160. ALDIZKARIA - 2015eko abuztuaren 18a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

9/2015 FORU AGINDUA, abuztuaren 14koa, Landa Garapeneko, Ingurumeneko eta Toki Administrazioko kontseilariak emana, Landa Garapeneko, Ingurumeneko eta Toki Administrazioko kontseilariaren uztailaren 22ko 271/2015 Foru Agindua aldatzen duena. Foru agindu horren bidez 2015. urteko lehenengo hiruhilekoan gertatutako euri-jasen ondorioz gainezka egindako ibaiek ureztaketako azpiegituretan eragindako kalteak presaz eta gerora gabe konpontzeko, ureztatzaileen elkarteek eta ureztaketako sindikatuek egindako gastuetarako ohiz kanpoko laguntzen deialdia onetsi eta haren oinarri arautzaileak ezarri ziren.

Landa Garapeneko, Ingurumeneko eta Toki Administrazioko kontseilariaren uztailaren 22ko 271/2015 Foru Aginduaren bosgarren oinarriak, 2015eko abuztuaren 3ko Nafarroako Aldizkari Ofizialean argitaratu baitzen, 15 egun naturaleko epea ezartzen du laguntza eskaerak aurkezteko.

Deialdia oporraldian argitaratu denez, ezarritako epea laburregia da eskatzen den dokumentazioa aurkeztu ahal izateko; horiek horrela, egokiagotzat jotzen da, dokumentazioaren aurkezpena errazteko, aipatu epea beste hamabost egun natural luzatzea.

Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan eskudantziak erabiliz,

AGINDU DUT:

Artikulu bakarra.–Landa Garapeneko, Ingurumeneko eta Toki Administrazioko kontseilariaren uztailaren 22ko 271/2015 Foru Aginduaren bosgarren oinarriaren lehen atala aldatzea. Foru agindu horren bidez 2015. urteko lehenengo hiruhilekoan gertatutako euri-jasen ondorioz gainezka egindako ibaiek ureztaketako azpiegituretan eragindako kalteak presaz eta gerora gabe konpontzeko, ureztatzaileen elkarteek eta ureztaketako sindikatuek egindako gastuetarako ohiz kanpoko laguntzen deialdia onetsi eta haren oinarri arautzaileak ezarri ziren. Bosgarren oinarriaren lehen atala honelaxe geldituko da:

“1. Eskaerak aurkezteko epea 30 egun naturalekoa izanen da, 271/2015 Foru Agindua Nafarroako Aldizkari Ofizialean argitaratu eta biharamunetik hasita.”

Iruñean, 2015eko abuztuaren 14an.–Landa Garapeneko, Ingurumeneko eta Toki Administrazioko kontseilaria, Isabel Elizalde Arretxea.

Iragarkiaren kodea: F1511628