250. ALDIZKARIA - 2015eko abenduaren 17a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

27C/2015 EBAZPENA, azaroaren 9koa, Politika Ekonomiko eta Enpresarialaren eta Lanaren zuzendari nagusiak emana, SKF Española SA enpresaren Tuterako lantokirako berdintasun planari buruzko akordioa erregistratu, gorde eta Nafarroako Aldizkari Ofizialean argitaratzea erabakitzen duena.

SKF Española SA enpresaren Tuterako lantokirako berdintasun planari buruzko akordioa (kode zenbakia: 31100041112015) aztertu da, Erregistro honetan 2015eko uztailaren 1ean sartu zena eta enpresaren ordezkariek eta sindikatuen ordezkariek 2015eko maiatzaren 29an izenpetu eta 2015eko irailaren 15eko aktaren bidez zuzendu zutena, Langileen Estatutuari buruzko Legearen testu bategina onetsi zuen martxoaren 24ko 1/1995 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen eta Akordioen Erregistro eta Gordailuei buruzko maiatzaren 28ko 713/2010 Errege Dekretuaren 2.1.f) artikuluan ezarritakoaren arabera. Horrenbestez,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Nafarroako Aldizkari Ofizialean argitaratzeko agintzea, denek jakin dezaten.

Iruñean, 2015eko azaroaren 9an.–Politika Ekonomiko eta Enpresarialaren eta Lanaren zuzendari nagusia, Pilar Irigoien Ostiza.

SKF ESPAÑOLA ENPRESAREN TUTERAKO LANTOKIRAKO BERDINTASUN PLANA

2015

AURKIBIDEA

Gure jokabide-kodea.

–Bere langileekiko konpromisoa.

–Etika lanean.

–Gizartearekiko erantzukizuna: etika soziala.

–Komunitatearekiko konpromisoa.

1.–Plantillari egindako inkestaren ondorio nagusiak.

2.–Berdintasun plana: jarduketa ardatzak.

2.1. Hautaketa.

2.2. Lanbide prestakuntza eta garapena.

2.3. Ordainsaria.

2.3.1.2. Adierazlea.

2.4. Lana, familiako eginkizunak eta bizitza pertsonala batera eramatea.

2.5. Laneko jazarpenaren prebentzioa.

3.–Berdintasun planaren gauzatzearen jarraipena.

4.–Berdintasun planaren gauzatze-adierazleen ebaluazioak.

5.–Aniztasun eta berdintasun batzorde iraunkorra sortzea.

Eszedentziak (hitzarmen kolektiboaren 68. artikulua).

42. artikulua. Lizentzia ordainduak. (Hitzarmen kolektiboa).

GURE JOKABIDE-KODEA

SKF produktu, soluzio eta zerbitzuen hornitzailea da, munduan liderra, errodamendu, obturadore, mekatronika eta lubrifikazio-sistemen sektorean. Mundu osoko bezeroei soluzioak ematen dizkiegu, haien lehiakortasuna hobetzeko.

SKF nazioarteko konpainia da, eta denboran zehar arrakasta izateko, hil edo biziko kontua da erakundea eta langile guztiak, haien betebeharrak betetzean, arduratsu agertzea gizarte, ekonomia eta etikaren aldetik.

Era bakarra da garapen finantzario eta sozial positiboa eta iraunkorra bermatzeko. Bakarrik honela berma dezakegu gugan konfiantza dutela.

Bere langileekiko konpromisoa

SKFn lan giro positibo eta erakargarria nahi dugu gure langileentzat, non baldintza hauek beteko baitira: haien ekarpenak baloratzen dira, haien lan jarduera aintzat hartzen da, osasuna eta segurtasuna bermatzen dira eta ongizatea sustatzen da.

Horregatik konpromisoa dugu langileak eta haien eskubideak errespetatzeko, haien trebetasunak eta gaitasunak etengabe garatzeko, lan ingurune akuilagarria sortzeko, esfortzua aintzat hartzeko, ideiak baloratzeko eta eskubide indibidualak errespetatzeko.

Horrez gain, konpromisoa hartzen dugu langile guztiekin errespetu bera izateko, hauetakoren batean oinarritutako bereizkeriarik gabe: arraza, erlijioa, kasta, jatorria, desgaitasuna, orientazio sexuala, generoa, adina, afiliazio sindikala edo politikoa. Horregatik langile guztiek sindikatuak sortzeko edo sindikatu batean elkartzeko duten eskubidea errespetatzen dugu, bai eta negoziazio kolektiborako eskubidea ere.

Konfidentzialtasuna bermatzen dugu langileen datuen erregistro, artxibo eta erabileran, Espainiako legediarekin bat.

Etika lanean

Erantzukizun horiek erabat betetzeko, erakunde osoan gure funtsezko balioak aplikatzen ditugu: goi mailako jardunbide etikoa, autonomia arduratsua, gardentasuna eta talde-lana. SKFren beste helburu bat da gure konpainiari lotutako hornitzaileek ere balio horiek betetzea.

Gizartearekiko erantzukizuna: etika soziala

Enpresa probetxuz zuzentzeko eta etikaz handiarazteko gaitasuna dugu, eta oinarria da gure gizarte-erantzukizuna betetzeko. Gaitasun horri esker, garapen teknologikoa bultzatzen dugu, bai eta aurrerapen ekonomikoa, ezagutzan oinarritutako enplegu kalifikatuaren sorrera eta gure inbertsoreentzako arrazoizko etekinak ere. Gure erantzukizun sozialen eta konpromisoen artean, hauek daude:

Ingurumena.

Konpromiso sendoa dugu ekologiaren aldetik jasangarria den garapena sostengatzeko. Horrenbestez, etengabe saiatzen gara guk eta gure hornitzaileek gauzatzen ditugun eragiketen errendimendua ulertzen eta hobetzen, ingurumenari dagokionez. Aldi berean soluzio berritzaileak garatu eta eskaintzen ditugu, gure bezeroen eta, oro har, gizartearen errendimendua hobetzeko, ingurumenari dagokionez.

Osasuna eta segurtasuna.

Ahaleginak egiten ditugu gure produktu eta zerbitzuak segurtasunez diseinatu eta fabrika daitezen, segurtasun inguruko informazio egokia izan dezaten eta modu seguruan erabil daitezen.

Komunitatearekiko konpromisoa

Konpromisoa dugu gure ingurua garatzen laguntzeko, behartsuenen garapen pertsonala sustatzen dituzten proiektu eta ekimenetan parte hartzeko, ikasketak eta lanbide heziketa sustatzeko, tokiko kirolak eta osasun arloko ekimenak sostengatzeko eta borondatezko beste lan batzuk suspertzeko.

Komunikazioa

SKFren politika da komunikazio irekia eta eskuragarria izatea, eta taldearen produktu, zerbitzu eta garapenei buruzko informazio erreal eta egonkorra ematea.

Marketineko material eta jarduera guztiak adeitsuak izanen dira, ez iraingarriak.

Konpainiari lotutako beste eragile batzuei ahal bezain pronto emanen zaie informazioa.

1. Plantillari egindako inkestaren ondorio nagusiak.

SKF Española enpresaren Tuterako lantokiak inkesta bat egin die langile guztiei enpresaren berdintasun eta bateragarritasun politikaren aplikazioa aztertzeko. Diagnostikoa 2014ko azaroan egin zen, eta atal hauek ditu:

1.–Hautaketa.

2.–Prestakuntza.

3.–Barne igoera.

4.–Ordainsaria.

5.–Lana, familiako eginkizunak eta bizitza pertsonala batera eramatea.

6.–Eskura dauden bateragarritasun neurriak ezagutzea.

7.–Sexu jazarpena edo sexuagatiko jazarpena prebenitzea.

8.–Berdintasun plan baten beharra.

Analisi kualitatibo eta kuantitatiboaz gain, datu demografikoak erabili dira diagnostikoa osatzeko.

Hauek dira ondorio nagusiak:

1.–Oso emakume gutxi ibili dira produkzioko lanpostuetan azken urteotan, lanpostu horietarako eskatzen diren lanbide titulazioak ikasten ez dituztelako.

2.–Berdintasun inguruko informazioa behar da, eta plantillari informazioa eman behar zaio gai hauen izaeraz eta xedeaz: berdintasun neurriak, berdintasunaren batzorde paritario iraunkorra, egitura berriaren batzordea, sexu jazarpenaren edo sexuagatiko jazarpenaren inguruko aholku batzordea eta agindupekoen etengabeko ebaluazioaren sistema.

3.–Erantzukidetasun eta bateragarritasun neurrien berri emateko beharra ikusi da, gure hitzarmeneko arauen multzoa eta legez Nafarroan eta Espainian aplikatzen direnak eskuragarriago jarriz.

2. Berdintasun plana: jarduketa ardatzak.

Berdintasun marko hau SKF Española enpresaren Tuterako lantokian aplikatu behar da.

Diagnostikoaren emaitzekin bat, berdintasun planak 5 jarduketa ardatz ditu:

1.–Hautaketa.

2.–Lanbide prestakuntza eta garapena.

3.–Ordainsaria.

4.–Lana, familiako eginkizunak eta bizitza pertsonala batera eramatea.

5.–Sexu jazarpena edo sexuagatiko jazarpena prebenitzea.

Jarduketa ardatz bakoitzean honako hauek deskribatzen dira:

–Helburuak.

–Helburuak lortzeko ekintza zehatzak.

–Helburu eta ekintzen jarraipena eta kontrola egiteko adierazleak.

Helburuak eta ekintzak kronograma batean jasotzen dira, ekintzen garapenaren arduradunak eta ekintzak ezartzeko epeak zehaztuta, kontuan harturik batzuk epe laburrekoak direla eta beste batzuk epe luzekoak.

2.1. Hautaketa.

2.1.1. 1. helburua:

Sendo uste dugu gure enpresako taldeen aniztasuna ona dela gure bezeroen premiak asetzen lehiakorrago izateko. Arrazoia da SKFren oinarrian gure langileen ezagutzak, esperientziak eta gaitasunak daudela. Horrenbestez, gure helburua da hautaketa prozesuetan hauetakoak kontuan ez hartzea: arraza, erlijioa, kasta, jatorria, desgaitasuna, orientazio sexuala, generoa, adina, afiliazio sindikala edo politikoa.

2.1.1.1. Ekintzak:

a) SKF Tudela enpresatik hurbil dauden herrietako ikastetxeekin elkarlanean aritzea, emakumeek eta gizonek industria adarreko espezialitateak baldintza berdinetan ikas ditzaten, enpresak behar dituen profil teknikoekin bat.

b) SKF Tudela enpresak hautaketa prozesu osoan berdintasunarekin eta diskriminaziorik ezarekin duen konpromisoa egiaztatzea eta mantentzea.

c) Hautaketaren iragarki eta irizpideek ez dute genero bateko pertsonak aurkezteko edo hautatzeko traba den baldintzarik izanen, betiere halako baldintzak ezinbestekoak ez badira lanposturako.

2.1.1.2. Adierazleak:

a) Inprimakiak, unibertsitate eta prestakuntza-zentroei praktiketako langileak hautatzeko bidalitako mezu elektronikoak, prentsan eta interneten bidezko enplegu bilatzaileetan argitaratutako iragarkiak; guztietan egiaztatuko da aniztasuna errespetatzen dela eta diskriminaziorik ez dagoela.

2.2. Lanbide prestakuntza eta garapena.

2.2.1. 1. helburua:

Emakumeen eta gizonen arteko berdintasuna erraztea gaitasun pertsonal eta teknikoen garapenean, bai eta haien lanbide sustapena ere.

2.2.1.1 Ekintzak:

a) Kolektibo guztien prestakuntza bermatzea, lanbide garapena izan dezaten.

b) Ahaleginak egitea prestakuntza lanorduetan eman dadila, ahal den guztietan.

c) Plantillari berdintasun inguruko informazioa ematea urtero.

2.2.1.2. Adierazlea:

Prestakuntza jaso dutenen gogobetetzeari buruzko inkesta, ondoko informazioa generoaren arabera lortzeko aukera emanez: prestakuntza jaso duten emakume eta gizonen kopurua eta ehunekoa; prestakuntza orokorra ala lanbide karrera garatzeko prestakuntza den; lanorduetan edo lanorduetatik kanpo egin den, bateragarritasunaren alde ala ez.

2.2.2. 2. helburua:

Bermatzea lana eta bizitza pertsonala batera ematea ez dela oztopo kualifikazio handiagoko lanpostuetara igo nahi duten profesionalentzat.

2.2.2.1. Ekintzak:

Prestakuntza erraztea lan murrizketa duten edo eszedentzian edo lana eta bizitza pertsonala batera eramateari lotutako egoera batean dauden langileei, ordutegi ezberdinak eskainiz joateko aukera izan dezaten.

2.2.2.1. Adierazleak:

Txanda ezberdinetan egindako prestakuntza ekintzen zerrenda aurkeztea, ahalik eta pertsona gehien joan daitezen.

2.3. Ordainsaria.

2.3.1. 1. helburua:

Balorazio bereko lanagatik ordainsari berdina ordaintzearen printzipioa egiaz aplikatzen dela bermatzea, zehazki soldatetan generoagatiko desberdintasunik ez dagoela, SKF Española enpresaren Tuterako lantokiaren hitzarmen kolektiboaren aplikazioan.

2.3.1.1. Ekintzak:

a) Berdintasun batzordeak egiaztatuko du SKF Tudela enpresaren ordainsari politikan ez dagoela diskriminaziorik, hau da, lanbide profesional bereko emakumezko eta gizonezko langileek, lan bera eginik, soldata bera dutela, eta desbideraketak zuzentzeko neurriak proposatzen direla.

b) Tratu berdintasuna bermatzea ordainsari sistema lana, familiako eginkizunak eta bizitza pertsonala batera eramateko neurriren bat erabiltzen duten langileei aplikatzean.

2.3.1.2. Adierazlea:

Egitura berriaren batzordearen aktak aurkeztea, non langileen mailak eta kategoriak aztertzen diren, maila egoerak ebaluatzeko asmoz.

2.4. Lana, familiako eginkizunak eta bizitza pertsonala batera eramatea.

2.4.1. 1. helburua:

Lana eta bizitza pertsonala batera eramatea errazten duen kultura sustatzea, eta bermatzea eskubide horiez baliatzeak ez duela ondorio txarrik lanbide esparruan, emakumezkoengan eragin handia baitu.

2.4.1.1 Ekintzak:

a) Sentsibilizazio eta informazio kanpainak egitea, langileei zuzendua, bateragarritasunari lotutako eskubide guztiak azaltzeko, bereziki azpimarratuz emakumezkoak zein gizonezkoak horietaz balia daitezkeela. Zehazki, gai hauek: desgaitasuna duten pertsonak zaintzeko eskubide berdintasuna, eta zereginen banaketa orekatuaren eta familia erantzukizunen inguruko sentsibilizazioa.

b) Kanpaina orokorra egiten bada ere, berariazko kanpainak eginen dira gaurkotasuna duten legegintza arloko gai zehatzei buruz. Lan hori errazteko, agiri bat eginen da gure hitzarmen kolektiboko bateragarritasun neurriak biltzeko.

2.4.1.2. Adierazlea:

a) Bateragarritasun neurrien eskaerak kontrolatzeko erregistroa, eta eskaera onartu eta ukatuen kopurua.

2.5. Laneko jazarpena prebenitzea.

2.5.1. 1. helburua;

Bermatzea jazarpena prebenitzeko protokoloa betetzen dela.

2.5.1.1. Ekintzak:

a) Jazarpena prebenitzeko protokoloa prestatzea, gero berdintasun planean sartzeko. Protokolo horren inguruko komunikazio eta informazio plana egitea, langile guztiei zuzendua.

b) Bermatzea langile guztiek eskura dutela protokoloa, honela:

–Honen berri ematea akuilatze planean, harrera egiteko prestakuntzan.

–Intranetean argitaratzea.

–Langileen ordezkariei banatzea.

–Salaketak jartzeko ezarritako bideak eta pertsonak jakitera ematea.

c) Berariazko prestakuntza ematea laneko jazarpenaren, jazarpen sexualaren eta sexuagatiko jazarpenaren inguruko zeregin zehatzak eta erantzukizunak dituzten pertsonei, eginkizunak behar bezala bete ditzaten, bai eta berdintasun batzordeko kideei ere.

2.5.1.2. Adierazlea:

a) Argitalpenak informazio pantailetan.

b) Harrera egiteko prestakuntza, fabrikan hasten direnentzat.

c) Urteko prestakuntza plana, jazarpena prebenitzeko protokoloei buruzko prestakuntza premia bereziak dituzten pertsonentzat.

3. Berdintasun planaren gauzatzearen jarraipena.

Planaren indarraldia sinatzen den egunean hasi eta 2016ko abenduaren 31n amaituko da. Indarraldia agorturik, plan berri bat adosten ez bada, honen edukia luzatuko da akordio berri bat sinatu arte.

Aldi horretan planeko ekintzak abian jartzearen jarraipena eginen da, sei hilabetean behin bilerak eginez, eta urteko txosten zehatza eginen da planaren aurrerapenari buruz, gero berdintasun batzordean azter dadin.

4. Berdintasun planaren gauzatze-adierazleen ebaluazioak.

Egoeraren diagnostikoan aurkeztutako datu nagusiak eguneratuko dira urtero, ezarritako helburu eta jarraipen-adierazle bakoitzeko. Plana hobetzeko ekintzak ezartzen ahalko dira, ebaluazioen emaitzak oinarri hartuta.

Langileek berdintasun planaren eta planeko ekimenen inguruan duten ezagutza eta pertzepzioaren jarraipena egitea, SKF enpresako langileei egiten zaien iritzi-inkesten bidez. Horrez gain, ekintzen balorazio kuantitatibo eta kualitatiboa eginen da.

5. Aniztasun eta berdintasun batzorde iraunkorra sortzea.

Berdintasun plana noraino bete eta garatu den jakiteko, aniztasun eta berdintasun batzorde paritario iraunkorra eratuko da, honako hauek osatua:

Enpresako zuzendaritzak izendatuak:

–Victoria Rueda eta Miguel Ángel Urueña.

Sindikatu sinatzaileek izendatuak:

–CCOO, Felix Bienzobas.

–UGT, Juan Antonio Alcalá.

–Solidari, Juan Luis Aguerri.

–ELA, Iñaki Baños.

SKF ESPAÑOLA ENPRESAREN TUTERAKO LANTOKIAREN HITZARMEN KOLEKTIBOAN DAUDEN NEURRIAK

Eszedentziak (hitzarmen kolektiboaren 68. artikulua)

Eszedentzia borondatezkoa edo nahitaezkoa izan daiteke.

1. Nahitaezkoa, lanpostua gorde eta antzinatasuna kontatzeko eskubidea ematen duena, lanera joatea galarazten duen kargu publikoren baterako izendatu edo hautatua izateagatik emanen da. Lanera itzultzea kargu publikoa utzi eta hurrengo hilabetearen barrenean eskatu beharko da.

2. Enpresan gutxienez urtebeteko antzinatasuna duen langileak eskubidea du borondatezko eszedentzia izateko, lau hilabeterako gutxienez eta bost urterako gehienez. Eskubide horretaz berriro balia daiteke langile bera, aurreko eszedentzia bukatu eta lau urte igaro eta gero. Eszedentzian dagoen langileak hilabete lehenago jakinarazi behar du itzultzeko asmoa duela, eta ez du beste eskubiderik enpresan hutsik dauden eta bere kategoriakoak edo antzekoak diren lanpostuetara itzuli ahal izateko lehentasuna baizik.

3. Familia arrazoiengatik hartutako eszedentziak. Langileek eskubidea izanen dute hiru urte bitarteko eszedentzia hartzeko, haur bakoitza zaintzeko, norberak izandakoa edo adoptatua izan, edo etxean hartua, bai modu iraunkorrean bai adoptatu aurreko harrera fasean, behin-behinekoz izanda ere. Hiru urte horiek haurra jaiotzen denetik edo, bestela, epaileen edo administrazioaren ebazpenaren egunetik aurrera kontatuko dira.

Bi urtebetera arteko eszedentziarako eskubidea izanen dute, halaber, adinagatik edo istripu, eritasun edo desgaitasun baten ondorioz bere kasa bizitzeko gauza ez den eta lan ordaindurik egiten ez duen ahaideren bat –odol bereko edo ezkontza bidezko bigarren gradura artekoa– zaindu behar duten langileek. Behar bezala justifikatu beharko dira alderdi horiek.

Atal honetan ezartzen den eszedentzia langile bakoitzaren eskubidea da, gizonezkoa izan edo emakumezkoa izan, eta zatika hartzen ahalko da. Hala ere, pertsona bera zaintzeko eskubidea Tuterako lantegiko bi langilek edo gehiagok badute, enpresak aldi berean erabili nahi den eskubidea mugatzen ahalko du, enpresaren funtzionamenduarekin lotutako bidezko arrazoiengatik.

Beste subjektu eragile batek beste eszedentzialdi bat izateko eskubidea sortzen duenean, hori hastearekin bukatuko da ordura artekoa, halakorik izanez gero.

Langileak artikulu honetan ezarritakoaren arabera eszedentzian pasatzen duen denbora antzinatasunerako kontatuko zaio, eta bitartean eskubidea izanen du lanbide prestakuntzako ikastaroetara joateko, zuzendaritzak deituta, batez ere lanera itzuli behar duenean. Lehenbiziko urtean lanpostua gordetzeko eskubidea izanen du. Epea akituta, gordeko zaion lanpostua lanbide talde berekoa edo kategoria baliokidekoa izanen da.

42. artikulua. Lizentzia ordainduak. (Hitzarmen kolektiboa).

Hitzarmen kolektibo honetan jasotako eskubide eta berme guztiak izatezko bikoteentzat ere lotesleak izanen dira. Horretarako izatezko bikotearen egiaztagiria aurkeztu beharko da, autonomia erkidego bakoitzeko legeriaren arabera emana. Zuzendaritzak bizikidetzaren egiaztagiria eskatu ahal izanen du egokia iruditzen bazaio.

Langileak, aurretik abisatu eta justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio eta honenbesteko denboraz:

a) Ezkontza: 19 egun natural.

b) Seme edo alaba baten jaiotza: 4 egun natural; jaiotzatik aurrera 2 egun natural hartuko dira eta langileak aukeratuko du noiz hartu beste 2 egunak, jaiotzatik hasita 30 eguneko epearen barnean.

f) Heriotzagatik:

1.–Ezkontidearena: 10 egun natural.

2.–Lehen mailako odol-ahaideak edo ezkontza-ahaideak: 3 egun natural, salbu eta seme-alaben kasuan: 4 egun natural.

3.–Bigarren eta hirugarren mailako odol-ahaideak edo ezkontza-ahaideak: egun natural 1, salbu eta senideak edo baliokideak, 2 egun natural izanen baitira.

4.–Lehengusu propioak: hiletara joateko behar den denbora. Hileta egiten den herrirainoko distantziak justifikatzen duenean egun natural batekoa izanen da.

d) Gaixotasunagatik:

1.–Ezkontidearen edo seme-alaben gaixotasun larria: 3 egun natural, eta baimen ez ordaindua hirugarren egunetik aurrera eskatzeko aukerarekin, gaixotasunaren izaerak eskatzen duen denborarako. Semearen gaixotasun larria dela eta, ordaindu gabeko lizentzia hori gurasoetako batek hartuko du, biak aritzen badira enpresan lanean.

e) Larria, lehen eta bigarren graduko odol-ahaideak edo ezkontza-ahaideak: 2 egun natural. Eritasuna larritzat joko da ospitalazioa behar denean. Gaixotasun larritzat hartzeko arrazoi bakarra ospitalizazioa denean, langileak har ditzakeen egunen kopurua ez da inola ere izanen baimena eragin duen gaixoa ospitalean eman duen denbora baino handiagoa. Baimenaren jatorria gertaera eragilea izanen da beti. Nolanahi ere, egun horiek jaiegun ez badira langilearen egutegian, egunak banatu ahal izanen ditu, nagusiekin adostuta, ospitaleko egonaldiko ahalik eta egun gehien hartzeko eta eriarekin dituen betebeharrak modu egokian betetzeko.

f) Lehengusuen ezkontza, langilearenak nahiz ezkontidearenak, bai eta hirugarren gradurainoko odol-ahaideena edo ezkontza-ahaideena: egun natural bat.

g) Bizilekuaren aldaketa: 2 egun natural, altzariak lekuz aldatu behar badira.

Lizentzia horiek egun naturaletarako emanen dira, eta gertaera eragiletik aurrera betiere, 2. puntuko d) letran adierazitako salbuespenarekin; lizentzietarako nahitaezkoa izanen da ziurtagiria aurkeztea, ondoren bada ere. Lantokitik hara bitarteko distantzia 150 km-koa edo handiagoa baldin bada beste egun natural bat gehituko zaio. Lizentzia horiek luzatu ahal izanen dira, lizentzia eragin duen egoera gertatzen den lekurainoko distantzia edo iristeko arazoak direla-eta justifikaturik badago.

h) Publikoa edo pribatua den eginbehar saihestezina betetzeko: behar-beharrezkoa den denbora. Aldi jakin bat lege bidez edo hitzarmenen bidez ezarritako arau batean jasota dagoenean, absentziaren iraupenari eta konpentsazio ekonomikoari dagokienez, arau hartan xedatutakoari jarraituko zaio. Aipatu eginbehar hori betetzeagatik hiru hilabeteko tartean lanorduetako %20 baino gehiagotan ezin izan bada egin beharreko lana bete, enpresak eszedentzia egoerara pasa dezake langilea, Langileen Estatutuaren 46. artikuluaren 1. idatz-zatian arautu bezala. Langile batek, eginbeharra betetzeagatik edo karguan jardun beharragatik, kalte-ordaina kobratzen badu, diru kopuru horixe deskontatuko zaio enpresak ordaintzen dion soldatatik.

i) Azterketak egiteko behar den denbora, ikasketa edo lanbide tituluak lortzeko ikasketak egiten ari diren langileentzat.

j) Gizarte Segurantzako osasun zerbitzuetara jotzeko beharrezkoa duen ezinbesteko denbora. Era berean, honako hauekin sendagile espezialistarengana joateko:

–Bere ardurapean zuzenean dituen seme-alabak eta adingabeak, 16 urtez beheitikoak badira.

–Ezkontidea.

–Bere ardurapean dituen eta, adinagatik edo ezintasun fisikoagatik, bere kasa moldatzen ez diren pertsonak. Ulertzen da ardurapean izatea dela beste pertsona baten euskarri ekonomiko edo fisikoa izatea, betiere agiri bidez frogatu behar den egoera. (errenta aitorpena, gizarte segurantzaren liburuxka, bizikidetasun ziurtagiria, harrerarena, gizarte zerbitzuena edo legezko beste edozein ziurtagiri).

Arratsaldeko ordu biak baino lehen Oinarrizko Osasun Eskualdetik kanpoko osasun zerbitzuetara joan behar duen gaueko txandako langileak lanaldi erdiko baimena izanen du, aurreko gauekoa.

k) Gaixorik egonda lanera joaterik ez duenak Langileria Departamentuari jakinarazi beharko dio, berak edo beste batek, lanean egon beharreko lehen lau orduen barrenean. Medikuaren ziurtagiria aurkeztu beharko du, edo osasun laguntza jaso izanarena. Lana egun bakar batean huts egiten badu, aski izanen da baldintza hori betetzea ordainsariak bajaren ondorioz eritasun egoeran balego bezalakoak izateko. Hortaz, enpresak diskrezionaltasunerako eskubidea izanen du, gehiegikeriarik izan ez dadin.

Eritasunaren ondorioz egun batean baino gehiagotan utziz gero lanera joateari, baja-agiria aurkeztu beharko da.

l) Seme-alaben bataio edo jaunartzeagatik: egun natural bat.

m) Egoera zehatz batzuetan, eta mediku pribatuen kontsultetara behar den denboran, betiere bisitak zerikusia badu onkologia edo ernalkuntza lagunduko zerbitzuekin. Eskabidea Tuterako lantegiko Langileria Departamentuko buruari aurkeztuko zaio.

Lizentzia ordaindu guztietan langileek lanean baleude bezala jasoko dituzte plusak.

Artikulu honetako araudiak bazter uzten du edukiarekin bat ez datorren xedapen edo akordiorik aplikatzea.

–Lehen gradua: ezkontidea, gurasoak eta seme-alabak.

–Bigarren gradua: ilobak, aitona-amonak eta senideak.

–Hirugarren gradua: birraitona-birramonak, osaba-izebak eta ilobak.

AHAIDETASUN-MAILEN TAULA

F1515425_0.pdf

(**) Eranskina: lana eta bizitza pertsonala batera eramatea errazten duten web orrien, gizarte segurantzaren eta probintzien estekak.

Iragarkiaren kodea: F1515425