Iragarkia
109. ALDIZKARIA - 2016ko ekainaren 7a
1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
16E/2016 FORU AGINDUA, maiatzaren 24koa, Herritarrekiko eta Erakundeekiko Harremanetako Departamentuko kontseilariak emana, Helduei euskara irakasteko 2016ko urtarriletik irailera bitarteko diru-laguntzen deialdia onesten duena.
Euskarabideko zuzendari kudeatzaileak aurkeztutako txostena ikusirik, adierazten baitu helduendako euskararen irakaskuntza sustatzen duten entitateei 2016ko urtarrilaren 1etik irailaren 30era bitarteko aldian laguntzak arautzeko deialdia onetsi eta argitara emateko beharra.
Horrenbestez, Herritarrekiko eta Erakundeekiko Harremanetako Departamentuaren egitura organikoa ezartzen duen abuztuaren 28ko 129/2015 Foru Dekretuan ezarritakoaren bidez esleitu dizkidaten ahalmenak erabiliz,
AGINDU DUT:
1. Onestea Nafarroako Foru Komunitateko entitate juridikoei helduei euskara irakasteko ematen zaizkien laguntzen deialdia, 2016ko urtarriletik irailera bitartekoa.
2. Deialdiaren oinarri arautzaileak, foru agindu honen I. eranskinean jaso direnak, onestea.
3. Deialdi honen konpromisoei aurre egiteko, jarraian adierazten diren aurrekontuko kredituak baimentzen dira; hala ere, aldaketak egiten ahalko dira, jasotako eskabideak kontuan hartuta:
AURREKONTUKO KONTU-SAILA | EKITALDIA | ZENBATEKOA |
B30001-B3100-4819-322900: (E)Helduei euskaraz irakasteko laguntzak | 2016 | 297.000,00 |
4. Foru agindu hau eta eranskinak Nafarroako Aldizkari Ofizialean argitaratzea.
5. Deialdi honen eta bere oinarri arautzaileen kontra, gora jotzeko errekurtsoa jar daiteke, Nafarroako Gobernuari zuzendua, argitaratu eta biharamunetik hasita hilabeteko epean.
6. Foru agindu honen kontra administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, argitaratu eta bi hilabeteko epean. Horrek ez du galarazten aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2016ko maiatzaren 24an.–Herritarrekiko eta Erakundeekiko Harremanetako Departamentuko kontseilaria, Ana Ollo Hualde.
I. ERANSKINA
Nafarroako Foru Komunitatean kokaturiko entitate juridikoek helduei euskara irakasteko 2016ko urtarriletik irailera bitarteko laguntzen deialdia arautzeko oinarriak
Lehen oinarria.–Xedea eta diruz lagundutako aldia.
Deialdi honen xedea da helduei euskara irakasteko ikastaroak ematen dituzten entitate juridikoendako (euskaltegiak, gau-eskolak eta bestelakoak) laguntzak arautzea, Nafarroako Foru Komunitatean kokaturik badaude.
Euskaltegia, gau-eskola eta bestelakoak esatean, honako hau dela ulertuko da: giza baliabide eta baliabide materialen egitura, berariaz helduak alfabetatzeko eta euskalduntzeko sortua eta zuzendua, halakotzat hartua bada helduen irakaskuntzarako ikastegi diruz lagunduen fitxategiko sailkapen eta inskripzioan. Inskripzio hori Euskarabideak eginen du, entitatearen eskaera jaso ondoren.
Diru-laguntzak 2016ko urtarriletik irailera bitarteko euskara ikastaroetarako emanen dira.
Bigarren oinarria.–Diru-laguntzaren xedeko ikastaroak.
Hona diru-laguntza mota honen xedeko ikastaroak:
a) Arruntak: aurrez aurrekoak izanen dira, astean gutxienez ere 4 irakastordu izanen dituzte eta ikastaro osoak, berriz, 100 ordu gutxienez. Aurrez aurreko ikastaro trinkoek gutxienez 60 irakastordu izanen dituzte.
b) Barnetegiak: ikastaro bakoitzak gutxienez ere 70 ordu izan behar ditu, eta haietarik gutxienez ere 60 irakastordu.
c) Baliabide telematikoen bidezko ikastaroak: bakoitzak gutxienez ere 120 lanordu izan behar ditu, eta haietarik gutxienez ere 15 ordu mintzapraktikakoak. (astean 6 ordu lan telematikoan eta ordu 1 mintzapraktikan).
d) Berariazko euskalduntze ikastaroak, ikasle tipologia desberdinetarako.
Hirugarren oinarria.–Aurrekontuan dagoen dirua eta diru-laguntzen moduluak.
3.1. Deialdi honetarako dagoen zenbatekoa gehienez ere 297.000 eurokoa da, “Helduei euskara irakasteko laguntzak” izeneko kontu-sailaren kargura.
3.2. Kontu-sail horretan dagoen diruaren araberakoa izanen da 2016ko urtarrilaren 1etik irailaren 30era bitarteko laguntzetarako ikasle-orduko erreferentzia-balioa, eta inoiz ere ez da izanen jardueraren kostua baino handiagoa.
–Aurrez aurreko eskoletan, irakastorduak berak izanen dira diruz lagunduko direnak.
–Autoikaskuntza moduan, diruz laguntzen ahalko dira ikastetxeak ezartzen dituenak, gehienez ere 250 ordu ikasle eta ikasturteko, betiere betetzen badituzte guztirako orduei buruz jarritako gutxieneko baldintzak eta, orobat, aurrez aurreko orduen gutxieneko proportzionaltasuna.
–Barnetegi moduan, diruz laguntzen ahalko dira zazpi ordu barnetegiko egun bakoitzeko.
3.3. Entitate bakoitzak eskaera eginen du 2016ko urtarriletik irailera bitarteko eperako. Hartan, ikastalde guztiei buruzko aurreikuspena eginen da, kontuan harturik ikastalde bakoitzaren ezaugarriak, ikastalde bakoitzaren ikasle-ordu kopurua eta entitatearen guztirako ordu kopurua epe horretarako (II eta III. eranskinak).
Ikastetxe bakoitzerako diru-laguntza kalkulatzeko erabiliko da aurreikuspen hori. Kontu-saileko diru guztia kontatutako ikasle-ordu guztien artean banatuta kalkulatuko da ordaindu beharreko modulua. Nolanahi ere, deialdi honen zazpigarren oinarriak dioena betetzea izanen da kasu bakoitzeko diru-laguntza ordaintzeko baldintza.
Laugarren oinarria.–Entitate onuradunen betebeharrak.
Lehen oinarrian adierazitako entitateek eskatzen ahal dituzte deialdi honetako laguntzak, Diru-laguntzei buruzko Foru Legearen 13. artikuluak adierazitako baldintzak betetzen badituzte eta diru-laguntzen xede diren jarduerak Foru Komunitatean egiten badituzte.
Bosgarren oinarria.–Eskabideak eta eskatutako agiriak aurkeztea.
5.1. Dokumentazioa Erregistro Elektroniko Orokorrean aurkeztuko da, ekainaren 23ko 70/2008 Foru Dekretuari jarraikiz, Euskarabidea-Euskararen Nafar Institutuko Erregistroan (Yanguas y Miranda, 27-1.a 31003 Iruña), edo azaroaren 26ko 30/92 Legearen 38.4 artikuluak dakartzan tokietako edozeinetan, zazpigarren oinarriaren 7.1 puntuan aipatzen diren epeen barnean. Euskarabideak ikastetxeen eskura jarritako aplikazio informatikoaren bidez osorik aurkezten ahal den dokumentazioa baliabide horren bitartez aurkezten ahalko da.
5.2. Hona aurkeztu beharreko dokumentazioaren edukia:
a) Diru-laguntzaren eskaera, 2016ko urtarriletik irailera bitarteko aldirako, biak barne, deialdi honen 3.3 puntuan agertzen den bezala. Horretarako, II eta III. eranskinetako fitxak erabiliko dira.
b) Kontratazio berriko irakasleen euskarazko titulazioen fotokopiak (EGA edo titulazio baliokidea, gutxienez).
5.2.1. II. eranskina: Entitate eskatzailearen gaineko dokumentazioa. Atal honetan hauek jaso beharko dira:
a) Ikastegiaren datuak, izena, helbidea, herria, IFZ.
b) Ikastegiko arduradunaren datuak.
c) 2016ko urtarriletik irailera bitarteko aldiari dagozkion sarreren eta gastuen aurrekontua, langileen, Gizarte Segurantzaren eta funtzionamenduaren kontu-sailak zehaztuz. Azken atal honetan sartuko dira kanpo zerbitzuak (alokairua, garbitze-lanak, mantentze-lanak, hornidura, etab.), gastu didaktikoak (liburuen harpidetzak, prestakuntza, etab) eta bestelako gastuak (bulegoko materiala, komunikazioak, publizitatea, etab.).
Diru-sarrerei dagokienez:
–Diru-sarrerak beste entitate publiko batzuen aldetik, diruz-lagundutako jarduerarako.
–Diru-sarrerak entitate pribatuen aldetik, diruz-lagundutako jarduerarako.
–Matrikularen ondorioz bildutako zenbatekoak. Ikastegian gordeko dira ikasleek ordaindutako matrikularen ordainagiriak edo, halakorik izan ezean, bankuen laburpenak, ordainketa horiei dagozkienak.
d) Irakasleak:
–Lan-egoera, titulazio akademikoa eta euskara titulua. Azken hau EGA edo titulazio baliokidea izanen da, gutxienez.
e) Ikastegiko zuzendariaren edo arduradunaren erantzukizuneko aitorpena, aurkeztutako datu eta agiriak egiazkoak direla adierazten duena, II. eranskinean jasotzen den bezala. Hartan sartuko da Herritarrekiko eta Erakundeekiko Harremanetako Departamentuari emandako baimena, behar diren neurriak hartu beharrez, egiaztatzeko entitate eskatzaileak eguneratuak dituela Foru Ogasunarekiko betebeharrak.
f) Eskaera aurkezteko ezarritako epeetan kotizazioaren egoerari buruzko ziurtagiria ere aurkeztuko da, Gizarte Segurantzako Diruzaintzak luzatua, ordainketak eguneratuak dituela egiaztatzen duena.
5.2.2. III. eranskina: ikastaldeei dagokien dokumentazioa. Hartan jasoko dira diruz lagundu daitezkeen ikastaldeen gainean eskatzen diren datuak:
Ikastaldearen hasiera eta amaiera data, haren ezaugarriak, aurreikusitako irakastordu kopurua, ikastalde bakoitzeko ikasle kopurua eta ikasle-ordu kopurua eta ikastegiko ikasle-ordu guztiak. Uztail, abuztu eta iraileko ikastaroetarako, ikastaldeen, orduen eta ikasleen estimazio bat eginen da, aurreko ikasturteetatik dauden datuetatik abiatuz.
5.2.3. Ikasleen gaineko dokumentazioa. “Euskaltegiak eta Gau-eskolak” izeneko fitxategia kudeatzeko aplikazioaren bidez emanen da informazio hori.
Seigarren oinarria.–Frogagiriak.
Zazpigarren oinarriaren 7.2 puntuan adierazten diren epeetan dokumentazio hau aurkeztuko da:
a) Ikasmaila bakoitzeko ikasleen zerrenda, sexuaren arabera. Ikasle bakoitzak bere ikastaldean izandako asistentziaren kalkulua. “Euskaltegiak eta Gau-eskolak” izeneko fitxategia kudeatzeko aplikazioaren bidez emanen da informazio hori.
b) Zazpigarren oinarriaren 7.3 puntuan adierazten diren epeetan, ziurtagiri bat aurkeztuko da, ikastetxearen arduradunak edo horretarako legezko ahalmena duenak sinatua, IV. eranskinari jarraikiz, eta kontzeptu hauek bilduko dituena:
–Justifikatutako aldiari dagozkion gastu eta diru-sarreren balantzea.
–Frogagirien bidez justifikatutako aldian eskuratutako diru-sarrera, matrikula, diru-laguntza eta bestelako laguntzen gaineko aitorpena, egozpenerako aplikaturiko irizpidea zehaztuz.
–Justifikatutako aldiari dagozkion langileen egiaztagiriak: nominak, TC inprimakiak, jatorrizkoak zein kopia soilak eta ordainagiriak.
–Justifikatutako aldiari dagozkion funtzionamendu gastuen frogagiriak eta beren ordainagiriak, jatorrizkoak edo kopia soilak.
–Euskarabideak beretako gordeko du entitate interesdunei jatorrizkoak eskatzeko eskubidea, alderatzeko eta haien egiazkotasuna egiaztatzeko; hala ez bada, behar diren legezko ekintzak abiarazten ahal ditu.
Zazpigarren oinarria.–Eskaerak eta frogagiriak aurkezteko epea.
7.1. Hamabost egun naturaleko epea izanen da, oinarri hauek Nafarroako Aldizkari Ofizialean argitaratu eta biharamunetik hasita, eskaerak eta laugarren oinarrian eskatzen diren frogagiriak aurkezteko.
7.2. Eskaerak aitzineko oinarrietan aipatzen diren baldintzak betetzen ez baditu, entitate interesdunari eskatuko zaio hamar egun baliodunean akatsak zuzentzeko edo agindutako agiriak aurkezteko. Halaber, jakinaraziko zaio, hori egin ezean, eskaerari uko egin diola ulertuko dela, inguruabar hori deklaratzen duen ebazpenaren ondotik.
7.3. 2016ko urtarril, otsail, martxo eta apirileko frogagiriak aurkezteko, 10 egun naturaleko epea egonen da, esleipenaren ebazpenaren jakinarazpena jasotzen denetik kontatzen hasita.
Halaber, urriaren 14ra arteko epea ezartzen da, 2016ko maiatz, ekain, uztail, abuztu eta iraileko aldirako edo diruz lagundutako aldi guztirako, ez bada aurrez justifikatu.
Lehenbiziko epea borondatezkoa da eta entitate esleipendunen kudeaketa ekonomikoa erraztuko duten tarteko ordainketak ezartzea du xede. Bigarren epea, urriaren 14a, nahitaezkoa eta baztertzailea da eta data horren ondotik aurkezturiko justifikaziorik ez da onetsiko.
Zortzigarren oinarria.–Diru-laguntzen ebazpena eta ordainketa.
8.1. Prozeduraren instrukzioa Hizkuntza Baliabideen Zerbitzuak eramanen du. Hark ebazpen proposamena eginen du Batzordearen balorazioa aztertu ondoan.
8.2. Baloraziorako Batzorde Teknikoa arduratuko da eskaeren balorazioaz; haien kide izanen dira Euskarabidea-Euskararen Nafar Institutuko Hizkuntza Baliabideen Zerbitzuaren titularra, batzordeburu, Euskararen Egiaztapenen eta Prestakuntzaren Ataleko burua eta laguntzen deialdiaren ardura duen teknikaria, idazkari. Haren irizpena loteslea izanen da.
8.3. Deialdi honen xedeko diru-laguntzak Euskarabidea-Euskararen Nafar Institutuko zuzendari kudeatzaileak ebatziko ditu; horretarako, hilabeteko epea izanen du, eskaerak aurkezteko epea bukatu eta biharamunetik hasita, eta hurrengo 5 egun baliodunean jakinaraziko dira. Hilabeteko epe hori iraganik berariazko ebazpenik ematen ez bada, eskaerak ezetsi direla ulertuko da.
8.4. Ikasturte osorako onartutako eskaerak kontuan harturik, Euskarabideko zuzendari kudeatzailearen ebazpenaren bidez ebatziko da ikastegi bakoitzerako ikasturte osorako onartu den ordu kopurua, eta orobat finkatuko ikasle-orduko diru-laguntzaren modulua eta ikasturte osoan entitate onuradun bakoitzari dagokion diru-laguntzaren zenbatekoa, deialdi honen hirugarren oinarriari jarraikiz.
Zenbateko hori baldintzapetuko du egiazko datuen arabera eta foru agindu honen laugarren oinarrian ezarritakoaren arabera azkenean egiten den doikuntzak.
8.5. Behar diren frogagiriak deialdi honen seigarren oinarrian zehazturiko epeetan aurkeztu ondoan ordainduko dira aldi horretan justifikaturiko orduei dagozkien zenbatekoak. Lehenengo aldian ezin izanen da onarturiko kopuru guztiaren %70a gainditu. Betiere, 2016ko urtarriletik irailera bitarteko aldirako, kontzesioan ezartzen den zenbatekoa izanen da, gehienez, ikastegi bakoitzaren diru-laguntza.
8.6. Bigarren justifikazio aldiaren ondotik kontzesiorako estimaturiko ordu kopurua benetan eman dena baino handiagoa bada, osotara jaso beharreko kopurua proportzionalki murriztuko da.
8.7. Frogagirietan ikusten bada ikastetxe baten defizita halako aldi baterako aurreikusitako diru-laguntza baino txikiagoa dela, hura murriztuko da justifikaturiko defizitarekin bat etorri arte.
Bederatzigarren oinarria.–Entitate onuradunen betebeharrak, jarraipena eta diru-laguntzen gaineko kontrola.
9.1. Ikastetxeak erregistroko fitxa bat eramanen du, ikaslearen etengabeko ebaluazioari eta asistentziari buruzko datuak idazteko.
9.2. Ikaslearen ebaluazioa modu etengabean eginen da, eta diagnostiko probak eginen dira ikasturtearen hasieran eta amaieran. Ebaluazio prozesuetan erabilitako probak urtebetez gordeko dira, egiten direnetik, eta emaitzak azken ebaluazioaren aktan jasorik geldituko dira.
9.3. Administrazioak kontabilitateko agiriak, pedagogiakoak edo bestelakoak noiznahi eska ditzake.
9.4. 2016ko urriaren 15a baino lehenago, diruz lagundutako entitateek 2015-2016 ikasturteko memoria (V. eranskina, diruz lagundutako jardueren programazio orokorra bete den ala ez ebaluatuko da bertan) eta ikasleen ebaluazioaren amaierako akta aurkeztuko dituzte.
9.5. Deialdi honetako diru-laguntzen entitate onuradunek baimena emanen dute Nafarroan helduen euskalduntzearekin loturiko datu estatistikoak tratatzeko.
9.6. Deialdi honen onuradun diren entitateek ordutegiak eta neurriak ezarriko dituzte, diru-laguntzaren xede den jarduera eman ahal izateko kontrataturiko pertsonen eta ikasleen pertsona, familia eta lan mailako ardurak bateratzeko.
Era berean, material, irudi eta dokumentazio guztiak emakumeen eta gizonen arteko erantzunkidetasuna, rol aniztasuna, berdintasuna eta bizikidetza balioak sustatuko ditu.
Halaber, lana lortzeari, mailaz igotzeari, lanean irauteari, prestakuntzari, ordainsariari eta kitatzeari dagokienez, emakumeen eta gizonen arteko berdintasuna bermatuko da.
9.7. Onuradunek bete beharko dituzte Diru-laguntzei buruzko 11/2005 Foru Legearen 9. artikuluan ezarritako baldintza orokorrak.
9.8. Onuradunek erabilitako propagandaren ale grafikoen bi kopia aurkeztuko dituzte gutxienez; haietan, Nafarroako Gobernuaren logoa agertuko da, jarduera diruz laguntzen duen entitatea den aldetik.
9.9. Memoriarekin batera entitateak koadro bat ere aurkeztu beharko du, ematen duen prestakuntza eskaintzaren eta Hizkuntzen Europako Erreferentzia Marko Bateratuan ezarritako mailen arteko baliokidetasuna adieraziz.
Hamargarren oinarria.–Datuen tratamendua.
Ikasleen eta irakasleen datu pertsonalen tratamendua bat etorriko da Datu pertsonalak babesteari buruzko abenduaren 13ko 15/1999 Lege Organikoan ezarriarekin.
Hezkuntzako kontseilariaren azaroaren 16ko 213/2011 Foru Aginduaren bidez sortu zen “Euskaltegis y Gau-eskolas/Euskaltegiak eta Gau-eskolak” datu pertsonalen fitxategi informatizatua, eta haren erregistroa egin zen Datuak Babesteko Erregistro Orokorrean.
Hamaikagarren oinarria.–Oinarriak ez betetzea, itzulketak eta arau-hausteak.
11.1. Ez-betetze arintzat joko dira irregulartasun formalak. Halakoetan, ez-betetzearekiko proportzionalak izanen diren itzulketak edo ez-ordaintze partzialak eginen dira. Ez-betetze larritzat joko dira funtsezko gaiei dagozkienak. Halakoetan, arau orokorra izanen da itzulketa edo ez ordaintze osoa, galarazi gabe, bi kasuetan ere, azaroaren 9ko 11/2005 Foru Legean ezarritako kasuetarako berandutza korrituak eskatzea. Baloraziorako Batzordeak mailakatzea egiteko komenigarriak iruditzen zaizkion irizpideak ezartzen ahalko ditu.
11.2. Arau-hauste eta zehapenetarako, Diru-laguntzei buruzko azaroaren 9ko 11/2005 Foru Legearen IV. tituluan xedaturikoa aplikatuko da. Zehapen prozedura Nafarroako Foru Komunitateko Administrazioari buruzko abenduaren 3ko 15/2005 Foru Legearen V. tituluan ezarritakoa izanen da.
Hamabigarren oinarria.–Diru-laguntzen bateragarritasuna.
12.1. Deialdi honetako diru-laguntza bateragarria da administrazio berak, beste administrazio publiko batzuek, erakunde publiko edo pribatuek eta norbanakoek, nazionalek zein nazioartekoek, ematen dituzten bestelako diru-laguntzekin. Diru-laguntzen zenbatekoa ezin da inola ere izan, bakarrik edo beste diru-laguntza, laguntza, diru-sarrera edo baliabideekin baturik, diruz lagundutako jardueraren kostua baino handiagoa.
12.2. Beste entitate batzuetatik jasotako diru-laguntza edo laguntza aldi berekoak eskuratzen badira, ordainduko den laguntza egokitu eginen da, laguntza eta sarrerak osotara ez daitezen izan egindako gastuak baino handiagoa.
Hamahirugarren oinarria.–Diru-laguntzen publizitatea.
13.1. Emandako diru-laguntzak eta onuradunen eta baztertuen zerrenda Euskarabidea-Euskararen Nafar Institutuaren webgunean argitaratuko dira: http://www.euskarabidea.es.
13.2. Entitate guztiek beren publizitatean adierazi beharko dute beren ikastaroak Nafarroako Gobernuak diruz laguntzen dituela. Aipamen hau Nafarroako Gobernuko sinbolo ofiziala arautzen duen urtarrilaren 27ko 4/2016 Foru Dekretuaren jarraibideekin bat eginen da. http://www.navarra.es/home_eu/Gobierno+de+Navarra/Simbolo+oficial/.
Hamalaugarren oinarria.–Gardentasuna.
14.1. Onuradunek Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritako gardentasuna bete beharko dute (betebehar hori irailaren 11ko 59/2013 Foru Dekretuan arautu zen) Nafarroako Aurrekontu Orokorren kargura diru-laguntzak eskuratzen dituztenean eta ondoko bi egoerak ematen direnean:
a) Emandako diru-laguntzaren zenbatekoa urteko 20.000 eurotik gorakoa izatea.
b) Emandako zenbatekoak entitate onuradunaren negozio kopuruaren edo urteko aurrekontuaren %20tik gorakoa izatea.
Aurreko idatz-zatian ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira. Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez guztizko batura. Erreferentziako negozio-zifra edo urteko aurrekontua honako hauen arteko txikiena izanen da:
a) Aurreko urteko negozio kopurua edo gauzaturiko aurrekontua.
b) Hala bada, diru-laguntza ematen denean entitatearen organo eskudunak onartutako negozio-zifra edo aurrekontua.
Bi gorabehera hauek batera dituzten onuradunek, Nafarroako Gobernuaren Erregistro Orokor Elektronikoan, Euskarabideari zuzenduta, jakinarazpena jaso edo, kasua bada, diru-laguntza eman izanaren ebazpena argitaratzeko egunetik hasita hilabeteko epean, modu telematikoan aurkeztu beharko dute ondoko dokumentazioa:
a) Entitatearen gobernu, administrazio eta zuzendaritza organoen osaera.
b) Organo horiek osatzen dituzten kargudunen zerrenda.
c) Kargudun bakoitzak entitatetik aurreko urtean jasotako ordainsari gordinak eta gainerako konpentsazio ekonomikoak, kontzeptuka xehaturik. Sorrera berriko entitateen kasuan, informazioa entitate horien aurrekontuetan edo plan ekonomiko-finantzarioan dagoena izanen da.
d) Kargudun bakoitzak gobernu, administrazio eta zuzendaritza eginkizunetan ematen duen dedikazioaren erregimena.
e) Onuradunaren urteko azken kontuen kopia bat.
14.2. Aurreko atalean deskribatzen diren gorabeherak ematen ez direlako, entitatea ez bada gardentasun betebeharraren mendeko, aitorpena aurkeztu beharko du, hori adieraziz.
14.3. Onuradunek emandako informazioa Nafarroako Foru Komunitatearen Administrazioaren Gobernu Irekiko Atarian argitaratuko da eta eskura izanen da argitaratu eta urtebetean zehar. Muga 15 hilabetekoa izanen da, informazioa kudeatzeko organoan sartzen den unetik hasita. Epe hori iraganik, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.
14.4. Entitateak ekitaldi berean diru-laguntza bat baino gehiago jasotzen baditu, ez du informazioa errepikatu beharko diru-laguntza bakoitzerako, salbu eta hasieran eman zituen datuak aldatzen badira.
14.5. Onuradunak informazioa emateko betebeharrak ez betetzeak ekar ditzakeen zehapenak galarazi gabe, ez-betetze horrek, emandako diru-laguntza ez ordaintzea ekarriko du, aurrerakinak barne, eta, hala badagokio, kobratutako zenbatekoak itzuli beharko dira, Diru-laguntzei buruzko Foru Legearen 35.1.c) artikuluan ezarritakoari jarraikiz.
Hamabosgarren oinarria.–Legeria aplikagarria.
Deialdi hau oinarri hauek gobernatuko dute, baita Diru-laguntzei buruzko azaroaren 9ko 11/2005 Foru Legeak ezarritakoak ere. Halaber, 161/1988 Foru Dekretuaren bidez onetsitako erregelamenduan xedatutakoa aplikatuko da. Erregelamendu horren bidez arautzen da helduen euskalduntzean diharduten entitate pribatuei laguntzak ematea.
Hamaseigarren oinarria.–Administrazio errekurtsoak.
Deialdi honen, bere oinarrien eta aplikazio egintzen aurka, gora jotzeko errekurtsoa aurkezten ahal da, Herritarrekiko eta Erakundeekiko Harremanetako Departamentuko kontseilariari zuzendua, hilabeteko epean, foru agindu hau Nafarroako Aldizkari Ofizialean argitaratu edo errekurtsoaren xede den egintza jakinarazi eta biharamunetik aitzina.
II. ERANSKINA
Gau-eskolek eta euskaltegiek bete beharreko fitxa.
III. ERANSKINA
Ikastegiko taldeen ezaugarriak.
IV. ERANSKINA
Diruz lagundutako aldiari dagozkion diru-sarreren eta gastuen frogagiriak.
V. ERANSKINA
VI. ERANSKINA
Gardentasun betebeharrari buruzko aitorpena.
Fitxategiak PDF formatuan daude, behera kargatu ahal izateko.
Iragarkiaren kodea: F1606869
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
