Iragarkia

115. ALDIZKARIA - 2016ko ekainaren 15a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

27C/2016 EBAZPENA, maiatzaren 4koa, Politika Ekonomiko eta Enpresarialaren eta Lanaren zuzendari nagusiak emana, Azagrako Navser SL enpresaren hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.

Ikusirik Azagrako Navser SL enpresaren hitzarmen kolektiboaren testua (kode zenbakia: 31008432012005), Erregistro honetan sartu zena 2016ko martxoaren 9an eta enpresaren eta sindikatuen ordezkariek 2016ko otsailaren 29an izenpetu eta 2016ko apirilaren 18an zuzendu zutena. Langileen Estatutuari buruzko Legearen testu bategina onetsi zuen urriaren 23ko 2/2015 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen eta Akordioen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Nafarroako Aldizkari Ofizialean argitaratzeko agintzea, orok jakin dezan.

Iruñean, 2016ko maiatzaren 4an.–Politika Ekonomiko eta Enpresarialaren eta Lanaren zuzendari nagusia, Izaskun Goñi Razquin.

NAVSER SLren HITZARMEN KOLEKTIBOA 2015-2017 aldirako

I. KAPITULUA

Xedapen orokorrak

1. artikulua. Lurralde eremua.

Navser SLko Zuzendaritzak, enpresaren aldetik, eta enpresako langileen ordezkariek, langileen aldetik, adostu dute hitzarmen hau, eta Navser SLk Azagran duen lantokian aplikatuko da.

2. artikulua. Eremu funtzionala.

Hitzarmen hau aplikagarri izanen da aipatutako enpresako departamentu guztiei atxikitako langileentzat. Enpresak zerbitzu osagarriak egiten dizkie beste enpresa batzuei, batik bat elikaduraren sektorean.

3. artikulua. Langile eremua.

Azagrako Navser SL enpresako lurralde eremuko eta eremu funtzionaleko langile guztiei aplikatuko zaie, Langileen Estatutuaren 2. artikuluan edo beste xedapen orokorretan aipatzen diren lan harreman bereziak dituztenei izan ezik.

4. artikulua. Indarraldia.

Hitzarmen honek indarra izanen du 2015eko urtarrilaren 1etik 2017ko abenduaren 31 bitarte.

Langileen Estatutuaren 85. artikuluan ezarritako ondorioetarako, bi alderdietako edozeinek hitzarmen kolektibo hau espresuki salatzen ahalko du 2017ko uztailaren 1etik 2017ko urriaren 31ra. Hitzarmena salatzen ez bada, urteka luzatuko da.

Langileen Estatutuaren 86.3 artikuluko azken paragrafoak aipatzen duen epea hiru urtekoa izanen da, urte batekoa izan beharrean.

5. artikulua. Ondorioak.

Hitzarmen honetan itundutako baldintzek multzo zatiezina osatzen dute; beraz, ez dago arauetako bat edo batzuk aplikatzerik gainerakoak ahantzirik. Ezarritako baldintzek konpentsatu eta irentsiko dituzte hitzarmen honek indarra hartzean lehendik zeuden beste baldintza guztiak. Hau baino lehenagokoak diren hitzarmen kolektiboek ez dute batere eraginkortasunik.

Hitzarmena Langileen Estatutuan ezarritakoaren arabera alda daiteke. 2018ko abenduaren 31ra bitartean, hitzarmenean soldatei buruz ezarritakoa ez aplikatzeko, Zuzendaritzaren eta Enpresa Batzordearen hitzarmena beharko da.

II. KAPITULUA

Lanaren antolaketa

6. artikulua. Lanaren antolaketa.

Lanaren antolaketa tekniko eta praktikoa enpresaren Zuzendaritzari dagokio, arlo horretako legezko xedapenen arabera.

Lanaren arrazionalizazio, mekanizazio eta zuzendaritza sistemek ezin izanen diote kalte egin langileen lanbide prestakuntzari; izan ere, langileek eguneko lanaren bidez prestakuntza hori osatu eta hobetzeko eskubidea eta betebeharra dute.

Gai horietan, garrantziaren arabera, enpresako Zuzendaritzak langileen ordezkarien iritzia entzunen du.

7. artikulua. Langileen sailkapena. Xedapen Orokorra.

Ageri diren lanbide kategoriak adierazpen mailan daude soilik, eta ez du esan nahi kategoria horiek guztiek beterik egon behar dutenik enpresaren beharrek eta bolumenak eskatzen ez badute.

Langile guztiak behartuta daude nagusiek agintzen dizkieten lan guztiak egitera, beren lanbide kategoriari dagozkion eskumenen barnean, eta Langileen Estatutuan aurreikusitakoa galarazi gabe.

–Kategoriaren diferentzia ordaintzea:

Langile bat prestatzen denean maila handiagoko lanpostu batean aritzeko, kategoriaren diferentzia ez du kobratuko harik eta 40 prestaketa egun pasatu arte. Egun horretatik aurrera kobratuko du kategoriaren diferentzia.

Kategoria handiagoko lanpostu batean ordezkapen bat egiten duenak, horretarako behar bezala prestaturik baldin badago, kategoriaren diferentzia kobratuko du lanpostu horretan aritzen den denbora guztian.

–Kategoriak finkatzea:

Lanpostu sortu berrietan eta lanpostu hutsetan (lana behin betiko uztea eta igoerak), zer lanpostutan aritzen den, haren lanbide kategoria handiagoa eskuratuko da lanpostu horretan eraginkortasunez 6 hilabetean aritu ondoren. Prestakuntza bukatzen denetik aurrera kontatuko dira 6 hilabeteok.

Ordezkapena egiten denean, kategoria ez da finkatuko, zenbat denbora irauten duen kontuan hartu gabe. Ordezkapena bukatu ondoren, langilea aurreko lanpostura itzuliko da, eta utziko dio kategoriaren diferentzia kobratzeari.

–Beheragoko mailako lanak:

Produkzio jardueraren behar larriak eta aurreikusi ezin direnak direla eta, langile bati bere kategoria baino beheragokoaren zereginak esleitzen bazaizkio, beharrezkoa den denboran baino ez ditu eginen, eta mantendu eginen dira bere lanbide kategoriari dagozkion ordainsaria eta hortik heldu diren bestelako eskubideak. Gainera langilearen legezko ordezkariei jakinarazi beharko zaie.

III. KAPITULUA

Kategorien definizioa

8. artikulua. Kategorien definizioa.

–Ataleko arduraduna:

Arloko arduradunaren agindupean eta haren ikuskapen zuzenarekin, horrek ezarritako eta zehaztutako jarraibideei heldu behar diena. Haiek martxan jartzen direla zuzenean kontrolatzen du eta horretan buru da.

Bere menpeko langileak zuzenean zuzendu eta kontrolatzen ditu, nagusi hurrenak markatutako jarraibideei helduta.

Bere menpeko langileek prozesu, arau eta lan jarraibide guztiak betetzea du ardura.

–Txandako arduraduna:

Enpresaren funtzionamenduko edozein jarduera egiten du, gehienetan makinak eta instalazioak maneiatzearekin erlazionatuta. Horretarako, berariazko kualifikazio teknikoa eta trebetasuna beharko ditu hori gauzatzeko. Langile talde baten buru da, egin beharreko atazak markatzen dizkie, kontrolatzen du egiten dituztela eta trebatzen ditu beharrezko teknika eskuratzeko. Nagusi baten menpean dago zuzenean, eta horrek helburuak markatzen dizkio, kontrolatzen du betetzen direla eta beharrezko prestakuntza ematen du.

–2. mailako ofiziala:

Enpresaren funtzionamenduko edozein jarduera egiten du, gehienetan makinak eta instalazioak maneiatzearekin erlazionatuta. Horretarako, berariazko kualifikazio teknikoa eta trebetasuna beharko ditu hori gauzatzeko, 1. mailako ofiziala dituen prestakuntza maila eta esperientzia erdietsi gabe. Oro har, jarduera horiek egiteko beharrezko prestakuntza berariazkoa da lanpostu horretarako eta barreneko izaera dauka. Nagusi baten menpean dago zuzenean, eta horrek helburuak markatzen dizkio, kontrolatzen du betetzen direla eta beharrezko prestakuntza ematen du.

–Laguntzailea / Administrari laguntzailea:

• Laguntzailea:

Aldez aurreko prestakuntza eta trebetasuna beharrezko ez duen edozein jarduera egiten du enpresaren funtzionamenduaren barruan.

Jarduera horiek egiteko beharrezko prestakuntza berariazkoa da lanpostu horretarako eta barreneko izaera dauka.

Nagusi baten menpean dago zuzenean, eta horrek egitekoak markatzen dizkio, kontrolatzen du betetzen direla eta beharrezko prestakuntza ematen du.

• Administrari laguntzailea:

Langile horrek, ekimenik izan gabe, administrazioko oinarrizko eragiketak egiten ditu, batik bat horiei dagozkien lan mekanikoak.

–Langilegaia:

18 urtetik gorako langilea, enpresan sartua eta lanpostuari buruzko prestakuntza barrenekoa eta berariazkoa jasotzen duena 2 hilabetean gehienez ere; une horretatik aurrera, laguntzailearen kategoria hartuko du.

Nagusi baten menpean dago zuzenean, eta horrek egitekoak markatzen dizkio, kontrolatzen du betetzen direla eta beharrezko prestakuntza ematen du.

Hitzarmen honetan aurreikusitako sistemari jarraikiz aldizkako langile finkoa izatera pasatzen den izangaiak soldataren diferentzia berreskuratuko du laguntzailearen aldean. Soldataren diferentzia hori zati berdinetan ordainduko da, aldizkako langile finkoaren lehenengo sei nominetan banatuta.

IV. KAPITULUA

Lanean hastea eta lana uztea

9. artikulua. Lanean hastea.

Lan kontratuak berarekin dakar probaldi bat gainditu beharra, sei hilabetekoa gehienez teknikari tituludunentzat eta hirukoa gehienez gainerako langileentzat, kualifikazio gabekoentzat izan ezik, 30 lanegunekoa izanen baitute gehienez.

Gehienez sei hilabeterako hitzartutako iraupen zehatzeko aldi baterako kontratuetan, Langileen Estatutuen 15. artikuluan jasotakoetan, probaldia hiru hilabetekoa izanen da gehienez, salbu eta kualifikazio gabeko langileak badira, kasu horretan ezin baita hilabetetik gorakoa izan.

Probaldia zenbatekoa izanen den idatziz agerraraziko da eta eten eginen da lanerako ezintasun iragankorreko kasuetan, amatasun bajan, haurdunaldia arriskua dagoenean, umeen adopzioan edo harreran eta egoera horiek dirauten denboran.

Probaldian, langileak bere lanbide kategoriari eta lanpostuari dagozkion eskubide eta betebeharrak izanen ditu, plantillakoa balitz bezala eta kontratazio motaren arabera, lan harremana suntsitzearen ondoriozkoak izan ezik (aldeetako edozeinen eskariz suntsi daiteke lan harremana).

Probaldia bukatutakoan, atzera egin ez bada, kontratua zein modalitatetan itundu den hari dagozkion ondorioak sortuko ditu, eta enpresan lanean aritutako denbora kontatuko da antzinatasunerako.

10. artikulua. Lanpostutik kentzea.

Enpresa uzten duten langileei, dagozkien ordainsari guztien likidazioa emanen zaie, zehatz azalduta, argi ikus dezaten kontzeptuak zer diren eta zenbatekoa zein den. Interesdunak langileen ordezkari baten edo delegatu sindikal baten presentzia eskatu ahal izanen du.

Beren borondatez enpresatik alde egin nahi duten langileak behartuak daude enpresari jakinaraztera, aurreabisurako epe hauek betez:

–Teknikariak eta administrariak: 30 egun natural.

–Menpekoak edo beharginak: 15 egun natural.

Langileak, aurrez abisatzen ez badu, ezin izanen du lana uzteagatik edo dimititzeagatik dagokion likidazioa jaso, harik eta enpresak langile guztiei hurrengo ordainsaria ematen dien arte.

V. KAPITULUA

Aldizkako langile finkoak

11. artikulua. Aldizkako langile finkoak.

a) Definizioa eta edukia.

Aldizkako lan kontratu finkoa, enpresa honetan izaera propioa duena, egun zehatzetan errepikatu gabe enpresan ohiko jardueran aldizkako lan finkoetan aritzeko enpresaren jarduera arruntaren barruan deitzen den langileari egiten zaiona da, urteko lanegun guztietan zerbitzuan aritzerik ez badago ere, kontuan izanda ez dela urteko lan egun guztietan zerbitzuan aritu behar.

Kontratu eredu bat da, bateratzen dituena enpresen interesak, bere jarduerak behar duen malgutasuna ezartzen duelako eta jarduera gutxien dagoenetan plantilla murrizteko bidea ematen duelako, eta langileen interesak, kontratu mugagabea delako.

Aldizkako lan finkoaren kontratuan aipamen hauek bilduko dira:

–Kontratuaren izaera.

–Kontratuaren xedeko zerbitzuak zein enpresa jarduera zikliko edo aldizkakotan emanen diren.

–Laneratzeko deia egiteko modua eta hurrenkera, hitzarmen kolektiboan ezarri bezala.

Urteko lanaldiaren gehieneko iraupena eta ordutegia, enpresako hitzarmenean edo egutegian ezarritako baldintzen arabera.

b) Deitzea eta erroldak.

Zer jardueratarako kontratatu zen, huraxe abiatzen den aldiro jasoko du deia aldizkako langile finkoak; deialdia ezari-ezarian eginen da, egin beharreko lanaren tamainak une bakoitzean dituen premien arabera.

Antzinatasunaren hurrenkerari jarraikiz deituko dira langileak kategoria, lanpostu eta atal bakoitzean, enpresaren produkzio beharren arabera. Antzinatasunaren alderantzizko hurrenkerari segituz emanen zaio amaiera lan aldiari kategoria, lanpostu eta atal bakoitzean, langileari idatziz jakinarazi ondoren.

Deia hiru egun natural lehenago eginen da. Horretarako, langileak Espainiako helbide bat adierazi beharko dio enpresari.

Aurreko paragrafoan bezala aldez aurretik deitutako langile batek, zehaztutako unean ez bada enpresan hasten, aldizkako langile finkoaren izaera galduko du, eta inguruabar hori borondatezko bajarekin parekatuko da. Halaber, borondatezko bajatzat hartuko da aldi baterako langile bat, hari deitu ondoren, ez bada lanean hasten.

Deia jaso eta lanean ez hasteak ez du ekarriko antzinatasun erroldan langileak duen hurrenkera galtzea, honako egoera hauetan dagoenean: aldi baterako ezintasuna, haurra izan, adoptatu edo familian hartu ondorengo atsedenaldia, eszedentzia, lizentzia edo justifikatutako beste arrazoi batzuk. Ez laneratzeko arrazoi justifikatua behar bezala egiaztatu beharko da. Lanera itzultzean, lan harremana berriz hasiko da.

Deialdia betetzen ez bada, ondoko bi paragrafoetako kasuetan izan ezik, langileak erreklamatzen ahalko du kaleratzeagatiko prozedura jurisdikzio eskudunaren aurrean. Epea hasiko da deialdirik egin ez dela jakin eta egun berean.

Ez da kaleratzetzat joko aldizkako langile finko guztiak hartzeko behar adinako lan kopururik ez izatearen ondorioz deirik ez izatea. Egoera horrek kontratuaren etetearen jarraipena ekarriko du, baldin eta ez badira sartzen egindako erroldaren arabera deien hurrenkeran beherago dauden aldizkako langile finkoak.

Honako hauek kontratua eteteko arrazoi izanen dira, eta, horren ondorioz, lan egiteko eta lana pagatzeko elkarrekiko betebeharretik askatuko dira, eta, kasu horietan, lanerako deitua ez izatea ez da kaleratzetzat hartuko: gorabehera atmosferikoak, banaketarako garraioak edo baliabideak gelditzea, indar eragilea etetea edo lehengairik ez izatea, enpresari egozten ahal ez zaion arrazoiren batengatik. Holakoetan, enpresek gertaera eragilearen berri emanen diete langileen ordezkariei, eta hori nahikoa izanen da prozesua aurrera eramateko.

c) Beste gai batzuk.

Enpresak egiazki lan egindako egunen egiaztagiria emanen dio langile bakoitzari edo lege-ordezkariei, zerbitzuak emateko aldiaren bukaeran.

Ondorio guztietarako, aldizkako langile finko bat amatasun bajan dagoenean, zerrendako hurrengo langileak ordeztuko du bere lanpostuan. Edozein ziurtagiri administratiborako beharrezkoa delarik behar den kontratua egitea, alderdien artean eginen da hura.

Enpresako lan bizitzan altan 365 egun naturaletik gora dauzkaten behin-behineko langileak berriro aldizkako langile finko gisa kontratatu daitezke soilik, salbu eta, lan egiteko deitu ondoren, ez badira lanean hasten.

Aurrekoa ezertan galarazi gabe, enpresak une bakoitzean indarrean dauden kontratu motak erabiltzen ahalko ditu, arautzen dituen kausalitate printzipioarekin bat.

VI. KAPITULUA

Ordainsariak

12. artikulua. Oinarrizko soldatak.

2015ean %0,25 ordainduko da. Ez da taulan finkatuko. 2014ko hitzarmeneko taularen oinarrizko soldataren gainean baino ez du eraginik izanen.

2015eko igoera %0,25ekoa izanen da, 2016koa, %0,75ekoa, eta 2017koa, %1,00ekoa. Hitzarmeneko oinarrizko soldataren, aparteko orduaren eta gaueko lanaren gainean izanen du eragina. Soldataren taulan finkatuko da.

Hitzarmenaren indarraldiko urteetan zehaztutako igoerekin, oinarrizko soldatak izanen dira kasuan kasuko eranskineko behin betiko tauletan jasotzen direnak.

Espainiako 2015etik 2017ra bitarteko KPIen batuketa, negatiboak badira ere aintzat hartuta, %2,00tik gorakoa bada, %0,50eko gehieneko mugara arteko soberakina 2018aren hasierako soldata taulari erantsiko zaio. 2018ko balizko igoera hori urte horretarako negozaitzen denetik aparte egonen da.

13. artikulua. Aparteko pagak. Fideltasun paga.

A) Biltegia.

A1) Langile orok eskubidea izanen du aparteko bi paga jasotzeko. Haietako bakoitzaren zenbatekoa soldataren 30 egunekoa izanen da (oinarrizko soldata).

Hilabeteka hainbanatuta ordainduko dira.

Hilabetean zehar enpresan lanean hasi edo lana uzten duen langileari aparteko paga emanen zaio, dagokion zati proportzionalaren arabera.

A2) Hitzarmen honek ukitutako langileek fideltasun paga jasoko dute. Paga horren zenbatekoa izanen da soldataren 30 egunekoa (oinarrizko soldata).

Paga hori hainbanaturik kobratuko da, urteko hamabi hilabeteetan. Urtean zehar lanean hasi edo lana uzten bada, fideltasun paga benetan lan egindako denboraren zati proportzionalean kobratuko da.

B) Garbiketa.

Atal horretako langileek aparteko pagak eta fideltasun pagak kobratuko dituzte orduko soldata osoan.

14. artikulua. Hotzaren plusa.

Navserrek zerbitzuak egiten dizkion enpresa batean lan egiten denean, bidezko denean hotzaren plusa kobratuko da, enpresa horren hitzarmenaren arabera.

15. artikulua. Gaueko lanaren plusa.

22:00etatik 06:00etara bitarte lan egiten dutenek gaueko lanaren plusa jasoko dute. Haren zenbatekoa soldaten tauletan zehazten da. Ondorio horietarako, ez dira kontatuko lan egutegiaren arabera errekuperatu beharreko orduen zatikiak.

Plus horretatik kanpo daude gaueko lanetarako espresuki kontratatzen diren langileak.

16. artikulua. Aparteko orduaren kontzeptua.

Aparteko lanorduak dira enpresako egutegian (adiera nagusian hartuta) ezarritako lanalditik kanpo edo horren gainetik egiten direnak, eta atal batzuek, ohituragatik, lanaren antolaketagatik edo akordio batengatik, dituzten edo izaten ahal dituzten ordutegi bereziak.

Aparteko orduak nahitaez egin beharko dira ezbeharrak edo bestelako kalte apartekoak edo presakoak konpontzeko edo prebenitzeko.

17. artikulua. Aparteko orduen prezioa.

Aparteko orduen prezioa soldaten tauletan zehazten da.

18. artikulua. Soldataren ordainketa.

Soldatak banku transferentziaren bidez ordainduko dira, ordaindu beharreko hilabetea amaitu eta hurrengoaren lehen bost egun baliodunen barnean.

Nominak prestatu ahal izateko, aparteko orduak aurretiaz itxiko dira, gehienez ere hamabi egun lehenago eta sartu ez diren egunak hurrengo hilabetean gehituko dira.

VII. KAPITULUA

Lanaldia, atsedenaldiak eta oporrak

19. artikulua. Egutegia eta ordutegiak.

Lan egutegian jasoko dira enpresaren zerbitzuan lan egiteko era guztiak. Bertan zehaztuko da zein den lan egiteko denboraren hasiera eta bukaera, eta iragarki oholean egonen da ikusgai.

Abenduaren 24an eta 31n ez da lanik eginen produkzioan. Produkzioa urtarrilaren 5ean geldi daitekeen edo ez baloratuko du Zuzendaritzak.

20. artikulua. Lanaldia.

Navser SLko langileen lanaldia 1.768 ordukoa izanen da 2015ean, 2016an eta 2017an.

Lanaldi jarraituko txandetan 15 minutuko atsedenaldia ezartzen da lan egiten den egun bakoitzeko. Lan egutegiarekin bat, prozesuko betebeharren arabera finkatuko da atsedenaldiaren ordua. Atsedenaldi hori benetan lan egindako denboratzat hartuko da.

Urtero, enpresak egutegian zehaztuko ditu ordu gehiagoko lanaldiagatik edo lanaldiaren erregularizazioagatik diren atsedenaldiko egunen %40. Gainerako %60 langile finkoek hautatuko dute libreki (atsedenaldia, norberak hartzeko egunak, etab.). “Oporren muga” izeneko taula errespetatu beharko da, produkzioan arazorik ez izateko.

21. artikulua. Asteko atsedena.

A) Biltegia.

Asteko lanaldia 40 ordukoa izanen da. Normalean, astelehenetik ostiralera banatuko dira, eguneroko eta asteroko atsedenaldia errespetatuz, aplikatu beharreko araudian xedatuarekin bat.

Arau orokor horretatik kanpo daude:

a) Eten ezin diren lanak.

b) Beharrezkoak diren konponketa eta garbiketa lanak, asteko zereginak ez eteteko; horretarako, behar-beharrezkotzat jotzen dira, bakarrik, larunbatean edo igandean egin ezean, industriaren operazioekin jarraitzea eragozten dutenak edo produkzioa geldiaraztearen ondorioz oztopo eta kalte larririk sortzen dutenak.

Lan horiek, posible balitz, laneko egun eta ordu normaletan eginen dira, hori normaltasunez betetzeak aipatutako ondorioak ekartzen ez dituenean.

c) Zaintza lanak.

d) Ezinbestean egin beharreko lanak behar denean eginen dira.

Arduradunak zehazten duenean eginen da garbiketa.

Langile bakoitzari deitzen ahal zaio larunbatetan nahitaez lan egiteko urtean 5 aldiz gehienez ere. Lanaldi hori ezin izanen da bi ordutik beherakoa izan, ezta zortzi ordutik gorakoa ere. Ordu horiek aparteko orduaren prezioan ordainduko dira, soldaten taularen arabera.

Larunbatetan lan egiten denean, enpresak aurretik abisatu behar du behar den denboraz.

B) Garbiketa.

Asteko lanaldia, atal honetan, jarduerak berezko dituen betebeharren araberakoa izanen da.

22. artikulua. Oporrak.

A) Biltegia.

Langileek eskubidea dute urtean oporraldi ordaindua izateko, 30 egun naturalekoa urteko, oinarrizko soldataren baliokoa. Oporrak urte natural bakoitzean lan egindako denboraren heinean hartuko dira.

Oporretan txandaren arabera gauean lan egin beharko lukeen langileak legokiokeen gaueko lanaren plusaren %50 jasoko du. Oporretan ez da bestelako zenbatekorik kobratuko, paragrafo honetan zehaztutakotik kanpo.

Horren arabera, langile batek oporrak hartu ondoren enpresa uzten badu, azken likidaziotik kendu eginen zaio baja emandako egunetik abenduaren 31ra arteko aldiari dagokion oporren zatia.

Era berean, oporraldia bukatu ondoren enpresan sartzen den langileari aukera emanen zaio enpresan sartzen den egunetik abenduaren 31ra arteko aldiari dagozkion opor egunak hartzeko.

Plantillako langileak oporren egunak bere nahira har ditzake, baina “oporren muga” izeneko taula errespetatu beharko da, produkzioan arazorik ez izateko. “Oporren muga” taula urteko egutegia prestatzean eguneratuko da.

Oporrak hartzeko eskaera urte bakoitzeko otsailaren 28a baino lehenago eginen da. Enpresak oporretarako egunak martxoaren 31n jakinaraziko ditu beranduenez. Egun horiek larunbata edo igandea badira, oporraldia hurrengo astelehenera arte luzatuko da.

Lanpostu bakoitzean, adostasunik ez badago oporrak hartzeko orduan, antzinatasun handiena duen langileak izanen du lehentasuna. Lehentasun horrek urte bat iraunen du, eta hurrengo urtean antzinatasunaren arabera den hurrengoari pasatuko zaio.

Aurretik zehaztutako oporrek bat egiten badute aldi baterako ezintasun profesional batekin, egunak alda daitezke urte naturalaren barruan, baldin eta ukitutako langileak ospitaleratzea edo etxean atsedena hartzea beharrezkoa dela frogatzen duen sendagilearen egiaztagiri bat aurkezten badu.

Zuzendaritzak eskatuta beren borondatez irailaren 8an (jaia Azagran) lan egitera aurkezten diren langileek beren hauturako beste egun batean izanen dute atsedena.

Langileen Estatutuaren 38. artikulua errespetatuko da oporrei dagokienez ABE kasuetan.

B) Garbiketa.

Atal horretako langileek orduko soldata osoan jasoko dute oporren zati proportzionalari dagokion ordainketa.

23. artikulua. Lanaldia luzatzea.

Enpresak, behar izatera, lanaldia luzatzeko agindu dezake; kasu horretan, ordu gehiagoko lanaldia aparteko ordu gisa ordainduko da.

Lanaldi arruntean ez dira inola ere benetako bederatzi lanordu baino gehiago eginen.

VIII. KAPITULUA

Segurtasuna eta higienea

24. artikulua. Segurtasuna eta higienea. Arau orokorra.

Segurtasunaren eta higienearen arloan eta lan-arriskuen prebentzioaren arloan, enpresako Zuzendaritzak zein langileek bete beharko dute indarra duen araudia.

25. artikulua. Laneko arropa.

1.–Enpresak laneko arropa emanen die langileei.

Laneko baldintzak/ezaugarriak kontuan hartuko dira, bai eta legezko betebeharrak ere (segurtasuna/prebentzioa) langileei eman beharreko laneko arropa zehazteko orduan.

Arroparen kalitatea eta ezaugarriak hobetzea saiatuko da beti. Merkatuaren eta horniduraren arrazoiak direla bide, enpresak laneko arroparen marka alda dezake.

2.–Enpresak du arroparen jabetza, eta, hartara, soilik produkzio zentroan erabil daiteke laneko orduetan. Langileari dagokio hura garbitu eta mantentzea.

3.–Arropa ematea.

Arropa banatuko da haren egoeraren arabera.

4.–Laneko arropa.

Erabilitako arropa nahitaez bueltatu beharko da arropa berri bat eskatzen denean.

Kaleratutako langileek arropa itzuli behar dute, eta hala jakinarazi beharko die kasuan kasuko arduradunak.

5.–Arropa eskatzea.

Jantziren bat berritu behar duten langile guztiek eskaera materialaren arduradunei eginen diete. Lan txandaren hasieran edo bukaeran jaso dezakete, arropa jaso dutela frogatzen duen ziurtagiriarekin.

26. artikulua. Osasun azterketak.

Alor horretan, enpresak osasuna zaintzeko kontratatu duen erakundeak xedatzen duena beteko da, legez ezarritakoaren arabera.

Osasun azterketak lanpostu bakoitzaren ezaugarri berezien araberakoak izanen dira.

27. artikulua. Lanpostua aldatzeko eskubidea.

Haurdun dauden emakumeek, medikuaren txostena izanik, eskubidea izanen dute lanpostua aldatzeko haurdun daudela jakiten dutenetik aurrera, laneko tokia arriskutsua baldin bada amarentzat edo umekiarentzat.

28. artikulua. Botika-gela.

Enpresa aldez aurretik instalatutako botika gela edo osasun gela hornitzeaz eta mantentzeaz arduratuko da, segurtasun eta higiene arloan indarra duten xedapenei jarraikiz.

IX. KAPITULUA

Eszedentziak eta lizentziak

29. artikulua. Eszedentziak eta lizentziak.

Langileen Estatutuan ezarritakoari jarraikiz arautuko da arlo hori.

A) Eszedentziak.

Eszedentziak borondatezkoak edo nahitaezkoak izan daitezke.

Borondatezkoa: Enpresan gutxienez urtebeteko antzinatasuna duten langileek eskatzen ahalko dute borondatezko eszedentzia. Eszedentzia lortzeko, baldintza hauek bete beharko dira ezinbestean:

a) Idatzizko eskabidea aurkeztea, arrazoiak azalduta.

b) Langileak konpromiso formala hartzea eszedentziaren denboran ez duela enpresan egiten zuen bezalako jarduerarik eginen. Baldintza hori ez betetzeak lan harremanaren amaiera eta lortutako eskubideen galera ekarriko ditu.

Eszedentzia eskaerak aurkeztu eta hurrengo hamabost egunetan ebatziko dira zerbitzu beharren arabera.

Eszedentzia gutxienez lau hilabetekoa eta gehienez bost urtekoa izanen da.

Eszedentzian dagoen langileak enpresan hutsik dauden eta bere kategoriakoak edo antzekoak diren lanpostuetan sartu ahal izateko lehentasuna du. Horretarako, eszedentzia bukatu aurreko hogeita hamar egun naturaletik hirurogeira bitarteko epean itzultzea eskatu beharko du. Bestela, lan harremanari uko egiten diola ulertuko da.

Nahitaezkoa: lanpostua gordetzeko eta eszedentziaren denbora antzinatasunean kontatzeko eskubidea emanen du, eta ondoko egoeraren batean daudenek eskuratzen ahalko dute:

a) Hautapen prozesu egoki baten bidez kargu publiko bat betetzeko hautatua edo izendatua izatea, estatuan, erkidegoan, eskualdean, probintzian edo udalean, eta eremu orokor guztietarako edo bakoitzerako.

Kargu horietarako Estatuko, autonomia erkidego bateko, eskualdeko, probintziako edo udaleko organo eskudunetan eta Ministroen Kontseiluan onetsitako izendapen ofizial baten bidez hautatua izan bada, eta dagozkion aldizkari ofizialetan edo behar den ebazpen administratiboaren bidez argitaratu bada.

b) Beren estatutuei jarraikiz eskualde barneko edo esparru handiagoko sindikatu eginkizunetan aritzen diren langileek ere eska dezakete eszedentzia enpresan, beren karguak irauten duen denborarako.

Probintzia barreneko edo esparru handiagoko sindikatu eginkizunetan edo ordezkari kargu publikoetan aritzeagatik lanpostua uzten duten langileen kasuan, langileak hogeita hamar egun naturaleko epea izanen du lanean berriz hasteko bere zerbitzua, kargua edo eginkizuna bukatzen duenetik aitzina.

Azaldutako eszedentzia kasu guztietan, eta iraun bitartean, hau da, eszedentziako langilea bere lanpostura itzultzen ez den bitartean, ez du eskubiderik izanen soldatarik jasotzeko, ez eta egoera horretan dagoen denbora ezertarako kontuan hartzeko ere, salbu eta nahitaezko eszedentzietan, antzinatasunerako kontatuko baita.

Eszedentziei dagokienez, hemen aurreikusten ez den orotan, Langileen Estatutuaren 46. artikuluari jarraituko zaio, batik bat seme-alabak eta familiakoak zaintzeko eszedentziei dagokienez.

B) Lizentziak.

Aldez aurretik abisatuta, hitzarmen honen eraginpeko langileek zilegi izanen dute lanera ez joatea soldata jasotzeko eskubidearekin, ondoko arrazoiengatik eta honako epeetan:

a) Hamabost egun natural, ezkontzen denean.

b) Gurasoak, aitona-amonak, bilobak, seme-alabak, ezkontidea edo anai-arrebak hiltzea, odol-ahaideak edo ezkontza-ahaideak izan: 3 lanegun heriotza herritik 100 kilometrotik behera gertatzen bada, eta lau lanegun 100 kilometrora edo urrunago gertatzen bada.

c) Aitona-amonen, gurasoen, seme-alaben, biloben, ezkontidearen edo anai-arreben eritasun larria, odol edo ezkontza bidezko ahaideen kasuan: bi egun naturaleko lizentzia ordaindua. Ospitaleratze kasuetan, eskubide hori 3 lanegunetara zabalduko da gehienez, langileak 50 kilometrotik gorako bidaia egin behar badu, eta 4 lanegunetara langileak 90 kilometrotik gorako bidaia egin behar badu.

d) Egun bat, ohiko bizilekua aldatzeko. Aldaira 50 kilometro baino gehiagora egin behar izanez gero, baimena 2 egunekoa izanen da.

e) Publikoa edo pertsonala den eginbehar saihestezina betetzeko behar-beharrezkoa den denbora. Legez edo hitzarmen bidez ezarritako arau batean denbora jakin bat finkatua badago, hartan absentziaren iraupenari eta horren konpentsazio ekonomikoari buruz xedatuta dagoenari jarraituko zaio.

f) Seme-alaben jaiotza, 3 lanegun.

g) Langileak medikuarengana joan behar badu eritasunagatik, lanaldiaren barnean, enpresak ordainduko ditu arrazoi horrengatik lanean egiten ez diren orduak; urtean gehienez ere 16 ordu izanen dira guztira. Familia medikuarengana joaten den bakoitzean, baimena gehienez 2 ordukoa izanen da, medikua Azagran egonez gero.

h) Urtean 40 ordu bitarte erabiltzen ahalko dira Gizarte Segurantzako edo Osasun Sistema Publikoko mediku espezialista batengana joateko.

i) Kirurgia anbulatorio handietan, ospitaleratzerik ez dagoenean, lanegun bat (operazioaren egun bera), ezkontidearen, gurasoen eta seme-alaben kasuan. Kasu horretan langileen artean ahaide bat baino gehiago badaude, haietako batek bakarrik har dezake lizentzia (bi langilek har dezakete operatuko duten pertsonaren aita eta ama direnean).

C) Norberaren aferak.

Urtean egun bat hartzen ahalko da norberaren aferetarako, baina ez da ordainduko. “Oporren muga” taula errespetatu beharko da, eta behar bezain goiz abisatu.

Erditzearen ondoriozko baimenei dagokienez, Auzitegi Gorenaren egungo jurisprudentzia aplikatuko da. Jurisprudentzia horretan aldaketarik egonez gero, Auzitegi Gorenak dioenari jarraituko zaio.

Artikulu honetan ezarritako lizentzien ondorioetarako, salbu eta ezkontza baimenerako, izatezko bikote egonkorren balioa onartzen da, baldin eta izaera horri dagozkion baldintza legalak betetzen dituztela egiaztatzen badute. Erregistro publikorik ez dagoen lekuetan, bestelako frogak onartuko dira, nahikoak izanez gero. Izatezko bikote egonkortzat hartuko da uztailaren 3ko 6/2000 Foru Legeak edo beste erkidego batzuetako antzeko legeek xedatzen dutena. Bi pertsona elkarrekin bizitze hutsa ez da bikote egonkortzat hartuko, aipatutako araudian zehaztutako baldintzak betetzen ez badira.

Bi alderdiek uste dute lizentzia horien beharrik gabeko erabilera eta abusuak eragotzi behar direla. Izan ere, justifikatutako arrazoiengatik eta ezinbestekoak direnean besterik ez dira erabili behar. Garbiketa atalaren ondorioetarako, han asteko lanaldia hain bitxia izanda, laneguntzat hartuko dira zerbitzuak emateko modukoak diren egunak, benetako jarduerarik ez badago ere.

30. artikulua. Laneko eta familiako eginkizunak batera eramatea.

Nahitaez bete beharreko arau orokorretan xedatutakoari jarraituko zaio.

X. KAPITULUA

Langileen ordezkariak

31. artikulua. Eskubide sindikalak.

Enpresak errespetatu eginen du langile guztiek libreki sindikatzeko duten eskubidea, onartuko du sindikatu batean afiliatuta dauden langileek bilerak egin eta kuotak kobratu ditzaketela lanorduetatik kanpo eta enpresako ohiko jardueran etenik egin gabe sindikatuko informazioa banatu dezaketela; era berean, ezin izanen du ez afiliatzeko edo afiliazioa uzteko baldintza jarri langile batek bere lanpostuari eusteko, edo afiliazioagatik edo sindikatuko jardueragatik beste modu batez kalte egin langileari.

Sindikatuek informazioa bidaltzen ahalko dute enpresara, banatu dadin, betiere lanorduetatik kanpo eta produkzio prozesua eten gabe. Lantokian iragarki ohol bat izanen da, behar bezala ezarritako sindikatuek mezuak jar ditzaten; dena dela, horien kopia enpresako Zuzendaritzari edo zentroko titularrari igorri behar diote lehenik.

32. artikulua. Sindikatuak.

Enpresan titulartasun pertsonalaren bidez ordezkatua izateko eskubidea duela alegatzen duen sindikatuak behar bezala egiaztatu beharko du enpresaren aurrean; horren ondoren, enpresak onartuko du ordezkari sindikalak sindikatua ordezkatzeko ahalmena duela, legezko ondorioetarako.

Sindikatuaren ordezkaritza delegatu sindikal baten esku egonen da, lantokiko langileak 100etik gora direnean eta sindikatu horrek enpresan 25 langile baino gehiago afiliatuta baldin baditu.

Sindikatuko ordezkariak jarduneko langilea izan behar du dagokion enpresan, eta ordezkatzen duen zentral edo sindikatuko estatutuen arabera izendatua. Langileen ordezkari bat izanen da lehentasunez.

33. artikulua. Langileen ordezkarien eginkizunak.

Langileen ordezkariek eta sindikatuko ordezkariek Langileen Estatutuan eta Askatasunari buruzko Lege Organikoan aitortzen zaizkien ahalmenak izanen dituzte.

34. artikulua. Sindikatuko kuota.

Langileen ordezkaritza duten sindikatuetako langile afiliatuek eskaturik, enpresak langileen hileko kuotatik kenduko du dagokien sindikatuko kuotaren zenbatekoa. Eragiketa hori egin diezaiotela nahi duen langileak idazki bat bidaliko dio enpresako Zuzendaritzari, honako hauek argi eta garbi adierazteko: deskontua egiteko agindua, zein sindikatutakoa den, kuotaren zenbatekoa eta diru transferentzia jasoko duen kontu korrontearen edo aurrezki kutxako libretaren zenbakia. Enpresak urtebetez eginen du kenketa, interesdunak besterik adierazten ez badu behintzat. Enpresako Zuzendaritzak transferentziaren kopia emanen dio sindikatuak enpresan duen ordezkaritzari, halakorik baldin bada.

35. artikulua. Ordu metaketa.

Langileen ordezkariek eta sindikatuko ordezkariek hilean ordu kreditua izanen dute, ordainduak eta ondorengo hiletan metatu ezin direnak, indarra duen legediaren arabera.

Hileko ordu ordainduen metaketari dagokionez, langileen ordezkariek bakoitzari dagozkion orduen %100era bitarte laga diezaiokete beren sindikatuko langile bati, ordezkaritza lanetan aritzeko. Lagatzaileak zenbat ordu lagatzeko eskubidea duen, horrenbeste ditu lagatzeko, eta orduak laga baino gutxienez hamar egun lehenago abisatu behar zaio enpresako Zuzendaritzari.

XI. KAPITULUA

Hutsegiteak eta zehapenak

36. artikulua. Hutsegiteak.

Hutsegitetzat hartuko dira indarra duten legezko xedapenetan eta, bereziki, hitzarmen honetan ezarritako betebeharrak urratzea edo ez ezagutzea dakarten ekintzak edo ez-egiteak. Garrantziaren arabera, hutsegiteak honela sailkatu dira: arinak, larriak eta oso larriak.

37. artikulua. Hutsegite arinen sailkapena.

Ondokoak hutsegite arintzat jotzen dira:

1.–Hilabete baten barnean lanera behin, bitan edo hirutan berandu iristea, bidezko arrazoirik gabe.

2.–Lanerako ezintasun iragankorreko baja edo lanera ez agertzearen bidezko arrazoiak (bai eta berrespen eta alta parteak ere) bi egun balioduneko epean ez jakinaraztea, hori egiterik ez dela izan frogatu ezean.

3.–Lanetik denbora gutxirako alde egitea, bidezko arrazoirik gabe.

4.–Norberaren garbitasun edo txukuntasun eza.

5.–Bizilekuz aldatu izanaren berri ez ematea, aldaketa egin eta hamar eguneko epearen barnean.

6.–Hilabete batean egun batez lanera ez agertzea, bidezko arrazoirik gabe.

7.–Noizean behin mozkortuta agertzea.

8.–Lanarekin zerikusirik ez duten inprimaki edo argitalpenak irakurtzea lanorduetan.

9.–Laneko arropa enpresaren instalaziotik kanpo erabiltzea, eta jantziak edo gauzak haiek edukitzeko eta gordetzeko lekuetatik kanpo uztea.

38. artikulua. Hutsegite larrien sailkapena.

1.–Lautik zortzira bitarteko hutsegite lanera berandu iristeagatik, hogeita hamar egun naturaleko epearen barnean.

2.–Hogeita hamar egun naturaleko epean lanera bi egunez ez agertzea, bidezko arrazoirik izan gabe.

3.–Absentzia kasuan aldez aurretik ez abisatzea, salbu ezinezkoa izan bada.

4.–Familian izandako aldaketak, Gizarte Segurantzako prestazioetan ondorioak izan ditzaketenak, behar den garaian ez jakinaraztea.

5.–Lanorduetan edozein motatako denbora pasatan ibiltzea.

6.–Beste langile bat lanera agertu dela simulatzea, haren sinadura, fitxa edo kontrol txartela erabiliz.

7.–Zuhurtziagabetasuna lanean. Langileari berari edo lankideei istripuren bat izateko arriskua ekartzen badie, edo instalazioak edo merkantziak matxuratzeko arriskua edo suak hartzekoa, hutsegite oso larritzat jo daiteke.

8.–Lan orduetan norberaren lanak egitea, bai eta enpresaren tresnak norberarendako erabiltzea ere, lanalditik kanpo izan arren, horretarako baimenik izan gabe.

9.–Langileak ikusitako egintzak, akatsak edo hutsegiteak ezkutatzea, horrek kalte larriak sortzen baditu, eta instalazioetan ikusten den edozein arazo garrantzitsuren berri nagusiei berehala ez ematea.

10.–Enpresako Zuzendaritzaren edo zuzendaritzan edo antolaketan eskumenak dituztenen jarraibideak ez betetzea beren ohiko lan eginkizunetan. Ez betetze horrek kalte nabarmena egiten badio enpresari edo jendeari, hutsegite oso larritzat jo daiteke.

11.–90 egun naturaleko epean 3 hutsegite arin edo gehiago egitea, desberdinak izan arren, aurretik hitzezko kargu-hartzea ez den zehapen bat jarri bazaio.

39. artikulua. Hutsegite oso larrien sailkapena.

Honako hauek hutsegite oso larriak dira:

1.–Lanera behin eta berriro berandu iristea edo ez joatea, bidezko arrazoirik gabe.

a) Lanera zortzi aldiz baino gehiagotan berandu iristea arrazoirik gabe, hogeita hamar egun naturaleko epean, eta hamasei aldiz baino gehiagotan bidezko arrazoirik gabe, ehun eta laurogei egun naturaleko epean.

b) Lanera ez joateagatiko hutsegitea: lanera hiru egunez ez agertzea, arrazoirik eman gabe, hogeita hamar eguneko epean.

2.–Agindutako kudeaketetan iruzur egitea, eta enpresari, lankideei edo beste edozeini ebastea edo lapurtzea, lantoki barnean nahiz lanean beste edozein lekutan aritzean.

3.–Enpresaren lanabes, makineria, aparatu, instalazio, eraikin, altzari edo agiriak desagerrarazi, ezdeus bihurtu edo hondatzea.

4.–Enpresaren edo langileen isilpeko eskutitzen edo agirien sekretua haustea.

5.–Enpresakoa ez den norbaiti nahitaez isilpean eduki beharreko datuak ezagutaraztea.

6.–Nagusiei edo lankideei kolpez edo hitzez erasotzea.

7.–Istripu larriak sorraraztea, zabarkeria edo zuhurtziagabekeria desenkusaezinagatik.

8.–Lankideekin liskarrak eta iskanbilak maiz sortzea, arrazoirik gabe.

9.–Segurtasun eta higieneagatik debekatuta dagoen tokietan erretzea. Debeku hori argi azaldu beharko da halako tokietan, kartelen, banderen edo beste edozein sistema egokiren bidez.

10.–Kontratuko onustea haustea, eta laneko konfiantza-abusua. Kontratuko onustea haustea da, besteak beste, lantokitik irtetean paketeek edo bildutako gauzek barruan zer duten erakutsi nahi ez izatea zeregin horretako langileek eskatzen dutenean, Langileen Estatutuaren 18. artikuluan ezarritako bermeekin beti.

11.–Lanean ohiko edo itundutako errendimendua luzaroan eta nahita gutxitzea.

12.–Segurtasunari buruzko arauak ez betetzea edo enpresak emandako babeserako ekipamendua ez erabiltzea.

13.–Hutsegite larriak behin baino gehiagotan egitea, hots, gertaerako aurreko urtean langileari hirutan edo gehiagotan zehapenak jarri zaizkionean hutsegite larriengatik, nahiz eta izaera diferenteetakoak izan.

40. artikulua. Zehapenak.

Hutsegiteen arabera, zehapen hauek ezarriko dira:

1.–Hutsegite arinengatik:

a) Hitzezko kargu-hartzea.

b) Kargu-hartze idatzia.

c) Egun bateko edo bi eguneko enplegu-soldaten etenaldia.

2.–Hutsegite larriengatik:

a) Hurrengo oporraldiko txanda hautatzeko eskubidea galtzea.

b) Enplegu-soldaten etenaldia, hiru egunetik hamabostera bitarte.

c) Kategoriaz igotzeko gaitasuna kentzea hiru urterako gehienez.

3.–Hutsegite oso larriengatik:

a) Hamasei egunetik hirurogeira bitarteko enplegu-soldaten etenaldia.

b) Kategoriaz igotzeko gaitasuna kentzea bost urterako gehienez.

c) Hurrengo oporraldiko txanda hautatzeko eskubidea galtzea.

d) Lanetik bidaltzea.

41. artikulua. Zehapenak betetzea.

Zehapen guztiak ematen diren unetik beretik hasita betearaziko dira; horrek ez du alde batera uzten zehapena jasotzen duenak jurisdikzio eskudunean erreklamazioak egiteko duen eskubidea. Baina, enpresari egoki iruditzen bazaio, zehapenaren betearazpena atzeratzen ahalko du 6 hilabete gehienez. Langileak zehapena aurkaratuz gero, irmo bilakatu eta hilabete bat atzeratzen ahalko du betearazpena.

42. artikulua. Preskripzioa.

Langileei dagokienez, hutsegite arinak hamar egunen buruan preskribatuko dira, larriak hogei egunen buruan eta oso larriak hirurogeiren buruan, enpresa hutsegiteaz jakitun egindako egunetik aitzina eta, nolanahi ere, hutsegitea egin eta sei hilabeteren buruan.

43. artikulua. Prozedura.

1.–Enpresako Zuzendaritzari edo haren ordezkariari dagokio sariak emateko edo zehapenak ezartzeko ahalmena.

2.–Enpresak langileen legezko ordezkariei eta ordezkari sindikalari, hala denean, jakinaraziko dizkie langileei ezartzen zaizkien zehapenak.

3.–Hutsegiteak arinak direnean ez da espedientea instruitu beharko. Hutsegite larrien edo oso larrien ondoriozko zehapenak ezartzeko ere ez da espedienterik instruitu beharko. Nolanahi ere, horiek idatziz jakinaraziko dira, eta idazkian zehatz azalduko da zer egitatek sortu duen hutsegitea eta nolako zehapena ezarriko den, non ez den hitzezko kargu-hartzea.

Gertaerak argitzearren, enpresak erabakitzen badu zehapenak ezartzeko espedientea irekitzea, interesdunak eskubidea izanen du deskargu orria aurkezteko eta proposatzen dituen eta instruktorearen ustez bidezkoak diren frogak gauzatzeko, eginbideak hasten direnetik hilabeteko epean gehienez.

4.–Hutsegite larri edo oso larri baten ondoriozko zehapena ezartzen zaienean karguetan dauden langileen legezko ordezkariei edo agintaldia bukatu eta urtebetea pasatua ez dutenei, aginduzkoa izanen da espedientea irekitzea, arau hauei jarraikiz:

a) Enpresak espedientea ireki dela jakinaraziko dio langileari eta, horrekin batera, espedientean azaltzen diren gertaerak biltzen dituen kargu-agiriaren berri emanen dio.

b) Enpresak idazkari bat eta insktruktore bat, inpartzialak, izendatuko ditu, eta horien izenak espedientea irekitzeko idazkian berean azalduko dira.

c) Instruktoreak idazki hori interesdunari igorriko dio, alegazioak egin eta bidezkoak iruditzen zaizkion frogak aurkez ditzan bost eguneko epean.

Idazki hori langileen legezko ordezkariei ere igorriko zaie, bidezkoak iruditzen zaizkien alegazioak egin ditzaten bost eguneko epean.

d) Espediente irekitzea bukaturik, enpresak ondokoak jakinaraziko dizkio langileari, idatziz: ezarritako zehapena, zein egunetatik hasita izanen dituen ondorioak, eta zehapenaren oinarri diren gertaerak.

44. artikulua. Enpresaren arau-hausteak.

Abuztuaren 4ko 5/2000 Legegintzako Errege Dekretuan eta indarra duten gainerako legezko xedapenetan ezarritakoa aplikatuko da.

XII. KAPITULUA

Arau erreferentzia

45. artikulua. Arau erreferentzia.

Aurreko artikuluetan berariaz bildu ez den orotan, orokorrean bi aldeek legezko xedapenei jarraituko diete, eta batez ere Langileen Estatutuari, Sindikatu Askatasunaren Lege Organikoari eta aplikatu beharreko gainerako legezko arauei.

I. ERANSKINA

Heriotzaren edo baliaezintasunaren kalte-ordaina.
Kalte ordaina lana dela-eta izandako aldi baterako ezintasunagatik

Navser SL enpresak indarrean mantenduko du aseguru poliza orokor bat hitzarmen honen eraginpeko langileentzat. Indarra izanen du enpresan lan egin eta Gizarte Segurantzan afiliatuta dauden langileentzat. Hona hemen estaldurak:

1. Lanekoa ez den istripuaren ondoriozko heriotza (24 orduko estaldura): eskubidedunek 6.010,12 euro jasoko dituzte.

2. Lan istripuaren ondoriozko heriotza: 21.000,00 euro.

3. Lanekoa ez den istripuaren ondoriozko baliaezintasun iraunkor osoa (24 orduko estaldura): 6.010,12 euro.

4. Lanekoa ez den istripuaren ondoriozko baliaezintasun iraunkor erabatekoa (24 orduko estaldura): 6.010,12 euro.

5. Lanekoa ez den istripuaren ondoriozko baliaezintasun handia (24 orduko estaldura): 6.010,12 euro.

6. Lan istripuaren ondoriozko baliaezintasun iraunkor osoa: 27.000,00 euro.

7. Lan istripuaren ondoriozko baliaezintasun iraunkor erabatekoa: 27.000,00 euro.

8. Lan istripuaren ondoriozko baliaezintasun handia: 27.000,00 euro.

Zenbateko horiek ez dira aldatuko hitzarmenak indarra duen bitartean.

Aldi baterako ezintasuna

Laneko istriputik edo eritasun profesionaletik eratorritako aldi baterako ezintasunaren kasuan, enpresak langilearen ordainsariak osatuko ditu, egiazko soldataren %100 bete arte (oinarrizko soldata), lehendabiziko egunetik eta 18 hilabetera bitarte gehienez ere. Orobat, aparteko pagak eta leialtasun paga osatuko dira.

Ukitutakoak ezin du altan zegoenean baino gehiago kobratu.

II. ERANSKINA

Desadostasunak konpontzea

Alderdien arteko desadostasunak Batzorde Paritariora igorriko dira.

Desadostasuna Batzorde Paritarioan konpontzen ez bada (desadostasun indibiduala izan edo kolektiboa izan), alderdiek men eginen diete Nafarroako Lan Auzitegian adiskidetze eta bitartekotza faseetan gatazkak konpontzeko aurreikusitako prozedurei. Orobat, arbitrajearen irtenbidea har dezakete horretarako adostasuna badago.

Artikulu hau, beraz, alderdien atxikimendu espresua da gatazken konponbiderako organoarekiko, eraginkortasun orokor gisa eta, ondorioz, itunak behartzen ditu enpresariak, ordezkari sindikalak eta langileak epaiketara jo aitzin beren desadostasunak aipatu organoaren bitartekotza eta adiskidetze prozeduretan azaltzera.

III. ERANSKINA

Batzorde Paritarioa

Hitzarmen honetako Batzorde Paritarioa sortuko da. Hitzarmen honetako Negoziazio Batzordeko kideek eta bi aldeen aholkulariek osatuko dute.

1.–Batzorde Paritarioaren eginkizunak:

a) Haren esku jartzen diren gatazka indibidual eta kolektiboetan bitartekari, arbitraje eta adiskidetze-lana egitea.

b) Akordio guztien interpretazio lanak egitea.

c) Akordio guztien jarraipen lanak egitea.

d) Langileen Estatutuak edo beste arau batzuek ezartzen dizkiotenak.

2.–Batzorde Paritarioak denen intereseko arloetan hartzen dituen akordioak oinarrizko hitzarmen honen partetzat joko dira eta horiek ere betebeharrekoak izanen dira. Halako akordioak Lan arloko Agintaritzari igorriko zaizkio, erregistra ditzan.

3.–Batzordea langileen 2 ordezkarik eta enpresako Zuzendaritzaren beste bik osatuko dute, guztiak Navser, S.L.ren hitzarmena negoziatu duen Batzordeko kideak izan direnak.

4.–Funtzionamenduko erregelamendua:

a) Bilkurak–.Batzorde Paritarioa zeregin hauetarako bilduko da:

Aurreko artikuluko 1 a) eta b) letretan aipatutako eginkizunak betetzeko, esku hartzeko eskatzen zaionean.

1 c) eta 1 d) ataletako kasurako, hiru hilean behin.

b) Deialdiak.–Batzorde Paritarioa biltzeko deia alderdi sinatzaileetako edozeinek eginen du, eta horretarako aski izanen da idatzizko komunikazio bat, eguneko gai zerrenda azalduko duena.

Batzorde Paritarioa bilduko da gaiaren garrantziaren arabera komeni den epearen barnean, baina deialdia egin eta hamabost eguneko epean gehienez.

Epe horretan Batzordea biltzen ez bada, Batzorde Paritarioaren esku-hartzea amaitu dela ulertuko da eta interesdunak bidezko iruditzen zaizkion ekintzetara jotzen ahalko du.

Batzordea bildurik, erabakiak hartuko ditu gai zerrendako gaien inguruan, bilkuran bidezko akordioak hartuz. Egokitzat hartzen bada, bilkura bertan behera geldi edo eten daiteke eta hurrengo hiru egun naturaleko epean jarraituko du. Epe horretan gai zerrendako gai guztiak jorratu ez badira eta haien gainean erabakirik hartu ez bada, ulertuko da Batzorde Paritarioaren esku-hartzea agorturik dagoela, eta interesdunak bidezko jotzen dituen ekintzetara jotzen ahalko du.

c) Quoruma. Aholkulariak.–Batzordea eratutzat joko da ordezkaritza bakoitzaren gehiengo soila bertaratzen denean.

Alderdiak bileretara joaten ahal dira bina aholkulari eramanda, gehienez.

d) Akordioen baliozkotasuna.–Batzordeak akordioak adosteko, edonola ere bi ordezkaritzetako bakoitzaren %50aren aldeko botoa beharko da.

Bilera bakoitzaren akta eginen da, eta idazkari lanetan ari direnek eta alderdi bakoitzeko ordezkari batek sinatuko dute.

e) Helbidea.–Batzorde Paritarioak enpresaren lokaletan izanen du jakinarazpen eta deialdietarako helbidea, Azagrako industrialdean.

5.–Batzorde Paritarioaren mende jarri beharra:

Alderdiek Batzorde Paritarioaren mende jarri behar dituzte edozein ekintza judizial edo administratiboren aurretik sortzen diren interes orokorreko gai guztiak, nahiz horrek ez duen galarazten gero eskubide kolektiboak erabili ahal izatea. Nolanahi ere, onustearen printzipioari jarraituz negoziatu beharko da.

IV. ERANSKINA

Langile finko bihurtzea

Plantillako langile finko bihurtuko dira honako hauek:

–2 langile, hitzarmen hau sinatzean.

–2 langile, 2017ko urtarrilaren 1ean.

–2 langile, 2018ko urtarrilaren 1ean.

Antzinatasun ordena zorrotz beteta.

V. ERANSKINA

Aldizkako langile finkoen zerrenda

VI. ERANSKINA

Bestelako hobekuntza batzuk

Bularra emateko baimena metatzen ahal da (ordu bat egunean).

Amatasunaren legezko atsedenaldia bi aste luzatuko da, enpresak ordainduta.

VII. ERANSKINA

Bestelako xedapenak

1. Hurrengo hilabeteetan alderdiek sailkapen profesionala egokituko dute Langileen Estatutuan ezarritakora.

2. 2018ko abenduaren 31ra bitarte, Zuzendaritzak ez du bere kasa aplikatuko Langileen Estatutuaren 34.2 artikuluan aurreikusitako malgutasuna. Enpresa Batzordearekin hitzartu beharko du.

3. Enpresak tarteko jantzi bat emanen du laneko arroparen artean.

4. Langileek, 2016ko otsaileko nominan, 2015ean kobratutako soldataren %0,25eko zenbatekoa jasoko dute, 2014ko soldata taulari jarraituz. Taulako urteko soldatari dagokio langile finkoei eginen zaien ordainketa hori, ez aparteko orduari, plusei edo beste kontzeptu batzuei. Aldizkako langile finkoentzat eta behin-behinekoentzat, berriz, lan egindako denboran orduko soldata osoaren gisa jasota dutenari dagokio, aparteko orduak, plusak edo beste kontzeptu batzuk kontuan hartu gabe. Hemen aurreikusten den ordainketa ez da islatuko edo finkatuko soldata taulan.

VIII. ERANSKINA

Erretiro partziala

2013ko martxoaren 25eko akordioa beteko da.

Enpresak erraztuko du, non ez duen gertaera larri batek galarazten, plantako langile finkoek erretiro partziala hartzea (bulegoetako langileak kanpo uzten dira, beraz), hitzarmen hau sinatzean indarra duen araudiarekin bat. Araudia aldatuta erretiro partziala garestiagoa bada, Zuzendaritza eta Batzordea bilduko dira erabakitzeko nola jokatu.

Erretiroarekin batera errelebo-kontratu bat egin behar baldin bada, langabetu bat edo enpresan aldi baterako kontratua duen pertsona bat kontratatuko da. Ezin zaio enpresari eskatu errelebo-kontratua aldizkako langile finko bati egitea, non eta ez dagoen berariaz onartua arau batez edo Auzitegi Nagusiaren jurisprudentzia sendotuaren bidez.

IX. ERANSKINA

Ikasteko lizentziak

Langileek, ikasketak edo lanbide karrera bat egiteko ikastetxe ofizial batean matrikulatuta badaude eta azterketaren batera aurkeztu behar badute, baimena eskatuko diote enpresari, eta enpresak behar duten denborarako baimena emanen die, urtean hamar egunez gehienez. Baimen hori ordainduko da hitzarmeneko lansariarekin eta ad personam plusarekin batera; langileak frogatu beharko du azterketara joan dela eta azterketetako irakasgaien erdiak gutxienez gainditu dituela deialdi arruntean edo berezian.

Lizentzia horietatik kanpo daude gidari azterketak, bai eta langileak Administrazioan sartzeko edo lanean ari den enpresa ez den beste batean sartzeko egiten dituenak ere.

Langileak lanaldi arrunta egokitzeko eskubidea izanen du, lanbide prestakuntzako ikastaroetara joan behar badu, edo lanbide prestakuntza edo hobekuntzarako baimena lortzeko, eta lanpostua gordeko zaio.

X. ERANSKINA

Soldaten taulak

2015eko ordainsarien taula

A) Biltegia.

Aurreikusitako 1.768 orduko lanaldiaren arabera kalkulatuta.

Urteko soldata = hileko soldata x 15 (12 hileko soldata + uztaileko paga + abenduko paga + iraute paga).

B) Garbiketa.

Orduko soldata osoan, atsedenaldien, jaiegunen, oporren, aparteko 2 ordainsariren eta iraute pagaren zati proportzionalak sartzen dira.

2016ko ordainsarien taula

A) Biltegia.

Aurreikusitako 1.768 orduko lanaldiaren arabera kalkulatuta.

Urteko soldata = hileko soldata x 15 (12 hileko soldata + uztaileko paga + abenduko paga + iraute paga).

B) Garbiketa.

Orduko soldata osoan, atsedenaldien, jaiegunen, oporren, aparteko 2 ordainsariren eta iraute pagaren zati proportzionalak sartzen dira.

2017ko ordainsarien taula

A) Biltegia.

Aurreikusitako 1.768 orduko lanaldiaren arabera kalkulatuta.

Urteko soldata = hileko soldata x 15 (12 hileko soldata + uztaileko paga + abenduko paga + iraute paga).

B) Garbiketa.

Orduko soldata osoan, atsedenaldien, jaiegunen, oporren, aparteko 2 ordainsariren eta iraute pagaren zati proportzionalak sartzen dira.

Iragarkiaren kodea: F1605755