1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
ERABAKIA, Nafarroako Gobernuak 2016ko abuztuaren 24an hartua, “Iruñerriko Ibai Parkea handitzeko Udalez gaindiko Plan Sektoriala” aldatzeko espedientea onesten duena, Ustarrotz, Ibiriku eta Eguesko kontzejuetan Urbi ibaiko ibilgu naturaleko pasealekuaren trazadurako aldaketari baitagokio. Sustatzailea Iruñerriko Mankomunitatea da.
Proiektatutako jarduketaren helburua da Ibai Parkea handitzeko Udalez gaindiko Plan Sektoriala aldatzea Eguesibarko udal mugapean, zehazki eremuari eta trazadurari dagokienez, honako xede hauekin: horren exekuzioa sinplifikatzea dauden bideak aprobetxatuz, Iratiko lehengo trenbidearen trazaduraren bi tarte berreskuratzea eta lotura egitea Egues eta Zangoza batzen dituen Iratiko Bide Berdearen Udalez gaindiko Plan Sektorialaren trazadurarekin (Nafarroako Gobernuak 2015eko ekainaren 11n hartutako erabakiaren bidez onetsia).
Nafarroako Gobernuak 2015eko ekainaren 24an hartutako erabakiaren bidez, “Iruñerriko Ibai Parkea handitzeko Udalez gaindiko Plan Sektoriala” aldatzeko espedientearen tramitazioa hasi zen, Ustarrotz, Ibiriku eta Eguesko kontzejuetan Urbi ibaiko ibilgu naturaleko pasealekuaren trazadurako aldaketari zegokionez. Erabaki hori 2015eko 141. Nafarroako Aldizkari Ofizialean argitaratu zen, uztailaren 22koan.
I.–Jendaurreko aldia eta entzutea emateko aldia.
Espedientea jendaurrean egon den bitartean, ez du inork alegazio idazkirik aurkeztu.
II.–Nafarroako Gobernuak 2015eko ekainaren 24an hartutako Erabakiko oharrei buruz.
Sustatzaileak, 2016ko otsailaren 23an, espeditentearen testu bategina aurkeztu du, erabaki horretan lurraldeari eta hirigintzari buruz bildutako oharrei erantzuteko. Testu horretan erabaki da oraingo UPSaren araudiari eustea eta beste bi plano erantsi dira, “UPSaren integrazio eremuak” aldaketa honen eremuan jasotzeko, non ibaiaren zenbait tarteren eta bidearen arteko espazioak biltzen baitira.
Halaber, atal bat erantsi da (11. atala, “Araudia”), eta 9.4 puntuan (Lurzoruaren sailkapena eta kategorizazioa), berriz, hausnarketa bat ukitutako lurzoruen kategorizazioari buruz. Eransketa horiek ez dira ez beharrezkotzat ez egokitzat hartzen, haien edukia soilik gogoraraztekoa baita indarreko araudia aplikatu beharra dagoela eta horiek erantsi beharra ez baita justifikatzen aldaketa honen eremurako bakarrik, eta ez UPS osorako. Hori dela eta, haiek kendu beharra dago.
III.–Txosten sektorialak.
Nafarroako Gobernuak 2015eko ekainaren 24an hartutako Erabakian biltzen den gisan, espedientea jendaurrean eduki baino lehenago, aldeko txostenak egin zituzten Herri Lan Zuzendaritza Nagusiak, Turismoa eta Merkataritza Antolatu eta Sustatzeko Zerbitzuak, Ondare Historikoaren Zerbitzuko Arkeologia Atalak eta Ondare Arkitektonikoaren Atalak eta Nekazaritzako Azpiegituren Zerbitzuko Herrilurren Atalak. Geroago, ondotik zehazten diren txostenak erantsi zaizkio espedienteari.
–Ebroko Ur Konfederazioa.
Ebroko Ur Konfederazioaren bi txosten jaso dira, bata Ingurumena Kudatzeko Alorrarena, 2015eko urriaren 20koa, eta bestea Ur komisarioarena, 2015eko azaroaren 24koa.
Horietako lehenbizikoan, irizten da ezen, ingurumenaren aldetik, proiektuak aurreikusteko modukoak dituen ondorioak bateragarritzat jotzen direla, sistema hidrikoari dagokionez, beharrezko neurri guztiak hartzen badira une oro jarduketa eremuko ingurune hidrikoa babesteko, dela lur gainekoa dela lur azpikoa, bermatzeko ez dela funtsean aldatuko eremuko dinamika hidrologikoa ez morfologikoa, eta ahalik eta gutxien esku hartzeko ur ibilguen zirkulazioan, Urbi ibaian izan edo urak horretara isurtzen dituzten erreka/latsetan, baita haien ur kalitatean ere. Halaber, tentu handiz ibili behar da obrak egitean jarduketa eremuko ibilgu naturalak ez ukitzeko (3. tartea. Urbi), eta haiei lotutako landare eta animaliak ere, eta lanak, ahal delarik, agorraldian egin behar dira, ibilgua ez kutsatzeko eta ez andeatzeko.”
Bestalde, Ur komisarioak, ur kontinentalen araubideari eta aprobetxamenduari dagokionez edo ur jabari publikoko eremuen eta horien polizia-eremuen erabilerei dagokienez, aldeko txostena egin du aldaketan sartutako jarduerei buruz, ondoko baldintza hauekin: arroaren erakundearen baimena beharko da ibilgu publikoak zeharkatzeko eta lehengo zeharkatzeak konpontzeko; eta, bide eraiki berrietan eta oraingoak konpontzean, ulertuko da horien aldekoa dela baldin eta egin beharreko jarduketek ez badute ekartzen erliebea aldatzea eta ez badute ibilgua ukitzen, eta ibilgu bakoitzari lotutako 5 metroko zortasuna libre utzi behar dute, edo, bestela, justifikatu zergatik den beharrezkoa tarte hori murriztea.
Gainera, txosten horretan ohartarazten da planteamendu hori garatzearen ondoriozko proiektuak jakinarazi behar zaizkiola arroaren erakundeari, horrek azter ditzan ur jabari publikoaren gaineko ukipenak, eta, halaber, planeamendu horretan sartutako jarduketek, edonola ere, bete behar dituztela jarduketak egitean kontuan hartu beharreko aurreikuspen orokor batzuk.
–Herri Lan Zuzendaritza Nagusia.
Herri Lan Zuzendaritza Nagusiak, 2015eko uztailaren 27ko azken txostenean, aipamena eginez Nafarroako Errepideei buruzko martxoaren 23ko 5/2007 Foru Legearen 41. artikuluari, erantzun du bide berdearen trazadura egin berrietan, errepideekin paralelo joaten badira, horien zortasun eremuan kokatu daitezkeela.
IV.–Ingurumen ondorioen adierazpena.
Ingurumeneko eta Lurraldearen Antolamenduko zuzendari nagusiak ekainaren 13an emandako 667E/2016 Ebazpenaren bidez, Ingurumen ondorioen adierazpena egin zen aldaketa honi buruz, eta proiektua garatzeko baldintza hauek ezarri ziren:
“–Urbi errekarekin paraleloak diren tarte sortu berrietan, tarte bat utziko da ibilguaren ondoan, iragazgaitu gabe edo lubetarik edo hondeaketarik egin gabe lurzoruaren mailan.
Horretarako, UPSa ibilguaren ondoan aldatzeko bi tarteetan (235 m eta 150 m luze), Ibai Parkea diseinatuko da belar zerrenda bat duela, gutxienez 5 metrokoa, bidearen eta ibilguaren artean. Beharrezkoa izanez gero, 4 metrotik 2,5era bitarte murriztuko da bideko zoladuraren zabalera. Bidea eta belar zerrenda oraingo alorretan eginen dira. Eguesibarko honako lurzati hauek ukitzen dira: 6. poligonoko 171.a, 7. poligonoko 37.a eta 5. poligonoko 36.a.
–Eguesen, industrialdearen ondoan, proposatutako aldaketak egungo pasealeku txikia berreskuratu gogo du, oraingo 2 metroko zabalera 3 metrora handitzeko. Zabaltze hori ibilgutik urrunen dagoen aldera egin behar da.
–Trazadura lurzoru urbanizaezinean egiten denean, ez da argirik paratuko, ahal dela.”
Horrenbestez, Lurraldearen Antolamenduko Batzordearen 2016ko ekainaren 21eko txostenarekin bat, eta Lurraldearen Antolamenduari eta Hirigintzari buruzko abenduaren 20ko 35/2002 Foru Legeari eta aplikatu beharreko gainerako arauei jarraikiz, Nafarroako Gobernuak, Landa Garapeneko, Ingurumeneko eta Toki Administrazioko kontseilariak proposaturik,
ERABAKI DU:
1. “Iruñerriko Ibai Parkea handitzeko Udalez gaindiko Plan Sektoriala” aldatzeko espedientea onestea, Ustarrotz, Ibiriku eta Eguesko kontzejuetan Urbi ibaiak duen ibilgu naturaleko pasealekuaren trazadurako aldaketari dagokionez. Sustatzailea Iruñerriko Mankomunitatea da.
2. Eraikuntza proiektua egin eta horri dagozkion obrak gauzatzeko orduan, bete beharko da ingurumen ondorioen adierazpenean eta Arkeologia Atalaren, Herri Lan Zuzendaritza Nagusiaren eta Ebroko Ur Konfederazioaren txostenean xedatutakoa.
3. Nolanahi ere, obrak egiteagatik ukituta izan daitezkeen beste azpiegitura eta zortasunei dagokienez, edo obrak egitea baldintzatzen ahal duten azpiegiturei eta zortasunei dagokienez, sustatzaileak behar diren baimen guztiak lortuko ditu kasuan kasuko gaian eskudun diren erakundeetatik.
4. Erabaki hau Nafarroako Aldizkari Ofizialean argitaratzea, orok jakin dezan.
5. Erabaki hau igortzea Herrilurren Atalari, Ingurumen Kalitatearen eta Klima Aldaketaren Zerbitzuari, Ondare Historikoaren Zerbitzuari, Turismoa eta Merkataritza Antolatu eta Sustatzeko Zerbitzuari, Lurraldearen Antolamendu eta Hirigintza Zerbitzuari eta Herri Lan Zuzendaritza Nagusiari.
6. Erabaki hau Ebroko Ur Konfederazioari, Iruñerriko Mankomunitateari eta Eguesibarko eta Lizoaingo udalei jakinaraztea, behar diren ondorioak izan ditzan, eta adieraztea, halaber, erabaki honek bide administratiboa amaitzen duela eta beraren kontra administrazioarekiko auzi-errekurtsoa aurkezten ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, erabakia argitaratu eta biharamunetik bi hilabeteko epean.
Dena dela, administrazio publikoek aldez aurreko errekerimendua egin dezakete, Nafarroako Gobernuari zuzenduta, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2016ko abuztuaren 24an.–Nafarroako Gobernuko kontseilari idazkaria, María José Beaumont Aristu.
Iragarkiaren kodea: F1609810
