduerak nahi diren tokietan gauzatzeak uki ditzakeen edo gauzatze hori baldintzatzen ahal duten azpiegitura eta/edo zortasunei dagokienez, operadoreek, obrak gauzatzen baino lehen, behar diren baimen eta txosten guztiak eskuratuko dituztela kasuan kasuko gaian eskudun diren organoetatik.

Determinazio espezifikoak

–Azpiegituren eta Euskarri Zentroaren Zerbitzuak errekerimendu batzuk egin zizkion sustatzaileari. Horrek behar bezalako erantzuna eman eta horren inguruko agiriak aurkeztu ditu, salbu kasu hauetan:

• NAV2058 estazioa (Odieta). Estazio horren emisio elektromagnetikoen azterlan berri bat bidaltzeko eskatu zen, bidali zutena beste estazio bati zegokiolako. Azterlan berririk ez da bidali, eta horregatik kokapen hau lurralde planetik kanpo dago, baimenik gabe.
• NAV6004 estazioa (Iruña). Estazioaren fitxa berri bat bidaltzeko eskatu zen, emisioen azterlana kanpoaldean eta aparkalekuko planta guztietan egina, bai eta antenaren eraginetik kanpo gelditzen den eremuaren paralelepipedoa ere. Operadoreak ez du informazio hori bidali, eta horregatik kokapen hau lurralde planetik kanpo dago, baimenik gabe.

–Azpiegituren eta Euskarri Zentroaren Zerbitzuak egindako errekerimendu bera egin zuen Elikagaien Segurtasunaren eta Ingurumen Osasunaren Zerbitzuak NAV6004 estaziorako.

–Ondare Historikoaren Zerbitzuak zenbait errekerimendu egin zizkion sustatzaileari, eta horrek ez du behar bezala erantzun, ez eta horien inguruko agiriak eman ere.

• NAV1059 estazioa (Erro). Kokapena tokiz aldatzeko eskatu zen, kultur intereseko ondasun den Done Jakue bidearen babes zerrendan baitzegoen. Errekerimenduari ez zaio erantzuna eman, eta horregatik kokapen hau lurralde planetik kanpo dago, baimenik gabe.
• NAV6008 (Iruña-Yanguas). Dokumentazioa aurkezteko eskatu zen, frogatzeko antena txikia dela eta estalki berean instalatutako beste elementu txiki batzuetatik hurbil dagoela. Errekerimenduari ez zaio behar bezala dokumentatutako erantzuna eman, eta horregatik kokapen hau lurralde planetik kanpo dago, baimenik gabe.

–Lurraldearen Antolamendu eta Hirigintza Zerbitzuak aditzera ematen du ezen, 35/2002 Foru Legearen 117. artikuluan xedatutakoarekin bat, kokapen hauek lurzoru urbanizaezineko jardueretako baimena behar dutela:

Iragarkiaren kodea: F1516085