1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
176E/2015 EBAZPENA, azaroaren 16koa, Ingurumeneko eta Lurraldearen Antolamenduko zuzendari nagusiak emana, Salestarren Udalez gaindiko Plan Sektorialeko UE-1 exekuzio-unitatearen urbanizazio-proiektua Eguesibarko udal mugapean (bide loturak) aldatzeko espedientea hasiera batean onesten duena. Sustatzailea UE-1 exekuzio-unitatearen Konpentsazio Batzordea da.
Herri Lanetako zuzendari nagusiaren uztailaren 21eko 169E/2014 Ebazpenaren bidez, behin betiko onetsi zen Salestarren Udalez gaindiko Plan Sektorialeko UE-1 exekuzio-unitatearen urbanizazio-proiektua, Eguesibarko udal mugapeari dagokiona. Plan horretako UE-1 exekuzio-unitateko Konpentsazio Batzordea da sustatzailea (2014ko 164. Nafarroako Aldizkari Ofiziala, abuztuaren 22koa).
Nafarroako Gobernuak 2015eko ekainaren 11n hartutako Erabakiaren bidez (2015eko 123. Nafarroako Aldizkari Ofiziala, ekainaren 26koa), hasiera batez onetsi zen Salestarren Udalez gaindiko Plan Sektoriala aldatzeko espedientea (bide loturei buruzkoa). Sustatzailea UE-1 exekuzio-unitatearen Konpentsazio Batzordea da.
Espediente honen xedea da urbanizazio-proiektua egokitzea tramitatzen ari den Udalez gaindiko Plan Sektorialaren aldaketaren ondoriozko planeamenduaren aurreikuspen berrietara, izan ere, eremu barruko zonaren urbanizazioa murriztuko da (NA-2310 errepidean), lau errei izatetik bi izatera pasatuko delako, eta Olazko lotura aldatuko da, PA-30 errepidearen gainean bigarren zubia eraikiko delako eta bide-galtzada bikoiztuko delako.
Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 43.1.d) artikuluan xedatutakoaren arabera, urbanizazio-proiektuen aldaketak tramitatu eta onestea Ingurumeneko, Lurraldearen Antolamenduko eta Etxebizitzako Departamentuari dagokio, gaur egun Landa Garapeneko, Ingurumeneko eta Toki Administrazioko Departamentua denari.
Lurraldearen Antolamendu eta Etxebizitza Zerbitzuak egindako espedientea azterturik, Lurraldearen Antolamenduari eta Hirigintzari buruzko abenduaren 20ko 35/2002 Foru Legean xedatutakoarekin bat, eta Landa Garapeneko, Ingurumeneko eta Toki Administrazioko Departamentuaren egitura organikoa ezarri zuen abuztuaren 28ko 137/2015 Foru Dekretuaren bidez eskuratu ditudan ahalmenak erabiliz,
EBATZI DUT:
1. Hasiera batez onestea Salestarren Udalez gaindiko Plan Sektorialeko UE-1 exekuzio-unitatearen urbanizazio-proiektua Eguesibarko udal mugapean aldatzeko espedientea (bide loturak), UE-1 exekuzio-unitatearen Konpentsazio Batzordeak sustaturik, betiere determinazio hauek ezarrita:
−Sustatzaileak txosten sektorialetan xedatutakoa bete beharko du, baita Lurraldearen Antolamendu eta Hirigintza Zerbitzuaren txostenean ezarritakoa ere. Txosten horiek ebazpen honekin batera igortzen dira.
−Behin betiko onespena baliozkoa izateko, nahitaezkoa izanen da lehenagotik onestea Salestarren Udalez gaindiko Plan Sektoriala aldatzeko espedientea (bide loturei buruzkoa), Salestarren UPSko UE-1 Konpentsazio Batzordeak sustatua eta Nafarroako Gobernuaren 2015eko ekainaren 11ko Erabakiaren bidez hasiera batez onetsi zena (2015eko 123. Nafarroako Aldizkari Ofiziala, ekainaren 26koa).
2. Espedientea jendaurrean jartzea eta ukitutako udalei entzutea ematea, ebazpen hau Nafarroako Aldizkari Ofizialean eta Nafarroan argitaratzen diren egunkarietan argitaratuz. Bi tramite horiek aldi berean eginen dira, eta 20 egun iraunen dute.
Ondorio horietarako, espedientea interesdunen eskura egonen da Landa Garapeneko, Ingurumeneko eta Toki Administrazioko Departamentuaren bulegoetan (Alondegi kalea, 1. 1. solairua, 31002, Iruña), eta epe horretan zilegi izanen da idatziz nahi adina alegazio aurkeztea.
Gainera, agiria Nafarroako Gobernuaren zerbitzuen katalogoan kontsultatzen ahalko da, baita Lurraldearen Antolamenduko eta Hirigintzako Zerbitzuaren webgunearen bidez ere: http://www.navarra.es/home_es/Temas/Territorio/Urbanismo/Exposicion+publica.htm.
3. Ebazpen hau espedientearen sustatzaileari, Eguesibarko Udalari, Iruñerriko Mankomunitateari, Herri Lanetako Zuzendaritza Nagusiari, Aireko Segurtasunaren Estatuko Agentziari eta Ebroko Ur Konfederazioari jakinaraztea, behar diren ondorioak izan ditzan.
Iruñean, 2015eko azaroaren 16an.–Ingurumeneko eta Lurraldearen Antolamenduko zuzendari nagusia, Eva García Balaguer.
Iragarkiaren kodea: F1515570