Iragarkia

94. ALDIZKARIA - 2014ko maiatzaren 16a

1. NAFARROAKO FORU KOMUNITATEA

1.7. BESTELAKOAK

184/2014 EBAZPENA, maiatzaren 6koa, Toki Administrazioko zuzendari nagusiak emana, ondoko proiektua eta ukitutako ondasun eta eskubideen zerrenda behin betiko onesten dituena: “Errezuko hoditeria nagusiaren berrikuntza partziala. 1. fasea”.

Toki Administrazioko zuzendari nagusiaren abenduaren 18ko 790/2013 Ebazpenaren bidez, jendaurrean jarri zen hamabost egunez bai proiektua bai ukitutako ondasun eta eskubideen zerrenda.

Jendaurreko aldi horretan alegazio batzuk aurkeztu ziren, eta horietako baten bat onartzeak proiektua aldatzea ekarri zuen. Horren ondorioz, proiektuak hobekuntza teknikoa du eta hasieran ukitutako finka batzuk orain ukipen txikiago dute. Aldaketa horrek beste batzuk ukitzea ekarri du, baita finka batzuk desafektatzea ere.

Horiek horrela, proiektuaren aldaketek ukitutako jabe guztiei jakinarazi zaie gorabehera hori, egokitzat jotzen dituzten alegazioak aurkezteko hamabost eguneko epean.

Epe horietan zenbait alegazio jaso dira, eta, Izarbeibarko Mankomunitateko zerbitzu teknikoek horiei erantzuna emateko, behar diren txostenak igorri dira, espedientean ageri direnak. Hona hemen laburpena:

1.–Anastasio Azanza Urra jaunak honako hau alegatzen du:

Irurreko (Gesalatz) 2. poligonoko 3135. lurzatiaren jabea dela, eta eskatzen du bere lurzatiko trazadura alda dadila, eta ondoko lursailarekiko (landugabea) mugara desbideratzeko, olibadiko kaltea txikitzeko.

Aurkeztutako alegazioa ez da onartzen, izan ere hodirako aurreikusitako trazadura inguruneko egonkorrena da geoteknikoki. Horregatik, beste trazadura batek hoditeria arriskuan jarriko luke, ezegonkortasun geoteknikoarengatik eta ondoko lurretako malda handiarengatik.

Nolanahi ere, obra zuinkatzeko fasean, ahalik eta kalte txikiena eginen zaie finkako olibondoei, eta obrak egiteko behar-beharrezkoak direnak bakarrik ukituko dira.

2.–Antonino Baigorri Azanza jaunak honako hau alegatzen du:

Gesalaz ibarreko 16. poligonoko 9. lurzatiaren jabea dela, eta eskatzen du bere finka gurutzatzen duen ur hornidurako hodiaren kokapena alda dadila. Proposatzen du Gesalazko 16. poligonoko 11. lurzatiko mugatik hurbilago paratzeko.

Alegazioari erantzunez, adierazten da ikuspuntu teknikotik ez dela komeni hodiaren trazadura Gesalazko 16. poligonoko 11. lurzatira hurbiltzea, izan ere hala eginez gero hodian ukondoak sartu beharko lirateke, eta hori saihestu nahi da, hodiko ur galerarik ez izateko eta exekuzioa ez garestitzeko.

Halaber, eskatutako trazadura aldaketa egiteko, hodia gehiegi hurbilduko litzateke urtegiko urak har dezakeen eremura eta Ur Jabari Publikora, eta Ebroko Ur Konfederazioak aldaketari uko egiten ahal dio.

Proiektuari hobekuntza teknikorik ez ekartzeaz gain, alegazio hau onartzeak berarekin ekarriko luke hirugarrenen jabetzak gehiago ukitzea.

Horiek horrela, ezetsi egin da alegazioa.

3.–Angélica Lesaca Lizarraga mojak, Allozko Zistertarrak ordezkatuz, honako hau alegatzen du:

Zistertarrak dauden gunea zingira-lurra dela, lurpea ezegonkorra duena, eta makinen pisuak, maiz, hodiak hausten dituela. Deierriko 6. poligonoko 415. lurzatia (Allotz), ibaiak gora egiten duenean edo euria azkar egiten duenean, putzuz betetzen da, eta ez da aise lehortzen. Gainera, pareta botatzea eta, sartzeko eta ateratzeko, makinak dauden tokiaz bestaldeko atea erabiltzeak ez ditu hausturak saihestuko. Horregatik, eskatzen dute hodia 925. lurzatitik igaro dadila.

Alegazioari erantzunez, adierazten da proposatutako trazadura ezin dela teknikoki onartu, zeren pieza berezi gehiago eskatuko bailituzke, eta horrek hodiaren ur galerak eta obra gauzatzeko kostuak handituko lituzke.

Orobat, ingurumeneko ukipena handituko luke, Deierriko 6. poligonoko 361. lurzatiko zuhaiztian.

Proiektuari hobekuntza teknikorik ez ekartzeaz gain, alegazio hau onartzeak berarekin ekarriko luke orain proiektuak ukitzen ez dituen finkak ukitzea.

Horiek horrela, ezetsi egin da alegazioa.

4.–Ana Elisa Gorena Nicuesa andrea, Muezko Kontzejua ordezkatuz, alegatzen du:

Kontzejuarentzat diru-sarrerarik handiena makalen egurra saltzea dela, eta landaketak galtzeagatik ordain ekonomikoa emanda egindako inbertsioa ez dela galduko, baina bai etorkizuneko diru-sarrerak. Deskribatzen du zein diren ukitutako lurzatiak eta makalen landaketa urtea.

Orobat, M.ª Vicenta Goñi Azanza andreak, Gesalazko Udaleko alkateak, honako hau alegatzen du:

Hodi berriak Gesalazko kiroldegiko udal lurzatia ukitzen du; sarbidea eta aparkalekuko zuhaitzak ukitzen dira. Horregatik, trazadura aldatzeko eskatzen dute. Orobat, eskatzen dute bermatu dadila herritarrak udal kiroldegian sartzeko bidea, iraunkorki, ekainaren 1etik irailaren 15era.

Gesalazko ibarreko Udalak eta Muezko Kontzejuak aurkeztutako alegazioak azterturik, hasierako aukeraren ordezko bat aurkitu da, proiektuari hobekuntza tekniko nabarmenak ekarriko dizkiona:

–Trazadura berriarekin, ez litzateke beharrezkoa izanen hodia bide asfaltatu baten azpitik eramatea, hain zuzen ere 158 metroko bide baten azpitik, zeina gero lehengoratu beharko bailitzateke. Hortaz, lortuko litzateke bide horren erabiltzaileei eragozpenak txikitzea (tarte horretan hoditeria paratu bitartean bidea itxirik izanen lukete), baita dirua aurreztea ere, bidea lehengoratu beharko ez litzateelako.

–Trazadura berriak ukondo gutxiago eskatuko lituzke hoditerian, eta, horrela, karga-galera gutxiago eta exekuzio kostu txikiagoa izanen lirateke.

–Trazadura berrian ez da zerbitzuekin gurutzaketarik egin beharrik. Hasierako trazaduran hustubideekin gurutzaketak egin behar ziren kiroldegiko ingurunean, eta horrek obrak zailtzen zituen.

–Trazadura berrian obrak agudoago gauzatuko dira, izan ere landan eginen dira, eta obra-lekuetarako sarbide hobea izanen dute langileek eta makinek.

Aipatutako hobekuntza teknikoez gain, Gesalazko ibarko Udalak aipatutako zuhaitzak ez dira bota behar, eta kiroldegirako sarbidea bermatzen da urteko edozein sasoitan.

Aldaketa horrek berarekin dakar Gesalazko 8. poligonoko 235. eta 239. lurzatiak desafektatzea.

Bestalde, ez da onartzen Muezko Kontzejuak aurkeztutako alegazioa, Gesalazko 8. poligonoko 224. eta 213. lurzatiak ukitzeari buruzkoa, baina ahalik eta makal gutxien ukituko dira obrak egitean, eta, obra bukaturik, lurzatia erabiltzeko muga hau bakarrik izanen da: ezin izanen da zuhaitzik landatu hodiko ardatzetik 1,5 metro baino hurbilago.

Makalen landaketaren esparrua dela eta, zortasun honek ez du garrantziarik lurzatia egur ustiapen gisa erabiltzeko, zeren sortuko den zortasun zerrendari egokitzen ahalko zaio esparrua.

Obra bukatutakoan, obran botatako makalak birlanda ditzake kontzejuak, eta, oraingo landaketak urtebete bakarrik duenez, makal berriek oraingoen tamaina bera izanen dute beren zikloaren bukaeran.

Gesalazko 8. poligonoko 235. eta 239. lurzatietako makalen ukipenei buruz aurkeztu den alegazioa onartzen da, zeren, Gesalazko Udalarekin eta Muezko Kontzejuarekin adostutako trazadura aldaketarekin, obrek ez dituzte ukituko.

Ez da kontuan hartzen Gesalazko 8. poligonoko 377. eta 415. lurzatietako zuhaiztien ukipenari buruzko alegazioa, zeren hodia igarotzen den tokietan landaretza naturala da, eta ez merkataritza-ustiapena. Horrenbestez, Ingurumen eraginaren azterlanean agertzen den bezala, obrek ukitutako zuhaitz espezieak birlandatuko dira.

5.–Alfredo Buldain Goñi jaunak, Errezuko kontzejuburuak, honako hau alegatzen du:

Gesalaz ibarra hornitzen duen ponpaketaren kokapen berriak, Ubaguaren iturrira doan bideko sarreran, ibilbide turistiko bat kaltetuko luke, paisaiaren eta ingurumenaren aldetik balio handikoa. Horregatik, eskatzen dute ponpaketa estazioaren kokapena alda dadila.

Aurkeztutako alegazioa ikusirik, eta aipatutako paisaiako kaltea saihesteko, aldaketa egin da proiektuan: Gesalazko ibarrerako ponpaketako etxola ezabatu da, eta ponpaketaren oraingo kokapena mantendu da, Ubagua ibaiko eskuineko bazterreko etxola lurperatuan.

Errezu hornitzeko ponpaketa berria Udalaren jabegoko gune batean ezarriko da, Monte Primero kalean (Deierriko 1. poligonoko 39. lurzatia).

Errezuko Kontzejuarekin adostu da konponbide hau, eta ez dakar obra garestitzea.

Aldaketa horrek berarekin dakar Errezuko 2. poligonoko 116. lurzatia (Deierri) desafektatzea.

6.–M.ª Jesús Ochoa de Zabalegui Hermoso de Mendoza andreak honako hau alegatzen du:

Gesalazko 8. poligonoko 423. lurzatiaren jabea da, eta ur hodia handik igaroko da. Hartan bada hodi bat, lurzatia gurutzatzen duena, mantendu beharra dena, eta, obrek ukituko dutenez, uste dute beharrezkoa dela lehengoratzea edo berritzea. Orobat, eskatzen du hodia lehengoratu behar denean abisatua izan dadila.

Adierazten den alegazioari erantzunez, azaltzen da proiektuan jadanik jaso dela oraingo hodiak lehengoratuko direla, obrak ukitutako tarteetan. Lanak bere finkan hasterakoan, jabeari abisatuko zaio.

Bestalde, aurkeztutako alegazioen ondorioz haren finkako trazaduraren aldaketaren berri jakinarazi zaio, eta adierazten du onartzen duela trazadura berria, baina nahi du idatziz jaso dadila lehengoratu edo berrituko eginen dela.

Lehenbiziko alegazioari erantzunez 2014ko martxoan azaldu zitzaion bezala, proiektuan jadanik jaso da oraingo hodiak lehengoratuko direla, obrak ukitutako tarteetan.

Behin obrak bukaturik, lanak hasi aurretik bezalako zerbitzu egoeran geldituko dira hodi horiek.

Ez da onartzen alegatzaileak eskatutako baldintzetan hartzea konpromisoa.

7.–María Eguren Lezaun andreak honako hau alegatzen du:

Irurreko (Gesalatz) 2. poligonoko 3016. lurzatiaren jabea dela, eta eskatzen du finkako mutur batean aurreikusirik dagoen hustubide kutxeta ken dadila.

Onartzen da aurkeztutako alegazioa. Kutxeta lurzatiko hegoaldeko mugara mugituko da.

8.–M.ª Carmen Yániz Urra andreak honako hau alegatzen du:

Lerateko (Gesalatz) 3. poligonoko 180. lurzatia ez dela ageri proiektuak ukitutakoen artean, eta, hodiaren trazadura ikusirik, ukipenen bat izan beharko luke. Halaber, adierazten du Lerateko 3. poligonoko 256. lurzatia ukituko litzatekeela, haren erdian kutxeta bat jarriko bailitzateke. Eta eskatzen du lurzatiko bazter batera eraman dadila. Orobat, adierazten du balorazioan ez dela kontuan hartu lurzatiak hiri lurzorutik hurbil daudela.

Azkenik, eransten du ezen, linea berria abian jartzeak berarekin baldin badakar bi zaharrak kentzea, hots, Allozko urtegiko bestaldeko bazterretik doazenak, bada, oraingo kutxetak eta etxolak kendu egin beharko liratekeela.

Alegazioari erantzunez, adierazten da aurkeztutako alegazioaren alderdi hauek ez direla aintzat hartzen:

–Lerateko (Gesalatz) 3. poligonoko 180. lurzatiaren ukipenari buruz, azaltzen da hodia jabari publikoko eremu batetik igarotzen dela oso-osorik, NA-7171 errepideko eremu batetik, hain zuzen, Lerateko 3. poligonoko 182. lurzatiraino. Hortaz, salbu katastroko akatsik bada, eta mugaketa bidez frogatzen ahal bada, 3. poligonoko 180. lurzatia ez dute obrek ukituko.

–Allozko urtegiko eskuineko bazterreko finketan dauden kutxetak eraisteari dagokionez (Izarbeibarrko eta Santa Cruzeko hodiei zerbitzu ematen diete), adierazten da hodi horiek zerbitzu ematen mantendu behar direla obra hauek bukatu arte, izan daitezkeen gorabeherei aurrea hartzeko.

Bestalde, Lerateko 3. poligonoko 256. lurzatian aurreikusitako hustubide kutxetari dagokionez, azaltzen da indarreko Errepideei buruzko Legeak ahalbidetu bezainbeste hurbilduko zaiola NA-7171 errepideari (lege horren arabera, erregistroak zelaitutako guneko kanpoko ertzetik 5 metrora –jabari publikoa– ezarriko dira hurbilenez).

Bukatzeko, ukitutako ondasun eta eskubideen balorazioari dagokionez, indarreko legediarekin bat egin beharko da. Gainera, Nahitaezko Desjabetzeari buruzko 1954ko abenduaren 16ko Legearen 52.7 artikuluarekin bat, finka okupatuta, desjabetze espedientea tramitatuko da, prezio justuaren eta ordainketaren faseetan.

9.–José Manuel Andueza Unanua jaunak, Miguel Unanua Munárriz jauna ordezkatuz, Muezko (Gesalatz) 8. poligonoko 376. lurzatiaren jabea baita, honako hau alegatzen du:

Aurreikusia dagoela bere lurzatian kutxeta bat ezartzea, sarbidea oztopatuko duena, baita lanabesekin aritzea ere. Eskatzen du kutxeta hori tokiz aldatu dadila, Muezko (Gesalatz) 8. poligonoko 377. herri lurzatira.

Ez da aurkeztutako alegazioa onartzen, zeren eskaera horrek ez lioke proiektu honi hobekuntza teknikorik ekarriko, eta, gainera, hirugarrenen jabetzako finken ukipenak handituko lituzke. Nolanahi ere, aurreikusitako egitura ezartzeko, finkarako sarbideak aztertuko dira eta horiek oztopatzea saihestuko.

10.–Carlos Remírez de Ganuza Ros jaunak honako hau alegatzen du:

Errezuko (Deierri) 1. poligonoko 167. lurzatiko intxaurrondoei dagokienez, eskatzen dute intxaurrondo ilara bat ez dadila erauzi, eta oraingo kaleko erdigunean aritu daitezela lanean, eta intxaurrondo horiek inausteko konpromisoa hartzen dute. Ukipenen ordainketarako, kontuan har dadila ezen, bi ilarak erditik inausita, ondorioa intxaurrondoa botatzea bezala izanen litzatekeela. Orobat, eskatzen dute kontuan har dadila lurpean badirela ureztaketa hodiak, obren ondoren orain bezala utzi beharrekoak, eta finkako beheko aldetik telefono linea bat igarotzen dela.

Bestalde, Errezuko (Deierri) 1. poligonoko 166. lurzatiko ukipenei dagokienez, adierazten dute negu honetan landatu direla intxaurrondoak, eta proiektuan ez da halakorik kontuan hartu, eta eskatzen dute landatu berri diren intxaurrondoak ez kaltetzeko moduan plantea daitezela obrak. Eskatzen dute kontuan har dadila bidean barna ureztaketa hodi bat doala, 167. lurzatiko oraingo sarearekin lotura egiten duena. Orobat, adierazten dute prest legokeela, Mankomunitateari inolako kosturik eragin gabe, bere azpilurzatia uztera lurrak pilatzeko.

Bukatzeko, Errezuko (Deierri) 2. poligonoko 180. lurzatiko makaldian izanen diren ukipenei dagokienez, eskatzen dute oraingo bidexkatik joan dadila hodia.

Aurkeztutako alegazioa onartzen da, honako hauek aintzat harturik:

1. poligonoko 166. lurzatiari dagokionez, obrak gauzatzean kontuan hartuko da arestian azaldutakoa, landaketa berria ez kaltetzeko.

1. poligonoko 167. lurzatiari dagokionez, uste da alegatzaileek planteatzen duten inausketarekin teknikoki posible dela obra egitea intxaurrondoen ilara oso bat erauzi gabe eta obra bera garestitu gabe.

Kontuan hartuko da urezketako lurpeko sareei buruz eta telefonoko lineari buruz aipatutakoa, horiek ez hausteko. Nolanahi ere, hodiren bat hausten bada nahi gabe, behar bezala konponduko da.

Intxaurrondoen balorazioari dagokionez, onartzen da kalte-ordainerako proposatutako irizpidea.

Deierriko 2. poligonoko 180. lurzatiari dagokionez, saiakera eginen da hodia oraingo bidexkan barna igaro dadin, teknikoki ahal den neurrian eta obra garestitzen ez bada.

11.–Victorino Navarcorena Zubeldía jaunak honako hau alegatzen du:

Proiektuak Leraten (Gesalatz) dituen 3. poligonoko 28. eta 171. lurzatiak ukitzen dituela, azalean kutxeta bana dutela, eta eskatzen du 171. lurzatiaren kasuan kutxeta tokiz alda dadila, C azpilurzatira, eta 28. lurzatiaren kasuan ahalik eta gehien hurbil dadila ezpondara.

Alegazioari erantzunez, adierazten da Lerateko (Gesalatz) 3. poligonoko 28. lurzatiko D-17 hustubideko kutxeta bide publikotik hiru metrora hurbilduko dela, bideko kanpoko ertzetik, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 112.2 artikuluan ezarritakoa betez. Distantzia hori aplikatuko da, salbu Landa Garapeneko, Ingurumeneko eta Toki Administrazioko Departamentuak adierazitakoa baino hurbilago ezartzea baimentzen badu.

Lerateko 3. poligonoko 171. lurzatian kokatutako bentosa kutxetari dagokionez, C azpilurzatira (larreak) mugituko da, A azpilurzatian (lehorreko alorra) jarri ordez.

12.–M.ª Ángeles Andueza Eguillor andreak honako hau alegatzen du:

Proiektuak Muetzen (Gesalatz) jabetzan duen 8. poligonoko 421. lurzatia ukitzen duela, 4 metro karratuko kutxeta bat duena, eta eskatzen dute kutxeta hori 420. lurzatira mugi dadila, zeren kontuan izanik finken tamaina, kaltea txikiagoa izanen litzateke.

Ez da alegazioa onartzen, hustubideak hodiko punturik baxuenean jartzen baitira, eta puntu hori 8. poligonoko 421. lurzatian baitago. Alegazio hori onartzeak ekarriko luke hirugarrenen lurzatietan ukipenak handitzea, horretarako oinarri teknikorik izan gabe.

Hala ere, finkako nekazaritza lanak ahalik eta gehien errazteko, eta teknikoki egiten ahal zenez, erregistroa finkako bazter batera eraman zen. Jabea proiektuak proposatutako kokapenarekin konforme ez badago, erregistroa berriz ere hasierako puntu baxuan jar daiteke, eragozpenik gabe.

Horrenbestez, Nahitaezko Desjabetzeari buruzko Legearen 20. artikuluan xedatutakoari jarraikiz, eta Landa Garapeneko, Ingurumeneko eta Toki Administrazioko Departamentuaren egitura organikoa ezartzen duen uztailaren 25eko 70/2012 Foru Dekretuak esleitu dizkidan eskudantziak erabiliz,

EBATZI DUT:

1. Ondoko proiektua eta ukitutako ondasun eta eskubideen zerrenda behin betiko onestea: “Errezuko hoditeria nagusiaren berrikuntza partziala. 1. fasea”. Orobat, aurkeztutako alegazioak ebazpen honen azalpen zatian adierazi bezala ebaztea.

2. Muezko (Gesalatz) 8. poligonoko 235. eta 239. lurzatiak eta Errezuko (Deierri) 2. poligonoko 116. lurzatia proiektutik desafektatzea, eta jendaurreko aldian egindako jarduketak indarrik gabe uztea.

3. Ebazpen hau, ukitutako ondasun eta eskubideen behin betiko zerrendarekin batera, argitaratzea Nafarroako Aldizkari Ofizialean eta Deierriko, Gesalazko eta Ziraukiko udaletxeetako iragarki oholetan, bai eta Izarbeibarko Mankomunitateko iragarki oholean ere. Orobat, iragarki bat argitaratuko da Foru Komunitateko egunkari batean.

4. Ebazpen hau Deierriko, Gesalazko eta Ziraukiko udalei, Izarbeibarko Mankomunitateari eta alegatzaileei jakinaraziko zaie. Horrekin batera, ohartarazten zaie administrazio publikoek ez beste interesdun guztiek gora jotzeko errekurtsoa jar dezaketela, Landa Garapeneko, Ingurumeneko eta Toki Administrazioko kontseilariari zuzendua, honako hau jakinarazi eta biharamunetik hilabeteko epean. Administrazio publikoek, berriz, administrazioarekiko auzi-errekurtsoa jar dezakete, Nafarroako Auzitegi Nagusiko Administrazioarekiko Auzien Salari zuzendua, jakinarazi eta biharamunetik bi hilabeteko epean, deusetan galarazi gabe horren aurretik Nafarroako Gobernuaren aurrean errekerimendua egitea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epeetan.

Iruñean, 2014ko maiatzaren 6an.–Toki Administrazioko zuzendari nagusia, Francisco Pérez Arregui.

Iragarkiaren kodea: F1406514