Iragarkia

119. ALDIZKARIA - 2016ko ekainaren 21a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

28C/2016 EBAZPENA, maiatzaren 4koa, Politika Ekonomiko eta Enpresarialaren eta Lanaren zuzendari nagusiak emana, Noaingo Guillén Obras y Proyectos SA enpresaren hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.

Noaingo Guillén Obras y Proyectos SA enpresaren hitzarmen kolektiboaren testua (kode zenbakia: 31101082012016) aztertu da, Erregistro honetan 2016ko apirilaren 18an sartu zena eta enpresaren ordezkariek eta sindikatuen ordezkariek 2016ko martxoaren 17an izenpetu zutena, Langileen Estatutuari buruzko Legearen Testu Bategina onetsi zuen martxoaren 24ko 2/2015 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera. Horrenbestez,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Nafarroako Aldizkari Ofizialean argitaratzeko xedatzea, orok jakin dezan.

Iruñean, 2016ko maiatzaren 4an.–Politika Ekonomiko eta Enpresarialaren eta Lanaren zuzendari nagusia, Izaskun Goñi Razquin.

GUILLEN OBRAS Y PROYECTOS SL ENPRESARENTZAKO HITZARMEN KOLEKTIBOA

Guillén Obras y Proyectos SL enpresarentzako hitzarmen kolektibo hau, alde batetik, enpresak sinatzen du, eta bestetik, enpresako langileen delegatuak, langileen aldetik.

1. artikulua. Enpresaren hitzarmen kolektibo honek indarra duen bitartean Nafarroako eraikuntzaren hitzarmen kolektiboa ordeztuko du, salbu eta hitzarmen horri buruz hemen biltzen diren aipamen zehatzei dagokienez.

2. artikulua. Eremu funtzionala: hitzarmen kolektibo hau nahitaez bete beharko da Guillen Obras y Proyectos SL eraikuntza enpresan (CNAE: 41.22).

3. artikulua. Langile eremua: hitzarmen kolektibo honek Guillen Obras y Proyectos SL plantillako langile guztiengan du eragina.

4. artikulua. Iraunaldia eta salaketa.

Hitzarmen honen indarraldia 2016ko urtarrilaren 1ean hasiko da, eta 2018ko abenduaren 31n amaituko.

Hitzarmena automatikoki salatuko dute negoziazio batzordeko alderdiek 2018ko urriaren 1ean; orduan, negoziazio-mahai berria eratu beharko da, hurrengo hitzarmenaren negoziazioak hasteko. Indarraldia bukatzen denerako beste hitzarmen kolektibo bat adostu ezean, Nafarroan indarra duen Eraikuntzaren Hitzarmen Kolektibo Probintzialera joko da.

5. artikulua. Osotasunarekiko lotura.

Hitzarmen honetan itundutako baldintzek multzo organiko eta zatiezina osatzen dute, eta, praktikan aplikatzerakoan, oso-osorik hartuko dira.

6. artikulua. Ordainsariak.

Hitzarmen kolektibo honen hiru urteko indarraldia bitartean, eta 15.2 artikuluan aipatzen diren balizko ordainsari aldakorrak deusetan galarazi gabe, ordainsariak I. eranskineko taulan agertzen direnak izanen dira, alde batera utzita goragoko sektorearen hitzarmen kolektiboetatik datorren edozein soldata-zehaztapen.

7. artikulua. Osotasunarekiko lotura.

Hitzarmen honetan itundutako baldintzek multzo organiko eta zatiezina osatzen dutenez eta, praktikan aplikatzerakoan, urteko kopuruan osotasunean hartuko direnez, hitzarmen hau baliorik eta indarrik gabe geldituko litzateke baldin eta jurisdikzio eskudunak hitzarmen honetako erabakietakoren bat baliorik edo indarrik gabe utziko balu. Horrelakorik gertatuz gero, hitzarmena sinatu duten alderdiek hitzematen dute kasuan kasuko ebazpenak indarra hartu eta hurrengo 10 egun balioduneko epean bilduko direla arazoa konpontzeko asmoz. Ebazpena irmo bilakatu eta 45 egun balioduneko epean alderdi sinatzaileak ados jartzen ez badira, konpromisoa hartzen dute bilera egutegi bat finkatzeko, hitzarmena bere osotasunean negoziatzeko.

8. artikulua. Eraikuntza sektorearen hitzarmen orokorra.

Arau-iturrien lehentasun sistemari jarraikiz, onartzen da eraikuntza sektorearen hitzarmen orokorra zuzenean aplikatzen ahal dela hitzarmen honen funtzio eta lurralde eremuan, hitzarmen orokor horren 10. eta 12. artikuluetan ezarritakoari jarraikiz.

Lanbide sailkapenari dagokionez, arau izanen dira eraikuntza sektorearen hitzarmen orokorraren lehenengo xedapen iragankorreko mailen taula eta Eraikuntzaren, Beiraren eta Zeramikaren gaineko Lan Ordenantzak.

9. artikulua. Irenspena eta konpentsazioa.

1. Hitzarmen honetan ezarritako diru-sari kuantifikatuek gutxieneko izaera dute beren aplikazio eremuan.

10. artikulua. Lan baldintzak ez aplikatzea.

Nafarroako eraikuntza sektorearen hitzarmen kolektibo indardunean xedatutakoari jarraikiko zaio, salbu eta hemen itundutako baldintza ekonomikoei dagokienez, horiek ezin baitira utzi aplikatu gabe.

11. artikulua. Kontratazioa.

Atal honi dagokionez, Nafarroako enpresa sektorearen hitzarmen kolektiboan xedatutakoari jarraikiko zaio.

12. artikulua. Kontratua amaitzeagatiko kalte-ordaina hainbanatzeko debekua.

Hitzarmen honek indarra hartu ondoren egiten diren kontratuetan, debekatuta dago kontratua amaitzeagatiko kalte-ordaina hainbanatzea, Nafarroako eraikuntza sektorearen hitzarmen kolektiboan ezarritakoarekin bat.

13. artikulua. Ordainsariak.

2016-2018 bitartean, lanbide kategoria bakoitzarentzako ordainsariak hitzarmen honen taula eta artikuluetan finkatzen direnak izanen dira.

14. artikulua. Oinarrizko soldata.

Hitzarmen honen eraginpeko langileen oinarrizko soldata I. eranskineko taulan zehaztua dago maila eta kategoria bakoitzerako.

15. artikulua. Aparteko haborokinak.

1.–Aparteko bi paga ordainduko dira, eranskineko taulan agertzen den zenbatekoak.

Langileak eskubidea du urtean aparteko bi eskersari baino ez izateko, ekainean eta abenduan ordainduko zaizkionak, ekainaren 30a eta abenduaren 20a baino lehen, hurrenez hurren.

Aparteko paga horiek ez dira sorraraziko Langileen Estatutuaren 45. artikuluan aurreikusitako kontratua eteteko arrazoietako batek dirauen bitartean, aldi baterako ezintasun egoeretan izan ezik.

Seihileko natural bakoitzean zehar lanean hasi edo enpresa uzten duen langileak seihilekoan emandako denboraren proportzioan sorraraziko du aparteko paga.

2.–Hitzarmen honen indarraldiko ekitaldi bakoitzean enpresak lortzen dituen ustiapen eta kontabilitate emaitzak ikusita, enpresak erabakitzen ahalko du urteko prima edo soldata-osagarri bat ordaintzea, berak finkatzen duen adinakoa. Osagarri hori ekitaldi bakoitza ixten den egunean (abenduaren 31n) alta-egoeran dauden langileek sorraraziko dute, eta kasuan kasuko ekitaldiaren hurrengo urteko lehen hiruhilekoan ordainduko da.

2015eko ekitaldiari dagokiona 2016an likidatuko da; horren zenbatekoak konpentsatu eta irensten ditu 2015ean aplikatu beharreko hitzarmeneko tauletan agertzen den edozein kontzeptugatik sortutako soldata-diferentzia guztiak, halakorik bada.

16. artikulua. Hitzarmenaren osagarria.

Oinarrizko soldatari osagarri gisako plus bat erantsiko zaio, maila eta kategoria bakoitzarentzat I. eranskineko taulan ezarrita dagoena. Plus hori benetan lan egindako lanaldi normala egiten duten langileek sorraraziko dute, errendimendua normala eta egokia izan bada.

17. artikulua. Antzinatasun saria.

Gaur egun jasotzen diren zenbatekoak ez dira aldatuko eta denbora-mugarik gabe mantenduko dira “ad personam” izeneko ordainsari-osagarri gisa, hau da, ez dute inolako aldaketarik izanen, zernahi gerta ere, eta kasuan kasuko langileak enpresarekin duen kontratua etetearekin batera iraungiko dira.

18. artikulua. Soldataz kanpoko plusa.

Lantokietara joateko langileek izaten dituzten gastuak konpentsatzeko asmoz, kontuan izanik langileen mugikortasuna, sektore horren ezaugarrietako bat baita, eta joan-etorrietan egin beharreko tartea edozein dela ere, soldataz kanpoko plus bat ezarri da, benetan lan egindako egun bakoitzeko kalkulatua. Delako plusa hitzarmenaren I. eranskineko tauletan dago zehaztua, eta berdina izanen da talde eta kategoria guztientzat.

19. artikulua. Dietak eta lokomozioa.

Hitzarmen honen indarraldia bitartean, eta enpresak gaur egun dituen zailtasunak kontuan harturik, alderdiek adostu dute unean-unean lanean ari diren obra kokatzen den tokia lantokitzat hartuko dela ondorio guztietarako, eta lanaldia hasiko dela kontatzen langilea bertara lan egiteko moduan iristen den unetik. Beraz, enpresa ez dago behartua inolako konpentsaziorik ordaintzera joan-etorrietan emandako denboragatik edo horiek egiteko izandako gastuengatik. Enpresak langileen eskura jarriko ditu Imarkoaindik kasuan kasuko lantokira joateko ibilgailu egokiak. Nor bere etxetik Imarkoainera joateko ematen den denbora ez da lan denboratzat hartuko, eta horren truke ez da inolako konpentsaziorik ordainduko. Lantokiaren inguruan egiten diren otorduak, lanaldiari jarraipena emateko beharrezkoak direnak, enpresaren kargura izanen dira, zeinak jatetxeari ordainduko baitizkio.

20. artikulua. Laneko arropa.

Nafarroako eraikuntza sektorearen hitzarmen kolektiboan ezarritakoari jarraikiz jokatuko da.

21. artikulua. Lanaldia.

Urteko lanaldia 1.728 ordukoa izanen da, benetan egindako lanordutan kontatuta, deusetan galarazi gabe atal honetan Nafarroako Foru Komunitateko hitzarmen kolektiboaren ondorioz egin litezkeen aldaketak.

Lan denbora kontatzeko, langileak, hala eguneroko lanaldiaren hasieran nola bukaeran, lanpostuan egon behar du.

Urteko orduak astelehenetik ostiralera arte bana daitezke, lanaldi zatitutan. Larunbatak lanaldi gisa hartuko dira, baina, bakar-bakarrik, eguraldi txarra, produkzioaren gorabeherak edo ezinbesteko kasuak direla medio galdutako orduak berreskuratzeko.

Kontuan izanik lantokiak mota askotakoak direla eta haietan eguraldiak duen eragina, urteko gehieneko lanaldia modu aldakorrean antolatzen ahalko da, baina, betiere, egunean bederatzi orduko lanaldia gainditu gabe.

Ordutegi malguari dagokionez, Langileen Estatutuan eta Nafarroako eraikuntza sektorearen hitzarmen kolektiboan ezarritakoari jarraikiko zaio.

22. artikulua. Aparteko orduak.

Nafarroako eraikuntza sektorearen hitzarmen kolektiboan ezarritakoari jarraikiz jokatuko da. Hitzarmen honen 21. artikuluan ezarritako urteko ordu kopurutik gora egiten diren orduak aparteko ordutzat hartuko dira.

Ordu arrunten prezio berean ordainduko dira, eta atseden denborarekin konpentsatzen ahalko dira, edo ordu-poltsa batean pilatu, eguraldiagatik edo bestelako inguruabarrengatik galtzen diren orduak konpentsatzeko.

Aurreko paragrafoan ezarritako konpentsazioa egiten bada, konpentsatutako aparteko ordu horiek ez dira zenbatuko haientzat ezarrita dauden mugen ondorioetarako.

Lan egiten den obrara joateko joan-etorrietan erabiltzen den denbora ez da inola ere lan denboratzat hartuko.

23. artikulua. Oporrak.

Nafarroako eraikuntza sektorearen hitzarmen kolektiboan ezarritakoari jarraikiz jokatuko da.

24. artikulua. Eguraldi txarra.

Lanaldia hastea ezinezkoa denean, lanaldi oso-osoa errekuperatuko da.

Eguraldia dela eta, lanaldia hasi ondoren lana utzi behar baldin bada, galdutako denboraren %70 errekuperatuko da.

25. artikulua. Baimenak eta lizentziak.

Nafarroako eraikuntza sektorearen hitzarmen kolektiboaren 31. artikuluan ezarritakoari jarraikiz jokatuko da.

26. artikulua. Seme-alabak edo ahaideak zaintzeko eszedentzia.

Nafarroako eraikuntza sektorearen hitzarmen kolektiboaren 32. artikuluan ezarritakoari jarraikiz jokatuko da.

27. artikulua. Erantzukizun zibileko aseguruaren poliza.

Nafarroako eraikuntza sektorearen hitzarmen kolektiboaren 35. eta 36. artikuluetan ezarritakoari jarraikiz jokatuko da.

28. artikulua.

1.–Aldi baterako ezintasuna.

a) Eritasun arruntaren ondoriozko aldi baterako ezintasun kasuan, enpresak oinarrizko soldataren, hitzarmenaren osagarriaren eta kalte-ordain kontzeptua den soldataz kanpoko plusaren honako portzentaje hauek ordainduko ditu.

Hona hemen portzentajeak:

a.–%75, bajako 1. egunetik 14.era bitarte, biak barne.

b.–%85, bajako 15. egunetik 29.era bitarte, biak barne.

c.–%100, bajako 30. egunetik aitzina.

Azken portzentajea, 30. egunetik aitzinako %100ekoa, ez da ordainduko gertaeraren aurreko hilabetean enpresan izandako abstentzioa %5etik gorakoa izan bada. Enpresa behartua dago absentismo datu horiek langileari edo haren ordezkari sindikalei ematera. Enpresak hori betetzen ez badu %100 ordainduko du.

b) Lan istripuaren ondoriozko aldi baterako ezintasun kasuetan –horrelakotzat joko da hezur-haustura, muskulu-lesioa eta objetiboki zehazteko moduko lesioak sortutako bestelako istripuak– eta eritasun profesionalaren ondoriozko aldi baterako ezintasun kasuetan –silikosia eta dermatosia edo beste edozein gaitz, Lan Osasunaren Institutuak edo antzeko beste erakunde batek aitortua–, enpresek Gizarte Segurantzaren prestazioak osatuko dituzte, eranskineko taulan ageri diren oinarrizko soldata eta hitzarmenaren osagarria izeneko kontzeptuetarako jasotako zenbatekoen %100eraino.

Prestazio osagarri horiek ordainduko dira langileak enpresarekin lan harremanak dituen bitartean; beraz, lan harremana amaitzearekin batera amaituko da prestazio osagarriak kobratzeko eskubidea ere, langilea lan istripuaren edo eritasunaren ondoriozko aldi baterako ezintasun egoeran bada ere.

Aldi baterako ezintasunean diren langileek eranskineko taulan zehaztutako aparteko eskersariak kobratuko dituzte.

Osagarri horretarako eskubidea izateko alta, baja eta berrespen parteak behar den garaian eta moduan aurkeztu beharko dira, indarreko legeriaren arabera.

Hitzarmen hau sinatzen duten alderdiek onartzen dute iruzurrezko absentismoa arazo handia dela eta, hura murrizteko, honako hauek hartu behar direla kontuan: langilea lanpostuan aurkeztea, enpresako medikuntza eta Gizarte Segurantzakoa egokiro antolatzea, laneko segurtasun eta higiene baldintzak eta lan giroa egokitzea eta langileen osasun fisikoa eta mentala behar bezala babestea. Hortaz, absentismoa modu eraginkorragoan murriztu ahal izateko, gogoan edukiko dira LANEk arlo horretan egindako hitzarmenak.

Langileen legezko ordezkariei aholku eskatu beharko zaie, bestalde, erabakiak hartzen direnean lanaren antolaketari buruz eta langilearen osasun fisikoan edo mentalean eragina izan dezaketen lehengaiak erabiltzeari buruz.

Helburu horiek modu egokian betetzeko, sinatzaileek konpromiso hauek hartu dituzte:

1. Enpresa bakoitzean aztertzea absentismorik ba ote dagoen, eta, izanez gero, hura murrizten saiatzea.

2. Bi alderdien iritziz neurriz gainekoak diruditen bajen kontrola Gizarte Segurantzarekin batera kudeatzea. Horretarako, hitzarmena sinatzen duten sindikatuek hitzematen dute, hitzarmena sinatu ondoren hilabeteko epean, enpresa elkarteekin batera behar diren kudeaketak eginen dituztela Osasunaren eta Gizarte Segurantzaren delegatuaren aitzinean iruzurrezko absentismoa saihesteko legeak aurreikusten dituen neurriak ezartzeko (bajako parteak, eriei jarraipena egitea, berrespen parteak).

3. Eritasunaren ondoriozko absentziak, egun bakar batekoak direnean ere, justifikatu beharko dira bajako partearen bidez edo, bestela, kontsultara joan izanaren frogagiriaren bidez, hartan emandako denbora zehaztuta.

Frogagiri horiek aurkeztu ezean, enpresek ez dute denbora horregatik inolako ordainsaririk pagatu beharrik, langileak eskubidea izanda ere.

Lan istripuaren edo eritasunaren ondoriozko bajan dauden langileak behartuak daude enpresari egoki iruditzen zaizkion osasun azterketak egitera, enpresak berak jartzen dizkien osasun langileekin.

Enpresak izendatutako pertsonak, medikuak edo zerbitzuak zehazten badu lanera ez agertzeko justifikatutako eritasuna ez dela aski arrazoi, enpresari jakinaraziko dio eta, hala, enpresak artikulu honetan biltzen diren osagarriak kentzen ahalko dizkio langileari.

Langilearen duintasuna errespetatuko da beti, eta ateratako ondorioak enpresa batzordeari edo langileen delegatuei jakinaraziko zaizkie.

4. Bajan dauden langileek berrespen partea nahitaez aurkeztu beharko dute, legez ezarritako epean.

5. Hitzarmena sinatzen duten alderdien iritziz, bajak iruzurrezkoak direla frogatzea aski arrazoi izanen da diziplinazko zehapenak aplikatzeko.

2.–Osasun azterketak.

Osasun azterketei dagokienez, Nafarroako eraikuntza sektorearen hitzarmen kolektiboaren 37. artikuluan ezarritakoari jarraikiz jokatuko da.

29. artikulua. Erretiroa.

Nafarroako eraikuntza sektorearen hitzarmen kolektiboaren 39. artikuluan ezarritakoari jarraikiz jokatuko da.

30. artikulua. Sarrera-data enpresan.

Enpresak behartuak daude nominan jartzera langileak zein egunetan sartu diren enpresan.

31. artikulua. Lanpostua uztea eta finikitoak.

Nafarroako eraikuntza sektorearen hitzarmen kolektiboaren 39. artikuluan ezarritakoari jarraikiz jokatuko da.

32. artikulua. Laneko segurtasun eta higienearen organoak.

Laneko Arriskuen Prebentzioari buruzko azaroaren 8ko 31/1995 Legea eta hura garatzen duten arauak dira aplikatu beharrekoak, baita eraikuntzaren sektorearen V. hitzarmen orokorraren bigarren liburukoak eta Nafarroako eraikuntza sektorearen hitzarmen kolektiboaren 45. artikulukoak ere.

33. artikulua. Langileen ordezkariak.

Nafarroako eraikuntza sektorearen hitzarmen kolektiboaren 46. artikuluan ezarritakoa aplikatuko da.

34. artikulua. Lanbide prestakuntza.

Nafarroako eraikuntza sektorearen hitzarmen kolektiboaren 47. eta 48. artikuluetan ezarritakoa aplikatuko da.

35. artikulua. Lanbide kategoriak eta horietako bakoitzari dagozkion ordainsari-mailak eranskineko 1. taulan agertzen direnak izanen dira, baita Nafarroako eraikuntza sektorearen hitzarmen kolektiboan eta eraikuntza sektorearen hitzarmen orokorrean jasotako arauak ere.

36. artikulua. Nafarroako Lan Gatazkak Konpontzeko Auzitegiaren mende jartzea.

Nafarroako eraikuntza sektorearen hitzarmen kolektiboaren 46. artikuluan ezarritakoa aplikatuko da.

37. artikulua. Taulak.

Hitzarmen honetan biltzen diren lansarien taulak, testuak eta errendimendu taulak hitzarmenaren zati dira, eta behartzeko indarra dute.

38. artikulua. Batzorde Paritarioa.

1.–Batzorde Paritario bat eratzen da hitzarmen honetan, sinatzaileek osatua. 2. atalean zehazten diren eginkizunak izanen ditu.

Batzorde Paritarioa hitzarmen honen funtzionamendu egokirako behar den guztietan bilduko da.

Bilkuraren deialdia idatziz egin beharko da, hiru egun baliodun lehenago, eta gai-zerrenda izanen du nahitaez.

2.–Batzorde Paritarioak eginkizun hauek beteko ditu:

a) Hitzarmena betetzen den zaintzea eta haren segimendua egitea.

b) Hitzarmen honen agindu guztiak aplikatzean eta interpretatzean sortzen diren gaiak ebaztea eta ezagutzea.

c) Alderdietako batek eskaturik, hitzarmena aplikatzearen ondorioz sor daitezkeen auzi edo arazo kolektiboetan bitarteko lana egitea eta/edo konponbidea bilatzen saiatzea, eta, alderdiek eskatuz gero, arbitraje lana egitea.

d) Bide administratibora eta jurisdikzionalera jo aurretik, nahitaez, hitzarmen hau aplikatzean eta interpretatzean hitzarmen kolektiboen inguruan sortzen diren planteamenduetan aginpidea izatea, artikulu honen 3. idatz-zatian aurreikusi bezala.

e) Hitzarmen honek eraginkortasun praktiko handiagoa izatea xede duen beste edozein eginkizun, edo testuan eta haren parte diren eranskinetan xedatutakotik eratortzen dena.

3.–Hitzarmen hau sinatzen duten alderdiek nahiz langileen eremuko 1. artikulukoek konpromisoa hartzen dute Batzorde Paritarioari jakinarazteko haren interpretazio eta aplikazioaren ondorioz sor daitezkeen zalantza, eztabaida eta auzi kolektibo guztiak, betiere aurreko atalean ezarritakoaren arabera bere eskumenekoak badira, haren bitartekotzaren bidez arazoa konpon dadin edo, ezin bada, horren gaineko ebazpena edo txostena eman dezan.

4.–Batzorde Paritarioari planteatzen zaizkion gaiak idatziz aurkeztuko dira, behar adinako informazioarekin, arazoa behar bezala ezagutuz aztertu ahal izan dezan. Gutxienez, honako informazio hau jakinaraziko zaio nahitaez:

a) Gaiaren azalpen labur eta zehatza.

b) Proposamen egilearen iritziz bere alde dituen arrazoi eta oinarriak.

c) Batzordeari egiten zaion proposamen edo eskakizun zehatza.

Kontsultaren idazkiarekin batera, arazoa hobeki ulertu eta konpontzeko beharrezkotzat jotzen diren agiri guztiak aurkeztuko dira.

5.–Batzordeak informazio edo agir i gehiago eskatzen ahalko ditu aferaren gaineko informazio hobea edo osatuagoa lortzeko asmoz. Horretarako, proposatzaileari gehienez 5 egun balioduneko epea emanen zaio.

6.–Batzorde Paritarioak, kontsultaren idazkia jaso ondoren edo, hala badagokio, beharrezko informazioa osatu ondoren, gehienez 20 egun balioduneko epea izanen du, akordioa erdietsiz gero, gaia behar den ebazpenaren bidez ebazteko.

Akordiorik egon ezean, Batzordeko kideek txosten bat eginen dute. Bertan, nork bere jarrera, eta, horrenbestez, desadostasuna argudiatzeko adierazi dituen irizpenak bilduko dira.

Azkeneko kasu horretan, Batzordeak hurrengo zenbakian zehazten den bezala jokatuko du.

7.–Batzorde Paritarioaren eskumeneko gaiak izanik, artikulu honen 2. ataleko e) letran edo, kasua bada,10. artikuluan biltzen diren gaietatik kanpo planteatzen zaizkion aferen inguruan akordiorik lortu ezean, desadostasunak gatazkak auzibidetik kanpo konpontzeko sistemetara igorriko dira, Lan Gatazken Konponbide Autonomoaren gaineko V. Akordioa onartuz (otsailaren 23ko Estatuko Aldizkari Ofizialean argitaratua, Enpleguko Zuzendaritza Nagusiak 2012ko otsailaren 10ean emandako ebazpenaren bidez), hori guztia hitzarmen honen 10. artikuluan xedatuarekin bat, edo, hala badagokio, gatazkak auzibidetik kanpo konpontzeko sistemei men eginez, Langileen Estatutuaren 83. artikuluan aurreikusitako lanbidearteko akordioen bidez.

8.–Enpresaren barruko malgutasuna sustatzen laguntzeko neurriei dagokienez, lanaldiaren banaketa irregularra ezarriz gero, Langileen Estatutuaren 34.2 artikuluan araututakoa izanen da.

Mugigarritasun funtzionalerako prozedurak, denboraldiak eta erreferentzialdiak eraikuntza sektorearen V. hitzarmen orokorraren IX. kapituluan daude arauturik, Mugigarritasun funtzionala izenekoan, 75. artikulutik 79.era bitarte.

39. artikulua. Aukera-berdintasuna eta bereizkeriarik eza.

Nafarroako eraikuntza sektorearen hitzarmen kolektiboan arlo horren gainean ezarritakoa aplikatuko da.

Iragarkiaren kodea: F1605868