1. NAFARROAKO FORU KOMUNITATEA
1.1. XEDAPEN OROKORRAK
1.1.1. Foru legeak eta legegintzako foru dekretuak
22/2015 FORU LEGEA, abenduaren 16koa, alderdi politikoei 1.314.612,30 euroko kreditu berezia ematekoa, Nafarroako Parlamenturako 2015eko hauteskundeetako gastuak finantzatzeko diru-laguntza gisa.
NAFARROAKO GOBERNUKO LEHENDAKARIA NAIZEN HONEK.
Aditzera ematen dut Nafarroako Parlamentuak onetsi duela honako:
FORU LEGEA, ALDERDI POLITIKOEI 1.314.612,30 EUROKO KREDITU BEREZIA EMATEKOA, NAFARROAKO PARLAMENTURAKO 2015EKO HAUTESKUNDEETAKO GASTUAK FINANTZATZEKO DIRU-LAGUNTZA GISA.
ZIOEN AZALPENA
Nafarroako Parlamentuko hauteskundeak arautzen dituen azaroaren 17ko 16/1986 Foru Legeak bere 44. artikuluan ezarri duenaren arabera, Nafarroako Foru Komunitateak diru-laguntzak emanen dizkie alderdi politiko, federazio, koalizio eta hautesle batasunei, hauteskundeetako gastuak finantzatzeko.
Foru lege beraren 48. artikuluak xedatuaren arabera, berriz, Nafarroako Gobernuak, Kontuen Ganberak hauteskundeetako kontabilitateei buruzko txostena igorri eta ondoko hilabetean, foru lege baten proiektua aurkeztuko dio Nafarroako Parlamentuari, esleitu beharreko diru-laguntzen zenbatekoa hartzen duen kreditu berezia emateko; aipatu diru-laguntzak, aldiz, Parlamentuak proiektua onetsi eta ondoko hogeita hamar eguneko epean ordaindu beharko dira.
Foru lege honen xedea hauxe da: egungo hauteskunde arauterian ezarritako agindua betetzea, 2015eko maiatzaren 24an Nafarroako Parlamenturako egindako hauteskundeek sortutako gastuak finantzatzen laguntzearren.
1. artikulua. Alderdi politiko, federazio, koalizio edo hautesle batasunentzako diru-laguntza gisa, 1.314.612,30 euroko kreditu berezia ematea onetsi da, 2015eko maiatzaren 24an Nafarroako Parlamenturako egin ziren hauteskundeen kanpainako gastuak finantzatzeko. Aipatu kredituaren zenbatekoa 2015era luzatutako 2012ko Nafarroako Aurrekontu Orokorren kontu-sail honi aplikatuko zaio: 010001-0001-4819-912100; izena, “Alderdi politikoentzako diru-laguntzak”.
2. artikulua. Aipatutako kreditu berezia gastuen aurrekontuko kontu-sail hauetan erabilgarri dagoen kredituarekin finantzatuko da, ondotik zehazten diren zenbatekoekin:
–170002-15200-4819-242107, “Enplegu Plana. Hitzarmena CEN, UGT eta CCOO erakundeekin, kualifikazio ibilbideen programetarako” izenekoa; 957.711,90 euroko zenbatekoa.
–170002-15200-4819-242109, “Enplegu Plana. Hitzarmena CEN, UGT eta CCOO erakundeekin, enplegu aukeretarako ibilbideen programetarako” izenekoa; 44.396,19 euroko zenbatekoa.
–429000-42010-4609-322100 kontu-saila, “Udalekin hitzarmenak, 0 eta 3 urte bitarteko haurrak eskolatzeko” izenekoa; 312.504,21 euro.
Azken xedapena.–Foru lege honek Nafarroako Aldizkari Ofizialean argitara eman eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta “Estatuko Aldizkari Ofizialera” igor dadila agintzen dut eta herritar eta agintariei bete eta betearaz dezatela manatzen diet.
Iruñean, 2015eko abenduaren 16an.–Nafarroako Gobernuko lehendakaria, Uxue Barkos Berruezo.
Iragarkiaren kodea: F1516980
