2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
TUTERA
Alkatetzaren 7/2016 Dekretua, ekainaren 8koa.
Aldaketa, Hezkuntza alorreko eskudantzien eskuordetzan
Behean adierazten den egunean, Tuterako Udaleko alkate udalburuak 7/2016 Dekretua eman du, eta hau da horren testua:
“Alkatetzaren apirilaren 19ko 3/2016 Dekretuaren bidez Silvia Cepas Medinaren esku utzi zen, modu berezian, Hezkuntzari dagozkion aferen barne zuzendaritza eta kudeaketa.
Oinarrizko legerian, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 13. artikuluak arautzen du eskumenak eskuordetzea.
Halaber, zinegotzi delegatuen araubidea Udalaren Erregelamendu Organikoaren 23. (4., 5. eta 6. puntuak), 34., 35. eta 36. artikuluetan dago, eta eskuordetzearen bidez ematen zaizkien eskudantziak erabiltzeko araubide orokorra, berriz, 82.etik 86.era bitarteko artikuluetan. Eta 23.4 artikuluak ezartzen duenez, alkateak edozein zinegotziri eskuordetze berezia ematen ahal dio alor horien barneko gai zehatzak zuzentzeko eta kudeatzeko, nahiz eta Tokiko Gobernu Batzarreko kide ez izan.
Kontuan harturik zinegotzigoak Udal honen Antolaketa Administratiboaren gaineko Erregelamendu berrira egokitu behar direla (2016ko 109. Nafarroako Aldizkari Ofiziala, ekainaren 7koa), baita 2016ko plantilla organikora ere (2016ko 104. Nafarroako Aldizkari Ofiziala, maiatzaren 31koa).
Egintza hau da toki araubideak eta Herri Administrazioen Araubide Juridikoari eta Administrazio Prozedura Erkideari buruzko Legearen araubide oinarrizkoak Alkatetzaren esku uzten dituen hautazkoetarik.
Ahalmen hori erabiliz eta gaia arautzen duten toki araubidearen arloko gainerako legezko xedapenak ikusita, dekretatu dut:
Lehena.–Alkateak apirilaren 19ko 3/2016 Dekretuaren bidez Silvia Cepas Medinaren esku egindako eskudantzien eskuordetzea aldatzea, hain zuzen ere Hezkuntzaren unitate administratiboen aferen barne zuzendaritzari eta kudeaketari dagozkienez, zinegotzigoak kudeatutako guneen lagapena gehituko baita.
Eskuordetzen diren eskudantziak honako hauek dira:
–Hezkuntzari dagozkion aferen barne zuzendaritza eta kudeaketa, baina ez hirugarrenak ukitzen dituzten egintza administratiboen bitartez ebazteko ahalmena, salbu ondoko lerroaldeetan ezarritakoa.
–Obren, zerbitzuen, horniduren eta laguntza teknikoaren kontratazioa eta kontzesioa, horien zenbatekoagatik faktura soilik edo faktura gehi kreditu erreserba soilik behar denean, betiere galarazi gabe aurrekontua betearazteko oinarrietan gastua baimentzeko xedatutakoa.
–Gastuak baimentzea eta xedatzea, aurreko atalean ezarritako mugaren barrenean, baita aurrekontua betearazteko oinarrietan aurreikusten direnak ere.
–Hezkuntzaren zinegotzigoek kudeatutako guneen lagapena.
Bigarrena.–Eskudantzien eskuordetzaren aldaketa hau, eraginkorra izateko, zinegotziak onartu beharko du. Eskuordetzea onartutzat hartuko da, inolako adierazpenik egin beharrik gabe, baldin eta, dekretu hau jakinarazi eta biharamunetik hiru egun balioduneko epean, ez badio Alkatetzari berariaz adierazten ez duela onartzen eskuordetzea.
Hirugarrena.–Dekretu honen berri ematea Udaleko osoko bilkurari; ukitutako zinegotziari jakinaraztea; Hezkuntza gaien arloari; eta Nafarroako Aldizkari Ofizialean argitaratzea, nahiz eta horrek ez duen eragozten sinatu ondoko egunetik aitzina dekretua indarrean egotea.”
Tuteran, 2016ko ekainaren 8an.–Alkate udalburua, Eneko Larrarte Huguet.
Iragarkiaren kodea: L1607343
