Iragarkia
68. ALDIZKARIA - 2015eko apirilaren 10a
1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.2. Oposizioak eta lehiaketak. Lan publikoaren eskaintza
651/2015 EBAZPENA, martxoaren 18koa, Hezkuntza Departamentuko Giza Baliabideen Zerbitzuko zuzendariak emana. Honen bidez merezimendu-lehiaketarako deialdia onesten da, Irakasleentzako Laguntza Zentroetako (ILZ) zuzendari eta aholkulari izateko lanpostuak zerbitzu eginkizunen araubidean betetzeko.
Ekainaren 17ko 245/1996 Foru Dekretuak Nafarroako Foru Komunitateko irakasleen etengabeko prestakuntzaren sarea sortu, egituratu eta antolatzeko arauak ematen ditu. Foru dekretu horren 5. eta 6. artikuluek Irakasleentzako Laguntza Zentroetako zuzendarien eta aholkularien izendapena eta eginkizunak ezartzen dituzte.
Apirilaren 30eko 37/2014 Foru Dekretuaren bidez Nafarroako Foru Komunitateko Administrazioaren unibertsitateaz kanpoko irakasle kidegoei dagozkien lanpostuak nola bete arautzen da. Haren 3. artikuluko 1. eta 2. ataletan ezartzen da Hezkuntza Departamentuak merezimendu-lehiaketen deialdiak eginen dituela, Irakasleentzako Laguntza Zentroetako (ILZ) aholkulari eta zuzendari izateko lanpostuak zerbitzu eginkizunetan betetzeko. Eskumena duen organoak proposaturik eginen dira deialdiak, ikastetxea zein gairekin loturik dagoen haren arabera.
Horrenbestez, Hezkuntza Departamentuko Unibertsitateen, Kalitatearen eta Prestakuntzaren Zerbitzuak proposamena jasota, Irakasleentzako Laguntza Zentroetako zuzendari eta prestakuntzarako aholkulari izateko zenbait lanposturen deialdia egiteko, ikasturte honetarako, bidezkoa da lanpostu horiek betetzeko merezimendu-lehiaketarako deialdia onestea, zerbitzu eginkizunen araubidean betetzeko.
Hezkuntza Departamentuko Hezkuntza Baliabideen zuzendari nagusiaren abuztuaren 3ko 15/2011 Ebazpenak eman dizkidan eskudantziak erabiliz, bidezkoa da:
1. Merezimendu-lehiaketarako deialdia onestea, Irakasleentzako Laguntza Zentroetako zuzendari eta aholkulari izateko lanpostuak zerbitzu eginkizunetan betetzeko.
2. Ebazpen hau eta dagozkion eranskinak Nafarroako Aldizkari Ofizialean argitara daitezela agintzea.
3. Ebazpen hau eta eranskinak igortzea Idazkaritza Tekniko Nagusiari, Giza Baliabideen Zerbitzuko Deialdien Atalari, Unibertsitateen, Kalitatearen eta Prestakuntzaren Zerbitzuari eta Argibide eta Agiri Bulegoari, behar diren ondorioak izan ditzaten.
MEREZIMENDU-LEHIAKETARAKO DEIALDIAREN OINARRIAK
Lehena.–Merezimendu-lehiaketarako dei egin da, deialdi honetan ezartzen diren zehaztapenei jarraikiz, Irakasleentzako Laguntza Zentroetako (ILZ) zuzendari eta aholkulari izateko honako lanpostu hauek zerbitzu eginkizunetan betetzeko:
ZENTROA ETA HERRIA | LANPOSTUA | LANPOSTU KOPURUA |
Lizarrako ILZ | Zuzendaritza | 1 |
Lizarrako ILZ | Hezkuntza teknologietako aholkularitza | 1 |
Lekarozko ILZ | Zuzendaritza | 1 |
Lekarozko ILZ | Hezkuntza teknologietako aholkularitza | 1 |
Iruñeko ILZ | Zuzendaritza | 1 |
Iruñeko ILZ | Hezkuntza teknologietako aholkularitza | 1 |
Iruñeko ILZ | Haur eta Lehen Hezkuntzako aholkularitza | 1 |
Iruñeko ILZ | Esparru zientifiko-teknologikoko aholkularitza | 1 |
Iruñeko ILZ | Lanbide Heziketako aholkularitza | 1 |
Iruñeko ILZ | Kalitatea kudeatzeko sistemetako aholkularitza | 1 |
Iruñeko ILZ | IKT tresnetako aholkularitza kalitatea kudeatzeko sistemetan | 1 |
Tafallako ILZ | Hezkuntza teknologietako aholkularitza | 1 |
Tuterako ILZ | Hezkuntza teknologietako aholkularitza | 1 |
Bigarrena.–Izangaien baldintza orokorrak eta lanbide-profila.
1. Deialdi honetan parte hartzen duten izangaiek baldintza orokor hauek bete beharko dituzte onartuak izateko:
–Irakasle funtzionarioa edo lan-kontratudun finkoa izatea eta, egitura organikoaren eta eginkizunen ondorioetarako, Nafarroako Gobernuko Hezkuntza Departamentuaren mende egotea.
–Jardunean egotea 2015eko irailaren 1ean.
Orobat, ebazpenaren I. eranskinean eskatzen diren berariazko baldintzak bete beharko dituzte izangaiek.
2. Irakasleentzako Laguntza Zentroetako zuzendari eta aholkulari lanetan arituko diren pertsonen lanbide-profila unibertsitatez kanpoko hezkuntza mailetako irakasle profesional batena izanen da, prestakuntza sendoa eta eguneratua izanen du didaktika eta pedagogia arloetan, eta ongi ezagutuko du bere lanaren testuingurua eta aukeratu nahi duen zentroaren proiektu pedagogikoa. Izangaiek trebetasuna izan behar dute Informazioaren eta Komunikazioaren Teknologiak (IKT) erabiltzeko, tresnak ezagutzeari eta erabiltzeari nahiz erabilera didaktikoari dagokienez. Halaber, gaitasuna izan behar dute lan-taldeetan aritzeko, eta antolatu, komunikatu eta dinamizatzeko trebetasuna izan.
Hirugarrena.–Parte hartzeko eskabidea eta aurkeztu beharreko agiriak.
1. Deialdi honetan parte hartu nahi dutenek eskabide baten bidez eskatu beharko dute; eskabidearen eredua interesdunen eskura izanen da Nafarroako Gobernuko Hezkuntza Departamentuko Argibide eta Agiri Bulegoan. Eskabidea, halaber, Hezkuntza Departamentuaren web orrian egonen da: www.educacion.navarra.es.
Parte hartzeko baldintzak ofizioz egiaztatuko ditu Hezkuntza Departamentuko Giza Baliabideen Zerbitzuak, izangaien espediente pertsonalei jarraikiz. Euskaraz jakin beharra duten lanpostuak eskatzen dituzten izangaiek EGA edo titulu baliokide baten jabe direla frogatzeko dokumentazioa aurkeztu beharko dute, salbu jadanik zerbitzu orrian jaso bada.
Parte hartzeko eskabidearekin batera, izangaiek aurkeztu beharko dituzte ebazpen honen II. eranskineko merezimenduen baremoko merezimenduen frogagiriak.
Eskabideak aurkezteko epea bukatu aurretik burutu, eta ezarritako epean aurkeztu diren merezimenduak baizik ez dira baloratuko.
Betebehar bat frogatzeko aurkezten den dokumentazioa ez da merezimendu gisa baloratzen ahalko.
2. Parte hartzeko eskabideak eta erantsitako dokumentazioa ondoko toki hauetakoren batean aurkeztu beharko dira: Hezkuntza Departamentuko Erregistroan (Santo Domingo, zk.g., Iruña), Nafarroako Gobernuko Erregistro Orokorrean, Nafarroako Gobernuaren gainerako erregistro bulegoetan (zerrenda 2014ko 46. Nafarroako Aldizkari Ofizialean argitaratu zen, martxoaren 7an), edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazitako bideren bat erabiliz.
Eskabidea posta bulego batean aurkeztuz gero, gutun-azal irekian aurkeztuko da, postako langileek data eta zigilua jar ditzaten, ziurtatu aurretik.
Halaber, ekainaren 23ko 70/2008 Foru Dekretuan xedatutakoarekin bat, eskabidea telematika bidez aurkezten ahalko da, Nafarroako Foru Komunitateko Administrazioaren Erregistro Orokor Elektronikoan. Erregistro hori Nafarroako Gobernuaren Interneteko web atarian dago (www.navarra.es). Kasu horretan, parte hartzeko eskabidearekin batera aurkeztu beharreko agiriak eransteko, Erregistro Orokor Elektronikoan artxiboak eransteko aurreikusita dauden formatuetatik edozein erabil daiteke.
3. Aurkezten diren agiriek ez dute zertan jatorrizkoak edo fotokopia konpultsatuak izan; agiri horien fotokopia arruntak aurkezten ahalko dira eskabideak aurkezteko epearen barnean.
Edozein unetan parte hartzeko eskabidearekin batera aurkeztu diren agirien jatorrizkoak edo fotokopia konpultsatuak eskatzen ahalko dizkie Administrazioak izangaiei.
4. Gaztelaniara itzuli beharko dira atzerriko hizkuntza batean idatzitako agiriak eta beste autonomia erkidego bateko hizkuntza ofizial propioan idatzitakoak, euskarazkoak izan ezik. Zinpeko itzultzaileek egin beharko dituzte itzulpen horiek eta agiriarekin batera aurkeztu beharko dira.
III. eranskineko baremoaren 2.3.2. atalaren arabera, hizkuntzak jakitea frogatzen duten ziurtagiriak ez dira itzuli beharko gaztelaniara.
Laugarrena.–Eskabideak aurkezteko epea.
Hamar egun balioduneko epea izanen da eskabideak aurkezteko, deialdi hau Nafarroako Aldizkari Ofizialean argitaratu eta biharamunetik hasita.
Bosgarrena.–Izangaiak onartzea.
1. Eskabideak aurkezteko epea bukaturik, Giza Baliabideen Zerbitzuak izangai onartu eta baztertuen behin-behineko zerrendak argitaratuko ditu Argibide eta Agiri Bulegoan eta Hezkuntza Departamentuaren webgunean (www.educacion.navarra.es). Baztertuen kasuan, ez onartzeko arrazoiak ere agertuko dira.
Argitaratze horren bidez, ukitutako izangai guztiei jakinarazi zaiela ulertuko da.
Zerrenda horien kontra interesdunek erreklamazioak aurkezten ahalko dituzte, Giza Baliabideen Zerbitzuari zuzendutako idazki baten bidez, bost egun balioduneko epean, behin Argibide eta Agiri Bulegoan eta Hezkuntza Departamentuaren www.educacion.navarra.es webgunean argitaratu eta biharamunetik.
2. Epe hori iraganik, modu berean, izangai onartu eta baztertuen behin betiko zerrendak onesten dituen Gizarte Baliabideen Zerbitzuko zuzendariaren ebazpena argitaratuko da. Baztertuen kasuan, ez onartzeko arrazoiak agertuko dira.
Argitaratze horren bidez, ukitutako izangai guztiei jakinarazi zaiela ulertuko da.
Ebazpen horretan aurkezpen ekitaldia egiteko eguna eta tokia finkatuko dira.
3. Izangai bazterturik ez badago, zuzenean onetsiko dira behin betiko zerrendak, eta Hezkuntza Departamentuko Argibide eta Agiri Bulegoan eta Hezkuntza Departamentuaren web gunean (www.educacion.navarra.es) argitaratuko dira.
Seigarrena.–Hautapen sistema.
1. Hautapen sistemak bi zati ditu:
a) Lehenbiziko zatian nahi den lanpostuaren eginkizunei lotutako proiektu bat aurkeztu eta defendatu beharko da, ebazpen honen II. eranskinean agertzen diren zehaztapenekin bat. Baztertzailea izanen da probari esleitutako puntuazioaren erdira ailegatzen ez direnentzat.
Izangai bakoitzak epaimahaiari azaldu beharko dio proiektua, ahoz, 30 minutuz gehienez. Gero, epaimahaiak ahoz eginen dizkion galderak erantzun beharko ditu, 15 minutuz gehienez.
Proiektuaren aurkezpena eta defentsa baloratzeko, 0tik 10era bitarteko puntuazioa emanen zaio, eta gutxienez 5 puntu lortu ez dutenak baztertuko dira.
Lortzen den puntuazioa epaimahaiko kideek emandakoen batez besteko aritmetikoa izanen da.
b) Bigarren zatian merezimenduak baloratuko dira, ebazpen honen III. eranskinean ezarritako merezimenduen baremoarekin bat, eta gehienez 10 puntu emanen dira.
Hautapen prozeduraren lehenbiziko zatia gainditzen duten izangaien merezimenduak bakarrik baloratuko dira.
Epaimahaiek izanen dute izangaien merezimenduak baloratzeko erantzukizuna. Nolanahi ere, Giza Baliabideen Zerbitzuak emanen die epaimahaiei izangaien merezimenduen berri, merezimenduen baremoko I. ataleko balorazioaren ondorioetarako.
2. Prozedura hasteko, izangaiak epaimahaiaren aurrean aurkeztuko dira eta proiektuaren kopia bat emanen diote. Aurkezpen ekitaldira joaten ez diren edo proiektuaren kopia ematen ez duten izangaiak hautapen prozeduratik baztertuko dira, eta ez da zilegi izanen beste pertsona batzuk haien ordez agertzea.
Izangaiei aurkezpen ekitaldira bertaratzeko deituko zaie. Horretarako, Giza Baliabideen Zerbitzuko zuzendariak ebazpena emanen du, prozeduran onartutako izangaien behin betiko zerrenda onesteko, eta 48 ordu lehenago, gutxienez, Hezkuntza Departamentuko Argibide eta Agiri Bulegoan (Santo Domingo kalea, zk.g., Iruña) eta departamentuaren web orrian (www.educacion.navarra.es) jendaurrean jarriko da. Bertan adieraziko da epaimahaien aurreko jarduketa noiz, zer ordutan eta non hasiko den.
Izangaiek parte hartzeko ordena alfabetikoa izanen da. Lehenengo deituraren hasieran “B” eta “S” letrak dituen izangaia hasiko da, Hezkuntza Departamentuko Giza Baliabideen Zerbitzuko zuzendariaren otsailaren 24ko 422/2015 Ebazpenarekin bat. Haren bidez, argitara eman zen letren zozketaren emaitza 2014-2015 ikasturtean Giza Baliabideen Zerbitzuak kudeatzen dituen deialdietarako.
3. Behin epaimahaiaren aurreko jarduketak hasita, izangaiei egin beharreko hurrengo deiak Argibide eta Agiri Bulegoan eta departamentuaren web orrian (www.educacion.navarra.es) eginen dituzte epaimahaiek.
4. Izangaien balorazioa bukaturik, epaimahaiek behin-behineko kalifikazioak argitaratuko dituzte, proiektuaren aurkezpeneko eta defentsako puntuazioekin, eta, behar denean, merezimenduen baremoko puntuazioekin, Argibide eta Agiri Bulegoan eta departamentuaren web orrian: www.educacion.navarra.es.
Berdinketak honako irizpide hauek, hurrenez hurren, kontuan hartuta hautsiko dira:
–Proiektuaren aurkezpenean eta defentsan lortutako puntuazio handiena.
–Ataletan eta azpiataletan zeinek duen puntu gehien, merezimenduen baremoko hurrenkeraren arabera.
Berdinketak badirau, letren zozketaren emaitza hartuko da kontuan. Zozketa Hezkuntza Departamentuko Giza Baliabideen Zerbitzuko zuzendariaren otsailaren 24ko 422/2015 Ebazpenean dago ezarria.
Behin-behineko kalifikazioen kontra izangaiek erreklamazioak aurkezten ahal dituzte, Giza Baliabideen Zerbitzuko zuzendariari zuzenduak, argitara eman eta biharamunetik bi egun balioduneko epean.
Erreklamazioak ebatzi ondoren, epaimahaiak behin betiko kalifikazioak bidaliko dizkio Giza Baliabideen Zerbitzuari, proiektuaren aurkezpeneko eta defentsako puntuazioekin, eta, behar denean, merezimenduen baremoko puntuazioarekin, prozeduraren espediente osoarekin batera, eta Argibide eta Agiri Bulegoan eta departamentuaren web orrian argitaratuko dira (www.educacion.navarra.es).
5. Deialdi honen zerbitzu eginkizunak Giza Baliabideen Zerbitzuaren ebazpen batez bidez emanen dira, hautatutako izangaien ordenaren arabera.
Zazpigarrena.–Epaimahaiak.
1. Epaimahai bakoitzak hiru kide izanen ditu: bi Hezkuntzaren, Lanbide Heziketaren eta Unibertsitateen Zuzendaritza Nagusiak proposatuak, eta bat irakasleen langile batzordeak proposatua.
Epaimahaien osaera ebazpen honen IV. eranskinean agertzen da.
Beharrezkoa bada, ordezko kideak izendatuko dira.
2. Epaimahaietako kideek ez dute parte hartuko, eta organo dei egileari horren berri emanen diote, baldin eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 28. artikuluan parte ez hartzeko aipatzen diren egoeretakoren batean badaude.
Izangaiek, halaber, zilegi dute epaimahaikideak errefusatzea, egoera horietako bat gertatzen denean.
Zortzigarrena.–Zerbitzu-eginkizunen araubidea.
1. Zerbitzu eginkizun hauek, hasteko, bi ikasturte oso iraunen dute, 2015eko irailaren 1ean hasita.
Zuzendaritza lanpostuetarako, behin lehenbiziko ikasturtea bukaturik eta bigarren ikasturteko martxoaren 1a baino lehen, irakasle interesdunek ordura arteko lanaren memoria aurkeztuko diote gai horretan eskuduna den zerbitzuari. Gai bakoitzean eskuduna den zerbitzuak baloratuko du memoria. Memoriaren balorazioa Giza Baliabideen Zerbitzuari bidaliko zaio dagokion ikasturteko apirilaren 30a baino lehen.
Aholkularitza lanpostuetarako, behin lehenbiziko ikasturtea bukaturik eta bigarren ikasturteko martxoaren 1a baino lehen, irakasle interesdunek ordura arteko lanaren memoria aurkeztuko diote ikastetxeko zuzendariari. Ikastetxeko zuzendariak baloratuko du memoria, baita gai bakoitzean eskuduna den zerbitzuak ere. Memoriaren balorazioa Giza Baliabideen Zerbitzuari bidaliko zaio dagokion ikasturteko apirilaren 30a baino lehen.
Memoriak balorazio positiboa izateak ekarriko du zerbitzu eginkizunak hiru ikasturtez luzatu ahal izatea.
2. Aurreko atalean aipatzen den bost urteko aldia bukaturik, baldin Irakasleentzako Laguntza Zentro berean lanpostu baten jabetza bigarren aldiz eta jarraian hartzen bada, deialdi bidez, betetzen zen behin betiko irakasle plazaren erreserba bukatu eginen da.
Zerbitzu eginkizunak bukaturik, ukitutako irakasleek lehentasunezko eskubidea izanen dute destinoa lortzeko, beren azken behin betiko destinoko herriko edo eskualdeko ikastetxeetan.
3. Deialdi honen ondorioz ematen diren zerbitzu eginkizunak arrazoi hauetako batengatik bukatuko dira:
a) Emandako aldia bukatzeagatik.
b) Ikastetxea kentzeagatik edo aldatzeagatik, eta horrek ez uzteagatik kentze edo aldatze horrek ukitutako zerbitzu eginkizunei segida ematea.
c) Interesdunak berariaz uko egiteagatik.
d) Gerora sortutako arrazoiengatik, hain zuzen, lanpostuan aritzeko gaitasun falta edo egokitu ezina erakusten badu, horrek baldin badakar errendimendu eskasa eta, horrenbestez, burutzaren eginkizunak eraginkortasunez betetzea galaraztea, eta orobat, lanpostuaren eginkizunak aldatzen badira.
Aipatu arrazoi batengatik zerbitzu eginkizunak bukatu aurretik, deialdia proposatu duen organoak txosten arrazoitu baten bidez eskatuko dio Giza Baliabideen Zerbitzuko zuzendariari zerbitzu eginkizunak bukatzeko prozedurari hasiera emateko.
Prozedura Giza Baliabideen Zerbitzuko zuzendariaren ebazpenaren bidez hasiko da. Ondoren igorriko da, ikastetxeko zuzendaritzak emandako txostenarekin batera, deialdia proposatu duen organoari, horrek egin ditzan egoki irizten dituen jarduketak, interesduna eta irakasleen batzordea entzun ondoren.
Bidezko jarduketak egin ondoren, deialdia proposatu duen organoak kontratatutako langileen gaitasuna edo lanposturako egokitzapena baloratzeko txostena prestatuko du. Txosten hori Giza Baliabideen Zerbitzuari igorriko zaio.
Txosten hori negatiboa bada, zerbitzu eginkizunei bukaera emanen zaie Giza Baliabideen Zerbitzuko zuzendariaren ebazpen baten bidez.
e) Jardunean ez den beste egoera administratibo batera pasatzeagatik.
f) Administrazioaren beste lanpostu baterako izendatua izateagatik.
g) Beste zerbitzu eginkizun batzuk emateagatik, dela Nafarroako Foru Komunitateko Administrazioaren eta haren erakunde autonomoen barrenean, dela beste administrazio publiko batean.
h) Zerbitzu eginkizunak ematea eragin zuen beharra desagertzeagatik, ikastetxean behin betiko destinoa duen irakasle batek lanpostua bete ondoren.
Justifikatutako aparteko kasuetan izan ezik, b eta c letretan aurreikusitako arrazoi batengatik zerbitzu eginkizunak aurreikusitakoa baino lehen bukatzen badira, ikasturtearekin batera bukatuko da.
4. Zerbitzu eginkizunak hasi baino lehen aurreko atalean aurreikusitako arrazoi bat (a eta d letretakoak izan ezik) gertatzen denean, zerbitzu eginkizunak ez dira emanen.
5. Zerbitzu eginkizun hauek ez dira bateragarriak maiatzaren 14ko 39/2014 Foru Dekretuan ezarritako baimenekin. Haren bidez, Nafarroako Administrazio Publikoetan enplegua banatzeko neurriak ezarri ziren.
Horrenbestez, funtzionarioek horrelako baimenen bat esleiturik badute, uko egin beharko diote, baldin nahi badute deialdi honetan ezarritako zerbitzu eginkizunak esleitzea. Orobat, funtzionarioari zerbitzu eginkizunak eman bazaizkio edo zerbitzu eginkizunetan aritzen bada eta aipatutako baimenen bat eskatzen badu, baimena ez zaio esleituko.
6. Deialdi honetan izangai bat ere ez hautatzeagatik hutsik gelditzen diren lanpostuak zerbitzu eginkizunen bidez betetzen ahalko dira ikasturte baterako, organo eskudunak proposatu ondoren.
Bederatzigarrena.–Errekurtsoak.
Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Hezkuntza Departamentuko Giza Baliabideen Zerbitzuko zuzendariari zuzenduta, errekurtsoaren xede den egintza argitaratu edo jakinarazi eta biharamunetik hilabeteko epean.
Ebazpen honen eta berau aplikatzeko egintzen kontra gora jotzeko errekurtsoa jar daiteke, Lehendakaritza, Justizia eta Barneko kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik aurrera.
Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.
Iruñean, 2015eko martxoaren 18an.–Giza Baliabideen Zerbitzuko zuzendaria, Begoña Unzué Vela.
I. ERANSKINA Betebehar berariazkoak A.–Zuzendaritzako lanpostuak |
ZENTROA ETA HERRIA | LANPOSTUA | BETEBEHAR BERARIAZKOAK |
Lekarozko ILZ | Zuzendaritza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea | ||
EGA titulua edo baliokideren bat izatea | ||
Iruñeko ILZ | Zuzendaritza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea | ||
Lizarrako ILZ | Zuzendaritza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea |
B.–Aholkularitzako lanpostuak |
ZENTROA ETA HERRIA | LANPOSTUA | BETEBEHAR BERARIAZKOAK |
Lekarozko ILZ | Hezkuntza teknologietako aholkularitza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea | ||
EGA titulua edo baliokideren bat izatea | ||
Iruñeko ILZ | Hezkuntza teknologietako aholkularitza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea | ||
EGA titulua edo baliokideren bat izatea | ||
Iruñeko ILZ | Haur eta Lehen Hezkuntzako aholkularitza | Eskabideak aurkezteko azken egunean karrerako funtzionario gisa gutxienez 3 urte izatea |
Maisu-maistren kidegokoa izatea | ||
EGA titulua edo baliokideren bat izatea | ||
Iruñeko ILZ | Esparru zientifiko-teknologikoko aholkularitza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoa eta espezialitate hauetako bat izatea: Biologia eta Geologia, Fisika eta Kimika, Matematika edo Teknologia | ||
Iruñeko ILZ | Lanbide Heziketako aholkularitza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoa izatea Lanbide Heziketa berariazkoaren espezialitateetako batean edo Lanbide Heziketako Irakasle Teknikoen Kidegokoa izatea. | ||
Iruñeko ILZ | Kalitatea kudeatzeko sistemetako aholkularitza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea | ||
Iruñeko ILZ | IKT tresnetako aholkularitza kalitatea kudeatzeko sistemetan | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea | ||
Lizarrako ILZ | Hezkuntza teknologietako aholkularitza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea | ||
Tafallako ILZ | Hezkuntza teknologietako aholkularitza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea | ||
Tuterako ILZ | Hezkuntza teknologietako aholkularitza | Eskabideak aurkezteko azken egunean karrerako funtzionario gisa gutxienez 3 urte izatea |
Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak edo maisu-maistrak izatea |
II. ERANSKINA
Hautapen sistemaren eta lanpostuen zehaztapenak
1.–Zuzendaritza lanposturako.
A.–Lan proiektua.
Interesdunek lan proiektua aurkeztuko dute, honako gai hauek landuko dituena:
a) Irakasleen etengabeko prestakuntzari buruzko alderdi orokorrak eta hautagaiaren ikuspegia.
b) Ekintza plana eta hobetzeko plana, gutxienez atal hauek jasoko dituena:
–Bere lanerako proposatzen dituen helburuak. Helburu horiek ezartzean, lortu nahi den zuzendaritzari dagokion ILZren proiektu pedagogikoa hartuko da aintzat, ekainaren 17ko 245/1996 Foru Dekretuaren 9. artikuluan aipatzen dena.
–Helburu horiek lortzeko ekintza lerroak eta proiektuak.
Helburuen betetze-maila baloratzeko adierazleak.
Proiektuak 25 orrialde izanen ditu gehienez ere (eranskinak barne, halakorik bada), alde batetik idatzita, DIN A-4 tamainan, Arial 11 letra erabiliz.
Proiektua eta defentsa baloratzeko, irizpide hauek hartuko dira kontuan: Irakasleen prestakuntzatik abiatuta, irakaskuntzaren kalitatea hobetzeko beharrei erantzun berritzaile eta eraginkorrak emateko eta horiek antolatzeko gaitasuna, baita izangaiaren ikuspegiaren egokitasuna eta originaltasuna ere, lortu nahi duen zuzendaritzari dagokion ILZko proiektu pedagogikoari dagokionez eta deialdiaren bigarren oinarrian adierazitako lanpostuaren profilari dagokionez.
Halaber, baloratuko da izangaiek gaitasuna eta ezagutza erakustea honako hauetan:
a) Lan taldeak gidatzea eta antolatu, komunikatu eta dinamizatzeko trebetasuna izatea, zuzendaritza lanak lankidetza eta talde-lanaren eredu batean burutzeko.
b) Prestakuntza eta berrikuntzaren gaineko planak, programak eta jarduerak koordinatzea.
c) Irakasleen prestakuntzaren gaineko egungo esparru teorikoen ezagutza aplikatzea, funtsezko gaitasunak curriculumean sartzea aplikatuz, hezkuntzaren kalitatea hobetzeko, ikastetxeen ebaluaziotik eta haien beharrak detektatzetik abiatuta.
d) Irakasleen Prestakuntza Plana sustatu eta gidatzea, Hezkuntza Departamentuak Irakasleen Prestakuntzako Atalaren bitartez ezarritako lehentasunezko ildo eta programei jarraikiz.
e) Irakasleen Prestakuntzako Atalak ezarritako lan ildoei jarraikiz, ILZko talde pedagogikoa koordinatzea Irakasleen Prestakuntza Plana prestatzeko prozesuaren fase guztietan: detekzioa, diseinua, gauzatzea eta ebaluazioa.
f) Irakaskuntzarako lanbide gaitasunen hobekuntza bultzatzea, ILZko talde pedagogikoaren prestakuntza sustatuz, etengabeko hobekuntzan eta talde-lanean oinarritutako berrikuntza prozesu gisa.
g) IKTak eta kalitatea kudeatzeko sistemak bultzatu eta integratzea zuzendaritza eta prestakuntza prozesuetan.
B.–Eginkizunak eta antolaketa.
Irakasleentzako Laguntza Zentroetako zuzendariek Nafarroako Foru Komunitateko irakasleen etengabeko prestakuntzaren sarea sortu, egituratu eta antolatzeko arauak ematen dituen ekainaren 17ko 245/1996 Foru Dekretuaren 6. artikuluan ezarritako eginkizunak izanen dituzte.
Horrez gain, Hezkuntza Departamentuko unitate administratiboek bultzatzen dituzten programekiko koordinazio eta lankidetza aktiboa sustatuko dute.
Beharrezkoa denean, bere ekimenez edo irakasleen etengabeko prestakuntzaren ardura duen unitateak erabakita, Irakasleentzako Laguntza Zentroko zuzendariak aholkulari lanak egiten ahalko ditu zuzentzen duen ILZri dagokion eremuan.
2.–Aholkularitza lanposturako.
A.–Lan proiektua.
Interesdunek lan proiektu bat aurkeztuko dute, hobekuntza planak aurrera eramateko behar diren estrategiak garatuko dituena, ikastetxeen testuingurua eta Hezkuntza Departamentuaren ildoak kontuan hartuta. Proiektuaren xedea izanen da prestakuntzarako proposamen berritzaile bat diseinatu, egin eta ebaluatzea, irakaskuntzarako gaitasun profesionalak hobetzeko asmoz, hezkuntzaren kalitatean eragina izanen duena.
Hautagaiak aukeratu nahi duen hezkuntza esparrua(k) ezagutzen d(it)uela erakutsi beharko du, baita hautatu nahi duen lanpostuaren lanbide profilak beharrezko dituen aholkularitza-gaitasunak ere, proposamena gauzatzeko beharrezkotzat jotzen baitira. Halaber, proposamenean IKTak txertatzeko aurreikuspenak esplizituki azalduko dira, eta horrek hezkuntzaren kalitatean izango duen eragina.
Proiektuak 25 orrialde izanen ditu gehienez ere (eranskinak barne, halakorik bada), alde batetik idatzita, DIN A-4 tamainan, Arial 11 letra erabiliz.
Proiektua eta defentsa baloratzeko, irizpide hauek hartuko dira kontuan: irakasleen prestakuntzatik abiatuta, irakaskuntzaren kalitatea hobetzeko beharrei erantzun berritzaile eta eraginkorrak emateko eta horiek antolatzeko gaitasuna, baita izangaiaren ikuspegiaren egokitasuna eta originaltasuna ere, aholkulari lana eginen dueneko ILZko proiektu pedagogikoari dagokionez eta deialdiaren bigarren oinarrian adierazitako lanpostuaren profilari dagokionez.
Halaber, honako hauetarako gaitasuna baloratuko da:
a) Curriculumari lotutako alderdi zientifiko eta didaktikoetan duen prestakuntza, eta eskuratu nahi den lanpostuaren hezkuntza etapa edo etapetarako egokiak diren proposamen metodologikoen gaineko prestakuntza.
b) Ikasgelako metodologia aktiboen gaineko prestakuntza eta curriculuma garatzea funtsezko gaitasunak sartuz.
c) Irakasleen prestakuntzaren gaineko esparru teorikoak ezagutzea, bereziki irakasleen talde lana eta lankidetza bultzatzen dituzten prestakuntza ereduen gainekoak, hori guztia hezkuntzaren kalitatea hobetzeko asmoz, ikastetxeen ebaluaziotik eta haien beharrak detektatzetik abiatuta.
Gainera:
d) IKT tresnetako aholkularitzarako kalitatea kudeatzeko sistemetan, baloratuko da, gutxienez, kalitate sareetan parte hartzen duten ikastetxeetan ezarritako KKSetan aplikatu beharreko IKTei buruzko prestakuntza, bereziki hezkuntza kudeaketa arina eta eraginkorra bultzatzen dutenak.
e) Kalitatea kudeatzeko sistemaren aholkularitzarako, gutxienez honako hauek hartuko dira kontuan: Nafarroako Foru Komunitateko ikastetxe publikoetako KKSak diseinatu, ezarri eta aitortzeko prestakuntza, KKSaren barneko auditoretza egiteko eskumena, IKT tresnak integratzea, hezkuntza kudeaketan lankidetzako IKT tresnak integratzea eta indarreko araudia ezagutzea.
f) Hezkuntza teknologietako aholkularitzarako, kontuan hartuko da horiek ezagutzea, esperientzia edo prestakuntzaren bidez, baita mota guztietako proiektuetan parte hartzearen bidez ere (departamentukoak, berrikuntzakoak, teknologia berrietakoak, deialdi nazionalak edo nazioartekoak...) INTEFek egindako Irakaskuntzarako Gaitasun Digitalaren Esparruari dagozkion gaitasunak baloratuko dira, bereziki.
B.–Eginkizunak eta antolaketa.
Aholkulariek Nafarroako Foru Komunitateko irakasleen etengabeko prestakuntzaren sarea sortu, egituratu eta antolatzeko arauak ematen dituen ekainaren 17ko 245/1996 Foru Dekretuaren 17. artikuluan ezarritako eginkizunak izanen dituzte.
Halaber, aholkulariak ikastetxeko erreferentziako aholkulari lanetan arituko dira, zuzeneko prestakuntza emanen dute eta online tutoreak izanen dira.
Hezkuntza Departamentuko unitate administratiboek sustatzen dituzten programetan koordinazio eta lankidetza aktiboa garatuko dute.
Osagarritasun printzipioaren arabera, beharrezkoa izanez gero, aholkulariek edozein etapatan egin beharko dituzte prestakuntza lanak. Halaber, printzipio berean oinarrituta, aholkulariek, irakasleentzako laguntza zentro bati atxikita egonik ere, beste edozein zentrotako eremuan garatutako prestakuntza jarduerak ematen ahalko dituzte, prestakuntza sareak antolatutako jarduerek hala eskatuta.
Horrez, gain, eta prestakuntza beharren arabera, irakasleen prestakuntzari buruzko beste lan eta eginkizun batzuk ere esleitzen ahalko zaizkie aholkulariei, zein lanpostutan sartu ziren kontuan hartu gabe.
III. ERANSKINA
Merezimenduen baremoa
Merezimenduen baremoko puntuazioa, guztira: 10 puntu.
I.–Lanbideko merezimenduak - gehienez 5 puntu.
Karrerako funtzionario gisa izandako irakaslana baloratzean, 0,48 puntu emanen dira zerbitzuko urte bakoitzeko, deialdiaren azkeneko eguna kontuan harturik. Deialdian parte hartzeko behar diren hiru urteak ez dira baloratuko.
Hilabete osoko 0,04 puntu emanen dira, eta gainerako egunak ez dira kontuan hartuko.
Frogagiriak: Hezkuntza Departamentuko Giza Baliabideen Zerbitzuak ofizioz aurkezten duen zerbitzu-orria da merezimendu honen egiaztagiria.
II.–Beste merezimendu batzuk - Gehienez 5 puntu.
2.1.–Prestakuntza jardueretan parte hartzea - Gehienez 2 puntu.
2.1.1.–Lortu nahi den lanpostuarekin lotura zuzena duten prestakuntza jardueretan parte hartzeagatik: 0,05 puntu, frogatutako 10 orduko, eta gehienez puntu 1.
Ondorio horietarako, jarduera guztietako prestaketa orduen batuketa eginen da, eta ez da puntuaziorik emanen 10 ordutik beheitikoengatik. Prestakuntza jarduerak kreditutan –eta ez ordutan– adierazten badira, kreditu bakoitzak 10 orduren balioa izanen du.
Frogagiriak: entitate antolatzaileak emandako ziurtagiriaren fotokopia, zeinetan berariaz agertuko baitira jardueraren kreditu kopurua edo orduak.
2.1.2.–Lortu nahi den lanpostuarekin lotura zuzena duten prestakuntza jarduerak edo ikastaroak emateagatik: 0,1 puntu, frogatutako 5 orduko, eta gehienez puntu 1.
Ondorio horietarako, jarduera guztietako prestaketa orduen batuketa eginen da, eta ez da puntuaziorik emanen 5 ordutik beheitikoengatik. Prestakuntza jarduerak kreditutan –eta ez ordutan– adierazten badira, kreditu bakoitzak 10 orduren balioa izanen du.
Frogagiriak: jarduera egin dela frogatzen duen ziurtagiri edo dokumentuaren fotokopia, zeinetan berariaz agertuko baitira jardueraren kreditu kopurua edo orduak.
2.2.–Gehienez puntu 1.
a) Ikerketa eta berrikuntza jarduerak, lortu nahi den plazarekin lotura dutenak: jarduera bakoitzeko 0,25 puntu.
b) Lortu nahi den plazarekin lotura duten biltzar, simposium edo jardunaldietan aurkeztutako txosten, komunikazio edo lan taldeak: jarduera bakoitzeko 0,25 puntu.
Frogagiriak: aipatutako jardueretan parte hartzearen frogagiriak.
2.3.–Titulazioak – Gehienez 2 puntu.
2.3.1.–Beste titulazio batzuk: gehienez 0,5 puntu.
–Doktore titulua: 0,3 puntu.
–Lizentzia edo dagokion gradua edo baliokidea den titulazioa, baldin izangaiaren irakaskuntzako kidegora sartzeko behar dena ez bada: 0,2 puntu.
–Diploma, bere irakaskuntzako kidegora sartzeko behar denaz bestelakoa: 0,15 puntu.
–Lanbide Heziketako goi mailako teknikariaren titulua: 0,1 puntu.
Frogagiriak: bere kidegoan sartzeko alegatutako tituluaren fotokopia, bai eta merezimendu gisa alegatzen diren guztiena ere edo, hala denean, titulua eskuratzeko eskubideak ordaindu izanaren ziurtagiria.
Titulazioak atzerrian lortzen direnean, titulazio horien fotokopia aurkeztu beharko da, homologazioa egiaztatzen duen agiriarekin batera.
2.3.2.–Hizkuntzak: gehienez 1,5 puntu.
–Euskara (ez da baloratuko baldin ezinbestekoa bazen deialdi honetan parte hartzeko): EGA edo balio berekoa: 1,25 puntu.
–Beste titulu batzuk: ingelesa, frantsesa edo alemana, Europar Batasuneko hizkuntza ofizialak diren aldetik, Hezkuntzako kontseilariak otsailaren 28an emandako 30/2011 Foru Aginduan jasoak (foru agindu hori Hezkuntzako kontseilariaren irailaren 28ko 184/2011 Foru Aginduaren bidez aldatu zen):
C1 edo baliokidea: 0,25 puntu.
B2 edo baliokidea: 0,15 puntu.
Frogagiriak: merezimendu gisa alegatutako egiaztagiriaren fotokopia edo titulua eskuratzeko eskubideak ordaindu izanaren ziurtagiria.
Hizkuntza bakoitzean, hautagaiak aurkezten duen maila altueneko ziurtagiria bakarrik hartuko da kontuan.
Ez da beharrezkoa hizkuntza gaitasunen egiaztagiriak gaztelaniara itzultzea.
IV. ERANSKINA
Epaimahaiak
1. Lekarozko ILZko zuzendaritzarako eta Iruñeko ILZko Haur eta Lehen Hezkuntzako aholkularitzarako epaimahaia:
Mahaiburua: Luis Iza Dorronsoro jauna, Hezkuntzako ikuskatzailea.
Idazkaria: Oihana Iñigo Olondriz andrea, Prestakuntza Programen Bulegoko burua.
Mahaikidea: Irakaskuntzako Langileen Batzordeko ordezkaria.
2. Lekarozko eta Iruñeko ILZetako hezkuntza teknologietako aholkularitzarako epaimahaia:
Mahaiburua: Santi Baztán Ancín jauna, irakaskuntzako aholkularia.
Idazkaria: Oihana Iñigo Olondriz andrea, Prestakuntza Programen Bulegoko burua.
Mahaikidea: Irakaskuntzako Langileen Batzordeko ordezkaria.
3. Iruñeko eta Lizarrako ILZetako zuzendaritzarako, esparru zientifiko-teknologikoko aholkularitzarako eta Lanbide Heziketako aholkularitzarako epaimahaia:
Mahaiburua: Maite Jimenez Zuasti andrea, Prestakuntzaren eta Kalitatearen Ataleko burua.
Idazkaria: Blanca Yoldi López andrea, Irakasleentzako Laguntza Zentroen eta Berriztapen Proiektuen Bulegoko burua.
Mahaikidea: Irakaskuntzako Langileen Batzordeko ordezkaria.
4. Lizarrako, Tafallako eta Tuterako ILZetako hezkuntza teknologietako aholkularitzarako epaimahaia.
Mahaiburua: Santi Baztán Ancín jauna, irakaskuntzako aholkularia.
Idazkaria: Maite Jimenez Zuasti andrea, Prestakuntzaren eta Kalitatearen Ataleko burua.
Mahaikidea: Irakaskuntzako Langileen Batzordeko ordezkaria.
5. Iruñeko ILZko aholkularitzarako epaimahaia (kalitatea kudeatzeko sistemak eta IKT tresnak kalitatea kudeatzeko sistemetan):
Mahaiburua: Maite Jimenez Zuasti andrea, Prestakuntzaren eta Kalitatearen Ataleko burua.
Idazkaria: Isabel Górriz Noain andrea, Kalitatearen Bulegoko burua.
Mahaikidea: Irakaskuntzako Langileen Batzordeko ordezkaria.
Iragarkiaren kodea: F1504417
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
