Iragarkia

109. ALDIZKARIA - 2015eko ekainaren 8a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

SAKANAKO MANKOMUNITATEA

Sakanako Mankomunitateko lehendakariaren 334/2015 Ebazpena, 2015eko maiatzaren 25ekoa, errotuluak euskaraz jartzeko diru-laguntzen deialdia onartzen duena

2015eko maiatzaren 22an Euskara Batzordeak errotuluak euskaraz jartzeko diru-laguntzen espedientea onartzeko proposamena egin zion Sakanako Mankomunitateko lehendakariari.

Ikusirik errotuluak euskaraz jartzeko diru-laguntzen espedientea, eta kontuan izanik diru-laguntzak banatzeko lege-betebeharrak betetzen direla, eta kontu-hartzaileak eta idazkariak espedientea ontzat eman dutela,

EBATZI DUT:

Lehendabizikoa.–Errotuluak euskaraz jartzeko diru-laguntzen espedientea onestea.

Bigarrena.–1.500 euroko gastua onestea Euskara Zerbitzuko 2015ko ekitaldiko aurrekontuetako 4 451 48205 (Errotuluak-Diru-laguntzak) kontu-sailean jasotako kredituaren kontura.

Hirugarrena.–Oinarriak Sakanako Mankomunitateko webgunean jartzea, Nafarroako Aldizkari Ofizialean argitaratzea, hedabideetara prentsa-oharra bidaltzea, eta diru-laguntzaren hartzaile diren balizko onuradunei jakinarazpena igortzea.

Laugarrena.–Honen berri Sakanako Mankomunitateko kontu-hartzaileari ematea.

Egintza honen kontra honako errekurtso hauek aurkeztu ahalko dira:

–Berraztertzeko errekurtsoa, egintzaren organo egile beraren aurrean, ebazpena jakinarazi eta biharamunetik hasita hilabeteko epean.

–Gora jotzeko errekurtsoa, Nafarroako Administrazio Auzitegiaren aurrean ebazpena jakinarazi eta hurrengo hilabetearen barrenean.

–Administrazioarekiko auzi-errekurtsoa, bi hilabeteko epearen barrenean, hura jakinarazi eta biharamunetik aurrera, Administrazioarekiko Auzien Epaitegiaren aurrean.

Lakuntzan, 2015eko maiatzaren 25ean.–Sakanako Mankomunitateko lehendakaria, Aitor Karasatorre Mugurutza.

ERROTULUAK EUSKARAZ JARTZEKO
DIRU-LAGUNTZA DEIALDIA

Oinarriak

1. Oinarrien xedea eta objektua. Oinarri hauen xedea da Sakanako Mankomunitateak errotuluak euskaraz jartzen dituzten establezimendu komertzialei, ostalaritzakoei eta elkarteei diru-laguntzak emateko modua ezartzea.

2. Diru-laguntzaren gaiak eta kontzeptuak. Diruz lagunduko dira errotuluak, toldoak eta ibilgailu komertzialen errotulazioa.

3. Diru-laguntzaren zenbatekoa. Xede hauetarako, guztira, 500,00 euro erabiliko dira, Euskara Zerbitzuko 2015eko ekitaldiko aurrekontuetako 4 451 48205 (Errotuluetarako diru-laguntzak) partidan jasotako kredituaren kontura. Baimendutako gastua handitu edo murriztu ahal izango du aldaketaren zenbatekoaren arabera eskumena esleituta duen organoak. Dena den, horrek ez du beste deialdi bat egitea ekarriko.

Euskara hutsean idatzita dagoen errotulua jartzen duenari gastuaren % 50 ordainduko zaio. Gehienez 500 euro emanen zaizkio. Euskaraz eta erdaraz idatzita dagoen errotulua jartzen duenari %25 ordainduko zaio. Gehienez ere 250 euro. Betiere elebitasun pizgarriaren irizpidea erabili beharko du, alegia euskarazko testuak –tamainarengatik, tokiarengatik edo azpimarratuta egoteagatik– lehentasuna izanen du.

Aurrekontuetan gehienez ere aurreikusi den diru-esleipena, behar den epean eta behar den moduan aurkezten diren eskaeren artean zatituko da deialdiko baldintzak betetzen dituztenen artean, betiere diru-laguntzek deialdiari esleitu zaion diru-kopurua baino gehiago jotzen badute.

4. Deialdiaren publizitatea. Deialdi hau aditzera emateko, prentsa-oharra helaraziko zaie hedabideei, eta jakinarazpena igorriko zaie diru-laguntzaren hartzaile diren balizko onuradunei. Horretaz gain, deialdiaren testu osoa Sakanako Mankomunitatearen webgunean jarriko da eta Nafarroako Aldizkari Ofizialean argitaratuko da.

5. Eskabideak aurkezteko epea. Eskabideak aurkezteko epea 2015ko abenduaren 4ra artekoa izanen da.

6. Aurkeztu beharreko dokumentazioa. Eskatzaileek honako dokumentazioa aurkeztu beharko dute Sakanako Mankomunitateko erregistroan:

a) Eskabide ofiziala beteta.

b) IFKren fotokopia.

c) Fakturaren fotokopia.

d) Errotuluaren argazkia.

e) Aitorpena, administrazio publikoei edo entitate pribatuei eskatutako edo haiek emandako diru-laguntza guztiena. Adierazi beharko da eskaerak ebazteke edo ebatzita dauden; azkenengo kasu horretan, erantsiko da kontzesioari buruzko ebazpenaren kopia.

Hori dena zuzenean edo Herri Administrazioaren Araubide Juridikoaren eta Administrazio Prozedura Erkidearen azaroaren 26ko 30/1992 Legeak aurreikusitako beste prozeduraren bat erabiliz egin ahal izango da. Hona helbidea:

–Sakanako Mankomunitatea.

–Uriz, 32, 31830 Lakuntza.

–948 464840.

–euskara@sakana-mank.com.

7. Eskatzaileek bete beharreko baldintzak. Diru-laguntzak kartel edo elementu bakoitzari aplikatuko zaizkio.

Ez dute diru-laguntzarik hartuko bakarrik izen-abizenak edo toponimoak dituzten errotuluek ezta gaizki idatziak edo oker gramatikalak dituztenek.

Sakanako Mankomunitateak itzulpen eta aholkularitza zerbitzua eskainiko die doan errotulua euskaraz jarri nahi dutenei.

Eskatzaileak Sakanako Mankomunitatearekiko zerga betebeharrak ordainduta izatea ezinbestekoa da (mankomunitateak ofizioz egiaztatuko du inguruabar hori eta behar den eginbidearen bitartez jasoko).

8. Aurkeztutako eskabidean egindako okerrak zuzentzea. Eskatzaileak aurkeztutako dokumentazioan okerrik dagoela edo agiriren bat falta dela ikusten bada, hamar egun emango zaizkio eskatzaileari akatsak zuzentzeko edo agiriak osatzeko. Epe hori igaro eta akatsa zuzendu edo agiriak osatu ez badira, eskatzaileak eskaeran atzera egin duela ulertuko da. Sakanako Mankomunitateko lehendakariak horretarako ebazpena egingo du.

9. Ebazpena. Deialdi honetako diru-laguntzak esleitzeko ebazpena Sakanako Mankomunitateko lehendakariak emango du Euskara Batzordearen irizpena ikusita, hamabost eguneko epean. Ebazpen hori interesatu guztiei jakinaraziko zaie.

Ebazpenean nori eman zaion diru-laguntza zehaztu behar da, eta berariaz adierazi behar da gainerako eskaerak ezetsi direla. Era berean, ebazpenak adierazi beharko ditu haren aurka jotzeko dauden errekurtso bideak, zein organoren aurrean aurkeztu behar diren eta zein epe dagoen hori egiteko, interesatuek egoki iritzitako beste edozein errekurtso bide erabiltzeko eskubidea baztertu gabe.

Ebazpena eman eta ordaintzeko epea lau hilabetekoa da, gehienez ere. Diru-laguntza eman eta ordainketa agintzeko ebazpena emateko epea 2015ko abenduaren 31n amaituko da. Behin epe hori berariazko ebazpenik eman gabe igaro eta gero, eskatzaileak eskaera ezetsitzat jotzen ahalko du.

10. Diru-laguntzaren ordainketa. Diru-laguntzak ordainketa bakarrean pagatuko dira. Banku transferentzia eginen da eskatzaileek adierazitako kontu korrontearen zenbakian.

11. Bateragarritasuna. Deialdi honetako diru-laguntzak bateragarriak dira beste erakunde publiko zein pribatuk helburu berberaz emandakoekin, betiere gehiegizko finantzaketarik gertatzen ez bada.

12. Diru-laguntzen itzulketa. Onuradunek diru-laguntza osoa edo zati bat itzuli beharko dute ondotik azaltzen direnak gertatzen direnean:

a) Diru-laguntza eskuratzea horretarako eskatzen diren baldintzak bete gabe, onuradunari egozten ahal zaizkion arrazoiengatik.

b) Eskatzen diren agiriak ez aurkeztea horretarako ezarritako epean.

c) Bateraezinak diren diru-laguntzak aldi berean jasotzea.

d) Nahitaez onartu behar diren egiaztapenak ez onartzea edo oztopatzea.

13. Arau-hauste eta zehapenak. Arau-hauste eta zehapenei dagokienez, Diru Laguntzei buruzko azaroaren 17ko 38/2003 Lege Orokorrak eta uztailaren 21eko 887/2006 Errege Dekretuaren bidez onartutako Diru Laguntzen Araudi Orokorrak aginduko dute. Zehapen prozedura Nafarroako Foru Komunitateko Administrazioari buruzko abenduaren 3ko 15/2004 Foru Legeko V. tituluan ezarritakoa izanen da.

14. Datuen babesa. Eskatzaileen datuak Datuak babesteari buruzko abenduaren 13ko 15/1999 Lege Organikoan ezarritakoaren arabera tratatuko dira. Eskatzaileek ematen dituzten datuak Sakanako Mankomunitateak kudeatzen dituen datu pertsonalen fitxategietan sartuko dira. Betiere helburua izango da diru-laguntzen deialdi hau eta horrekin zerikusia duen beste edozein administrazio espediente kudeatzea. Fitxategi horren arduraduna Sakanako Mankomunitateko Euskara Zerbitzua izango da, eta sartu, zuzendu, ezereztu eta aurka egiteko eskubideak Sakanako Mankomunitatea duen jendearendako harrera bulegoan (Lakuntzan, Uriz 32) egikaritu ahal izango dira.

15. Ordezko arauak. Deialdi honetan aurreikusten ez den orotarako Administrazioari buruzko uztailaren 2ko 6/1990 Foru Legea eta Diru-laguntzei buruzko azaroaren 17ko 38/2003 Legea aplikatuko dira.

16. Errekurtsoak. Deialdi honen aurka, baita oinarri hauen aurka eta haiek betearazteko hartzen diren ebazpenen aurka ere, errekurtso hauetako edozein aurkeztu ahal izango da, aukeran:

a) Berraztertzeko errekurtsoa, egintzaren organo egileari zuzendua, hilabeteko epean, errekurritzen den egintza jakinarazi edo argitaratu eta biharamunetik hasita.

b) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritzen den egintza jakinarazi edo argitaratzen denetik aitzina.

c) Administrazioarekiko auzi-errekurtsoa, Administrazioarekiko Auzien Epaitegiari zuzendua, bi hilabeteko epean. Errekurritzen den egintza jakinarazi edo argitaratu eta biharamunean hasiko da epe hori.

ERROTULUAK EUSKARAZ JARTZEKO
DIRU-LAGUNTZA DEIALDIA

Eskabidea

Eskatzailearen datuak:

–Eskatzailearen izen-abizenak:

–Eskatzailearen NAN:

–Elkartearen edo establezimenduaren izena:

–Elkartearen edo establezimenduaren IFZ:

–Helbidea:

–Posta kodea:

–Herria:

–Telefonoa:

–E-posta:

–Kontu korrontearen zenbakia:

Gastuak guztira: ........................... euro

Data eta sinadura

Jakinarazten dizugu zure datuak fitxategi batean sartuko direla Datu Pertsonalak Babesteko abenduaren13ko 15/1999 Lege Organikoak ezarritakoa betetzeko. Betiere, horren helburua izango da diru-laguntzen deialdi hau eta horrekin zerikusia duen beste edozein administrazio espediente kudeatzea. Fitxategi horren arduraduna Sakanako Mankomunitateko Euskara Zerbitzua da, eta sartu, zuzendu, ezereztu eta aurka egiteko zure eskubideak horren aurrean egikaritu ahal izango dituzu, eta horretarako jo beharko duzu NANarekin Sakanako Mankomunitateak jendearendako harrera bulegora (Lakuntzan, Uriz 32).

ERROTULUAK EUSKARAZ JARTZEKO
DIRU-LAGUNTZA DEIALDIA

Zinpeko aitorpena

Eskatzaileak hau aitortzen du:

 Ez dagoela sartuta diru-laguntza publikoak itzularazteko edo zigortzeko inongo prozeduratan.

 Laguntza eskabide honetaz landa ez duela helburu bererako beste laguntzarik eskatu edo jaso, beste inongo erakunde publiko nahiz pribatuk emana.

 Diru-laguntza eskatu diela beheko erakunde hauei:

 Helburu bererako edozein erakunde publiko nahiz pribaturi diru-laguntza eskabiderik eginez gero, Sakanako Mankomunitateari jakinarazteko konpromisoa hartzen duela bere gain.

Eta, hala ager dadin, izenpetu egiten du.

(Data eta sinadura)

Iragarkiaren kodea: L1508014