1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
719/2016 EBAZPENA, irailaren 22koa, Ingurumeneko eta Lurraldearen Antolamenduko zuzendari nagusiak emana, hondakinak sortzeari buruzko mikrokontakizunen 2016ko I. lehiaketaren oinarriak eta mikrobideoen 2016ko I. lehiaketarenak onesten dituena. Lehiaketak ikasleei zuzendurik daude.
Nafarroako Gobernuak ingurumen hezkuntzaren tratamendua zeharka indartu nahi du maila guztietan. Landa Garapeneko, Ingurumeneko eta Toki Administrazioko Departamentuaren egitura organikoa ezartzen duen abuztuaren 28ko 137/2015 Foru Dekretuaren 56. artikuluaren arabera, Ingurumenari buruzko Informazio eta Hezkuntzaren Atalaren eskumena da, besteak beste, ingurumenari buruzko jarduerak, prestakuntzakoak, zabalkundekoak eta hezkuntzakoak, planifikatu, koordinatu eta gauzatzea.
Eskumen horren barnean, ikasleak ingurumen arloko gaietan sentsibilizatzeko jarduerak daude. Zehazki, aurten hondakina baliabide gisa hartzea sustatu nahi da, 2017-2027 Nafarroako Hondakinen Plan berria kontuan harturik.
Helburu nagusia gazteek sentsibilizazio eta ezagutza handiagoa lortzea da, estimulu positibo baten bidez, ingurumenari buruz oro har eta, zehazki, hondakinen sortzeari buruz, bai eta kontzientzia hartzea etxeko hondakinak sortzeak dakarren ingurumen kostuari buruz.
Adierazitakoarekin bat, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak eta Landa Garapeneko, Ingurumeneko eta Toki Administrazioko Departamentuaren oinarrizko egitura organikoa ezartzen duen abuztuaren 28ko 137/2015 Foru Dekretuak ematen dizkidaten eskudantziak erabiliz,
EBATZI DUT:
1. “Nire eguneroko ekarpena hondakinak murrizteko” mikrokontakizunen 2016ko I. lehiaketaren oinarriak onestea (I. eranskina). Nafarroako Lehen Hezkuntzako ikasleek parte hartzen ahal dute lehiaketa honetan.
2. “Eguneroko bizitzan hondakin gutxiago sortzea” mikrobideoen 2016ko I. lehiaketaren oinarriak onestea (II. eranskina). Nafarroako Bigarren Hezkuntzako ikasleek parte hartzen ahal dute lehiaketa honetan.
3. 2.500 euroko gastua onestea, “Sariak, lehiaketak eta txapelketak” izeneko 740003-74300-2268-456200 kontu-sailaren kargura, lehiaketaren gastuetarako.
4. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jar dezakete, Landa Garapeneko, Ingurumeneko eta Toki Administrazioko kontseilariari zuzendua, hilabeteko epean.
5. Foru agindu honen kontra, administrazio publiko interesdunek administrazioarekiko auzi-errekurtsoa aurkezten ahal dute Nafarroako Justizia Auzitegi Nagusiko Administrazioarekiko Auzien Salari zuzendua, hura argitaratu eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 97.2 artikuluan aurreikusi bezala.
Epeak ebazpen hau Nafarroako Aldizkari Ofizialean argitaratu eta biharamunean hasiko dira kontatzen.
6. Ebazpen hau Landa Garapeneko, Ingurumeneko eta Toki Administrazioko Departamentuko Idazkaritza Tekniko Nagusiari, Uraren Zerbitzuari, Partaidetzaren eta Jasangarritasunaren Atalari, Hondakinen Atalari eta Ekonomia Aferetarako Bulegoari eta Hezkuntza Departamentuko Prestakuntza Atalari igortzea, behar diren ondorioak izan ditzan.
7. Deialdi hau eta bere oinarriak Nafarroako Aldizkari Ofizialean eta ohiko komunikabideetan argitaratzea.
Iruñean, 2016ko irailaren 22an.–Ingurumeneko eta Lurraldearen Antolamenduko zuzendari nagusia, Eva García Balaguer.
I. ERANSKINA
Mikrokontakizunen lehiaketa
Nire eguneroko ekarpena hondakinak murrizteko
LEHIAKETAREN OINARRIAK
Lehena.–Xedea.
Nafarroako Gobernuak, Landa Garapeneko, Ingurumeneko eta Toki Administrazioko Departamentuaren bidez, mikrokontakizunen I. lehiaketa antolatu du, “Nire eguneroko ekarpena hondakinak murrizteko” izenburupean. Lehiaketa hori berria da “Nafarroaren Eguna” dela-eta eginen diren ekitaldien barnean eta eskola neska-mutilen sormen literarioa eta ingurumenarekiko harremana sustatzea du xede, beren eguneroko bizitzan hondakin gutxiago sortzetik abiatuta.
Parte-hartzaileek kontakizun labur bat idatzi beharko dute etxeko hondakinak murrizteko egunero egiten dituzten ekintzei buruz.
Aurkezten diren lanen originaltasuna baloratuko da.
Bigarrena.–Parte hartzeko baldintzak eta formatua.
“Nire eguneroko ekarpena hondakinak murrizteko” mikrokontakizunen lehen lehiaketa Nafarroako Foru Komunitateko Lehen Hezkuntzako 3. ikasmailatik 6.era bitarteko ikasleei zuzenduta dago.
Lehiaketan bi kategoria daude:
a) Lehen Hezkuntzako 3. eta 4. mailak.
b) Lehen Hezkuntzako 5. eta 6. mailak.
Lehiaketa honetara aurkezten den ikastetxe bakoitzak bere finalistak hautatu beharko ditu, kategoria bakoitzeko bat, ikastetxearen ordezkari izan daitezen. Mikrokontakizuna egin duten ikasleen izen-deiturak eta ikasgela adierazi beharko da.
Aurkeztuko diren lanek originalak eta aurretik argitaratu gabeak izan beharko dute.
Lanak DIN A 4 formatuan aurkeztu behar dira, 10 puntuko Arial letrarekin eta 1,5eko lerroartearekin idatzirik, orriaren bi aldeetatik inprimaturik (paperean aurkezten badira), sinadurarik gabe eta lelo batekin. Horrekin batera gutun-azal itxi bat aurkeztuko da, kanpoaldean leloa adieraziz, eta barruan egilearen datuak (izena, bi abizenak, ikastetxea, ikasmaila eta gela) jasotzen dituen orri bat sartuta.
Kontakizunaren luzera gutxienez orrialde batekoa izanen da, eta gehienez hiru orrialdekoa. Aukeratutako gaia “Nire eguneroko ekarpena hondakinak murrizteko” da.
Euskaraz nahiz gaztelaniaz egin daiteke.
Hirugarrena.–Non eta noiz aurkeztu.
Izena emateko eta lanak aurkezteko epea oinarri arautzaileak Nafarroako Aldizkari Ofizialean argitaratu eta biharamunetik 2016ko urriaren 21era arte izanen da (bi egun horiek barne), Landa Garapeneko, Ingurumeneko eta Toki Administrazioko Departamentuko ondoko helbide honetara zuzenduta, ikastetxearekin harremanetan jartzeko behar diren datu guztiak adieraziz:
Aukerak (fisikoki eta/edo telematikoki):
Ingurumeneko eta Lurraldearen Antolamenduko Zuzendaritza Nagusia.
Mikrokontakizunen lehiaketa.
Ingurumenari buruzko Informazio eta Hezkuntzaren Atala.
González Tablas kalea, 9, beheko solairua.
31005 Iruña (Nafarroa).
Harremanetarako datuak: 848 42 49 10 / 848 42 75 82 sian@navarra.es.
Laugarrena.–Epaimahaia.
Epaimahai batek hautatuko ditu sarituak. Epaimahaia honako hauek osatuko dute:
Landa Garapeneko, Ingurumeneko eta Toki Administrazioko Departamentuko Uraren Zerbitzuko zuzendaria edo hark eskuordetzen duen teknikaria.
Landa Garapeneko, Ingurumeneko eta Toki Administrazioko Departamentuko Partaidetzaren eta Jasangarritasunaren Ataleko burua edo hark eskuordetzen duen teknikaria.
Landa Garapeneko, Ingurumeneko eta Toki Administrazioko Departamentuko Hondakinen Ataleko burua edo hark eskuordetzen duen teknikaria.
Landa Garapeneko, Ingurumeneko eta Toki Administrazioko Departamentuko Ingurumenari buruzko Informazio eta Hezkuntzaren Ataleko burua edo hark eskuordetzen duen teknikaria.
Hezkuntza Departamentuko Prestakuntza Ataleko burua edo hark eskuordetzen duen teknikaria.
Epaimahaiaren erabakia Landa Garapeneko, Ingurumeneko eta Toki Administrazioko Departamentuaren web orrian argitaratuko da, ebazpenaren ondoren. Gainera, Hezkuntzako Buletinean, web orrian eta sare sozialetan argitaratuko da, aipatutako hedabideetan kontakizunak ere argitaratu ahalko direlarik.
Bosgarrena.–Sariak.
Kategoria bakoitzerako saria honakoa izanen da:
1. Liburu elektroniko bat, naturari buruzko liburu sorta eta diploma, irabazlearendako.
2. Sendavivara txangoa, gela osoarendako.
Irabazleak Nafarroaren Eguna ospatzeko ekitaldietara joanen dira beren lana irakurtzera eta sariak jasotzera. Sari banaketa abenduaren 3aren (Nafarroaren Egunaren) bezperatan izanen da, Nafarroako Jauregiko Tronuaren Aretoan.
Behar den aurrerapenarekin jakinaraziko zaie zehazki zer egunetan eta zer ordutan izanen diren sari banaketa eta kontakizun irabazleen irakurketa.
Seigarrena.–Parte hartzeko konpromisoa.
Lehiaketan parte hartzeak berekin dakar oinarri hauek onartzea eta, orobat, Epaimahaiak edo Landa Garapeneko, Ingurumeneko eta Toki Administrazioko Departamentuak hartutako erabakiak onartzea.
Oinarriak ez betetzeak lehiaketatik kanpo gelditzea ekar dezake, Epaimahaiak edo Landa Garapeneko, Ingurumeneko eta Toki Administrazioko Departamentuak erabakitzen badute.
Zazpigarrena.–Eskubideak.
Landa Garapeneko, Ingurumeneko eta Toki Administrazioko Departamentuak eskubidea izanen du finkatutako arauak betetzen ez dituen edonor lehiaketatik kanpo uzteko; lehiaketa behar bezala joan dadin behar diren arau osagarriak emateko eta salbuespenak baimentzeko; eta ordutegiak finkatzeko edo aldatzeko, betiere, behar den aurrerapenarekin iragarriko dituelarik.
“Nire eguneroko ekarpena hondakinak murrizteko” mikrokontakizunen lehiaketan parte hartzeak berekin dakar Landa Garapeneko, Ingurumeneko eta Toki Administrazioko Departamentuari lagatzea aurkeztutako lanak, bai eta horiek kopiatzeko, banatzeko eta komunikazio publikorako eskubideak ere.
Zortzigarrena.–Datuen lagapena.
Datu Pertsonalak Babesteari buruzko abenduaren 13ko 15/1999 Lege Organikoan xedatutakoa betez, Nafarroako Gobernuaren fitxategi batean sartuko dira igorritako eskabide honetatik ateratzen diren datu pertsonalak, eskatzaileek horiek tratatzeko baimena ematen dutelarik.
II. ERANSKINA
Mikrobideoen lehiaketa
Eguneroko bizitzan hondakin gutxiago sortzea, ekonomia zirkularraren eta sorkuntza digitalaren funtsezko alderdia
LEHIAKETAREN OINARRIAK
Lehena.–Xedea.
Nafarroako Gobernuak, Landa Garapeneko, Ingurumeneko eta Toki Administrazioko Departamentuaren bidez, mikrobideoen I. lehiaketa antolatu du. Lehiaketa hori berria da abenduaren 3an ospatzen den “Nafarroaren Eguna” dela-eta eginen diren ekitaldien barnean eta gazteen ingurumenarekiko harremana sustatzea du xede, eguneroko bizitzan hondakin gutxiago sortzetik abiatuta, ekonomia zirkularraren eta sorkuntza digitalaren funtsezko alderdia dela ikusirik.
Bideo labur bat egin beharko dute hondakinak murrizteko egunero egin daitezkeen ekintzei buruz, Europar Batasuneko politiken ildoan.
Aurkezten diren lanen originaltasuna baloratuko da.
Bigarrena.–Parte hartzeko baldintzak eta formatua.
Mikrobideoen lehenengo lehiaketa Derrigorrezko Bigarren Hezkuntza (DBH) ikasten duten Nafarroako Foru Komunitate osoko gazteei zuzenduta dago:
–Parte-hartzaileek DBH ikasi behar dute (DBHko 1.etik 4.era).
–Gazteek bakarka edo taldean parte har dezakete. Taldeek gehienez hiru kide izan dezakete. Talde bakoitzak bideo bakar bat aurkez dezake.
Parte-hartzaile guztien izen-deiturak, NANa, ikastetxea, ikasmaila eta ikasgela adierazi beharko dira.
Aurkeztuko diren lanek originalak eta aurretik argitaratu gabeak izan beharko dute.
Bideoek 2 minutu iraunen dute, gehienez ere. Aukeratutako gaia “Eguneroko bizitzan hondakin gutxiago sortzea” da.
Lanak euskaraz edo gaztelaniaz aurkez daitezke eta, nahi izanez gero, erabili ez den hizkuntzako azpitituluak sar daitezke bideoan.
Bideoak gero web inguruneetan edo sare sozialetan hedatzeko moduko formatu digital batean (FLV, MOV, WMV edo beste bat) igorri behar dira, pen-drive bidez, DVD edo antzekoen bidez, edo Dropbox moduko plataforma digitalen bidez.
Hirugarrena.–Non eta noiz aurkeztu.
Izena emateko eta lanak aurkezteko epea oinarri arautzaileak Nafarroako Aldizkari Ofizialean argitaratu eta biharamunetik 2016ko urriaren 21era arte izanen da (bi egun horiek barne), Landa Garapeneko, Ingurumeneko eta Toki Administrazioko Departamentuko ondoko helbide honetara zuzenduta, harremanetan jartzeko behar diren datu guztiak adieraziz:
Ingurumeneko eta Lurraldearen Antolamenduko Zuzendaritza Nagusia.
Mikrobideoen lehiaketa.
Ingurumenari buruzko Informazio eta Hezkuntzaren Atala.
González Tablas kalea, 9, beheko solairua.
31005 Iruña (Nafarroa).
Harremanetarako datuak: 848 42 49 10 / 848 42 75 82 sian@navarra.es.
Laugarrena.–Epaimahaia.
Epaimahai batek hautatuko ditu sarituak. Epaimahaia honako hauek osatuko dute:
Landa Garapeneko, Ingurumeneko eta Toki Administrazioko Departamentuko Uraren Zerbitzuko zuzendaria edo hark eskuordetzen duen teknikaria.
Landa Garapeneko, Ingurumeneko eta Toki Administrazioko Departamentuko Partaidetzaren eta Jasangarritasunaren Ataleko burua edo hark eskuordetzen duen teknikaria.
Landa Garapeneko, Ingurumeneko eta Toki Administrazioko Departamentuko Hondakinen Ataleko burua edo hark eskuordetzen duen teknikaria.
Landa Garapeneko, Ingurumeneko eta Toki Administrazioko Departamentuko Ingurumenari buruzko Informazio eta Hezkuntzaren Ataleko burua edo hark eskuordetzen duen teknikaria.
Hezkuntza Departamentuko Prestakuntza Ataleko burua edo hark eskuordetzen duen teknikaria.
Epaimahaiaren erabakia Landa Garapeneko, Ingurumeneko eta Toki Administrazioko Departamentuaren web orrian argitaratuko da, sarituak hautatu ondoren. Gainera, Hezkuntzako Buletinean, web orrian eta sare sozialetan argitaratuko da, aipatutako hedabideetan bideoak ere argitaratu ahalko direlarik.
Bosgarrena.–Sariak.
Saria izanen da: HD bideo kamera bat eta naturari buruzko liburu sorta (bideoa taldean egin bada, gehienez 3).
Sari banaketa abenduaren 3aren (Nafarroaren Egunaren) bezperatan izanen da, Nafarroako Jauregiko Tronuaren Aretoan. Irabazleei beren bideoak erakusteko eta/edo azaltzeko eta sariak jasotzeko deituko zaie.
Behar den aurrerapenarekin jakinaraziko zaie zehazki zer egunetan eta zer ordutan izanen diren sari banaketa eta bideo irabazleen proiekzioa.
Seigarrena.–Parte hartzeko konpromisoa.
Lehiaketan parte hartzeak berekin dakar oinarri hauek onartzea eta, orobat, Epaimahaiak edo Landa Garapeneko, Ingurumeneko eta Toki Administrazioko Departamentuak hartutako erabakiak onartzea.
Oinarriak ez betetzeak lehiaketatik kanpo gelditzea ekar dezake, Landa Garapeneko, Ingurumeneko eta Toki Administrazioko Departamentuak edo Epaimahaiak erabakitzen badute.
Landa Garapeneko, Ingurumeneko eta Toki Administrazioko Departamentuak eskubidea izanen du finkatutako arauak betetzen ez dituen edonor lehiaketatik kanpo uzteko.
Zazpigarrena.–Eskubideak.
Antolatzaileak eskubidea izanen du lehiaketa behar bezala joan dadin behar diren arau osagarriak emateko eta salbuespenak baimentzeko. Halaber, antolaketa batzordeak eskubidea izanen du ordutegiak finkatzeko edo aldatzeko, betiere, behar den aurrerapenarekin iragarriko dituelarik.
“Eguneroko bizitzan hondakin gutxiago sortzea, ekonomia zirkularraren eta sorkuntza digitalaren funtsezko alderdia” mikrobideoen lehiaketan parte hartzeak berekin dakar Landa Garapeneko, Ingurumeneko eta Toki Administrazioko Departamentuari lagatzea aurkeztutako lanak, bai eta horiek kopiatzeko, banatzeko eta komunikazio publikorako eskubideak ere.
Copyrighta. Jasotzen diren lan guztiak Gobernuaren zein enpresa publikoen webguneetan eta sare sozialetan argitaratu eta hedatu ahalko dira, ahalik eta hedapen zabalena izan dezaten.
Zortzigarrena.–Datuen lagapena.
Datu Pertsonalak Babesteari buruzko abenduaren 13ko 15/1999 Lege Organikoan xedatutakoa betez, Nafarroako Gobernuaren fitxategi batean sartuko dira igorritako eskabide honetatik ateratzen diren datu pertsonalak, eskatzaileek horiek tratatzeko baimena ematen dutelarik.
Iragarkiaren kodea: F1610918
