Iragarkia
162. ALDIZKARIA - 2016ko abuztuaren 23a
2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
IRUÑA
Maila txikiko aisialdi-lokalen funtzionamendua arautzen duen udal ordenantza. Behin betiko onespena
Iruñeko Udalbatzak bi mila eta hamaseiko uztailaren lauan egindako Osoko Bilkuran behin betiko onetsi zuen Iruñeko udal-mugartean maila txikiko aisialdi-lokalen funtzionamendua arautzen duen Udal Ordenantza.
Iruñean, 2016ko uztailaren 21ean.–Alkatea, Joseba Asiron Saez.
IRUÑEKO UDAL-MUGARTEAN MAILA TXIKIKO AISIALDI-LOKALEN FUNTZIONAMENDUA ARAUTZEN DUEN UDAL ORDENANTZA
Ordenantzaren aurkibidea
ZIOEN AZALPENA
ATARIKO TITULUA
Xedapen orokorrak
1. artikulua. Xedea.
2. artikulua. Aplikazio-esparrua.
3. artikulua. Organo eskuduna.
LEHEN TITULUA
Lokalen funtzionamendu-baldintzak eta baimen-araubidea
4. artikulua. Funtzionamendu-araubidea.
5. artikulua. Lizentzien tramitazioa.
6. artikulua. Lokalean eduki beharreko dokumentazioa.
7. artikulua. Maila txikiko aisialdi-lokalen gutxieneko funtzionamendu-baldintzak.
8. artikulua. Maila txikiko biltoki-lokalen edukiera eta funtzionamendu-ordutegia.
BIGARREN TITULUA
Legezkotasunaren babesa
9. artikulua. Funtzionamendu- eta ikuskaritza-araubidea.
10. artikulua. Hirigintza arloko legezkotasuna babestea eta urratutako ordena berrezartzea.
XEDAPEN IRAGANKORRA
Dagoeneko arian dauden lokalak.
AZKEN XEDAPENA
Indarrean sartzea.
A ERANSKINA
Eraikuntza- eta kokapen-baldintzak
A.1. Maila txikiko aisialdi-lokalaren kokapen-baldintzak.
A.2. Maila txikiko biltoki-lokalaren eraikuntza-baldintzak.
A.2.1. Aplikazio-araubidea.
A.2.2. Azalerak.
A.2.3. Estaldurak.
A.2.4. Komuna.
A.2.5. Maila txikiko biltoki-lokalaren isolamendu akustikoa.
A.3. Gehienezko edukiera.
B ERANSKINA
Titulu-ereduak
C ERANSKINA
Bizikidetza-hitzarmenaren eredua
ZIOEN AZALPENA
2/1989 Foru Legeak, martxoaren 13koak, arautzen ditu Nafarroako Foru Komunitatean egindako ikuskizun publikoak eta josteta-jarduerak –horiek jendeari oro har zuzenduak izaki edo jendea biltzeko gaitasuna dutelarik–, betiere kontuan hartu gabe haien titulartasuna publikoa edo pribatua den, irabazi asmorik duten ala ez eta ohikoak edo noizbehinkakoak diren. Aipatu Foru Legearen 1.2 artikuluak espresuki baztertzen ditu haren aplikazio-esparrutik soilik esparru pribatuan –dela familian dela gizarte arloan– egiten diren jarduerak, hau da, jendaurrekoak ez direnak. Nolanahi ere, honako hau jasotzen du: “Josteta edo aisialdi jarduerak egiteko lokal horiek behar diren baldintza teknikoak bete behar dituzte hirugarrenei enbarazu ez egiteko eta pertsona eta ondasunen segurtasuna bermatzeko, bereziki egituren sendotasunari eta instalazioaren funtzionamenduari dagokienez, suteen aurkako prebentzio eta babes neurriei dagokienez eta, orobat, osasungarritasun eta higiene baldintzei dagokienez; horretarako, behar den udal lizentzia eduki beharko dute”.
Horren ondorioz, azken urteotan Nafarroako udalerri batzuetan ezarri dituzte jarduera hauetarako diziplina-araubideak, xede horretarako dagozkion ordenantza arautzaileak emanez.
Iruñeari dagokionez, etxabe ugari gazteen biltokirako zabaltzeak –aisialdi-alternatiba gisa– kexak sortu ditu bizilagunen artean, neurri zuzentzaile eta isolamendu akustikoen ezak eragozpenak eragin dizkietelako ondo-ondoko bizilagunei, bereziki herritarren atsedena oztopatuta gaueko ordu txikietan eginiko zaratengatik eta, baita ere, jarduera horien kontrol ezak sortzen dituen segurtasun falta eta beldurragatik. Egoera horri erantzun, eta jokoan dauden interes guztiak (gazteen aisialdia eta bizilagunen atsedena) bateragarri egite aldera, Hirigintza eta Etxebizitzako zinegotzi ordezkariak tresna bat eratu zuen, lokaletan egiten diren jarduerak bereizi eta horren arabera holako edo halako neurriak ezartzeko, edo, halakorik beharko balitz, haietan garatzen ari den jarduera galarazteko. Hirigintza, Etxebizitza eta Ingurumeneko Zinegotzi Ordezkariak 2001eko uztailaren 3an emandako ebazpenaren bitartez, Prozedura-eskuliburua onetsi zen, gazteak biltzeko lokalen erabilera-aldaketarako lizentziei buruz. Haren hitzaurreak dio –Deskribapena epigrafean–, jarduera hauek erabilera-aldaketarako lizentziari lotu beharra ezartzen dela Lurzoruari buruzko Legearen testu bateginaren 178. artikuluan eta Hirigintza Diziplinako Erregelamenduko 1.13 artikuluan.
Eskuliburua indarrean egon den urteetan azaldutako arazoa hein batean arintzea lortu izan da, baina, hala ere, beharrezkotzat jotzen da urrats bat gehiago egitea aisialdi pribatuko jarduera horien garapenaren araubidean. Gaur gaurkoz, bere horretan jarraitzen du jarduera horiek arautzea bideratu zuen udal-gogoak, betiere hirugarrenei eragozpenak galarazteko eta pertsonen zein ondasunen segurtasuna bermatzeko.
Ez da beharrezkotzat jo berariazko zehapen-araubiderik ezartzea, Ordenantza hau aplikatzetik erator litezkeen hirigintza alorreko arauak urratzeari dagozkien zehapenak jasota daudelako aplikatzekoak diren beste lege-xedapen batzuetan.
Edonola ere, bizilagunen arteko gatazkak konpontzea xede duen Ordenantza honen ekarpena hutsaren hurrengoa izan daiteke, baldin eta ez badu atzean herritar ororen –heldu zein gazte– konbentzimendua, gizarte-bizikidetzaren onurak taldeko gainontzeko kideekiko errespetuaren eta begiramenaren bitartez lortzen diren gainean. Eta halako uste sendoa barneratu eta elkarri helarazteko eginkizuna ez litzaieke botere publikoei egokitu behar, baizik eta eremu pribatuan haren arabera jarduteko eta helarazteko erantzukizuna dugunoi.
Hori horrela, garrantzitsua da erabiltzaileek lokalaren kontu jakin batzuen berri edukitzea: lokalaren jarduera zein den, gehienezko edukiera, eragin daitekeen gehienezko soinu-maila eta abar.
Harik eta –oraingo araudiaren osagarri– hirigintzari buruzko arau orokor berriak onesten ez diren bitarte, eta aldi horretarako soilik, testu honetan jasota daude lizentzia eskuratzeko prozedurari buruzko arauak, eta, eranskin gisara, lokalen eraikuntza- eta kokapen-baldintzei buruzko arauak.
Agiri honetan jasota dauden baldintza teknikoen asmoa ez da baldintzak gehitzea jada araututa dauden alderdietan, baizik eta erabilera hau eratu eta arauari lotzea. Horrenbestez, lokal hauen erabilera-baldintzek honako ekarpenak dakartzate:
–Bizikidetasun egokia edukitzea, hala kasuan kasuko eraikinaren erabilera nagusiekin edo bertan baimenduta dauden erabilerekin nola lokalek kokaleku duten hiriko aldearekin.
–Lokalen tamaina eta intentsitatea mugatzea.
–Zerikusirik ez edukitzea jendaurreko erabilerekiko edozein antzekotasunekin.
–Kaltegabetasuna bermatzea.
–Irtenbide alternatiboak kontuan hartzeko aukera ematea, arau-eskakizunen aurrean.
–Erabilera egingarria bilakatzea aldi luzeetan erabili ez eta errenta doiturik duten lokalen kasuetan, non egokitzapen batzuk ez diren ez teknikoki ez ekonomikoki bideragarriak, neurri batean, erabiltzaileak diru-ahalmen urrikoak direlako.
ATARIKO TITULUA
Xedapen orokorrak
1. artikulua. Xedea.
Ordenantza honen xedea da maila txikiko aisialdi-lokalen funtzionamendu-baldintzak –ordutegia barne– arautzea, bateragarri egin ahal izateko lokal horien erabiltzaileen interesak eta lokalen kokaleku diren hiriko eraikin eta guneetako bizilagunenak. Horren bitartez bermatu nahi da lokalen funtzionamendua egokia izanen dela, eta eragozpen eta arriskuak saihestuko direla.
Harik eta –oraingo araudiaren osagarri– hirigintzari buruzko arauak onesten ez diren bitarte, eta aldi horretarako soilik, testu honetan jasota daude, baita ere, lokalen eraikuntzaren eta kokapenaren gaineko oinarrizko baldintzei buruzko arauak eta lizentzia eskuratzeko prozedurari buruzkoak.
Ordenantza honen ondorioetarako, maila txikiko aisialdi-lokaltzat joko dira, oro har, azalera mugatua eta okupazio ertain-txikia dutenak, non eremu pribatuari soilik –dela familian dela gizarte arloan– dagozkion aisialdiko jarduerak, zaletasun eta enparauei lotutakoak, gauzatzen diren, baldin eta jarduera horiek ez badira jendaurrekoak eta ez badaude berariaz arauturik.
Aurrekoen artean daude maila txikiko biltoki-lokalak. Ezaugarri dute, hain zuzen, haien xedea bertan egotea edo biltzea dela, eta hizkera arruntean etxabe, pipero, koadrilla-gela edo beste deritzete.
2. artikulua. Aplikazio-esparrua.
Ordenantza hau aplikatuko zaie Iruñeko udal-mugarteko tamaina txikiko aisialdi-lokal guztiei.
3. artikulua. Organo eskuduna.
Jarduera-irekierak kontrolatzen dituen organo eskudunak izanen ditu eskumenak hauetarako: lizentziak ematea, kontrolak eta izan daitezkeen errekerimenduak egitea, kautelazko neurriak hartzea, ixteko aginduak ematea eta maila txikiko aisialdi-lokalen baldintzekin edo haien funtzionamenduarekin zerikusia duten gainerako jarduketak gauzatzea.
LEHEN TITULUA
Lokalen funtzionamendu-baldintzak
eta baimen-araubidea
4. artikulua. Funtzionamendu-araubidea.
Maila txikiko aisialdi-lokalen funtzionamendua esparru pribatuari lotuko zaio soil-soilik, ezin izanen direlarik inolaz ere jendaurrekoak izan.
5. artikulua. Lizentzien tramitazioa.
Oro har, lizentziak administrazio publikoen administrazio-prozedura erkidearen alorrean indarreko legediaren xedapenen arabera tramitatuko dira, eta bereziki Ordenantza honetan eta Toki Araubidearen Oinarriak arautzen dituen Legean jasotakoen arabera, jarraian aipatuko diren berezitasunekin.
Eskabideak Iruñeko Udalak horretarako emango duen arauzko eredu bidez aurkeztuko dira, kasu bakoitzean eskatzekoak diren agiriekin batera.
Baldin eta, askotan gertatzen den bezala, maila txikiko biltoki-lokalean ez bada obrarik egiteko asmorik, berariazko eskabidearekin batera egiaztagiri tekniko bat aurkeztu beharko da, ereduarekin bat, lokala egokia dela ziurtatzeko, eta bertan aipatuko dira gauzatu nahi den jarduera garatzeko bete beharreko ezaugarri teknikoak.
Behin udal-zerbitzu teknikoek egiaztatu dituztelarik haiei aurkeztutako eskabidea eta dokumentazio teknikoa, eta behar diren errekerimenduak –halakorik balitz– egin eta gero, Udalak ebatziko du lokala bat datorren udal-antolamenduak ezarritako hirigintza-erabilerarekin eta lokalaren oinarrizko ezaugarriak bat datozen atxikitako agirietan jaso direnekin, eta dagokion lizentzia emanen du, baldintzak betetzen badira.
Maila txikiko biltoki-lokalen erabilera-lizentzietan adieraziko dira lokalen gehienezko edukiera, barneko gehienezko soinu-maila eta funtzionamendu-ordutegia.
Xedatutako neurri zuzentzaileak benetan egin nahi izateko jarrera edukitzeak edo horiek egin izanak baldintzatuko du lizentzia hori ematea.
Halaber, lokala ezarritako ordutegiaz gaindi erabiltzeko, elkarbizitzako hitzarmen bat aurkeztu beharko da, eta bertan berariazko atal bat gehituko da, gai horri loturik hitzartu diren baldintzak jasota.
6. artikulua. Lokalean eduki beharreko dokumentazioa.
Honako agiri hauen kopia bana egonen da lokalean Udalaren eta gainerako administrazio publikoen eskura, haien eskumenak gauzatu ditzaten:
–Emandako lizentziak, baimenak edo/eta aurretiko jakinarazpenen agiriak, edo/eta erantzukizunpeko adierazpenak, behar bezala eginbidetuak, Udal Erregistroaren sarrera-zenbakia jasota, bai eta lokalari dagozkion dokumentazio teknikoa ere.
–Egindako udal-kontrolen edo -ikuskapenen gaineko dokumentazioa.
–Titulua, Udal honek emana, jardueraren erabiltzaileek erraz ikusteko moduko toki batean jarrita, honako hauek adierazita:
- Jarduera.
- Titularra.
- Kokapena.
- Lizentzia emateko ebazpena.
Maila txikiko biltoki-lokaletan, gainera, funtzionamendu-baldintza hauek adieraziko dira:
- Gehienezko soinu-maila barruan.
- Gehienezko edukiera.
- Funzionatzeko ordu-muga.
B eranskinean jasota daude titulu-ereduak (diseinua orientagarria da).
7. artikulua. Maila txikiko aisialdi-lokalen gutxieneko funtzionamendu-baldintzak.
Maila txikiko aisialdi-lokalen funtzionamendurako beharrezkoa izanen da A eranskinean jasotako eraikuntza- eta kokapen-baldintzak betetzea, bai eta Udalaren erabilera-lizentzia edukitzea ere.
Maila txikiko aisialdi-lokalek ez dute izanen ez sukalderik, ez jakiak prestatzeko gailurik, eta ez dute isuriko atmosferara inolako isuririk, kerik eta antzekorik, salbu airea girotzeko sistemek sor ditzaketenak.
Maila txikiko aisialdi-lokalek ez dute sortuko etxebizitzetan sortzen ohi diren hondakinez bestekorik.
Maila txikiko aisialdi-lokaletan ez da egonen inpaktuak edota ageriko bibrazioak sortzen dituen makinarik edo antzekorik, eta gehienezko soinu-maila, barruan, 70 dbA-koa izanen da.
Lokalaren ateek, pertsianek eta beste kanpo-itxiturek beharrezko elementuak eta neurriak edukiko dituzte (indargetze-sistema, koipeztatze egokia, etab.), zarata gogaikarririk ez eragiteko.
Lokalean ez da materialik bilduko, salbu eta jarduera gauzatzeko beharrezkoak direnak.
Lokala okupatuta dagoenean, biraketa-ardatz bertikaleko ate eraisgarriak erabiliko dira bakarrik lokala ixteko, ateak modu erraz eta azkar irekitzeko gailuak dituztela, giltzarik erabili gabe eta mekanismo bati baino gehiagori eragin gabe.
8. artikulua. Maila txikiko biltoki-lokalen edukiera eta funtzionamendu-ordutegia.
Maila txikiko biltoki-lokala baimentzeko Udalak ematen duen lizentziak adieraziko du lokalaren gehienezko edukiera.
Lokalek itxita, hutsik eta erabili gabe egon behar dute 00:00etatik 09:00etara, astelehenetik ostiralera.
Larunbat, igande eta jaiegunetan, berriz, 02:30etik 09:00etara egon behar dute itxita, hutsik eta erabili gabe.
Ordutegi mugatu horrek ez du indarrik izanen sanferminetan, Eguberri eta Urte Berriko egunetan. Nolanahi ere, egiaztatzen bada lokaletako jarduerak eragozpenak eragiten dizkiela auzokideei, behar diren heineko neurriak hartuko dira auzokideen atsedena bermatzeko.
Ordutegi mugatu hori ez da ezarriko, baldin eta maila txikiko biltoki-lokalaren erabiltzaileek eta lokalak kokaleku duen etxearen jabe-erkidegoak hitzarmen bat sinatzen badute haien arteko elkarbizitza bermatzeko (C eranskina), lizentzia eskatu baino lehen.
Hitzarmena sinatu beharko dute, batetik, lokalaren erabiltzaileetako hiru ordezkari adinez nagusik eta, bestetik, higiezinaren jabe-erkidegoaren legezko ordezkari batek, erkidegoak horretarako behar bezala baimenduta, gehienek hartutako erabaki baten bidez.
Hitzarmenean bi parteek egoki jotako baldintzak jaso daitezke, hala nola funtzionamendu-ordutegia edo beste, betiere indarreko arauak urratu ezinen dituztelarik.
Hitzarmenaren indarraldia jarduerak iraun bitartekoa izanen da, eta bertan behera uzten ahalko dute bi parteak ados jarrita edo bietako batek berariaz salatzen badu.
Hitzarmena aldatuz gero, horren kopia bat txertatu beharko da Udalak emandako erabilera-lizentziaren espedientean. Aldaketak eragina badu tituluaren edukietan, Udalak beste titulu berri bat emanen du.
Erabilera-lizentzia eskualdatu nahi denean, horren gaineko jakinarazpenari atxiki beharko zaio jardueraren titular berriekin sinatutako elkarbizitza-hitzarmen berritua.
BIGARREN TITULUA
Legezkotasunaren babesa
9. artikulua. Funtzionamendu- eta ikuskaritza-araubidea.
Udalak bisitak egiten ahalko ditu lokaletara egiaztatzeko lokalak eta bertako instalazioak lotzen zaizkiela titularrek aurkeztutako dokumentazio teknikoari eta emandako lizentzian jasotako xedapenei, bai eta funtzionamendua egiaztatzeko ere.
Ordenantza honetan araututako jardueren ikuskapena Udalari dagokio, eta horretarako ofizialki izendatutako langileek eginen dituzte jarduerak egiaztatu eta ikuskatzeko zereginak, bai eta, kasu orotan ere, Udaltzaingoak.
Jardueren titularrek behar besteko laguntza emanen diete ikuskatzaileei haien zereginak bete ditzaten.
10. artikulua. Hirigintza arloko legezkotasuna babestea eta urratutako ordena berrezartzea.
Baldin eta Udalak badaki hemen arautzen diren lokaletako bat jardunean ari dela Udalaren derrigorrezko baimenik gabe, jarduera horren etenaldia agintzen ahalko du, betiere kautelazko beharrezko neurriak hartu eta gero, eta jarduera legezko bihur badaiteke, titularrari errekerimendua eginen dio egoera arauen arabera erregularizatzeko, eta gehienez bi hilabete jo dezakeen epea emanen dio prozedura abiatzeko.
Jarduerak ezin badu baimenik lortu, aplikagarri den indarreko araudia betetzen ez duelako, Udalak behin betiko itxiko du, behin interesdunari entzun eta gero.
Udalak hutsunerik atzemanez gero lizentziapeko jarduera batean, errekerimendua eginen dio jardueraren titularrari hori zuzendu dezan, hartu beharreko neurri zuzentzaileen araberako epe batean, betiere, behar bezala justifikatutako salbuespenezko kasu berezietan izan ezik, epea ezinen delarik izan hilabetetik gorakoa. Halaber, Udalak, neurri prebentibo gisara, eten ahalko du jarduera, interesdunari entzun eta gero, baldin eta funtsezko arrazoirik bada pertsonei edo ondasunei berehalako kaltea edo arriskua eragiten ahal zaiela pentsatzeko, betiere arriskua eragin dezaketen inguruabarrak desagertzen ez diren bitartean.
Ordenantza honetan edo aplikagarriak diren gainerako arauetan jasotako xedapenen bat ez dela betetzen egiaztatuz gero, titularrei errekerimendua eginen zaie, epe jakin batean hori zuzendu dezaten, eta epe hori iraganda ez badute justifikatzen errekerimendua bete egin dutela, Udalak, egoki diren tramiteak egin eta gero, lokala ixteko espedienteari ekinen dio, eta atzera botako du emandako lizentzia.
XEDAPEN IRAGANKORRA
Dagoeneko arian dauden lokalak.
Lokala gazteen bilgune gisa erabili ahal izateko erabilera-aldaketarako lizentzia duten lokalak –lizentzia ordenantza hau onetsi baino lehen emana–, maila txikiko biltoki-lokaltzat joko dira.
Urtebeteko epean, 5. artikuluan aipatzen den titulua eskatu beharko dute.
Baldin eta Ordenantza honek indarra hartu baino lehen emandako lizentzia duten lokaletan eragindako eragozpenak salatu eta egiaztatu badira, Udalak galdatzen ahalko du lizentzia berri bat eska dezatela, zeina arau honen egoki jotako xedapenei lotuko baitzaie.
AZKEN XEDAPENA
Indarrean sartzea.
Ordenantza honek indarra hartuko du Nafarroako Toki Administrazioari buruzko 6/1990 Foru Legearen 326 artikuluan aurreikusitako epea iragaten den unean.
A ERANSKINA
Eraikuntza- eta kokapen-baldintzak
A.1. Maila txikiko aisialdi-lokalaren kokapen-baldintzak.
Maila txikiko aisialdi-lokalek kokapen-baldintza jakin batzuk beteko dituzte, jardueren izaeraren eta xedearen arabera antzekoen diren jardueretarako Udalaren hirigintza-arauek zer baldintza zedarritu eta horiek.
Maila txikiko biltoki-lokalek bakarrik beheko solairuan kokatu daitezke, eta debekaturik dago horiek kokatzea familia bakarreko bizitegi-erabilera edo industria-erabilera duten eraikinetan edo lur-sailetan. Lokalaren lurzorua ez da egonen ezein partetan ere 1,5 m-ko kotatik azpian, beheko solairuan lokalera sartzeko mailarekiko.
Horrez gain, gutxienez honako distantzia hauek gorde behar dira maila txikiko beste edozein biltoki-lokalekin:
–100 metro, Alde Zaharrean (VIII. UI) eta Milagrosan (XIX. UI).
–50 metro, hiriko gainerakoan.
Baldintza hori bera bere bete beharko da lokala handitu nahi denean.
Distantziak, artikulu honetan xedatutakoaren ondorioetarako, honako eskema honen arabera neurtuko dira:

Baldintza hori bete dela egiaztatu beharko da lizentzia eskatzeko espedientean, jarduera zein establezimendutan kokatu edo handitu nahi den eta haren kokalekua jasota, bai eta hurbilen dauden biltoki-lokalak adierazita ere.
Baldin eta distantziagatik bateraezinak diren proposamen zenbait aldi berean tramitatzen ari badira, lehenago aurkeztutako eskabideak izanen du lehentasuna, betiere beharrezko agiri teknikoa –teknikari eskudun batek sinatua– aurkeztu badute.
A.2. Maila txikiko biltoki-lokalaren eraikuntza-baldintzak.
A.2.1. Aplikazio-araubidea.
Jarduera berri bat instalatu behar den kasuetan, lokalak eraikuntzari dagozkion baldintza guztiak bete beharko ditu.
Dagoeneko arian dauden maila txikiko aisialdi-lokalen kasuan, oraingo eraikuntza-baldintzei eutsiko zaie, harik eta obrak egin edota jarduera handitu edo aldatzen ez den bitartean.
Dagoeneko arian dauden maila txikiko aisialdi-lokaletan zaharberritze-lanik eginez gero, zaharberritutako aldea egokituko da. Eraikuntza-elementuen edota instalazioen egokitzapenak zentzuduna izan beharko du hirigintza, teknika eta ekonomiaren aldetik. Hori horrela, kontuan hartuko dira hala jarduketa mota eta haren irismena nola distantzia, arauaren parametroekin bat.
Lokala handituz gero –gaitasunak, edukiera edota azalera gehituta–, edota lokala aldatuz gero, aldaketa horiek eraikuntza-baldintzak bete beharko dituzte ukitutako aldeetan.
A.2.2. Azalerak.
Maila txikiko aisialdi-lokalaren eraikitako azalerak 125 m²-tik beherakoa izan beharko du, eta lokaleko egonlekuen azalera erabilgarrien baturak, 100 m²-tik beherakoa.
A.2.3. Estaldurak.
Zoru eta hormetan erabilitako estaldurek erraz garbitu eta desinfektatzekoak izan beharko dute.
A.2.4. Komuna.
Maila txikiko aisialdi-lokalak komun bat edukiko du, komun-zuloaz, konketaz, ur-horniduraz eta saneamendu-loturaz horniturik.
A.2.5. Maila txikiko biltoki-lokalaren isolamendu akustikoa.
Maila txikiko biltoki-lokalean aireko zaratarekiko isolamendu akustikoaren maila, lokalaren eta horren eragina gehien jasotzen duen etxebizitzako esparru habitagarriaren artean, 55 dBA-tik gorakoa izanen da, indarra duen IKTren DB-HR zehaztapenen arabera.
A.3. Gehienezko edukiera.
Lokalaren gehienezko edukiera gehienez har ditzakeen erabiltzaile kopurua da.
Maila txikiko biltoki-lokaletan, gehienezko edukiera ezarriko da erabiltzaileendako egonaldi-eremuen azalera erabilgarriaren arabera, pertsona bakoitzari 5 m² dagozkiolarik, salbu eta lehen 20 m²-etan, non pertsona bakoizari 2 m² baitagozkio.
B ERANSKINA
Titulu-ereduak
Erabiltzeko Lizentzia (maila txikiko biltoki-lokala).
C ERANSKINA
Bizikidetza-hitzarmenaren eredua.
Deskargatu beharreko artxiboak PDF formatuan daude.
Iragarkiaren kodea: L1609251
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
