2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
ITZAGAKO ADMINISTRAZIO ZERBITZUEN MANKOMUNITATEA
Erantzukizuneko aitorpena eta aurretiazko komunikazioa behar dituzten hirigintzako jarduketak arautzen dituen ordenantza. Behin betiko onespena
2016ko otsailaren 19an egindako Mankomunitatearen Batzarrean hasiera batean onetsi zen Erantzukizuneko aitorpena eta aurretiazko komunikazioa bakarrik behar dituzten hirigintzako jarduketak arautzen dituen ordenantza, Itzagako Administrazio Zerbitzuen Mankomunitatea osatzen duten sei udalen mugapeetarako: Ibargoiti, Itzagaondoa, Elo, Lizoain-Arriasgoiti, Untzitibar eta Urrotz-Hiria.
Hasierako onespenaren erabakia 2016ko 55. Nafarroako Aldizkari Ofizialean argitaratu zen, martxoaren 21ean, eta jendaurreko epean inork ez du alegaziorik aurkeztu; hortaz, Nafarroako Toki Administrazioari buruzko 6/1990 Foru Legearen 325. artikuluan xedatuari jarraikiz, behin betiko onesten da Erantzukizuneko aitorpena eta aurretiazko komunikazioa behar dituzten hirigintzako jarduketak arautzen dituen udal ordenantza, Itzagako Administrazio Zerbitzuen Mankomunitatea osatzen duten sei udalen mugapeetarako: Ibargoiti, Itzagaondoa, Elo, Lizoain-Arriasgoiti, Untzitibar eta Urrotz-Hiria.
Urrotz-Hirian, 2016ko maiatzaren 24an.–Mankomunitateko burua, Pedro María Martínez Juango.
ERANTZUKIZUNEKO AITORPENA ETA AURRETIAZKO KOMUNIKAZIOA BAKARRIK BEHAR DITUZTEN HIRIGINTZAKO JARDUKETAK ARAUTZEN DITUEN ORDENANTZA
ZIOEN AZALPENA
Nafarroan Hirigintza iraunkorra, Hiri-berrikuntza eta Hirigintza-jarduera Laguntzeko neurriei buruzko martxoaren 5eko 5/2015 Foru Legearen bidez aldatu zen Lurraldearen Antolamenduari eta Hirigintzari buruzko abenduaren 20ko 35/2002 Foru Legea: manu berriak erantsi zituen, erantzukizuneko aitorpena edo aurretiazko komunikazioa behar zituzten obrak arautzeko.
Hala, 189.ter artikulu berrian ezartzen dira zer hirigintza jarduketa dauden erantzukizuneko aitorpenaren edo aurretiazko komunikazioaren araubidearen menpe, jasota gelditzearen, gauzatzearen eta geroko kontrolaren ondorioetarako.
Itzagako Mankomunitateak erabaki du foru legeria berria transposatzea, Mankomunitatea osatzen duten sei udaletako udal mugapeen barnean egiten diren obra lizentzien arloan; hala, ezarri eta argitu da hirigintzako zer egintzak duten nahitaezkoa erantzukizuneko aitorpena eta Udalari aurretiazko komunikazioa egin beharra, baita horien geroko kontrola edo ez-betetzeen ondorioak ere.
1. artikulua. Xedea.
Ordenantza honen xedea da obra txikietarako hirigintza lizentziak emateko prozedura arautzea, horien tramitazioa komunikazio araubideko eta araubide laburreko prozedura erraztuen bidez egitekoa denean.
Erantzukizuneko aitorpenak titularrari ahalmena emanen dio nahi duen eta eskaeran adierazi duen hirigintzako jarduera egiteko, baldin behar den dokumentazio nahitaezkoa badu, galarazi gabe egoki diren egiaztatze, kontrol eta ikuskatze ahalmenak.
Erantzukizuneko aitorpenaren bitartez ez dira eskuratuko legediaren edo hirigintzako planeamenduaren kontrakoak diren ahalmenak.
Erabat deusezak izanen dira legediaren edo hirigintzako planeamenduaren aurkako erantzukizuneko aitorpenak, baldin eraginkorrak izateko oinarrizko baldintzak biltzen ez badituzte.
Erantzukizuneko aitorpena behar izanik, halakorik aurkeztu gabe egiten badira jarduketak, ondorio guztietarako ulertuko da lizentziarik gabeko jarduketak direla, eta lizentziarik gabeko obren eta erabileren lege-babes eta zehapen araubide bera aplikatuko zaie.
2. artikulua. Esparrua.
Obra txikiak dira ordenantza honen jarduketa eremua, eta kanpoan gelditzen dira gainerako jarduketak; horiek prozedura arruntaren bidez tramitatutako dira.
3. artikulua. Aurretiazko komunikazioa behar duten obra txikien tipologia.
Erantzukizuneko aitorpenaren eta aurretiazko komunikazioaren menpe daude honako obra hauek:
Aurretiazko komunikazioa behar duten obra gauzatzearen kostua gehienez ere 1.000 euro izanen dira.
–Merkataritza jarduera egiteko lokalak egokitzeko obrak, aplikatu beharreko araudi sektorialarekin bat.
–Munta edo tamaina txikiko obrak, gauzatzearen kostua gehienez ere 1.000 euro izanik.
–Itxiturak eta hesiak.
–Eremu publikotik ikusten ahal diren publizitate kartelak.
–Eraiki aurreko lanak, adibidez zundaketak, prospekzioak, laginak eta saiakuntzak.
–Lorategi lanak eta zoladura lanak jabari pribatuko eremu libreetan, baldin obrek ez badute ukitzen erabilera, zerbitzu edo instalazio publikorik, eta aldaketarik sortzen ez badute lurzoruaren maila naturalean eta zuhaitzik mozten ez bada.
–Obra txikiak, halakotzat harturik eraikineko barneko eta kanpoko aldeen kontserbazioari eta mantentzeari dagozkienak, betiere gauzatzeko aurrekontua 1.000 euro bada gehienez ere:
- Barneko eta kanpoko pintura lanak.
- Barneko estaldurak (zoladura, paretak) berritzea eta aldatzea.
- Barneko zur-lanak (ateak) berritzea eta aldatzea.
- Kanpoko aldeko zur-lanak (leihoak) berritzea eta aldatzea, elementu amankomuneko zati ez direnean.
- Instalazioak (elektrizitatea, hodiak, etab.) berritzea eta aldatzea.
- Trenkadak berritzea eta aldatzea.
Obra txiki horietatik kanpo gelditzen dira honako hauek:
- Aldamioak behar dituzten obrak.
- Babes mailaren bat duten eraikinak edo multzoak ukitzen dituztenak.
- Eraikinaren elementu amankomunak ukitzen dituztenak (barnean direla kanpoaldeko zur-lanak aldatzea, baldin zenbait etxebizitzaren elementu amankomun baten zati badira, adibidez bizitegien eraikin kolektiboetan).
- Eraikinen egitura ukitzen dutenak.
- Elementuaren erabilera aldaketa dakartenak, edo banaketa aldatzen dutenak, eta, hala, bizigarritasun baldintzak ukitzen ahal dituztenak.
- Eraikinaren kanpoaldeko itxuraren aldaketa funtsezkoa dakartenak.
- Antolaketatik kanpo dauden eraikinetan edo elementuetan esku hartzen dutenak.
Erantzukizuneko aitorpenaren araubideak ez ditu galarazten toki entitateak dituen ikuskatzeko, kontrolatzeko eta zehapenak jartzeko ahalmenak, baldin obrak bat ez badatoz legeriarekin, planeamenduarekin edo erantzukizuneko aitorpenarekin berarekin.
4. artikulua. Betekizun dokumental eta teknikoak.
Itzagako Administrazio Zerbitzuen Mankomunitateko bulegoetan ondoko agiriak aurkeztuta hasiko da erantzukizuneko aitorpenaren eta aurretiazko komunikazioaren menpe dauden obren prozedura:
1) Eskabidea, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 70. artikuluan ezarritako datuekin.
2) Erantzukizuneko aitorpena, berariaz adierazten duena indarrean den araudian eskatutako baldintza guztiak betetzen direla eta hori frogatzen duen dokumentazioa baduela.
3) EIOZaren (eraikuntzen, instalazioen eta obren gaineko zerga) autolikidazioa, eredu normalizatuaren arabera, banku entitate batean ordainketa egin izanaren frogagiriarekin.
Gainera, obraren hirigintza arloko dokumentazio hau aurkeztu beharko da:
–Egin beharreko jarduketaren xede den higiezinaren kokapenaren planoa, adieraziz helbidea eta lurzatia.
–Egin beharreko jarduketak azaltzeko memoria laburra.
–Egintzak behar dituen bestelako baimenak, kasu bakoitzean araudi sektorialak eskatzen dituenak.
–Eraikineko kanpoaldeko elementuetan jarduketarik behar izanez gero, haren argazkiak aurkeztuko dira.
–Egin beharreko jarduketaren aurrekontua.
Udal administrazioak atzematen badu egindako aurretiazko komunikazioak gabeziak dituela, aurreko aginduetan ezarritako baldintzen bat ez delako betetzen edo zehaztugabea delako, edo informazioa zehaztugabea bada komunikatutako egintzaren legezkotasuna baloratzeko, sustatzaileari eskatuko zaio egoera hori zuzen dezala, hamar eguneko epean.
Baldin erantzukizuneko aitorpenari eransten zaion edozein datu, adierazpen edo agiri funtsean ez-zuzena edo faltsua bada, edo zerbait falta bada, edo aurkezten ez bada, edo aplikatzekoa den araudiak ezarritako baldintzak betetzen ez badira, ezin izanen da eskaerako hirigintzako jarduera hasi, gertaera horien berri jakiten den unetik beretik, deusetan galarazi gabe izan daitekeen erantzukizun penal, zibil eta administratiboa.
Jardueraren titularrak, egoki juzgatzen badu, erantzukizuneko aitorpena aurkeztu aurretik egiaztatzen ahalko du jarduera bideragarria den hirigintzaren aldetik, hirigintzako kontsulta egiteko inprimakia erabiliz.
XEDAPEN INDARGABETZAILEA
Indarrik gabe uzten dira ordenantza honetan ezarritakoaren kontrakoak diren edo honekin kontraesanean udal xedapen guztiak.
AZKEN XEDAPENA
Ordenantza honek Nafarroako Aldizkari Ofizialean osorik argitaratu eta biharamunean hartuko du indarra.
Iragarkiaren kodea: L1606371
