Iragarkia

233. ALDIZKARIA - 2015eko azaroaren 20a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

13C/2015 EBAZPENA, urriaren 2koa, Politika Ekonomiko eta Enpresarialaren eta Lanaren zuzendari nagusiak emana. Honen bidez erabakitzen da Berako Conservas Martiko SA enpresaren hitzarmen kolektiboa erregistratu, gorde eta Nafarroako Aldizkari Ofizialean argitaratzea.

Ikusirik Berako Conservas Martiko SA enpresaren hitzarmen kolektiboaren testua (kode zenbakia: 31100942012015), Erregistro honetan sartu zena 2015eko irailaren 29an eta enpresaren eta sindikatuen ordezkariek 2015eko irailaren 21ean izenpetu zutena. Langileen Estatutuari buruzko Legearen testu bategina onetsi zuen martxoaren 24ko 1/1995 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen eta Akordioen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Nafarroako Aldizkari Ofizialean argitaratzeko agintzea, denek jakin dezaten.

Iruñean, 2015eko urriaren 2an.–Politika Ekonomiko eta Enpresarialaren eta Lanaren zuzendari nagusia, Pilar Irigoien Ostiza.

BERAKO CONSERVAS MARTIKO SA ENPRESAREN LAN HITZARMEN KOLEKTIBOA

Beran (Nafarroa), 2015eko irailaren 21ean.

Batetik, Pablo Martín Taboada eta Jon Ander Goikoetexea Labiano jaunak, Conservas Martiko SA enpresa ordezkatuz.

Bestetik, Begoña Alzugaray Almandoz, M.ª Lourdes Begino Garro, Fernando Fernández Martínez, José Antonio Sánchez Ibáñez eta Alberto Sanz Ortega jaun-andreak, talde independenteko kideak, eta Paula García Terán, José Luis Tapia Eguzkiagirre eta Ramón Telletxea Mitxelena jaun-andreak, ELA sindikatuko kideak, enpresako langileen ordezkariak.

Bi aldeek elkarri aitortuz behar den legezko gaitasuna, erabaki dute:

I. KAPITULUA

Aplikazio eremua

1. artikulua. Langile eremua, eremu funtzionala eta lurralde eremua.

Hitzarmen kolektibo hau Martiko Sozietate Anonimoa enpresak Beran (Nafarroa) duen lantokian zerbitzua ematen duten langileei aplikatuko zaie, salbuespen bakarra izanik legezko xedapen partikularrek araututako lan harreman bereziak dituztenak.

2. artikulua. Denbora eremua.

Hitzarmen kolektibo honen testuak lau urteko indarraldia izanen du. 2012ko urtarrilaren 1etik aurrera sortuko ditu ondorioak, eta 2015eko abenduaren 31n amaituko da.

II. KAPITULUA

Lanaren antolaketa

3. artikulua. Lanaren antolaketa.

Lana antolatzea enpresaren zuzendaritzari dagokio, arlo horretako legezko xedapenen arabera.

III. KAPITULUA

Lanbide sailkapena

4. artikulua. Xedapen Orokorra.

Martiko SA enpresan lan egin eta hitzarmen kolektibo honen eraginpean dauden langileak sailkatuko dira honako irizpide hauek kontuan hartuz: produktibitatea, kalitatea-trazabilitatea, autonomia maila, ekimena, balioaniztasuna, erantzukizuna, konplexutasuna, agintea eta konpromisoa.

Sailkapen hori eta haren arau osagarriak direla bide, enpresaren beharretarako lanbide egitura egokia lortu nahi da, langile guztiak hobeki integratu daitezen produkzio lanetan eta uneoro hobeki egokitu daitezen lanpostu batera, behar duten prestakuntzaren bitartez.

Kontratuzko lan harremanaren lehen mailako edukia da haren antolamenduzko sailkapenak dakartzan eginkizunak betetzea. Ondorioz, bertako edozein lanpostu bete beharko da, behin lanpostu berriari dagokion prestakuntza jasotakoan enpresaren aldetik.

5. artikulua. Lanbide sailkapena eta lanbide taldeak.

Lanbide taldeen definizioa. Martiko SA enpresako langile guztiak ondoko lanbide talde hauetakoren batean sailkatuko dira:

Sailkapen taldeak: oinarrizko hitzarmen honen eraginpeko enpresetako langileak lanbide talde hauetakoren batean sailkatuta daude:

1. Teknikariak.

2. Administrazioko langileak.

3. Produkzio langileak.

Teknikarien lanbide taldeko kategoriak: teknikariak kategoria hauetan banatzen dira:

1. Zuzendaria.

2. Kudeatzailea edo teknikaria, goi mailako tituluduna.

3. Goi mailakoa ez den titulua edo erdi mailako titulua duen teknikaria.

Administrarien lanbide taldeko kategoriak: administrazioko langileak kategoria hauetan banatzen dira:

1. Bulegoko burua.

2. Lehen mailako administrari ofiziala.

3. Bigarren mailako administrari ofiziala.

4. Hirugarren mailako administrari ofiziala.

5. Administrari laguntzailea.

Produkzio langileen lanbide taldeko kategoriak. Produkzio langileak kategoria hauetan banatzen dira:

1. Plantako arduraduna.

2. Atalburua.

3. Lehen mailako ofiziala.

4. Bigarren mailako ofiziala.

5. Hirugarren mailako ofiziala.

6. Laguntzailea.

Hitzarmen kolektibo honetan langileen sailkapena adierazi baizik ez da egin, eta ez dakar berekin adierazi diren lanpostu eta kategoria guztiak beteak izan beharra, enpresen beharrek eta bolumenak eskatzen ez badute.

Langile guztiak behartuta daude nagusiek agintzen dizkieten lan guztiak egitera, beren lanbide kategorian, Langileen Estatutuaren 23. eta 39. artikuluetan ezarritakoa galarazi gabe.

Lanbide kategoria oinarrizko hitzarmen honetan finkatua ez duten langileen kasuan, aipatu diren kategorien artean antzekoenak direnekin parekatuko dira haienak.

Lehendik dauden lanbide kategoriak hitzarmen kolektibo honetan adierazitako izen eta edukietan integratuko dira.

Lanbide kategorien definizioa:

Atal honetako definizioak ez dira zehatzak, azalpen hutsa baizik.

Teknikarien taldeko lanbide kategoriak:

1. Zuzendaria. Lanbide tituluarekin edo halakorik gabe, industriako elaborazio prozesuetako edo zerbitzuetako fase guztietan edo batzuetan prestakuntza, gaitasun onartua eta praktika duen langilea eta exekutibo baten edo teknikari espezializatu baten eginkizunak dituena.

2. Kudeatzailea edo teknikaria, goi mailako tituluduna. Estatuak unibertsitateen nahiz eskola berezi ofizialen edo legez onartutakoen bidez emandako goi mailako titulua izanik, enpresak lanbide titulu horren arabera kontratatu duena, bere lanbideko eginkizunak egiten dituena eta lanaren ordaina soldata bidez edo oroharreko prezioaren bidez bakarrik edo batez ere jasotzen duena, loturarik gabe, eta, beraz, bere lanbideko ordainsarien ohiko eskalaren arabera.

3. Goi mailakoa ez den titulua edo erdi mailako titulua duen teknikaria. aurrekoa ez bezalako lanbide titulu ofizial bat izanik, bere lanbideko zerbitzuak tituluari dagozkion eginkizunak betez egiten dituena, bere ordainsaria goi mailako teknikarientzat ezarritako modu berean jasotzen badu betiere.

Administrarien taldeko lanbide kategoriak:

Administrarien kontzeptu orokorrean bulegoko lanak egiten dituztenak sartzen dira. Halako lanak: bulegokoak, esaterako kontabilitatea, fakturazioa, kalkulua, kobrantza, gutuneria, informatika, etab.

1. Bulegoko burua. Administrazio zerbitzu guztiak ezagutzen dituen eta enpresaren administrazio ardura eta zuzendaritza bere gain hartzen dituen langilea.

2. Lehen mailako administrari ofiziala. Ekimenez eta erantzukizunez eta bere agindupean beste langile batzuk izanda, zerbitzu edo departamenturen bat bere kargu duen administraria, lan hauek egiten ongi dakiena: fakturak eta horien kalkulua; estatistiken kalkulua; kontu korronteen liburuak, egunkari liburu nagusia eta korrespontsalak eramatea, eskutitzak norberaren ekimenez idaztea, likidazioak, eta soldaten nominak, soldatak eta Gizarte Segurantza kalkulatzea.

3. Bigarren mailako administrari ofiziala. Administrazio departamendu bateko lanak egiten dakien eta praktikan jartzen dituen langilea. Haren eginkizunek nolabaiteko espezializazioa eskatzen dute eta lehen mailako administrari ofizial batek edo bulegoko buruak antolatzen eta zuzentzen ditu.

4. Hirugarren mailako administrari ofiziala. Hemezortzi urtetik gorako langilea, oinarrizko administrazio lanak egiten dituena, hala nola fakturak kalkulatu eta prestatzea, datuak pasatzea nomina eta liburuetan, eta idatzoharrak egitea, oro har. Harreragile lanetan eta enpresak merkaturatzen dituen produktuen dastaleku eta salmenta lanetan ere aritu daiteke. Lan hauek ere egiten ditu: eskabideak jasotzea, horien jarraipena egitea bezeroak eskuratzen dituen arte, albaranak, itzulketen kontrola eta kudeaketa. Lanbide kategoria horretara iristen da, halaber, enpresan lanean mila eta ehun egun natural betetzen direnean.

5. Administrari laguntzailea. Bulegoan lan osagarri eta errazak egiten dituen langilea da. Mandatuak eta oharrak jasotzen ditu eta nagusiek agintzen dizkioten lanak egiten ditu. Betiere bere eginbeharrak oinarrizkoak dira. Hirugarren mailako administrari ofizialaren antzeko jarduerak egiten ditu, baina lanbide kategoria horretara pasatzeko behar den lanegun kopurura iritsi gabe.

Produkzio langileen lanbide kategoriak:

Talde horretan sartzen diren langileek, behar den prestakuntzaren jabe direla, beren espezialitateko lanak egiten dituzte, horiek lan nagusiak edo laguntzaileenak izan, eta ekimenez, arduraz eta errendimenduz gauzatzen dituzte, beren kategoriaren arabera:

1. Plantako arduraduna. Behar den ezagutza eta gaitasuna izanik, planta baten eta hura osatzen duten atalen ardura duen langilea, bere mende dagozkion langile profesionalak daudela; langile horiei agintzen zaien lana betearazi behar die, eta bere ardurapean daude errendimendua eta lortutako produktuaren kalitatearen eta egindako lanaren kontrola. Beraz, bere eginkizunen artean honako hauek daude, besteak beste:

–Bere mendeko langileen eta enpresaren arteko harreman onak begiratu eta zaintzea.

–Bere mende duen ataleko fitxategien ordena egokia zaintzea.

–Zehapenak edo sariak proposatzea, bere mendeko langileei dagokienez.

–Bere ardurapeko atal guztien produktibitatea kontrolatzea.

–Lana hobetzeko proposamenak egitea zuzendaritzari.

–Bere ardurapean dituen ataletako instalazio eta tresnen egoera egokiaren eta mantentzearen ardura izatea, atalburuaren eta mendekoen laguntzaz.

–Lan taldeak eratzea eta produkzioa planifikatzea bere ardurapeko ataletan.

–Segurtasun, kalitate, ordena eta garbitasun arauak bete daitezen arduratzea.

–Segurtasun arauak betearaztea, bai eta enpresaren barneko arauak eta produktuak manipulatzeko jardunbide egokiak ere.

2. Atalburua. Plantaren arduradunaren agindupean, halakorik bada, edo zuzenean enpresaren agindupean, bere atala edo atalak edo produkzio osoa zuzentzeko ardura du. Atal bakoitzeko lanetan esku har dezake maiz; bere agindupeko langileen asistentzia eta diziplina zaintzen ditu, eta aldi berean lanaren xehetasunak eta burutzapen egokia begiratzen ditu, lanak egiteko aginduak aplikatuz. Beraz, bere eginkizunen artean honako hauek daude, besteak beste:

–Bere ataleko makina eta tresnen kontserbazio eta errendimendua zaintzea.

–Agindupean dituen langileen zuzendaritza bere gain hartzea, ahalik eta errendimendurik handiena lortzen saiatuz eta langileen diziplinaz arduratuz.

–Langileei agintzen zaizkien prozesu edo lanen ordena, funtzionamendu eta zainketa egokiaz arduratzea.

–Agintzen zaizkion lan programak betetzearen erantzule izatea.

–Agintzen zaizkion parte, egoera-orri eta txostenak egitea, behar diren datuak jarrita, eta mendekoek aurkezten dituzten datuak egiaztatzea.

–Edozein arazo berehala konpontzeko bideak jartzea, bere taldearen lana eten ez dadin.

–Bere ardurapeko langileen prestakuntzaz eta trebakuntza praktikoaz arduratzea.

–Manipulatzen den produktuaren kalitatearen akatsak atzeman eta zuzentzea (lehengaia, material lagungarria, tarteko produktuak, produktu bukatua).

–Produktuaren kalitateaz arduratzea.

–Lantokiaren garbitasuna zaintzea eta akatsak salatzea.

–Segurtasun arauak, enpresaren barneko arauak eta bere lanpostuari dagozkion manipulazio jardunbide egokiak betetzea.

3. Lehen mailako ofiziala. Langile honek, atalburu edo arduradun baten edo haren ordezko baten agindupean, esleitu zaion ataleko eragiketa guztiak dakizki eta gauzatzen ditu, espezializazio eta errendimendu maila gorenetan. Talde lanean aritzen da, eta bere lanen eta bere menpekoen lanen erantzulea da. Lan hauek egiten ditu, besteak beste:

–Bere lan lerroari esleitutako produkzio lanak egitea, bere lanaren eta mendekoenaren ardura duela.

–Bere lan lerroari esleitutako produktibitate eta kalitate estandarrak betetzea, bai berak bai bere menpekoek.

–Agiriak betetzea, produkzio-datuak sartzea terminal informatiko baten bidez, edo kasu bakoitzerako behar diren inprimakien bidez.

–Bere lan lerroak fabrikatu behar dituen produktuetarako eskatzen den kalitatea lortzea, bai berak bai bere laguntzaileek.

–Bere lan lerroak erabiliko dituen lehengaien kalitate akatsak atzeman eta zuzentzea.

–Lan lerroko makinen garbiketa eta oinarrizko mantentze lanak egitea.

–Lan lerroa garbi eta egoera ezin hobean edukitzea, bai eta bere laguntzaileen ordena ere.

–Lan lerroko tresnak garbitu, zaindu eta gordetzeaz arduratzea.

–Segurtasun arauak, enpresaren barneko arauak eta bere lanpostuari dagozkion manipulazio jardunbide egokiak betetzea.

4. Bigarren mailako ofiziala. Langile honek zeregin konplexuak gauza ditzake, zenbait teknika eskatzen dituztenak, baita zenbait oinarri tekniko ulertzea ere. Zeregin hauek gauzatzeko, autonomia maila handia behar da, eta erantzukizun eta ekimen maila handiagoa. Bakarka edo taldean lan egin dezake. Eginkizun hauek ditu, besteak beste:

–Bere postuari esleitutako produkzio lanak gauzatzea, ezarritako metodoarekin bat.

–Bere postuari esleitutako produktibitate ratioak betetzea.

–Fabrikatu behar dituen produktuetarako eskatzen den kalitatea lortzea.

–Produkzio prozesuan erabiltzen dituen lehengaien edo gai erdi landuen kalitate akatsak atzematea.

–Berak fabrikatutako produktuen kalitatea egiaztatzea, kalitate departamentuak ezarritako parametroen arabera.

–Erabiltzen dituen makinen garbiketa eta oinarrizko mantentze lanak egitea.

–Bere lan esparrua garbi eta baldintzarik hoberenetan izatea.

–Lanabes eta tresnak garbitzea, zaintzea eta gordetzea.

–Segurtasun arauak, enpresaren barneko arauak eta bere lanpostuari dagozkion manipulazio jardunbide egokiak betetzea.

–Agiriak betetzea, produkzio-datuak sartzea terminal informatiko baten bidez, edo inprimakien bidez.

5. Hirugarren mailako ofiziala. Langile honek espezializazio maila handiko produkzio lanak gauzatzeko ardura du, lan taldean eta maila handiagoko ofizial batek gainbegiratuta. Lanbide kategoria horretara iristen da, halaber, enpresan lanean mila eta ehun egun natural betetzen direnean. Eginkizun hauek ditu, besteak beste:

–Bere postuari esleitutako produkzio lanak gauzatzea, ezarritako metodoarekin bat.

–Bere postuari esleitutako produktibitate ratioak betetzea.

–Fabrikatu behar dituen produktuetarako eskatzen den kalitatea lortzea.

–Produkzio prozesuan erabiltzen dituen lehengaien edo gai erdi landuen kalitate akatsak atzematea.

–Berak fabrikatutako produktuen kalitatea egiaztatzea, kalitate departamentuak ezarritako parametroen arabera.

–Erabiltzen dituen makinen garbiketa eta oinarrizko mantentze lanak egitea.

–Bere lan esparrua garbi eta baldintzarik hoberenetan izatea.

–Lanabes eta tresnak garbitzea, zaintzea eta gordetzea.

–Segurtasun arauak, enpresaren barneko arauak eta bere lanpostuari dagozkion manipulazio jardunbide egokiak betetzea.

6. Laguntzailea. Langile honek produkzio zeregin errazak gauzatzeko ardura du, kasu bakoitzean beharrezkoa den arreta jarriz. Enpresan hiru urte egin arte lanbide kategoria honetan iraunen du, berariazko kontrataziorik ezean.

Lanbide kategorien definizio orokorrak sektorean integraturik dauden edo integra daitezkeen jardueretarako egokiak dira eta horiei aplikatzen ahal zaizkie; hala, edozein lanpostu ezarri diren kategorietako batekin parekatuko da, lanpostuak eskatzen duen lanbide gaitasunaren arabera.

6. artikulua. Mugigarritasun funtzionala.

Enpresako Zuzendaritzak, teknika, ekoizpen edo antolakuntza mailako beharrizanak kontuan harturik, langileei lanbide kategoriaren aldaketa ekartzen duten zereginak esleitzen ahalko dizkie, bai aldi baterako bai epemugarik gabe, ordainsaria murriztu gabe. Aldaketak ordainsari handiagoak baldin badakartza, lanpostu berriari dagozkionak jasoko dituzte, lanpostu horretan aritzen diren eta eginkizun horiek dirauten bitartean. Nolanahi ere, eginkizun horiek bitarte baterako zergatiengatik gauzatzen direnean (bajengatik, eszedentziengatik, etab. egiten diren ordezpenak...) ez dira zenbatuko kategoria berria finkatzeko.

IV. KAPITULUA

Plantillak eta eskalafoiak

7. artikulua. Aldizkako lan kontratuen erregulazioa.

Merkatuaren egoerak, lanaren pilaketak edo eskabideen kopuru handiak hala eskatzen duenean, langilearen egitekoa enpresako ohiko jarduera izanik ere. Zerbitzu edo lan jakinak egiteko kontratuak ere egin ahalko dira.

Halakoetan, kontratuek legez ezarrita dagoen gehieneko iraupena izaten ahalko dute.

Enpresaren produkzio jarduerarik handieneko alditzat uztaila, abuztua, iraila, urria eta azaroa hartuko dira, hilabete horietan produkzioa muturrekoa eta eskabideak oso handiak izaten direlako. Baliteke urteko beste garai batzuetan aparteko lanak edo zerbitzu jakinak egin behar izatea; betiere enpresak behar bezala zehaztu eta frogatuko ditu halakoak.

Plantillaren egonkortasuna:

Bi aldeek uste dute, Martiko SAren jardueraren ezaugarriak kontuan izanik, produktu eraldatuei dagokienez sasoi batzuetan jarduera handiagoa dela besteetan baino. Horregatik, helburua da hitzarmen kolektibo honetan plantillaren egonkortasuna lortzea, eta ohiz kanpoko egoeretan baizik ez daitezela egin aldi baterako kontratuak.

Horretarako, alderdiek hauxe hitzartu dute:

a) Enpresaz kanpoko eta beste kontratazio eratako aldi baterako kontratuak arrazoitzea, horiek erabiltzeko irizpideak eta baldintzak zehaztuz.

b) Ildo horretatik, hitzarmen honen indarraldian, aldi baterako kontratuak legeei jarraikiz sinatuko dira, eta batez ere ondorengo egoerak gertatzen direnean:

–Aldi baterako ezintasun bajak edo oporrak bete beharra.

–Kualifikazio berezia eskatzen dutela-eta, plantillako langileek egin ezin dituzten lanak.

–Produkzioaren inguruabarrei aurre egiteko eta obra edo zerbitzu jakinetarako kontratuak.

–Errelebo kontratuak.

–Eszedentziak.

Hitzarmen hau sinatzen denetik aurrera, enpresak konpromisoa hartzen du egiturazko kaleratzerik ez egiteko, hitzarmen honen indarraldian eta ondoko urte batean.

V. KAPITULUA

Enpresan sartzea eta mailaz igotzea

8. artikulua. Probaldia.

Probaldi bat hitzartzen ahalko da: sei hilabete gehienez teknikari tituludunentzat eta bi gehienez gainerako langileentzat.

Probaldi hori idatziz agerraraziko da, eta aldi baterako ezintasun egoeretan eten eginen da, berariaz hala adosten bada.

Probaldian, langileak bere lanbide kategoriari eta lanpostuari dagozkion eskubide eta betebeharrak izanen ditu, plantillakoa balitz bezala eta kontratazio motaren arabera, lan harremana suntsitzearen ondoriozkoak izan ezik (aldeetako edozeinen eskariz suntsi daiteke lan harremana).

Probaldia bukatutakoan, atzera egin ez bada, kontratuak dagokion modalitateko ondorioak sortuko ditu, eta enpresan lanean aritutako denbora kontatuko da antzinatasunerako.

9. artikulua. Lana borondatez uztea.

Beren borondatez enpresatik alde egin nahi duten langileak behartuak daude enpresari jakinaraztera, aurreabisurako epe hauek betez:

Beharginak: 15 egun natural.

Teknikari eta administrariak: hilabetea.

Aipatu epeetan aurreabisua egiten ez bada, enpresak eskubidea izanen du langilearen likidaziotik eguneko soldata deskontatzeko aurreabisua atzeratzen den egun bakoitzeko.

10. artikulua. Kategoriaz igotzea.

Mailaz igotzeko arau hauek izanen dira:

Enpresak postu huts bat bete nahi duenean, kontuan hartu beharko ditu plantillan dauden langileak, eta, horretarako, enpresak aukeratutako langileak zortzi hilabeteko gaitze aldia izanen du, egiaztatzeko balio duela eginkizun horiek betetzeko. Enpresak edo langileak berak ez badituzte betetzen gaitzeko helburuak, eginkizun horiek betetzeko nahikoak, edo horiek betetzeko interesik ez izanez gero, aurreko lanbide kategoria berreskuratzen ahalko du, eta, beraz, baita egoki diren soldata eta laneko baldintzak ere.

Aurreko lerroaldeko igoerarako langile gaiturik ez balego enpresako plantillan, enpresak askatasuna izanen du plantillatik kanpoko norbait kontratatzeko.

VI. KAPITULUA

Lanaldia, aparteko orduak eta oporrak

11. artikulua. Lanaldia.

Oro har, eta Langileen Estatutuaren 34. artikuluko 1. idatz-zatian xedatutakoari jarraikiz, urtean egin beharreko benetako lanorduak 1.712 izanen dira, 2012., 2013., 2014. eta 2015. urteetarako.

12. artikulua. Lanaldiaren antolaketa.

Enpresaren ahalmena izanen da lanaldia antolatzea, horretarako lan txandak, lanaldi etengabea eta abar ezarriz, langileen ordezkariekin ados jarririk, eta betiere arlo honetan indarra duten legezko arauei jarraikiz.

Urtero lan egutegia eginen da eta bertan bilduko dira lan ordutegia, asteko atsedenaldiak, jaiegunak eta, langileen ordezkariekin adosturik, oporraldiak eta jaiegun, igande eta zubietako lana.

Atsedenaldia:

Eguneko lanaldian 20 minutuko atsedenaldia izanen da. Hori benetako lan denboratzat joko da ondorio guztietarako. Atsedenaldia amaitzean langileak bere lanpostuan eta lanean hasteko prest egon behar du. Eguneko 6 ordutik gora lanaldi jarraitua egin beharko da atsedenaldi horretarako eskubidea sortzeko.

13. artikulua. Aparteko orduaren kontzeptua.

Aparteko orduak dira enpresako lan egutegian (adiera nagusian hartuta) ezarritako lanalditik kanpo edo horren gainetik egiten direnak, eta atal batzuek, ohituragatik, produkzioaren antolaketagatik edo akordio batengatik, dituzten edo izaten ahal dituzten ordutegi bereziak.

Ez dira aparteko ordutzat joko asteburuko txanda itunduan egiten diren lanorduak, ezta legezko ordezkariekin itundutako malgutasun formulen arabera egindakoak ere.

Enpresako zuzendaritzak egin diren aparteko orduen berri emanen die langileen legezko ordezkariei.

Ahal dela, atal bakoitzeko aparteko orduak bertako langileek eginen dituzte.

14. artikulua. Aparteko orduaren balioa.

Aparteko orduaren balioa, hitzarmen kolektibo honetako langileentzat, hau izanen da:

–Aparteko lehen ordua: 1,25 orduko oinarrizko soldata.

–Aparteko bigarren ordua eta gainerakoak: 1,50 orduko oinarrizko soldata.

–Larunbatetako lana: 1,50 orduko oinarrizko soldata (ordu guztiak).

Nolanahi ere, gure sektorean Eguberrietako kanpainaren behar handia dugunez, eta merkatua malgutzeko eskaera gero eta handiagoa dela eta, gure bezeroei erantzun egokia emateko eta lehiakorrak izateko, kanpainan (urritik abendua arte) egindako orduak, salbu jaiegunetakoak, ordu arrunt gisa hartuko dira (ordu bat ordu batekin konpentsatuko da). Larunbatetan arratsaldeko txandan eta/edo gauekoan egindako orduak oinarrizko soldatako ordu eta erdirekin konpentsatuko dira.

15. artikulua. Igande eta jaiegunetako lana:

Igande eta jaiegunetan lan egin beharra badago, honela ordainduko da:

–Lehen lanorduaren ordainez, hiru orduko oinarrizko soldata.

–Bigarren orduaren eta gainerakoen ordainez, ordu eta erdiko oinarrizko soldata.

Abenduaren 3an egiten diren orduak larunbatetan egindakoen konpentsazio bera izanen dute, hau da, oinarrizko soldataren ordu eta erdirekin.

16. artikulua. Oporrak.

Martiko SAko langileek, enpresan lan egiten duten urte natural bakoitzeko, 22 laneguneko (astelehenetik ostiralera bitarteko egunak) opor ordainduak hartzeko eskubidea izanen dute. Aldeak ados jarriko dira oporrak antolatzeko.

17. artikulua. Lan egutegia.

Urtero enpresetako zuzendaritzak eta enpresa batzordeak lan egutegia prestatu eta sinatuko dute.

Egutegian ondokoak zehaztuko dira: lanegunak, asteko eta/edo eguneko lanaldia, oporrak, asteko atsedenaldia eta jaiegunak.

Antolamendua edo produkzioa dela-eta, urteko lan egutegia aldatu ahal izanen da.

VII. KAPITULUA

Lizentzia ordainduak, baimenak eta eszedentziak

18. artikulua. Lizentzia ordainduak.

Langileak baimena du lanera ez agertzeko, ordaindua izateko eskubidea galdu gabe, baldin eta aldez aurretik abisatu eta justifikatzen badu. Hona hemen horretarako arrazoiak eta denbora:

a) Langilearen ezkontza: 15 egun natural.

b) Ezkontidea, seme-alabak edo gurasoak hiltzea: 4 egun natural, gertaera izaten den egunetik hasita. Ezkontidea, seme-alabak edo gurasoak ospitaleratzea, baita etxean denean ere, medikuak berariaz agindurik: 3 egun, ez-jarraituak izan daitezkeenak, ospitaleratzeak dirauen bitartean. Anai-arreba, biloba eta aitona-amonen kasuan, 2 egun. Ahaide politikoei ere badagokie atal hau. Kasu horietan, 200 kilometrora baino urrunago joan behar denean bi egun gehiago izanen dira.

c) Egun natural bat, 1. eta 2. mailara arteko familiarren ebakuntza gertatzen denean ospitaleratu gabe.

d) Gurasoen, seme-alaben eta anai-arreben ezkontza: egun natural bat.

e) Ohiko bizilekuz aldatzeko: egun bat.

f) Seme edo alaba baten jaiotzagatik: 3 egun natural, eta bost egun arte luzatu daitezke zesarearen kasuan.

g) Eginbehar publikoren bat betetzeko: publikoa eta pertsonala den eginbehar saihetsezina betetzeko: behar-beharrezkoa den denbora, boto ematekoa barne.

h) Eginkizun sindikaletan edo langileen ordezkaritza lanetan aritzeko: legez ezarritako moduan (20 ordu hilabeteko).

i) Medikuaren edo espezialistaren kontsultara joateko behar-beharrezkoa den denbora.

j) Urtean 20 ordu, gehienez, odoleko edo ezkontza bidezko lehen mailako ahaideei medikuaren kontsultara laguntzeko.

Ezkondu gabeko bikoteei, legezko ondorio guztietarako, baimen ordainduak berdin aplikatuko zaizkie, beren egoera justifikatua badute erregistroan edo erroldan.

19. artikulua. Eszedentziak.

Eszedentzia borondatezkoa edo nahitaezkoa izan daiteke, eta indarreko legeak aplikatuko dira.

Ezin izanen da borondatezko eszedentziarik eskatu Martiko enpresaren antzeko sektore edo jardueretako enpresetan lan egiteko.

20. artikulua. Laneko eta familiako eginkizunak batera eramatea.

Esnea emateko baimena.

Lanaldiaren murrizketa legezko zaintzarengatik.

Lanaldiaren murrizketa ahaideak zaintzeko.

Amatasunaren babesa.

Kontratua etetea amatasunagatik, haurdunaldiagatik edo adopzioagatik.

Atal hauetan indarreko legeak aplikatuko dira.

VIII. KAPITULUA

Baldintza ekonomikoak

21. artikulua. Ordainsariak.

Hitzarmen honetako soldatak honako egitura hau izanen du:

–Oinarrizko soldata: kontzeptu guztiak ditu barnean (oinarria, osagarriak, oporrak eta aparteko pagak).

Produkzioko langileen taulak

Administrazioko langileen taulak

–Antzinatasun saria: osagarri bat da, enpresari lotuta egindako denbora saritzen duena. Langilea finkoa den egunetik aurrera zenbatuko da.

–Absentismoarekin lotutako saria: 2014. eta 2015. urteetarako, prima berri bat aplikatuko da, lanera bertaratzearekin loturik. Hauxe da prima:

2014. urterako, absentismoaren indizea hitzarmen honetan ezarritako urteko lanaldiaren %2,75 baino txikiagoa bada, zerbitzuak bederatzi hilabetez baino gehiagoz eman dituzten langileek prima edo pizgarri bat jasoko dute hitzarmen hau sinatutakoan, etorkizuneko akordio edo hitzarmenetan ezin finkatu dena: 150 euro gordin urtean, edo arabera dagokiona, egindako lan denbora kontuan hartuz.

2015. urterako, bi prima ezartzen dira, bat kolektiboa eta bestea banakakoa. Absentismo orokorra %2,75 baino txikiagoa bada, zerbitzuak bederatzi hilabetez baino gehiagoz eman dituzten langile guztiei 100 euro pagatuko zaizkie, edo egindako lan denborari dagokiona, 2016. urteko martxoan jaso beharrekoa. Era berean, zerbitzuak bederatzi hilabetez baino gehiagoz eman eta beren urteko absentismoaren indizea gehienez hitzarmen honetan ezarritako urteko lanaldiaren %2,5ekoa duten langileei, 2016ko martxoan, prima edo pizgarria jasoko dute, etorkizuneko akordio edo hitzarmenetan ezin finkatu dena: 200 euro gordin urtean, edo edo arabera dagokiona, egindako lan denbora kontuan hartuz.

22. artikulua. Soldata igoerak.

2012. urtean: 2011. urteko soldatari eustea.

2013. urtean: 2012. urteko soldatari eustea.

2014. urtean: 2013. urteko soldatari eustea.

2015. urtean: 2014. urteko soldatari eustea.

23. artikulua. Gaueko lanaren plusa.

22:00etatik 06:00etara bitartean lan egiten duten langileek gaueko lanaren plusa kobratuko dute: oinarrizko soldataren %25.

Plus honetatik kanpo geldituko dira ohiko lanaldia 6:00 baino lehen hasten duten langileak.

24. artikulua. Aparteko eskersariak.

Hitzarmen kolektibo honen eraginpeko langileek urtean aparteko bi eskersarirako eskubidea izanen dute. Aparteko eskersarian oinarrizko soldata eta antzinatasun saria sartuko dira. Paga horiek hileko nominetan banatuko dira.

25. artikulua: Aldi baterako ezintasuna.

Eritasun arrunta.

Eritasun arruntaren edo lanekoa ez den istripuaren kasuan, lehenbiziko egunetik seigarren eguna arte soldataren %75 jasoko du. 7. egunetik aurrera soldataren %100 jasoko du.

Ospitaleratzen diren langileek soldatan %100 kobratuko dute.

Lan istripuak eta lanbide eritasunak.

Hitzarmen kolektibo honen eraginpeko langileek, laneko istripu edo lanbide eritasunen baten ondorioz aldi baterako ezintasuna (ABE) izaten badute, beren benetako soldataren %100 kobratzeko eskubidea izanen dute lehenbiziko egunetik hasi eta gehienez ere 18 hilabete igaro arte.

26. artikulua. Masaje emailea.

Enpresak, langileen osasuna zaintzeko, masaje zerbitzu bat jarriko du haien esku, enpresaren kargura. Zerbitzu hori ez da finkatuko, urtetik urtera berrikusiko da, emaitzen arabera.

IX. KAPITULUA

Hutsegiteak eta zehapenak

27. artikulua. Hutsegiteak.

Hutsegitetzat hartuko dira indarra duten legezko xedapenetan eta, oro har, hitzarmen kolektibo honetan ezarritako betebeharrak urratzea edo ez ezagutzea dakarten ekintzak edo ez-egiteak.

Garrantziaren arabera, hutsegiteak honela sailkatuko dira: arinak, larriak eta oso larriak.

28. artikulua. Hutsegite arinen sailkapena.

Ondokoak hutsegite arintzat jotzen dira:

1. Hilabeteko epearen barnean lanera behin, bitan edo hirutan berandu iristea, bidezko arrazoirik gabe.

2. Lanerako ezintasun iragankorreko baja edo lanera ez agertzearen bidezko arrazoiak bi egun balioduneko epean ez jakinaraztea, hori egiterik ez dela izan frogatu ezean.

3. Arrazoi justifikaturen bat izan gabe, lanetik alde egitea denbora gutxirako.

4. Norberaren noizean behingo garbitasun eta txukuntasun eza.

5. Egun batez lanera ez agertzea, bidezko arrazoirik gabe.

29. artikulua. Hutsegite larrien sailkapena.

Honako hauek hutsegite larriak dira:

1. Lautik zortzira bitarteko hutsegite lanera berandu iristeagatik, 30 egun naturaleko epearen barnean.

2. Lanera bi egunez ez agertzea 30 egun naturaleko epean, bidezko arrazoirik izan gabe.

3. Lanorduetan edozein motatako jokoetan ibiltzea.

4. Beste langile bat lanean agertu dela simulatzea, haren sinadura, fitxa edo kontrol-txartela erabiliz.

5. Lanean zuhurtziarik gabe jokatzea. Jokabide hori hutsegite oso larritzat jo daiteke, baldin eta langilea bera edo lankideak istripua izateko arriskuan jartzen badira edota instalazioak edo salgaiak hondatzeko edo su hartzeko arriskuan.

6. Lanorduetan norberaren lanak egitea, bai eta enpresaren tresnak norberarentzat erabiltzea ere, lanalditik kanpo izan arren, horretarako baimenik izan gabe (hutsegite arina izan liteke).

7. Langileak ikusitako egintzak edo hutsegiteak ezkutatzea, horrek kalte larriak sortzen baditu, eta instalazioetan ikusten den edozein arazo garrantzitsuren berri buruari berehala ez ematea.

8. Norberaren akatsak asmo txarrez ezkutatzea eta, horren ondorioz, enpresari kalte egitea.

9. Eguneroko 20 minutuko atsedenaldi ordainduaren ondoren lanpostura berandu itzultzea.

30. artikulua. Hutsegite oso larrien sailkapena.

Honako hauek hutsegite oso larriak dira:

1. Behin eta berriz lanera berandu iristea edo ez joatea, horretarako justifikaziorik gabe.

a) Esate baterako, lanera zortzi aldiz baino gehiagotan berandu iristea arrazoirik gabe, hogeita hamar egun naturaleko epean, eta hamasei aldiz baino gehiagotan bidezko arrazoirik gabe, ehun eta laurogei egun naturaleko epean.

b) Lanera ez joateagatiko hutsegitea: lanera hiru egunez ez agertzea, arrazoirik eman gabe, hiru hilabeteko epean.

2. Agindutako kudeaketetan iruzur egitea, eta enpresari, lankideei edo beste edozeini lantoki barnean nahiz lanean beste edozein lekutan aritzean ebastea edo lapurtzea.

3. Enpresaren lanabes, makineria, aparatu, instalazio, eraikin, altzari edo agiriak desagerrarazi, ezdeus bihurtu edo hondatzea.

4. Enpresaren edo langileen eskutitzen edo isilpeko agirien sekretua haustea.

5. Enpresakoa ez den norbaiti nahitaez isilpean eduki beharreko datuak ezagutaraztea.

6. Nagusi, mendeko edo lankideak jotzea edo iraintzea, norberaren defentsarako ez bada.

7. Istripu larriak sorraraztea, zabarkeria edo zuhurtziagabekeria desenkusaezinagatik.

8. Lankideekin liskarrak eta iskanbilak sortzea.

9. Segurtasun eta higieneagatik debekatuta dagoen tokietan erretzea. Debeku hori argi azaldu beharko da halako tokietan, kartelen, banderen edo beste edozein sistema egokiren bidez.

10. Kontratuko onustea haustea, eta laneko konfiantza-abusua.

11. Ohiko edota itundutako errendimendua luzaroan eta nahita gutxitzea.

12. Produktu bukatuaren kalitate kontroletan akatsak izatea.

12. Urtebetean bi hutsegite larri egitea.

13. Borondatezko eszedentzian egonik antzeko enpresa batean edo enpresa lehiakide batean lan egitea.

31. artikulua. Zehapenak.

Hutsegiteen arabera, zehapen hauek ezarriko dira:

1. Hutsegite arinengatik:

–Hitzezko kargu-hartzea.

–Kargu-hartze idatzia.

–Gehienez bi eguneko enplegu-soldaten etenaldia.

2. Hutsegite larriengatik:

–Hurrengo oporraldiko txanda hautatzeko eskubidea galtzea.

–Hiru egunetik hamabostera bitarteko enplegu-soldaten etenaldia.

–Goragoko kategoria batera pasatzeko gaitasuna kentzea hiru urterako gehienez.

3. Hutsegite oso larriengatik:

–Hamasei egunetik hirurogeira bitarteko enplegu-soldaten etenaldia.

–Goragoko kategoria batera pasatzeko gaitasuna kentzea, bost urterako gehienez.

–Hurrengo oporraldiko txanda hautatzeko eskubidea galtzea.

–Kaleratzea.

32. artikulua. Zehapenak betetzea.

Zehapen guztiak ematen diren unetik beretik hasita betearaziko dira; horrek ez du alde batera uzten zehapena jasotzen duenak jurisdikzio eskudunean erreklamazioak egiteko duen eskubidea.

33. artikulua. Preskripzioa.

Langileei dagokienez, hutsegite arinak hamar egunen buruan preskribatuko dira, larriak hogei egunen buruan eta oso larriak hirurogeiren buruan, enpresa hutsegiteaz jakitun egindako egunetik aitzina eta, nolanahi ere, hutsegitea egin eta sei hilabeteren buruan.

34. artikulua. Prozedura.

1. Enpresako zuzendaritzari edo haren ordezkariari dagokio sariak emateko edo zehapenak ezartzeko ahalmena.

2. Enpresak langileen legezko ordezkariei eta ordezkari sindikalari, hala denean, jakinaraziko die hutsegite larrien eta oso larrien ondorioz langileei ezartzen zaizkien zehapenak.

3. Hutsegiteak arinak direnean ez da espedientea ireki beharko. Hutsegite larrien edo oso larrien ondoriozko zehapenak ezartzeko ere ez da espedienterik instruitu beharko. Nolanahi ere, horiek idatziz jakinaraziko dira, eta idazkian zehatz azalduko da zer egitatek sortu duen hutsegitea eta nolako zehapena ezarriko den, non ez den hitzezko kargu-hartzea.

Gertaerak argitzearren, enpresak erabakitzen badu espedientea irekitzea zehapenak ezartzeko, interesdunak eskubidea izanen du deskargu orria aurkezteko eta proposatzen dituen eta instruktorearen ustez bidezkoak diren frogak gauzatzeko, eginbideak hasten direnetik zazpi eguneko epean gehienez.

4. Hutsegite larri edo oso larri baten ondoriozko zehapena ezartzen zaienean karguetan dauden langileen legezko ordezkariei edo agintaldia bukatu eta urtebetea pasatua ez dutenei, aginduzkoa izanen da espedientea irekitzea, arau hauei jarraikiz:

a) Enpresak espedientea ireki dela jakinaraziko dio langileari eta, horrekin batera, espedientean azaltzen diren gertaerak biltzen dituen kargu-agiriaren berri emanen dio.

b) Enpresak insktruktore bat izendatuko du, eta horren izena espedientea irekitzeko idazkian berean azalduko da.

c) Instruktoreak idazki hori interesdunari igorriko dio, alegazioak egin eta bidezkoak iruditzen zaizkion frogak aurkez ditzan bost eguneko epean.

d) Espediente irekitzea bukaturik, enpresak ondokoak jakinaraziko dizkio langileari, idatziz: ezarritako zehapena, zein egunetatik hasita izanen dituen ondorioak eta zehapenaren oinarri diren gertaerak.

35. artikulua. Enpresaburuaren lan arloko arau-hausteak.

Apirilaren 7ko 8/1988 Legean eta indarra duten gainerako legezko xedapenetan ezarritakoa aplikatuko da.

X. KAPITULUA

Segurtasuna eta higienea

36. artikulua. Arau orokorra.

Laneko Arriskuei Aurrea Hartzeko 31/1995 Legea ardatz harturik, hitzarmen kolektibo honetan, gai honen garapenak hiru oinarri nagusi izan behar ditu:

a) Martiko SA enpresako langileen osasunaren eta segurtasunaren babes egokia bermatuko duen prebentzio politika diseinatzea, atal bakoitzaren egoeratik abiatuta, egungo legearen erregelamenduzko garapenaren hutsuneak betetzeko.

b) Langileek beren ordezkarien bidez arriskuen prebentzioan eta ezabaketan eraginkortasunez parte hartuko dutela bermatzea.

c) Enpresan araudia hobeki aplikatuko dela ziurtatzea.

Beraz, hiru alderdi nagusi horiek garatzeko, hitzarmen kolektibo hau sinatu duten aldeek ondoko neurriak hartzea erabaki dute:

1. Segurtasun eta osasun batzordea eratzea eta prebentzio plan eta programak diseinatu eta aplikatzea. Langileen ordezkariek lan horretan parte hartuko dute. Langileen batzordeko kideek eta enpresaren ordezkariek osatuko dute batzorde hori.

2. Lanpostuetan ezin saihestu diren arriskuen ebaluazioa egitea, prebentzio neurri egokienen lehentasunak zehaztea langileen ordezkariekin batera, eta langileen osasuna zaintzea lanpostu bakoitzaren arriskuak kontuan izanik.

3. Toxiko, nekagarri eta arriskutsutzat jotzen diren lanpostuen ondorioz, plusak behin-behineko neurriak izanen dira. Arriskua kendu arte iraunen dute baina ez dira arriskua gutxitzeko traba izanen. Lanpostu bereziki nekagarrien azterketa bat eginen da, neurriak hartzeko, ahal dela nekagarritasun hori arintzeko.

37. artikulua. Laneko segurtasuna.

Enpresak eta langileek zehatz bete beharko dituzte laneko segurtasun eta higienearen arloan indarra duten xedapen guztiak.

38. artikulua. Lokaletako higienea.

Lokalek baldintza egokiak izan behar dituzte osasun eta ingurumen aldetik, eta garbi eta higiene onarekin edukitzeko baliabideak izan; langileek enpresako zuzendaritzak horri begira ematen dituen arauak bete behar dituzte.

39. artikulua. Osasun azterketak.

Oinarrizko hitzarmen honen eraginpeko langileek urtean behin osasun azterketa orokorra, egokia eta behar adinakoa egiteko eskubidea dute.

Langileei egin beharreko proba medikoak lanaldiaren barnean eginen dira. Osasun azterketa hori osasun zerbitzu egokiek antolatuko dute.

40. artikulua. Higiene zerbitzuak.

Lantoki guztietan edateko ura hartzeko behar beste toki izanen da, bai eta aldagelak, garbigelak, dutxak eta komunak ere, legez ezarritakoaren arabera.

41. artikulua. Laneko arropa.

Enpresak langile guztiei, oro har, lanerako behar dituzten arropak eta oinetakoak emanen dizkie, zein departamentutan lan egiten duten kontuan hartuta.

Enpresak behar diren arropa beroak emanen dizkie tenperatura baxuko departamentu edo ataletan lan egiten duten guztiei. Era berean, behar diren oinetako egokiak eta irristagaitzak banatuko ditu.

Lanerako arropa horien kontserbazioa eta garbiketa enpresaren kontura izanen dira.

42. artikulua. Botika-gela.

Enpresa aldez aurretik instalatutako botika gela edo osasun gela hornitzeaz eta mantentzeaz arduratuko da, segurtasun eta higiene arloan indarra duten xedapenei jarraikiz.

43. artikulua. Langileen higienea.

Jangaiak prestatzen eta maneiatzen zuzenean esku hartzen duten langileek zorrotz beteko dituzte ezarritako higiene eta osasun neurri guztiak.

Enpresak beharrezkoak diren baliabide guztiak emanen dizkie, behar duten langileei, jangaiak erabiltzeko txartela lor dezaten.

Era berean, enpresak arauak ezarriko ditu, jangaiak zuzenean ukitu ez arren fabrikazio lanak egiten diren lokaletan sartu behar duten langileentzat.

Halaber, kontuan izanen da langileen higiene neurriei dagokienez indarra duen araudian ezarritakoa bete behar dela.

Produkzio departamentu guztietan txanoa nahitaez erabili behar da.

XI. KAPITULUA

Langileen ordezkariak

44. artikulua. Eskubide sindikalak.

Enpresak errespetatu eginen du langile guztiek libreki sindikatzeko duten eskubidea, onartuko du sindikatu batean afiliatuta dauden langileek bilerak egin eta kuotak kobratu ditzaketela eta lanorduetatik kanpo eta enpresako ohiko jardueran etenik egin gabe sindikatuko informazioa banatu dezaketela; era berean, ezin izanen du ez afiliatzeko edo afiliazioa uzteko baldintza jarri langile batek bere lanpostuari eusteko, edo afiliazioagatik edo sindikatuko jardueragatik beste modu batez kalte egin langileari. Sindikatuek informazioa bidaltzen ahalko dute enpresara, banatu dadin, betiere lanorduetatik kanpo eta produkzio prozesua eten gabe. Lantokian iragarki ohol bat izanen da, behar adinako ordezkaritza duten sindikatuek oharrak jar ditzaten.

45. artikulua. Enpresa batzordearen eskumenak.

Enpresa batzordeak Langileen Estatutuaren 64. artikuluan onartutako eskumenak izanen ditu.

46. artikulua. Ordu metaketa.

Enpresa batzordeko kideek Langileen Estatutuan ezarritako ordu ordainduak izanen dituzte hilean beren ordezkaritza lanak egiteko, segurtasun eta osasun arloko prebentziorako orduak barne.

Hileko ordu ordainduen metaketari dagokionez, Batzordeko kideek, batzordeko kide diren aldetik, bakoitzari dagozkion orduen %100era bitarte laga diezaiokete beren sindikatuko beste langile bati. Lagako diren orduak hilean hilekoak izanen dira, betiere orduak laga baino hilabete bat lehenago, gutxienez, enpresako zuzendaritzari horren berri emanda.

47. artikulua. Batzarrak egiteko orduak.

Urtean gehienez ere lau ordu hartu ahalko dira batzarrak egiteko, eta lan denboratzat joko dira ondorio guztietarako.

Hori dela eta, batzarra egin ondoren enpresa batzordeak bertaratu diren langileen zerrenda emanen dio enpresako zuzendaritzari, batzarrean emandako denbora urteko lanaldirako kontuan har diezaien ondorio guztietarako.

48. artikulua. Etengabeko prestakuntza.

Martiko SA enpresako zuzendaritzak ordezkari sindikalei hitz eman die plantillako langileen etengabeko prestakuntza sustatuko duela. Bi aldeek enpresako langileen etengabeko eguneratzea sustatu nahi dute, lehen mailako garrantzi estrategikoa duelako horrek enpresetan, teknologiaren eta antolamenduaren aldaketa handien garai hauetan.

Langileen kualifikazioa langileen eskubidea da, eta tresna, beren garapenerako, desberdintasunak murrizteko eta enpresa barnean sustatzeko. Horretaz gain, balio estrategikoa da, langileentzat eta enpresarentzat.

49. artikulua. Berdintasuna.

Hitzarmen honen sinatzaileek bere egiten dute oso-osorik emakumeen eta gizonen arteko tratu berdintasunaren printzipioa, bereizkeria mota guztiak gaitzesten dituzte eta aukera berdintasunez lan egiteko eskubidea aitortzen dute.

Alde sinatzaileek konpromisoa hartu dute lantokian aukera berdintasunaren printzipioa bultzatzeko eta genero diskriminaziorik eza zaintzeko, Langileen Estatutuaren 37. artikuluan ezarritakoarekin bat.

Konpromiso honek berarekin dakar, halaber, emakume eta gizonen arteko berdintasunerako oztopoak kentzea eta izan litekeen bereizkeria zuzentzeko ekintza positiboak abiaraztea edo behar diren neurriak hartzea.

Alde sinatzaileek konpromisoa hartzen dute irudi eta hizkera ez sexista bultzatzeko, barneko eta kanpoko komunikazio guztietan.

50. artikulua. Arauen lehentasuna.

Aurreko artikuluetan berariaz arautu ez den orotan, aldeek Haragi Industrietarako Hitzarmen Kolektibo Nazionalean eta Langileen Estatutuan eta lan arloko indarreko gainerako legeetan xedatutakoari jarraituko diote.

51. artikulua. Batzorde Paritarioa.

–Eraketa:

Martiko SAren hitzarmen kolektiboaren zuzenketaren akta hau sinatu eta hilabeteko epean, Batzorde Paritario bat sortuko da, alde bakoitzeko bi ordezkarik osatuko dutena.

–Eginkizunak:

Batzorde horren esku daude hitzartutakoaren interpretazioa, jarraipena eta zaintza, baita haren menpe jarritako gatazkak aztertu eta erabakia hartzea ere arazoei irtenbidea emateko prozeduretan; orobat, premiazkoa denean, hitzarmenaren edukia osatzea, hitzarmen honetan ezarritakoari jarraikiz.

Halaber, hitzarmen honetan xedatutakoaren interpretazioaz edo aplikazioaz edozein gatazka indibidual edo kolektibo paratu aitzin, hala aurretiazko erreklamaziokoa lan administrazioko agintaritza eskudunari, nola organo jurisdikzional eskudunari zuzendua, lehenik auzia Batzorde Paritarioaren esku jarriko da.

Langileen Estatutuko III. tituluan xedaturikoarekin bat, Batzordeak hitzarmen honen xede diren gaiei buruz eta gai horiek interpretatu eta garatzeko hartzen dituen erabakiak hitzarmenari erantsiko zaizkio eta balio juridiko bera izanen dute.

–Erregelamendua:

Batzorde Paritarioak bere funtzionamendurako egokia den erregelamendua prestatu eta onets dezake.

Batzorde Paritarioa edozein aldek eskaturik bilduko da, deialdia eskatzen denetik hamabortz eguneko epean, salbu eta presa dela-eta, bilera alde guztien eskubideak zaintzeko moduko epe batean egitea komeni denean.

Batzordeak erabakiak hartzeko, kideen hiru laurdenen botoak beharko dira erabaki horren alde. Haren ebazpenak astebeteko epea izanen du gehienez.

52. artikulua. Gatazkak epaitegitik kanpo konpontzea.

Batzorde Paritario horren baitan zuzentzen ahal ez diren gatazkak konpondu beharrez, alderdiek auzia lanbide arteko organo independenteen eskutan uzten ahal dutela deusetan ukatu gabe ere, alderdiek hitzartu dute, aitzinetik edo hasiera batean, izatea organo hau hitzarmen kolektibo honen aplikazioaren, interpretazioaren edo garapenaren ondoriozko gatazka indibidual edo kolektibo guztiak konpontzera saiatuko dena.

53. artikulua. Hitzarmena salatzeko modua eta baldintzak.

Alderdi sinatzaileetako edozeinek salatzen ahalko du hitzarmen kolektibo hau, iraungi baino 30 egun lehenago, bertze aldeari idatziz jakinaraziz.

Hitzarmen kolektiboa salatu zenetik urte bat iraganda beste hitzarmen bat lortu gabe edo arbitraje laudo bat eman gabe, hitzarmenak indarra galduko du, eta Haragi Industrietarako Hitzarmen Kolektibo Nazionalean xedatutakoa aplikatuko da.

Nolanahi ere, aldeek modu frogagarrian konpromisoa hartzen dute beste hitzarmen kolektibo bat sinatzeko, aldeetako edozeinek hitzarmen hau salatzen duen unetik beretik, eta aldeen nahia da gaur egungo arauen edukitik abiatuta hastea negoziazio prozesua, eta hala jaso zen 2015eko uztailaren 27ko aktan.

Iragarkiaren kodea: F1514701