Iragarkia

154. ALDIZKARIA - 2015eko abuztuaren 10a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

EBAZPENA, 2015eko ekainaren 23koa, Arriskuen Prebentziorako eta Lanaren zuzendari nagusiak emana. Honen bidez erabakitzen da Zangozako Udalaren erakunde autonomo den San Vicente de Paúl zahar etxea entitatearen hitzarmen kolektiboa erregistratu, gordailutu eta Nafarroako Aldizkari Ofizialean argitaratzea.

Ikusirik Zangozako Udalaren erakunde autonomo den San Vicente de Paúl zahar etxea entitatearen akordio kolektiboaren testua (kode zk.: 31100010132015), funtzionarioei eta administrazio-kontratudunei buruzkoa, erregistro honetan 2015eko ekainaren 19an sartu zena eta Udaleko ordezkariek eta sindikatuetakoek 2015eko apirilaren 24an izenpetu zutena. Abuztuaren 30eko 251/1993 Legegintzako Foru Dekretuaren 84.3. artikuluan ezarritakoaren arabera (haren bidez Nafarroako Administrazio Publikoen zerbitzuko Langileen Estatutuaren Testu Bategina onetsi zen),

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Nafarroako Aldizkari Ofizialean argitaratzeko agintzea, denek jakin dezaten.

Iruñean, 2015eko ekainaren 23an.–Arriskuen Prebentziorako eta Lanaren zuzendari nagusia, Imelda Lorea Echavarren.

ZANGOZAKO UDALAREN ERAKUNDE AUTONOMO DEN SAN VICENTE DE PAÚL ZAHAR ETXEAREN ZERBITZUKO FUNTZIONARIOEN ETA ADMINISTRAZIO-KONTRATUDUNEN LAN BALDINTZEI BURUZKO AKORDIOA

2015. urtetik 2018. urtera

Zangozan, 2015eko apirilaren 24an.

INDIZEA

I. TITULUA

Aplikazio eremua

1. artikulua. Langile eremua.

2. artikulua. Iraunaldia.

3. artikulua. Hitzarmenaren osotasunarekiko lotura eta bermeak.

4. artikulua. Batzorde mistoa.

II. TITULUA

Antolaketa, lanbideen sailkapena eta mailak

5. artikulua. Antolaketa.

6. artikulua. Plantilla organikoa.

7. artikulua. Lanbide sailkapena.

8. artikulua. Mailak.

III. TITULUA

Lan baldintzei buruzko akordioak: lanaldia, asteko atsedenaldia, oporrak, lizentziak, baimenak, eszedentziak

9. artikulua. Lanaldia.

10. artikulua. Asteko atsedena.

11. artikulua. Oporrak.

12. artikulua. Lizentziak eta baimenak.

13. artikulua. Lanaldiaren murrizketa.

14. artikulua. Eszedentziak.

IV. TITULUA

Ordainsariak

15. artikulua. Ordainsariak.

16. artikulua. Jaiegunak, gaueko lana eta txandakako lana.

17. artikulua. Aparteko orduak.

V. TITULUA

Beste gai batzuk

18. artikulua. Laneko arropa.

19. artikulua. Eskubide sindikalak.

20. artikulua. Aseguruen poliza.

21. artikulua. Laneko osasuna eta segurtasuna.

22. artikulua. Aldi baterako ezintasuna.

23. artikulua. Prestakuntza plana.

24. artikulua. Diziplina araubidea.

1. eranskina.–Oinarrizko ordainsariak eta osagarri orokorrak.

2. eranskina.–Oinarrizko ordainsariak eta ordezko osagarriak.

3. eranskina.–Atzeraeraginezko ordainsariak.

4. eranskina.–Jaiegunak, txandakako lana eta gaueko lana.

5. eranskina.–Lanbide taldeen eginbeharrak.

I. TITULUA

Aplikazio eremua

1. artikulua. Langile eremua.

Zangozako Udalaren erakunde autonomo den San Vicente de Paúl zahar etxea (hemendik aurrera “zahar etxea”) entitatearen zerbitzuko funtzionarioen eta administrazio-kontratudunen lan baldintzak arautzen ditu akordio honek.

2. artikulua. Iraunaldia.

Hitzarmen kolektibo honek 2015eko urtarrilaren 1etik 2018ko abenduaren 31ra arteko indarraldia izanen du. Nolanahi ere, sinatuta onesten den egunean hartuko du indarra, nahiz ondorio ekonomikoek atzerako eragina izanen duten eta 2015eko urtarrilaren 1etik aplikatuko diren.

Akordio hau berritu dadin, indarraldia amaitu baino bi hilabete lehenago alderen batek salatu beharko du, berritu dadin edo, kasua bada, amaitu dadin. Inork ez badu behar den denboraz salatzen, urtez urte luzatuko da besterik gabe.

3. artikulua. Hitzarmenaren osotasunarekiko lotura eta bermeak.

Hitzarmen honetan itundutako baldintzek multzo banaezin bat osatzen dute, iraupen bermea dute, xede diren langileek zahar etxearekin duten erlazio juridikoarekiko independentea.

Hala, sinatzaileen edo besteren jarduketa baten ondorioz xedeko langileen funtzionario izaera galduko balitz, bai eta lan araubideko langile gisako kokatzea ere, akordio honetan zehaztutako baldintzei eutsiko zaie “Lanbide sailkapena”, “Ordainsariak”, “Lanaldia” eta “Lizentziak, baimenak eta eszedentziak” arloetan.

4. artikulua. Batzorde mistoa.

Batzorde paritario bat sortuko da, non zahar etxeko ordezkariek bertako funtzionarioek adina kide izanen baitituzte, akordio hau interpretatu, begiratu, zaindu eta garatzeko, liskarrak konpontzeko prozedura guztietan haiek aztertu eta haien gainean erabakitzeko, eta, behar denean eta bi aldeak ados daudenean, hitzarmen hau osatzeko.

Aholkulariek laguntzen ahalko diete bi alderdien ordezkariei. Eztabaidetan parte hartuko dute eta hizpidea izanen dute, baina botorik ez.

Batzorde Paritario horrek alderdietako edozeinek eskatuta eginen du bilera, desadostasunak izaten direnean (banakakoak edo taldekakoak), akordio honen nahiz aplikatzekoa den araudiaren bidez esleitzen zaizkion gaien interpretazioaren edo betetzearen gainean. Ebazpen bat hartu beharko du zazpi eguneko epean.

Planteatzen diren arazoak adostasunez konpondu beharko dira; bestela, egoki diren erakundeetan planteatzen ahalko dira.

Gatazkaren izaera dela-eta zahar etxean zerbitzua ematen duten lan araubideko langileen arloko konponbide bera izan behar denean, Batzorde Mistoak bilerak egin eta erabakiak har ditzake (bi aldeek adosten duten prozeduraren arabera), zahar etxeko lan araubideko langileen hitzarmen kolektiboko 1d) artikuluaren babesean eratutako Batzorde Mistoarekin.

II. TITULUA

Antolaketa, lanbideen sailkapena eta mailak

5. artikulua. Antolaketa.

Enpresari edo hark eskuordetutako norbaiti dagokio lana antolatzeko ahalmena. Egoki den antolaketa eginen da, akordio honetako baldintzak errespetatuz, baita aplikatzeko legeria ere, betiere zahar etxearen xedeak ahal bezain ongi bete daitezen. Horretarako, lana balioesteko, arrazionalizatzeko, lan egiteko metodo eta prozesuak hobetzeko eta lana errazteko, baita behar diren zerbitzuak eta alde kuantitatibo eta kualitatiboak ezartzeko ere, egoki jotzen dituen sistemak ezartzen ahalko ditu. Komeni den kasuetan, daukaten garrantzia dela-eta, aurretik langileen ordezkariekin hitz egin beharko da, eta/edo negoziatu, erregelamenduz hala xedatua dagoenean.

Lanaren antolaketak lanaren berariazko programak izanen ditu oinarri, eta bere baitan izanen du zerbitzuen eta haiei loturiko zereginen oinarrizko antolaketa. Langileek iradokizunak eta ekarpenak egin diezazkiokete enpresak planteatzen duen antolaketa sistemari.

6. artikulua. Plantilla organikoa.

Urtero, langileen ordezkariei kontsulta egin ondoren, behar den plantilla organikoa onetsiko da, legez ezarritako moduan.

7. artikulua. Lanbide sailkapena.

Funtzionario guztiak lanbide talde hauetako batean sailkatuko dira, lanpostuak betetzeko egindako deialdi publikoen arabera:

–1. taldea: OLT/EUD.

–2. taldea: zerbitzu orokorrak-arduraduna.

–3. taldea: zerbitzu orokorrak-sukaldaria.

–4. taldea: zerbitzu orokorrak.

8. artikulua. Mailak.

Funtzionarioek betetzen dituzten lanpostuetako eginbeharren, eginkizunen, zereginen eta arduren arabera, funtzionarioak dagokien mailean kokatuko dira, Nafarroako Administrazio Publikoen zerbitzuko Langileen Estatutuaren Testu Bateginak onartutako mailekin bat. Honela:

–2. taldea: zerbitzu orokorrak-arduraduna. Maila: C.

–4. taldea: zerbitzu orokorrak. Maila: D.

Maiatzaren 29ko 19/2013 Foru Legearen arabera bihurtu ziren funtzionario akordio honen langile eremuko langileak, eta foru lege horren 10. artikuluak berariaz xedatzen du honako hau: “Xedapen honetan ezartzen den prozeduraren bidez egiten den Nafarroako Administrazio Publikoen zerbitzuko Langileen Estatutuaren aplikazioak ez du ezein kasutan ekarriko interesdunari maila altuagorik esleitzea lan-kontratudun finko gisa kasuko administrazioan sartzeko eskatu zitzaion titulazioa baino, salbu eta legez ezarritako prozeduretako baten bitartez mailaz igo denean”.

Beraz, ukitutako langileei E mailako titulazioa eskatu zitzaienez lanpostura sartzeko, ezin zaizkie zuzenean D eta C maila profesionalak esleitu betetzen diren lanpostuei.

Disfuntzio hori zuzentzeko, aldeek honako hau adostu dute:

1. Legez egoki diren prozedurei hasiera ematea, ahal bezain laster –2016. urtea helburu izanik– lanpostuak eta betetzen dituzten funtzionarioak D edo C mailetan, egoki dena, koka daitezen, betetzen diren eginkizunen arabera. Ahal dela, “lanposturik gehitzen ez duten igoeren” bidez gauzatuko dira prozedura horiek. Prozedurak martxan jartzeko, kontuan hartuko da ea horietan parte hartzeko eskatzen diren titulaziorik eta/edo antzinatasunik baden.

2. Behar den mailari atxikitzea posible ez denean, edo legezko mugen arabera berandutzeak gertatzen badira, lanpostuko osagarrien ehuneko egokiak aplikatuko dira betetako eginkizunak diruz ordaintzeko. Hala, helburuko mailako posturako ezarritako ordainsari gordin berberak kobratuko dituzte ukitutakoek.

III. TITULUA

Lan baldintzei buruzko akordioak: lanaldia, asteko atsedenaldia, oporrak, baimenak, eszedentziak

9. artikulua. Lanaldia.

Oro har, 1.592 orduko lanaldia izanen da urtean, lanaldi osoan.

Ezartzen da 20 minutu daudela kafea edo ogitartekoa hartzeko. Benetan lan egindako denboratzat joko dira. Horietan ez da zerbitzu edo egoiliar bat ere utziko arretarik gabe. Horretarako, txanda bakoitzeko langile guztiek ez dute batera hartuko atsedenaldia.

Orduak kontrolatzeko, enpresak erloju bat paratu du, sartzeko eta ateratzeko ordua erregistratzeko eta presentzia kontrolatzeko. Nahitaez erabili behar da, bai sartzean bai ateratzean, laneko arropa jantzita, eta ez kalekoa.

Baldintza horietan aldaketarik gertatzen bada, goitik edo behetik, urteko lanaldiaren konputuan, enpresak eta langileak negoziatuko dute hurrengo urteko lanaldia handitzea edo murriztea.

Lanaldiaren urteko konputuaren ondorioetarako, kontuan hartuko da urtean zehar egindako ordu aldaketa.

Lan egindako jaiegunak hartzeko egutegia finkatu ondoren, egunen bat aldatu behar bada ezinbesteko kasu batean, betiere hura sortzen duen arrazoia langileen ordezkariari jakinarazita, enpresak 25,00 euro eguneko ordainduko dizkio aurreikusita egon gabe zerbitzuak betetzen dituen langileari, egutegia aldatzeagatik, eta atseden egun bat emanen dio beste egun batean, zeina enpresaren eta ukitutako langilearen artean zehaztu beharko baita.

10. artikulua. Asteko atsedena.

Langileek eskubidea izanen dute bi eguneko atsedenaldi etenik gabea hartzeko.

11. artikulua. Oporrak.

Funtzionario eta administrazio-kontratudunek, jardunean dauden urte oso bakoitzean, hogeita zazpi lanegunetako opor ordainduak izanen dituzte; bestela, lan egindako denbora gutxiago bada, proportzioan dagokiena emanen zaie oporretan.

Langile guztiek zehaztuko dute, urte bakoitzeko urtarrilaren 31 baino lehenago, zein egunetan hartu nahi dituzten oporrak. Bi epetan izanen da: horietako bat 14 lanegunekoa izanen da eta bestea 13 lanegunekoa. Horretaz gain, beste hirugarren bat ere egonen da, lan egindako jaiegun ofizialak bilduko dituena.

Enpresa saiatuko da langileek eskatutako epeak errespetatzen, betiere zerbitzuaren beharrak aseturik gelditzen badira. Urte bakoitzeko otsailaren 16a baino lehenago emanen du erantzuna.

Urtean txandaka hartuko dira, enpresan izandako antzinatasuna abiapuntu hartuta. Antzinatasun bera izanez gero, zozketa bat eginen da ukitutako langileen artean.

Oporrak batera hartzen dituzten langileen kopurua ez da lan txanda bakoitzeko plantillaren %50etik gorakoa izanen, lanbide talde bakoitzean.

Opor gisa konputatutako atsedenaldiak errespetatuko dira, oporretan ordezkapenak egiten dituzten langileek dagozkien atsedenaldiak izan ditzaten.

Behin-behineko langileek oporrak eska ditzakete kontratua hasi eta 6 hilabete iraganda.

Zerbitzuaren funtzionamendua bermatzeko, gainerako langileen lanak berrantolatuko dira, lan ordutegiari eutsiz.

Beharrezkoa bada langileen lanak eta txandak aldatzea, batera gertatzeagatik aldi baterako ezintasunak, baimen ordainduak, norberak hartzeko egunak, oporrak eta abar, arduradunak aldatuko ditu, zerbitzuaren funtzionamendua ziurtatzeko.

Oporrak hartzeko unean, langilea aldi baterako ezintasun batean badago, medikuak alta ematetik aurrera hartuko dira oporrak, ahal delarik, errespetatu behar baita oporrak une horretan hartu behar dituztenen txanda.

Modu berean jokatuko da aldi baterako ezintasuna laneko istripu batengatik edo amatasunarengatik denean.

Oporrak arautzeari dagokionez artikulu honetan arautu ez diren alderdiei dagokienez, otsailaren 9ko 11/2009 Foru Dekretuan xedatutakoari jarraituko zaio, edo hura ordezten duen arauari. Nafarroako Administrazio Publikoetako funtzionarioen opor, lizentzia eta baimenen Erregelamendua onetsi zen aipatutako foru dekretuaren bidez, eta urtarrilaren 23ko 5/2013 Foru Dekretuaren bidez aldatu (2013ko 22. Nafarroako Aldizkari Ofizialean argitaratua, otsailaren 1ean).

12. artikulua. Lizentziak eta baimenak.

Lizentzia eta baimenen arloan, otsailaren 9ko 11/2009 Foru Dekretuan xedatutakoari jarraituko zaio, edo hura ordezten duen arauari. Nafarroako Administrazio Publikoetako funtzionarioen opor, lizentzia eta baimenen Erregelamendua onetsi zen aipatutako foru dekretuaren bidez, eta urtarrilaren 23ko 5/2013 Foru Dekretuaren bidez aldatu (2013ko 22. Nafarroako Aldizkari Ofizialean argitaratua, otsailaren 1ean).

Orobat, honako lizentzia eta baimen hauek aitortuko dira:

a) Eritasun larria: 3 egun, bigarren gradura arteko odol-ahaidetasun edo ezkontza-ahaidetasuneko ahaideen kasuan. Arrazoi horregatik langileak lantokitik 100 km-tik gorako bidaia egin behar badu, 4 egun.

Eritasun larria izanen da ahaidea ospitale batean sartzea eta hartan gutxienez 24 ordu egotea ekartzen duena.

Lizentzia hori edozein unetan har daiteke, betiere ahaidea ospitaleraturik baldin badago.

Beste baimen ordaindu bat ezin izanen da eman harik eta hilabete bat, gutxienez, iragan arte subjektu eragile beragatik eta arrazoi beragatik lehenago emandako beste baimen bat bukatzen denetik.

b) Medikutara joatea odol edo ezkontza bidezko lehen mailako ahaideekin (gurasoak, seme-alabak). Gehienez ere 12 ordu urtean.

c) Azterketara joatea, enpresaren hautaketa deialdietan.

d) Langileek lizentzia ordaindugabe bat eska dezakete, zio pertsonalak direla eta, hilabete 1etik 3ra bitartekoa, urte natural bakoitzaren barruan.

13. artikulua. Lanaldiaren murrizketa.

Lanaldia murrizteari dagokionez, Nafarroako administrazio publikoetako funtzionarioen lanaldiaren murrizketa arautzen duen apirilaren 4ko 27/2011 Foru Dekretuari jarraituko zaio.

14. artikulua. Eszedentziak.

Eszedentzien arloan, Nafarroako Administrazio Publikoen zerbitzuko Langileen Estatutuaren testu bategina onesten duen abuztuaren 30eko 251/1993 Legegintzako Foru Dekretuan xedatutakoari lotuko zaio, edo hori ordezten duen arauari, baita hura garatzen duten arauei ere.

IV. TITULUA

Ordainsariak

15. artikulua. Ordainsariak.

Ordainsariak zehazteko, Nafarroako Administrazio Publikoen zerbitzuko Langileen Estatutuaren testu bategina onesten duen abuztuaren 30eko 251/1993 Legegintzako Foru Dekretuaren 39. artikulutik 55. artikulura bitartean xedatutakoari lotuko zaio, edo hori ordezten duen arauari.

Zahar etxeko funtzionarioen ordainsariak hauek izanen dira: uztailaren 4ko 158/1984 Foru Dekretuaren bidez onetsitako Ordainsarien Behin-behineko Erregelamenduan maila bakoitzerako oro har ezarritakoak eta aplika daitezkeen gainerako xedapenetan kasu bakoitzerako ezartzen direnak, eta, horretaz gain, plantilla organikoan lanposturako onetsitako osagarriak.

Bi aldeek erabaki dute, 2015. urtetik 2018. urte bitarteko ekitaldi ekonomikoetarako, 1. eranskinean zehazten diren oinarrizko ordainsari eta osagarriak aplikatzea.

Akordio honen 7. artikuluan ezarritakoarekin bat, akordioko edozein ekitaldi ekonomikotan langile bat ezin bada kokatu adostutako erreferentziako mailan, 2. eranskinean zehazten diren oinarrizko ordainsari eta osagarriak jasoko ditu, edo behar direnak, halako moduz non ordainsari gordinak izanen diren beren mailan sailkatutakoek jasotzen dituztenen adinakoak.

Aipatutako mailako soldatak urtero egokituko dira, erregelamenduz maila bakoitzerako zehazten denarekin bat.

Funtzionario bihurtu zirenetik akordio hau sinatu arte akordio honen xede diren funtzionarioek behar ez bezala jasotako ordainsariak –3. eranskinean zehazten dira– 2015eko maiatzetik abendurako nominetan ordainduko dira, zenbateko berberetan.

16. artikulua. Jaiegunak, gaueko lana eta txandakako lana.

Hirugarren eranskinean zehazten den konpentsazioa jasoko dute funtzionarioek jaiegunengatik, gaueko lanarengatik eta txandakako lanarengatik.

17. artikulua. Aparteko orduak.

Guztiz debekaturik dago aparteko orduak egitea, ezinbesteko kasuan ez bada.

Salbuespeneko kasuetan egin daitezke aparteko orduak; halakoetan, ordu arruntaren balioa %75 handituta ordainduko zaio langileari, edo ordu horiek hartuko ditu, beraren hautura.

V. TITULUA

Beste gai batzuk

18. artikulua. Laneko arropa.

Enpresa behartuta dago laneko arropa eta oinetako egokiak ematera.

Urte bakoitzeko urrian, enpresak lanerako behar den arropa egokia banatuko die langileei, kontuan hartuta bakoitzaren jarduera, lanpostua, etab. Ondoko jantziak emanen dira:

–Praka eta ator zurien jokoa (aurreikusitako iraupena: 6 hilabete).

–Oinetako egokiak (aurreikusitako iraupena: urte bat).

–Berogarriak (beharraren arabera).

–Latexezko edo binilozko eskularruak (beharraren arabera).

–Mandarrak (sukaldeko langileentzat, beharraren arabera). Behin-behineko langileei lan denboraren proportzioan emanen zaizkie jantziak.

Jantziak edo oinetakoak itzuli beharko dira berriak jasotzeko.

Langile batek zahar etxea uzten badu, eman zaizkion arropa eta oinetakoak itzuli beharko ditu.

Enpresan garbitu eta lisatuko dira jantziak.

Debeku da laneko uniformeak aldatzea. Emandako formatuan erabili behar dira, piezak moztu gabe.

Ez da etxetik atera behar uniformea jantzita, ezta zahar etxetik ere, lanaldia bukatutakoan.

19. artikulua. Eskubide sindikalak.

Langileen ordezkariak horien titularrak izanen dira, eta unean-unean indarra duen araudian aitortutako eskubide sindikalak balia ditzakete; ordu kreditua meta daiteke, hala behar izanez gero, urteko gehieneko mugaraino, betiere aldez aurretik enpresari eskatuta.

20. artikulua. Aseguruen poliza.

Enpresak poliza bat sinatuko du aseguru konpainia batekin, istripuak estaltzeko, langileak asegurudun eta onuradun gisa ezarrita. Ondokoa da aseguratutako kapitala:

–Heriotzaren kasuan, lanez kanpoko istripu baten ondorioz: 30.000,00 euro.

–Baliaezintasun iraunkor absolutuaren kasuan, lanez kanpoko istripuaren ondorioz: 30.000,00 euro.

Udalaren plantillako langileendako aseguru bat kontratatuko da istripuetarako, lanaldiko ordutegirako edo “in itinere” kasurako, ondoren adierazten diren zenbatekoak:

–Berrogeita hamazazpi mila euro (57.000,00 euro), heriotzaren kasuan eta,

–Ehun mila euro (100.000,00 euro), baliaezintasun osoaren nahiz partzialaren kasuan, baita ezintasun iraunkor absolutuaren edo osoaren kasuetan ere.

Langile batek estalduretako bat inplementatu nahi duenean, adierazitako estalduren eta ezarritakoen arteko aldearen %50 hartuko du bere gain, eta Zangozako Udalak hartuko du bere gain gainerako %50a.

21. artikulua. Laneko osasuna eta segurtasuna.

Arlo horretan, enpresako zuzendaritzak eta langileen ordezkariek beren gain hartzen dute unean-unean indarra duen araudia betetzeko eta betearazteko eginbeharra, laneko arriskuak prebenitzeari eta osasuna zaintzeari dagokienez; horretarako, konpromisoa hartzen dute, nork bere neurrian, araudi horretako eskubideei eta betebeharrei heltzeko.

Zahar etxeak zerbitzuaren enpresa esleipen-hartzaileari eskatuko dio laneko arriskuei buruzko egungo azterlana aldatzeko, beharrezko eguneraketak egiteko, prestakuntzaren eta prebentzioaren aldetik, eta laneko segurtasuna eta osasuna hobetzeko neurriak aplikatzeko.

Enpresa esleipen-hartzaileak konpromisoa hartuko du langileen legezko ordezkariei jakinarazteko arlo horretan egiten dituen jarduketa guztiak, eta, aldi berean, haien elkarlana eskatuko die, elkarren betebeharrak konplitzeko.

22. artikulua. Aldi baterako ezintasuna.

Akordio honek ukituriko langileek, aldi baterako ezindurik dauden bitartean, edozein delarik desgaitasun horren zergatikoa, Gizarte Segurantzaren prestazioaz gain, osagarri bat kobratuko dute, ohiko soldataren % 100 berdindu arte, egoera hori gaixo-agirien eta berrespen ofizialen bidez frogatzen duten denboran, senda-agiria hartu arte.

Haurdunaldiko eta amatasuneko arriskua dagoenean, langilearen soldataren %100 bermatzen da, indarreko araudiarekin bat.

23. artikulua. Prestakuntza plana.

Ikasketa akademikoak eta lanbide prestakuntza edo hobekuntza arlokoak maiz egiten dituzten langileek lehentasuna dute oporrak eta lan txandak aukeratzeko, bai eta lanaldi arrunta egokitzeko ere ikastaroetara eta azterketetara joan daitezen, betiere laneko premiak eta antolaketak horretarako bide ematen duten neurrian.

Era berean, zerbitzuaren kudeaketagatik eta lanaren antolaketagatik posible denean, honakoa erabaki daiteke:

–Urtean gehienez ere berrogei orduko baimen ordainduak ematea lanbide prestakuntza eta hobekuntzako ikastaroetara joateko, haien edukia zuzenean lanpostuari lotua bada. Enpresak eskainiko ditu ikastaroak eta arduratuko da ikastaroetara joan daitezkeen langileak joateko antolaketaz. Langileek proposa dezakete ikastaroak egitea. Lanorduetan eginen dira, ahal delarik. Hura posible ez bada, haietan emandako orduak diruz edo denboraz konpentsatuko dira.

–Baimenak ematea unibertsitatean 25 urtetik gorako enplegatuak sartzeko proba prestatzeko. Denboraren erdia langilearen kontura izanen da eta beste erdia enpresaren kontura.

Kasu guztietan, ikastaroan agertu dela eta aprobetxatu duela frogatzen duen agiria aurkez dezala eskatuko dio enpresak langileari.

24. artikulua. Diziplina araubidea.

Langile guztiak, salbuespenik gabe, agintzen zaizkien eginkizunen erantzule izanen dira enpresaren aurrean, bai eta euren jokabideen erantzule ere, eta lan hitzarmen kolektibo honetan eta aplikatzekoak diren legeetan ezarritako aginduak eta neurriak beteko dituzte, galarazi gabe kasuan-kasuan izan dezaketen erantzukizun zibila nahiz penala.

Hutsegitetzat hartauko dira hitzarmen honek ezarritako betebeharren kontrako egintzak edo ez-egiteak edo indarra duten legezko xedapenek agindutakoaren kontrakoak.

Enplegatuei hutsegite larriengatik edo oso larriengatik ezartzen zaizkien zehapenak langileen legezko ordezkariei jakinaraziko zaizkie.

Enpresak zehapenak jartzen ahal dizkie langileei, ondorengo artikuluetan ezarritako hutsegiteen eta zehapenen mailaketari jarraikiz.

Hutsegiteen mailaketari dagokionez, aipatu behar da langile baten hutsegitea arina, larria edo oso larria izan daitekeela, haren garrantziaren eta asmoaren arabera.

Hutsegite arinak:

–Eginkizunak berandu edo zabarkeriaz betetzea, hala nola enpresaren lokalak, baliabideak edo produktuak behar ez bezala erabiltzea edo arreta gabezia txikiak materialak edo dokumentuak zaintzean, salbu eta haien larritasuna dela eta, hutsegite larritzat har daitezkeenetan.

–Lanera ez agertzeko arrazoia aurretik ez jakinaraztea edo, bestela, hutsegitea gertatu eta ondoko 24 orduan, ezinbestekoetan salbu, hartarako ezintasuna frogatu ezean.

–Bidezko arrazoirik gabe, hilabete baten barnean behin, bitan edo hirutan berandu iristea.

–Lanetik edo zerbitzutik alde egitea bidezko arrazoirik gabe, denbora laburrerako bada ere. Horren ondorioz enpresari edo lankideei nolabaiteko kalterik sortzen bazaio edo istripuren bat eragiten bada, hutsegite hau larritzat edo oso larritzat har daiteke, kasua nolakoa den.

–Norbere garbitasun eta txukuntasunik eza.

–Helbidea, bizilekua, telefonoa edo familiaren egoera aldatu eta enpresari ez jakinaraztea, aldaketa horiek zerga arloko edo Gizarte Segurantzarekiko betebeharren ondorioetarako garrantzitsuak badira.

–Lanaldiaren barrenean, sakelako telefonoa norberaren aferetarako erabiltzea.

–Aurikularrak erabiltzea irratiekin edo beste sistema batzuekin.

–Arauzko uniforme osoa ez erabiltzea lanaldiaren barnean.

–Jendea edo egoiliarrak behar den adeitasunez eta arretaz ez atenditzea.

–Lankideekin bortizkeriaz eztabaidatzea lanaldiaren barruan edo ordena nahastea egoiliarren aurrean.

–Hilabetean egun batez lanera ez agertzea, bidezko arrazoirik gabe.

Hutsegite larriak:

–Eginkizunak berandu edo zabarkeriaz betetzea, hala nola enpresaren lokalak, baliabideak materialak edo dokumentuak behar ez bezala erabiltzea, haien larritasuna dela eta. Nahitaez erabili beharreko jantziak eta segurtasun tresnak ez erabiltzea.

–Bidezko arrazoirik gabe hogeita hamar eguneko aldian hiru aldiz baino gehiagotan lanera berandu iristea.

–Lanera ez joatea, egun batetik hiru egunera bitarte, arrazoia justifikatu gabe, hogeita hamar eguneko epean; hura ez jakinaraztea eta baja agiri ofiziala ez aurkeztea hura egin eta hurrengo berrogeita zortzi orduko epean, non ez den frogatzen hura egitea ezinezkoa dela. Hutsegite bakar bat nahikoa izanen da lankide bati erreleboa hartu behar dionean edo enpresari kalte nabaria egiten zaionean.

–Lanaldian jostetan ibiltzea.

–Lanpostua uztea, bidezko arrazoirik gabe.

–Nagusiei edozein lanetan desobeditzea, lana arrazionalizatzeko metodo berriei gogor egitea eta trabak jartzea barne. Diziplina hautsi dela nabarmen ikusten denean edota jokabide horrek enpresari kalte nabaria sortzen dionean, hutsegite oso larritzat jotzen ahalko da.

–Beste langile baten presentzia lanean simulatzea, haren ordez fitxatuz.

–Enpresako denbora, uniformeak, materialak, produktuak edo materialak enpresaz kanpoko lanetarako edo norberaren onerako erabiltzea.

–Zabarkeriaz edo utzikeriaz aritzea lanean, haren martxa onaren kaltetan.

–Lanean ari dela erretzea edo alkoholezko edariak edatea.

–Agintekeria edo errespeturik ez agertzea erabiltzaileei, edozein kategoriatako lankideei eta ahaideei eta haietako edozeinen laguntzaileei, edo enpresarekin harremanetan dagoen beste edozeini.

–Enpresak emandako sakelako telefonoa ez hartzea arrazoirik gabe.

–Egoiliarrak arretarik gabe uztea eta laguntza behar duten egoiliarrekin ez egotea une oro zentroan barna ibiltzen direnean.

–Laurogeita hamar eguneko epe batean beste hutsegite arin bat egitea (puntualtasuna salbu), nahiz desberdina izan, baldin langileari hitzezko kargu hartzea ez den zigorra jarri izan bazaio.

Hutsegite oso larriak:

–Bidezko arrazoirik gabe sei hilabetean hamar aldiz edo gehiagotan, edo urtean hogei aldiz, berandu iristea.

–Lanera hiru egun jarraian baino gehiagotan huts egitea edo bost egun tartekatutan hilabete batean, bidezko arrazoirik eman gabe.

–Kontratuko onustea haustea, eta iruzurra, desleialtasuna edo konfiantza-abusua agindu zaizkion kudeaketetan.

–Zahar-etxeko egoiliar baten prozesu patologikoaren, haren barru-barruko kontu baten edo indarreko legeek babesten duten beste edozein datu pertsonalen berri ematea.

–Hitzezko eta egitezko tratu txarrak ematea, psikikoak edo moralak, egoiliarrei, edozein kategoriatako lankideei edo haien ahaideei eta laguntzaileei, baita enpresarekin harremanetan dagoen beste edozein pertsonarekin ere.

–Zentroko egoiliarrengandik onura ekonomikoak nahiz gauzazkoak, eskatu, galdatu edo lortzea.

–Zentroaren, egoiliarren edo langileen gauzak, dokumentuak, materiala, etab. harentzat hartzea.

–Eritasun edo istripu itxurak egitea. Hutsegitea dela ulertuko da langilea, arrazoi horiengatik bajan egonik, beste edozein lanetan aritzen denean, norberaren kontura edo besteren kontura. Atal honetan sartzen da istripuaren edo eritasunaren ondoriozko baja luzatzeko egiten den trikimailu oro.

–Beste pertsona bat zerbitzuan aritzeko jartzea enpresaren baimenik gabe.

–Zabarkeria medikazioa ematerakoan eta/edo prestatzerakoan, edo egoiliarraren osasunean edo osotasunean ondorioak ekartzen dituen beste edozein.

–Lanorduetan mozkortzea eta drogak hartu ondoko egoeran egotea. Langilea aipatu egoeretan dagoelako zantzuak ageri direnean, enpresako osasun zerbitzuak edo, bestela, enpresak izendatzen duen medikuak egin beharreko azterketa onartu beharko du. Azterketa horiek egitean langilearen duintasuna eta intimitatea ahalik eta gehien errespetatuko da eta bertan egonen da langileen legezko ordezkari bat edo, hori lantokian ez badago, enpresako beste langile bat, ahal izanez gero betiere.

–Sexu jazarpena eta jazarpen morala. Enpresako edozein pertsonaren aurkako sexu erasoak, hitzezkoak zein egitezkoak; aparteko larritasuna izanen dute aginte edo hierarkia posizioaz baliatuz gauzatzen direnek, aldi baterako kontratua dutenen aurka egiten direnek eta haiek salatu dituzten pertsonen aurka hartutako mendekuek.

–Enpresaren korrespondentzia edo isilpeko dokumentuen sekretua haustea edo enpresakoa ez den bati isilpean eduki beharreko datuak ezagutaraztea.

–Lantokian diziplinarik ez izatea.

–Enpresari bidegabeko lehia egitea zenbait ekintzaren bidez.

–Istripu larriak sorraraztea zuhurtasunik gabe edo zabarkeriaz jokatzeagatik.

–Lan errendimendua arrazoirik gabe gutxitzea.

–Lanean segurtasun eta osasunerako ezarritako arau eta neurriak ez betetzea edo bertan behera uztea, horren ondorioz osasunerako eta integritate fisikorako arriskuak sortzen ahal direnean.

–Lankideekin liskarrak sortzea.

–Gauzak, dirua eta abar ebatsi edo lapurtzea, enpresarenak zein egoiliarrenak edo enplegatuenak, kasuan kasuko akzio penalak ezertan galarazi gabe.

–Hiruhileko berean hutsegite larri gehiago egitea, nahiz desberdinak izan, zehapena jaso badute.

Zehapenak

Hutsegite arinengatik:

–Hitzezko kargu-hartzea.

–Kargu-hartze idatzia.

–Egun bateko enplegu-soldaten etenaldia.

Hutsegite larriengatik:

–Bi egunetik hogeira bitarteko enplegu-soldaten etenaldia.

–Beste lanpostu batera aldatzea, zentro berean.

Hutsegite oso larriengatik:

–Hogei egunetik hirurogeira bitarteko enplegu-soldaten etenaldia.

–Enpresa beraren beste zentro batera nahitaez aldatzea, helbidez aldatzera behartu gabe.

–Kaleratzea.

Preskripzioa:

–Hutsegite arinak: 10 egun.

–Hutsegite larriak: 20 egun.

–Hutsegite oso larriak: 60 egun.

Horiek guztiak enpresak gertaeren berri izaten duenetik eta, betiere, gertatu eta handik sei hilabetera.

5. ERANSKINA

Lanbide taldeen eginkizunak

1. taldea.–OLT/DUE.

–Egoiliarrei harrera egitea eta haiek ezagutzea, erizaintzako arretaren errekerimendu berariazkoak zehaztea eta beharrak baloratzea, edo gainerako langile egokiengana eramatea.

–Egoiliarrak zaindu eta artatzea, haien beharrizan pertsonal eta sanitarioak asetzeko, bereziki, OLT-EUDen zerbitzuen beharra duten uneetan.

Egoiliarren eboluzioaren jarraipena egitea eta proposatzea zer laguntza maila eta mota jaso behar duten; eguneroko sendaketak egitea eta abar.

–Egoiliar bakoitzaren historial medikoa eta erizaintzakoa ireki, zaindu eta eguneratzea. Bere eginkizunekin zerikusia duten datuak idaztea.

–Odol-presioa, pultsu-maiztasuna eta tenperatura neurtzea.

–Eritasunaren ondorioz ohean dauden egoiliarrak zaintzea, agindutako jarrera-aldaketak eginez, erientzako janari zerbitzua kontrolatuz, eta tresnen bidez elikatu behar diren eriei elikagaiak emanez.

–Zaintzako neurriak mantentzea kontrol jarraituko egoiliarren gainean, edozein gorabeheraren berri emanez.

–Sendagilearekin elkarlanean aritzea erabili beharreko materiala eta medikamentuak prestatuz eta haren aginduei kasu eginez, zahar etxean bisita egiten duenean.

–Egoiliarren kanpoko zein barruko kontsultak kontrolatzea, hitzorduak kontrolatzea.

–Menuen jarraipena egitea. Sukaldean zehaztapenak egitea zerbitzu bakoitzean prestatu beharreko menuen inguruan eta haien aldaketen inguruan. Aldaketak egoiliarrei jakinaraztea.

–Kontrola eta laguntza jantokian, hala behar izatera, baita egoiliarren kontaketa ere gosariaren, bazkariaren eta afariaren orduetan.

–Egoiliarrei medikazioa prestatu eta ematea, sendagileen aginduen arabera (batik bat tratamenduak). Farmaziei jakinaraztea agindu mediko bat aldatzen denean, eta atzemandako edozein gorabeheraren berri ematea.

–Farmaziako, analitikako eta erradiologiako eskariak egitea.

–Medikamentuak, osasun eta farmazia materialak, pixoihalak eta abar eskatu, jaso, gorde, kontrolatu eta ateratzea.

–Egoiliarren garbitasuna kontrolatzea, baita logeletan dituzten sendagaiak eta janariak ere.

–Podologiako zerbitzua antolatu eta kontrolatzea.

–Fisioterapeutekin elkarlanean aritzea jardueretan.

–Egoiliarren bisita medikoak antolatzea.

–Bisita medikoen hitzorduak biltzea erizaintzan.

–Egoiliarrei bisita medikoak jakinaraztea (eguna, ordua, arrazoia, egin beharreko probak, baraurik joan behar duten, edo bestelako zehaztapenak). Aurreko egunean jakinaraztea.

–Gainerako langileei jakinaraztea, dutxa, gosaria eta abar antolatzeko.

–Egin beharreko bisitak egoiliarrengan interesa agertzen duten ahaideei edo joan-etorrietan laguntzen dituztenei jakinaraztea. Bisitaren eguna, ordua eta tokia behar bezain garaiz jakinaraztea.

–Bisitetarako beharrezko dokumentazioa prestatzea, kontsultaren jakinarazpenaren kopia emanez, hura behar izanez gero.

–Ahaideek ezin badute egoiliarra lagundu, horren berri emanen zaie joan-etorriez arduratzen diren langileei, behar bezain garaiz hura antolatzeko.

–Bisita medikoaren ondoren, ahaideei jakinaraztea horren emaitzak.

–Egoiliarren ahaideei edo tutoreei arreta eta informazioa ematea egoera larrietan eritasuna, heriotza, medikuarenganako joan-etorriak, ezbeharrak, erorikoak, emaitza medikoak eta abar direla eta.

–Horretarako, fitxategia eguneratuta edukiko da beharrezko abisuak jaso behar dituzten ahaideekin.

–Zahar etxean egiten diren jarduera orokorretan parte hartzea.

–Egoiliarrari eta familiar erizaintza zerbitzu egokiak ekartzen dizkieten prozedurak, arauak eta protokoloak prestatzean laguntzea.

–Zerbitzu orokorretako langileen jarraipenean eta ebaluazioan parte hartu eta laguntzea.

–Ordutegirako prestasuna.

–Beste eginkizun batzuetan laguntzea, une jakin batzuetan.

–Aurretik aipatu ez diren beste eginkizun edo jarduera batzuk, lanpostuarekin zerikusirik badute.

2. taldea.–Zerbitzu orokorrak-arduraduna.

–Lanak esleitzea zerbitzu orokorretako langileei eta haiek egiten dituzten begiratzea.

–Zerbitzu orokorretako langileak ordeztea, nor bere lanpostuan, une jakin batzuetan haietatik kanpo daudenean. Langilerik ez dagonean, lanpostuak altan dauden beste langileekin betetzea, behin-behineko langilerik kontratatzerik ez dagoenean kasuan kasuko ordezkapenetarako.

–Zerbitzu orokorretako langileei laneko arropa eta oinetakoak berriz ematea, zuzendaritzarekin elkarlanean.

–Langile guztien eta tokietako higiene erabatekoa begiratzea.

–Gelak eta gainerako lekuak gainbegiratzea, baita larrialdien abisurako sistemak ere.

–Egoiliarren jantzi pertsonalak eta arropa zuria jaso, garbitu, lisatu eta banatzeko ardura, eta jantzi pertsonala eta arropa zuria konpondu eta markatzekoa.

–Baimenik ez dutenei sukaldean eta despentsan sartzen ez uztea.

–Garbiketa eta higiene produktuen, tresnen, arropa zuriaren eta beste batzuen hornidura eskatu, jaso, bildu eta izakinak eta irteerak kontrolatzea.

–Elikagaien bilketa antolatzea Nafarroako Elikagaien Bankuan edo beste toki batzuetan.

–Telefono bidezko komunikazioak.

–Mezularitza.

–Instalazioetako mantentze-lanak, hainbat konponketa eginez eta hainbat elementu berriro jarriz.

–Eraikina, sarbideak eta giltzak zaintzea.

–Egoiliarrek arduradunari jakinaraziko dizkiote beren geletan edo gainerako toki eta instalazioetan atzemandako arazoak.

–Erabiltzaileei informazioa ematea gai arruntei buruz (helbideak, ordutegiak, jarduerak, ekitaldiak, menuak eta antzekoak).

–Bisiten kontrola eta harrera.

–Egoiliarrak, langileak eta, oro har, zentroan dauden pertsona guztiak behar den begiruneaz eta gizatasunaz tratatzea.

–Egoiliarren lekualdaketak antolatzea, bere baliabideak zein zentroaren kanpoak erabiliz.

–Informazioa ematea eta areagotzea egoiliarren parte-hartzea zahar etxeko eta inguruneko bizitza sozialean eta jarduera sozial eta kulturaletan, artistikoetan eta jolastekoetan, barnekoak zein kanpokoak izan.

–Zaletasunak sortzeko eta garatzeko orientazioa eta sostengu pertsonala, egoiliarrek aisialdia benetan okupatuta izan dezaten.

–Ordutegirako prestasuna.

–Lanpostuarekin zerikusia duten prestakuntza ikastaroetara joatea, hala ezartzen bazaio.

–Lanbide isilpekotasuna betetzea, aplikazio guztietan bete ere.

–Beste eginkizun zehaztu gabe batzuk, lanpostuarekin zerikusirik badute.

3. taldea.–Zerbitzu orokorrak-sukaldaria.

–Jatekoak prestatzea, finkatuta dauden menu eta dieten arabera.

–Sukaldeari atxikitako langileak antolatzea.

–Menuak proposatu behar direnean laguntza ematea.

–Legez ezarritako kontrolak egitea.

–Despentsa egunero zaintzea eta izakinen egoera gainbegiratzea. Dauden izakinak kontatzea, beharrezkoak diren gaiak eskatzeko.

–Janariak egoki administratzen saiatzea, etekin hobea lortzeko.

–Hornitzaileei eskaerak egitea.

–Baimenik ez dutenei sukaldean eta despentsan sartzen ez uztea.

–Sukaldeko gorabeheren berri ematea.

–Sukaldean lan egiten dutenen higienea zaintzea.

–Sukaldeko makinak eta tresnak funtzionamendu eta garbiketa baldintza egokietan dauden begiratzea eta hala mantentzen laguntzea (erretiluak, suak, labea, frijigailuak, erauzgailuak, iragazkiak, ebakitzaileak, eltzeak, etab.).

–Betiere, garbi eta txukun ibiliko dira, eta uniforme egokia jantziko dute.

–Esleitzen zaizkion eginkizun guztiak, lanpostuarekin zerikusia badute, zehaztuta ez badaude ere.

4. taldea.–Zerbitzu orokorrak.

–Egoiliarrak garbiketa pertsonalean laguntzea eta zaintzea, baita behar fisiologikoetan eta itxura pertsonalean ere.

–Erizainei laguntzea egoiliarrei botikak ematean eta sendaketak egitean.

–Eri ezinduei janaria banatzea eta bakarrik baliatzen ez direnei jaten ematea.

–Egoiliar ohatuei jarrera aldatzea; behar dutenak jaikiaraztea eta etzanaraztea.

–Oheak egin eta aldatzea; zahar etxeko eta egoiliarren arropa zaintzea, geletatik arropa zikina ateratzea eta gelak txukun edukitzea.

–Beste profesionalekin batera aritzea egoiliarren aisialdiko eta errehabilitazioko jardueretan.

–Egoiliarrek tokiz aldatu behar dutenean, behar diren gauza pertsonal guztiak prestatzea.

–Erizaintzako arduradunei aditzera ematea egoiliarrengan sumatzen dituzten zantzu edo sintoma ezohikoak.

–Egunero garbitzea logelak, pasabideak, galeriak eta gainerako gelak eta garbitzeko materiala, bukatu den tokietan, berriz ere paratzea.

–Jantokian janaria banatzea eta zerbitzatzea.

–Egunero garbitzea bainugelak eta komunak, elkarbizitzarako eta aisialdirako guneak, zaintza espezializatuko eta administrazioko eremuak, aldagelak, patioak, kapera, jantokia eta abar.

–Egoiliarren jantzi pertsonalak eta arropa zuria garbitu, lisatu eta banatzeko lanak egitea, jantzi pertsonala eta arropa zuria konpondu eta markatzea, eta garbitu, lehortu eta lisatzeko makinak maneiatzea, arropa eta erabilitako produktuak ahalik eta gehien zainduz.

–Erizaindegia nahiz egoiliar erien gelak arreta bereziaz garbitzea, arropa zikina egunero eramanez eta dena ongi antolatuta edukiz.

–Agintzen zaion eguneko lana arreta handiz egitea eta tresnak eta produktuak arduraz erabiltzea.

–Egoitzan edo geletan arrotzik sartzen bada, dagokion arduradunari horren berri ematea.

–Arduradunari aditzera ematea ikusitako akatsak edo gauza hautsien berri.

–Ontziak eta banatzeko tresnak garbitzen laguntzea sukaldariei.

–Jantokia prestatzea.

–Egoiliarrak, langileak eta, oro har, zentroan dauden pertsona guztiak behar den begiruneaz eta gizatasunaz tratatzea.

–Lanbide isilpekotasuna betetzea, aplikazio guztietan bete ere.

–Jakiak zahar etxean sartuz gero arduradunari adieraztea, are gehiago kanpoan prestatuak badira.

–Betiere, garbi eta txukun ibiliko dira, eta uniforme egokia jantziko dute.

–Lanposturako interesgarriak diren prestakuntza ikastaroetara joatea.

–Arduradunak agintzen dizkion gainerako eginkizunak, nahiz zehazturik ez egon, lanpostuarekin bat heldu badira.

Zangozan, 2015eko apirilaren 24an.

–Zahar etxearen aldetik: Stua.: Angel Navallas Etxarte.

–Langileen aldetik:

Iragarkiaren kodea: F1509560