2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
MARAÑÓN
Aldaketa, Marañongo udal hilerriaren erabilera
eta hura erabiltzeko eta hartan zerbitzu egiteko eskubide
eta tasak arautzen dituen ordenantzan
Marañongo Udalak, 2016ko martxoaren 16an egindako osoko bilkuran, erabaki zuen, besteak beste, hasiera batean onestea aldaketa udal ordenantzan, Marañongo Udal hilerriaren erabilera eta hura erabiltzeko eta hartan zerbitzu egiteko eskubide eta tasak arautzen dituen horretan. Iragarkia 2016ko 86. Nafarroako Aldizkari Ofizialean argitaratu zen, maiatzaren 5ean.
Nafarroako Toki Administrazioari buruzko uztailaren 2ko 6/1990 Foru Legearen 325. artikuluari jarraikiz, maiatzaren 31ko 15/2002 Foru Legeak aldatu baitzuen, eta jendaurreko epea inork alegaziorik aurkeztu gabe iraganik, ordenantza hori behin betiko onetsi eta testu osoa ematen da argitara, behar diren ondorioak izan ditzan.
Marañonen, 2016ko ekainaren 13an.–Alkatea, Laura Corres Martín.
ORDENANTZA, MARAÑONGO UDAL HILERRIAREN ERABILERA ETA HURA ERABILTZEKO ETA HARTAN ZERBITZU EGITEKO ESKUBIDE ETA TASAK ARAUTZEN DITUENA
LEHENBIZIKO KAPITULUA
Hilerriaren erabilera eta erabiltzeko eskubideak
I. TITULUA
Xedapen orokorrak
1. artikulua.
Toki Araubidearen Oinarriei buruzko Legearen 4., 25. eta 26. artikuluetan, Nafarroako Toki Administrazioari buruzko Foru Legearen 4. eta 39.1.f) artikuluetan, eta Hilotzen gaineko Osasunari buruzko Erregelamendua onetsi zuen urriaren 15eko 297/2001 Foru Dekretuaren arabera, udal hilerriaren administrazioa, zuzendaritza eta zaintza Marañongo Udalari dagozkio, batere ukatu gabe beste administrazio batzuek alor berean dituzketen legezko eskumenak.
2. artikulua.
Administrazioak, zuzendaritzak eta zaintzak ahalmen hauek dakartzate berekin:
a) Hilerrietako higienearekin eta osasungarritasunarekin zerikusia duen guztia.
b) Hilerrien zainketa, garbiketa eta egokitzapena. Hala ere, norbanakoen betebeharra izanen da hobia edo nitxoa mantendu eta zaintzea, behar bezala segur, xahu eta apain egon daitezen.
c) Hilotzak eramateari dagokiona eta hilerriaren barne araubidea ukitzen duen guztia.
d) Lurren eta hilobien antolaketa, banaketa, erabilera eta aprobetxamendua.
e) Bidezko diren eskubide eta tasak kobratzea.
f) Hilobien erregistroa eramatea, liburu zigilatu eta zenbatu batean.
3. artikulua.
Udalburutzaren ardurapekoak izanen dira hilerriaren antolaketa eta funtzionamendua; horretarako, behar adina langile izanen du, eta bere eginbehar hau ahalik eta hobekien betetzeko, behar diren proposamenak aurkeztuko dizkio Udalari.
4. artikulua.
Udalerriko biztanleriaren zentsuaren araberako hilobi kopurua egonen da Marañango hilerrian, edo haietarako lur aski bederen bai.
5. artikulua.
Marañongo hilerrian ehorztera ekartzen diren hilotz guztiak lurperatuko dira, legezko tramiteak bete badira, eta tasen eranskinean aipatzen diren ehorzketa eskubideak ordaindu beharko dira zerbitzu horiengatik.
6. artikulua.
Hilerriko lurra lurperatzeko eta hilobietarako eraikuntzak egiteko erabiliko da, ez besterako. Azken lan horiek egiteko, obra lizentzia beharko da, eta dagokien zerga ordaindu.
7. artikulua.
Hobien kokapena, lurrerauzketa gastuak eta hobiak ireki nahiz ixteko kostuak Marañongo Udalaren kontura izanen dira.
Heriotza bat gertatzen denean, ahaideek edo ehorzketan interesa dutenek hau eginen dute:
–Udalari aditzera eman, hobia edo nitxoa presta dadin.
–Bake Epaitegiko Idazkaritzan heriotzaren ziurtagiri medikoa aurkeztu, Erregistro Zibilean inskribatzeko eta ehorzketarako lizentzia egiteko.
8. artikulua.
Hilobiak segur, xahu eta apain atxikitzea titularren betebeharra da.
Hilobiaren zainketa behar bezalakoa ez denean, Udalburutzak 30 egun naturaleko epea emanen die interesdunei behar diren obrei ekiteko, eta gehienez ere 2 hilabeteko epean bukatu beharko dira.
Aipatu epea bukatuta, Udalburutzak xedatuko du obren ordezko exekuzioa eta horren gainean ordenantza fiskalak dioena aplikatuko du; kostua, interesdunek ordaindu beharko dute.
9. artikulua.
Udalak eremu bat finkatuko du hilerriaren barrenean hilotz erraustuen ontziak ehorzteko (errauts kutxatilak, ontziak etab.).
Errauts horiek ehorzteko nahiz hobitik ateratzeko, ordenantza honetako arauak aplikatuko dira.
10. artikulua.
Aprobetxamendua honako hauengatik ere iraungi daiteke:
a) Hilerria desagertzeagatik.
b) Interes publikoagatik.
c) Ehorzketa gehiago egiteko, hobiak behar direnean.
11. artikulua.
Hilotzak hilerrian berean lekuz aldatzeko atera daitezke hobitik, baita beste hilerri batera eramateko ere.
Nolanahi ere, osasunari buruz indarra duten xedapenetan ezarritakoari jarraikiz atera behar dira, bisitetarako ez diren orduetan eta osasunaren aldetik behar diren neurri guztiak hartuz.
12. artikulua.
Hilotzak hobitik zein egun eta ordutan atera behar diren adieraziko zaie hartan interesa dutenei, lan hori ikusi dezaten, hala nahi badute.
Epea amaitzeagatik hilotza atera behar denean, ez da inolako gaztigurik eman beharko.
Eskatzaileak hilotza ateratzeko lanak bere kontura kontratatzen ahalko ditu. Udalburutzari komunikatu beharko dio aurretik, 30 egun naturaleko epean, horrek baimena eman eta lanak ikuskatu beharko baititu.
13. artikulua.
Hilerrian berean bertze hilobi batera aldatzeko nahiz bertze hilerri batera eramateko atera diren hondarrak ez dira gorputegira eramaten ahal.
Beste hilerri batetik ekartzen diren hilotzak ehorzteko ez da lur berria okupatuko. Gutxienez ere hamar urteko antzinatasuna duen hilobian ezarriko dira edo, bestela, hezurtegira eramanen dira.
14. artikulua.
Hiltzeko arrazoiak osasun arriskurik sortu ez badu, baltsamatu gabeko hilotzak baldintza hauetan atera daitezke:
a) Lurperatu ondotik gutienez ere hamar urte iraganda, lurrean, panteoietan, hobietan edo nitxoetan ehortzitako hilotzak atera daitezke, arrunt hezurturik baldin badaude.
b) Hilobi mota guztietan: ehorzketa zinkezko hilkutxan egin baldin bada, edozein unetan atera eta lekualdatzen ahal da, betiere hilkutxa kontserbazio egoera ezin hobean badago.
Aipatutakoak baino epe laburragoetan ez da hilotzik ateratzeko baimenik emanen, epaile batek agindu ezean, salbuespenezko kasuetan izan ezik, Udalburutzak baimenduta.
Ekainetik irailera bitarte, biak barne, ez da hilotzik ateratzeko baimenik emanen, epaile batek aipatu baino epe laburragoetan agindu ezean.
Hala ere, hilabete horietan hildako lagun baten ezkontide edo 2. mailako ahaide odolkide izandakoaren gorpuzkiak atera daitezke, hilarekin batean eta haren ondoan ehortzi ahal izateko.
Betiere, ehorzketa hori egin ahal izateko a) eta b) baldintzak bete beharko dira.
15. artikulua.
Hilotz baltsamatuak atera eta lekuz aldatzeko baimena noiznahi eman daiteke, baina zerraldoaren kanpoko kutxa berria ezarri beharko da, ongi kontserbaturik ez badago.
16. artikulua.
Bai hilotz bat ateratzen denean lekuz aldatzeko bai berriz ere ehorzten denean, horren oharra jasoko da behar diren liburuetan.
II. TITULUA
Xedapen bereziak
17. artikulua.
Marañongo hilerrian debeku dira lurreko ehorzketak.
Ordenantza honek indarra hartzen duenetik, hilotzak edo hondar erraustuak nitxoetan baino ezin izanen dira ehortzi; ez da panteorik egiteko baimenik emanen.
18. artikulua.
Marañongo hilerrian ehortziak izateko eskubidea izanen dute baldintza hauetariko bat betetzen dutenek:
a) Heriotza gertatzen denetik gutienez ere bi urte lehenago Marañongo Udalean erroldaturiko bizilagunek.
b) Marañongo seme-alabak: ordenantza honen aplikazioari dagokionez, Marañongo seme-alabak dira Marañongo Erregistro Zibilean jaiotzaren inskripzioa egina dutela frogatzen dutenak edo beren lehen bizilekua eta erroldatzea Marañonen izan zutela frogatzen dutenak.
c) Aurreko baldintzetariko bat betetzen dutenen ezkontide eta lehen graduko ahaideek.
d) Aitzineko kasuetan egon gabe ere, Marañongo hilerrietan ehortziak izan nahi duten guztiek.
19. artikulua.
Ehorzketa egiteko egungo ilaren ordenari segituko zaio, heriotzaren dataren arabera, eta ordena hori ez da inola ere aldatuko.
Interesdunek aurretik eskatuta, Udalak emanen du hilobien kontzesioa, eskaeren ordenari jarraikiz.
Hobien kokapena, lurrerauzketaren gastuak eta hobiak ireki nahiz ixteko kostuak Udalaren kontura izanen dira. Udalak ez du bere gain hartuko panteoiak, hilarriak edo gurutzeak kentzeagatik sorrarazten diren gastuak.
20. artikulua.
Hilobietan paratu edo idatzi nahi diren hilartitzak, oroigarriak eta ikurrak begirunetsuak izan beharko dira eta lekuarekin bat egiten dutenak.
Debeku da nitxo edo hobietan zulatze lanak edo larriena kentzekoak egitea fabrikan, uztaiak, gako-iltzeak etab. paratze aldera, baina finkoak ez diren elementuak paratzen ahal dira. Betiere, baimentzen diren lanak Udalburutzak ikuskatuko ditu.
BIGARREN KAPITULUA
Tasak Marañongo hilerrian zerbitzu egiteagatik
21. artikulua.
Zergapeko egintza ondoko zerbitzuak egitea da:
1. Ehorzketak nitxoetan, hobietan edo kolunbarioetan.
2. Hilotzak hobitik ateratzea.
3. Hilobiei lotutako bertze lan batzuk.
22. artikulua.
Ordenantza honetan araututako zerbitzuren bat eskatzen dutenak dira tasa hauen subjektu pasiboak, pertsona fisiko edo juridikoak izan edo, nortasun juridikorik gabe, batasun ekonomikoa edo ondare banatua eratzen duten entitateak izan.
23. artikulua.
Zerga-oinarria ordenantza honen tarifen eranskinean agertzen da. Tributu-kuota eta zerga-oinarria berdinak dira.
24. artikulua.
Ematen ahalko dira hobi berean bi hilotz edo gorpuzki nahiz gehiago batera lurperatzeko lizentziak, baldin eta ehorzketa lekuak behar bezain zehazturik badaude, baina hilotz bakarra lurperatzetik goitiko lanak partikularrak berak egin beharko ditu, bere kontura.
25. artikulua.
Hilerri honetako hilobi batetik gorpuzkiak atera eta beste batean ehortziz gero, hilotza ateratzeagatik eta ehorzteagatik ordaindu beharko dira tasak. Gorpuzkiak beste hilerri batetik ekarriz gero, ehorzketari dagokion tasa ordainduko da bakarrik.
26. artikulua.
21. artikuluko 1. eta 2. zenbakietan aipatzen diren zerbitzuei dagozkien tasak zerbitzuak egin baino lehen ordaindu behar dira, salbu premia larrietan edo udal bulegoek jaieguna duten kasuetan. Horrelakoetan langileak oharra jasoko du eta horren berri emanen die udal bulegoei, behar den tarifa ordainarazteari ekin diezaioten.
Nafarroako Toki Ogasunei buruzko Legearen 108. artikuluan xedatutakoari jarraituz, tasak autolikidazio bidez eskatzen ahalko dira.
Azken xedapen bakarra.–Ordenantza honek indarra hartuko du eta ondorio juridiko osoak sortuko ditu, testu osoa Nafarroako Aldizkari Ofizialean argitaratu ondoan.
Ordenantza honetan aurreikusi ez den orotan, Nafarroako Toki Ogasunei buruzko Legeari jarraituko zaio.
ERANSKINA
Tarifak
1.–Ehorzketak:
a) Heriotza gertatzen denetik gutienez ere bi urte lehenago Marañongo Udalean erroldaturiko bizilagunek: 400 euro.
b) Marañongo seme-alabak: Ordenantza honen aplikazioari dagokionez, Marañongo seme-alabak dira Marañongo Erregistro Zibilean jaiotzaren inskripzioa egina dutela frogatzen dutenak edo beren lehen bizilekua eta erroldatzea Marañonen izan zutela frogatzen dutenak: 480 euro.
c) Aitzineko baldintzetariko bat betetzen dutenen ezkontide eta lehen graduko ahaideak: 480 euro.
d) Aitzineko kasuetan egon gabe ere, Marañongo hilerrietan ehortziak izan nahi duten guztiek: 680 euro.
2.–Hobitik ateratzea:
Hilerriko hilobi guztietarako: zerbitzuaren kostua.
3.–Gorpuzki erraustuen ontziak ehorztea:
a) Heriotza gertatzen denetik gutienez ere bi urte lehenago Marañongo Udalean erroldaturiko bizilagunek: zerbitzuaren kostua.
b) Marañongo seme-alabak: ordenantza honen aplikazioari dagokionez, Marañongo seme-alabak dira Marañongo Erregistro Zibilean jaiotzaren inskripzioa egina dutela frogatzen dutenak edo beren lehen bizilekua eta erroldatzea Marañonen izan zutela frogatzen dutenak: 200 euro.
c) Aitzineko baldintzetariko bat betetzen dutenen ezkontide eta lehen graduko ahaideak: 200 euro.
d) Aitzineko kasuetan egon gabe ere, Marañongo hilerrietan ehortziak izan nahi duten guztiek: 350 euro.
4.–Gorpuzki erraustuen ontziak hobitik ateratzea. Hilerrian gisa honetan hobitik ateratzen diren guztiak: zerbitzuaren kostua.
Iragarkiaren kodea: L1607417
