Iragarkia

62. ALDIZKARIA - 2015eko martxoaren 31

1. NAFARROAKO FORU KOMUNITATEA

1.1. XEDAPEN OROKORRAK

1.1.1. Foru legeak eta legegintzako foru dekretuak

10/2015 FORU LEGEA, martxoaren 18koa, hein batean aldatzen dituena Pertsona Fisikoen Errentaren gaineko Zergari buruzko Foru Legearen testu bategina (ekainaren 2ko 4/2008 Legegintzako Foru Dekretuak onetsia), Sozietateen gaineko Zergari buruzko abenduaren 30eko 24/1996 Foru Legea eta Tributuei buruzko abenduaren 14ko 13/2000 Foru Lege Orokorra

NAFARROAKO GOBERNUKO LEHENDAKARIA NAIZEN HONEK

Aditzera ematen dut Nafarroako Parlamentuak onetsi duela honako

FORU LEGEA, HEIN BATEAN ALDATZEN DITUENA PERTSONA FISIKOEN ERRENTAREN GAINEKO ZERGARI BURUZKO FORU LEGEAREN TESTU BATEGINA (EKAINAREN 2KO 4/2008 LEGEGINTZAKO FORU DEKRETUAK ONETSIA), SOZIETATEEN GAINEKO ZERGARI BURUZKO ABENDUAREN 30EKO 24/1996 FORU LEGEA ETA TRIBUTUEI BURUZKO ABENDUAREN 14KO 13/2000 FORU LEGE OROKORRA

ZIOEN AZALPENA

Araudi fiskala aldatzeko eta jarduera ekonomikoa pizteko neurriak hartzeko abenduaren 24ko 29/2014 Foru Legeak hainbat agindu aldatu ditu Pertsona Fisikoen Errentaren gaineko Zergari buruzko Foru Legearen testu bateginean (ekainaren 2ko 4/2008 Legegintzako Foru Dekretuak onetsia).

Aldaketetako batek aipatu testu bateginaren 60. artikuluan du eragina, hau da, aurrezkiaren likidazio-oinarri bereziaren karga-tasak ezartzen dituen horretan.

60. artikulu horren eskalan, aipatu 29/2014 Foru Legeak onetsia baita, bada desadostasun bat onetsitako karga-tasen eta ateratzen den kuota osoari dagozkion kopuruen artean.

Honela gelditu da 29/2014 Foru Legeak onetsitako eskalaren taula:

Begi bistakoa da lehenengo 6.000 euroei dagokien kuota osoa 1.140 eurokoa dela eta ez 1.080 eurokoa. Eta lehenengo 18.000 euroei dagokien kuota osoa ez dela 3.720 eurokoa, 3.660 eurokoa baizik.

Ulertu behar da akats bat dela, tasen eta kuotaren arteko desadostasun bat baino gehiago, eta zuzendu egin behar dela, 60. artikuluko eskalaren taula aldatuta; jakina, onetsitako karga-tasetatik abiatuta, hau da, % 19tik, % 21etik eta % 23tik.

Bestetik, Hitzarmen Ekonomikoaren Negoziazio Batzordean Estatuarekin lortutako akordioen ondorioz, Foru Komunitateak Estatuan den araudi bera aplikatu beharko du energia elektrikoaren ekoizpenaren balioaren gaineko zergan. Energia elektriko berriztagarria ekoizteko Nafarroan kokatuta dauden instalazioen titularrak diren zergadun txikiei kalterik ez sortzearren, zerga horren aurreko araudian salbuetsita baitzeuden, kenkari bat ezartzen da zergadun horientzat pertsona fisikoen errentaren gaineko zergaren eta sozietateen gaineko zergaren kuota diferentzialean, energia elektrikoaren ekoizpenaren balioaren gaineko zerga dela-eta ordaindutako tributu-kuotagatik.

Bestetik, Araudi fiskala aldatzeko eta jarduera ekonomikoa pizteko neurriak hartzeko abenduaren 24ko 29/2014 Foru Legeak Sozietateen gaineko Zergari buruzko abenduaren 30eko 24/1996 Foru Legearen 51. artikulua aldatu du. Aipatu 51. artikuluaren gaur egungo testuan, benetako kuota eta gutxieneko tributazioa arautzen baititu, hutsune garrantzitsuak atzeman dira zerga kontzeptuak zehazteko eta haien edukia ulertzeko orduan. Bi hutsuneak konpontzearren, beste testu bat proposatzen da aipatu 51. artikuluarentzat.

Lehendabizi, 51.2 artikuluko benetako kuotaren kontzeptuak ez du inolako argitasunik ekartzen gutxieneko tributazioan. Areago, nahasmendua dakar. Horregatik, kentzea proposatzen da.

Gainera, gutxieneko tributazioaren beste kontzeptu bat ezartzen da, gaur egun indarra duenari estu lotua, baina haren akatsik gabea. Horrela bada, gutxieneko tributazioaren kontzeptu berrian (orain 51. artikuluko 2. idatz-zatian kokatua) bi helburu bilatzen dira:

Lehena Hura argitzea eta ulergarriagoa egitea.

Bigarrena Teknikoki hobetzea; izan ere, hutsune batzuk atzemanak ziren barreneko eta nazioarteko zergapetze bikoitzagatiko kenkariaren aplikazioan, biak kenkari teknikoak izanik, aplikatzen zituzten enpresak gaizki ateratzen baitziren gutxieneko tributazioa konputatzeko garaian. Adibide gisa, holding sozietateek ezin zuten osorik aplikatu dibidenduengatiko kenkaria.

Bestetik, egun indarra duen formularen arabera, tributazioaren gutxienekoaren murrizketa zerga-tasaren proportziokoa denez, paradoxa gertatzen da: zenbat eta zerga-tasa handiagoa aplikatu, txikiagoa da gutxieneko tributazioa, eta horrek ez du zentzurik.

Azkenik, Foru Legearen 70. artikuluari egiten zaion aipamena gehitzen zaio 51. artikuluaren testuari, haren 1. idatz-zatian berariaz esaten baita foru lege honen 51.3 artikuluan araututako tasak ez duela eraginik izanen zinema-ekoizpenetako inbertsioengatiko kenkarian.

Tributuei buruzko Foru Lege Orokorrari dagokionez, 99.5 artikulua aldatzen da, jakinarazpen elektronikoa arautzen duena, administrazio publikoen zein herritarren beraien segurtasun juridikoan eragina duten akats tekniko garrantzitsuak konpontzearren. Izan ere, 99.5 artikuluaren bigarren lerrokadak, jakinarazpen elektronikoa errazteko asmoz, beste helbururik gabe, nahi zuen Nafarroako Zerga Ogasuneko tributudunak baino ez direnek Foru Komunitateko jakinarazpen elektronikoaren prozeduran bakarrik alta eman behar izatea. Hala ere, zehaztu behar da bai Nafarroako Zerga Ogasunak bai administrazio publiko gehien-gehienek helbide elektroniko gaitua (HEG) aukeratua dutela jakinarazpen elektronikoaren sistema gisa. Sistema horretan postontzi elektroniko bakar bat dago zergadun bakoitzarentzat, eta hartan uzten dituzte jakinarazpenak administrazio publiko guztiek, tributu arlokoak izan edo ez; hortaz, oker pentsatzea da zergadun horrek postontzi baten baino gehiagoren zain egon behar duela bere jakinarazpenak jasotzeko. Postontzi batera bakarrik jo beharko du. Gainera, 99.5 artikuluaren bigarren lerrokada horretan proposatzen den sistema dela-eta, beste administrazio publiko batzuek desadostasuna agertu dute, beren eskumenetan sartu izan delakoan; izan ere, Foru Komunitateak ezin du arautu nolako jakinarazpenak egin behar dituzten gainerako administrazio publikoek. Horrela, tributudun batek bere zergen aitorpenak Nafarroako Zerga Ogasunari aurkeztu behar izateak ez du esan nahi ez dituela beste zerga administrazio batzuekin dituen zergak bete behar. Horregatik, tributudun horrek beste zerga administrazioetako zerga jakinarazpenak jaso beharko ditu haien jakinarazpen sistemaren bidez, eta Foru Komunitateak ezin du hor sartu. Arrazoi horiengatik kendu da 99.5 artikuluko aipatu bigarren lerrokada.

Lehenengo artikulua.–Pertsona Fisikoen Errentaren gaineko Zergari buruzko Foru Legearen testu bategineko aldaketak.

2015eko urtarrilaren 1etik aurrerako zergaldietarako ondorioekin, ekainaren 2ko 4/2008 Legegintzako Foru Dekretuaren bidez onetsitako Pertsona Fisikoen Errentaren gaineko Zergari buruzko Foru Legearen testu bateginaren hurrengo aginduek testu hau izanen dute:

Bat.–60. artikulua. aldatzen da, eta testu hau izanen du:

"60. artikulua. Aurrezkiaren likidazio-oinarri bereziaren karga.

Aurrezkiaren likidazio-oinarri bereziari ondoko eskalan adierazten diren tasak aplikatuko zaizkio:

Bi.–68. bis artikulu. berria gehitzen da. Hona:

"68. bis artikulua. Energia elektronikoaren ekoizpenaren balioaren gaineko zerga dela-eta ordaindutako tributu-kuoten kenkaria.

1. Dagokion kuota diferentziala finkatuta dela, energia elektriko berriztagarria ekoizteko Nafarroan kokatuta dauden instalazioen titular edo titularkide diren subjektu pasiboek, instalazio bakoitzeko potentzia instalatu izenduna 100 kW-etik gorakoa ez bada, kenkari gehigarri bat egiten ahalko dute energia elektrikoaren ekoizpenaren balioaren gaineko zerga dela-eta Nafarroako Zerga Ogasunari ordaindutako tributu-kuotengatik.

2. Zer zergalditan ordaindu den, haietan ordaindutako tributu-kuotengatik eginen da kenkaria, zein den ere energia elektrikoaren ekoizpenaren balioaren gaineko zergaren autolikidazioari eta ordainketa zatikatuari dagokien zergaldia.

3. Energia elektrikoa ekoizten duten instalazioen titularkidetasunaren kasuan, titulartasun juridikoari kasu bakoitzean aplikatzen zaizkion arau edo itunen arabera eginen da kenkaria eta, haiek ez badira modu sinesgarrian agertzen, kenkaria erdibana dela ulertuko du Zerga Administrazioak.

4. Ekonomia, Ogasun, Industria eta Enpleguko kontseilariak foru agindu bidez arautuko ditu kenkari hau aplikatzeko behar diren xedapenak".

Hiru.–Xedapen iragankor bat, hamaseigarrena, eransten da. Hona:

"Hamaseigarren xedapen iragankorra.–Energia elektrikoaren ekoizpenaren balioaren gaineko zerga dela-eta zenbait subjektu pasibok 2014. urtean zerga arloko beste administrazio batzuei egindako ordainketak.

2014. urtean energia elektriko berriztagarria ekoizteko instalazioen titular edo titularkide izan diren subjektu pasiboek ere, instalazio bakoitzeko potentzia instalatu izenduna 100 kW-etik gorakoa ez bada eta 2014. urtean energia elektrikoaren ekoizpenaren balioaren gaineko zerga dela-eta tributu-kuotak ordaindu badizkiete zerga arloko beste administrazio batzuei, 68. bis artikuluan arautako kenkaria egiten ahalko dute kopuru horiengatik. Kenkari hori 2015. urteko zergaldiari dagokion aitorpenean eginen da".

Bigarren artikulua.–Sozietateen gaineko Zergari buruzko Foru Legeko aldaketak.

2015eko urtarrilaren 1etik aurrerako zergaldietan, Sozietateen gaineko Zergari buruzko abenduaren 30eko 24/1996 Foru Legearen hurrengo aginduek testu hau izanen dute:

Bat.–51. artikulua aldatzen da, eta testu hau izanen du:

"51. artikulua. Kuota osoa eta gutxieneko tributazioa.

1. Likidazio-oinarriari karga-tasa aplikatzetik ateratzen den zenbatekoa hartuko da kuota osotzat.

2. 50. artikuluko 1. eta 2. idatz-zatietan ezarritako karga-tasen arabera zerga ordaintzen duten subjektu pasiboen kasuan, kuota osoaren gainean hobariak eta kenkariak aplikatzetik ateratzen den zenbatekoa ezin izanen da hurrengo lerrokadetan definitzen den gutxieneko tributazioa baino txikiagoa izan; aplikazio horretatik kanpo daude ikerketa, garapen eta berrikuntza teknologikoko jarduketak egiteagatiko kenkaria, 66. artikuluan arautua, ibilgetu materialeko elementu berrietan egindako inbertsioengatiko kenkaria, 63. artikuluan arautua, eta zinema-ekoizpenetan eta ikus-entzunezko serieetan egindako inbertsioengatiko kenkaria, 70. artikuluan arautua.

Gutxieneko tributazio-kuotaren zenbatekoa zehazteko, honela jokatuko da:

Lehena. Kuotan aplikatutako hobariak eta 59. artikuluan aipatu barne zergapetze bikoitza galarazteko kenkariak karga-tasaren artean zatituta ateratzen den adina gutxituko da likidazio-oinarria, hobariak eta kenkariak ekitaldian aplikaturik.

Bigarrena. Ateratzen den zenbatekoari % 10eko portzentajea aplikatuko zaio.

Hirugarrena. Aurreko eragiketaren emaitzari ekitaldian aplikatu diren nazioarteko zergapetze bikoitzeko kenkariak kenduko zaizkio.

% 10eko portzentaje hori % 7koa izanen da, baldin eta subjektu pasiboak zergaldian zehar gutxienez % 5 handitzen badu plantillan lan-kontratu mugagabea dutenen batez bestekoa, zergaldia hasi aurreko hamabi hilabeteekin alderatuta".

Bi.–74. artikuluari beste idatz-zati bat, 3.a, gehitzen zaio. Hona:

"3. Orobat, energia elektriko berriztagarria ekoizteko Nafarroan kokatuta dauden instalazioen titular edo titularkide diren subjektu pasiboentzat, instalazio bakoitzeko potentzia instalatu izenduna 100 kW-etik gorakoa ez bada, konturako ordainketatzat hartuko dira eta kengarriak izanen dira energia elektrikoaren ekoizpenaren balioaren gaineko zerga dela-eta Nafarroako Zerga Ogasunari ordaindutako tributu-kuotak.

Zer zergalditan ordaindu den, haietan ordaindutako tributu-kuotengatik eginen da kenkaria, zein den ere energia elektrikoaren ekoizpenaren balioaren gaineko zergaren autolikidazioari eta ordainketa zatikatuari dagokien zergaldia.

Energia elektrikoa ekoizten duten instalazioen titularkidetasunaren kasuan, titulartasun juridikoari kasu bakoitzean aplikatzen zaizkion arau edo itunen arabera eginen da kenkaria eta, haiek ez badira modu sinesgarrian agertzen, kenkaria erdibana dela ulertuko du Zerga Administrazioak.

Ekonomia, Ogasun, Industria eta Enpleguko kontseilariak foru agindu bidez arautuko ditu kenkari hau aplikatzeko behar diren xedapenak".

Hiru.–Xedapen iragankor bat, berrogeita hamargarrena, eransten da. Hona:

"Berrogeita hamargarren xedapen iragankorra.–Energia elektrikoaren ekoizpenaren balioaren gaineko zerga dela-eta zenbait subjektu pasibok 2014. urtean zerga arloko beste administrazio batzuei egindako ordainketak.

2014. urtean energia elektriko berriztagarria ekoizteko instalazioen titular edo titularkide izan diren subjektu pasiboek ere, instalazio bakoitzeko potentzia instalatu izenduna 100 kW-etik gorakoa ez bada eta 2014. urtean energia elektrikoaren ekoizpenaren balioaren gaineko zerga dela-eta tributu-kuotak ordaindu badizkiete zerga arloko beste administrazio batzuei, 74.3. bis artikuluan arautako kenkaria egiten ahalko dute kopuru horiengatik. Kenkari hori 2015. urteko zergaldiari dagokion aitorpenean eginen da".

Lau.–Xedapen iragankor bat, berrogeita hamaikagarrena, eransten da. Hona:

"Berrogeita hamaikagarren xedapen iragankorra.–Zerga-taldeak.

2014ko urtarrilaren 31n indarra duen Hitzarmen Ekonomikoaren 27. artikuluan xedatutakoa aplikatuta, zerga-baterakuntzaren araubideko araudi komunari jarraituz 2015eko urtarrilaren 1a baino lehen ordaintzen duten zerga-taldeek aukera izanen dute tributu-araubide horrekin jarraitzeko 2014ko abenduaren 31 arte; betiere, hura aplikatzeko, zerga-baterakuntzari buruz une bakoitzean indarra duen araudi komunean aurreikusten diren baldintzak betez gero.

Nafarroako Zerga Ogasunari emanen zaio hautuaren berri eta balioa izanen du harik eta xedapen honetan aurreikusitako epe iragankorra bukatu arte, non ez duen interesdunak errebokatzen".

Hirugarren artikulua.–Tributuei buruzko Foru Lege Orokorreko aldaketak.

2015eko urtarrilaren 1etik aurrerako ondorioekin, Tributuei buruzko abenduaren 14ko 13/2000 Foru Lege Orokorraren 99. artikuluko 5. idatz-zatiak testu hau izanen du:

"5. Jakinarazpena baliabide elektronikotik egin ahal izateko, interesdunak espresuki eskatu edo baimendu beharko du.

Aurrekoa galarazi gabe, erregelamendu bidez finkatzen ahalko da nahitaezkoa dela jakinarazpen elektronikoa egitea pertsona fisiko ez diren tributudunentzat.

Jakinarazpen elektronikoaren sistemak aukera emanen du zehatz jakiteko zer egun eta ordutan uzten den interesdunaren eskura jakinarazpenaren xedeko egintza, baita interesdunak noiz ikusi duen edukia ere, jakinarazpena une horretatik aurrera egindakotzat joko baita legezko ondorio guztietarako.

Jakinarazpena interesdunaren eskura dela ziurtatuta, hark edukia ikustera sartu gabe hamar egun natural iraganez gero, jakinarazpena errefusatutzat joko da, artikulu honetako 3. idatz-zatian ezarritako ondorioekin, salbu eta, ofizioz edo hartzaileak eskaturik, edukia ikusteko ezintasun tekniko edo materiala dagoela frogatzen bada.

Jakinarazpen elektronikoak modu hauetako baten bidez eginen dira, erregelamendu bidez ezarritakoari jarraikiz:

a) Helbide elektroniko gaituaren bitartez (HEG).

b) Jakinarazpena jaso izanaren adierazpena duen posta elektronikoaren sistemaren bat erabiliz.

c) Ezar litekeen beste bideren bat erabiliz, betiere araubide berariazkoan ezartzen diren epe eta baldintzetan jakinarazpena jaso dela ziurtatzen bada".

Azken xedapen bakarra.–Indarra hartzea.

Foru lege honek Nafarroako Aldizkari Ofizialean argitaratu eta biharamunean hartuko du indarra, legean berean aurreikusitako ondorioekin.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2015eko martxoaren 18an.–Nafarroako Gobernuko Lehendakaria. Yolanda Barcina Angulo.

Iragarkiaren kodea: F1504540