Iragarkia
80. ALDIZKARIA - 2015eko apirilaren 27a
1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
216/2015 FORU AGINDUA, martxoaren 25ekoa, Gizarte Politiketako kontseilariak emana, Nafarroako kirolen federazioei 2015ean diru-laguntzak emateko oinarri arautzaileak onesten dituena.
Uztailaren 5eko 15/2001 Foru Legeak, Nafarroako Kirolari buruzkoak, 6.1 artikuluan ezartzen duenaren arabera, Foru Komunitateko kirol administrazioari dagokio, egun Nafarroako Kirolaren eta Gazteriaren Institutuaren bitartez, Nafarroako Gobernuaren kirol gaietako politika planifikatu eta betearaztea. 6.2. e) artikuluan adierazten da haren eskumenen artean dagoela Nafarroako kirol federazioak, esleitu zaizkien eginkizun publikoak betetzen ari direnean, koordinatu eta begiratzea, haien jarduera pribatua ezertan eragotzi gabe.
Aipatutako foru legeak, 33.a) artikuluan, zehazten du Foru Komunitateko kirol administrazioak diru-laguntzak ematen ahal dizkiela Nafarroako kirol federazioei.
Espedienteko txosten tekniko eta juridikoek adierazten dute, hurrenez hurren, diru-laguntza hauek egokiak eta interes publikokoak direla, eta deialdia eta haren oinarri arautzaileak, legezkoak.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak eta Gizarte Politiketako Departamentuaren egitura organikoa ezartzen duen uztailaren 25eko 73/2012 Foru Dekretuak emandako eskudantziak erabiliz,
AGINDU DUT:
1. Nafarroako kirolen federazioei 2015ean (2014ko abendutik 2015eko azarora arte, biak barne) diru-laguntzak norgehiagokako araubidean emateko oinarri arautzaileak onestea, baita dokumentazioa aurkezteko erabili beharreko ereduak ere. Oinarri arautzaileen testua I. eta II. eranskinetan daude, eta ereduak III., IV. eta V. eranskinetan.
2. 2015. urtean diru-laguntza horiek emateko, guztira 1.975.000 euroko gastua baimentzea, 2015era luzatutako 2012ko Nafarroako Aurrekontu Orokorren ondoko kontu-sailen kargura, betiere kreditua baldin badago:
–1.915.000 euro “Federazioentzako diru-laguntzak” izeneko 940002-95120-4819-336100 kontu-sailaren kargura.
–40.000 euro “Nafarroako kirol selekzioen jantziak” izeneko 940002-95120-4819-336106 kontu-sailaren kargura.
–20.000 euro “Kirol federazioen ekipamendua” izeneko 940002-95120- 7819-336100 kontu-sailaren kargura.
3. Foru agindu hau onetsi baino lehenago aurkezten ahal ziren diru-laguntzen eskaerak foru agindu honetan ezarritako araudiari jarraikiz tramitatuko dira.
4. Foru agindu hau eta eranskinak Nafarroako Aldizkari Ofizialean argitaratzea, behar diren ondorioak izan ditzaten.
Iruñean, 2015eko martxoaren 25ean.–Gizarte Politiketako kontseilaria, Iñigo Alli Martínez.
I. ERANSKINA
Nafarroako kirol federazioei diru-laguntzak emateko deialdia.
Oinarri arautzaileak
1. oinarria. Xedea eta helburua.
1. Nafarroako kirolen federazioei diru-laguntzak emateko oinarri arautzaileak onestea da deialdi honen helburua, 2014ko abenduaren 1etik 2015eko azaroaren 30era bitarteari dagozkionak zehazki.
2. Diru-laguntza horiek emanez Nafarroako kirol federazioak babestu nahi dira, Nafarroako Kirolari buruzko uztailaren 5eko 15/2001 Foru Legeak eta hura gero garatu zutenek ezartzen dituzten funtzioak betetzeko asmoz.
2. oinarria. Diruz laguntzen ahal diren kontzeptuak.
1. Langileria gastuak, zerbitzu komunetakoak, gastu orokorrak eta administrazioko gastuak.
2. Nafarroako txapelketa ofizialak antolatzea.
3. Txapelketa nazional ofizialetan parte hartzea.
4. Txapelketa nazional ofizialak antolatzea.
5. Sustapen jarduerak.
6. Prestakuntza jarduerak.
7. Kirol jantziak.
8. Material inbentariagarriaren ekipamendua.
3. oinarria. Entitate onuradunak.
Nafarroako Kirol Entitateen Erregistroan inskribaturik dauden Nafarroako kirol federazioak izan daitezke diru-laguntza hauen onuradun, apirilaren 14ko 80/2003 Foru Dekretuan xedatutakoarekin bat, horren bidez arautu baitziren Nafarroako Kirol Entitateak eta Nafarroako Kirol Entitateen Erregistroa.
4. oinarria. Federazioek, onuradun izateko, bete beharrekoak.
1. Nafarroako Kirol Entitateen Erregistroan inskribatua egotea.
2. Gizarte Segurantzarekiko zerga arloko betebeharrak eta Nafarroako Foru Komunitateko Administrazioaren edo haren erakunde autonomoen aldeko zorrak ordaintzeko betebeharrak eguneratuak izatea.
3. Diru-laguntzen onuraduna izateko, Diru-laguntzei buruzko azaroaren 9ko 11/2005 Foru Legearen 13. artikuluan ezarritako debekuetatik kanpo egotea.
4. Federazioek antolatutako jardueren ondoriozko erantzukizun zibila babesten duen aseguru bat kontratatuta edukitzea, bai entitatearentzat berarentzat, bai haren izenean ari diren pertsonentzat ere (zuzendaritza taldekoentzat eta langileentzat).
Eskaerak aurkezteko epea bukatzen den egunean bete beharko dira aipatutako betebehar guztiak, eta diru-laguntza jasotzen duen jarduerak irauten duen bitartean.
5. oinarria. Eskaerak aurkeztea.
1. Eskaerak Nafarroako Kirolaren eta Gazteriaren Institutuaren Erregistroan aurkeztuko dira (Arrieta kalea, 25, 31002 Iruña), edo Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4. artikuluan aipatzen diren prozeduretako edozeinen bitartez.
2. Eskaera Nafarroako Kirolaren eta Gazteriaren Institutuari zuzenduko zaio, horretarako ezarritako eredu ofizialari jarraikiz.
3. Eskaerak aurkezteko epea 15 egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.
4. Eskaerak postaz aurkez daitezke. Kasu horretan, interesdunak dagokion ziurtagiriaren bidez frogatu beharko du zein egunetan egin zuen igorpena posta bulegoan, eta, egun berean, diru-laguntza kudeatzen duen organoari iragarri behar dio telefax, telex edo telegrama bidez proposamena igorri duela. Bi baldintza horiek bete ezean, eta eskaera aurkezteko ezarritako epetik kanpo jasotzen bada, dokumentazioa ez da onartuko. Halaber, epea amaitu eta 10 egun natural iraganik dokumentaziorik jaso ez bada, ez da inola ere onartuko.
Diru-laguntza eskatzeak berarekin dakar deialdi hau arautzen duten oinarriak onartzea.
6. oinarria. Eskatzaileek aurkeztu beharreko dokumentazioa.
Honako dokumentazio hau aurkeztu behar da, Nafarroako Kirolaren eta Gazteriaren Institutuak prestatutako ereduekin bat (V. eranskina):
1. Eskabide-orri orokorra. Helbide elektroniko bat adieraziko da, eskabidean akatsik eginez gero, balizko zuzenketa haren bidez eskatzeko, eranskin honen 7. oinarriarekin bat.
2. Erantzukizuneko aitorpena, entitatearen ordezkariak emana, entitatea diru-laguntzen onuradun izateko debeku-egoeretan ez dagoela dioena. Debeku horiek Diru-laguntzei buruzko azaroaren 9ko 11/2005 Foru Legearen 13. artikuluko 2. eta 3. idatz-zatietan ageri dira.
3. Nafarroako Gobernuko Ekonomia, Ogasun, Industria eta Enplegu Departamentuaren ziurtagiria, Foru Ogasunarekiko zerga betebeharrak egunean dituela frogatzen duena. Ziurtagiri horrek hilabeteko antzinatasuna izanen du gehienez.
4. Gizarte Segurantzako Diruzaintza Orokorraren ziurtagiria, eskatzaileak Gizarte Segurantzarekiko betebehar guztiak egunean dituela frogatzen duena. Ziurtagiri horrek hiru hilabeteko antzinatasuna izanen du gehienez.
5. Federazioek antolatutako jardueren ondoriozko erantzukizun zibila babesten duen aseguruaren polizaren kopia, bai entitatearentzat berarentzat, bai haren izenean ari diren pertsonentzat ere (zuzendaritza taldekoentzat eta langileentzat).
6. Eskaeraren xedeko kontzeptu bakoitzerako eskabide-orria (eranskin honen 2. oinarriaren 1. ataletik 8.era), NKGIk egindako ereduei jarraikiz (V. eranskinean daude). Eskabide horiek paperean eta/edo euskarri digitalean sinatuak aurkeztuko dira. Paperean sinatuak aurkezten badira, fitxategiak euskarri digitalean ere aurkeztuko dira.
7. Eskaera zuzentzea.
Aurkeztutako dokumentazioa aski ez bada edo deialdian eskatzen direnak betetzen ez baditu, entitate eskatzaileari galdeginen zaio, jaso izana egiaztatzen duen agiri baten bidez, hamar egun balioduneko epean dokumentazioa osatu edo akatsak zuzen ditzala, eta ohartaraziko zaio hala egin ezean ezetsi eginen dela bere eskaera, azaroaren 9ko 11/2005 Legeko 19.3. artikuluak dioen bezala.
Errekerimendua modu elektronikoan egiten ahalko da, mezu elektroniko bat bidaliz eskatzaileak eskaeran jarritako helbidera. Errekerimendua modu horretan egiten ahalko da, bakar-bakarrik, eskatzaileak eskabide-orri orokorreko aitorpena sinatuz berariaz baimendu baldin badu.
8. oinarria. Antolamendua eta instrukzioa.
1. Nafarroako Kirolaren eta Gazteriaren Institutuko Kirol Zuzendariordetza Nagusia izanen da laguntza hauek emateko prozedura antolatu eta aurrera eramateko unitate organikoa.
2. Instrukzio organoak administrazio publikoko arlo juridikoko teknikari baten laguntza izanen du.
3. Instrukzio organoak eskaerak ebazteko beharrezkotzat jotzen duen dokumentazioa edo informazio osagarria eskatzen ahalko du edonoiz, baita oinarri arautzaile hauetan eskatzen diren baldintzak zorrotz betetzen direla frogatzeko ere.
9. oinarria. Diru-laguntzak emateko prozedura, balorazioa eta zenbatekoa.
1. Diru-laguntzei buruzko azaroaren 9ko 11/2005 Foru Legean ezarritakoaren arabera, laguntza hauek norgehiagoka ermanen dira, Diru-laguntzei buruzko Foru Legearen 17.1 artikuluan xedatutakoarekin bat.
2. Aurkeztutako eskaeren balorazioan, eman beharreko diru-laguntzen zenbatekoa zehazteko, foru agindu honen II. eranskinean (baremoa) ezarritako irizpideak hartuko dira kontuan.
3. Balorazio ekonomikotik ateratzen den zenbateko osoa aurrekontuetan erabilgarri dagoen diru kopurua baino handiagoa bada, baremoa aplikatuta ateratzen diren kopuruak modu proportzionalean banatuko dira, II. eranskinean deialdiaren atal bakoitzerako ezarritako xehetasunen arabera.
10. oinarria. Alegazioen tramitea, eta eskaerak berriz egitea.
1. Eskaeren hasierako balorazioa eginda, Kirolaren Zuzendariordetza Nagusiak federazio guztiei jakinaraziko die laguntzak emateko prestatu duen proposamena, eta hamar egun balioduneko epea emanen die eskaera berriz egiteko, hurrengo atalean xedatutakoari jarraikiz.
2. Proposatutako diru-laguntzarekin batera aurreko oinarriko 3. atalean adierazitako hainbanaketa ere jakinarazten bada, federazioek zilegi izanen dute eskaera berriz egitea hasierako eskaeran adierazitako jarduera berberetarako, gastu-konpromisoak eta baldintzak diru-laguntzen xedeko kontzeptu bakoitzerako eman daitekeen zenbatekora doitzeko. Doikuntza horretan, hala badagokio, zilegi izanen da diruz laguntzen ahal den jardueraren ondoriozko diru-sarreren aurreikuspenak modu proportzionalean murriztea. Horren ondorioetarako, jardueraren ondoriozko diru-sarrerak izanen dira jarduerak berak zuzenean sortzen dituen diru-sarrerak (inskripzio-kuotak eta antzekoak), baita beste entitate publiko edo pribatu batzuetatik etorritakoak ere, jarduera horretarako laguntzak gutxitu edo baliogabetu ditzaketenak.
Nolanahi ere, eskaera berregitean diru-laguntzaren xedea, baldintzak eta helburuak errespetatu beharko dira, baita eskaeraren atal bakoitzerako ezarritako balorazio irizpideak ere. Era berean, eskaeran azaldutako aurreikuspenen arabera Federazioaren berezko baliabideekin estali behar den gastua mantendu beharko da, hau da, diruz laguntzen ahal den jarduerak zuzenean sortzen ez dituen gastuak. Eskaera berregin ondoren banatzen diren azkeneko diru-laguntzak finkatzean, II. eranskinean ezarritako gehieneko ehunekoak errespetatu beharko dira.
3. Instrukzio organoak eskaera berregina onetsi ondoren, dokumentazio guztia organo eskudunari igorriko zaio, laguntzen gaineko behin betiko ebazpena eman dezan.
11. oinarria. Ebazpena.
1. Nafarroako Kirolaren eta Gazteriaren Institutuko zuzendari kudeatzaileari dagokio diru-laguntzetarako aurkeztutako eskaerak ebaztea.
2. Diru-laguntza emateko ebazpenean diru-laguntzaren xedeak, zenbatekoa eta ordaintzeko modua agertuko dira. Halaber, hala behar bada, eskaeraren baten ezespena ebatziko da.
3. Eskaerak hiru hilabeteko epearen barrenean ebatziko dira, deialdi hau Nafarroako Aldizkari Ofizialean argitaratzen den egunetik hasita.
4. Epe hori ebazpen espresik eman eta jakinarazi gabe iraganik, interesdunek beren eskaera ezetsi egin dela ulertuko dute. Hala ere, Administrazioa beharturik dago ebazpena ematera.
5. Ebazpena honela jakinaraziko da: Nafarroako Gobernuko iragarki oholean (Karlos III.aren etorbidea, 2) eta Nafarroako Kirolaren eta Gazteriaren Institutuko bulego nagusietako iragarki oholean iragarkiak jarriz eta komunikabideen bitartez.
6. Laguntzak ekitaldi ekonomiko jakin baten kargura jasotzeak ez dakarkio onuradunari hurrengo urteetan laguntza izateko eskubidea.
12. oinarria. Jarduera berrien eskaera.
1. Ebazpena eman ondoren, federazioek, instantzia bidez, diru-laguntza eska dezakete jarduera berri baterako, 2. oinarriko ataletako batean sartuta badago edo hasieran aurreikusietako bat ordeztuko duen jarduera baterako. Horri dagokionez, federazioarentzako diru-laguntzen eskaera aurkeztu ondoren egiten direnak baizik ez dira hartuko jarduera berritzat.
2. Eskaera horiek, beranduenez, eskatutako jarduera berria egin baino 15 egun lehenago aurkeztu behar dira.
3. Instrukzio organoak (Nafarroako Kirolaren eta Gazteriaren Institutuko Kirolaren Zuzendariordetza Nagusia), behar den ofizioaren bitartez, eskaera onartu edo ez onartu erabakiko du, eta onartzeko edo atzera botatzeko arrazoiak emanen ditu.
4. Nafarroako Kirolaren eta Gazteriaren Institutuak eskaera hori onartzen badu, diru-laguntzaren zenbatekoa ez da handituko; izan ere, emandako diru-laguntza konpentsatu egin beharko da jarduera berria ere kontuan izanda. Konpentsazio hori azken justifikazioan egin beharko da. Horrela, jardueraren bat egiten ez bada, edo gastua txikiagoa bada, aukera izanen da jarduera berri horiei dagokien diru-laguntzarekin konpentsatzeko, betiere bakoitzari dagokion baremoaren irizpideekin bat.
13. oinarria. Bateragarritasuna.
Deialdi honetan araututako diru-laguntzak bateragarriak dira xede bererako jasotzen den beste edozein diru-laguntza edo laguntzarekin. Hala ere, diru-laguntza horien zenbatekoa ezin izanen da inola ere izan, bakarrik edo beste diru-laguntza, laguntza, diru-sarrera edo baliabide bereki batzuekin batuta, onuradunak egin beharreko jardueraren kostua baino handiagoa.
14. oinarria. Diru-laguntzaren ordainketa.
1. Diru-laguntzak onesteko ebazpena eginik, 2. oinarriaren 1.etik 6.era bitarteko ataletako kontzeptuetarako, konturako 3 ordainketa egiten ahalko dira gehienez, lauhileko hauei dagozkienak: 2014ko abendua-2015eko martxoa, 2015eko apirila-2015eko uztaila, eta 2015eko abuztua-2015eko azaroa. Gero espedientea ixteko ebazpen bat etorriko da. Espedientea ixteko ebazpenean, azken justifikazioa baino lehen egindako konturako ordainketak doituko dira.
2. Aurreko atalean aipatutako konturako ordainketen zenbatekoa kalkulatzeko, bi atal hauek hartuko dira aintzat, bata besteari gehituta:
a) Langileria gastuak, gastu orokorrak eta administrazioko gastuak (2. oinarriaren 1. atala): kontzeptu horietarako onetsitako diru-laguntzaren arabera hilabete bati dagokion parte proportzionala. Atal honetako ordainketa egiteko, horri dagokion justifikazio-inprimakia aurkeztu beharko da.
b) Jardueren gastuak (3. oinarriaren 2. ataletik 6.era bitarte): justifikazio-inprimakian azaldutakoaren arabera, ordaintzeko data bakoitzean zer portzentaje dagoen egina diruz lagundutako jardueretatik, kontuan harturik gauzatze-portzentajea eta jarduerarako aurreikusitako egunen eta benetan egindakoen erlazioa. Atal honetako ordainketa egiteko, egindako jardueraren memoria aurkeztu beharko da, kirol arloari dagokiona, eta horrekin loturiko egiaztagiriak.
c) Gorako a) eta b) ataletan araututako prozeduraz gainera, zilegi izanen da kontzeptu horietako gastuak justifikatzea konturako ordainketa bakoitzean egindako jardueretako gastuen eta ordainketen egiaztagiriak aurkeztuz.
d) Ordaintzeko ebazpen horiek egiteko, federazioek aurkeztutako justifikazioak bi prozedura motatan elkartuko ditu Nafarroako Kirolaren eta Gazteriaren Institutuak:
I.–Ebazpen berean bilduko dira ordainketa-kontzeptu guztien justifikazio guztia aurkeztu duten federazioei dagozkien ordainketak.
II.–Ebazpen berean bilduko dira langileriaren gastuen eta gastu orokorren atalarengatik edo jardueren atalarengatik federazioei dagozkien ordainketak, betiere federazio bakoitzari dagokiona banan-banan eta bereiz adierazita, aurkezten diren justifikazioen arabera.
3. Lehenbiziko ordainketa egin baino lehen, gardentasun-betebeharrak justifikatzeko dokumentazioa aurkeztu beharko da, 19. oinarrian araututakoari jarraikiz.
4. Diruz lagundutako kontzeptuak eskuratu direla eta haiek ordaindu direla frogatzeko ziurtagiriak (jatorrizko fakturak) federazioek aurkeztu ondoren emanen da 2. oinarriko 7. eta 8 ataletako kontzeptuei dagokien diru-laguntza (kirol jantziak eta material inbentariagarriaren ekipamendua). Ordainketa hori dena batera egiten ahalko da, edo, bestela, lauhileko bakoitzari dagokiona, bereiz. Ziurtagiri horiek aurkezteko azken eguna 2015eko abenduaren 31 izanen da.
15. oinarria. Jardueren arteko doikuntzak.
1. Diru-laguntzaren helburuak oso-osorik betetzen baldin badira (eskaeran aurreikusitako jarduerak egiteari dagokionez) eta proposaturiko jardueraren batean gutxiago gastatu baldin bada, azkeneko justifikazioan zilegi izanen da doikuntza edo konpentsazio ekonomikoak egitea diru-laguntzaren xedeko beste jardueraren batean izandako gastu handiagoekin, baita federazio onuradunek egindako beste jarduera berri batzuetan edo diruz lagundutako jardueren antzekoak diren beste batzuetan izandako gastuekin ere (12. oinarrian ezarritako prozeduraren arabera eskatu eta baimendu baldin badira), betiere deialdi honen arabera diruz lagungarriak baldin badira (zein multzotan sailkatzen diren gorabehera). Dena dela, kirol federazio bati jarduera jakin bat egiteagatik esleitzen zaion diru-laguntzak ez ditu gaindituko deialdi honetako II. eranskinean (1. oinarritik 8.era bitarte) adierazitako portzentajeak. Doikuntza edo konpentsazio horiek, betiere, ezin izanen dute gainditu laguntza emateko ebazpenean federazio bakoitzari esleitutako diru kopurua.
2. Aurreko puntuan aipatutako aurrekontu-aldaketak ezin dira izan jarduera bakoitzarentzat hasiera batean aurkeztutako aurrekontuaren %30etik gorakoak. Muga horretatik gorako dirua ezin izanen da erabili horrelako doikuntzak beste jarduera batzuekin egiteko.
3. Diru-laguntzak ematen dituen organoak, espedientea ixten denean, aurkezten den azken justifikazioaren arabera ebatziko du behar dena.
16. oinarria. Justifikazioak.
1. Justifikazioak justifikazio-kontuen bidez eginen dira, salbu eta txapelketa nazionaletan parte hartzeko laguntzen atalekoak, horietarako moduluen prozedura erabiliko baita. Kirol jantzien eta material inbentariagarriaren ekipamenduaren atalean, justifikazioa honela eginen da: eskatutako eta onartutako kontzeptuak eskuratu eta ordaindu direla justifikatzeko agiriak (fakturak) aurkeztuz. Agiri horiek gastuen azken justifikazio gisa hartuko dira, eta horiek ere justifikazio-kontuan sartu beharko dira.
2. Justifikazio-kontu horretan diru-laguntza eskaeran sartu ziren jardueren eta kontzeptuen egiaztagiriak sartuko dira, bakar-bakarrik.
3. Deialdiaren atal bakoitzerako aurrekontuaren (hasierakoaren edo egokituaren) %100 betearazi izanaren justifikazioa egin beharko da, hartarako diru-laguntzarik onetsi bada. Justifikatutako gastua aurrekontua baino gutxiago baldin bada, proportzioan egokituko da zenbatekoa azken ebazpenean.
4. Diru-laguntza hauen onuradun diren federazio guztiek azken justifikazio hau aurkeztu beharko dute 2015eko abenduaren 31 baino lehenago:
a) Egindako jardueren memoria bat, kirol arlokoa, eta, horrekin batera, federazioak egindako eta aurreko epeetan justifikatu gabe gelditu diren kirol jarduera guztiei dagokien dokumentazioa.
b) Jarduera mota bakoitzerako eskabide-orriak (langileria, zerbitzu komunak, gastu orokorrak, administraziokoak eta Nafarroako txapelketetakoak), gastuen betearazpen errealari dagokion atala behar bezala beterik.
c) Diru-laguntzaren xedeko jardueren justifikazio-kontua III. eranskinean agertzen den ereduaren arabera prestatuko da, eta bertan jarduera bakoitzaren gastu eta diru-sarreren zerrenda sailkatu bat agertuko da, honako hauek adierazita: agiri zenbakia, jarduera, jaulkipen data, sozietatearen izena, kontzeptua, zenbatekoa eta ordainketaren data.
5. Nafarroako Kirolaren eta Gazteriaren Institutuak justifikazio-kontu horien gaineko berrikuspen txostenak eginen ditu, Kontu-auditoreen Erregistro Ofizialean inskribatua dagoen jarduneko kontu-auditore baten bidez. Txosten horiek honako hauek betez eginen dira:
I.–Txosten horien kontratazioa NKGIk eginen du.
II.–Txostena maiatzaren 17ko EHA/1413/2007 Aginduan ezarritakoari jarraikiz eginen da, IV. eranskinean agertzen den eredua erabiliz. Agindu horren bidez onetsi zen kontuen auditoreek diru-laguntzen justifikazio-kontuak berrikusteko jarraitu beharreko jarduketa araua,
17. oinarria. Espedientea ixteko ebazpena.
Eranskin honen 15. eta 16. oinarrietan ezarritako dokumentazioa berrikusi ondoren, NKGIk espedientea ixteko ebazpena emanen du, eta, horretan, ordaindu edo itzuli beharreko diru kopurua zehaztuko da, egindako justifikazioaren arabera, betiere diru-laguntza emateko ebazpenean ezarritako kopurua gainditu gabe.
18. oinarria. Kirol federazio onuradunen betebeharrak.
1. Federazioak hartutako laguntzaren xedeko jarduerak egitea eskaeran adierazi bezala, eta diru-laguntza emateko ezarritako baldintzak betetzea.
2. Eranskin honen 16. oinarrian ezarritako egiaztagiriak aurkeztea, hala tarteko konturako ordainketetarako, nola azken justifikaziorako.
3. Nafarroako Gobernuaren laguntza jaso dela adieraztea jardueren edozein eratako publizitatean, Nafarroako Kirolaren eta Gazteriaren Institutuak adierazten duen irudi korporatiboa jarriz.
4. Laguntza ematen duen organoak eta indarra duen antolamenduaren arabera eskudun diren bestelakoek egin beharreko egiaztapen lanak onartzea.
5. Diru-laguntza jasotzen duen jardueraren frogagiriak gordetzea, dokumentu elektronikoak barne, egiaztatze eta kontrol lanen xede izan daitezkeen bitartean.
6. Laguntzak erabili behar dira onartu diren berariazko helburuetarako, eta haien aplikazioa justifikatu beharko da, kontuan harturik, orobat, jardueren artean egiten diren doikuntzak, behar diren ataletan ezarrita dagoen bezala.
7. Diru-laguntza jasotzen duen jarduera finantzatzeko lortzen dituen beste laguntza, diru-sarrera edo baliabide batzuen berri ematea diru-laguntza ematen duen organoari. Hori jakin bezain laster komunikatu behar da, eta, betiere, jasotako funtsak zertan erabili diren justifikatu baino lehen.
8. Federazio guztiek erraztasunak eman behar dituzte NKGIk kontratatutako kontu-auditoreek berrikuspen-txostenak egin ditzaten.
9. Diru-laguntzei buruzko azaroaren 9ko 11/2005 Foru Legearen 35. artikuluan ezarritako kasuetan, hartutako diru-laguntzak itzultzea.
10. Diru-laguntzei buruzko Foru Legeak onuradunei ezartzen dizkien gainerako betebeharrak.
19. oinarria. Gardentasun-betebeharrak.
1. Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritakoari jarraikiz, entitate onuradunek gardentasun-betebeharrak izanen dituzte, irailaren 11ko 59/2013 Foru Dekretuaren bidez arautuak (Nafarroako Aurrekontu Orokorren kargurako diru-laguntzen onuradunen gardentasun-betebeharrak arautzen dituen foru dekretua). Urtean 20.000 eurotik gorako diru-laguntza jasotzen duten entitate onuradunek, onetsitako laguntza beren negozio-zifraren edo urteko aurrekontuaren %20tik gorakoa bada, honako informazio hau eman beharko diote Nafarroako Kirolaren eta Gazteriaren Institutuari:
a) Entitateen gobernu, administrazio eta zuzendaritza organoen osaera.
b) Organo horiek osatzen dituzten kargudunen zerrenda.
c) Entitateak aurreko urtean kargudun bakoitzari emandako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan jasotakoa izanen da.
d) Kargudun bakoitzak gobernuko, administrazioko eta zuzendaritzako eginkizunetan duen dedikazioaren araubidea.
e) Entitate onuradunaren urteko azken kontuen kopia bat.
Entitate onuradunen legezko ordezkariek sinatu beharko dute aipatutako informazioa.
2. Aurreko ataleko inguruabarrak ez gertatzeagatik entitate onuradunak gardentasun-betebeharra bete behar ez badu, horixe dioen aitorpen bat aurkeztu beharko du, deusetan galarazi gabe deialdia kudeatzeko unitateari egiaztatu eta ikuskatzeko esleitu zaizkion ahalmenak.
Aitorpen hori aurkeztuta ere, nahitaez onartu behar dira laguntza ematen duen organoaren egiaztapen lanak, eranskin honen 18. oinarrian ezarritakoak.
3. Atal honetan aipatutako informazioa diru-laguntza onesteko ebazpena jakinarazi eta hilabeteko epean aurkeztu beharko da. Telematika bidez aurkeztuko da, Nafarroako Gobernuaren Erregistro Orokor Elektronikoaren bitartez, Nafarroako Nafarroako Kirolaren eta Gazteriaren Institutuari zuzendua.
4. Onuradunak informaziorako betebeharrak ez betetzeak ekar ditzakeen zehapenak galarazi gabe, atal honetan agindutako informazioa ez aurkezteak onetsitako diru-laguntza ez ordaintzea ekarriko du berekin, eta, bidezko bada, kobratutako zenbatekoak itzuli beharra, Diru-laguntzei buruzko Legearen 35.1.c) artikuluan ezarritakoari jarraikiz.
5. Nolanahi ere, kirol federazio onuradunek dokumentuak ez aurkezteko eskubidea izanen dute baldin eta haiek dagoeneko Foru Komunitateko Administrazioaren esku badaude (Nafarroako Foru Komunitateko Administrazioari buruzko abenduaren 3ko 15/2004 Foru Legearen 9.4 artikulua).
6. Datu Pertsonalak Babesteari buruzko abenduaren 13ko 15/1999 Lege Organikoaren 11.2.a) artikuluan ezarritakoarekin bat, entitate onuradunak eman behar duen informazioan dauden datu pertsonalak jakinarazteko ez da beharrekoa izanen interesdunaren baimena, Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian baimentzen baita.
7. Entitate onuradunek ematen duten informazioa Nafarroako Foru Komunitateko Administrazioaren Gobernu Irekiaren Atariko webgunean argitaratuko da. Informazio hori urtebetez egonen da ikusgai argitaratzen denetik hasita, eta gehienez 15 hilabetez utziko da bertan, informazioa kudeatzen duen organoan sartzen den egunetik hasita. Epe hori igarota, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.
20. oinarria. Azpikontratazioa.
Federazio onuradunek zilegi dute diruz lagundutako jarduerak azpikontratatzea, guztiz edo partez, eta ez dago horretarako portzentaje-mugarik. Nolanahi ere, onuradunak berak egiten badu diru-laguntza jasotzen duen jarduera, horretarako behar diren gastuen kontratazioa kontzeptu horretatik kanpo geldituko da.
Diru-laguntzei buruzko Foru Legearen 26. artikuluan ezarritako gainerako aurreikuspenak ere bete beharko dira. Zehazki, hirugarrenekin hitzarturiko jarduerak diru-laguntzaren zenbatekoaren %20 gainditzen duenean eta zenbateko hori 60.000 eurotik gorakoa denean, azpikontratazioa egiteko kontratua idatziz sinatu beharko da.
21. oinarria. Hornitzaileak kontratatzea.
Diru-laguntzei buruzko Foru Legearen 28. artikuluko 3. idatz-zatian xedaturikoarekin bat, ekipamendu ondasunak eskuratzen direnean edo aholkularitza edo laguntza enpresek zerbitzuak ematen dituztenean, diruz laguntzen ahal den gastuaren zenbatekoa 12.000 eurokoa baino handiagoa bada, federazio onuradunak frogatu beharko du, organo emailearen aurrean, hornitzailea eraginkortasun eta ekonomia irizpideei jarraituz hautatu dela.
Kasu horietan, federazio onuradunak helburua lortzeko gai diren hiru enpresarekin edo gehiagorekin kontsultatu eta negoziatu beharko ditu kontratuaren baldintzak, eta eskaintzarik hoberena egiten duenarekin sinatuko du. Kontsulta-tramitearen gaineko dokumentazioa eta eskaintzak gorde egin beharko ditu entitate onuradunak. Kontu horiek agiri bidez frogatu beharko ditu diru-laguntza ematen duen organoaren aurrean, kontratua sinatu bezain laster. Agiri horiekin batera, enpresa hautatzeko arrazoiei buruzko txosten labur bat aurkeztuko da.
Ez da beharrezkoa izanen enpresa bati baino gehiagori kontsulta egitea, diru-laguntza jaso dezaketen gastuen ezaugarrien berezitasunagatik, merkatuan hornidura edo zerbitzu hori ematen duten enpresak behar adina ez direnean.
22. oinarria. Itzuli beharra.
Proiektua gauzatu ezik edo diru-laguntza emateko ezarritako baldintzak bete ezik, Diru-laguntzei buruzko Foru Legearen 35. artikuluan aipatzen diren zergatikoak gertatuz gero edo deialdi honetan berariaz aipatzen diren eginbeharrak bete ezik, jasotako laguntza itzuli beharko da, osorik edo partez. Legeek ezarritako kasuetan, gainera, bidezkoa izanen da diru-laguntza pagatu zenetik itzuli beharraren gaineko ebazpena ematen den arte sorturiko berandutza interesak ordaintzeko eskatzea.
Dirua itzultzeko prozedura goian aipaturiko artikuluan xedaturikoari jarraituko zaio eta irekitzen denetik 12 hilabeteko epean eman beharko da haren gaineko ebazpena.
Halaber, onuradunak betebeharrak ia osorik bete dituenean eta zalantzarik gabe bere konpromisoak burutzeko jarrera frogatzen duenean, hasierako aurrekontua oinarri izanda egindako kontzesioaren eta benetan egindakoaren arteko proportzionaltasun irizpideari jarraituz zehaztuko da itzuli beharreko dirua.
23. oinarria. Arau-hausteak eta zehapenak.
Deialdi honetan aurreikusitako diru-laguntzen federazio onuradunak Diru-laguntzei buruzko Foru Legearen 42. artikuluan eta hurrengoetan, diru-laguntzen arloko arau-hauste administratiboei buruz, ezarritako zehapen araubidearen menpe egonen dira, eta han ezarritako erantzukizunak izanen dituzte.
Diru-laguntzen arloko zehapenak erregelamendu bidez finkatzen den prozeduraren arabera ezarriko dira, edo, halakorik izan ezean, Nafarroako Foru Komunitateko Administrazioari buruzko abenduaren 3ko 15/2004 Foru Legearen V. tituluan xedatutakoari jarraikiz.
24. oinarria. Administrazio errekurtsoak.
1. Deialdi honen eta bere oinarrien kontra gora jotzeko errekurtsoa jar daiteke, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratzen denetik, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.
2. Era berean, Nafarroako Kirolaren eta Gazteriaren Institutuko zuzendari kudeatzailearen ebazpenen aurka, gora jotzeko errekurtsoa aurkezten ahalko da, Gizarte Politiketako kontseilariari zuzendua, hilabeteko epean jakinarazi eta biharamunetik aitzina, Nafarroako Foru Komunitateko Administrazioari buruzko abenduaren 3ko15/2004 Foru Legean xedatuarekin bat.
25. oinarria. Aplikatu beharreko legeria.
Foru dekretu honetan aurreikusirik ez dagoen guztian, Diru-laguntzei buruzko azaroaren 9ko 11/2005 Foru Legean eta Nafarroako Kirolari buruzko uztailaren 5eko 15/2001 Foru Legean xedatutakoari jarraituko zaio.
II. ERANSKINA
Nafarroako kirol federazioei diru-laguntzak emateko deialdia.
Irizpideak eta baremoak
Sarrera.–Irizpide orokorrak:
1. “Federazioentzako diru-laguntzak” izeneko 940002 95120 4819 336100 kontu-sail ekonomikoa deialdiaren atal guztien artean banatuko da, bloketan sailkatuta. Dokumentazioa azterturik, baremoko atal bakoitzaren arabera esleituko da diru-laguntza, lehentasunen ordena honi jarraikiz eta ezarritako portzentajea aplikatuta:
1. Langileria gastuak, zerbitzu komunetakoak, gastu orokorrak eta administraziokoak: erabilgarri dagoen kontu-sail ekonomikoaren %42.
2. Nafarroako txapelketa ofizialak: %23.
3. Txapelketa nazional ofizialetan parte hartzea: %22.
4. Txapelketa nazional ofizialak antolatzea: %3.
5. Sustapen jarduerak: %8.
6. Prestakuntza jarduerak: %2.
2. Lehenbizi, langileria gastuei, gastu orokorrei eta administrazioko gastuei dagozkien eskaerak aztertuko dira, eta atal honetako baremoaren arabera dagokien diru-laguntza esleituko zaie.
a) Esleitutako kopurua handiagoa baldin bada bloke horretarako erabilgarri dagoen kontu-sailaren %42 baino, ukitutako federazioen artean banatuko da, proportzionalki, diru kopuru hori.
b) Esleitutako kopuruak erabilgarri dagoen kontu-sailaren %42 gainditzen ez badu, soberan gelditzen den diruarekin beste bloke bat sortuko da, “esleitu gabe dauden zenbatekoak” izenekoa.
3. Aurreko puntuan aipatutako prozesua 6 blokeekin errepikatuko da (haietako bakoitzerako erabakitako portzentajeak aplikatuta), 1. atalean ezarritako ordenari jarraikiz.
4. “Esleitu gabe dauden zenbatekoak” izeneko blokea honela banatuko da:
a) Lehenbizi, hasiera batean esleitutako kopuruak aski ez izateagatik hainbanaketa egin behar izan den blokeetan falta den dirua estaltzeko erabiliko da, 1. atalean ezarritako ordenari jarraikiz. Bloke horietako bakoitzean diru-laguntzak emateko aurreikusitako irizpide berberak aplikatuko dira.
b) Sei blokeak aztertu ondoren oraindik ere esleitu gabeko dirurik gelditzen bada, langileria gastuen, zerbitzu komunen, gastu orokorren eta administrazioko gastuen atalari dagozkion diru-laguntzen portzentajea handitzeko erabiliko da diru hori, erabilgarri dagoen kontu-saila osorik agortu arte.
5. Benetan gauzatu diren jardueren azken dokumentazioa aztertzen denean, zilegi izanen da aurrekontu aldaketak egitea deialdi honetako atal batetik bestera, I. eranskineko 15. oinarrian agertzen den bezala. Horrela, jarduera baten gastua baxuagoa izan bada, beste jarduera batean izandako gastu handiagoa konpentsatzeko erabiltzen ahalko da diru hori, betiere II. eranskinean deialdiko bloke bakoitzerako ezarritako portzentaje mugak gainditu gabe.
6. Ez da diru-laguntzarik izanen honako kategoria hauetako txapelketa eta/edo lehiaketak antolatzeko eta/edo haietan parte hartzeko:
a) Bakar-bakarrik 2007. urtean eta hortik aurrera jaio diren kirolarientzat diren txapelketa eta lehiaketak.
b) Masterrak, beteranoak eta antzeko kategorietakoak.
7. Kirol jantziei eta ekipamenduari buruzko ataletarako (I. eranskineko 2. oinarriaren 7. eta 8. puntuetakoak) bideratuko den diru kopurua foru agindu honetan kasuan kasuko kontu-sail ekonomikoen kargura baimendutakoa izanen da. Dagokion diru-laguntza kalkulatzeko, eranskin honetako oinarrietan adierazitako irizpideak baizik ez dira aplikatuko, betiere aurkeztutako dokumentazioa aztertuz.
8. Deialdi honetako diru-laguntzak ez dira erabiliko NKGIren beste deialdi berariazko batzuen xede diren jardueretarako.
1. oinarria. Langileria gastuak, zerbitzu komunetakoak, gastu orokorrak eta administrazioko gastuak.
1. Atal honetan, honako hauetarako diru-laguntzak emanen dira:
a) Federazioak lan administratiboak eta zuzendaritza teknikoa egiteko kontratatutako langileak.
b) Zerbitzu komunetako bulegoaren gastuak, aurreikusitako hiru ataletako edozeinetakoak (administratiboak, teknikoak eta komunikaziokoak).
c) Federazioen funtzionamendu gastu arruntak (gastu orokorrak eta administraziokoak), zehaztu diren kontzeptuetarako.
2. Federazioaren programa jakin batzuetarako berariaz kontratatzen diren langileentzako diru-laguntzak ez dira atal honetan sartzen, federazioak ez baditu modu jarraituan kontratatuak.
3. Aldi berean federazioaren zuzendaritza teknikoan eta federazioaren berariazko programei loturiko bestelako eginkizunetan aritzen diren langile kontratatuen kasuan, eskabidean ongi zehaztuko da alderdi horietako bakoitzari aplikatzen zaion portzentajea, eman litekeen diru-laguntza ere atal horietan banatzeko (langileria edo beste programa batzuk), atal bakoitzerako irizpideen arabera. Federazioaren beste programa batzuetan ere aritzen diren langileak, gehienez ere, %50 izanen dira.
4. Honako hauek dira gastu orokorren eta administrazioko gastuen atalean diruz laguntzen ahal diren kontzeptuak:
a) Bulegoko materiala eta material informatiko suntsikorra.
b) Hainbat motatako aholkularitza: kontabilitatekoa, lan arlokoa, datuak babestekoa, etab.
c) Aseguru orokorrak (erantzukizun zibilekoa, hirugarrenak babestekoa, etab.), lizentziei lotutako aseguruak izan ezik.
d) Komunikazioak: telefonoa eta Internet.
e) Posta eta mezularitza.
f) Banketxeetako gastuak: banketxeen komisioak (transferentzietakoak, mantentze-lanetakoak, erreziboak kobratzekoak, etab.) eta finantzaketa-interesekoak (maileguak, kreditu kontuak, etab.). Gastu horiek diru-laguntza jasotzen ahalko dute baldin eta diruz lagundutako jarduerarekin zuzeneko lotura badute eta hura ongi prestatu edo egiteko ezinbestekoak badira. Banketxeetako kontuetako interes zordunak salbuetsita daude (kontu korronteetako zorpekoak).
g) Kilometrajea, dietak eta ordezkaritza gastuak, lehendakariarentzat eta zuzendaritza batzordeko kideentzat. Gehieneko zenbateko hauek ezarri dira ondorengo kontzeptuetarako: kilometrajea (0,12 euro/km), ostatua (30 euro gaueko) eta dietak (12 euro otordu bakoitzeko, bazkaria edo afaria).
5. Diru-laguntzaren portzentajea hauxe izanen da:
a) Kontratatzen diren langileentzat: gastuei kontzeptu honengatik jasotako diru-sarrerak kendu ondoren ateratzen den zenbatekoaren %45. Federazio bakoitzak 62.000 euro hartzen ahal ditu gehienez. Kalkulu hori egiteko, aintzat hartuko dira federazio eskatzaileek kudeaketa federatiboaren kontzeptuarentzat beste entitate batzuetatik jaso ditzaketen diru-sarrerak.
b) Zerbitzu komunen bulegorako: %90.
c) Gastu orokorretarako eta administrazioko gastuetarako: %35. Portzentaje horri %15 gehituko zaio baldin eta federazioek langileria gasturik eta zerbitzu komunetako gasturik ez badute.
d) Portzentaje horiek handitu egiten ahalko dira erabilgarri dagoen kontu-sail ekonomikoa agortu arte, eranskin honetako “Sarrera” oinarriko 4.b) atalean bildutako aurreikuspenarekin bat. Portzentajearen igoera berdina izanen da hiru ataletan (kontratatutako langileak, zerbitzu komunak eta funtzionamendu gastuak).
6. 2015etik aurrera kontratatu beharreko langileen gastuak diruz laguntzeko, ezinbestekoa izanen da NKGIk aldez aurretik oniritzia ematea kontratazio prozesuari. Horretarako, kontratazioa egin beharra dagoela justifikatzeko txostena aurkeztuko da; kontratazio horietan ez dira gaindituko bulego eta langelen sektorearen hitzarmen kolektiboan ezarritako diru kopuruak. Horren arabera, NKGIk erabakiko du kontratazio horiek onartzea ala baztertzea.
2. oinarria. Nafarroako txapelketa ofizialak antolatzea.
1. Atal honetan Nafarroako txapelketa ofizialak (lehiaketa, liga, jardunaldi eta antzekoen bidez) antolatzeko diru-laguntzak sartzen dira.
2. Atal honetan eman daitekeen diru-laguntza kalkulatzearen ondorioetarako, espezialitate eta modalitate guztietako txapelketak eskema honen arabera sailkatzen dira:
a) Kirol kolektiboetako probak: modalitate edo espezialitate honetako txapelketa edo probetan bi talde lehiatzen dira elkarren aurka denbora eta toki berean, tresna mugikor baten jabetza txandakatuz, erasorako eta defentsarako ekintza tekniko-taktikoen bitartez.
b) Kirol indibidualetako probak: aurreko atalean jaso ez diren gainerako modalitate guztiak.
3. Diru-laguntza jaso dezaketen txapelketak: oro har, atal honen babesean honako hauek jaso dezakete diru-laguntza: lehiaketetan izaten diren adinaren araberako kategoria, modalitate eta/edo espezialitateetako txapelketak, hain zuzen, kirolerako adinaren araberako kategoria, espezialitate eta/edo modalitate bateko Nafarroako txapeldun titulua eskuratzea dakartenak, betiere kontuan hartuta benjaminen azpiko adina dutenen eta master kategoriakoen txapelketetarako irizpide orokorretan jasotako salbuespena.
4. Diru-laguntza jaso dezaketen gastuak:
a) Garaikurrak: federazio bakoitzak antolaturik, Nafarroako txapeldun titulua eskuratzea dakarten kirol maila goreneko txapelketetarako garaikurrak, dominak eta antzekoak (kirol modalitate bakoitzaren araberakoak), adinaren araberako kategoria, espezialitate eta modalitate guztietakoak. Modalitate batzuetan ohikoa bada, onartuko da garaikur edo domina bat ematea, eta, gehigarri gisa, bestelako sari bat. Sari bakoitzerako, zenbateko hauek onartuko dira gehienez: 50 euro garaikur eta/edo sari tradizional bakoitzeko, eta 4 euro domina bakoitzeko. Zenbat garaikur ematen diren kalkulatzearen ondorioetarako, honako ezaugarri hauek hartuko dira kontuan:
–Federazio bakoitzaren antolamenduaren araberako adin-kategoria, espezialitate eta modalitate bakoitzean antolatzen diren kirol maila goreneko txapelketetan, Nafarroako txapeldun titulua lortzera bideratuak badaude, garaikurrak, dominak eta antzekoak dira diruz lagungarriak. Lehenengo hiru sailkatuentzako sariak baizik ez dira izanen diruz lagungarriak (edo lehenbiziko laurentzakoak, 3. eta 4. sailkatuak zehazteko zuzeneko lehiaketa ez duten modalitateetan, eta, orobat, topagune moduko azken fase bat egiten duten modalitateetan).
–Aurreko atalean adierazitako lehiaketa mailatik beherako lehiaketetan: garaikurrak baizik ez dira izanen diruz lagungarriak, parte-hartzaileen kopuruaren arabera: 8 talde baino gutxiago badira, saria irabazlearentzat besterik ez; 8-12 talde, sariak lehenengoarentzat eta bigarrenarentzat; 12 talde baino gehiago, sariak lehenengo hirurentzat.
b) Arbitrajeak: atal honetan sartzen dira zehatz-mehatz arbitraje-lanak direnak, eta, orobat, federazioaren kontura lehiaketaren kontrolerako eta jarraipenerako antzeko lanak egiten dituzten pertsonak (mahaikideak, ohar-hartzaileak eta antzekoak). Kirol federazio bakoitzak onartu ondoren, NKGIri aurkeztu zaizkion arbitraje tarifak aplikatuko dira. Kirol modalitatea zein den, irizpide hauek aplikatuko dira:
–Kirol indibidualen probetan: federazioak antolatutako Nafarroako txapelketetako arbitraje guztiak sartzen dira.
–Taldekako kirol probetan: diruz laguntzen ahal diren gehieneko tarifa batzuk ezarri dira, kirol modalitate bakoitzean kategoria (seniorrak, juniorrak, gazteak, etab.) eta genero bakoitzean parte hartzen duten taldeen arabera: 4 talde baino gutxiago, diru-laguntzarik gabe; 4-10 talde, 1.000 euro; 11-20 talde, 2.000 euro; 21-30 talde, 3.000 euro; 31-40 talde, 4.000 euro; 40 talde baino gehiago, 5.000 euro.
c) Jokorako materiala: kirol indibidualen txapelketetan, horrelako materialerako gastua onartuko da baldin eta inbentariagarria ez bada eta federazioak berak zuzenean jartzen badu parte-hartzaileen eskura arrazoi teknikoengatik (materialaren homologazioa, eta abar): teniserako, golferako, euskal pilotarako eta antzekoetarako pilotak, badmintonerako luma-bolak, herri kiroletarako egurra, etab. Kirol kolektiboetako azken faseetako lehiaketetan erabiltzeko den materiala ere onartuko da. Atal honetan, 3.000 euroko muga ezartzen da federazio bakoitzarentzat.
d) Osasun arreta: kirol modalitate bakoitzaren arriskuen arabera (kasuan kasuko Nafarroako federazioaren edo dagokion Espainiako federazioaren kirol araudiaren bidez onesten direnak), kirol indibidualen proben lehiaketetarako anbulantzien eta/edo medikuen gastuak diruz laguntzen ahalko dira, baina ez, ordea, kirol kolektiboetako proben txapelketetarako direnenak.
e) Instalazioak eta azpiegitura muntatzea: lehiaketa egiten deneko instalazioa egokitzeko behar-beharrezkoak diren gastuak. Atal honetan sartzen dira egokitzapen horretarako behar diren langileak eta materiala (hesiak, koltxonetak eta, modalitate bakoitzaren ezaugarri berezien arabera, lehiaketarako beharrezkoa den edonolako materiala garraiatu eta instalatzea).
f) Instalazioen alokairua: lehiaketarako beharrezkoak diren instalazioen alokairuaren berariazko gastuaren %30eko diru-laguntza emanen da.
g) Oro har, aipatutako txapelketak antolatzeko Nafarroako Kirolaren eta Gazteriaren Institutuaren ustez beharrezkoak eta ezinbestekoak diren gastu guztiak. Atal honetan, lehiaketa antolatzeko behar-beharrezkoa eta ezinbestekoa den material suntsigarria sartzen da, baina horren beharra berariaz justifikatu beharko da. Oro har, diruz laguntzeko modukoak hartuko dira txapelketaren antolakuntza orokorrarekin zerikusia duten kontzeptuak, txapelketarako behar-beharrezkoak baldin badira. Ez dira diruz laguntzeko modukoak hartuko, ordea, parte hartzen duten kirolariei eta/edo taldeei zuzenean egozten ahal zaizkien gastuekin lotutako kontzeptuak. Zilegi da txapelketa horiek antolatzeko zuzeneko ardura duten langileen gastuengatik portzentaje bat egoztea diruz laguntzeko moduko gastu gisa.
h) Otordu gastuak, ostatu gastuak eta antzekoak ez dira inola ere diruz lagunduko.
i) Material inbentariagarri gisa har daitekeena erostea ez da inola ere diruz lagunduko.
5. Esku-diruzko saririk ematea ez da inola ere aurreikusiko.
6. Federazio bakoitzak eskaera orokor bat aurkeztu beharko du, non diru-laguntza jaso dezaketen modalitate eta/edo kategoria guztietako Nafarroako txapelketen aurrekontu guztiak bilduko baitira (diru-sarrerak eta gastuak). Horrez gainera, txapelketa eta kontzeptu bakoitzaren datu guztiak zehaztu beharko dira, horretarako inprimaki ofizialak erabiliz (aurrekontuak, egunak eta parte-hartzaile kopurua adierazita).
7. Nafarroako txapelketatarako diru-laguntza nola kalkulatuko den:
a) Diru-laguntza Nafarroako txapelketen atalaren barrenean sartzen diren gastu guztietarako izanen da, eta txapelketak antolatzean gertatzen den defizitaren %100 estaliko du, betiere diru-laguntza jaso dezaketen txapelketak eta gastuak kontuan harturik, baita atal batzuetan ezarritako muga partzial batzuk ere.
b) Defizita kalkulatzeko, instalazioen alokairuen atalean sortutako gastuen %30 baizik ez da aintzat hartuko.
c) Txapelketa baten antolakuntzan sortutako defizita kalkulatzeko, aintzat hartuko dira, bakar-bakarrik, diruz laguntzeko modukoak diren kontzeptuei dagozkien gastuak eta gastu horiei loturik dauden diru-sarrerak.
8. Atal honetako diru-laguntzen kontura federazio bakoitzak jaso dezakeen kopurua mugatua da, hots:
a) Federazio olinpikoak eta interes berezia dutenak (kirol modalitate autoktonoak: herri kirolak eta pilota): 70.000 euro.
b) Olinpikoak ez diren federazioak: 35.000 euro.
3. oinarria. Txapelketa nazional ofizialetan parte hartzea.
1. Atal honetan sartzen dira autonomia erkidegoetako federazioek Espainiako Txapelketen sailkapen faseetan eta/edo azken faseetan parte hartzeko diru-laguntzak, hau da, kirol modalitate eta/edo espezialitate bakoitzean Espainiako txapeldun titulua lortzeko txapelketetan parte hartzekoak.
2. Atal honetan, diru-laguntza emanen da, orobat, kirol modalitate autoktonoen erkidegoen arteko txapelketetan parte hartzeko, interes berezikoak badira: herri kirolak eta pilota.
3. Erreferentziako modulu batzuk ezarriko dira eskatutako jarduera bakoitzerako, hurrengo atalean adierazten diren irizpideei jarraikiz, eta, modulu horiek oinarri hartuta, diru-laguntzaren portzentajeak aplikatuko dira, federazioaren eta jardueraren arabera. Azkenik, modulua egokituko da, jarduera zenbatean bete den ikusita (distantziak, parte-hartzaileen kopurua eta jardueraren iraupena).
4. Erreferentziako moduluak parte-hartzaile kopuruaren arabera zehaztuko dira, baita txapelketaren herrira joateko distantziaren arabera eta haren iraupenaren arabera ere. Distantziak, parte-hartzaileen kopurua, ostatu eta otordu gastuak eta kilometrajea kalkulatzeko, irizpide hauek aplikatuko dira:
a) Joan-etorrien distantzia. Ondoko ataletan aipatzen diren probintziak zein diren, hiru distantzia mota bereizten dira: laburrak, ertainak eta luzeak (txapelketa egiten den herrirainoko kilometro kopurua hartuko da aintzat):
I.–Laburrak: Bilbo, Burgos, Huesca, Logroño, Donostia, Soria, Gasteiz, Zaragoza.
II.–Ertainak: Albacete, Ávila, Bartzelona, Castelló, Ciudad Real, Cuenca, Girona, Guadalajara, Lleida, León, Madril, Oviedo, Palentzia, Salamanca, Santander, Segovia, Tarragona, Teruel, Toledo, Valentzia, Valladolid eta Zamora.
III.–Luzeak: Alacant, Almería, Badajoz, Balearrak, Cáceres, Cádiz, Ceuta, Kordoba, Granada, Huelva, Jaén, A Coruña, Las Palmas, Lugo, Málaga, Melilla, Murtzia, Ourense, Pontevedra, Santa Cruz Tenerifekoa eta Sevilla.
b) Parte-hartzaileen kopurua: txapelketako akta ofizialetan benetan inskribaturik dauden parte-hartzaileen kopurua, entrenatzailea eta ofizialki onartutako delegatuak eta/edo laguntzaileak barne, kirol modalitatea zein den.
c) Ostatua: 30 euro aplikatuko dira gaua pasatu behar den bakoitzean, eta ondoko irizpideak hartuko dira aintzat gauak pasatzeko gastua kalkulatzeko, distantzien arabera:
I.–Laburrak: lehiaketa egunen kopurua ken bat.
II.–Ertainak: lehiaketa egunen kopurua.
III.–Luzeak: lehiaketa egunen kopurua gehi bat.
d) Otorduak: 12 euro aplikatuko dira otordu bakoitzeko (bazkaria eta afaria). Parte-hartzaileen kopuruaren arabera kalkulatuko da, ondoko irizpide hauei jarraikiz:
I.–Laburrak: lehiaketa egunen kopurua bider bi, ken bat.
II.–Ertainak: lehiaketa egunen kopurua bider bi, gehi bat.
III.–Luzeak: lehiaketa egunen kopurua bider bi, gehi hiru.
e) Kilometrajea: parte-hartzaileen kopuruaren arabera kalkulatuko da, ondoko irizpide hauei jarraikiz:
I.–Txapelketan gehienez 20 parte-hartzaile badaude (kopuru hori barne): 0,20 euro aplikatuko dira 4 parte-hartzaileko (edo zatikia). Kirol modalitateren batean lehiatzeko materialen premia dela-eta garraiorako ibilgailu bereziren bat erabili behar bada, ibilgailu hori ere hartuko da kontuan. Premia, dena dela, eskaeran justifikatu beharko da.
II.–Txapelketan 21 parte-hartzaile edo gehiago badaude: ulertuko da bidaia autobusez egiten dela, eta 1,15 euro aplikatuko da kilometroko, gehi kopuru finko bat, 250 euro eguneko.
III.–Iruñetik txapelketa eginen den herrirainoko distantziak hartuko dira aintzat (joatea eta etortzea).
IV.–Penintsulatik kanpoko bidaietarako, 200 euro pertsona bakoitzeko izanen da erreferentzia Kanarietara joaten bada, eta 100 euro pertsona bakoitzeko gainerakoetarako, gehi Iruñetik Madrilera (Kanarietara, Ceutara eta Melillara joateko bidaietarako) edo Iruñetik Bartzelonara joatekoa (Baleareetarako bidaietarako).
f) Dagokion diru-laguntza kalkulatzeko oinarrizko zenbateko edo modulua ostatuari, otorduari eta kilometrajeari dagozkien kopuruen batura izanen da, gehi txapelketan izena emateko ordaindutako zenbatekoak. Izena emateko gastuak justifikatzeko, egiaztagiriak aurkeztu beharko dira (fakturak eta ordainketa-agiriak), eta justifikazio-kontuan sartu beharko dira.
g) Txapelketa egunetan, ostatuaren eta otorduen kontzeptuak txapelketen ordutegien arabera kalkulatuko dira. Horrelakoetan, txapelketako akreditazio aldia (edo antzekoa) kontuan hartuko da, eta, hortaz, tramitazio hori hasten denetik aurrera kontatuko da; tramite hori egin beharrik ez badago, lehenbiziko partidatik aurrera kontatuko da. Lehenbiziko partida 16:00ak baino lehen jokatzen bada, aurreko eguneko ostatua eta afaria ere kontatuko dira.
5. Diru-laguntza, hasiera batean, jarduera bakoitzari dagokion moduluaren %45ekoa izanen da. Txapelketa bakoitzaren ezaugarriak ikusita, portzentaje hori handitzen ahalko da (%100era iritsi arte), honako irizpide hauen arabera:
a) Errendimendu programa batean sartuta egotea: %20.
b) Modalitate olinpikoa, paraolinpikoa edo interes berezikoa (herri kirolak eta pilota) izatea: %15.
c) Nafarroako Kirol Jokoen programan sartutako jarduera izatea: %15.
e) Langile administratiboen gasturik ez duten federazioak (atalak: langileria gastuak eta administrazio zerbitzu komunak): %15.
6. Atal honetan, federazio bakoitzak 30.000 euro jaso ditzake gehienez.
7. Txapelketa horien azken antolatzaileak (Espainiako Federazioa, Kirolen Batzorde Gorena, beste autonomia erkidego bat, etab.) diru-laguntzaren bat eman baldin badu atal horietakoren batentzat, zenbateko hori deskontatuko da modulu honi dagokion kopurutik.
4. oinarria. Txapelketa nazionalak antolatzea.
1. Atal honetan sartzen da Espainiako Txapelketatako azken faseen eta/edo sektoreko faseen (edo antzekoen) antolakuntza. Kirol modalitate autoktonoen txapelketak ere sartzen dira, autonomia erkidegoen artekoak (herri kirolak eta pilota).
2. Diru-laguntza gastuaren %50ekoa izanen da, baina aurreikusitako defizita gainditu gabe. Emandako diru-laguntza likidatuko da benetan izandako diru-sarrerak eta gastuak kontuan hartuta. Nolanahi ere, Nafarroako Kirolaren eta Gazteriaren Institutuaren diru-laguntzak ez du aipatutako portzentaje hori gaindituko.
3. Diru-laguntza jaso dezaketen gastuak:
a) Garaikurren, arbitrajeen eta jokorako materialaren gastuak, osasun arretaren gastuak, instalazioak eta azpiegiturak muntatzekoak eta instalazioak alokatzekoak, II. eranskin honen 2.4 oinarrian adierazitakoaren arabera.
b) Antolakuntza, protokolo eta komunikazio gastuak, kartelak egitekoak eta antzekoak.
c) Ostatu eta otordu gastuak, baina, bakar-bakarrik, txapelketaren antolakuntzan ari diren langileenak, ez, ordea, parte hartzen duten kirolari, teknikari eta zuzendarienak. Ostatu eman duen hotelaren edo ostatu-etxearen fakturaren bidez justifikatuko dira, kontzeptu horietan benetan egindako gastua adina.
d) Material inbentariagarriaren erosketa ez da diruz laguntzeko modukoa hartuko, ez eta esku-dirutan ematen diren sariak ere.
e) Oro har, aipatutako txapelketak antolatzeko Nafarroako Kirolaren eta Gazteriaren Institutuaren ustez beharrezkoak eta ezinbestekoak diren gastu guztiak. Atal honetan, lehiaketa antolatzeko behar-beharrezkoa eta ezinbestekoa den material suntsigarria sartzen da, baina horren beharra berariaz justifikatu beharko da. Oro har, diruz laguntzeko modukoak hartuko dira txapelketaren antolakuntza orokorrarekin zerikusia duten kontzeptuak, txapelketarako behar-beharrezkoak baldin badira. Ez dira diruz laguntzeko modukoak hartuko, ordea, parte hartzen duten kirolariei eta/edo taldeei zuzenean egozten ahal zaizkien gastuekin lotutako kontzeptuak.
5. oinarria. Sustapen jarduerak.
1. Nafarroa edo Espainia mailako jarduera ofizialak ez izateagatik, aurreko ataletan sartu ez diren jarduera guztiak sartzen dira atal honetan.
2. Diru-laguntza jaso dezaketen gastuen kontzeptuak II. eranskin honen 2.4 oinarrian adierazitako berberak dira.
3. Eskatzen diren jarduerak mailaka sailkatuko dira, maila bakoitzeko jarduerei dagokien diru-laguntza portzentajea ezartzeko:
a) I. maila. Kontzeptu bat baino gehiago hartzen ditu bere baitan: 1) Aurreko urtean 300 lizentzia baino gutxiago izan dituzten federazioek beren modalitatea sustatzeko aurkeztutako eskaerak, lizentzien kopurua handitzeko helburu zehatza dutenak; 2) berariaz, emakumeen kirola sustatzeko jarduerak; 3) egoera ahulean dauden talde minoritarioentzako jarduerak. Aplikatu beharreko diru-laguntza: gastuaren %75ekoa, baina aurreikusitako defizita gainditu gabe.
b) II. maila: kasuan kasuko kirol modalitatea sustatzeko, hitzarmen bidez, toki entitateekin lankidetzan antolatzen diren jarduerak. Hitzarmen hauek aintzat hartuko dira, bakarrik, toki entitateen eta federazioen arteko jarduera hori 2014. urtean aurreikusi ez bazen. Diru-laguntza: %50.
c) III. maila. Kontzeptu bat baino gehiago hartzen ditu bere baitan: 1) Kasuan kasuko modalitatearen garapen eta sustapen programak egiteko eta kirol praktika Nafarroa osora hedatzeko helburua duten jarduerak, hain zuzen, aurreko urtean 301 eta 750 lizentzia bitarte izan duten federazioenak; 2) Kirol teknikak hobetzeko jarduerak; 3) Kirol antolamendurako proiektuak; 4) Espainiako eta/edo nazioarteko federazioen egutegi ofizialetan dauden txapelketa eta lehiaketak antolatzea eta horietan parte hartzea, eranskin honetako 3. oinarrian agertzen ez badira. Diru-laguntza: %50.
d) IV. maila. Honako hauek hartzen ditu bere baitan: 1) Kirol aldiari bukaera emateko festak, topaketak eta antzekoak (bazter utzi dira, berariaz, otorduen eta antzekoen gastuak); 2) Ofizialak ez diren gainerako txapelketa eta lehiaketak antolatzea eta horietan parte hartzea; 3) Udako campusak eta antzekoak; eta 4) 750 lizentzia baino gehiago dituzten federazioek antolatzen dituzten gainerako sustapen jarduerak. Diru-laguntza: %35.
4. Diru-laguntza esleitzeko prozedura:
a) Lehenbizi, I. mailari dagozkion eskaerak aztertu eta baloratuko dira, eta baremoaren arabera dagokien kopurua esleituko zaie, betiere eranskin honetako sarreran bloke honentzat ezarritako muga gainditu gabe.
b) I. maila honetan, aipatutako esleipenaren ondoriozko zenbatekoa atal honetarako erabilgarri dagoen kontu-saila baino handiagoa bada, hainbanaketa eginen da ukitutako federazioen artean.
c) Gero, II. mailari dagozkion eskaerak aztertu eta baloratuko dira, eta horiekin ere berdin jokatuko da (behar izanez gero, hainbanaketa ere eginen da).
d) Azkenik, III. eta IV. mailetako eskaerak azertu eta baloratuko dira. Kasu honetan, hainbanaketa egin behar izanez gero, bi maila horientzat eginen da, batera.
6. oinarria. Prestakuntza jarduerak.
1. Federazioek beren teknikari, epaile eta arbitroentzat antolatutako prestakuntza eta birziklatze ikastaroetarako diru-laguntza emanen da (jardunaldiak, clinic deiturikoak eta antzekoak), baita teknikari eta/edo kirolari nafarrek Nafarroako federazioen bitartez beste entitate batzuek antolatutako ikastaroetan parte hartzeko ere.
2. Kanpo uzten dira deialdi zehatzago baten bidez diruz laguntzen ahal diren jarduerak.
3. Aplikatuko den diru-laguntza gastuaren %30ekoa izanen da, baina aurreikusitako defizita gainditu gabe.
4. Nafarroako federazioek antolatutako jardueretan, gastu kontzeptu hauek hartuko dira aintzat: begiraleen ordainketak, material didaktikoa, zabalkuntza eta komunikazio gastuak, eta instalazioak (baldin eta NKGIk ezin baditu bere instalazioak edo itundutako beste batzuk erabili). Beste entitate batzuek antolatutako ikastaroetan parte hartzeko, gastu hauek hartuko dira aintzat: izena ematekoak, joan-etorriak, eta ostatu eta otordu gastuak, halakorik badago. Gastu horiek behar diren fakturen bidez justifikatuko dira, benetan egindako gastuaren arabera.
7. oinarria. Kirol jantziak.
1. Atal honetan, Espainiako txapelketetan parte hartzen duten Nafarroako selekzioen gastu hauek sartzen dira: kirol jantzi ofizialak (paseokoak zein beroketa egitekoak) eta haien osagarriak erosteko gastuak, betiere Nafarroako Kirolaren eta Gazteriaren Institutuak oniritziarekin erosi badira.
2. Jantzietan irudi korporatiboaren marka agertu behar da, Nafarroako Kirolaren eta Gazteriaren Institutuak zehazten duena. Eskuratu aurretik, materialaren behin betiko diseinua aurkeztu beharko da Nafarroako Kirolaren eta Gazteriaren Institutuan, eta, eskuratu ondoren, erositako materialaren ale bana.
3. Materialaren ezaugarri teknikoak:
a) Jantzi arruntak: txandala, poloa, parka, zira, izerditakoa, kamiseta eta jokatzeko galtzak.
b) Osagarri arruntak: bidaietarako poltsa eta/edo motxila.
c) Berariazko osagarriak kirol modalitatearen arabera: betiere Nafarroako Kirolaren eta Gazteriaren Institutuaren oniritziarekin.
d) Gomendatutako koloreak: gorria (oinarrizko kolorea), urdina, eta zuria kontrasterako.
4. Aplikatu beharreko baremoa: Kiroletako Batzorde Gorenaren bidez antolatutako Espainiako Txapelketetan parte hartzen duten federazioen eskaerak aztertuko dira lehenbizi; ondoren, errendimendu programetan sartutako federazioenak, 2014ko deialdian diru-laguntza jaso zutenenak; azkenik, aurrekontuko kontu-sailean oraindik diru erabilgarririk balego, gainerako eskaerak aztertuko lirateke. Kasu guztietan, baremo hau aplikatuko da, eskatutako jantzien aurrekontuaren arabera:
I.–1.000 euro arte, kopuru hori barne, %100.
II.–1.000,01 eurotik 2.000ra bitarte, %90.
III.–2.000,01 eurotik 3.000ra bitarte, %80.
IV.–3.000,01 eurotik 4.000ra bitarte, %70.
V.–4.000,01 eurotik 5.000ra bitarte, %60.
VI.–5.000,01 eurotik 10.000ra bitarte, %50.
VII.–10.000 eurotik gora, %25.
5. Baremoa aplikatu ondoren, deialdirako baimendutako zenbatekoa gainditzen bada, diruz lagundutako federazioen artean hainbanatuko da, honela:
a) Aurrekontuko kontu-saila agortzen bada Kiroletako Batzorde Gorenaren bidez antolatutako Espainiako Txapelketetan parte hartzen duten federazioen eskaerak aztertzean, federazio guztien artean eginen da hainbanaketa.
b) Aurrekontuko kontu-sailean diru aski baldin badago errendimendu programetan sartutako federazioen eskaerak aztertzeko, eta orduan agortzen bada, federazio horien artean eginen da hainbanaketa.
c) Aurrekontuko kontu-saila aski izan bada federazio guztien eskaerei kasu egiteko, aurreko bi ataletako edozeinetan sartu gabeko federazioen artean baizik ez da eginen hainbanaketa.
8. oinarria. Material inbentariagarriaren ekipamendua.
1. Diru-laguntza eskatzen ahal da tresna informatikoak, kiroleko materiala, bulegoko materiala, komunikazio sistemak eta, oro har, federazioei egokitutako Kontabilitate Plan Orokorraren kontabilitate-irizpideen arabera inbentariagarria den beste edozein material eskuratzeko.
2. Aplikatu beharreko baremoa. Diru-laguntza zehazteko, portzentaje hauek aplikatuko dira, eskatutako materialaren aurrekontuaren arabera:
a) 601 euro arte, kopuru hori barne, %90.
b) 601,01 eurotik 1.200era bitarte, %85.
c) 1.200,01 eurotik 1.800era bitarte, %80.
d) 1.800,01 eurotik 2.400era bitarte, %75.
e) 2.400,01 eurotik 3.000ra bitarte, %70.
f) 3.000,01 eurotik 3.600era bitarte, %65.
g) 3.600,01 eurotik 4.200era bitarte, %60.
h) 4.200,01 eurotik 5.000ra bitarte, %55.
i) 5.000,01 eurotik 10.000ra bitarte, %45.
j) 10.000 eurotik gora, %45era bitarte, aurrekontuan erabilgarri dagoen diruaren arabera.
3. Aurreko ataleko portzentajeak federazioek eskatutako materialari aplikatuko zaizkio. Eskaerak ondoko bi kontzeptuetan sailkatuko dira:
a) Kirol materiala.
b) Bulegoko materiala, komunikaziokoa, administratiboa eta antzekoa.
4. Baremoa aplikatu ondoren, deialdirako baimendutako zenbatekoa gainditzen bada, diru-laguntza eskatu duten federazioen artean hainbanatuko da.
Iragarkiaren kodea: F1504733
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
