233. ALDIZKARIA - 2015eko azaroaren 20a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

11C/2015 EBAZPENA, irailaren 30ekoa, Politika Ekonomiko eta Enpresarialaren eta Lanaren zuzendari nagusiak emana, Ororbiako Redín y Becerra, SL (Reybesa) enpresaren hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.

Orkoiengo Redín y Becerra SL (Reybesa) enpresaren hitzarmen kolektiboaren testua (kode zenbakia: 31100472012013) aztertu da, Erregistro honetan 2015eko irailaren 22an sartu zena eta enpresaren ordezkariek eta sindikatuen ordezkariek 2015eko irailaren 10ean izenpetu zutena, Langileen Estatutuari buruzko Legearen testu bategina onetsi zuen martxoaren 24ko 1/1995 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera. Horrenbestez,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Nafarroako Aldizkari Ofizialean argitaratzeko agintzea, denek jakin dezaten.

Iruñean, 2015eko irailaren 30ean.–Politika Ekonomiko eta Enpresarialaren eta Lanaren zuzendari nagusia, Pilar Irigoien Ostiza.

REDIN Y BECERRA SL (REYBESA) ENPRESAREN HITZARMENA

1. artikulua. Alderdiak zehaztea.

Redin y Becerra (Reybesa) enpresaren hitzarmen kolektibo honen sinatzaileak honako hauek dira: Reybesa enpresa, ugazaben aldetik, eta ELA sindikatuari atxikitako langileen ordezkariak, langileen aldetik.

2. artikulua. Langile eremua, eremu funtzionala, lurralde eremua eta iraunaldia.

1. Langile eremua:

Hitzarmen honek Redin y Becerra SL (Reybesa) enpresari atxikitako langile guztiak ukitzen ditu.

2. Eremu funtzionala:

Hitzarmen hau nahitaez bete beharko da Redin y Becerra SL enpresan.

3. Lurralde eremua:

Hitzarmen hau Nafarroan aplikatuko da.

4. Iraunaldia:

Hitzarmen kolektibo honek 2 urte iraunen du: 2014ko urtarrilaren 1etik 2015eko abenduaren 31ra arte.

3. artikulua. Salaketa.

Hitzarmen kolektibo honen indarraldia 2012ko urtarrilaren 1ean hasiko da, eta 2013ko abenduaren 31n amaitu.

Hitzarmen hau salatu nahi bada, hitzarmena edo urteko luzapena bukatu baino hiru hilabete lehenago gutxienez egin beharko da.

Iraunaldia amaitu ondoren, hitzarmena urtero luzatuko da mugagabe, harik eta bi alderdiek haren ordezko bat sinatzen duten arte, mugagabeko aurreraeragina baitu.

4. artikulua. Lanaldia.

Hitzarmena indarrean dagoen bitartean, itundutako lanaldia honako hau izanen da:

Egiazki lan egin beharreko 1.744 ordu urtean, gehienez ere, bi urteetarako (2014. eta 2015. urteetarako).

Lanaldi osoa arautzeko, enpresak jardueraren eskakizunen arabera lan egutegi bat prestatuko du urtero. Egutegian langileen ordezkariek egindako proposamenak hartuko dira kontuan.

Lanaldi jarraituaren kasuetan, gutxienez hamabost minutuko atsedenaldia ezarriko da. Aurreko lerroaldean aurreikusi den atsedenaldia benetako lan denboratzat hartuko da.

Langileek lanaldia murrizteko eskubidea izanen dute Langileen Estatutuaren 37.5 artikuluan ezarritako kasu eta baldintzetan.

5. artikulua. Ordainsarietako kontzeptuak.

Alderdiek honako soldata igoera hau hitzartu dute:

2014an: %1eko igoera, 2013ko soldata gordinen gainean.

2015ean: %1eko igoera, 2014ko zenbateko gordinen gainean.

Hitzarmen kolektibo honetan itundutako soldata igoerak langile bakoitzaren soldata errealaren gainean aplikatuko dira. Soldata igoerak soldatako kontzeptu guztietan aplikatuko dira.

6. artikulua. Antzinatasuna.

Langileek sorraraz ditzaketen laurtekoen kopurua mugagabea izanen da, eta ikastun sartu berriei edo gaur egun ikastun edo izangaiaren kategoria dutenei ikaskuntza ere kontuan hartuko zaie.

Aldi baterako kontratu bat mugagabeko kontratu bihurtzen denean, aldi baterako kontratu horren iraupena ere kontuan hartuko da antzinatasuna kalkulatzeko.

Laurteko bakoitzeko zenbatekoa enpresa hitzarmenaren oinarrizko soldataren %5 izanen da, une oro indarra duten legezko xedapenetan aurreikusitakoari jarraikiz.

7. artikulua. Lanbide-sailkapena.

Nafarroako metalaren merkataritza sektorearen hitzarmenean agertzen den lanbide sailkapena mantenduko da.

8. artikulua. Produkzio primengatiko osagarriak.

Produkzio prima gisa langileek kobratu dituzten zenbatekoak 5. artikuluan (“Ordainsarietako kontzeptuak”) aipatutako portzentaje berean igoko dira 2014an eta 2015ean.

9. artikulua. Gaueko lanaren osagarriak.

22:00etatik 06:00etara bitartean lan egindako ordu guztiek gaueko lanaren plusa izanen dute, %25 hain zuzen.

Gaueko lanaldiko lanetarako berariaz kontratatu diren langileek ez dute jasoko osagarri hori.

10. artikulua. Aparteko eskersariak.

Enpresek uztaileko eta Eguberrietako aparteko eskersariak ordainduko dizkiete horietarako eskubidea duten langile guztiei. Eskersaria hilabeteko soldata adinakoa izanen da, ordainsari guztiak hartuta.

Enpresek langileentzako eskersari araubide bat prestatuko dute, irabazien edo salmenten araberakoa, establezimendu bakoitzaren antolaketari egokitua. Eskersari horiek langileak hilabetean jasotzen duen soldata osoa adinakoak izanen dira gutxienez.

Aurreko lerroaldean aipatzen den eskersaria urtean behin ordainduko da eta, kasu guztietan, urte bakoitzeko lehendabiziko hiruhilekoan likidatu beharko da.

11. artikulua. Bidaiak eta dietak.

Lanarekin lotutako bidaiak treneko lehenengo klasean eginen dira, gutxienez, edo horren mailakoan beste lokomozio-bide bat erabiliz gero. Enpresak ordainduko ditu langileak egiten dituen gastuak, behar bezala justifikatuta betiere.

Langileak bere ibilgailua erabiltzen badu joan-etorriak egiteko, 2014. urtean enpresak 0,27 euro ordainduko dizkio kilometroko, eta zenbateko hori 0,28 eurokoa izanen da 2015ean, 5. artikuluan (“Ordainsarietako kontzeptuak”) ezarritako irizpideei jarraikiz.

Langileak 30 egun baino gehiago beste herri batera joan behar baldin badu lan egitera eta bertan bizitzera, enpresak erraztasunak eman beharko dizkio langileari etxera gutxienez 2 egunerako itzul dadin, inolako kalte ekonomikorik gabe.

Lanaldi zatituan eguerdiko atseden tartea ordu eta erditik beherakoa baldin bada, enpresak ordainduko ditu bazkari gastu logikoak, betiere langileak ordainagiria aurkeztuta, kontuan hartu gabe egoitza duen herrian egin den edo ez.

Lantokiz aldatzen den kasuan, enpresaburuaren kontura izanen da garraioa, tartea 5 km-tik gorakoa denean edo beste herri batera joan beharra denean.

12. artikulua. Eritasuna eta istripua.

Edozein gertakizunen ondoriozko aldi baterako ezintasun egoeran, haurdunaldiko arriskua barne dela, enpresek Gizarte Segurantzak ematen duenaren eta soldata osoaren arteko diferentzia ordainduko dute.

Behin-behinekoz lanpostu egokiago bat emanen zaie haurdun dauden emakumeei, aldatzea beharrezkoa badute, medikuak justifikatu ondoren eta enpresako aukera teknikoak eta antolaketarenak kontuan hartuta.

13. artikulua. Kontratuen blindajeari buruzko klausulak.

Kontratuaren amaitze edo kaleratze mota guztietan (diziplinakoa nahiz objektiboa, banakakoa nahiz kolektiboa), kaleratzeagatiko kalte-ordaina unean uneko legeri indardunean ezarritakoa izanen da.

14. artikulua. Heriotzagatiko laguntza.

Langilea hiltzen bada, haren eskubidedunei enpresak hiru hilabeteko soldata ordainduko die, horietako bakoitza langileak kobratu duen azken soldata adinakoa.

15. artikulua. Laneko arropa.

Enpresa behartuta dago langileei laneko bi jantzi edo gehiago ematera, bakoitzak dituen eginkizunetarako egokiak. Jantzi horiek enpresaren eta langilearen arteko lan harremanaren hasieran banatuko dira eta urte bakoitzeko lehen hiruhilekoan berrituko dira, edo beharrezkoa denean.

16. artikulua. Oporrak.

Urteko oporrak unean uneko lanaldi indardunean ezarritakoa izanen da, eta langileak eta enpresaburuak adostutako garaian hartuko dira.

Oporrak hartzeko, beti hartuko dira kontuan enpresak ezartzen dituen beharrezko txandak eta gutxieneko langile kopurua, enpresaren ohiko funtzionamendua ez oztopatzeko.

Oporrak hartzeko garaiari buruz adostasunik ez izatera, Lan Arloko Epaitegira jo daiteke eta hark erabakiko du oporrak noiz hartu.

Oporraldi batean aldi baterako ezintasuna gertatuz gero, eta horren ondorioz langileak urte naturalean dagozkion oporrak hartzerik ez badu, ezintasuna bukatu ondoren hartzen ahalko ditu, ezintasuna sortu duen kontingentzia eta igarotako denbora edozein direla ere.

Edonola ere, Langileen Estatutuan xedatutakoari jarraituko zaio.

17. artikulua. Lizentzia ordainduak.

Langile orok, aurretik abisatu eta justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio eta honenbeste denborako:

a) Langilearen ezkontza: 20 egun natural, oporraldiarekin batzen ahal direnak, enpresarekin ados jarrita eta ohiko funtzionamendua oztopatu gabe betiere.

b) Seme-alaben, gurasoen eta anai-arreben ezkontza: egun natural bat.

c) Seme edo alaba baten jaiotza: bi egun natural, horietatik bat, gutxienez, laneguna.

d) Aitona-amonen, anai-arreben, biloben, aita-amaginarreben eta koinata-koinatuen eritasun larria: bi egun natural.

e) Ezkontidearen, seme-alaben eta gurasoen eritasun larria, ospitaleratu beharra badakar: hiru egun natural.

f) Aitona-amonen, anai-arreben, biloben eta aita-amaginarreben eta koinata-koinatuen heriotza: bi egun natural.

g) Aitaren edo amaren heriotza: hiru egun natural.

h) Seme-alaben heriotza: lau egun natural.

i) Ezkontidearen heriotza: bost egun natural.

j) Ohiko bizilekuz aldatzeko: egun natural bat.

k) Publikoa den betebehar saihestezina betetzeko behar-beharrezkoa den denbora.

l) Hitzarmen honen eraginpeko langileek norberaren aukerako 9 ordu izanen dituzte, lau egun lehenago abisatuta, betiere.

Ordu edo egun horiek ezin izanen dira erabili oporrak luzatzeko edo jaiegunekin zubiak egiteko.

m) Ordubeteko murrizketa egunean, haurrari bularra emateko. Baimen hori amak edo aitak hartzen ahal du, nahierara.

Lizentzia horien ondorioetarako, larritzat joko da ospitaleratu beharra dakarren eritasuna.

Gertaera eragilea sortzen den unetik beretik kontatuko da lizentzia ordainduen hasiera. Lizentzien iraupena nola banatu adostu eginen da edo ospitalizazioak dirauen bitartekoa izanen da.

Heriotza, eritasun edo seme-alaben jaiotza kasuetan, bidaia egin behar izanez gero, dagokion lizentzian bi egun gehiago izanen dira.

Ondorio horietarako, izatezko bikoteek ere 17. artikulu osoan jasotzen diren lizentziak izanen dituzte.

18. artikulua. Lanaldi murrizketa.

Legepeko zaintza dela eta, langile batek hamabi urtetik beherako haurren bat edo ordaindutako lanik egiten ez duen desgaitu fisiko, psikiko edo sentsorialen bat bere kargu izanez gero, eskubidea izanen du lanaldia murrizteko, Langileen Estatutuaren 37.5 artikuluan ezarritako kasu eta baldintzetan. Murrizketa hori gauzatzeko, eguneko, asteko, hilabeteko edo urteko lanaldia hartzen ahalko da erreferentzialditzat.

19. artikulua. Borondatezko eszedentzia.

Enpresan gutxienez urtebeteko antzinatasuna duen langile orok eskubidea du borondatezko eszedentzia izateko, lau hilabeterako gutxienez eta bost urterako gehienez. Langileak ez du izanen lanpostua gordetzeko eskubidea, salbu eta enpresak idatziz eskubidea aitortzen badio. Aurreikusitako gehienekoa baino iraupen txikiagokoa eskatuz gero, luzapenak eska daitezke, harik eta gehieneko iraupena bukatu arte.

20. artikulua. Legepeko zaintzagatiko eszedentzia.

Langileek eskubidea izanen dute hiru urte bitarteko eszedentzia hartzeko, haur bakoitza zaintzeko, norberak izandakoa edo adoptatua izan, edo etxean hartua, bai modu iraunkorrean bai adoptatu aurreko harrera fasean. Hiru urte horiek haurra jaiotzen denetik edo, hala bada, epaileen edo administrazioaren ebazpenaren egunetik aurrera kontatuko dira.

Eszedentziarako eskubidea izanen dute, halaber, adinagatik edo istripu edo eritasun baten ondorioz bere kasa bizitzeko gauza ez den eta lan ordaindurik egiten ez duen familiartekoren bat –odol ahaidetasuneko edo ezkontza ahaidetasuneko bigarren mailara artekoa– zaindu behar duten langileek. Gehienez ere bi urtekoa izanen da.

Eszedentzia hartzeko, Langileen Estatutuari jarraituko zaio.

Langileak artikulu honetan ezarritakoaren arabera eszedentzian pasatzen duen denbora antzinatasunerako kontatuko zaio, eta bitartean eskubidea izanen du lanbide prestakuntzako ikastaroetara joateko, enpresaburuak deituta, batez ere lanera itzuli behar duenean. Lehenbiziko bi urtetan lanpostua gordetzeko eskubidea izanen du. Epe hori bukatuta, gordeko zaion lanpostua lanbide talde berekoa edo kategoria baliokidekoa izanen da.

21. artikulua. Nahitaezko eszedentzia.

Eginkizun edo kargu publiko nahiz sindikal batean aritzeko hautatuek eszedentzia berezi bat eskatzen ahalko dute, izendapen horren iraunaldi osorako. Lanera itzultzea kargua utzi eta hurrengo hilabetearen barrenean eskatu beharko da.

Eszedentzia eta luzapenak eskatzeko eta lanera itzultzeko, enpresari 15 egun aurretik jakinarazi beharko zaio. Eskaera, luzapena eta erantzunak idatziz eginen dira.

22. artikulua. Kulturarako laguntza.

Langileen kultur eta lanbide maila igotzeko asmoz, enpresak Arte Aplikatuetako eta Lanbide Artistikoetako eskoletan eta hizkuntza eskolan euskara ikasteko edo lantokiaren herri berean dagoen antzeko ikastetxe batean ikasteko matrikula gastuak ordainduko dizkie langile guztiei, betiere ikasketa horiek lanorduetatik kanpo egiten badituzte eta ikasketen aprobetxamendua normala baldin bada. Horixe bera eginen da ikastunekin, ohartaraziz ezen bidezko arrazoirik gabe klasera ez joateak eskubidea galtzea ekarriko duela. Enpresek erraztasunak emanen dituzte ikastunak arratsaldeko zazpietan atera daitezen lanetik, artikulu honetan ezarritakoa erabili ahal dezaten.

23. artikulua. Xedapen orokorrak aplikatzea.

Hitzarmen honetan aurreikusi edo arautu ez den orotan indarreko legedian ezarritako arauak aplikatuko dira.

Merkataritzako langileak behartuta daude lanaldiaren bukaeran egiten ari diren eginbeharrak bukatzera, lanaldi arruntean jarri beharreko ardura berarekin.

Langile bat delitu arrunt batengatik edo arrunta ez den delituagatik atxilotua izan arren auziperatu ez badute edo auziperatu izanda ere absolbitzen badute, ez zaio lanera agertu ez izana kontuan hartuko; beraz ez da justifikatu gabeko absentziatzat joko eta horren ondorioz ez dute kaleratuko.

24. artikulua. Xedapen orokorrak. Kontratazioa.

Praktiketan kontratatzen diren langileek hitzarmenean kategoriaren arabera ezarritako soldataren %60 eta %75 jasoko dute kontratuaren indarraldiaren lehen eta bigarren urteetan, hurrenez hurren.

Probaldia:

Probaldia 15 egunekoa izanen da kategoria guztientzat, buru eta arduradunentzat izan ezik, horientzat, gehienez ere, bi hilabetekoa izanen baita.

Gaueko lanaren plusa:

Gaueko 10:00etatik goizeko 06:00etara lan egindako ordu guztiei gaueko lanaren plusa, %25ekoa, gehituko zaie.

Erretiro partziala. Errelebo kontratua:

Langileen esku dago 60 urtetik aitzinera erretiro partziala hartzeko erabakia hartzea.

Enpresak du, ordea, erretiro sistema horretan sartzen diren langileen lanaldia antolatzeko ahalmena.

25. artikulua. Batzorde paritarioa.

Batzorde paritario bat eratuko da, hitzarmenaren sinatzaileek osatua; gehienez ere 6 kide izanen ditu, 3 langileen aldetik eta 3 enpresaren aldetik.

Batzordearen bi aldeetako edozeinek eskatzen ahal du batzordea biltzeko, eta 15 eguneko epean bilduko da, beranduenez.

Batzordeak eskumen hauek izanen ditu:

Hitzarmen kolektiboko arauak interpretatzea.

Hitzarmen honetako konpromisoak garatzea.

Dituen eskumenen ondorioz, edozein ordezkaritzaren hirutik batek eskatuz gero bilduko da batzorde paritarioa.

Batzorde paritarioan dagoen sindikatuen ordezkaritza bakoitzak aholkulari baten laguntza izaten ahalko du, baita enpresa-ordezkaritzak ere. Aholkulariak hizpidea izanen du, baina botorik ez.

Edozein batzordekidek ordezko bat izaten ahalko du, batzordeari aurretik abisatzen badio.

Batzorde paritarioaren akordioek balioa izateko, ordezkaritza bakoitzaren botoen %51ren babesa izan beharko dute.

Batzorde paritarioan sortzen diren desadostasunak Lan Gatazkak Auzibidetik Kanpo Konpontzeko Akordioan araututako bitartekotza-prozedurei jarraikiz konponduko dira.

Batzorde paritarioko kide titularrek eskubidea izanen dute bilkuretarako baimen ordaindua izateko hura biltzen den egunetan, eta eginkizun hauek betetzen sortzen diren gastuak enpresak ordainduko ditu.

26. artikulua. Eskubide sindikalak.

Enpresa batzordeko kideek eta langileen delegatuek legean ezarritako eskubide guztiak izanen dituzte, hauek bereziki:

1. Gai garrantzitsuen gaineko txostenak egitea, hala nola enplegu erregulazioari, lanaldi murrizketari eta instalazioak beste toki batera eramateari buruzkoak.

2. Enpresak langileei ezarritako zehapen oso larrien gaineko informazioa jasotzea. Ahal den neurrian, absentismoaren eta horren zergatien gaineko informazioa (laneko istripuak, lanbide eritasunak eta horien ondorioak) jasotzea.

3. Lankideei lan harremanetan eragina duten edo izan dezaketen gaiei buruzko informazioa ematea, legeak ezarritako moduan.

Enpresa batzordeko kideek eta langileen ordezkariek hilean 20 lanordu izanen dituzte euren karguko eginkizunetarako.

27. artikulua. Aseguruen poliza.

Hitzarmen honek bere eragin esparruan hartzen dituen enpresek euren langileentzat aseguru kolektiboa kontratatuko dute, istripuaren ondorioz heriotza eta erabateko baliaezintasuna edo baliaezintasun iraunkorra gertatuz gero, honako kopuru hauek bermatuko dituena:

36.060,73 euro, heriotza kasuetan.

36.060,73 euro, laneko edo lanetik kanpoko istripuaren ondoriozko edo laneko eritasun baten ondoriozko baliaezintasun iraunkorra eta erabatekoa gertatuz gero.

Betiere, Nafarroako Metalaren merkataritza sektorerako hitzarmen kolektiboan adierazten diren kapital berak kontratatu beharko dira aseguruan hitzarmen honen indarraldi osorako.

28. artikulua. Enplegua sustatzea.

Edozein arrazoirengatik enpresan hutsik gelditzen diren lanpostu guztiak, INEMen izena emandako langileek beteko dituzte.

Eskaera egiten duen langileak urriaren 31ko 1991/1984 Errege Dekretuan xedatutakoari lotzen ahal zaio, eta, horrela eginez gero, dekretu hartan ezarritakoa beteko da.

29. artikulua. Lan osasuna.

Enpresak behartuta daude langile guztiei urtean osasun azterketa bat egitera. Azterketa hori lan istripuetako ugazaben mutualitateetan eginen da; zeinetan dagoen enpresa inskribatua, hartantxe. Langileek osasun azterketaren emaitzak jakiteko eskubidea dute. Azterketak lanorduetan eginen dira.

Enpresak behartuta daude langileei euren lanposturako behar dituzten jantziak edo babesgarriak ematera.

Horretarako, enpresak eta langileen ordezkariek hitzeman dute prebentzioko planak ezarriko dituztela, ahal duten neurrian eta aurreikusitako epeetan, laneko arriskuak desagerrarazteko edo pixkanaka gutxitzeko eta sektoreko lan arriskuei eraginkorki aurrea hartzeko.

Prebentzioko delegatuei dagokienez, legean ezarritako bermeak izanen dituzte eta enpresek hitzeman dute erraztasunak emanen dizkietela euren eginkizunetarako behar dituzten ordu kredituen bidez.

30. artikulua. Hizkuntza plusa.

Lanean hizkuntza bat baino gehiago erabili beharra duten langileek hitzarmenaren soldataren %5eko plusa kobratzeko eskubidea izanen dute.

31. artikulua. Berdintasunaren legea.

Berdintasunaren lege indarduna sartzen da.

32. artikulua. Sexu jazarpenaren kontrako neurriak.

Laneko jazarpena, edozein motatakoa dela ere, hutsegite oso larritzat joko da.

33. artikulua. Tratu txarren biktimei laguntza emateko neurriak.

Hitzarmen honen lurralde eremutik kanpoko herrietan, probintzietan edo erkidegoetan lan zentroak ireki dituzten enpresek lanpostu hutsak baldin badituzte euren lantokietan, lanpostu huts horiek tratu txarren biktimei eskainiko dizkiete.

Enpresako zuzendaritzak erabakiko du, nolanahi ere, ea tratu txarren biktima lanpostu hutsa betetzeko gai den eta behar duen gaitasuna eta ahalmena duen. Era berean, tratu txarren biktima bat baino gehiago izanez gero, enpresak erabakiko du horien artean zeinek izanen duen lanpostu hutsa betetzeko lehentasuna, betiere haien gaitasuna eta ahalmena kontuan hartuta.

Dena dela, lanpostu bat hutsik dagoela ulertuko da lanpostua bete gabe dagoenean eta horren eginkizunak tratu txarren biktimak duen lanbide kategoriari dagozkionak direnean.

Lanpostu hutsik ez dagoela ulertuko da, lanpostu bat bete gabe egon arren, enpresak hura amortizatzea erabakitzen badu.

Erasotzaileak eta erasotuak lantoki berean lan egiten badute, enpresak behar diren neurriak hartuko ditu, txanda aldaketa barne, beharrezkoa bada, enpresaren instalazioetan eta lantokian erasotzaileak eta biktimak bat egin ez dezaten.

34. artikulua.

Hitzarmen hau enpresako langile guztiei aplikatuko zaie, kontratazio mota edozein dela ere.

35. artikulua. Lanbide prestakuntza.

Hitzarmen honen eremuan, enpresak haren langileriaren lanbide prestakuntza sustatuko du; horretarako, ordezkari sindikalen eta enpresaren artean aztertuko dituzte prestakuntza jarraituaren arloko beharrak, eta enpresa planak prestatzen ahal dituzte, bai eta sektoreka egin daitezkeen plan bateratuetan parte hartu ere.

Enpresak hartzen badu langileak prestakuntza ikastaroetara joateko erabakia, langileek horrelakoetan ematen dituzten orduak benetako lanordutzat joko dira, eta ahaleginak eginen dira ikastaroak lanorduetan izan daitezen.

36. artikulua. Hitzarmen honetan hitzartutako lan baldintzen aldaketa.

Langileen Estatutuaren 82.3 artikuluan xedatutakoa erabili baino lehen, enpresak konpromisoa hartzen du langileen ordezkariekin eztabaidatu eta negoziatzeko enpresaren egoera konpon dezaketen aukeren inguruan (adib.: lanaldi murrizketak, soldatak, etab.).

Bi alderdiek espresuki erabaki dute, desadostasunak konpontzeko, Nafarroako Lan Auzitegiko lanbide arteko akordioaren adiskidetze eta bitartekotza prozesuen menpe jarriko direla beti. Arbitraje prozedura aplikatuko da, bakar-bakarrik, haren menpe jartzeko bi alderdien arteko akordioa badago.

Orobat, gaia Aholku Batzorde Nazionalaren edo Autonomikoaren menpe jartzeko, alderdi bakoitzak gehiengoz erabaki beharko du.

Lehen klausula gehigarria.–Hitzarmen honetan xedatutako baldintzei jarraikiz, enpresak eta langileen ordezkariek adostutako epeetan kobratuko dira langileek sorrarazitako atzerakinak, betiere enpresako diruzaintza ukitzen ez bada.

Sinadura:

Carlos Zunzarren García.

Ignacio Mayayo Zabalza.

Jairo García Jaimes.

Francisco Borrego Suárez.

Bautista Oreja Noain.

Jose Antonio Arriazu Hernández.

Enrique Redín Itoiz.

Iragarkiaren kodea: F1514702