Iragarkia

224. ALDIZKARIA - 2015eko azaroaren 11

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

EBAZPENA, azaroaren 4koa, Euskarabidea-Euskararen Nafar Institutuko zuzendari kudeatzaileak emana, Nafarroako Foru Komunitatean kokaturiko entitate juridikoek helduei euskaraz irakasteko 2015eko urritik abendura bitarteko laguntzen deialdia onesten duena.

Hizkuntza Baliabideen Zerbitzuak aurkeztutako txostena ikusirik, adierazten baitu helduendako euskararen irakaskuntza sustatzen duten entitateei 2015eko urritik abendura bitarteko laguntzak arautzeko deialdia onetsi eta argitara emateko beharra.

Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1.d eta 99. artikuluek eta Euskarabidea-Euskararen Nafar Institutua erakunde autonomoaren estatutuak onetsi zituen abuztuaren 28ko 130/2015 Foru Dekretuaren 15. artikuluaren d) puntuak ematen dizkidan ahalmenak erabiliz,

Herritarrekiko eta Erakundeekiko Harremanetarako Departamentuaren egitura organikoa ezartzen duen abuztuaren 28ko 129/2015 Foru Dekretuak esleitutako ahalmenez baliatuz,

EBATZI DUT:

1. Nafarroako Foru Komunitatean kokaturiko entitate juridikoek helduei euskaraz irakasteko 2015eko urritik abendura bitarteko laguntzen deialdi hau onestea, eta orobat hura arautzen duten oinarriak, ebazpen honen I. eranskinean biltzen direnak.

2. Diru-laguntza emateko oinarri arautzaileak onestea. Oinarri horiek ebazpen honen I. eranskinean jaso dira.

3. Deialdi honen konpromisoei aurre egiteko, ondotik ematen diren aurrekontu kredituetarako baimena ematen da, jasotako eskabideak kontuan harturik, aldaketak egiten ahalko badira ere. Hona hemen:

4. Ebazpen hau eta eranskinak Nafarroako Aldizkari Ofizialean argitaratzea.

5. Ebazpen hau eta eranskinak igortzea Ogasuneko eta Finantza Politikako Departamentuak Hezkuntza Departamentuan duen kontu-hartzaile delegatuari, Aurrekontu eta Kudeaketa Ekonomikoaren Atalari, Kudeaketa Ekonomikoaren Bulegoari, Euskarabideko Hizkuntza Baliabideen Zerbitzuari eta Programen Bulegoari, behar diren ondorioak izan ditzan.

6. Ebazpen honek ez du administrazio bidea amaitzen, eta bere aurka gora jotzeko errekurtsoa para daiteke, Nafarroako Gobernuari zuzendua, hilabeteko epean argitaratu eta biharamunetik aitzina. Administrazio publikoek administrazioarekiko auzi-errekurtsoa paratzen ahal dute eskumena duen ordena jurisdikzionalari zuzendua, honako hau argitaratu eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epeetan.

Iruñean, 2015eko azaroaren 4an.–Euskarabidea-Euskararen Nafar Institutuko Zuzendari Kudeatzailea, Mikel Arregui Pérez.

I. ERANSKINA

Nafarroako Foru Komunitatean kokaturiko entitate juridikoek helduei euskaraz irakasteko 2015eko urritik abendura bitarteko laguntzen deialdia arautzeko oinarriak

Lehen oinarria.–Xedea eta diruz laguntzen den epea.

Deialdi honen xedea da helduendako euskararen irakaskuntza sustatzen duten entitate juridikoendako (euskaltegiak, gau-eskolak eta bertzelakoak) laguntzak arautzea, Nafarroako Foru Komunitatean kokaturik badaude.

Euskaltegia, gau-eskola eta bertzelakoa erratean, ulertuko da giza baliabide eta baliabide materialen egitura, titulartasun pribatu nahiz publikokoa, berariaz helduak alfabetatzeko eta euskalduntzeko sortua eta zuzendua, halakotzat hartua bada helduen irakaskuntzarako ikastetxe diruz lagunduen erregistroko sailkapen eta inskripzioan. Aipatu inskripzioa Euskarabideak berak eginen du entitateak hala eskatuta.

Diru-laguntzak 2015eko urritik abendura bitarteko euskara ikastaroetarako emanen dira.

Bigarren oinarria.–Diru-laguntzaren xedeko ikastaroak.

Hona diru-laguntza mota honen xedeko ikastaroak:

a) Arruntak: aurrez aurrekoak izanen dira, astean gutxienez ere 4 irakastordu izanen dituzte eta ikastaro osoak, berriz, 120 ordu gutxienez. Aurrez aurreko ikastaro trinkoek gutxienez 60 irakastordu izanen dituzte.

b) Barnetegiak: ikastaro bakoitzak gutxienez ere 70 ordu izan behar ditu, eta haietarik gutxienez ere 60 irakastordu.

c) Baliabide telematikoen bidezko ikastaroak: bakoitzak gutxienez ere 120 lanordu izan behar ditu, eta haietarik gutxienez ere 15 ordu mintzapraktikakoak. (astean 6 ordu lan telematikoan eta ordu 1 mintzapraktikan).

d) Bertze ikastaro batzuk, aitzinekoen gisakoak, Baloraziorako Batzorde Teknikoak onetsi beharrekoak.

Hirugarren oinarria.–Aurrekontuan dagoen dirua eta diru-laguntzen moduluak.

3.1. Deialdi honetarako dagoen zenbatekoa 131.867 euro dira, “Helduendako euskarazko irakaskuntzarako laguntzak” izeneko 44200 440001 4819 322900 kontu-sailaren kargura, aurrekontuetan aldaketak eginez gero gero etor litezkeen kanbiamenduak ukatu gabe ere.

3.2. Kontu-sail horretan dagoen diruaren araberakoa izanen da 2015eko urritik abendura bitarteko laguntzetarako ikasle-orduko erreferentzia-modulua.

–Aurrez aurreko eskoletan, irakastorduak berak izanen dira diruz lagunduko direnak.

–Autoikaskuntza moduan, diruz laguntzen ahalko dira ikastetxeak ezartzen dituenak, betiere betetzen badituzte guztirako orduei buruz jarritako gutxieneko baldintzak, eta orobat bete aurrez aurreko orduen gutxieneko proportzionaltasuna, gehiena izanik 250 ordu ikasle eta ikasturte bakoitzeko.

–Barnetegi moduan, diruz laguntzen ahalko dira zazpi ordu barnetegiko egun bakoitzeko.

3.3. Entitate bakoitzak 2015eko urritik abendura bitarteko eperako eginen du eskaera. Hartan, talde guztiei buruzko aurreikuspena eginen da, kontuan harturik talde bakoitzaren ezaugarriak, talde bakoitzaren ikasle eta ordu kopurua eta entitatearen guztirako ordu kopurua epe horretarako (II eta III. eranskinak).

Ikastetxe bakoitzerako diru-laguntza kalkulatzeko erabiliko da aurreikuspen hori. Kontu-saileko diru guztia kontatutako ikasle-ordu guztien artean banatuta kalkulatuko da ordaindu beharreko modulua. Nolanahi ere, deialdi honen zazpigarren oinarriak dioena betetzea izanen da kasu bakoitzeko diru-laguntza ordaintzeko baldintza.

Laugarren oinarria.–Eskabideak eta eskatutako agiriak aurkeztea.

4.1. Dokumentazioa Erregistro Elektroniko Orokorrean aurkeztuko da, ekainaren 23ko 70/2008 Foru Dekretuari jarraikiz, Euskarabidea-Euskararen Nafar Institutuko Erregistroan (Yanguas y Miranda, 27-1.a, 31003 Iruña), edo azaroaren 26ko 30/1992 Legearen 38.4 artikuluak dakartzan tokietako edozeinetan, seigarren oinarriaren 6.1 puntuan aipatzen diren epeen barnean. Euskarabideak ikastetxeen eskura jarritako aplikazio informatikoaren bidez osorik aurkezten ahal den dokumentazioa baliabide horren bitartez aurkezten ahalko da.

4.2.–Hona aurkeztu beharreko dokumentazioaren edukia:

a) Diru-laguntzaren eskaera, 2015eko urritik abendu bitarterako, biak barne, deialdi honen 3.3 puntuan agertzen den bezala. Horretarako, II eta III. eranskinetako fitxak erabiliko dira.

b) Irakasle kontratatu berrien euskarazko titulazioen fotokopiak.

4.2.1.–II. eranskina: Entitate eskatzailearen gaineko dokumentazioa. Atal honetan hauek jaso beharko dira:

a) Ikastetxearen datuak, izena, helbidea, herria, IFZ.

b) Ikastetxearen arduradunaren datuak.

c) 2015eko urritik abendura bitarteko epeari dagozkion diru-sarrera eta gastuen aurrekontua, berezirik langileei, Gizarte Segurantzari eta funtzionamenduari dagozkien gastuak.

Diru-sarrerei dagokienez:

–Diru-sarrerak bertze entitate publiko batzuen aldetik, diruz-lagundutako jarduerarako.

–Diru-sarrerak entitate pribatuen aldetik, diruz-lagundutako jarduerarako.

–Matrikularen ondorioz bildutako zenbatekoak. Ikastetxean gordeko dira ikasleek ordaindutako matrikularen ordainagiriak edo, halakorik izan ezean, bankuen laburpenak, ordainketa horiei dagozkienak.

c) Irakasleak:

–Haien egoera, lanaren eta titulazioaren aldetik.

d) Ikastetxeko zuzendariaren edo arduradunaren erantzukizuneko aitorpena, aurkeztutako datu eta agiriak egiazkoak direla adierazten duena, II. eranskinean jasotzen den bezala. Hartan sartuko da Herritarrekiko eta Erakundeekiko Harremanetako Departamentuari emandako baimena, behar diren neurriak hartu beharrez, egiaztatzeko entitate eskatzaileak eguneratuak dituela Foru Ogasunarekiko betebeharrak.

e) Eskaera aurkezteko ezarritako epeetan kotizazioaren egoerari buruzko ziurtagiria ere aurkeztuko da, Gizarte Segurantzako Diruzaintzak luzatua, ordainketak eguneratuak dituela egiaztatzen duena.

4.2.2. III. eranskina: Ikasle taldeen gaineko dokumentazioa. Hartan jasoko dira ikasle taldeen gainean eskatzen diren datuak:

Taldearen hasiera eta amaiera data, haren ezaugarriak, aurreikusitako irakastordu kopurua, talde bakoitzeko ikasle kopurua eta ikasle-ordu kopurua eta ikastetxeko ikasle-ordu guztiak.

4.2.3. Ikasleen gaineko dokumentazioa. Euskaltegiak eta Gau-eskolak fitxategiko kudeaketarako aplikazioaren bidez aditzera emanen da informazio hori.

Borzgarren oinarria.–Frogagiriak.

Seigarren oinarriaren 6.2 puntuan adierazten diren epeetan dokumentazio hau aurkeztuko da:

a) Ikasmaila bakoitzeko ikasleen zerrenda. Hiruhilekoa bukatuta, ikasle bakoitzak bere taldean izandako asistentziaren kalkulua. Halaber, taldeen osaeran aldaketarik baldin bada, epe beretan adieraziko da. Euskaltegiak eta Gau-eskolak fitxategiko kudeaketarako aplikazioaren bidez aditzera emanen da informazio hori.

b) Seigarren oinarriaren 6.3 puntuan adierazten diren epeetan, ziurtagiri bat aurkeztuko da, ikastetxearen arduradunak edo horretarako legezko ahalmena duenak sinatua, V. eranskinari jarraikiz, eta kontzeptu hauek bilduko dituena:

–Justifikatutako aldiari dagozkion gastu eta diru-sarreren balantzea.

–Frogagirien bidez justifikatutako aldian eskuratutako diru-sarrera, matrikula, diru-laguntza eta bertzelako laguntzen gaineko aitorpena, egozpenerako aplikaturiko irizpidea zehaztuz.

–Justifikatutako aldian langileen arloan egindako gastuen frogagirien jatorrizkoak edo kopia soilak: nominak, Gizarte Segurantzarendako TC1 eta TC2 kotizazio agiriak, eta ordainagiriak.

–Justifikatutako aldiari dagozkion funtzionamendu gastuen frogagirien jatorrizkoak edo kopia soilak, beren ordainagiriekin.

–Euskarabideak beretako gordeko du interesdunei jatorrizkoak eskatzeko eskubidea, alderatzeko eta haien egiazkotasuna egiaztatzeko; hala ez bada, behar diren legezko ekintzak abiarazten ahal ditu.

Seigarren oinarria.–Eskaerak eta frogagiriak aurkezteko epea.

6.1. Hamabortz egun naturaleko epea izanen da, oinarri hauek Nafarroako Aldizkari Ofizialean argitaratu eta biharamunetik aitzina, eskaerak eta laugarren oinarrian eskatzen diren frogagiriak aurkezteko.

6.2. 2015eko abenduaren 22a baino lehen, honako datuak aurkeztu beharko dira: asistentzia, taldeen osaera, balantze ekonomikoa eta borzgarren oinarriak aipatzen dituen gainerako frogagiriak.

6.3. Eskaerak aitzineko oinarrietan aipatzen diren baldintzak betetzen ez baditu, interesdunari eskatuko zaio hamar egun baliodunean akatsak zuzentzeko edo agindutako agiriak aurkezteko. Halaber, jakinaraziko zaio, hori egin ezean, eskaerari uko egin diola ulertuko dela, inguruabar hori deklaratzen duen ebazpenaren ondotik.

Zazpigarren oinarria.–Diru-laguntzen ebazpena eta ordainketa.

7.1. Prozeduraren instrukzioa Hizkuntza Baliabideen Zerbitzuak eramanen du. Hark ebazpen proposamena eginen du Batzordearen ebaluazioa aztertu ondoan.

7.2. Baloraziorako Batzorde Teknikoa arduratuko da eskaeren balorazioaz; haien kide izanen dira Euskarabidea-Euskararen Nafar Institutuko Hizkuntza Baliabideen Zerbitzuaren titularra, batzordeburu, Euskararen Egiaztapenen eta Prestakuntzaren Ataleko burua eta laguntzen deialdiaren ardura duen teknikaria, idazkari. Haren irizpena loteslea izanen da.

7.3. Deialdi honen xedeko diru-laguntzak Euskarabidea-Euskararen Nafar Institutuko zuzendari kudeatzaileak ebatziko ditu; horretarako, hilabeteko epea izanen du, eskaerak aurkezteko epea bukatu eta biharamunetik goiti, eta hurrengo 5 egun baliodunean jakinaraziko dira. Hilabeteko epe hori iraganik ebazpen espresik ematen ez bada, eskaerak ezetsi direla ulertuko da.

7.4. Ikasturte osorako onartutako eskaerak kontuan harturik, Euskarabideko zuzendari kudeatzailearen ebazpenaren bidez ebatziko da ikastetxe bakoitzerako ikasturte osorako onartu den ordu kopurua, eta orobat finkatuko ikasle-orduko diru-laguntzaren modulua eta ikasturte osoan entitate onuradun bakoitzari dagokion diru-laguntzaren zenbatekoa, deialdi honen hirugarren oinarriari jarraikiz.

Zenbateko hori baldintzapetuko du egiazko datuen arabera eta ebazpen honen laugarren oinarrian ezarritakoaren arabera azkenean egiten doikuntzak.

7.5. Behar diren frogagiriak deialdi honen seigarren oinarrian zehazturiko epeetan aurkeztu ondoan ordainduko dira aldi horretan justifikaturiko orduei dagozkien zenbatekoak. Betiere, 2015eko urritik abendura bitarteko aldirako, kontzesioan ezartzen den zenbatekoa izanen da, gehienez, ikastetxe bakoitzaren diru-laguntza.

7.6. Frogagirietan ikusten bada ikastetxe baten defizita halako aldi baterako aurreikusitako diru-laguntza baino txikiagoa dela, hura murriztuko da justifikaturiko defizitarekin bat etorri arte.

7.7. Aldi osoan eman beharreko laguntza guztien zenbateko osoa handiagoa bada kontzesioaren unean aurrekontuan horretarako dagoen dirua baino, laguntza horiek hein berean murriztuko dira, dagoen dirua berdindu arte.

7.8. 2014-2015eko ikasturteari dagozkion diru-laguntzak ordaindu ondotik gerakinik gelditzen bada “Helduendako euskarazko irakaskuntzarako laguntzak” kontu-sailean, ikastetxeei gehigarri bat ordaintzen ahalko zaie Euskarabideko zuzendari kudeatzailearen ebazpenaren bidez. Gehigarri hori 2015eko urritik abendura bitarteko egiazko ikasle-ordu guztien heinekoa izanen da, eta entitate bakoitzari ordainduko zaio, betiere ondoriozko diru-laguntzen multzoa txikiagoa bada entitateak aldi horretarako justifikaturiko defizita baino.

Zortzigarren oinarria.–Onuradunen betebeharrak, jarraipena eta diru-laguntzen gaineko kontrola.

8.1. Ikastetxeak erregistroko fitxa bat eramanen du, ikaslearen etengabeko ebaluazioari eta asistentziari buruzko datuak idazteko.

8.2. Ikaslearen ebaluazioa modu etengabean eginen da, eta diagnostiko probak eginen dira ikasturtearen hasieran eta amaieran. Ebaluazio prozesuetan erabilitako probak urtebetez gordeko dira, egiten direnetik, eta emaitzak azken ebaluazioaren aktan jasorik geldituko dira.

8.3. Administrazioak agiri guztiak eskatzen ahalko ditu noiznahi, kontabilitatekoak, pedagogikoak edo bertzelakoak izan.

8.4. Diru-laguntza eskatzen duten entitateek 2015-2016ko ikasturterako plana (IV. eranskina) aurkeztuko dute, gehienez ere hamabortz egun naturaleko epean, deialdi hau Nafarroako Aldizkari Ofizialean argitaratu eta biharamunetik aitzina.

8.5. Orobat, Administrazioak asistentziari eta aprobetxamenduari buruzko txostenak eskatzen ahalko dituenez, diru-laguntza eskatzen duten entitateek txosten horiek gorde beharko dituzte; horiek entitatearen arduradunak sinaturik egonen dira. Txosten horietan honako hauek jasoko dira:

–Ikaslearen datuak: izena, deiturak eta IFZ.

–Ikasturtearen datuak: ikasturtearen hasiera eta amaiera, maila, klase-orduak, eskola ordu kopurua (barnetegian bada, egun kopurua ere bai) eta matrikularen kostua.

–Aprobetxamenduaren datuak: hasierako maila eta amaieran erdietsitako maila, hartutako eskola kopurua eta haien portzentajea. Orobat gehituko da ikaslearen ebaluazioa.

8.6. Laguntza hauen onuradunek begiratu beharko dituzte giza eskubideak eta pertsonen arteko bizikidetzaren balioak; beraz, ezin izanen dute sinbolorik edo elementurik ikusgai izan, herritarrendako laidogarria bada, erabiltzaileen duintasuna urratzen badu edo bortizkeria zuritzen badu.

8.7. Deialdi honen entitate onuradunek laguntza emanen dute Nafarroako helduendako euskarazko irakaskuntzarekin ikusteko duten datu estatistikoen bilketan.

8.8. Onuradunek bete beharko dituzte Diru-laguntzei buruzko 11/2005 Foru Legearen 9. artikuluan ezarritako baldintza orokorrak.

8.9. Onuradunek erabilitako propagandaren ale grafikoen bi kopia aurkeztuko dituzte gutxienez; haietan, Nafarroako Gobernuaren logoa agertuko da, jarduera diruz laguntzen duen entitatea den aldetik.

8.10. Entitate onuradunei eskatzen ahalko zaie laguntza eman dezaten, aztertzaile gisa, Nafarroako Gobernuak mailak egiaztatzeko abiaraz litzakeen azterketetan.

8.11. 2015-2016ko ikasturteko planarekin batera, entitate bakoitzak bere irakaskuntza-eskaintzaren baliokidetze taula aurkeztuko du, Hizkuntzetarako Europako Erreferentzia Esparruan markaturiko mailekin.

Bederatzigarren oinarria.–Datuen tratamendua.

Ikasleen eta irakasleen datu pertsonalen tratamendua bat etorriko da Datu pertsonalak babesteari buruzko abenduaren 13ko 15/1999 Lege Organikoan ezarriarekin.

Hezkuntzako kontseilariaren azaroaren 16ko 213/2011 Foru Aginduaren bidez sortu zen “Euskaltegis y Gau-eskolas/Euskaltegiak eta Gau-eskolak” datu pertsonalen fitxategi informatizatua, eta haren erregistroa egin zen Datuak Babesteko Erregistro Orokorrean.

Hamargarren oinarria.–Oinarriak ez betetzea, itzulketak eta arau-hausteak.

10.1. Ez betetzetzat joko dira irregulartasun formalei dagozkienak; halakoetan, dirua hein batean itzuli beharra edo erabat ez ordaintzea etorriko da, ez betetzeari dagokion heinean. Ez betetze larritzat joko dira, berriz, kontu substantiboei dagozkienak; halakoetan, dirua osorik itzuli beharko da, edo batere ordaindu ez. Batean nahiz bertzean berandutza korrituak eskatzen ahalko dira, azaroaren 9ko 11/2005 Foru Legean ezarritako kasuetan. Baloraziorako Batzordeak mailakatzea egiteko komenigarriak iruditzen zaizkion irizpideak ezartzen ahalko ditu.

10.2. Arau-hauste eta zehapenetarako, Diru-laguntzei buruzko azaroaren 9ko 11/2005 Foru Legearen IV. tituluan xedatutakoa aplikatuko da. Zehapen prozedura Nafarroako Foru Komunitateko Administrazioari buruzko abenduaren 3ko 15/2005 Foru Legearen V. tituluan ezarritakoa izanen da.

Hamaikagarren oinarria.–Diru-laguntzen bateragarritasuna.

11.1. Deialdi honetako diru-laguntzak bateragarriak dira bertze diru-laguntzekin, izanik horiek Administrazioarenak berarenak, bertze administrazio publiko batzuenak, bertze ente publiko edo pribatu batzuenak, edo nazioko nahiz nazioarteko partikularrenak. Diru-laguntzen zenbatekoa ezin da inola ere izan, bakarrik edo bertze diru-laguntza, laguntza, diru-sarrera edo baliabideekin baturik, diruz lagundutako jardueraren kostua baino handiagoa.

11.2. Bertze entitate batzuek emandako diru-laguntzarik edo laguntzarik eskuratzen baldin bada, onartutako laguntza aldatzen ahalko da, laguntza guztien zenbatekoak diruz lagundutako jardueraren kostua gainditzen badu.

Hamabigarren oinarria.–Diru-laguntzen publizitatea.

12.1. Emandako diru-laguntzak eta onuradunen eta baztertuen zerrenda Euskarabidea-Euskararen Nafar Institutuaren web orrian argitaratuko dira: http://www.euskarabidea.es.

12.2. Entitate guztiek finantzaketa horren izaera publikoa jaso beharko dute diruz lagundutako ikastaroen propagandan.

Hamahirugarren oinarria.–Gardentasuna.

13.1. Entitate onuradunek Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritako gardentasuna bete beharko dute (betebehar hori irailaren 11ko 59/2013 Foru Dekretuan arautu zen) Nafarroako Aurrekontu Orokorren kargura diru-laguntzak eskuratzen dituztenean eta ondoko bi egoerak ematen direnean:

a) Emandako diru-laguntzaren zenbatekoa urteko 20.000 eurotik gorakoa izatea.

b) Emandako zenbatekoak entitate onuradunaren negozio kopuruaren edo urteko aurrekontuaren ehuneko 20a gainditzea.

Aurreko atalean ezarri diren kopuru mugak gainditzen diren edo ez aintzat hartzerakoan, Nafarroako Foru Komunitateko Administrazioak edo bere erakunde publikoek urte naturalean emandako diru-laguntzen kopuru guztia gehituko da. Diru-laguntza hainbat urtekotan egiten den kasuetan, ondorio hauetarako aurrekontu-ekitaldi bakoitzean emandako kopurua kontatuko da, eta ez batura osotara. Negozio kopurua edo erreferentziazko urteko aurrekontua, ondoko magnitudeen artean zenbateko txikiena duena izanen da:

a) Aurreko urteko negozio kopurua edo gauzaturiko aurrekontua.

b) Hala badagokio, diru-laguntza ematen duen entitatearen organo eskumendunak onetsitako negozio kopurua edo aurrekontua.

Bi gorabehera hauek batera dituzten entitate onuradunek, modu telematikoan aurkeztu beharko dute aipaturiko Foru Dekretuan eskatzen den informazioa Nafarroako Gobernuaren Erregistro Orokor Elektronikoan, Euskarabideari zuzenduta, jakinarazpena jaso edo, kasua bada, diru-laguntza eman izanaren ebazpena argitaratzeko egunetik hasita hilabeteko epean.

13.2. Aurreko atalean deskribatzen diren gorabeherak ematen ez direlako, entitatea ez bada gardentasun betebeharraren mendeko, aitorpena aurkeztu beharko du, hori adieraziz.

13.3. Entitate onuradunek emandako informazioa Nafarroako Foru Komunitatearen Administrazioaren Gobernu Irekiko Atarian argitaratuko da eta eskura izanen da argitaratu eta urte betean zehar. Muga 15 hilabetekoa izanen da, informazioa kudeatzeko organoan sartzen den unetik hasita. Epe hori iraganda, argitaratzearen ardura duen unitateak ofizioz erretiratuko du eta, ez balu hala egiten, entitate onuradunak eska dezake erretira dadila eta, gehienez ere, eskabidea jasotzen den unetik hasita hilabeteko epean eginen da.

13.4. Entitateak, segidako diru-laguntzen onuraduna izan bada jardunaldi berean, ez du informazioa berretsi beharko diru-laguntza bakoitzaren kasuan, salbu eta hasieran eman ziren datuak aldatzen badira.

13.5. Onuradunak informazioa emateko duen betebeharra ez betetzeagatik izan daitezkeen balizko ondorio zigortzaileak galarazi gabe, ez betetze horrek emandako diru-laguntza ordaintzea galaraziko du, aurrerakinak barne eta, kasua bada, emandako kopuruak itzultzea ekarriko du, Diru-laguntzei buruzko Foru Legearen 35.1 c) artikuluan ezarritakoarekin bat.

Hamalaugarren oinarria.–Legeria aplikagarria.

Deialdi hau oinarri hauek gobernatuko dute, baita Dirulaguntzei buruzko azaroaren 9ko 11/2005 Foru Legeak ezarritakoak ere. Halaber, aplikatzekoa izanen da entitate pribatuei helduak euskalduntzeko laguntzak nola eman arautzeko 161/1988 Foru Dekretuan onetsitako Erregelamenduaren 3. artikuluan xedatua.

Hamaborzgarren oinarria.–Administrazio errekurtsoak.

Deialdi honen, bere oinarrien eta aplikazio egintzen aurka, gora jotzeko errekurtsoa aurkezten ahal da, Herritarrekiko eta Erakundeekiko Harremanetako Departamentuko kontseilariari zuzendua, hilabeteko epean, ebazpen hau Nafarroako Aldizkari Ofizialean argitaratu edo delako egintza jakinarazi eta biharamunetik aitzina.

II. ERANSKINA

–Gau-eskolek eta euskaltegiek bete beharreko fitxa (PDF).

III. ERANSKINA

–Ikastetxeko taldeen ezaugarriak (PDF).

IV. ERANSKINA

Ikasturteko plana

1.–Ikastetxearen identifikazioa.

1.1.–Izena:

1.2.–IFK:

1.3.–Arduraduna:

1.4.–Helbidea:

1.5.–Telefonoa:

1.6.–E-posta:

2.–Ikastetxearen informazio orokorra.

2.1.–Egitura organikoa.

2.2.–Egitura didaktikoa (erabilitako curriculuma, antolaketa...).

2.3.–Ikasturteari dagozkion datuak.

3.–Moduluak, aldiak...

3.1.–Ikastaro motak.

3.2.–Aldiak, egutegia.

3.3.–Bertze batzuk: udako ikastaroak, ikastaro berariazkoak.

4.–Giza baliabideak.

4.1.–Irakasleen jarduera.

4.2.–Irakasleen prestakuntza.

5.–Jarduera osagarriak.

V. ERANSKINA

–Diruz lagundutako aldiari dagozkion diru-sarreren eta gastuen frogagiriak (PDF).

Iragarkiaren kodea: F1514926