1. NAFARROAKO FORU KOMUNITATEA
1.7. BESTELAKOAK
14/2015 EBAZPENA, ekainaren 10ekoa, Ekonomia, Ogasun, Industria eta Enplegu Departamentuko idazkari tekniko nagusiak emana, Nafarroako Zerga Ogasuna Erakunde Autonomoko zuzendari kudeatzailearen esku uzten duena bere eskumeneko gaiei lotutako ziurtagiriak luzatzeko ahalmena.
Nafarroako Foru Komunitateko Administrazioko idazkaritza tekniko nagusiak arautzeko Erregelamendua onesten duen otsailaren 21eko 29/2005 Foru Dekretuak idazkaritzen esku uzten du departamentuan dauden agiri eta datuen gainean fede emateko eta horien gaineko ziurtagiriak luzatzeko eskumena.
Ekonomia, Ogasun, Industria eta Enplegu Departamentuan Nafarroako Zerga Ogasuna Erakunde Autonomoaren eskumeneko gaiei buruzko ziurtagiriak egiteko eskaerak gero eta gehiago direnez, gomendagarria da ziurtatu beharreko datuak gordetzen dituen erakundeak berak eskumena edukitzea ziurtagiriak luzatzeko irailaren 24ko 88/2014 Foru Dekretuaren bidez erakunde horrek esleituta dituen gaiei buruz, aipatu Departamentuko idazkari tekniko nagusiak eskuordetuta.
Horrenbestez, Nafarroako Gobernuari eta Lehendakariari buruzko abenduaren 3ko 15/2004 Foru Legearen 36. artikuluan, uztailaren 25eko 4/2013 Foru Dekretuaren (Landa Garapeneko, Ingurumeneko eta Toki Administrazioko Departamentuaren egitura organikoa ezarri zuen) 5. artikuluari buruz xedatutakoaren ondorioz, adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 23. eta 49. artikuluek ematen dizkidaten eskudantziak erabiliz,
EBATZI DUT:
1. Ziurtagiriak luzatzeko ahalmena Nafarroako Zerga Ogasuna Erakunde Autonomoko zuzendari kudeatzailearen esku uztea, bere eskumeneko gaiei dagokienez.
2. Ebazpen hau Nafarroako Zerga Ogasuna Erakunde Autonomoari eta Ekonomia, Ogasun, Industria eta Enplegu Departamentuko Idazkaritza Tekniko Nagusiari igortzea, behar diren ondorioak izan ditzan.
3. Ebazpen hau Nafarroako Aldizkari Ofizialean argitaratzea, denek jakin dezaten.
Iruñean, 2015eko ekainaren 10ean.–Idazkari tekniko nagusia, Pedro Ugalde Zaratiegui.
Iragarkiaren kodea: F1509153
