162. ALDIZKARIA - 2016ko abuztuaren 23a

1. NAFARROAKO FORU KOMUNITATEA

1.7. BESTELAKOAK

233E/2016 EBAZPENA, abuztuaren 2koa, Ingurumen Kalitatearen eta Klima Aldaketaren Zerbitzuko zuzendariak emana, Olaztiko udal mugapean porlana fabrikatzeko instalazio baten Ingurumen baimen integratua eguneratzen duena. Instalazioaren titularra Cementos Portland Valderrivas SA da.

Instalazio horrek ingurumen baimen integratua du, Ingurumen, Lurraldearen Antolamendu eta Etxebizitzako kontseilariaren ekainaren 6ko 302/2007 Foru Aginduaren bidez emandakoa, eta Ingurumenaren eta Uraren zuzendari nagusiaren maiatzaren 22ko 218E/2014 Ebazpenaren bidez eguneratua, Europako Parlamentuak eta Kontseiluak azaroaren 24an emisio industrialei buruz onetsitako 2010/75/EB Zuzentaraura egokitzeko xedearekin.

Era berean, Ingurumenaren eta Uraren zuzendari nagusiaren maiatzaren 26ko 855/2011 Ebazpenaren bidez, Ingurumen baimen integratua aldatu zen “landarezko biomasaren hondakinen balorizazio energetikoa” izeneko proiektua gauzatzeko; Nafarroako Gobernuak 2013ko urtarrilaren 16an hartutako Erabakiaren bidez, “Olaztiko zementu fabrikan erregai alternatiboen balorizazioa egitea” izeneko Udalez gaindiko Proiektu Sektoriala (UPrS) onetsi, eta ingurumen baimen integratua eman zitzaion; eta, azkenik, Ingurumenaren eta Uraren zuzendari nagusiaren abuztuaren 22ko 1553/2013 Ebazpenaren bidez, Ingurumen baimen integratua aldatu zen magnesio-oxidoa eta dolomia sinterizatua produzitzeko.

Ingurumeneko eta Lurraldearen Antolamenduko zuzendari nagusiaren irailaren 1eko 38E/2015 Ebazpenaren bidez, iraungitzat jotzen da Ingurumenaren eta Uraren zuzendari nagusiaren maiatzaren 26ko 855/2011 Ebazpenaren bidez baimendutako aldaketa; Nafarroako Gobernuak 2015eko azaroaren 11n hartutako Erabakiaren bidez, Cementos Portland Valderrivas SAri “Olaztiko zementu fabrikan erregai alternatiboen balorizazioa egitea” izeneko proiekturako emandako Ingurumen baimen integratua iraungitzat deklaratu zuen”; eta, azkenik, Ingurumeneko eta Lurraldearen Antolamenduko zuzendari nagusiaren azaroaren 25eko 197E/2015 Ebazpenaren bidez, iraungitzat jotzen da Ingurumenaren eta Uraren zuzendari nagusiaren abuztuaren 22ko 335E/2013 Ebazpenaren bidez baimendutako aldaketa.

Egintza administratibo asko gertatu direnez bata bestearen atzetik, horrek instalazioaren funtzionamendu baldintzetan eragina duela iritzita, beharrezkotzat jotzen da Ingurumen baimen integratua eguneratzea.

Gainera, Batzordearen 2013ko martxoaren 26ko betearazpen erabakiak zementuaren, karearen eta magnesio oxidoaren fabrikaziorako dauden teknika erabilgarri onenei (TEO) buruzko ondorioak ezartzen ditu industriako isuriei buruzko Europako Parlamentuaren eta Kontseiluaren 2010/75/EB Zuzentarauaren arabera; horrexek, argitalpen egunetik gehienez ere lau urtean, Ingurumen baimen integratuaren baldintzak berritzera eta, beharrezkoa izanez gero, eguneratzera behartzen du, Kutsaduraren Prebentzio eta Kontrol Integratuei buruzko uztailaren 1eko 16/2002 Legearen 25. artikuluan xedatutakoaren arabera.

Kutsaduraren Prebentzio eta Kontrol Integratuei buruzko uztailaren 1eko 16/2002 Legearen lehen xedapen iragankorraren 2.d) atalean xedatutakoa betetzeko, arrisku nabarmeneko substantzien erabilera, ekoizpena edo emisioa berrikusi da, eta erabaki da, horrelakorik ez dagoenez, ez dela beharrezkoa oinarrizko txosten bat egitea egungo kokapenari buruz, lurzoruaren eta lur azpiko uren kutsadurari dagokionez.

Baimen honek hondakin urak botatzeko baimena dakar, Ur Jabari Publikoaren gaineko Erregelamenduaren 245. artikuluaren aplikatuz eskatzen dena, Uren Legearen Testu Bategina onesten duen uztailaren 20ko 1/2001 Legegintzako Errege Dekretuaren hamargarren xedapen gehigarriarekin bat; horri begira, isurketak egitearen gaineko onargarritasunari buruzko txostenaren edukia erantsi da. Txostena Ebroko Ur Konfederazioak eman du 2015eko urtarrilaren 23an.

Industria establezimendua ez dago irailaren 21eko 840/2015 Errege Dekretuaren aplikazio eremuan sartuta. Dekretu horrek istripu larriek sortzen dituzten arriskuak kontrolatzeko neurriak onetsi zituen, substantzia arriskutsuak tarteko diren kasuetarako.

Kasu honetan, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 27. artikuluko d) eta e) letretan aurreikusitako inguruabarrak gertatzen direla iritzi da, eta, horrenbestez, bidezko da Ingurumen baimen integratuan ezarritako baldintzak ofizioz aldatzea, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 28. artikuluan aurreikusitako administrazio prozedurarekin bat, eta ez da bidezkotzat jo aldaketa-espediente hau jendaurrean jartzea.

Ebazpen proposamenaren tramitazio prozesuan entzutea eman zaio instalazioaren titularrari hogeita hamar egunez, eta ez du proposamenaren aurkako alegaziorik aurkeztu.

Adierazitakoarekin bat, eta zerbitzuetako zuzendariei eskumenak eskuordetzeko Ingurumeneko eta Lurraldearen Antolamenduko zuzendari nagusiak irailaren 22an emandako 63/2015 Ebazpenaren bidez eskuordetu dizkidaten eskumenak erabiliz,

EBATZI DUT:

Lehendabizikoa.–Olaztiko udal mugapean porlana fabrikatzen duen instalazio baten Ingurumen baimen integratua eguneratzea. Hortaz, instalazioak eta jarduerak berak instalazioari Ingurumen baimen integratua emateko eta aldatzeko lehendik tramitatutako administrazio espedienteetan ezarritako baldintzak bete beharko dituzte, eta, horiez gainera, ebazpen honen eranskinetan adierazitako baldintzak eta neurriak. Instalazioaren titularra Cementos Portland Valderrivas SA da.

Bigarrena.–Nafarroako Foru Komunitateko Hondakinen Ekoizpenaren eta Kudeaketaren Erregistroan 15P01189016231999 zenbakiarekin hondakin arriskutsuen sortzaile gisa duen baimenaren indarra mantentzea. Sortzen ahal dituen hondakinak ebazpen honen III. eranskinean jasotakoak dira. Hondakinen ekoizpenean egiten den edozein aldaketa Nafarroako Gobernuko Ingurumen Kalitatearen eta Klima Aldaketaren Zerbitzuari jakinarazi beharko zaio, aipatutako erregistroan sartzeko.

Hirugarrena.–Hondakin ez-arriskutsuen kudeatzaile izateko baimena ematea instalazioari, eta Nafarroako Foru Komunitateko Hondakinen Ekoizpenaren eta Kudeaketaren Erregistroan inskribatzea, 15G04189016232015 erregistro zenbakiarekin. Kudeatzen ahal dituen hondakinak eta hondakin horiek tratatzeko gauzatzen ahal dituen eragiketak ebazpen honen III. eranskinean ageri dira. Halaber, titularrak hondakinen kudeaketan izandako edozein aldaketa jakinarazi beharko dio Nafarroako Gobernuko Ingurumen Kalitatearen eta Aldaketa Klimatikoaren Zerbitzuari. Baimenak zortzi urteko indarraldia izanen du, eta automatikoki berrituko da beste horrenbeste urteko aldietarako, Hondakin eta Lurzoru Kutsatuei buruzko uztailaren 28ko 22/2011 Legearen 27.8 artikulua aplikatuz (Hondakinak tratatzeko eragiketen baimena). Sozietatearen helbidea dagoen autonomia erkidegoan ingurumen arloan eskumena duen organoak III. eranskinean adierazitako tratamenduak egiteko baimendutako entitate batek ustiatuko du instalazioa, uztailaren 28ko 22/2011 Legearen 27.2 artikuluan ezarritakoarekin bat.

Laugarrena.–2016ko urriaren 31 baino lehen, titularrak azterlan tekniko eta ekonomiko bat aurkeztu beharko du 8. labean aurrekaltzinatzeko sistema bat jartzeko beharraz, zementuaren, karearen eta magnesio oxidoaren fabrikaziorako dauden teknika erabilgarri onenei (TEO) buruzko ondorioen agiriko 6. MTD betetzeko (Batzordearen 2013ko martxoaren 26ko betearazpen erabakia).

Bosgarrena.–2016ko urriaren 31 baino lehen, titularrak instalazioak egokitzeko proiektu teknikoa aurkeztu beharko du, zementua, karea eta magnesio oxidoa produzitzeko dauden teknika erabilgarri onenei (TEO) buruzko ondorioak ezartzen dituen Batzordearen 2013ko martxoaren 26ko betearazpen erabakian ezarritakoa betetzearren, Europako Parlamentuak eta Kontseiluak emisio industrialei buruz onetsitako 2010/75/EB Zuzentarauarekin bat, modua izan dadin Ingurumen baimen integratuaren baldintzak berrituko dituen prozedura bat tramitatzeko, Kutsaduraren Prebentzio eta Kontrol Integratuei buruzko uztailaren 1eko 16/2002 Legearen 25. artikuluan xedatutakoari jarraituz.

Seigarrena.–2016ko urriaren 31 baino lehenago, titularrak ebazpen honen II. eranskinean adierazitako dokumentazioa aurkeztu beharko du, 1. eta 3. fokoetan emisioak neurtzeko kokatutako sistema automatikoen (SAM) ezaugarriak deskribatzeko.

Zazpigarrena.–2017ko urtarrilaren 1a baino lehen, titularrak airearen kalitatea zaintzeko gunea Landa Garapeneko, Ingurumeneko eta Toki Administrazioko Departamentuak kudeatzen duen Nafarroako Airearen Kalitatea kontrolatzeko Sarean sartu beharko du.

Zortzigarrena.–Baimen integratuan ezarritako baldintzak ofizioz aldatzen edo berrikusten ahalko ditu Ingurumeneko eta Lurraldearen Antolamenduko Zuzendaritza Nagusiak, arau hauetan jasotako inguruabarren bat gertatzen denean: Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 27. artikulua, edo Kutsaduraren Prebentzio eta Kontrol Integratuei buruzko uztailaren 1eko 16/2002 Legearen 25. artikulua.

Bederatzigarrena.–Ebazpen honetan bildu diren baldintzak ez betetzeak berarekin dakar ingurumeneko diziplina neurriak hartzea, hain zuzen ere, Kutsaduraren Prebentzio eta Kontrol Integratuei buruzko uztailaren 1eko 16/2002 Legearen IV. tituluan jasotakoak, galarazi gabe sektoreko legerian ezarritakoa, aplikatzekoa izaten segituko baitu, eta, horren osagarri, Ingurumena Babesteko Esku-hartzeari buruzko martxoaren 22ko 4/2005 Foru Legearen VI. tituluan ezarritako zehapen araubidea.

Hamargarrena.–Ebazpen hau Nafarroako Aldizkari Ofizialean argitaratzea.

Hamaikagarrena.–Ebazpen honek ez du administrazio bidea amaitzen, eta interesdunek, administrazio publikoek izan ezik, gora jotzeko errekurtsoa jar dezakete haren aurka, Landa Garapeneko, Ingurumeneko eta Toki Administrazioko Departamentuko kontseilariari zuzendua, hilabeteko epean. Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik hasita kontatuko dira

Hamabigarrena.–Ebazpen hau Cementos Portland Valderrivas SAri, Olaztiko Udalari, Ebroko Ur Konfederazioari eta Ingurumen Kalitatearen eta Klima Aldaketaren Zerbitzuari igortzea, behar diren ondorioak izan ditzan.

Iruñean, 2016ko abuztuaren 2an.–Ingurumen Kalitatearen eta Klima Aldaketaren Zerbitzuko zuzendaria, Pedro Zuazo Onagoitia.

Oharra: ebazpen honetan aipatzen diren eranskinak interesdunen eskura egonen dira Ingurumeneko eta Lurraldearen Antolamenduko Zuzendaritza Nagusiaren bulegoetan (González Tablas kalea, 9, behea, Iruña), Ingurumen Kalitatearen eta Klima Aldaketaren Zerbitzuan eta Nafarroako Gobernuaren webgunean: http://www.navarra.es/home_es/Temas/Medio+Ambiente/Evaluacion+ambiental/Autorizaciones+ambientales/.

Iragarkiaren kodea: F1609436