202. ALDIZKARIA - 2015eko urriaren 9a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

240/2015 FORU DEKRETUA, irailaren 30ekoa, Nafarroako Berdintasunerako Institutua erakunde autonomoaren estatutuak onesten dituena.

ATARIKOA

Nafarroako Foru Eraentza Berrezarri eta Hobetzeari buruzko Lege Organikoaren 44.18 artikuluak berdintasunerako politiken arloko eskumen esklusiboak ematen dizkio Nafarroako Foru Komunitateari.

Berdintasunaren printzipio konstituzionalak generoan oinarritutako desberdintasun eta bereizkeria mota guztiak benetan desagerraraztea eskatzen du, eta Nafarroako bizitza politikoaren, ekonomikoaren, kulturalaren eta sozialaren eremu guztietan gizonezkoen eta emakumezkoen arteko berdintasuna lortzea, Emakumeen eta Gizonen Aukera Berdintasuna Sustatzeko azaroaren 28ko 33/2002 Foru Legean, Emakumeen eta Gizonen arteko Berdintasunari buruzko martxoaren 22ko 3/2007 Lege Organikoan eta Emakumeen kontrako Indarkeriari aurre egiteko apirilaren 10eko 14/2015 Foru Legean xedatutakoa betetzeko.

Nafarroako Foru Komunitateko Lehendakariaren uztailaren 22ko 8/2015 Foru Dekretuak Nafarroako Foru Komunitateko Administrazioko departamentuen egitura berria ezartzen du. Horren arabera, familiaren eta haur eta nerabeentzako arretaren arloetako eskumena Eskubide Sozialetako Departamentuari dagokio, eta gizonen eta emakumeen arteko berdintasunerako politiken arloko eskumena, berriz, Herritarrekiko eta Erakundeekiko Harremanetako Departamentuari.

Herritarrekiko eta Erakundeekiko Harremanetako Departamentuaren oinarrizko egitura ezartzen duen abuztuaren 12ko 55/2015 Foru Dekretuaren bidez, Nafarroako Familiarako eta Berdintasunerako Institutua departamentu horri atxikitzen zaio, eta Nafarroako Berdintasunerako Institutua izen berria ematen zaio. Helburuei dagokienez, gizonen eta emakumeen arteko berdintasunerako politiken arloko eskumenak kudeatuko ditu soilik.

Horrenbestez, erakunde autonomoaren estatutuak aldatu behar dira, Nafarroako Foru Komunitateko Administrazioaren antolaketa berrira egokitzeko.

Nafarroako Foru Komunitateko Administrazioari buruzko abenduaren 3ko 15/2004 Foru Legean xedatutakoari jarraikiz, Nafarroako Gobernuari dagokio erakunde publikoen estatutuak onestea.

Foru dekretu honen helburua da Nafarroako Berdintasunerako Institutuaren estatutuak onestea.

Horrenbestez, Herritarrekiko eta Erakundeekiko Harremanetako kontseilariak proposaturik, eta Nafarroako Gobernuak 2015eko irailaren 30ean egindako bilkuran harturiko erabakiarekin bat,

DEKRETATU DUT:

Artikulu bakarra.–Estatutuak onestea.

Nafarroako Berdintasunerako Institutua erakunde autonomoaren estatutuak onetsi dira. Horien testua foru dekretu honen eranskinean ageri da.

Lehen xedapen gehigarria.–Aurreko institutuen aipamenak.

Gaur egun dagoen araudian edo jadanik emandako egintza administratiboetan gizonen eta emakumeen arteko berdintasunen arloko eskumenak izan dituzten institutuez egiten diren aipamen guztiak Nafarroako Berdintasunerako Institutuaz eginak bezala ulertuko dira.

Bigarren xedapen gehigarria.–Kudeaketa esleipenak.

Nafarroako Berdintasunerako Institutuak ahalmena izanen du departamentu bereko edo beste bateko organo edo erakunde publikoei esleitzeko hark dituen helburu eta eginkizunak betetzeko beharrezkoak diren jarduera material edo teknikoak, edo zerbitzuetakoak, egitea, arlo hori arautzen duen legedian xedatutakoa betez.

Xedapen iragankor bakarra.–Izendapenak berrestea.

Honako izendapen hauek berresten dira, egin ziren baldintza berberetan:

–Genero Berdintasuneko Politiken zuzendariordearena, hemendik aurrera Plangintzaren eta Programen Zuzendariordetza izanen dena.

–Emakumeen aurkako Indarkeriaren eta Informazioaren Ataleko buruarena, hemendik aurrera Emakumeen aurkako Indarkeriaren Atala izanen dena.

–Proiektu eta Programa Ataleko buruarena, hemendik aurrera Programen eta Genero Zeharkakotasunaren Atala izanen dena.

Xedapen indargabetzaile bakarra.–Arauak indargabetzea.

Indarrik gabe gelditzen dira foru dekretu honi aurka egiten dioten maila bereko edo apalagoko xedapen guztiak eta, bereziki, Nafarroako Familiarako eta Berdintasunerako Institutuaren estatutuak onetsi zituen uztailaren 25eko 75/2012 Foru Dekretua.

Azken xedapenetan lehena.–Aurrekontuko aldaketak.

Ahalmena ematen zaio Ogasuneko eta Finantza Politikako Departamentuko titularrari foru dekretu honetan ezarritakoa betetzeko beharrezkoak diren aurrekontu aldaketak egin ditzan.

Azken xedapenetan bigarrena.–Arauen garapena.

Ahalmena ematen zaio Herritarrekiko eta Erakundeekiko Harremanetako Departamentuko titularrari foru dekretu hau garatzeko eta betetzeko behar diren xedapenak eman ditzan.

Azken xedapenetan hirugarrena.–Indarra hartzea.

Foru dekretu honek Nafarroako Aldizkari Ofizialean argitaratzen den egunean hartuko du indarra.

Iruñean, 2015eko irailaren 30ean.–Nafarroako Gobernuko lehendakaria, Uxue Barkos Berruezo.–Herritarrekiko eta Erakundeekiko Harremanetako kontseilaria, Ana Ollo Hualde.

NAFARROAKO BERDINTASUNERAKO INSTITUTUA
ERAKUNDE AUTONOMOAREN ESTATUTUAK

I. TITULUA

Izaera, atxikipena eta eskumenak

1. artikulua. Izaera.

Nafarroako Berdintasunerako Institutua erakunde autonomo bat da, nortasun juridiko propioa duena, bai eta jarduteko ahalmen osoa ere, xedeak bete ahal izateko.

Nafarroako Berdintasunerako Institutua zeharkakoa da, berdintasunerako politikak politika publiko guztietan txerta daitezen.

2. artikulua. Atxikipena eta babesa.

Nafarroako Berdintasunerako Institutua, bere helburuak betetzeko, Herritarrekiko eta Erakundeekiko Harremanetako Departamentuak plangintza eta politika orokorrari buruz ematen dituen jarraibideen mendean dago, hari atxikita. Departamentu horren esku gelditzen dira Institutua kontrolatu eta babesteko ahalmenak, estatutuetan, foru legerian eta administrazioaren antolamendu juridikoan esleitzen zaizkionak, hain zuzen ere.

3. artikulua. Eskumenak eta eginkizunak.

1. Nafarroako Berdintasunerako Institutuari eskumen hauek dagozkio:

a) Nafarroako Foru Komunitateko emakumeen eta gizonen arteko berdintasunerako politikak koordinatzea eta kudeatzea.

b) Emakumeen aurkako indarkeriaren edo genero indarkeriaren aurkako neurri integralak koordinatzea eta kudeatzea.

2. Eskumen horiek garatzeko, eta horien esparru materialaren barnean, Nafarroako Berdintasunerako Institutuak honako eginkizun hauek beteko ditu:

a) Xedapen orokorreko proiektuak egitea bere eskumenenen esparruan.

b) Emakumeen eta gizonen arteko berdintasun gaietan Nafarroako Gobernuaren plangintza orokorra prestatzea, departamentuek euren plangintza sektorialak prestatzeko dituzten eskumenak galarazi gabe.

c) Nafarroako Foru Komunitatean berdintasunerako politikak diseinatu, abian jarri, koordinatu eta ebaluatzea.

d) Jarduketak koordinatzea emakumeen aurkako indarkeriaren prebentzioa landu eta haren ondoriozko biktimei laguntza eta babesa ematen dieten erakundeen artean.

e) Nafarroako Gobernuaren eta haren lehendakariaren abenduaren 3ko 14/2004 Foru Legean genero kontua dela-eta, bertan ezartzen diren neurrien eraginari buruzko txostenak bultzatzea eta horiek prestatzen laguntza ematea.

f) Ekintza positiboko neurriak diseinatu eta bultzatzea.

g) Nafarroako Foru Komunitateko Administrazioaren politika, programa eta ekintza guztietan generoaren ikuspegia sar dadin bultzatzea, maila eta fase guztietan.

h) Nafarroako Administrazio Publikoei laguntza ematea gizonen eta emakumeen arteko berdintasunaren alde lan egiteko.

i) Gizonen eta emakumeen arteko berdintasunaren arloan, Nafarroako Foru Komunitateko Administrazioaren eta gainerako administrazio publikoen, instituzioen, entitateen eta erakunde publiko nahiz pribatuen arteko harremanak sustatzea.

j) Nafarroako Foru Komunitatean emakumeen egoeraren bilakaerari buruzko azterlanak eta ikerketak egitea.

k) Emakumeen desberdintasun egoeren gainean sentsibilizazio jarduerak egitea, bai eta nafar herritar guztientzat zuzendutako berdintasunerako beharrezko neurrien gainean ere.

l) Nafarroako Gobernuak plan orokorrean eta plan sektorialetan onetsitako jarraibideak egoki aplikatu eta eraginkortasunez betetzen direla bermatzea, Emakumeen kontrako indarkeriari aurre egiteko apirilaren 10eko 14/2015 Foru Legea garatzeko.

m) Sexuak eragindako bereizkeria kasu zehatzetan egindako salaketak bideratzea eta haiei arreta eta konponbidea ematea.

n) Erabakiak hartzeko garaian, emakumeen partaidetza eta ordezkaritzarako bidea ematea.

o) Bere eskumeneko arloei dagozkien baliabideak kudeatzea.

p) Indarra duten xedapenek agintzen edo esleitzen dizkioten gainerako eginkizunak.

II. TITULUA

Egitura organikoa

I. KAPITULUA

Zuzendaritza organoak

4. artikulua. Zuzendaritza organoak.

Nafarroako Berdintasunerako Institutuak zuzendaritza organo hauek ditu:

a) Gobernu Kontseilua.

b) Zuzendaritza-kudeatzailetza.

II. KAPITULUA

Gobernu Kontseilua

5. artikulua. Kontseiluaren osaera.

1. Nafarroako Berdintasunerako Institutuaren Gobernu Kontseiluak kide hauek ditu:

a) Kontseiluburua: Herritarrekiko eta Erakundeekiko Harremanetako Departamentuko titularra.

b) Kontseiluburuordea: Nafarroako Berdintasunerako Institutuko zuzendari-kudeatzailea.

c) Kontseilukideak: zuzendaritza nagusi hauetako titularrak: Politika Ekonomiko eta Enpresarialaren eta Lanaren Zuzendaritza Nagusia; Toki Administrazioko Zuzendaritza Nagusia; Hezkuntza Zuzendaritza Nagusia; Vianako Printzea Erakundea-Kultura Zuzendaritza Nagusia; Osasun Zuzendaritza Nagusia; Gizarteratzeko eta Babes Sozialerako Zuzendaritza Nagusia; Lehendakaritzako eta Gobernu Irekiko Zuzendaritza Nagusia; Justizia Zuzendaritza Nagusia; Barne Zuzendaritza Nagusia; Aurrekontuaren Zuzendaritza Nagusia.

d) Idazkaria: Nafarroako Berdintasunerako Institutuko Plangintzaren eta Programen zuzendariordea.

2. Departamentuak Gobernu Kontseiluan dituen kideen zuzendaritza karguren bat hutsik geldituz gero, departamentuko titularrak haien ordezkoak izendatuko ditu, aldi baterako, behin betiko izendapenak egin bitartean.

3. Gobernu Kontseiluak, bidezko baderitzo, baimena ematen ahalko die berdintasunaren arloan aritzen diren organo eta entitateen ordezkariei bilkuretan parte har dezaten, bereziki mugimendu feministaren eta elkarteen mugimenduaren entitateetakoei, tokiko eragileei eta genero indarkerian aditu direnei. Hizpidea izanen dute, baina botorik ez.

6. artikulua. Gobernu Kontseiluaren ahalmenak.

Honako ahalmen hauek dagozkio Gobernu Kontseiluari:

a) Urtero, erakunde autonomoaren aurrekonturako aurreproiektuaren proposamena onestea.

b) Nafarroako Berdintasunerako Institutuaren ondarea administratzea.

c) Berdintasunerako politiken arloko urteko kudeaketa plana onestea, baita prestatzen diren urteko txosten guztiak ere.

d) Erakundea autonomoaren zuzendaritza eginkizunak kontrolatu eta gainbegiratzea.

e) Esleitzen edo agintzen zaion beste edozein eginkizun, indarra duen antolamendu juridikoarekin bat.

7. artikulua. Kontseiluburuaren ahalmenak.

1. Honako hauek dira kontseiluburuaren ahalmenak:

a) Gobernu Kontseiluaren ordezkari izatea edozein jarduera klasetan, eta ordezkaritza hori betetzeko behar diren ahalmen eta aginduak ematea.

b) Gobernu Kontseiluaren bilkuretarako deia egitea, eguneko gai zerrenda finkatzea, bilkuretako buru izan eta horiek zuzentzea.

c) Gobernu Kontseiluak harturiko erabakiak eta Nafarroako Berdintasunerako Institutuaren funtzionamendua erregulatzen duten arauak bete daitezela begiratzea.

d) Presako kasuetan behar diren ebazpenak hartzea, eta ondotik egiten den lehenbiziko bilkuran horien berri ematea Gobernu Kontseiluari.

2. Postua hutsik dagoenean, titularra kanpoan edo eri dagoenean edo justifikatutako gainerako kasuetan, kontseiluburuaren ordez kontseiluburuordea arituko da.

8. artikulua. Idazkaritza.

1. Plangintzaren eta Programen zuzendariordeak Kontseiluaren bilkuretan botoz eta hizpidez parte hartuko du eta Gobernu Kontseiluko idazkaria izanen da. Kanpoan dagoenean, Sustapenaren eta Kudeaketaren zuzendariordea aritzen ahalko da haren ordez.

2. Kontseiluko idazkariak eginkizun hauek izanen ditu:

a) Kontseiluburuaren aginduz Gobernu Kontseiluaren bilkuretarako deia egitea eta gainerako kideentzako zitazioak egitea.

b) Gobernu Kontseiluaren lanak prestatzea, Nafarroako Berdintasunerako Institutuko zuzendaritza-kudeatzailetzarekin batera, eta erabakien betearazpena tramitatzea.

c) Gobernu Kontseiluaren bilkuretako aktak egitea, hartzen diren erabakien fede ematea eta eskatzen diren ziurtagiriak luzatzea, Gobernu Kontseiluaren liburu eta dokumentuak zaintzea eta deialdiez arduratzea.

d) Agintzen zaizkion gainerako eginkizunak betetzea.

9. artikulua. Funtzionamendua.

1. Gobernu Kontseilua nahitaez urtean behin, gutxienez, bilduko da bilkura arruntean. Bilkura bereziak lehendakaritzak hala erabakirik eginen dira.

2. Gobernu Kontseiluaren funtzionamenduari dagokionez, Nafarroako Foru Komunitateko Administrazioari buruzko abenduaren 3ko 15/2004 Foru Legean kide anitzeko organoentzat ezarritakoari men eginen zaio.

10. artikulua. Aholkularitza.

Gobernu Kontseiluak edozein unetan beste pertsona batzuen aholkua eskatzen ahalko du, haiek dituzten ezagupenak, prestakuntza, izen ona edo bestelako inguruabarrak direla kausa, esku hartzea egokitzat jotzen baldin badu. Kasu horretan, dei berezia eginen zaie horretarako.

III. KAPITULUA

Zuzendaritza-kudeatzailetza

11. artikulua. Izendatzea, kargutik kentzea eta ordeztea.

1. Nafarroako Berdintasunerako Institutuko zuzendari-kudeatzailearen izendapena eta kargutik kentzea Nafarroako Gobernuak erabakiko du askatasunez, Herritarrekiko eta Erakundeekiko Harremanetako Departamentuko titularrak proposatuta.

2. Kargua hutsik dagoenean, titularra kanpoan edo eri denean, edo beste arrazoi batzuengatik beharrezkoa denean, Plangintzaren eta Programen zuzendariordeak ordeztuko du edo, hori kanpoan bada, Sustapenaren eta Kudeaketaren zuzendariordeak.

12. artikulua. Funtzioak.

Nafarroako Berdintasunerako Institutuko zuzendaritza-kudeatzailetzak eginkizun hauek izanen ditu:

a) Erakunde autonomoaren ordezkaria izatea.

b) Gobernu Kontseiluaren eta kontseiluburuaren erabakiak bete eta betearaztea eta, presako kasuetan, beharrezkoa bada, behar diren ebazpenak ematea, eta hurrengo bilkuran Gobernu Kontseiluari horren berri ematea.

c) Nafarroako Berdintasunerako Institutuaren funtzionamenduaz ardura nagusia izatea.

d) Berdintasun politiken arloan, urteko jarduketa-ildo nagusiak finkatzea, onesten diren plan estrategikoen helburuak lortzeko.

e) Nafarroako Berdintasunerako Institutuaren jardueren eta organoen barne antolaketa zuzendu eta koordinatzea.

f) Erakunde autonomoko giza eta finantza baliabideak, bai eta fisikoak ere, osoki kudeatzea, zerbitzu eraginkorrak eta kalitatekoak eman ahal izateko.

e) Txostenak egitea Herritarrekiko eta Erakundeekiko Harremanetako Departamentuaren titularrak espedienteen gainean ebazteko proposamenei buruz.

h) Erakunde autonomoak jarduteko behar diren administrazio ebazpenak ematea eta administrazio egintzak bete daitezen agintzea.

i) Kontratazio administratiboaren arloan indarra duen araudiak kontratuak egiteko erakunde autonomoen ordezkariei esleitzen dizkien ahalmenak erabiltzea.

j) Nafarroako Berdintasunerako Institutuaren jarduketa programak prestatzea, bai eta aurrekontuen aurreproiektuaren proposamena eta urteko memoria ere, eta horiek guztiak Gobernu Kontseiluari aurkeztea, onets ditzan.

k) Nafarroako Berdintasunerako Institutuaren funtzionamendurako behar diren ordainketak eta gastuak baimentzea, indarra duen araudiak ezarri bezala.

l) Nafarroako Berdintasunerako Institutuaren lan metodoak hobetzeaz arduratzea.

m) Lan arloko auzibidera eta auzibide zibilera jo aurreko erreklamazioak ebaztea, langileriaren arloko erreklamazioak izan ezik, eta, orobat, ondarearen gaineko erantzukizuneko prozeduren ondoriozkoak, erakunde autonomoaren esparru materialaren barrenean.

n) Herritarrekiko eta Erakundeekiko Harremanetako kontseilariari proposatzea atalburuak, bulegoburuak edo atala baino maila beheragoko unitateburuak, erakunde autonomoari atxikiak, bitarte baterako izendatzea, funtzio publikoaren arloan eskumena duen departamentuak aldeko txostena egin ondoren.

o) Ebazpen bidez izendatzea erakunde autonomoko zuzendariordeen eta atalburuen aldi baterako ordezkoak, kargua hutsik dagoenean, titularrak kanpoan direnean edo eritasun nahiz ezintasun bat dutenean.

p) Nafarroako Berdintasunerako Institutuko plantilla organikoaren eta lan eskaintzaren arloko proposamenak egitea eta funtzio publikoaren arloan eskumena duen departamentura igortzea.

q) Nafarroako Berdintasunerako Institutuko langileen buru izatea.

r) Bere eskumeneko arloetan zehapen espedienteak hasi, tramitatu eta ebazteko ahalmenak erabiltzea.

s) Herritarrekiko eta Erakundeekiko Harremanetako Departamentuko kontseilariak, bere kargua dela-eta, agintzen dizkion gainerako eginkizunak.

13. artikulua. Eginkizunak beste norbaiten esku uztea.

Zuzendari-kudeatzaileak bere eskudantzia batzuen erabilera Plangintzaren eta Programen zuzendariordearen eta Sustapenaren eta Kudeaketaren zuzendariordearen esku uzten ahalko ditu, indarra duten legeetan ezarritakoarekin bat.

IV. KAPITULUA

Zuzendariordetzak eta atalak

14. artikulua. Nafarroako Berdintasunerako Institutuko zuzendariordetzak.

Nafarroako Berdintasunerako Institutuak zuzendariordetza hauek ditu bere egituran, zuzenean Zuzendaritza-kudeatzailetzaren mendean:

a) Plangintzaren eta Programen Zuzendariordetza.

b) Sustapenaren eta Kudeaketaren Zuzendariordetza.

15. artikulua. Izendapena eta kargutik kentzea.

Zuzendariordeen izendapena eta kargutik kentzea Nafarroako Gobernuak erabakiko du askatasunez, foru dekretu bidez, Herritarrekiko eta Erakundeekiko Harremanetako Departamentuko titularrak proposatuta.

16. artikulua. Plangintzaren eta Programen Zuzendariordetza.

Plangintzaren eta Programen Zuzendariordetzak eginkizun hauek izanen ditu:

a) Emakumeen eta gizonen arteko berdintasunerako politiken esparruko jarduketen urteko plangintza proposatzea Zuzendaritza-kudeatzailetzari.

b) Emakumeen eta gizonen arteko berdintasuna bultzatzea eta sustatzea, Nafarroako Foru Komunitateko Administrazioaren politika, plan, programa eta jarduketa guztien erdigune gisa.

c) Nafarroako Foru Komunitateko Administrazioaren baitan gauzatzen diren ekintza positiboen eta genero ikuspegiaren integrazioa koordinatzea eta horien jarraipena egitea.

d) Nafarroako Foru Komunitateko Administrazioko departamentuetan genero berdintasunerako unitateak ezar daitezela sustatu eta arautzea.

e) Erraztasunak ematea Nafarroako Gobernuaren proiektuak eta haietan esku hartzen duten administrazio publiko eta erakundeenak prestatzeko eta haien gainean laguntza teknikoa jasotzeko, Nafarroako Foru Komunitaterako garrantzia berezia duten arau eta planetako genero eraginari buruz.

f) Nafarroako Gobernuko beste departamentuekin batera, Nafarroako Foru Administrazioan berdintasunaren arloan abian jartzen diren jarduketa planak ebaluatzea.

g) Jarraipenaren etengabeko azterketa egitea Nafarroako Foru Komunitateko genero berdintasunaren eta emakumeen aurkako indarkeriaren gaineko politiken betetearazpenari buruz.

h) Langile publikoen prestakuntza genero ikuspegitik sustatzea, bereziki hezkuntza, osasuna, justizia, barne eta gizarte eskubideen arloetan.

i) Estatuko eta autonomietako administrazioen kontseilu eta batzordeetan parte hartzea.

j) Plan eta ekintza politikoaren diseinu eta ebaluazioan, emakume elkarteen, talde feministen eta berdintasunaren aldeko gizon taldeen parte-hartze aktiboa, gero eta handiagoa dena, koordinatzea, eta ahaleginak egitea haiek garatzeko behar diren baliabideak izan daitezen.

k) Legez ezarritako emakumeen eta gizonen arteko parekotasun irizpideen aplikazioaren jarraipena egitea enpresa publikoetan eta Nafarroako Foru Komunitateko Administrazioko zuzendaritza lanpostuetan edo antzekoetan.

l) Lan arloan emakumeen eta gizonen arteko desberdintasuna murrizteko neurriak proposatzea.

m) Nafarroako Gobernuan berdintasunerako barne planak proposatzea, egungo errealitate sozialera egokituak.

n) Zuzendariordetzari atxikitako langileak antolatzeko ahalmenak erabiltzea.

o) Zuzendaritza-kudeatzailetzak agintzen dizkion bestelako eginkizunak.

17. artikulua. Plangintzaren eta Programen Zuzendariordetzako atalak.

Plangintzaren eta Programen Zuzendariordetzak atal hauek ditu bere egituran:

a) Programen eta Genero Zeharkakotasunaren Atala.

b) Emakumeen aurkako Indarkeriaren Atala.

18. artikulua. Programen eta Genero Zeharkakotasunaren Atala.

Programen eta Genero Zeharkakotasunaren Atalak eginkizun hauek izanen ditu:

a) Nafarroako Foru Komunitateko Administrazioan genero zeharkakotasunaren estrategia ebaluatzea, berdintasunerako urteko programen bidez.

b) Genero berdintasunerako unitateen ezarpena koordinatu eta haien jarraipena egitea Foru Administrazio osoan.

c) Genero berdintasunaren arloko txostenak eta azterlanak prestatzea beste departamentuekin batera.

d) Nafarroako Gobernuko departamentuei aholku ematea Nafarroako Gobernuak onetsitako arau, plan eta programen sexu edo genero arrazoiengatiko eraginari buruzko txostenak prestatzeko orduan.

e) Eraginari buruzko txostenak prestatzea Nafarroako Berdintasunerako Institutuan.

f) Nafarroako Gobernuan toki administrazioaren arloko eskumenak dituen departamentuarekin batera, Nafarroako toki entitateei dagokienez prestatzen diren berdintasun politikak koordinatzea eta horien jarraipena egitea.

g) Baliabide tekniko eta giza baliabide nahikoak bermatzea berdintasun planak tokiko eremuan ezartzeko, aukera-berdintasuneko agentearen lanbide figura bultzatuz eta egonkortuz.

h) Lana eta familiako bizitza bateratzeko tokian tokiko itunak izeneko programei laguntzea eta haiek koordinatzea, zainketaren etikaren ikuspegitik.

i) Instituturako azterlanak eta txostenak egitea, berezko baliabideen zein lankidetza hitzarmenen bidez.

j) Enpresei aholku ematea genero berdintasunerako planak ezar eta gara ditzaten, eta lan hori koordinatzea, Nafarroako Gobernuaren genero berdintasunaren ezarpenerako prozeduraren bidez.

k) Baterako hezkuntza, balioetan heztea eta heziketa afektibo-sexuala bultzatzea, ardatz nagusiak baitira jarrera matxista eta baztertzaileak prebenitzeko eta bizitza afektibo-sexual osasuntsua eta arduratsua sustatzeko.

l) Erakunde autonomoaren jarduerei buruz agintzen zaizkion gainerako eginkizunak.

19. artikulua. Emakumeen aurkako Indarkeriaren Atala.

Emakumeen aurkako Indarkeriaren Atalak eginkizun hauek izanen ditu:

a) Emakumeen aurkako indarkeriari arreta ematean eta aurreneurriak hartzean eraginkortasunez koordinatzeko erakundeen arteko Akordioaren betetze-mailaren jarraipena eta ebaluazioa koordinatzea.

b) Genero indarkeriaren arloko eskumenak dituen ministerioarekin koordinatzea.

c) Emakumeen aurkako indarkeriari aurre egiteko plan estrategikoak abiaraz daitezela proposatzea eta haien edukiak nola gauzatzen diren aztertzea.

d) Genero indarkeriaren arloan onesten den urteko plangintza koordinatu eta betearaztea, dauden programak emakumeen aurkako indarkeria mota guztietara egokituz.

e) Laguntza juridikoa bermatzea genero indarkeria jasan duten emakumeei.

f) Emakumeen aurkako indarkeriaren arloan jartzen diren salaketa polizialen jarraipena egitea.

g) Emakumeen aurkako indarkeriaren prebentzio eta arretarako baliabideen jarraipen teknikoa egitea eta koordinatzea, zehazki harrera egiteko baliabideei, arreta emateko talde integralei, emakumeei laguntza juridikoa emateko zerbitzuari eta beste batzuei dagokienez.

h) Emakumeen trafiko eta sexu esplotazioaren arloan Nafarroan egiten diren jarduketak koordinatzea.

i) Emakumeen aurkako indarkeria kasu larrienetan, egin beharreko jarduketak eta kasuen jarraipena koordinatzea, indarreko araudia betez.

j) Erakunde autonomoaren jarduerekin loturik agintzen zaizkion gainerako eginkizunak.

20. artikulua. Sustapenaren eta Kudeaketaren Zuzendariordetza.

Sustapenaren eta Kudeaketaren Zuzendariordetzak eginkizun hauek izanen ditu:

a) Zuzendaritza-kudeatzailetzari estrategiak proposatzea genero berdintasunaren arloan Nafarroako gizartean eragina izateko, gizartea sentsibilizatzeko ekintzak eginez pertsonen eta taldeen jarrerak alda daitezen.

b) Neurriak bultzatu eta sustatzea emakumeek jasaten dituzten bereizkeriak gainditzeko, arrazoi hauetakoren batengatik: kultura, etnia, adina, aniztasun funtzionala, gizarte klasea eta orientazio sexuala.

c) LGTB kolektiboaren eskubideen benetako berdintasuna bultzatu eta sustatzea, eta berariazko arretarako neurriak garatzea kolektibo horrek jasaten duen genero bereizkeria gainditzeko, genero desberdintasunaren aurrean ahula baita.

d) Gizartean eta politikan emakumeen parte-hartzea sustatu eta suspertzea.

e) Eztabaida sozialak eta jarduketen programa integralak abiaraz daitezen erraztea genero desberdintasunaren eta emakumeen aurkako indarkeriaren aurrean, sexu esplotazioa eta emakumeen trafikoa barne.

f) Hizkuntzaren erabilera integratzaile eta ez sexistaz arduratzea gobernu ekintza osoan.

g) Laguntza teknikoa eta baliabideak ematea bere eskumeneko arloetan jakinarazten zaizkion proiektu eta programei, Nafarroako sektore publikoan eta gizartean sortutakoei.

h) Eremu publikoan eta hedabideetan jardunbide egokietarako kodeak proposatzea, emakumeen eta gizonen irudi estereotipatuak gainditzeko.

i) Profesionalen prestakuntza ekintzak kudeatzea emakumeen aurkako indarkeriaren eta genero berdintasunaren arloan.

j) Genero berdintasunaren arloko araudia onesteko orduan, sustatzaile eta bultzatzaile lana egitea eta lankidetzan aritzea.

k) Zuzendaritza-kudeatzailetzari jarraibideak proposatzea bere menpeko unitate organikoen funtzionamendurako, bai eta erakunde autonomoaren helburuak betetzen laguntzen duten proposamen eta prozedurak ere.

l) Aholkularitza ematea erakundearen eskumenekin lotura duten gai juridiko, ekonomiko eta administratiboetan.

m) Erakunde autonomoaren aurrekontuen eta ekonomiaren kudeaketa gauzatu eta kontrolatzea, bere eskumenen esparruan.

n) Zuzendariordetzari atxikitako langileak antolatzeko ahalmenak erabiltzea.

o) Zuzendaritza-kudeatzailetzak agintzen dizkion bestelako eginkizunak.

21. artikulua. Sustapenaren eta Kudeaketaren Zuzendariordetzako atalak.

Sustapenaren eta Kudeaketaren Zuzendariordetzak atal hauek ditu bere egituran:

a) Informazioaren, Sentsibilizazioaren eta Partaidetza Sozialaren Atala.

b) Kudeaketaren eta Baliabideen Atala.

Unitate organiko horiek ondorengo artikuluetan ezarritako eginkizunez gainera, Nafarroako Gobernuko departamentuen arteko koordinazioaz ere arduratuko dira, sektorekako plangintzaren eta onesten diren berdintasun planen arabera.

22. artikulua. Informazioaren, Sentsibilizazioaren eta Partaidetza Sozialaren Atala.

Informazioaren, Sentsibilizazioaren eta Partaidetza Sozialaren Atalak eginkizun hauek izanen ditu:

a) Emakumeen elkartegintza eta parte-hartze soziala bultzatu eta sostengatzea.

b) Planak eta estrategiak proposatzea emakumeen ahalduntzea bultzatzeko eta emakumeak elkarteetan egon daitezen eta parte har dezaten sustatzeko.

c) Nafarroako emakume-elkarteei zuzendutako berdintasun politikak diseinatu eta gauzatzea.

d) Mugimendu feministaren, tokiko eragileen eta berdintasunean eta genero indarkerian aditu direnen parte-hartzea erraztea esleitzen zaizkion jarduketa eta txostenetan.

e) Emakumeen eta gizonen arteko berdintasunaren arloko sentsibilizazio kanpainak egitea jardunbide egokiei eta baloreei buruz.

f) Ekitaldiak antolatzea eta horietan parte-hartzea berdintasuna eta emakumeen ekarpen soziala agerian jartzen laguntzeko.

g) Emakumeen eta LGTB kolektiboaren bereizkeriaren eta sexismoaren kontra egiten duten sentsibilizazio ekintzak bultzatzea eta horietarako laguntza ematea hezkuntza, gizarte eta kultura arloetan, zeharka eta instituzio guztietan.

h) Jardunaldiak, mintegiak eta biltzarrak diseinatu eta antolatzea berdintasunaren inguruan, Institutuko helburuetarako interesekoak.

i) Emakumeen eta gizonen arteko berdintasunaren eta sustapenaren arloan Nafarroako Foru Komunitatean dauden baliabide, zerbitzu eta laguntzen gaineko informazioa ematea.

j) Informazioa eta dokumentazioa biltzea emakumeen egoerari eta sustapenari buruz, eta parte-hartze aktiboa izatea genero berdintasunaren politikei buruzko dokumentazioa eta argitalpenak prestatu eta zabaltzeko.

k) Nafarroako Berdintasunerako Institutuaren web-orriaren edukia mantentzea eta eguneratzea.

l) Nafarroako Berdintasunerako Institutuaren jarduera zabaltzea.

m) Bereizkeria kasuengatik jarritako salaketak bideratzea.

n) Erakunde autonomoaren jarduerei buruz agintzen zaizkion gainerako eginkizunak.

23. artikulua. Kudeaketaren eta Baliabideen Atala.

Kudeaketaren eta Baliabideen Atalak eginkizun hauek izanen ditu:

a) Genero berdintasunaren arloko araudia onesteko orduan, sustatzaile eta bultzatzaile lana egitea eta lankidetzan aritzea.

b) Berdintasunaren arloko indarreko araudia aztertzea, eta txostenak egitea emakumeen bereizkeria ezabatzeko neurriak hartzeko sostengu gisa.

c) Zuzendaritza-kudeatzailetzarekin batera, aurrekontuen aurreproiektua egitea eta aurrekontuko aldaketak proposatzea, bere eskumenen esparruan.

d) Jarraipena, betearazpenaren kontrola eta txostenak egitea, eskatzen zaionean, aurrekontuei eta prozedurei buruz eta gai ekonomiko, juridiko eta administratiboei buruz.

e) Datu-banku bat eta adierazleak mantentzea, Nafarroako Berdintasunerako Institutuaren eginkizunen garapenerako euskarri gisa.

f) Urteko memoria egitea Institutuaren kudeaketari eta funtzionamenduari buruz.

g) Genero indarkeria pairatzen duten emakumeentzako laguntza ekonomikoen espedienteak kudeatzea.

h) Genero indarkeria pairatzen duten emakumeentzako prebentzio eta arretarako baliabideak kudeatzea.

i) Genero indarkeria pairatzen duten emakumeen egiaztagiriak kudeatzea etxebizitza babestua eskura dezaten.

j) Arlo honetako kontratuak eta diru-laguntzen deialdiak kudeatzea.

k) Dokumentazio zentroa kudeatzea eta antolatzea, berdintasunaren arloko ezagutza kudeatzearen ardura duen unitate gisa.

l) Erakunde autonomoaren jarduerei buruz agintzen zaizkion gainerako eginkizunak.

24. artikulua. Bulegoak eta antzeko unitateak.

Bulegoak edo ataletatik beherako beste administrazio unitate batzuk sortu, aldatu edo kentzea Herritarrekiko eta Erakundeekiko Harremanetako kontseilariaren aginduz eginen da, zuzendaritza-kudeatzailetzak proposaturik, aurretik ondorio horietarako eskumena duten departamentuek txostena emanda.

III. TITULUA

Ondarea, baliabideak, aurrekontuak eta kontrola

25. artikulua. Ondarea.

Gai horiek erregulatzen dituen araudian xedatutakoari jarraikiz, Nafarroako Berdintasunerako Institutuari lotuta izanen dira erakundeari bere helburuak betetzeko atxikitzen zaizkion Nafarroako Ondarearen ondasun eta eskubide guztiak. Ondare horren ondasun direnez gero, dagokien jatorrizko kalifikazio juridikoa mantenduko dute.

26. artikulua. Baliabide ekonomikoak.

Nafarroako Berdintasunerako Institutuko baliabideak honako hauek izanen dira:

a) Hari atxikitako ondasun eta eskubideen interes, errenta eta mozkinak.

b) Nafarroako Foru Komunitateak erakundeari bere gizarte prestazio eta zerbitzuetarako atxikitzen dizkion baliabideak.

c) Nafarroako Aurrekontu Orokorren kargura egiten zaizkion transferentziak eta ekarpenak.

d) Bidezko diren xedapenen arabera jaso ditzakeen diru-sarrera arruntak nahiz bereziak.

e) Entitateek emandako borondatezko ekarpen edo diru-laguntzak.

f) Jaso dezakeen beste edozein baliabide.

27. artikulua. Aurrekontuen araubidea.

1. Nafarroako Berdintasunerako Institutuaren kudeaketa urteko aurrekontuen araubidearen menpe izanen da, eta hori Nafarroako Parlamentuak onetsi beharko du.

2. Aurrekontuen egitura, diru-sarreren eta gastuen sailkapenari eta horien zehaztasun mailari dagokienez, Nafarroako Aurrekontu Orokorretarako ezarritako arau eta erregelei egokituko zaie, aurrekontu orokor horien barnean baitira.

3. Aurrekontuen exekuzioari eta likidazioari dagokienez, Nafarroako Aurrekontu Orokorrei aplikatzen zaizkien arau orokorretara joko da.

28. artikulua. Kontu-hartzailetza.

Nafarroako Berdintasunerako Institutuko kudeaketa ekonomikoa –hots, eduki ekonomikoko ondasun eta eskubideak sorrarazten dituzten egintza, agiri eta espedienteak- Nafarroako Foru Komunitateko Administrazioarentzat ezarritako modu eta baldintza berberetan eramanen da kontu-hartzailetzari eta kontabilitateari dagokienez.

29. artikulua. Kontabilitate araubidea.

1. Nafarroako Berdintasunerako Institutua kontabilitate publikorako araubidearen menean geldituko da, Nafarroako Foru Komunitatearen Administrazioak dituen modu eta baldintza berberetan.

2. Kontuak ematea Nafarroako Kontu Orokorretarako aurreikusitakoaren arabera formalizatu, tramitatu eta ebatziko da.

IV. TITULUA

Langileak

30. artikulua. Langileen araubidea.

Nafarroako Berdintasunerako Institutuko langileria honako hauek osatuko dute:

a) Nafarroako Gobernuak hautaturik, izendapen libreko zuzendaritza karguetan aritzen direnak.

b) Nafarroako Foru Komunitateko Administrazioko funtzionarioak eta lan-kontratudunak, Nafarroako Berdintasunerako Institutuari atxikita daudenak eta atxikitzen zaizkionak.

c) Estatuko Administrazio Orokorretik edo beste administrazio batetik Nafarroako Foru Komunitatera transferitu eta Nafarroako Berdintasunerako Institutuari atxiki zaizkion langileak.

d) Erakunde autonomoaren beraren lan-kontratudunak eta administrazio-kontratudunak.

V. TITULUA

Egintzen araubide juridikoa

31. artikulua. Araubide juridiko orokorra.

1. Nafarroako Berdintasunerako Institutuaren egintzen araubide juridikoa Nafarroako Foru Komunitatearen Administrazioari buruzko abenduaren 3ko 15/2004 Foru Legearen VIII. tituluaren I. kapituluan erakunde autonomoentzat ezarritakoa izanen da.

2. Langileei, kontratazioei eta aurrekontuei buruzko administrazio egintzei dagokienez, Nafarroako Foru Komunitateko Administrazioaren araudi berariazkoari jarraituko zaio.

32. artikulua. Errekurtsoak.

Nafarroako Berdintasunerako Institutuak emandako egintza eta ebazpenen kontra bidezko izanen da legez ezarritako errekurtso administratibo eta jurisdikzionalak paratzea.

33. artikulua. Laguntza juridikoa.

1. Botere Judizialari buruzko Lege Organikoan xedatutakoari jarraikiz, Nafarroako Berdintasunerako Institutuaren ordezkaritza eta defentsa epaiketetan Nafarroako Gobernuko Aholkularitza Juridikoari dagokio, ordezkatu eta defendatzeko elkargoko beste abokatu profesional bat izendatzen den kasuetan salbu.

2. Halaber, Nafarroako Gobernuaren Aholkularitza Juridikoak aholku juridikoa ematen ahalko dio Nafarroako Berdintasunerako Institutuari, erregelamenduz ezartzen den moduan.

Iragarkiaren kodea: F1513412