1. NAFARROAKO FORU KOMUNITATEA
1.7. BESTELAKOAK
317/2015 EBAZPENA, ekainaren 25ekoa, Hezkuntza Baliabideen zuzendari nagusiak emana, Iruñeko “Nafarroako Eskola Politeknikoa” Lanbide Heziketako ikastetxe pribatuaren irekierarako eta funtzionamendurako baimena aldatzen duena, irakasgaien kopurua handitzeagatik.
Ikusirik María Reyes Olaberri Garay andreak, Iruñeko “Nafarroako Eskola Politeknikoa” Lanbide Heziketako ikastetxe pribatuaren entitate titularra ordezkatuz, egindako eskaera, baimena eman dakion ikastetxeari Gizarte Integrazioko Lanbide Heziketako goi mailako zikloa irakasteko.
Nafarroako Foru Komunitatean araubide orokorreko irakaskuntza ez-unibertsitarioa ematen duten ikastetxe pribatuak baimentzeko prozedura ezarri zuen uztailaren 6ko 251/1992 Foru Dekretuak 16. artikuluko e) letran ezarritakoaren ondorioz,
Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1.d) artikuluaren bidez eskuordetutako ahalmenak erabiliz, eta Hezkuntzako Azpiegituren Zerbitzuak proposaturik,
EBATZI DUT:
1. Iruñeko “Nafarroako Eskola Politeknikoa” Lanbide Heziketako ikastetxe pribatuaren (ikastetxearen kodea: 31014487) irekierarako eta funtzionamendurako baimena aldatzea, irakasgaien kopurua handitzeagatik. Izan ere, Gizarte Integrazioko Lanbide Heziketako goi mailako zikloa irakasten hasiko da, ondorioak dituela 2015/16 ikasturtetik aurrera.
2. Hezkuntza Departamentuko Unibertsitatez kanpoko ikastetxeen erregistroan ikastetxearen datu hauek inskribatzea, data horretatik aurrera:
–Izen generikoa: Lanbide Heziketako ikastetxe pribatua.
–Berariazko izena: Nafarroako Eskola Politeknikoa.
–Helbidea: Zaragozako etorbidea, 23
–Herria: Iruña.
–Udalerria: Iruña.
–Titularra: Escuela Politécnica Navarra, Sociedad Limitada Laboral.
–Osaera juridikoa:
a) Erdi mailako lanbide heziketa:
1. “Haur Hezkuntza” heziketa zikloa, “Gizarte eta Kultur Zerbitzuak eta Komunitatearentzako Zerbitzuak” lanbide arlokoa: 2 unitate, 1 lehenengo mailan eta 1 bigarren mailan, gehienez ere 40 ikaspostukoak.
b) Goi mailako lanbide heziketa:
1. “Mendekotasun Egoeran Dauden Pertsonentzako Arreta” heziketa zikloa, “Gizarte eta Kultur Zerbitzuak eta Komunitatearentzako Zerbitzuak” lanbide arlokoa: 4 unitate, 2 lehenengo mailan eta 2 bigarren mailan, gehienez ere 80 ikaspostukoak.
2. “Gizarte Integrazioa” heziketa zikloa, “Gizarte eta Kultur Zerbitzuak eta Komunitatearentzako Zerbitzuak” lanbide arlokoa: 2 unitate, 1 lehenengo mailan eta 1 bigarren mailan, gehienez ere 40 ikaspostukoak.
3. Ikastetxearen titularrak, ikasturtea hasi baino hilabete bat lehenago, “Gizarte Integrazioa” heziketa zikloko irakasleen izenen zerrenda aurkeztu beharko du Hezkuntza Departamentuko Hezkuntzako Azpiegituren Zerbitzuan, eta bertan zehaztuko du zer lanbide modulutan, Gizarte Integrazioko goi mailako teknikariaren titulua ezarri eta beraren gutxieneko irakaskuntzak finkatu zituen uztailaren 13ko 1074/2012 Errege Dekretuaren III C eranskinean zehaztutakoen artean, arituko den haietako bakoitza, betiere eranskin horretan modulu bakoitzerako ezarritako titulazioa edukiz gero, errege dekretu horren 12. artikuluaren 6. puntuan ezarritakoarekin osatuta. Zerrenda horrekin batera, titulazioen fotokopia konpultsatuak igorri behar dira, eta, hala balegokio, irakasle bakoitzak dituen ziurtagiriak ere bai. Horretaz gain, irakasle bakoitzak prestakuntza pedagogikoa eta didaktikoa duela dioten kasuan kasuko egiaztagiriak aurkeztu behar dira, Derrigorrezko Bigarren Hezkuntzako, Batxilergoko, Lanbide Heziketako eta araubide bereziko irakaskuntzarako prestakuntzen baldintzak zehaztu zituen azaroaren 8ko 1834/2008 Errege Dekretuak eskatu bezala.
4. Halaber, zikloaren programazio didaktiko bat igorri beharko du, Nafarroako curriculuma osatuta gelditu ondoren.
5. Ikastetxearen titularrak beharrezko baimena eskatu beharko dio departamentu honi osaeran edozein aldaketa eginez gero, Nafarroako Foru Komunitatean araubide orokorreko irakaskuntza ez-unibertsitarioa ematen duten ikastetxe pribatuak baimentzeko prozedura ezarri zuen uztailaren 6ko 251/1992 Foru Dekretuaren 16. eta 17. artikuluetan agertzen diren kasuetan.
6. Ikastetxeak duen baimena baliorik gabe uzten ahal da aurreko idatz-zatian aipatutako foru dekretuaren laugarren tituluan azaltzen diren kasuetan.
7. Ikastetxea Nafarroako Gobernuaren itunen araubidean sartzea “Gizarte Integrazioa” zikloa irakasteko, zein ebazpen honen bidez baimentzen baita. Ituna sinatzeko, itunen gaineko berariazko legedian xedatutakoari jarraikiko zaio.
8. Ebazpen honen aurka, gora jotzeko errekurtsoa jar daiteke, Hezkuntza Departamentuko kontseilariari zuzendua, jakinarazi eta biharamunetik hilabeteko epean.
9. Ebazpen hau Nafarroako Aldizkari Ofizialean argitaratuko da.
10. Ebazpen hau igortzea ikastetxearen titularrari, Hezkuntzako Ikuskapen Zerbitzuari, Lanbide Heziketaren Zerbitzuari, Hezkuntzako Azpiegituren Zerbitzuari, Ikastetxeen, Finantzaketaren eta Ikasketetarako Laguntzen Atalari, Obra Atalari eta Kontratazioaren, Zerbitzu Osagarrien eta Koordinazio Administratiboaren Atalari, eta Ikastetxeetako Informazioa Kudeatzeko Bulegoari.
Iruñean, 2015eko ekainaren 25ean.–Hezkuntza Baliabideen zuzendari nagusia, Iñigo Huarte Huarte.
Iragarkiaren kodea: F1509786