1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
ERABAKIA, Nafarroako Gobernuak 2016ko abuztuaren 24an hartua, “Iruñerrian gai inerteen hondakindegiak ezartzeko Udalez Gaindiko Proiektu Sektoriala eguneratzeko proiektua” izenekoari buruzko dokumentazio berria jendaurrean jarri eta, aldi berean, mugapean eragina duten udalei entzunaldia ematen diena. Proiektuaren sustatzailea “Recuperación Ambiental SL” da.
I.–Aurrekariak.
Nafarroako Gobernuak 2001eko uztailaren 2an hartutako Erabakiaren bidez, “Asociación Navarra de Empresas de la Construcción y Obras Públicas” elkarteak sustaturiko “Iruñerrian gai inerteen hondakindegiak ezartzeko Udalez gaindiko Proiektu Sektoriala” onetsi zen, kokaleku hauetarako: 1. Txitxibar (Getze Galar), 2. Espartza Galar (Galar), 3. Gazolatz (Zizur), 4. Arazuri (Oltza), 7. Zabaldika (Esteribar) eta 8. Undio (Zizur), erabaki horren azalpen zatian, hirigintza eta lurralde arloan kontuan hartu beharrekoen atalean jasotako baldintzak bete beharra ezarrita (2001eko 110. Nafarroako Aldizkari Ofiziala, irailaren 10ekoa).
Horrenbestez, abenduaren 17ko 346/2001 Foru Dekretuaren bidez, Iruñerrian gai inerteen hondakindegiak ezartzeko Udalez Gaindiko Proiektu Sektoriala interes orokorrekoa zela deklaratu zen (2002ko 11. Nafarroako Aldizkari Ofiziala, urtarrilaren 25ekoa).
Ondoren, Nafarroako Gobernuak 2002ko urtarrilaren 7an hartutako Erabakiaren bidez, Ardazko (Eguesibar) kokalekua ere onetsi zen, “Asociación Navarra de Empresas de la Construcción y Obras Públicas” elkarteak sustaturiko “Iruñerrian gai inerteen hondakindegiak ezartzeko Udalez gaindiko Proiektu Sektorialaren” barnean (2002ko 19. Nafarroako Aldizkari Ofiziala, otsailaren 13koa).
Zenbait urte geroago, 2006ko azaroaren 24an, “Recuperación Ambiental SL” enpresak Iruñerrian gai inerteen hondakindegiak ezartzeko Udalez Gaindiko Proiektu Sektoriala eguneratzeko proposamen bat aurkeztu zuen; bertan, kokaleku (onartu) batzuei uko egiten die (Txitxibar, Zabaldika, Undio eta Arazuri), Erreniegako ipar mazelan eta Iberon kokaleku berriak gehitzen ditu, eta Ardazko eta Espartza Galarko hondakindegiak (onartuak) handitzen ditu.
Nafarroako Gobernuak 2010eko otsailaren 22an hartutako Erabakiaren bidez, eguneratzeko proposamen hori Udalez Gaindiko Proiektu Sektorial deklaratu zen, eta jendaurrean jarri eta planaren eraginpeko mugapeetako udalei entzunaldia eman zitzaien, Lurraldearen Antolamenduari eta Hirigintzari buruzko abenduaren 20ko 35/2002 Foru Legean aurreikusitako ondorioetarako eta Ingurumen ebaluazio estrategikoaren prozeduraren ondorioetarako (2010eko 33. Nafarroako Aldizkari Ofiziala, martxoaren 15ekoa).
2015eko martxoaren 30ean, “Recuperación Ambiental SL” enpresak beste ale bat aurkeztu zuen, paperean, jendaurrean egondako aurreko dokumentazioaren ordezkoa.
II.–Dokumentazio berria.
Ondotik azaltzen dira 2015eko martxoaren 30ean aurkeztutako dokumentuan egin diren aldaketak, jendaurrean lehenago egondakoarekin alderatuta:
−Hondakindegiak ezarri aurretik, bitartean eta ondotik lurzorua babesteko aplikatzekoak diren araubideak ezartzea.
–Aukeren azterlana irizpide anitzeko analisiarekin osatzea (eguneratuta), hautatu diren kokalekuen egokitasuna edo ukapena zehazteko.
−Hautatutako kokalekuen trafikoari buruzko azterlana.
−Iberoko kokalekuan aurreikusi den bidea aldatzea, pinudian eraginik ez izateko.
−Erreniegako kokalekura NA-1110 errepidetik sartzean dagoen gurutzagunea aldatzea, indarreko legeriarekin bat.
−Urteko hondakinen bolumena gutxitzea, hondakindegien bizitza erabilgarria luzatzeko.
−Esku-hartzearen lehen fasea eta haren iraupena programatzea.
−Espartza Galarko hondakindegia handitzeko aurreikusi den jarduketan, okupazioaren azalera eta behin betiko egoera aldatzea, ezponda eta goi tentsioko aireko linea saihesteko.
Aldaketa horiek funtsezkotzat hartzen ahal dira jendaurrean jarritako hasierako proiektuarekin alderatuta, eta horregatik bidezkoa da proposamen berri hau jendaurrean jarri eta, aldi berean, mugapean eragina duten udalei entzunaldia ematea.
Dokumentazio berria aztertu ondoren, proiektuak erantzun egokia ematen dio lurraldearen antolamenduaren, hirigintzaren eta ingurumenaren arloan aplikatzekoa den legeriak eskatzen duen dokumentazioari. Nolanahi ere, espedientea ebatzi aurretik, banku abal bat edo zuzenbidean onartutako beste berme mota bat aurkeztu beharko da, plana behar bezala beteko dela ziurtatzeko; abal edo berme horren zenbatekoa proiektuko obra zibilerako kalkulatu den aurrekontuaren %6 adinakoa izanen da, Lurraldearen Antolamenduari eta Hirigintzari buruzko abenduaren 20ko 35/2002 Foru Legearekin bat.
III.–Hirigintzari eta lurraldeari buruz kontuan hartu beharrekoak.
III.1.–Lurraldearen antolamendurako tresnekin bat etortzea.
Ukitutako eremurako araua Nafarroako Erdialdeko Lurraldea Antolatzeko Plana (LAP 3) da, maiatzaren 16ko 45/2011 Foru Dekretuaren bidez onetsia.
Hondakindegi bakoitzaren ukipen partikularra aztertu ondoren, hautatutako kokalekuek ez dute ukipenik sortzen Plan horretan sartuta dauden Babes Bereziko Eremuetan (urbanizatzeko prozesutik kanpo daude, hartutako LEDak edo balio bereziak direla eta), ez eta natur arriskuak izan ditzaketen eremuetan ere.
Aurrekoa gorabehera, lege sektorial batek ezarritako babes araubide berezia duten lurzoruak ukitzen dituzten jarduketak egiteko, arlo horretako organo eskudunaren baimena edo aginduzko txostena izan beharko da.
III.2.–Hirigintzako udal planeamenduarekin bat etortzea.
Dagozkion hirigintzako udal planeamenduak azterturik, lege sektorialek eta lurraldearen antolamenduko tresnek ezarritakoa galarazi gabe, Nafarroako Gobernuak 2010eko otsailaren 22an hartutako Erabakian xedatutako oharrak errepikatzen dira jardueraren bateragarritasunaz ukitutako lurzoru urbanizaezinaren kategorietarako eta/edo azpikategorietarako ezarritako araubideekin, gorde beharrekoarekin eta/edo babesekoarekin.
Halere, Lurraldearen Antolamendu eta Hirigintza Zerbitzuaren 2016ko ekainaren 27ko txostenean erantzun beharreko gai batzuk daude arlo horretan.
III.3.–Beste ukipen batzuk.
Jarduerak egungo azpiegitura eta zerbitzuetan dituen ukipenei dagokienez, lehenago jendaurrean egondako agirian aurreikusi ziren jarduketak mantentzen dira, hau da, Erreniegako ipar mazelan Faltzes-Irurtzun gasbidea desbideratu eta berrezarri beharra, bai eta Ardazko hondakindegia gurutzatzen duen tentsio ertaineko aireko linea elektrikoa ere. Espartza Galarko hondakindegiaren okupazio azalera, berriz, aldatu egiten da, inguru horretan barna, ipar-mendebaldetik hego-ekialdera doan goi tentsioko aireko linea elektrikoaren gainean jarduerak zuen ukipena kentzeko.
III.4.–Proposaturiko araudia.
Lurraldearen Antolamenduari eta Hirigintzari buruzko abenduaren 20ko 35/2002 Foru Legeari eta LAP 3.aren PN8 eranskinari jarraikiz, tresna hau onetsiz gero ezarpenaren eremuan sartutako lurzoruak babestu beharreko lurzoru urbanizaezinak izanen lirateke, jarduera berezietarako lurzoruaren azpikategoriarekin.
Proiektuak aipatu beharko luke kategorizazio hori, bai eta hura desagertu eginen dela behin jarduera itxita eta ukitutako lurrak lehengoratzeko lanak amaituta daudenean, edo, bestela, “jarduketa bete ondoren” izan beharreko babes araubidean (memoriaren “17. atala.–Lurzoruaren babes araubidea”) justifikatzen den denbora iragan ondoren.·
Eremuko lurzorua erabili eta babesteko araudia, hala bada, aplikatzen ahal diren gainerako arauen gainean egonen da, aplikatzen ahal diren arau sektorialei eta lurraldearen eta hirigintzaren antolamenduko tresnei jarraikiz.
Aurkeztutako araudiaren ildotik, jaso beharko dira proiektatutako azpiegitura eolikoak egiteak eta abiarazteak sortuko dituzten ukipenak eta zortasunak (aldi baterakoak nahiz iraunkorrak), bai eta horren gaineko informazio grafikoa ere.
Lurraldearen Antolamendu eta Hirigintza Zerbitzuaren 2016ko ekainaren 27ko txostenean berrikusi eta/edo zuzendu beharreko beste gai batzuk daude.
Hondakindegi bakoitzerako definitzen den eremuari dagokionez, ez dira aurreikusi obrak gauzatzeko eskatzen ahal diren egokitzapenak (baimentzen ahal direnak, 35/2002 Foru Legearen 44.4 artikuluarekin bat).
IV.–Ingurumen arloko tramitazioa.
Ingurumena Babesteko Esku-hartzeari buruzko martxoaren 22ko 4/2005 Foru Legean eta lege hori garatzeko erregelamenduan ezarritakoari jarraikiz, proiektu hau ingurumen ebaluazio estrategikoaren prozeduraren mende jarri behar da, eta Ingurumen ondorioen adierazpena ere egin beharko zaio.
2016ko ekainaren 6an, espedienteari erantsitako dokumentazio berria aztertuta, Ingurumen Kalitatearen eta Klima Aldaketaren Zerbitzuak txostena eman zuen adieraziz “aurkeztutako dokumentazioa nahikoa da eta jendaurrean jar daiteke Ingurumen ebaluazio estrategikoaren prozeduraren ondorioetarako.”
Aurrekoa gorabehera, hautatutako kokalekuek ingurumen aldetik duten harrerarako gaitasuna aztertu ondoren, aurreikusitako lau eremuen artean ingurumenaren ikuspuntutik bideragarriak diren bakarrak Iberoko hondakindegia eta Espartzako hondakindegiaren handitzea dira, eta bi proiektu horien kasuan ere osatu beharreko alderdi batzuk aipatzen dira.
V.–Departamentuen txostenak.
Proiektua araudi sektorial aplikagarrira egokitu eta doitzeari dagokionez, txosten bana eskatu zaie zenbait organo eta erakunderi, bakoitzaren eskumeneko arloari buruz.
Erakunde horien txosten batzuk proiektuan edo haren gauzatzean kontuan hartu beharreko determinazio edo oharrak jasotzen dituzte.
–Abiazio Zibileko Zuzendaritza Nagusia.
–Ebroko Ur Konfederazioa.
–Herri Lan Zuzendaritza Nagusia.
–Herrilurren Atala (Landa Garapeneko, Nekazaritzako eta Abeltzaintzako Zuzendaritza Nagusia).
–Ondare Arkitektonikoaren Atala (Vianako Printzea Erakundea-Kulturako Zuzendaritza Nagusia).
–Arkeologia Atala (Vianako Printzea Erakundea-Kultura Zuzendaritza Nagusia).
–Babes Zibilerako Zuzendaritza.
–Iruñerriko Mankomunitatea.
Horrez gain, txostena eskatu zaie Enagas eta Iberdrola enpresei, haien eskumeneko gaietan hondakindegiek izan ditzaketen ukipenei buruz, eta horiek kontuan hartu beharko dira espedientea ebatzi aurretik.
VI.–Interes orokorraren, onura publikoaren eta interes sozialaren deklarazioak.
Sustatzaileak interes orokorraren, onura publikoaren eta interes sozialaren deklarazioak eskatu ditu, bai eta proiektua presakoa dela deklaratzea desjabetzearen ondorioetarako. Indarreko UPSa ere deklarazio horiek jaso zituen.
Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 47. artikuluan ezarritakoarekin bat, deklarazio horiek Nafarroako Gobernuak egin ditzake, bidezkoa bada, proiektu sektorial honen behin betiko onespena ematearekin batera.
Horrenbestez, Lurraldearen Antolamendu eta Hirigintza Zerbitzuaren 2016ko ekainaren 27ko txostenarekin bat, eta Lurraldearen Antolamenduari eta Hirigintzari buruzko abenduaren 20ko 35/2002 Foru Legeari eta aplikatu beharreko gainerako arauei jarraikiz, Nafarroako Gobernuak, Landa Garapeneko, Ingurumeneko eta Toki Administrazioko kontseilariak proposaturik,
ERABAKI DU:
1. “Iruñerrian gai inerteen hondakindegiak ezartzeko Udalez Gaindiko Proiektu Sektoriala eguneratzeko proiektua” izenekoari buruzko dokumentazio berria hogeita hamar egunez jendaurrean jarri eta, aldi berean, mugapean eragina duten udalei entzunaldia ematea, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen ondorioetarako. Proiektuaren sustatzailea “Recuperación Ambiental SL” da.
Ondorio horietarako, espedientea interesdunen eskura egonen da Landa Garapeneko, Ingurumeneko eta Toki Administrazioko Departamentuaren bulegoetan (Gonzalez Tablas kalea, 9, 31005 Iruña), eta epe horretan zilegi izanen da idatziz nahi adina alegazio aurkeztea.
Agiria, halaber, web orri honetan ikusten ahalko da: http://www.ExposicionpublicaOT.navarra.es
2. Orobat, espedientea jendaurrean jartzea, epe berean, Ingurumen ebaluazio estrategikoaren prozeduraren ondorioetarako, Ingurumena Babesteko Esku-hartzeari buruzko 4/2005 Foru Legean ezarritakoarekin bat.
3. Enpresa sustatzaileari adieraztea, espedientea ebatzi baino lehen, espedientea osatu egin beharko duela, erabaki honen azalpen zatiko II. atalean adierazitakoari jarraikiz, eta aintzat hartu beharko dituela hirigintzari eta lurraldeari buruz kontuan hartu beharrekoak, Lurraldearen Antolamendu eta Hirigintza Zerbitzuaren 2016ko ekainaren 27ko txostenean jasotakoak.
4. Adieraztea proiektuak eskatutako txosten sektorialetan xedatutakoa bete beharko duela.
5. Eskuratutako txosten sektorialak eta Lurraldearen Antolamendu eta Hirigintza Zerbitzuaren 2016ko ekainaren 27ko txostena sustatzaileari igortzea.
6. Nolanahi ere, obrak egitean ukituta gelditzen ahal diren beste azpiegitura eta zortasun batzuei dagokienez, edo exekuzio hori baldintzatzen ahal dutenei dagokienez, sustatzaileak behar diren baimen guztiak lortuko ditu kasuan kasuko gaian eskudun diren erakundeetatik. Bide publikoen jarraitutasuna eta hondakindegi bakoitzaren alboko lurzatietarako sarbidea bermatu beharko dira. Hau da, sarbideen gaia proiektu honetan erabakita gelditu beharko da.
7. Erabaki hau Nafarroako Aldizkari Ofizialean argitaratzea.
8. Erabaki hau honakoetara igortzea: Herri Lan Zuzendaritza Nagusia, Herrilurren Atala, Ondare Arkitektonikoaren Atala, Arkeologia Atala, Babes Zibilerako Zuzendaritza; era berean, honakoei jakinaraztea: Abiazio Zibilaren Zuzendaritza Nagusia, Ebroko Ur Konfederazioa, Enagas, Iberdrola, Iruñerriko Mankomunitatea, Zizurko, Eguesibarko, Oltzako eta Galarko udalei, eta sustatzaileari, behar diren ondorioak izan ditzan.
Iruñean, 2016ko abuztuaren 24an.–Nafarroako Gobernuko kontseilari idazkaria, María José Beaumont Aristu.
Iragarkiaren kodea: F1609812
